Monthly Archives: February 2020

মিৎকাপ চা—অনন্ত কুমার সরেন (অতেত্)

সৃজন অফিসখন রুওয়াড় তরাগে সুমিতায় মেতাদেয়া, ‘এগো, মিৎকাপ চা বেনাও গৎআঞ মেসে ।’
সুমিতা চেৎহঁ বায় রড় আদা। মিৎ মনেতে সোফারে দুড়ুব্ কাতে, টিভিরে সিরিয়াল এ ঞেল এদা। টিভিসেৎগেয় কয়ঃ আকাদা।
সৃজন মনেকেদায়, আয়াঃ কাথা জানিচ্ বায় আঁজম আকাদা। অনাতে আরহঁয় লাইকেদা, ‘উকুর মিৎকাপ চা’ঞ কয়কেৎ মেদ? ‘
‘অফিসখন রুওয়াড় সাঁওতে, মিৎকাপ চা বেনাওগৎ আয়মে হুঁঃ -স্টেশনরে মিৎকাপ চা কিরিঞ কাতে বাম ঞু দাড়েয়াদা? সে কিরিঞ কাতে চা ঞুরেয়াঃ টাকা বাং তাঁহেকান তামা পকেট্ রে? ‘চাচারহাৎ সাঁহিচ্ এ লাইকেদা সুমিতা।
স্টেশনরেয়াঃ চা আর আপনার এরাআঃতিতে বেনাও চা মিৎ হোয়এনা? আঁজমকাতে হাহাড়াঃ এনায় সৃজন। আডিদিন থনাঃ ঞেল এদায়, সুমিতা যাঁহানাঃ মেতায় খান, চাচারহাৎ সাঁহিচ্ এ রড় কানা। চেদাঃ? অনাদ বায় বুঝাও দাড়েয়াঃ কানা। উনিত ভাগে ভাবতে লাই দাড়েকেয়ায়, মিৎঘাড়িচ্ জিরাঃমে, তায়মতিঞ চা আমকানা। মেনখান –ধুর্ চা ঞুরেয়াঃ ইচ্ছাগে চাবায়েনা। মিৎঘাড়িচ্ তায়ম সৃজন পাজামা পাঞ্জাবি হরঃ কেদায়। মিৎধাও সুমিতাসেৎ কয়ঃকেদায়,।ঞেলেয়ায় টিভি পর্দাসেৎগেয় কয়ঃ আকাদা। সৃজন বাইবাইতে অড়াঃখনে ওডোক্ এনা। অড়াঃখন ওডোক্ কাতে ছাটকারেগে লাল্টুসালাঃ ঞাপাম হোয় এনা। লাল্টুদ সৃজনরেন গিদরা। দশার চানাচ্ রেয় পাড়হাঃকানা। গাতেকসালাঃ খেলকাতে, অড়াঃএ রুওয়াড়কানা। সৃজনাঃ ডাঁডারে হাড়ুব্ কাতে আডি রাস্কা সালাঃ লাইকেদায়, ‘বাডায়াম বাবা, তেহেঞ পেয়া ছক্কাঞ দাল আকাদা আর বিল্টু,সঞ্জু,বাবুন তাকঞ আউট্ আকাদ্ কআ। ‘
লাল্টু ক্রিকেট খেল আডিয় কুশিয়াঃআ। টিভিরো খেল ঞেলঞেলতে, ক্রিকেট চেতান দুলাড় সিরজাও আকাদেয়া। অনাতে মাজান আকানসে দিনাম খেল এ চালাঃগেয়া। সৃজন এ থির আকানগেতে লাল্টু লাই কেদায়, ‘বাবা, চেৎহঁ বাম লাইএৎদ? ‘
‘অ-হেঁ হেঁ, আডি নাপায়। ‘সৃজন এ লাইকেদা। লাইহোয়োঃআ, অনাতেয় লাইকেদা। মেনখান, রড়রে রাস্কা উনাঃ বাং সদর লেনা। চেদাঃসে, মনেরে রাস্কা গে বানুঃ। তাঁহেনা চিকাতে? যাঁহারে মিৎকাপ চা খাতির তেহেঞ —
লাল্টুআঃ তি সাব্ কাতে, মেতাদেয়ায়, ‘বেটা, দো তি-জাঁগা আরুব্ কাতে পাড়হাঃ দুড়ুব্ মে হোয়সে? ‘
–‘চল আমহঁ অঙ্ক লাইআঞমে।
–‘দো পাড়হাও হাতাড়ঃমে, নিৎগিঞ রুওয়াড় হিজুঃ কানা। ‘
–‘নেঃ এ ত অফিস্ খনেম হেচ্ এনা, আরহঁ অকাতেম চালাঃকানা বাবা? বাংসে বাঞ চালাও হচআমা।,চল রুওয়াড় মে। ‘
–এঙ্গাতে, মেতায় কানাঞ — দো অড়াঃ বলনমে। ‘নংকা মেনকাতে, ঢেকাগৎ কাদেয়ায়। লাল্টু আদ চেৎহঁ বাং লাইকাতে, হেঁজঃবেঁজঃ অড়াঃএ বলয়েনা।
নিতোঃ অকাসেৎ এ চালাঃআ? দোকানসেৎ চা ঞু সে, ক্লাবসেৎ এ চালাঃআ? ভাবিত্ এনায় সৃজন। ধুর্, চা কয়কাতে যেখন বাং ঞামলেনা, তেহেঞদ আদ চাগে বায় ঞুয়া। ‘মনেমনে তেয় লাইকেদা সৃজন। অনাতে, ক্লাবসেৎগেয় মঁহডায়েনা।
সৃজনদ রেলরে চাকরীয়ায়।অফিস্ দ কোলকাতা রেয়াঃ ফেয়ারলি প্লেসরে। তাঁহেনায় উত্তরপাড়ারে। তাড়াম তাড়ামতেয় উইহার এদা, লাল্টুসালাঃ অনকা বাং ব্যওহার লেখানগে বোগেকঃআ। লাল্টুআঃ উনঅক্তরেনাঃ হেঁজঃবেঁজঃ মুখান, আয়াঃ মেঁৎ সামাংরে ঝালকাও গৎএনা। সৃজন আডি দুক্ এ বুঝাও কেদা। লগন রুওয়াড় হেচ্ কাতে, কাটিচ্ আদর টাদর কাতে দুকে হিড়িঞ হচয়েয়া। উইহার কেদায় সৃজন।

রমঝম ক্লাব। আডি সেরমা মাড়াং নআ উত্তরপাড়ারে হেচ্ লেন চাকরি য়ান কড়াক জুমিৎকাতে, নআ ক্লাব দক তেয়ারলেদা। জস্ দ তাঁহেকানা, ‘সান্তাড়ি পাথাম ‘উছান। অনাতায়ম ‘গায়ান অপেরা ‘হঁ বেরেৎ আকানা। নঁডে দিনামগে আয়ুব্ অক্ত আয়মা হড়ক জাওরাঃআ। যাঁহায়কআঃ অফিস্ সাঁগিঞরে, ওনকো রুওয়াড় তেক বিলম লেনখান, অড়াঃ বাংসেনকাতে সোঝে নঁডেক হিজুঃআ। আর আড্ডা বাড়াকাতে অড়াঃক সেনঃআ। অবিশ্য সৃজন দিনামদ বাং, যাঁহাতিস্ করেয় হিজুঃআ। তেহেঞহঁয় হেচ্ কঃ চং বংচং, মনেক বাড়িচ্ এনতায়তেয় হেচ্এনা। ঞেল কওআয়, আয়মাহড়গেক হেচ্ আকানা। নোকো মুদ্ রে আদমকদ হারমোনিয়াম, তিরয়ো, বালাম আতেক সেরেঞ এদা। আদমকদ তাসক খেলকানা। আর আদমকদ নিছক্ দুড়ুব্ আকানতেক গালমারাও এৎকানা। সৃজন বাইবাইতে বলকাতে সজ্ ঞেলকাতে মিৎধারেরেয় দুড়ুব্ এনা। জানিচ্ অকয়হঁ বাংক দিশা আকাদেয়া, অনাতে বাংক রড় আদেয়া। থিরথার এ দুড়ুব্ আকানা। উইহার এদায়, সুমিতা চেদাঃ নংকায় ব্যওহার কেদা? একেন তেহেঞ সুমুংদ বাং, যাওগে নংকায় ব্যওহার এদা। নঃঅয়ত অকাহিলোঃ, কেদোঃ জমবড়া কাতে বিছ্নারে গিতিচ্ তায়ম, দুলাড় মেশা চেরেচ্ লাগিৎ সুমিতাআঃ লুটিরে লুটিয় ভিড়াও কেদা। সৃজন ঠেলাও সাহাকাতে আড়িস্ বেজারসালাঃ লাইকেদায়, ‘মেন অচঃমে, ইঞদ জাপিৎ বুঝাও আকাদিঞা। ‘আর লেঙ্গাতিতে এমন ভাবতে মচায় জৎকেদা, মনেহোয় এনা আয়াঃ লুটি চেতানতে ‘সুঙগাতেজোয় ‘পারমএনা। সৃজন চেৎহঁ বায় লাইলেদা। কাইধিলেকা বিছ্নারেয়াঃ মিৎধারে রেয় গিতিচ্ এনা। এনহিলোঃ তায়মখনগে সৃজন একলাগেয় গিতিচ্আ।
‘আরে সৃজন বকঞ, নিঝুম একলাগেম দুড়ুব্ নাপোড়েনদ? চেৎ ব্যাপার? ‘সুপ্রকাশ এ লাইকেদা।
সুপ্রকাশ দ আডিমাড়াং খন উত্তরপাড়ারে মেনায়া। রেলরে চাকরী য়ায়। নঁডেখন উছানঃকান ‘সান্তাড়ি সাঁওহেৎ পাথাম ‘রেন সাসাপড়াওইচ্ কানায়। সুপ্রকাশ আঃ রড় আঁজমকাতে, সৃজনাঃ উইহার কেচেৎএনা। কয়ঃকেদায় উনিসেৎ। গশ মুলিন মুখানরে রাস্কারেয়াঃ ঝালাক্ আগুকাতে লাঁদামেশা এড়েকাথায় লইকেদা, ‘বাং বাং সুপ্রকাশ দা, চেৎহঁ বাং। এমনিগে দুড়ুব্ থির কাতে, ওনকোআঃ সেরেঞ ইঞ আঁজমেৎ তাঁহে। ‘
–‘মেনখান বকঞ, আমাঃ মুখান ঞেলকাতে ইঞাঃ মনে হোয়োঃ কানা, আমাঃ মনেতালারে ঠিক্ যাঁহানাঃ হোয় আকানা। বকঞ, আপনার মনেকাতে ইঞঠেনেম লাই দাড়েয়াঃআ। যুদি যাঁহানাঃ দিশ-হুদিশ ইঞ এম দাড়েয়াম খান। অবশ্য ইঞঠেন লাইতে যুদি যাঁহান আনাট্ব বানুঃতামা। ‘
সৃজন থিরথার। ভাবনাঃকানায়, আঁপড়েয়াঃ ঘারঞ্জরেয়াঃ এপেরহেঁডেজ্ কাথা, এটাঃহড়ঠেন লাইকি ঠিক্ হোয়োঃআ? হয়ত আপনার মনেকাতে উনি সানামকাথাম লাইআদেয়া, উনি আরহঁ এটাঃ হড়ঠেনে লাইকেদা। নংকাকাতে সানামহড়ঠেন ডামডাহেয়েনা। অনাখন বাং লাইকাতে,আঁপড়েয়াঃআনাট্ আঁপড়েতেগে সলহে হোয়োঃআ। মেনখান, চেৎলেকাকাতয় সলহেয়া? সুমতি চেদাঃ নংকায় ব্যওহার এদা, অনাগেত বায় বুঝাও দাড়েয়াঃকানা। তাহলে, সলহেয়ায় চিকাতে? ভাবনা রেয়াঃ কাথা।
সৃজন থিরথার গুনিভাবিঃকান ঞেলকাতে, সুপ্রকাশ এ লাইকেদা, ‘জানিচ্, ইঞ বাংএম পাত্য়াও আঞকানা, বাংসে? অনাতে — বকঞ, ইঞ কাথাঞ এমাম কানা, অকয়ঠেনহঁ বাঞ লাইআ। ‘
সুপ্রকাশ আঃ মচাখন নআ কাথা আঁজমকাতে হাহাড়াঃ এনায় সৃজন। চিকাতেয় বুজ্ কেদা আয়াঃমনেরেয়াঃ কাথা? সুপ্রকাশ দা দ অনলিয়াকানায়। অনলিয়াকদ মানমি মনেরেয়াঃ আঁড়গো -রাকাব্ সানামক বুজ্ তিয়োঃ দাড়েয়াঃআ। অনাতেগে জানিচ্ আয়াঃ মনেরেয়াঃ কাথায় বুজ্ তিয়োঃকেদা। যখন উনাঃ কাতেয় লাইকেদা, উনিচেতান পাত্য়াও দহ গানঃআ। অনাতে মনে উজাড়কাতে উনিঠেন সানাম কাথায় লাইকেদা সৃজন ।
সৃজনআঃ সানাম কাথা আঁজম তাতে, মিৎঘাড়িচ্ থিরকাতে চেৎকচয় উইহার আচুরকেদা সুপ্রকাশ। ইনাতায়ম লাইকেদায়, ‘বকঞ, শিকড়ীতল খাঞ্চারেন চেঁড়ে লেকা আম বাহুহঁ সংসার খাঞ্চারে বুন্দিমেনায় লেকায় আইকাও এদা। দিনামদিন ইসিন বাসাং, জম -ঞু, জাপিৎ আরহঁ ইসিন বাসাং — নিয়া মিৎধারা তেগে জিয়ন হরা তল আকানা। চেঁড়ে যেলেকা খাঞ্চাখন খন ওডোকঃ লাগিৎ এ ছাট্ পাটাঃআ, বায় ওডোক্ দাড়েয়াঃ খান এদ্রে আড়িস্ বেজার এ সদরা, ঠিক্ অনকাগে আমবাহুহঁ এদ্রে আড়িস্ বেজার এ সদর এদা। আরহঁয় লাই ইদিকেদা, ‘সৃজন বকঞ একেন জম -ঞু, হরঃ-বাঁদে তেদ মনেবাং তিরপিতঃ আ। অনাতে মনে পালটাও লেকা মিৎ-বারদিন লাগিৎ দিশম অড়াঃসেৎ বাংখান নাইহার সেৎ সেন হিজুঃপে। এন্ডেখানগে মনেরে রাস্কা সারসাঃআ। ‘
মেনখান সুপ্রকাশ দা,নআদ চিকাতে হোয়োঃআ? চেদাঃসে, নিতোঃ অফিস্ রে ছুটিহঁ বাঞ ঞামা। অনাবেগর গিদরাআঃ ইস্কুল মেনাঃআ। ‘সৃজন এ লাইকেদা।
–‘ঠিক্ গেয়া, ছুটি যুদি বামঞামা, এন্ডেখান হাপ্তা মুচাৎরে নআ সোরকরে খনগে আচুর হিজুঃপে। ‘
–‘হেঁ, নআদ হোয় দাড়েয়াঃআ। ‘ সৃজন এ লাইকেদা।

