” ᱫᱩᱯᱩᱞᱟ.ᱲ ᱵᱚᱱ ᱛᱟᱸᱦᱮᱱ – ᱜᱚᱯᱚᱲ ᱵᱚᱱ ᱠᱟ.ᱢᱤ “- M. Nepolian Tudu

” ᱚᱞ ᱫᱚ ᱵᱟᱨᱟᱦᱤ ᱠᱟᱱ
ᱟᱵᱚᱭ ᱛᱚᱞᱫᱚᱦᱚ ᱵᱚᱱᱟ
ᱢᱟᱨᱥᱟᱞ ᱦᱚᱨᱛᱮᱭ ᱚᱨ ᱤᱫᱤ ᱵᱚᱱᱟ ” ᱾ ᱟ.ᱰᱤ ᱫᱩᱠᱷ ᱨᱮᱱᱟᱜ ᱠᱟᱛᱷᱟ ! ᱜᱩᱨᱩᱜᱚᱢᱠᱮᱭᱟᱜ ᱱᱚᱣᱟ ᱠᱟᱛᱷᱟ ᱡᱚᱣᱟᱣ ᱚᱪᱚᱭ ᱞᱟ.ᱜᱤᱫ, ᱦᱮᱸ ᱪᱚ ᱟᱨ ᱛᱤᱱᱟ.ᱜ ᱥᱮᱨᱢᱟ ᱛᱟᱺᱜᱤ ᱦᱳᱭᱳᱜ ᱛᱟᱵᱚᱱᱟ ᱾ ᱢᱟᱨᱥᱟᱞ ᱰᱟᱦᱟᱨᱛᱮ ᱟᱵᱚᱭ ᱰᱟᱨᱦᱟᱣ ᱟᱠᱟᱫᱵᱚᱱ ᱨᱮᱦᱚᱸ ; ᱢᱤᱫ ᱥᱤᱞᱤᱥᱩᱛᱟ.ᱢᱛᱮ ᱛᱚᱯᱚᱞ ᱢᱤᱫᱠᱟᱛᱮ ᱮᱠᱟᱞ ᱵᱟᱝᱵᱚᱱ ᱛᱟᱦᱮᱸᱫᱟᱲᱮᱭᱟᱜ ᱠᱟᱱᱟ ᱾ ᱡᱟᱦᱟᱱᱟᱜ ᱵᱟᱝ ᱡᱟᱦᱟᱱᱟᱜ ᱱᱟᱜᱚᱥᱛᱮ ᱥᱟᱱᱛᱟᱲᱵᱚᱱ ᱯᱟ.ᱴᱩᱵ ᱚᱸᱰᱚᱠᱚᱜ ᱠᱟᱱᱜᱮᱭᱟ ᱾ ᱚᱠᱟ ᱡᱚᱠᱷᱮᱡ ᱫᱚ ᱫᱷᱚᱨᱚᱢ ᱤᱫᱤᱠᱟᱛᱮ, ᱚᱠᱟ ᱚᱠᱛᱚ ᱨᱮᱫᱚ ᱦᱩᱞᱢᱟᱦᱟᱸ ᱢᱟᱱᱟᱣ ᱤᱫᱤᱠᱟᱛᱮ ᱾ ᱚᱱᱟ ᱥᱟᱶᱛᱮ ᱟᱨ ᱢᱤᱫᱴᱟᱝ ᱤᱥᱩ ᱤᱫᱤᱠᱟᱛᱮ ᱨᱮᱭᱟᱲ ᱫᱟᱱᱟᱝ ᱵᱷᱤᱛᱤᱨ ᱞᱟ.ᱲᱦᱟ.ᱭ ᱞᱮᱛᱟᱲ ᱟᱠᱟᱱᱟ ᱾ ᱚᱱᱟᱫᱚ ᱦᱳᱭᱳᱜ ᱠᱟᱱᱟ ᱜᱩᱨᱩᱜᱚᱢᱠᱮᱭᱟᱜ ᱡᱟᱱᱟᱢ ᱢᱟᱦᱟᱸ ᱤᱫᱤᱠᱟᱛᱮ|

