কুকলি–অনন্ত কুমার সরেন

বাঁকুড়া গোবিন্দনগর বাসস্ট্যান্ডরে রানীবাঁধ সেৎ চালাঃ বাস গাডীঞ পাঁজায়েৎ কান অক্ত, তায়মসেৎখন তিরলৗ আড়াংতে হহ, ”সোহাগদা ,এ সোহাগদা —
ইঞগেয় হহ অৗঞ কানা। কয়ঃ রুওয়ৗড় কিদৗঞ। ঞেলেয়ৗঞ মিৎ তিরলৗ, মেঁৎরে হরঃ সামানম রঙ্ নানহা ফ্রেম রেয়াঃ চশমা। বহঃ হরাসি ধারেরেনাঃ উপ্ ক নাসে পাঁডুরেনাঃ আহলা ঞেলঃকানা। হৗল্ক১ গুলৗব্ বাহা রঙ্ রেয়াঃ শাড়ীতেয় বাঁদে আকানা। অনা রঙ্ রেয়াঃগে ব্লাউজ হঁ। লেঁগাতিরে ঘড়ি, জজমতিরে বালা। জজম তারেনরে গঃ মিৎটাং হুডিঞ ঞঃ ব্যাগ। মচারে মুলুচ্ লাঁদাআতে ইঞসেৎ গেয় হিজুঃকানা। হেচ্ সোরকাতে লৗইকেদায়, ‘রানীবাঁধ সেৎ বাস এম পাঁজায়েদা থ? ‘
–‘হেঁ। ‘ইঞিঞ লৗইকেদা।
–‘হানে -হান্তেরে মেনাঃ আকাদা।’মেনকাতে অন্তেয় উদুঃকেদা। আরহঁয় লৗই ইদিকেদা ,’আলম চিন্তৗয়া আম লাগিৎহঁ সিট্ ইঞ দহ আকাদা। বাস আড়াঃতে বিলম গেয়া।ইনৗঃতে দেলা চা লাং ঞু লেগে। ‘মিৎ সাঁহেৎতে উনিয় লৗইকেদা।
হাহাড়াঃ কাতেঞ তেঁগো থির আকানা। আসলে, উনিদ বৗঞ ওরোম দাড়েয়ায় কানা। চেৎতায় ঞুতুম? অকারেঞ ঞেল আকাদেয়া? নংকা এমানাঃ দিসৗরেয়াঃ ইঞ রিকৗয়েদা। মেনখান -বাংআ, বৗঞ দিসৗ দাড়েয়াঃ কানা।
হাহাড়াঃ কাতেঞ তেঁগোথির আকানগেতে লৗইকেদায়, ‘সোহাগদা, তেঁগোথির এনদম? দেলা হিজুঃমে। ‘
–‘আচ্ছা মৗই, আমদ ঠিক্ —
–‘বাংএম ওরোম দাড়েয়াঞ কানা , বাংসে?
–‘হেঁ, মানে –আমদ অকয়? মানে চেৎতাম ঞুতুম? আমদ চিকৗতেম বাড়ায় কিদিঞা? ‘নংকান আয়মা কুকলি আচ্ ঠেনিঞ দহকেদা।
–‘হেঁ হেঁ, সানামাঃগিঞ লৗইআমা। নিতোঃদ চল চা দোকানসেৎ লাং বললেনগে। ‘লাঁদালাঁদাতে উনিয় লাইকেদা।
মিৎটাং ছিমছাম ঞঃ চা দোকান রেলিঞ বলয়েনা। বারয়া কাতে জবে লাডু, সিঙাড়া আর চা, আচ্ গেয় বরাত কেদা ।চা ঞু অক্তে আরহঁঞ কুলিকেদেয়া, ”আচ্ছা মৗই, মাসে -আমাঃ ওপরোম এম গৎ অৗঞমে। ইঞমা দিসৗ আচুরকাতে হঁ বৗঞ দিসৗ ঞামলেদা, আমদ অকারেঞ ঞেল আকাৎমেয়া। ‘
–‘ইঞহঁ রানীবাঁধ হাই স্কুল রেগিঞ পাড়হাও আকানা। ইঞ যেখন গেলমিৎ কেলাসরেঞ ভুরতিয়েনা, উনদ আম গেলবার কেলাসরেম পাড়হাঃ কানা। স্কুলরেয়াঃ সেরমা পুরৗও রৗস্কৗ আখড়ারে, আমাঃ অনড়হেঁ অঁড়হে, সেরেঞ ইঞ আঁজম আকাদা। আঁজমকাতে রৗস্কৗ আকানৗঞ। মেনখান -তিসহঁ আমসালাঃ রড় রপড়দ বাং হোয় আকানা। ‘
–‘ও আচ্ছা। চেৎতাম ঞুতুম লৗইমেসে?’