শনি বার হিলোঃ। সৃজন অফিস্ খন রুওয়াড় হররেগে মনেমনেতেয় গটাকেদা, সেনকাতেগে সুমিতাঠেন গাপানাঃ প্রোগ্রাম রেয়াঃ কাথায় লাই পাশনাওআ। অড়াঃ রুওয়াড়তেয় বিলমএনা তেহেঞদ। হেচ্কাতে ঞেলেয়ায় লাল্টুদ পারকমরে দুড়ুব্ কাতেয় পাড়হাঃ কানা। কয়ঃ কেদায় সুমিতাসেৎ। উনিদ।। উতুয় গেগেৎকানা। সৃজন জামা, প্যান্ট পালাট্ কাতে, তি-জাঁগা আরুব্ এনতে সোফারেয় দুড়ুব্ এনা। মিৎঘাড়িচ্ তায়ম সুমিতাসেৎ কয়ঃকাতেয় লাইকেদা, ‘এগো আঁজম এদাম, গাপা সেতাঃ সেতাঃ জমবাড়াকাতে ভিক্টোরিয়া, বিড়লা তারামন্ডল, আলিপুর চিড়িয়াখানা ঞেঞেলবন সেনঃআ। আর চেৎ জিনিস্ ক হাতাওএম লাইএৎ তাঁহেদ রুওয়াড় হররে নিউমার্কেট্ খন অনাক বাজার কাতে,অড়াঃবন রুওয়াড়়া। ‘
নআ কাথা আঁজমকাতে সুমিতা কয়ঃ কেদায় সৃজনসেৎ। মেনখান হেঁ সে বাং, চেৎহঁ বায় লাইলেদা।
নতে নআ কাথা আঁজমকাতে, লাল্টু আডিয় রাস্কায়েনা। পারকমখন আঁড়গো কাতে সৃজনঠেন হবর এনতেকুলিকেদেয়ায়, ‘গাপা তিরেবন চালাঃআ বাবা? চেৎকবন ঞেলা? ‘নংকান আডি আয়মা কুকলি। অনাতায়ম লাইকেদায়, ‘বাবা, ইঞ ভাগেভাগে খেলনা কিরিঞ আঞ হোয়োঃ তামা। ‘
–‘হেঁ হেঁ বেটা, কিরিঞ আম হোয়োঃআ। ‘সৃজন এ লাইকেদা।
দশারহিলোঃ। রোববার সে ছুটি হিলোঃকরেদ, সৃজন বিলমতে জাপিৎখনে বেরেৎআ। তেঁহেঞহঁ আউরিয় বেরেৎআ। লাল্টুয় হহআয় কানা, ‘এ বাবা, বাবা –বেরেৎমে। ‘
সৃজন আঁশউঁশ কাতেয় থির এনা। সৃজন ঠেলাও কাতে লাল্টু আরহঁয় হহকেদা,’বাবা, বেরেৎমে লগন। মাসে ঞেলমে তিনাঃ বেড়া আকানা। ‘
সৃজন মেঁৎ ইৎকিৎ ইৎকিৎ তে বেরেৎ কাতে পারকমরেয় দুড়ুব্ এনা।
লাল্টুয় লাইকেদা, ‘বাবা ‘-
–উঁ -‘
–‘ইঞ আয়োয় লাইকেদা —
–‘চেৎ?
–‘লগন সাত্ হদঃমে। ‘
–‘চেদাঃ?
–‘বারে -আমগেত হলাম লাইক্দা, তেহেঞ দাঁড়ানবন চালাঃআ,আর আমগেম হিড়িঞ কেদা? ‘
–‘ওহ্ হো, সারিগেত হিড়িঞ আকাদাঞ। ‘
–‘বাবা, সাত হদঃমে। ইঞ আয়ো দাকা উতুয় সাত্ আকাদা। জম কাতেবন সেন হদঃআ। ‘
–‘হেঁহেঁ, সাতঃ কানাঞ। ‘
সৃজন উইহার কেদায়, হলা যেখন সুমিতায় মেতাদেয়া উনদ, হেঁ সে বাং চেৎহঁ বায় লাইলেদা। আর তেহেঞদ –।অনাতেক মেনা, কুড়িহপনাঃ মনেঅহম তুনুম ঞামকেয়া। ‘বাইবাইতে বেরেৎ এনতে বাথরুম সেৎ এ তাড়াম কেদা।
জম বাড়াকাতে সৃজন, সুমিতা, লাল্টুতাক কোলকাতা ক চালাও এনা। পৈলোতে ভিক্টোরিয় মেমোরিয়ালঞেলকাতে, বিড়লা তারামন্ডল। ইনাতায়ম আলিপুর চিড়িয়াখানা ঞেলঞেল তেগে আডিগান অক্ত লাগাওএনা। আদক চালাও এনা নিউমার্কেটতে। নিউমার্কেট রে বাজার টাজারসাত্ কাতে অড়াঃ রুএয়াড় হিজুঃতে, আডিগান আয়ুব্ গৎএনা।
হেচ্ তরাগে সুমিতা ব্যাগ্ -ট্যাগ্ ক পারকমরে দহহটকাতে, তি -জাঁগা আরুব্ কাতেগে ইসিল অড়াঃতেয় বলয়েনা। মিৎঘাড়িচ্ তায়ম স্টোভরেনাঃ সোঁসোঁ সাডে আঁজম হিজুঃকানা।
নাতে লাল্টুহঁ আচ্ লাগিৎ কিরিঞ আকাৎ খেলনাক ব্যাগ্ খন ওডোক্ আকাৎতে পারকম চেতানরে দুড়ুব্ কাতে য় ঞেলবাড়ায়েদা। আর আচ্ মতগে চেৎকচয় বাড়াং বুড়ুং অঃ কানা।
সৃজনদ তেহেঞ সারাদিন তাড়াম বাড়া খাতির লাঁগাগেয় বুঝাও এদা। অনাতে হরঃ আকাৎ জামা -প্যান্ট বাং পাল্টাও কাতে চেয়াররে টেন্ডারকাতে মেঁৎ জাপিৎ কাতেয় দুড়ুব্ থির আকানা। লাঁগা খাতির মেঁৎকিন লাঠা গৎলেনা। নংকান অক্ত সুমিতা আচ্ সোররে হেচ্ কাতে লাইকেদায়, ‘নাঃআয় চা। ‘
সুমিতাআঃ রড় আঁজমকাতে, কয়ঃ কেদায় সৃজন। ঞেলেয়ায়, মিৎকাপ লল চা সেপেঞ কাতে, আচ্ সোররেয় তেঁগো আকানা। লুটিরে মেসকচ্ লাঁদা।
সৃজন চায় আতাং কেদা। সৃজন মনে লেদায়, সুমিতা আটুপাটু ইসিন অড়াঃতেয় বলয়েনা দাকা ইসিন লাগিৎ। চেদাঃসে, হিজুঃতে আয়ুব্ গৎ আকানা। লাল্টুয় জাপিৎ এমানকেয়া। নিতোঃএ বুঝাওকেদা, চা বেনাও লাগিৎগে —।সৃজন মিৎধাও চা’য় চেপেচ্ কেদা। চা’রে চিনি কম আকানা। এনহঁ –সৃজনাঃ মচাখন ‘আহ্ ‘-নআ তিরপিৎ আড়াং ওঁডোক্ গৎএনা।।
—-(মুচাৎ) —

MUNGLI ᱢᱩᱝᱞᱤ

Story:- Mungli by Ananta Saren


“মুংলি”
–অনন্ত কুমার সরেন
কুলহি সেৎখন রতন ব্যানার্জীয় হহ কেদা–এই মানু, মানু –ঘরে আছিস্?
সিঁগৗড় বেড়া। মানু হ্যারাকিন মারশালরে ডাংরা লৗগিৎ বুসুব্ এ গেৎ এৎ তাঁহেকানা। হহ আঁজমকাতে গেৎএ থির কেদা, লৗইকেদায় –কে ডাকছ?
–আমি ব ভাইপো, রতন ব্যানার্জী।
–অ, রতন খুড়া। আস আস, ঘর দিকেই আস।
রতন ব্যানার্জী সাঁওতে আরহঁ বার্ পে জনা হড়, মানু আঃ অড়াঃসেৎ’ক বল হেচ্ এনা। রতন মিৎটাং রাজআরি দলরেন নেতা,লোকাল কমিটিরেন সুৎরেৎ কানায়। মানু লৗইকেদায় –ঐ ভঁতাটায় পাত খাটিয়াতে সবাই বস।