ᱦᱚᱞᱟ ᱢᱮᱱᱮᱫ ᱕ ᱢᱮ ᱫᱤᱥᱚᱢ ᱡᱟᱠᱟᱛᱨᱮᱱ ᱥᱟᱱᱛᱟᱲ ᱦᱚᱯᱚᱱ ᱟᱰᱤ ᱢᱟᱱᱚᱛ ᱥᱟᱞᱟᱜ, ᱜᱩᱨᱩᱜᱚᱢᱠᱮᱭᱟᱜ ᱡᱟᱱᱟᱢ ᱢᱟᱦᱟᱸᱠᱚ ᱢᱟᱱᱟᱣ ᱥᱟᱨᱤ ᱠᱮᱫᱟ ᱾ ᱮᱱᱦᱚᱸ ᱱᱚᱣᱟ ᱤᱫᱤᱠᱟᱛᱮ ᱴᱚᱴᱷᱟᱠᱤᱭᱟ. ᱵᱷᱮᱞᱮᱜᱮᱫ ᱛᱟᱸᱦᱮᱭᱮᱱ ᱜᱮᱭᱟ ᱾ ᱜᱩᱨᱩᱜᱚᱢᱠᱮᱭᱟᱜ ᱡᱟᱱᱟᱢ ᱫᱚ ᱜᱩᱨᱩᱠᱩᱱᱟ.ᱢᱤ ᱨᱮ ᱾ ᱱᱚᱣᱟ ᱤᱫᱤᱠᱟᱛᱮ ᱪᱟᱸᱫᱳ ᱤᱯᱤᱞ ᱥᱟᱵᱽᱠᱟᱛᱮ ᱟᱰᱤ ᱜᱚᱴᱟᱝ ᱞᱮᱠᱷᱟ ᱛᱩᱞᱟ.ᱡᱚᱠᱷᱟ ᱥᱟᱢᱟᱝ ᱥᱚᱫᱚᱨᱚᱜ ᱠᱟᱱᱟ ᱾ᱦᱮᱸ ᱥᱟ.ᱨᱤ ᱠᱟᱛᱷᱟᱜᱮ ᱱᱚᱣᱟᱦᱚᱸ ᱾ ᱢᱮᱱᱠᱷᱟᱱ ᱱᱚᱣᱟᱫᱚ ᱥᱟᱱᱛᱟᱲ ᱠᱚᱣᱟᱜ ᱥᱟ.ᱜᱩᱱ ᱠᱟᱢᱤᱦᱚᱨᱟᱧᱮᱫᱚ ᱡᱟ.ᱱᱤᱡ ᱡᱟᱸᱜᱮᱫᱚ ᱵᱟᱝᱜᱮᱭ ᱥᱤᱨᱡᱟ.ᱣᱼᱟ ᱾ ᱮᱱᱦᱚᱸ ᱱᱚᱣᱟ ᱤᱫᱤᱠᱟᱛᱮ ᱢᱤᱫᱵᱟᱨ ᱠᱟᱛᱷᱟᱧ ᱢᱮᱱᱞᱮᱜᱮ ᱾

ᱦᱮᱸ ᱜᱚᱢᱠᱮ ᱠᱚ ᱱᱤᱛ ᱟᱵᱚ ᱥᱟᱱᱛᱟᱲ ᱦᱚᱯᱚᱱ ᱟᱵᱚᱣᱟᱜ ᱩᱯᱨᱩᱢ ᱟᱛᱮᱵᱚᱱ ᱞᱟᱦᱟᱜ ᱠᱟᱱᱟ, ᱟᱰᱤ ᱱᱟᱯᱟᱭ ᱠᱟᱛᱷᱟ ᱾ᱢᱮᱱᱠᱷᱟᱱ ᱱᱚᱣᱟ ᱤᱫᱤᱠᱟᱛᱮ ᱢᱤᱫᱨᱩᱛᱤ ᱜᱟᱱᱦᱚᱸ ᱵᱤᱱᱛᱤᱨᱤᱡ ᱟᱞᱚᱜᱮ ᱥᱮᱴᱮᱨᱚᱜᱼᱢᱟ ᱾ ᱪᱮᱫᱟᱜ ᱥᱮ, ᱱᱚᱣᱟ ᱫᱚ ᱢᱟᱨᱟᱝ ᱟᱱᱟᱴᱫᱚ ᱮᱠᱟᱞ ᱵᱟᱝᱠᱟᱱᱟ ᱾ ᱱᱚᱝᱠᱟ ᱠᱟᱛᱮᱜᱮ ᱵᱮᱝᱜᱚᱞ ᱯᱚᱱᱚᱛᱨᱮ, ᱥᱟᱱᱛᱟᱲᱤ ᱢᱤᱰᱤᱭᱟᱢᱛᱮ,ᱚᱞᱪᱤᱠᱤ ᱟᱠᱷᱚᱨᱛᱮ ᱚᱞ ᱠᱟᱛᱮ ᱱᱮᱥ ᱠᱷᱟᱱᱜᱮ ᱯᱟ.ᱴᱷᱩᱣᱟ.ᱠᱚ ᱠᱚᱞᱮᱡᱽ ᱨᱮᱱᱟᱜ ᱜᱟᱱᱟᱰᱤ ᱠᱚ ᱞᱮᱵᱮᱫ ᱮᱫᱟ ᱾ᱟᱰᱤ ᱜᱚᱨᱚᱵᱽ ᱨᱮᱱᱟᱜ ᱠᱟᱛᱷᱟ ᱾ ᱱᱟᱣᱟ ᱢᱤᱫ ᱱᱟᱜᱟᱢ ᱛᱮᱭᱟᱨ ᱟᱠᱟᱱᱟ ᱾ ᱟᱨ ᱱᱚᱣᱟ ᱥᱟᱜᱩᱱ ᱞᱟᱦᱟᱱᱛᱤ ᱰᱟᱦᱟᱨ ᱨᱮᱫᱚ, ᱜᱩᱨᱩᱜᱚᱢᱠᱮᱭᱟᱜ ᱡᱟᱱᱟᱢ ᱢᱟᱦᱟᱸ ᱨᱮᱱᱟᱜ ᱠᱩᱠᱞᱤᱫᱚ ᱵᱟᱝ ᱛᱟᱦᱮᱸᱠᱟᱱᱟ ᱾ᱥᱩᱢᱩᱝ ᱜᱚᱢᱠᱮ ᱪᱮᱛᱟᱱ ᱯᱟ.ᱛᱭᱟ.ᱣ ᱛᱟᱦᱮᱸᱠᱟᱱᱟ ᱾ ᱟᱨ ᱥᱟᱶᱛᱮ ᱛᱟᱦᱮᱸᱠᱟᱱᱟ ᱪᱤᱠᱤ ᱫᱩᱞᱟ.ᱲᱤᱭᱟ. ᱠᱚᱣᱟᱜ ᱥᱟᱜᱩᱱ ᱟᱛᱟᱝ ᱫᱟᱨᱟᱢ ᱾ᱛᱟᱦᱮᱸᱠᱟᱱᱟ, ᱪᱤᱠᱤ ᱯᱟᱨᱥᱟᱞᱤᱭᱟ. ᱠᱚᱣᱟᱜ ᱚᱥᱟᱵᱷᱮᱲ ᱮᱱᱮᱢ ᱾ᱱᱚᱣᱟᱠᱚ ᱥᱟᱱᱟᱢ ᱫᱩᱞᱢᱤᱫ ᱠᱟᱛᱮ ᱛᱮᱭᱟᱨᱮᱱᱟ ᱚᱜᱚᱢ ᱫᱚᱨᱭᱟ ᱥᱮᱸᱜᱮᱞ ᱡᱟ.ᱛᱤ ᱥᱟᱱᱛᱟᱲ ᱠᱚᱣᱟᱜ ᱚᱞᱚᱜ ᱠᱟ.ᱨᱫᱷᱟ.ᱱᱤ ᱾