–‘মালিনী, মালিনী মুরমু ।’
–‘মা -লি -নী — উইহৗর রেয়াঃ ইঞ রিকৗকেদা। হেঁ, দিসৗঞামগৎ কিদৗঞ। সানামাঃগে দিসৗরে হেচ্ গৎএনা। অকয়াঃ মচারেচঞ আঁজমলেদা, মালিনীআঃ মালিনবাহা চরক্ চিকন রূপ ঞেলতে, আয়মা কড়াগে দুলৗড়রেয়াঃ পাসিক অডাও লেদা।মেনখান -অকয়হঁ বাংক পাসি দাড়ে কাওদেয়া।
গেলবার কেলাসরেয়াঃ বিনিড্ পাশকাতে, ইঞদ বেসিক ট্রেনিং হাতাও ইঞ সেন এনা। ইনৗতায়ম, মালিনীআঃ চেৎ খবরগে বৗঞ দহ আকাদা। দিনদিনতে উনিদঞ হিড়িঞ সাঁগিঞ কেদেয়া। থিরথারগে মিনৗঞ খাতির মালিনীগেয় কুলিগৎ কিদিঞা, ‘চেলে সোহাগদা , দিসৗ ঞাম কিদিঞাম? ‘
–হেঁ হেঁ, দিসৗ ঞামকেৎ মিয়ৗঞ। আসলে, আডিদিন হোয়গৎ আকানা থ, অনাতে বৗঞ ওরোম দাড়েয়াম কানা। ‘লাঁদা মেশা কাতেঞ লাইকেদা ।
চা ঞু হোয় সৗত্ এনখান, মালিনী গে কাউডিয় মেটাও কেদা। আদ দোকানখন ওডোক্ কাতে সোঝে বাস রেলিঞ দেজ্ এনা। মালিনী যাঁহাঠেন জায়গায় দহ হটলেদা, অঁডেগে পান্তে তেলিঞ দুড়ুপ্ এনা। মালিনী দ জানালা ধারেরেয় দুড়ুপ্ এনা। বাসগাডী আড়াঃরেয়াঃ অক্ত হোয়এন খান, গাডীক আড়াঃ কেদা।
মিৎঘাড়িচ্ তায়ম কুলি কেদেয়াঞ, ‘আচ্ছামৗই,আমদ অকাতেম সেনলেনা? ‘
–‘আম জাঁহারেম হেচ্ লেনা, ইঞহঁ অঁডেগিঞ হেচ্ লেনা। ‘
–‘ইঞমাত নওয়া বাঁকুড়ারে হোয়এন ‘দিসম জাকাৎ অনলিয়ৗ গাঁওতা, পুছিমবাংলা চাঙ্গাআঃ ‘অনলিয়ৗ হেলমেল আখড়ারেঞ হেচ্ লেনা। ‘
-‘হেঁ, ইঞহঁ অঁডেগিঞ হেচ্ লেনা। ‘
–‘সারি! তবে, বৗঞ ঞেললেৎ মেদ? হাহাড়াঃ মেশা ইঞৗঃ কুকলি।
–‘উনৗঃ হড় গাদেলরে চিকৗতেম ঞেলিঞা? তবে, ইঞদঞ ঞেল আকাৎমেয়া। অনা লাগিৎতেগে আম লাগিৎহঁ বাসরে দুড়ুপ্ জায়গাঞ দহ আৎমে তাঁহে। ‘
–ওআচ্ছা।তাহলে -আমহঁম অলবেল গেয়া। মানে -অনড়হেঁ, কৗহনি এমান কম অলগেয়া, বাংসে? ‘
–‘বাংআ সোহাগদা, ইঞদ বৗঞ অলগেয়া। তবে, স্কুলরে পাড়হাঃ অক্তখনগে মিৎবার সান্তাড়ি পুথি পাছামকঞ পাড়হাও গে তাঁহে।মেনগানঃআ গিদরৗ উমেরখনগে, পুথি পাথামক পাড়হাও রেয়াঃ হেওয়া মেনাঃ আকাদা। নিতোঃদ মিৎটাং কুড়ি গিদরৗ কওয়াঃ স্কুলরেঞ পাড়হাও এৎ কওয়া। অনাতে, সেরমারে বার্ -পে গটাং সান্তাড়ি পতব্ হাতাও কাতেঞ পাড়হাওআ। অনাবেগর, আয়মা গটাং পাথাম রেনগে ইঞদ গ্রাহক কৗনৗঞ। সেরমা ভোর ডাক্ তালাতে পাথামক ইঞঠেন হিজুঃআ। অনা পাথাম করেগে ‘অনলিয়ৗ হেলমেল’ রেয়াঃ ঢৗরওয়াঃ ঞেলকাতে, নডেদঞ হেচ্ লেনা। ‘