–হঁ হঁ, বসছি। তবে–বেশীক্ষন বসব নাই, তোর সঙ্গে কটা কথা বলেই চলে যাব।
–কথা? আমার সঙ্গে? কি কথা ব খুড়া? ডর্ লাগাঞ দিছ যে।
–ডরাবার কিছু নাই ভাইপো।আয়, আমাদের কাছে আসে বোস্ দেখি।
মানু ওনকোঠেন হেচ্ সোরকাতে, মিৎটাং বুসুব্ আটি অতরে দহকাতে, অনা চেতানরেয় দুড়ুব্ এনা। লৗইকেদায় –লাও, ইবার্ বল, শুনি। কি কথা বলতে আসেছ?
দুড়ুব্ জুৎঞঃ কাতে, রতন এ লৗইকেদা –মানু, তুই হয়ত শুনেছিস্, সামনেই পঞ্চায়েৎ ভোট। এইবার পঞ্চায়েত ভোটে বৌমা মানে –তোর বৌকে, ভোটে দাঁড় করাব।
আঁজমকাতে, হাহাড়াঃ এনায় মানু, লৗইকেদায় –অ্যাঁ!,আমার বৌকে ভোটে দাঁড় করাবে? লাঁদাকাতে আরহঁ লৗইকেদায় –কিযে বল খুড়া, আমার বৌ ভোটের মর্ম কি বুঝে? তাছাড়া –লেখাপড়াও ত বেশী জানে নাই।
–লেখাপড়া বেশী জানার দরকার নাই, নাম সই করতে পারলেই হবেক্।
–হঁ, নাম সই করতে পারবেক্ অবশ্য, ক্লাস ফোর পর্যন্ত পড়েছে।
–অ, তাহলেই হবেক্। শুনে রাখ্ ভাইপো, বৌমা যদি ভোট জিততে পারে, তাহলে –বৌমাকেই প্রধান করব।
–প্র-ধান! বল কি খুড়া?
–হঁ ভাইপো, একদম সত্যি বলছি।জানিস্ প্রধানের পদটা এবার এসটি মহিলাদের জন্যেই সংরক্ষিত হয়েছে, তাই —
–কিন্তু, এটুকু লেখাপড়া করে কি প্রধানের কাজ সামলাতে পারবেক্? মানুআঃ মনেরে হিঁদিচ্।
–কেনে পারবেক্ নাই? সবকিছুই শিখাঞ দিয়া হবেক্। লেখাপড়া জানা একজন ওর সঙ্গে থাকবেক্, ওই সবকিছু বলে দিবেক্,আর বৌমা শুধু সই করবেক্, বাস্—
–কিন্তু —,মানুআঃ ভাবনা, দাড়েয়াঃ আয় ত?
মানুয় দহাবহাঃ কান ঞ়েলকাতে, রতন একদম মানুআঃ লুতুর ফেডরে চোকো কাথায় লৗইয়ায় কান লেকাকাতে লৗইকেদায় –শুন্ ভাইপো, বৌমা প্রধান হলে, মাসে মাসে ভাতা যেমন পাবেক্, তেমনি আরো অনেক কিছুই ……তোদের ঘরের অবস্থাটাই পাল্টে যাবেক্। মেনকাতে লাঁদাকেদায় রতন।
‘”অনেক কিছুই'” —-নোওয়া অনেক কিছুদ চেৎ চেৎ মানুঠেন বাং পুষ্টৗও লেনা, তবে –রতনআঃ কাথা আঁজমকাতে মনে হোয়এনা, রেঁগেচ্ নাচার সংসাররে জম ঞুরেয়াঃ হারকেৎ আদ বাং তাঁহেনা, আচ্ হঁ মুনিস্ কামি চালাঃ বাং হোয়োঃতায়া, মাসে –তিনৗঃ নাপায়। মানুআঃ মনে পাল্টাও এন তায়া কি? হোয় দাড়েয়াঃআ, চেদাঃসে, নঃঅ নংকান সংসার মাত সানাম কগেক খজ্ আ।
মানু কুসিয়েনায়, মেনখান – কুসিদ বায় সদর লেদা।লৗইকেদায় –আচ্ছা খুড়া, তুমরা একটুকু বস ,আমি বৌটার সঙ্গে কথা বলে আসি। মেনকাতে অড়াঃসেৎ এ বলয়েনা মানু।
মানু, এরাৎতেৎ মুংলিঠেন সেনকাতে লৗইকেদায় –এগো, ওনকোওয়াঃ কাথাতম আঁজমকেদা ,মাসে লৗইমে,ওনকো চেৎইঞ লৗই আকোওয়া? ভোটরে তেঁগোনাম? সে -বাংআ?
মুংলি,ফোর হৗবিচ্ এ পাড়হাও আকানা, আরহঁ চেতান সেৎ পাড়হাও রেয়াঃ রৗস্কৗদ তাঁহেকানগে তায়া, মেনখান সোররে মারাং স্কুল বাং তাঁহেকানতে, বায় পাড়হাও দাড়েয়াদা। সৗঁগিঞ স্কুল হোষ্টেলরে তাঁহে কাতে পাড়হাও হচরেয়াঃ কৗউডি দাড়ে, রেঁগেচ্ নাচার আচ্ আয়ো বাবা তৗকিনাঃ বাং তাঁহেকানা। অনাতে অলঃ পাডহাও বাগিকাতে, অড়াঃ সংসাররেয়াঃ কামিকগেয় হেওয়ায়েনা। আর পেড়াক লাগাও এনখান হৗলি উমের রেগে মানুঠেনক গঙ্ কাদেয়া। মানু একলা হপন, অড়াঃরেয়াঃ আবস্থা দমে বাং কেটেজ্ রেহঁ, মেনাঃ আকাৎ হাসারেয়াঃ আরজাও হোড়ো , সাঁওতে কিষৗঁড় হড়কঠেন কামিকাজ কাতে, দাঃ সাবাঃ জম ঞুকাতে জিয়নদ খেমাও ইদিঃকানা।
মুংলি, আয়াঃ অলঃ আকিল দাড়েরেয়াঃ কাথা উইহৗর আচুরকাতে, লৗইকেদায় –ধুর্, ইঞ থুংলিদ ভোটরেয়াঃ চেৎইঞ বুজ্আ। বাংআসে,ভোটরে ইঞদ বৗঞ তেঁগোনা বাছা।
–আঁজমমে গো, ওনকো’ক লৗইএদা,ভোটরেম জিৎকৗর লেনখান পঞ্চায়েতরেন প্রধানক বেনাও মেয়া।
–মেনখান -ইঞকি প্রধানআঃ কামি নাপায় সৗঁহিচ্ ইঞ সুসৗর দাড়েয়াঃআ? ইঞমা অলঃ জৗসতি বৗঞ বাড়ায়া।
–অনানিয়ৗ দ আলম ভাবনাঃআ, ওনকোরেন মিৎহড় আম সাঁওতেয় তাঁহেনা,উনিগে সানামাঃএ লৗই আমা। আমদ খৗলি সই লেখানগে, বাস্ -।
–মেনখান –,মুংলিআঃ মনেরে হিঁদিচ্।
–আঁজমমে গো, আমেম প্রধান লেনখান চাঁদো চাঁদো ভাতা যেমনেম ঞামা, অনকাগে আরহঁ চেৎক চং ঞামঃআ, আলাংআঃ রেঁগেচ্ নাচার সংসার রেয়াঃ হালত্ গে পাল্টাও উতৗরঃআ। অনাতেঞ লৗইএৎ তাঁহে, যেখন দাঁও ঞামঃকানা, উনদ –আম ভোটরে তেঁগোনমে।
–ইঞদ সাঁহাস্ বৗঞ ঞামএদা, তবে –আম জখনেম লৗইএদা,উনদ ভোটরেঞ তেঁগোনা, মুংলিয় লৗই কেদা।
–আচ্ছা, হাপে তবে ওনকোঞ লৗই আকগে। মেনকাতে ওনকোঠেনে সেনএনা মানু। ওনকোঠেন হেচ্ কাতে মানু লৗইকেদায় –খুড়া, তুমরা যখন বলছ তখন বৌটা ভোটে দাঁড়াতে রাজি হয়েছে।
–ও, খুব ভাল কথা।তাহলে – আজ আমরা আসি, পরে আবার আসব। মেনকাতে ওনকোক চালাওএনা।