ᱚᱱᱟᱛᱮ ᱫᱮᱞᱟᱵᱚᱱ ᱫᱤᱥᱚᱢ ᱡᱟᱠᱟᱛᱨᱮᱱ ᱥᱟᱱᱛᱟᱲᱠᱚ, ᱜᱩᱨᱩᱜᱚᱢᱠᱮᱭᱟᱜ ᱥᱟ.ᱨᱭᱟ.ᱲ ᱵᱚᱱ ᱯᱟᱸᱡᱟᱭᱟ ᱾ ᱥᱟᱱᱟᱢᱠᱚ ᱪᱤᱠᱤᱵᱚᱱ ᱪᱮᱫᱼᱟ ᱟᱨᱵᱚᱱ ᱪᱮᱫ ᱟᱠᱚᱣᱟ, ᱪᱮᱫ ᱚᱪᱚ ᱠᱚᱣᱟ ᱾
ᱫᱷᱩᱲᱤᱼᱫᱷᱟ.ᱨᱛᱤ ᱨᱮᱱᱟᱜ ᱱᱚᱣᱟ ᱞᱚᱞᱚ ᱦᱚᱭ ᱛᱟᱞᱟᱨᱮ, ᱟᱵᱚ ᱥᱟᱱᱛᱟᱲ ᱠᱚᱣᱟᱜ ᱡᱟ.ᱛ ᱞᱮᱠᱟᱛᱮ ᱵᱟᱧᱪᱟᱣ ᱛᱟᱦᱮᱸ ᱞᱟ.ᱜᱤᱫ ; ᱡᱩᱢᱤᱫᱚᱜ ᱞᱟ.ᱜᱤᱫ ᱥᱩᱢᱩᱝ ᱢᱤᱫᱴᱟᱝᱜᱮ ᱦᱚᱨ ᱢᱮᱱᱟᱜᱼᱟ, ᱚᱱᱟᱫᱚ
ᱚᱞᱪᱤᱠᱤ ᱼᱼᱼᱼᱼᱚᱞᱪᱤᱠᱤᱼᱼᱼᱼᱼᱼᱼ ᱚᱞᱪᱤᱠᱤ ᱼᱼᱼᱼᱼᱼᱚᱞᱪᱤᱠᱤ ᱾

ᱢᱩᱪᱟ.ᱫ ᱨᱮ ᱱᱚᱣᱟᱜᱤᱧ ᱢᱮᱱᱼᱟ , ᱥᱟᱱᱟᱢᱠᱚ ᱚᱱᱛᱚᱨ ᱛᱟᱞᱟᱨᱮᱵᱚᱱ ᱛᱷᱟᱯᱚᱱᱼᱢᱟ, ᱜᱩᱨᱩᱜᱚᱢᱠᱮᱭᱟᱜ ᱢᱟᱱᱛᱟᱨ ᱵᱟᱨᱟᱵᱟᱨᱤ ᱜᱩᱨᱩ ᱟᱲᱟᱝ
” ᱚᱞ ᱫᱚᱵᱚᱱ ᱥᱮᱬᱟᱭ ᱜᱮ
ᱡᱟ.ᱛᱤ ᱫᱷᱚᱨᱚᱢ ᱵᱚᱱ ᱛᱤᱸᱜᱩᱭᱜᱮ
ᱫᱷᱟ.ᱨᱛᱤᱨᱮ ᱦᱚᱲ ᱞᱮᱠᱟᱵᱚᱱ ᱛᱟᱦᱮᱸᱱᱟ ᱾᱾” ___________*****___________