কুকমু রিনিচ কুড়ি উনি দ
বাপ্পাদিত্য বেসরা
ভর তিকিন সেতোং
বাহু গিদার জাপিৎ বিছনারে
বাগি ওটো কাতে
ইঞ দঞ তাড়াম আকাদা
বুরু ধাসনা ফেডঃ হরতে
উনি সাঁও পান্তে পান্তে।
তিনাঃ মজ
লেমেঞ লাবিৎ লিল শাড়ি
উসুল লবয় হড়মরে
শোভা আকাদায়
ইঞ দঞ তাড়াম আকাদা
বাং বাডায় হর হরতে
হেঁদে ধিরি সিরম দাঁধি জাপাঃ
উনি সাঁও পাউড়ি গিডি গিডি জড়তে।
ঘানে উনিসেৎ
মেঁৎ মেঁৎ জাপাঃ কয়ঃ
মুলুচ লুটিয়াতেঃ
ডাঁডারে তি ককে
তাড়াম ইদিয়েদালিঞ লাতার
গাডা বালি আর খেত বৌদ হাবিচ।
সারিগে আডি মজ এ
ঞেলঃ কানা তেহেঞ,
ইঞাঃ
উনাঃ সোররে চিকাতে তেহেঞ উনি!!!
মনেয় কুশিঃ কুশিঃ কানা।
উনদিন চেদাঃ বাম সেটেরলেনা
“ইঞরেন মা এরা গিদার অড়াঃরে
আমাঃ হঁ ত হরাসিরে সিঁদুর”।
আর হঁ সোর কাতে চঃ চেরেচ সানা লিদিঞা
তেহেঞ দ আরহঁ
“আডিগে মজেম ঞেলঃ কানা
বুজ কাতে হঁ চেদাঃ
চেৎ কো চ লাং এপেম কান,
পালে বঙ্গা কুড়ি কানাম আম দ?”
আচকাঞ এভেনেনা
পারকম রেয়াঃ তায়ম সেৎরে
কসবাৎ কাতে
ভর তিকিন নংকাঞ কুকমু জং কান।