মুংলি ভোটরেয় জিৎকৗর এনা। আর রতনআঃ কাথা লেকাতে প্রধানহঁয় হোৎএনা। দল তরফ্ খনাঃ মিৎ বেকার কড়া গিদরৗ সাধন ব্যানার্জী, আচ্ সাঁওতেয় তাঁহেনা। উনিগে অড়াঃখন মটর সাইকেলতে অফিসে ইদি অৗগুয়েয়া,অফিস রেয়াঃ কামিকয় লৗই সহদেয়া, অকাকরে সই হোয়োঃআ বাং হোয়োঃআ, সানামাঃএ লৗই আয়া।
সাধন দ রতন হপনতেৎ, বিএ পাশকাতে অড়ারেগে মেনায়া। রতন, হপনতেৎ গেয় তেঁগোয়েয়া মেনতে, মেনখান প্রধানাঃ পদ একেন আদিবাসী গাঁতাকরেন তিরলৗক লৗগিৎগে হোয় এনখান, উনিদ বায় তেঁগো লেনা। তবে, গড় ঞুতুমতে মুংলি সাঁওতে দহকাতে, আচুর হরতে সাধনগে প্রধানএ হোয়এনা, অনাদ লৗই গানঃগেয়া।
আতোরেন এটাঃ তিরলৗ, মুংলিরেন আতো সৗগৗই ঞাতাত্ এরা সে এরেলতেৎ কুড়িতাক, যেখন তি’রে টিপিন দাকা টেওয়েঞ কাতে,তারেনরে গামছা লাদেকাতে কিষৗঁড় কামি বাংখান সড়ক তেয়ার কামিক চালাঃআ, উন –মুংলিদ শান্তিপুরি শাড়ীতে কাশো বাঁদে কাতে ,তারেনরে ব্যাগ গঃকাতে মটর সাইকেল রেয়াঃ তায়মরে দুড়ুব্ কাতে, পঞ্চায়েত অফিসতেয় চালাঃআ। মুংলি যেখন অফিসে চালাঃআ, তেঁগোকাতেক কয়গেয়।আতো সৗগৗই ঞাতয়া তাকক লৗইয়া –এনা বাছা, মুংলিদ আডিগেয় মলং আনিচ্ আ, অনাতে হেমাল উমুল অফিস অড়াঃরেয় কামিকানা, আর আব খানদ –দাঃ জৗপুৎ সেতোংরে কামি হোয়োঃকান তাবনা। মুংলিআঃ সাজ্ বাজ্ ঠাট্ বাট্ ঞেলকাতে, মনে মনতেদক রিসৗঃ গেয়া জৗনিচ্।
মুংলিআঃ সংসার, অফিসরেয়াঃ কামি নাপায় সৗঁহিচ্ তেগে পারম চালাঃকান তাঁহে, ঠিক্ দারায়কান পঞ্চায়েত ভোট মাড়াং বিরোধী দল পাহটা খনাঃক লৗলিস্ কেদা– প্রধান কৗউডিয় লয়ছয় আকাদা, অনা কৗউডি রেয়াঃ জৗসতিগে আচ্ এ কড়পা আকাদা। অনাতে ওনকো তুনখি তলাস্ কাতে ঞেলরেয়াঃক দাবীকেদা।
লৗলিস্ রাকাব্ এন তরাখনগে মুংলিদয় অ -স্বীকার আকাদা,মেনখান- তুনখি তলাস্ কাতে অডিট্ রিপোর্ট রে ঞেলএনা,ওনকোওয়াঃ লৗলিস্ দ যথাৎআঃ কান গেয়া, আয়মা কৗউডি রেয়াঃ হুদিস্ গে বাং ঞামঃ কানা।
প্রধান হিসৗব্ তে মুংলিগেয় দুসিয়েনা, আর অনাখৗতির প্রধান পদ খনহঁক অচঃ কেদেয়া। মেনখান -মুংলি ভৗবিত্ কাতেহঁ বায় ঞামএদা, কৗউডি লয়ছয় সে কড়পাহঁ বায় কড়পা আকাদা, এনহঁ –চিকৗতে আচ্ গেয় দুসিয়েনা? তাহলে কি, সাধন সাঁওতে এটাঃ সহেৎ ক জুমিৎ কাতে কৗউডি লয়ছয়রে জপড়াও মেনাঃ আকাৎ কোওয়া? হোয় দাড়েয়াঃআ, চেদাঃসে,আচ্ ত উনৗঃ বায় বাড়ায়া, ওনকোওয়াঃ কাথা লেকাতেগে নুনদিনে কামি অৗগু আকাদা। অনাতে আচ্ গেয় দুসিয়েনা, আর ওনকোদ ফাঁক রেগেক তাঁহেয়েনা।
বিন্ দায়দোষ কাতেহঁ প্রধান পদ খন অচঃ হোয়এন তায়তে, আডি লাজাও আর অপমানে বুঝৗও কেদা। লাজাও রেয়াঃগে কাথা, কোম্বড়ো লেকাতে দিসম হড়ঠেনে ছৗটয়ৗর হচ লেনখান,অকয়দ এনতেৎ লাজাও সে অপমান বায় বুঝৗও আ?
মুংলিআঃ মনে জিউয়িখনাঃ সুখ্ সাহা ইদিঃকানা।দাঃলো ঘাট্, পুখরি ঘাট্ জাঁহারেগে হড় থুতি গালমারাও এ ঞেল কোওয়া, মুংলিআঃ মনে হোয়োঃআ –ওনকোদ জৗনিচ্ আয়াঃ কাথাগেক গালমারাও এদা। মনে হোয়গদঃআ,আচ্ উদুঃকাতেক লৗইএদা –হানি কোম্বড়োয় হিজুঃকানা। মুংলি উইহৗর কাতে বায় ঞাম এদা,চেৎলেকাতেয় লৗই আকোওয়া যে, আচ্ দ কৗউডি বায় কোম্বড়ো আকাদা। আর লৗইকাতেহঁ ওনকোক পৗত্য়ৗঃআ কি? জৗনিচ্ বাংআ। নংকা উইহৗর আচুর কাতে,অডাঃখন নেতারদ ভাগে বায় ওডোক্ বাড়াঃআ। হড় যেখন কামি কাসনি লৗগিৎ অড়াঃখনক ওডোক্ ফারাকঃআ, অনকান অক্ত দাঃলোকয় সেনঃআ, নিচোল অক্ত পুখরিতে তোপোন কহঁয় চালাঃআ,যাতে হড় সালাঃ ঞাপাম আল হোয়োঃ তায়মা। জম ঞু দুড়ুব্ জৗপিৎ সারাঘৗড়িগে মুংলিআঃ মনে হোয়োঃআ, আয়াঃ কাথাগে জৗনিচ্ হড়ক গালমারাও এদা, উইহৗর আচুর অপমান রেয়াঃ আঁগরা সেঙ্গেলতেয় আতারঃ কানা।মনে জিউয়িরে বুটুঞ হাসো,বৗইবৗইতে বৗড়তি ইদিঃকানা। দিন দিনতে সাহাও দাড়ে যেখন আৎএনা, উনগে মুংলি ——–
সেতাঃ তরাগে আতো জাকাৎ হড়ক বাড়ায়কেদা, বাড়গে সীমৗ উলদারেরে মুংলিদয় আকা আকানা। আঁজম ঞামকাতে আয়মা হড়ক হেচ্ সেটের আকানা, আয়মা হড়াঃ মনেরেগে কুকলি, চেদাঃ? চেৎখৗতির আচ্ তে জিউয়িই নাসাও কেৎতায়া? রাঃরাঃতে মানুয় লৗইকেদা –হয়ত কৗউডি লয়ছয় রেক কৗইধি কেদে খৗতির,চেদাঃসে,আচ্ দ চেৎগে বায় বাড়ায়া।বিন দায়দোষ কাতেহঁ কৗউডি লয়ছয় সে কোম্বড়ো বাব্ কাতে শাসেৎএ ঞামকেৎ খৗতির, আডি লাজাও অপমানে অৗইকৗও কেৎআ, অনা হতেচ্ তে ভাগে রড়হঁ বায় রড় বাড়ায়েৎ তাঁহে, হায় গুমৗন কাতে নিঝুমে দুড়ুব্ কঃতাঁহে। তবে–নংকায় কামি গদা, অনাদ বৗঞ বুঝৗও ঞামলেৎ তাঁহে। বুঝৗও ঞামলেখানিঞ হুনৗং নংকাদ বাং হোয়কঃআ। লৗই লৗইতে মানুআঃ মেঁৎখন হিডির হিডির মেঁৎদাঃ জরয়েনা।
ইস্, আডি দুক্ রেনাঃকাথা। আতোরেন মিৎহড়ে লৗইকেদা।
–দুক্ বৗড়তি বুঝৗঃকানা নোওয়া খৗতির, কৗউডি লয়ছয়রে জাঁহায় জপড়াওক তাঁহেকানা, ওনকোদ ফাঁক্ রেগেক তাঁহেয়েনা। আর লাজাও অপমান শাসেৎ এ ঞামকেদা এটাঃ মিৎহড়, জাঁহাখৗতির জিউয়িগে নাসাও হোয়এনতায়া।
নোওয়া কাথা আঁজমকাতে উমেরান মিৎহড়ে লৗই কেদা– এঙ্গাতে, রাজআরীরেয় সেলেৎ এনতেগে নংকাদ হোয়এনা, বাংখান —–
রাজআরীরে সেলেদঃরেয়াঃ ইচ্ছৗ উনিয়াঃদ বাং তাঁহে কানা,ইঞিঞ মেতাদে তেগেয় সেলেৎলেনা। নিতোঃ ইঞ বুঝৗও এদা, ইঞ বৗঞ মেতায়খানগে বোগে কঃ আ। মানুয় লৗইকেদা।
–রাজআরীদ ইঞ আম লেকান মিৎফুড়ুঃ সেচেৎআন হড়াঃদ বাংকানা, শিখ্নৗত্ আর চৗটয়ৗল হড়াঃগে সাজাঃ আ।
আতোরেন মিৎ বাচড়া কড়া গিদরৗ লৗইকেদায় –অনে আঞ্চার খুঁটরে চেৎএ ঘেঁট্ আকাৎলেকা ঞেলঃকানা। জত হড়ক কয়ঃকেদা, ঞেলাক সারিগে, ঘেঁট্ আকাৎ লেকাগে ঞেলঃকানা।
মানু, মেঁৎদাঃ জৎকাতে সেন সোর এনায়, আঞ্চার খুঁট্ খন ঘেঁট্ লাড়াকাতে ঞেলায়, মিৎটাং কাগজ্ সাকাম। অনা কাগজ্ সাকামরে অলমেনাঃআ ———-
“লাজাও অপমান রেয়াঃ আঁগরা আতাস্ বৗঞ সাহাও দাড়েয়াৎতে, নোওয়া ধুড়ি ধারতি বৗগিকাতে চালাও তেগে হোয়এন তিঞা। নিন উডিচ্ সেচেৎ দাড়েআতে রাজআরী আখড়ারে আঁড়গোগে এতম হোয়লেনা। মেঁৎ মারসাল আর বুজ্ দিসৗ বাং খৗতিরগে, মেঁৎরে ধুড়িক এর দাড়েয়াদা। অনাতে, নোওয়া ধুড়িধারতি বাগিয়াঃ মাড়াং নোওয়াগিঞ লৗইয়া –লাফাং সেচেৎ শিখনৗত্ আরজাও কাতে বুজ্ দিসৗ দাড়ে যখন পাকটঃআ, আর এটাঃক আয়ুর সোতোঃ ইদিরেয়াঃ দিল দাড়ে যেহিলোঃ কেটেজঃআ, এনহিলোঃগে রাজআরী আখড়ারে আঁড়গোন পে, বাংখান –ইঞলেকাগে আপেয়াঃ হালৎহঁ হোয় দাড়েয়াঃআ। ইঞৗঃ গচ্ হড়ম জটেৎকাতে কিরয়ৗ আতাংপে, আদ তিসহঁ এটাঃ জৗত্ আঃ তায়মতে বাংপে গুয়ুর গুয়ুরঃআ, ওনকো আচুতে আদ বাংপে এনেচ্ আ। এন্ডেখানগে – -ইঞৗঃ হয় জিউয়ি থিরলৗঃআ।”
মুচৗৎ রে, মুংলি জৗনিচ্ আয়াঃ ঞুতুমে অললেদা, পষ্ট সৗঁহিচ্ বাং ঞেল ওরোমঃকানা। হয়ত –দুক্ কৗঁহিস্ তে, লাজাও অপমানতে, নোওয়া মঁজ্ ধুড়িধারতি বাগি হোয়োঃকান তায়তে, মুচৗৎ মেঁৎদাঃ অনা ঞুতুম চেতান রেগে জর আকানা।
মুচৗৎ
©®>অনন্ত কুমার সরেন।

One act Play GAANE ᱜᱟᱱᱮ

Written by Ananta Kumar Saren

নুমিন দিন অনড়হেঁ কপে ঞেল আকাদা, পাড়হাও আকাদা। তেহেঞদ মিৎটাং মিৎকিতা গায়ান আপে সামাংরিঞ সদর এদা, যাঁহাদ ‘ইতা ‘পাথামরে (Oct -Dec 2015)উছান আকানা।


মিৎকিতা আতেনাঃ লাঁদা গায়ান ঃ –
‘গানে ‘
-অনন্ত কুমার সরেন

যাঁহায় ক আতে ঃ –
কড়াক ঃ – ১।গানে, ২।টেন্টে, ৩।ডুবাং (নোকোদ ঝত অরাসরা গাতে কড়া)
কুড়ি ঃ ১।ফুলি (আতোরেন গে মিৎ তিরলা)


পৈলো জখেচ্ ঃ –
কুলহিরে —
গানে ঃ – এই –টেন্টে সে অকয় য়া?
টেন্টে ঃ -হোয় গানেদা ইঞগে।
গানে ঃ -সুটুং সুটুং কুলহি কুলহিতে অকাসেৎ দম তাড়াম কেদা?
টেন্টে ঃ -ইয়া –অনা লাতার কুলহি সেৎ ইঞ তাড়াম কেদা।
গানে –লাতার কুলহি? হেঁয়া চেৎ বেপার, দিনাম তারাসিঞ আকানসে লাতার কুলহিম চালাঃ কানা?
টেন্টে –এয়া গানেদা, বেপার সেপারদ চেৎহঁ বাং। ইয়া মানে –কামি লাঁগা ফারনাও পাউরা ঞুঞ চালাঃ আ,ফুলিগড়ম ঠেন।
গানে –(লাঁদা লাঁদাতে) হেঁয়া, একেন পাউরা ঞুগে সে –‘ওকোচোকো’ যাঁহানাঃ —
টেন্টে –বাংয়া গানেদা, আম যাঁহাম মনেয়েদা অনকা দ বাং।
গানে –(রাগি) হেঁ য়া হেঁ, ইঞদ বডে দাঃতে আলম আবিঞা বুঝাও কেদাম?
টেন্টে –এয়া গানেদা ,খালিয়াঃগে ঞু তারা চটা লেকাম রাগিঃ কানা।
গানে –আচ্ছা লাইমেসে, চেতান কুলহি কাপু হিলি, তালা কুলহি গোডেৎ হপন আয়ো তালম কাতে, ফুলি গড়ম ঠেনগে চেদাঃ পাউরা ঞুম চালাঃ আ?
টেন্টে –ও অনা কাথা,?(লাঁদা) আসল কাথা হোয়োঃ কানা, ফুলি গড়ম আডি এটাঃগে পাউরায় তেয়ারা। মিৎধাও এম ঞু লেখান –ভাঁওরি মেরম লেকা আচুর বিহুর উনিঠেন সেনঃ বুঝাও মেয়া। অনাবেগর —
গানে –চেৎ ?
টেন্টে –উনি BPL কদ সরফা গনংতে পাউরায় এমা কআ। আর ইঞহঁত BPL অনাতে —
গানে –(হাহাড়াঃ) এঁ-! লাইআম চেৎ? পাউরা ভাটি রেহঁ BPL ?
টেন্টে –হেঁ, অনাবেগর -মিৎ হাপ্তা লেতাড় এম ঞু লেখান, তারা বোতোল Free. ।
গানে –সারি?
টেন্টে –হেঁ বাংখানদ। এয়া গানেদা বুঝাও কেদাম, ফুলি গড়ম মিৎ ফুড়ুঃ গান অলঃ এ বাড়়ায়তে, চেৎ লেকাতে খুদ্দার মুঁচ্লেকা তিরয়াও গানঃআ, অনাদয় তেবাঃ ঞাম আকাদা। আরহঁঞ আঁজমে কানা –
গানে –চেৎ?
টেন্টে –বাংমা ‘টাটিঝারি ট্রেনিং ইস্কুল ‘এ তেয়ার লাগিৎ।
গানে –ইস্কুল মানে –অলঃ সেঁড়া লাগিৎ ইস্কুল?
টেন্টে –বাং।
গানে –তবে?
টেন্টে –অনা ইস্কুল রে তিরলাক রানু রান রেহেৎ কয় ঞেল ওরোম হচকআ। রানু চেৎলেকা কাতে তেয়ার হোয়োঃ আ, তিনাঃ গান রান রেহেৎ মেশায় হোয়োঃ আ, চেৎলেকা কাতে বাড়তি পাউরা তেয়ার গানঃ আ, নংকা সানামাঃ অড়ে অড়পাৎ এ সেঁড়া আকআ।
গানে –বাহ্ -আডি নাপায়। মেনখান নআ রেয়াঃ আসল জস্ দ চেৎ?
টেন্টে –হেঁ, পাউরা ভাটি আব সাঁওতা তালারে ঝারনা লেকা জিয়াড় তাঁহেন মা। নআ হোয়োঃ কানা জস্ দ।
গানে —আঁজম কাতে তেহেঞ আডিঞ রাস্কায়েনা। নংকাগে আর মিৎদিন আডিঞ রাস্কালেনা।
টেন্টে –অনাদ তিস্ গানেদা?
গানে –যেহিলোঃ ইঞ বাবাআঃ পকেট্ খন টাকা কোম্বড়ো কাতে, অনা টাকাতে পাউরা কিরিঞ কাতে পৈলো পাউরাঞ ঞু লেদা এনহিলোঃ। এ টেন্টে বকঞ –
টেন্টে –চেৎ গানেদা?
গানে –দো মিৎ বোতোল পাউরা আগুয় তালাংনে। মিৎতে দুড়ুব্ কাতে রাস্কা লাং চেপেচ্ হাটিঞা।
টেন্টে –গানেদা, আমহঁম ঞুয়া?
গানে –হেঁয়া।
টেন্টে –তবে চলসে উনিঠেন গে। আডি এটাঃগেম বুঝাও গদা। ফুলি গড়মাঃ চেহর বেহর রড় তায়, মনে রুমুয় লাঁদা তায়, অন্তররে হারাড় উতারঃ আ। নিঝুম অক্তরে তিনাঃ এম দিশা আচুরা উনাঃগে রাস্কা সেতেঞঃ আ।
গানে –এয়া অন্ডেদ বাং। হানা –বাড়গে কচা উল হেমালরে দুড়ুব কাতেলাং ঞুয়া। দো লগন আগুয়মে।। আর হেঁ, নে কাউডি সাবমে, ভান্টু ঠেনখন পেশাল চানাচুর আগু দারায়মে। আর –বারয়া গেলাস্ হঁ আগু দারায়মে যাই।
—————- —————-ঃ ————-
দশার জখেচ্ ঃ –
ফুলিআঃ অড়াঃ —
টেন্টে –(হহ হহতে) এ গড়ম, গড়ম– অকায়েনায় য়া? অড়াঃ মা হাংহাং, অকাতেদয় ছান্ এনা?
ফুলি –(বাহরে সেৎখন) অকয় য়াপে হহয়েদা? ইঞদ বাড়গে সেৎরে মিনাঞা। (হেচ্ সোর কাতে) ও -টেন্টে গড়ম, মা দুড়ুব্ মে।
টেন্টে –অকা সেৎদম সেন লেনা?
ফুলি –এযা, বাড়গে সেৎ ঝুরি আগুঞ সেন লেনা।
টেন্টে –অনা মাঞ ঞেলকেৎ মে কোরো কোরো ঝান্টি হবর কাতেম হেচ্ এনা। ইঞদঞ মেন এদা এনান -সাজ্ বাজ্ কাশো কলসা কাতে, অকাতেদম তুল লেনা?
ফুলি –ও- এনান ?(লাঁদা) এযা -অনা ‘টাটিঝারি টেরনিং ইস্কুল ‘অকাঠেন তেয়ার হোয়োঃ আ, অনা ঠাঁও ঞেঞেল ইঞ দুকানা।
টেন্টে –আদ -অকাঠেন ঠাঁওদম গটা কেদা।?
ফুলি –অনাদ ‘ভিন্টি ডুংরি সোররে ‘।
টেন্টে –(হাহাড়াঃ) ভিন্টি ডুংরি! আতোরে বাংকাতে অঁডেদ চেদাঃ?
ফুলি –এযা -বারুবারাং, ঠোম্পো, দুঁধিলতা, সঁধাইনি এমান এমান রান রেহেৎ কমা ভিন্টি ডুংরি রেগে ঞামঃ আ। অনাতে -উদুঃ সেঁড়ারে সুবিতা হোয়োঃ আ।
টেন্টে –ও -অনাতে? আডি নাপায়।
ফুলি –এযা গড়ম, জাওআ গজ্ আকান তিঞা। নিতোঃ ইঞ চঁদায় লাগিৎ। মাসে লাইমে, অকাসেৎ এম হেচ্ এনা?
টেন্টে –ইঞমা গড়ম, দিনাম আমাঃ রাসা চেপেজ্ গিঞ হিজুঃ আ।
ফুলি –(হাহাড়াঃ) এঁ – !ইঞাঃ রাসা?
টেন্টে –থুড়িথুড়ি। আমাঃ পিলচু রাসা চেপেজ্ ইঞ হিজুঃ আ। ধেট্ –চেৎ মেনতে চেৎ, নআ মচং খন ফসং ওডোক্ গৎ এনা। দেন লগন মিৎ বোতোল এম গৎ আঞমে।
ফুলি –(হাহাড়াঃ) মিৎ বোতোল! এয়া আমমা তারা বেোতোল গেম ঞুয়দ? আর তেহেঞদ —
টেন্টে –হেঁ, আর মিৎ হড় মেনায়া।
ফুলি –উনিদ উকুরিচ্? নঁডেদ বাঞ ঞেলে কানদ?
টেন্টে –উনিদ হান্তেরে মেনাঃ আকাদেয়া। দেন লগন এম হদ্ আঞমে। ইদি হদাঞ।
ফুলি –উঁহুঃ, ইঞ বোতোলদ বাঞ ইদি হচআঃ আ।
টেন্টে –আচ্ছা জালাত, বোতোল বাম ইদি হচআঃ খান, পাউরাদ চিকাতিঞ ইদিয়া? গামছারে ঘেঁট্ কাতে?
ফুলি –বাংআ সে, নংকা কাতে আডি বোতোল পোয়মাল আকান তিঞা।
টেন্টে –আহ্ গড়ম, ঞু হোয় লেনখান গে বোতোলদঞ আগু হট কাতামা। আমদ একাল আলম ভাবনাঃ আ।
ফুলি –হেঁ হেঁ, অনকাদ সানাম গেক লাইআ। উনি সুরাই যেমন এ লাইলেদা, গাপাগে বোতোল আর কাউডিঞ আগু হটআমা। নঃঅয় সেরমা আচুরেন রেহঁ, বোতোল হঁ বানুঃ আর কাউডিহঁ বানুঃ।
টেন্টে –এ গড়ম উনিয়াঃ কাথাদ বাদ্ কাঃমে। ইঞদ বাঞ অনকানা। ইঞ চেতান পাত্য়াউ দহয়মে।
ফুলি –ধুর্ ধুর্, ইঞাঃ পাত্য়াউ দ চাবা আকানা।
টেন্টে –হেঁ –ইঞ আমরেন বার মাসয়া খুদ্দার, ইঞ চেতানহঁ পাত্য়াউ বানুঃ আকাৎ তামা?
ফুলি –(রাওআল সাঁহিচ্) আচ্ দ অনকায় রাগি গদঃআ। (লাঁদা) এ যা, ইঞকি আমিঞ মেতাম কানা? (রাগি) উনি বেড্গা সুরাই গেত — হাপে, নিৎগিঞ আগু আম কানা।
টেন্টে –বারয়া গেলাস হঁ আগু তরায়মে।
(বোতল গেলাস ঠপকাও সাডে)
ফুলি –নে সাব্ মে।
টেন্টে –হোয় দেন। ঞু হোয় লেনখান নিৎগে বোতোল আর গেলাস্ ইঞ আগু হট আমা।
ফুলি –হোয় যা গড়ম, একাল আলম হিড়িঞা, হোয়সে?
টেন্টে –হেঁ হেঁ, বাঞ হিড়িঞা। গড়ম —
ফুলি –চেৎ?
টেন্টে –নআদ বাড়ায় কাঃমে, ‘চাঁদো বোঁগা অক্তরে দাঃ জাড়িয় হিড়িঞা, মেনখান– নুয় টেন্টে যাঁহা কাথায় এমা, অনাদ তিস্ হঁ বায় হিড়িঞা।

তেশার জখেচ্ ঃ –
(বোতল আর গেলাস্ রেয়াঃ ঠপকাও সাডে)
টেন্টে –গানেদা, নঃঅয় গেলাস্ আর পাউরা বোতল।
গানে –এয়া মা হাটিঞ চালানো।
টেন্টে –অ -ইঞগে হাটিঞ তালাং আঞ? আচ্ছা, ঠিক্ গেয়া।
(গেলাস্ রে পাউরা দুল রেয়াঃ সাডে)
গানে –আডি এটাঃগে ‘স’ এন দয়া।
টেন্টে –ঞু রেহঁ আডি এটাঃ গেম বুঝাও গদা,হেঁহেঁ।নে সাব্ মে।
গানে –হেঁ দেন। (ঞু কাতে) আহ্ –নংকান পাউরাদ ঞু গুজুঃগে বুঝাও মে দয়া এঙ্গাতে –।
টেন্টে –চেলে –লাই আৎমে তাঁহেৎ ইঞ সে?
(সাঁগিঞ হররে ডুবাং, আচ্ মতগে)
ডুবাং –উনকিন উল বুটা রেদ অকয় য়া? উঁ –মিৎ হড়দ টেন্টে, -আর উনিদ গানে কালায়। ঠিক্ বঠে, হাপেঞ সেন লেনগে, ভাগ্ ইঞ ঞামখান। (সেন সোর কাতে, লাঁদা লাঁদাতে) আডি এটাঃগে ‘স’ কান দয়া। সাঁগিঞ খন স ঞাম কাতেগে ভাঁওয়ার লেকাঞ ভানভানাও হেচ্ গৎ এনা। গানেদা, দেনয়া ইঞহঁ কাটিচ্।
গানে -এয়া এ ডুবাং বকঞ, ইঞদ বাং, নুই টেন্টে মেতায়মে। উনিগে ইঞদয় ঞু হচঞ কানা।
ডুবাং –এ টেন্টে, দেনয়া ইঞহঁ কাটিচ্ হাটিঞ আঞ বেন।
টেন্টে –এয়া ডুবাং, নআদ আলম আঁশঃআ ভাই। চেদাঃ সে, মোটে মিৎ বোতোল পাউরা।-
ডুবাং –এয়া ইঞদ বিশিদ বাং, মিৎ ঢক্ গান হাটিঞ আঞ খানগে হোয়োঃআ।
টেন্টে –(রাগি) মেতায় কানাঞ বাং গানঃআ, এনহঁ —
ডুবাং –এটেন্টে,দিশায়াম?হানেসাকরাৎরে ইঞ যেখন শুকরি জেল পিঠাঞ জম এৎ তাঁহে, উন চেৎলেকা ইঞসেৎ মেরেল মেরেল এম কয়ঃ আকাৎ তাঁহে আর কডচ্ কডচ্ উলিদাঃ এম উদ্ এৎ তাঁহে, উন মিৎ কেচাঃ পিঠাঞ হাটিঞ আৎমে তাঁহে সে? (লাঁদা) এই টেন্টে, দেনয়া আমহঁ তেহেঞ কাটিচ্ হাটিঞ আঞমে। বিশিদ বাং, নাডরি লহদঃ লেকা।
টেন্টে –হেঁদায়া ডুবাং, হড় কাথাদম বুজ্আসে বাংয়া? মেতাম কানাঞ —।এই ডুবাং, নাঃআয় আঁজমমে —
ডুবাং –চেৎ?
টেন্টে –মা মিৎধাও ইঞাঃ তায়মরে থিয়াঞমে, চেৎহঁ বাঞ মেতামা। মেনখান –পাউরাদ অহঞ হাটিঞ কেমা।
ডুবাং –অ –নআ কাথা। ঠিক্ গেয়া, ইঞহঁ গাপা হাট্ খন শুকরি জেল ইঞ আগুয়া আর চেতান কুলহি লাতার কুলহি দাঁড়া রাকাব্ দাঁড়া আঁড়গো জেল চাট্ সাঁও পাউরাঞ ঞুয়া। ঞেলমিয়াঞ -উন আমেম আঁশঃআ সে বাং। হুঁঃ — (ঞির এনায়)
টেন্টে –হেঁ হেঁ, দো চালাঃ মে। এঁগাতে, নঁডেয় ঞেরেঞ ঞেরেঞঃ কানা।
গানে –এয়া বকঞ, উনিদ বাদ্ কায় মেসে। আচ্ছা, হেঁয়া টেন্টে বকঞ,
টেন্টে –চেৎ গানেদা?
গানে –আদ তিসেম বাপ্লাঃ আ য়া? সে নংকা, ‘রাম ডাঙ্গুয়া ফতেসিং ‘গেম তাঁহেনা?
টেন্টে –এয়া গানেদা, তেহেঞ মঁড়ে সেরমা ধুরিয়া বাহু আগু রেয়াঃ ইঞ রিকায়েদা। মেনখান –কুশিগে বাংক কুশি আঞ কানা।
গানে –(হাহাড়াঃ) এ্যঁ !লাই আম চেৎয়া? কারাম ছাইলাঃ লেকান কড়া, বাংক কুশিয়াম কানা? হেঁয়া, চেৎক লাই এদা?
টেন্টে –লাই এদাক, নুই জেন্ঠেঠেনদ কুড়ি গিদরা বাংলে গঙেয়া। নুইকি আলেরেন কুড়ি গিদ্রা কামি কাতেয় আসুল দাড়ে আয়া?
গানে –হেঁ, নাসেনাঃ জেন্ঠে গেয়াম, নআদ সারি কাথা। মেনখান –আমাঃ অন্তররে উরগুম দুলাড় আর হেমাল কুড়য়াত মেনাঃআ?
টেন্টে –অনাদ উকুরক বুঝাও এদা? গানেদা, অনাক কাথাঞ দিশা আচুর লেখান দুকতে কাঁহিস্ তে ডাডিদাঃরে উনুম গুজুঃগে বুঝাও ইঞা।
গানে –আহাহাহা –টেন্টে বকঞ, উনাঃদ আলম হুলাসঃআ। দুক্ তে যাঁহা লেকাম গচ্ এমান লেনখান, ডাঙ্গুয়া কড়াক পে মাহাক ‘স্ট্রাইক্ ‘গদা আর হারাতরা ডাঙ্গুয়া কুড়ি বাপলা গেক বয়কটা। এঙ্গাতে, ডাঙ্গুয়া তেক বুড়হিঃআ। ইঞ তাঁহেনতে সাঁওতারেনাঃ নুনমারাং বাঞ ক্ষুতি হচআঃআ।
টেন্টে –গানেদা, মা মানাঞমে। বাংখান সারিসারি গিঞ গচ্ উতারঃআ। (রাঃ)
গানে –এয়া, অনকান কাথাদ আলসেম বাঁখেড়া। ইঞ মিনাঞা ত, আলম ভাবনাঃ আ।
টেন্টে — যাঁহানাঃ ব্যবস্হায়মে গানেদা, বাংখান–(রাঃ)
গানে –এয়া থিরঃ আমসে। আচ্ছা, হেঁয়া টেন্টে বকঞ,
টেন্টে –চেৎ গানেদা?
গানে –চেদাঃ এম জেন্ঠেঃ কানা, ডাক্তর ঠেনদ বাম ঞেল হচ আকানা?
টেন্টে –হেঁ, চেদাঃ বাং। আব নআ সোর করেনমা হেঁগে, হানা বাঁকুড়ারেন সেঁড়া ডাক্তরঠেন হঁঞ ঞেল হচ আকানা।
গানে –ডাক্তরদ চেৎক লাইকেদা?
টেন্টে –লাইকেদাক –ভাগে ভাগে জম ঞুয়মে আর নআ ভাইটামিনক কিরিঞ কাতে জমমে, এন্ডেখানগেম মটা উতারঃআ। এঙ্গাতে –,’মিৎ ফাত্য়াঃ গান ‘ভাইটামিন ইঞ জমকেৎ রেহঁ উকুরিঞ মটা লেনা?
গানে –আডি ভাবনা রেয়াঃ কাথাদয়া। (থিরঞঃ কাতে) আচ্ছা হেঁয়া, –
টেন্টে –চেৎ গানেদা?
গানে –অঝা কঠেনদ বাম ঞেল হচলেদা? পালেন যাঁহানাঃ লাগান ভাজান —
টেন্টে –ধুর্ ধুর্, উনকু অঝা কআঃ কাথাদ আলম লাইআ। এঙ্গাতে, ‘মিৎকুড়য়া’ সিম গেক চাবায়েনা। আর হুঁসিৎ হুঁসিৎতে মটামা সাঁগিঞ রেয়াঃ, তাঁহুগিঞ জেন্ঠে ইদিয়েনা। গানেদা —
গানে –চেৎ?
টেন্টে –নিতোঃদ আমগে যাঁহানাঃ ব্যবস্হায়মে, বাংখান —
গানে –ডাক্তর-অঝা বাংক গান লেদা, ইঞকিঞ ‘গান ‘আ?
টেন্টে –হেঁয়া গানেদা, মাসে গান আম নাহ্ –
গানে –হাপে তবে কাটিচ্ উইহার হচআঞমে। (মিৎঘাড়িচ্ থিরঞঃ কাতে) আচ্ছা হেঁয়া টেন্টে বকঞ, লাইআঞ মেসে —
টেন্টে –চেৎ?
গানে –আঁগাতরা বিছ্না চাটিচ্ খন ঞিদা সাঁডাং হাবিচ্ চেৎকম জম ঞুয়া,?
টেন্টে –আঁগা পায়াররে বিছ্না খন চাটিচ্তরা মিৎগেলাস দাঃ আর মিৎটাং বিড়িঞ ঞুয়া।
গানে –অ্যাঁ !
টেন্টে –হেঁ, আর দাতানি আব্ হুতুমকাতে বাস্কে দাঃমাডি, অনাতায়ম —
গানে –চেৎ?
টেন্টে –তোপোবাড়া কাতে আর কেদোঃহঁ দাঃমাডিগে। অনাবেগর –
টেন্টে –দিনাম তারাসিঞ আকানসে তারাবোতোল পাউরা।
গানে –বাহ্ বাহ্, নঃঅয় চয়া ভাগেগেম জমঞুয়া, এনহঁ চিকাতেদ বামমটাঃ কানা?
টেন্টে –মাবুঝাও মে।
গানে –আচ্ছা টেন্টে বকঞ, দাঃসেৎ গেয়ামসে?
টেন্টে –হেঁ, বার বেড়া।
গানে –হুম্ ম্ ম্ ম্ ম্, নঃঅ নআ খাতিরগে বাম মটাঃ কানা।
টেন্টে –বাঞ বুঝাও লেদা?
গানে –এয়া, আমদ যাঁহাতিনাঃ ভাগেভাগে জমঞুয় মেসে সানামাঃ তাব্ হরাঃ কানা। আদ চিকাতেদম মটাঃআ?
টেন্টে –অ্যাঁ ! অনাতে?
গানে –বাখাচ্ দ। মাসে উইহারমে, আমযাঁহাকম জমঞুয় এদা, সানামাঃ যুদি আমাঃ হড়মরে তাপুঃ তাঁহেকঃআ, তেহেঞতে ‘হাতী লেকায়াম মটাকঃদ ‘।
টেন্টে –হুঁ -ঠিক্ কাথাগেম লাই আকাদা গানেদা। অনাতেয়া বাঞ মটাঃ কানা। আচ্ছা গানেদা –
গানে -চেৎ?
টেন্টে –তাহলে চেৎইঞ চিকায়া?
গানে –চেৎআদ, অনা দাঃসেৎ বন্দয়মে, এন্ডেখানগেম মটাঃআ।
টেন্টে –ঠিক্ গেয়া লাহাতে অনা দাঃসেৎগে বন্দয় হোয়োঃআ। এঙ্গাতে নআ হুডিঞ হুডিঞ বেপার, ডাক্তর সে অঝা বাংক সাব্ দাড়েয়াদা। ধুর্ ধুর্, নোকো সানামক সাঁওতা গড়াখন ঝড়া ওডোক্ কাক হোয়োঃআ।
গানে –হেঁ বকঞ, সারি কাথাগেম লাই আকাদা।
টেন্টে –হেঁ বাংখান, ডাক্তরক বাংদ চেতান পুথিক পাড়হাএ বাংদ চেৎ। আর ওনকো অঝাকমা রোগ আজারসেৎ বাং নজর কাতে, খালি পাউরা বোতোল আর সিমসাঁডি সেৎগে নজর তাক। মাঝে, আমদ চেৎলেকা রোগএম সাব্ ঞাম কেদা। অনাতেগে —
গানে -চেৎ?
টেন্টে –যাঁহালেকান আনাট্ গে আডি আলগাতেম সলহে গানতে, সানামহড় গানেক মেতামা। (লাঁদা) তেহেঞ এনা সারিতেৎ ইঞ বুঝাও ঞামকেদা। আচ্ছা গানেদা –
গানে -চেৎ?
টেন্টে –দাঃসেৎ বন্দ লেখানগিঞ মটাঃআ?
গানে -হুঁ।
টেন্টে –বাহুহঁক ইমাঞা?
গানে –একদম। অনেঞ মেতামকানদ -বাহুরেন এঙ্গাৎক এমন লাইনক এমা, দুওয়ার গেক লসৎ উতার তামা।
টেন্টে –নআ কাথা আঁজমকাতেী, আডি রাওআল ইঞ বুঝাও কেদা। আলেঅড়াঃ হড় তেহেঞ কেদোঃদ, রহড় দাকা হচকআ আর লগন জমবাড়া কাতে ঘাঁজ্লং পারকমরে সাঁডাং কাতে, সুকালি ঘাঁরঞ্জ রেনাঃ কুকমুঞ ঞেলা। গানেদা —
গানে –মা লাইমে বকঞ।
টেন্টে –ইয়া, মা-নে -মিৎটাং কাথা –‘ওসোরিঞ’ কানা।
গানে –অ্যাঁ !ওসোরেৎ মেয়া? উঁহুঁহুঁ -দো দো লগন দাড়হদ্ মে, বাংখান যাঁহা লেকাম বুজুর এমান লেখান, সানামাঃ ‘লন্ডভন্ড ‘গদঃআ।
টেন্টে –ধাট্, এয়া অনাদ বাং –
গানে –তবে?
টেন্টে –এয়া কাথা লাই ওসোর আকাদিঞা।
গানে –আ -কাথা। ইঞদঞ মেনএদা –আচ্ছা, মাতবে -চেৎকাথা লাই ওসোর আকাৎমেয়া? লা়াইমে।
টেম্টে –ইয়া মানে, হেঁয়া গানেদা, আমাঃ নআ ‘টুপলাঃ’বহঃরে চিকাতে উনাঃ বুরধি তাম?
গানে –অ -অনাকাথা ।(লাঁদা) সানামাঃইঞ লাইআমা। অনালাহা -আমিঞ ‘কুস্টান ‘লেমগে।
টেন্টে –এয়া গানেদা, কুস্টান কুস্টানদ বাং ভায়।
গানে –ধুর্ ভোত্ড়ো, এয়া কুস্টান মানে ‘পশ্ন ‘মানে কুকলি ‘।
টেন্টে -অ -কুকলি। মাতবে -চেৎতাম কুকলি?
গানে -হেঁয়া টেন্টে বকঞ, আমদ জানাম লেনাম অকারে?
টেন্টে -ইঞ বাবাঃয়ো পাটয়া গালাং গলাং এ লাই আদিঞ তাঁহে, ইঞাঃ জানাম আব নআ ‘টটকডি’ রেগে।
গানে -টটকডি? তারমানে -রসপাল রেন ধাইবুডহি, হুঁঃ -আদ চিকাতে বুরধিদ হোয় আমা?
টেন্টে -চেৎলেকা? বাঞ বুঝাও লেদা?
গানে -এয়া, আম যেখন বসমতাম লেবেদ্ লেদা, উন উনি আকাট্ মুখ্যু ধাই বুডহি হালাং কাতেয় আঁজ্লে রাকাব্ লেৎমেয়া মাসে, আদ চিকাতে বুরধি হোয়আমা?
টেন্টে -অ্যাঁ !অনাতে?
গানে -বাথাচদ।
টেন্টে –অ -অনাতেয়া -।হুঁ –ঠিক্ কাথাগেম লাইআকাদা। আচ্ছা গানেদা -,আমদয়া অকারেম জানামলেনা?
গানে –ইঞ? (লাঁদা) বর্ধমানরে।
টেন্টে -(হাহাড়াঃ) ব র ধ মা ন!
গানে -হেঁ। এয়া আমতম বাড়ায়া, ইঞবাবা পুলিশরেয় চাকরি তাঁহে?
টেন্টে- হেঁ বাড়ায়াঞ।
গানে -উনদ বর্ধমান রেলে তাঁহেকানা। ইঞ বসমতাঞ লেবেদ্ কেৎতায়ম, বর্ধমান হাসপাতাল রেন শিক্ষিত আর ঞেলজং চরক্ নার্স এ আঁজ্লে রাকাব্ লিদিঞা। অনাতে –(লাঁদা)
টেন্টে -অ -অনাতেয়া আমাঃ উনাঃ বুরধি তাম, তেহেঞ এনাঞ বুঝাও ঞামকেদা। এয়া গানেদা –
গানে -মা লাইমে বকঞ।
টেন্টে -নিয়াবার্ আব নআ ‘টটকডি ‘রে জানাম কাতে, যাঞ ভুল আকাদা, দারায় বার্ দ আদ বাঞ ভুলআ। দারায় বার্ দ ইঞবঁ ‘কোলকাতা ‘রিঞ জানামঃ আ, এন্ডেখান -ইঞহঁ আমলেকা বুরধি হোয় আঞা সে চেৎয়া গানেদা? (লাঁদা)
গানে –হেঁহেঁ, ঠিক্ কাথাগেম লাই আকাদা (লাঁদা)
(বানা হড়গে হাদ্ হাদ্ লাঁদা)
———(মুচাৎ) ——–