মালিনীআঃ মচাখন নওয়া কাথা আঁজমকাতে, আডিঞ রৗস্কৗয়েনা। নাহাঃমা জৗসতি হড়গে সান্তাড়ি সাঁওহেৎ পাথামক বাংক পাড়হাও এদা। পাপাড়হাওক বানুঃ আকাৎক খাতিরগে, মিৎবার পাথাম বেগর আয়মা পাথামগে লেতাড়দ বাং উছৗনঃ রানা। আদম পাথামকরেনাঃ উছৗন মাত আধান দিনরেগে হাপিৎ উতৗর আকানা। সারিগে, মালিনী লেকা যুদি আডি সাঁগে হড় রৗস্কৗসালাঃ সান্তাড়ি সাঁওহেৎ পাথামক পাড়হাও কেয়া, তাহলে -পাথামকরেনাঃ উছৗন যেলেকা লেতাড় ইদিকঃআ, অনকাগে, সান্তাড়ি সাঁওহেৎ বাগওয়ান হঁ দালায় দালায় বাহা কঃআ।
মালিনীআঃ মলং হরাসি চিঁকাড়গে ঞেলকাতেহঁ কুলিগৎ কেদেয়ৗঞ ,’আচ্ছা মৗই, আমদ অকারেক গঙ্ আকাৎ মেয়া? ‘চেদাঃসে, নাহাঃ মা আয়মা কুড়ি গিদরৗগে জাঁওয়ায় কাতেহঁ বাংক সিঁদুরঃ কানা।
মালিনী জানালাতে বাহরে সেৎ কয়ঃ কেদায়। মিৎ ডঁডেক্ তে পারম চালাঃকান চিতৗারক ঞেলকাতে, মেঁৎ এ রুওয়ৗড় আগুকেদা। নাসে বহঃ তিরুব্ কাতে মালিনীয় লৗইকেদা, ‘বাংআ সোহাগদা, ইঞাৗঃ বাপলাদ বাং হোয় আকানা ।অবিশ্য আয়মা জায়গা খনগে ইঞ ঞেঞেল নাওয়া পেড়াদক হেচ্ লেনগেয়া, মেনখান …
–‘চেৎ? বাংক কুশিয়াৎ মেয়া? হাহাড়াঃ! ঞেলজংতেহঁম মঁজ্ গেয়া।অনাবেগর, মিৎটাং স্কুলরেহঁম চাকরি রানা, এনহঁ -চিকৗতে বাংক কুশিয়াৎ মেয়া? ‘হাহাড়াঃ কাতে ইঞিঞ লৗইকেদা।
–‘বাং, বাংক কুশিলেনা অনকাদ বাংআ। ‘
–‘তবে?
–‘কুশিদ জতগেক কুশিলেন গেয়া। মেনখান –জত জাঁওয়ায় বাবু লাগিদঃ কানগেক লাইকেদা, ‘কুড়ি গিদরা ঞেলকাতে কুসিমা কুশিগে, তবে -লৗ়ইতেনাঃদ নওয়া, যুদি কুড়ি গিদরৗ চাকরিয় বাগিয়া, এন্ডেখানগে বাপলাদ হোয়োঃআ। ‘আঁজমকাতে, হাহাড়াঃ ইনৗঞ। তিনাঃ কষ্ট সাহাও কাতে, অলঃ পাড়হাও ইঞ সেঁড়া কেদা, আর আডি রিকৗকাতে চাকরি হঁঞ ঞামআকাদা। বাপলা খাতিরতে অনা ঞাম চাকরিঞ বাগিকাঃআ? ইঞৗঃ মনে সায় বায় এমলেদা। চাকরি বাগি বাঞ রেবেনলেন খাতিরগে, ইঞৗঃ বাপলা বাং হোয়আকানা।
–‘অ্যাঁ! লৗইয়াম চেৎ? ‘হাহাড়াঃ ইনৗঞ।
–‘সারিগে সোহাগদা, আব সাঁওতারেন চাকরিয়েৎ কড়াকদ আয়মা সেচেৎ শিকনৗত্ ক আর্জাও আকাৎ সে ডিগ্রীক হামেট আকাৎ নংকান কুড়ি গিদরৗ গেক বাপ্লায়েৎ কওয়া। মেনখান -ইঞলেকান চাকরিকান কুড়ি গিদরৗক বাপলা বাংক রেবেন কানা। আসলে, ওনকোক খজ্ কানা, সেচেৎ শিকনৗত্ বাহু অফিসরে কলম বাং সাব্ কাতে, অড়াঃ সংসাররে চাটু খুন্তিগেয় সাব্ মা। সংসাররেয়াঃ সানাম ভৗরিয়াগেয় দিপিল মা। ‘
–‘মেনখান মৗই, ইঞমা মিৎবার চাকরিয়ান কুড়ি গিদরৗঞ বাড়ায় কওয়া, যাঁহায়াঃ বাপলা হোয় আকানা। আর অড়াঃ সংসার সাঁওতে চাকরি, বানার রেয়াঃ আঁগিভার রৗস্কৗসালাঃক দিপিল আকাদা আর নায়তে নাপায়তে সংসার সুসৗরকাতে জিয়নক খেমাও এদা।
–‘হেঁ, নওয়াদ সারিয়াঃগেম লৗই আকাদা সোহাগদা।মেনখান -ওনকোওয়াঃ লেখাদ তিনৗঃ? আডিগেক কম আ। নোকোখনাঃ আডি জাসতি চাকরিয়ান কুড়ি গিদরৗ বাপলাকাতে সংসার জিয়নরেয়াঃ কুকমুক ঞেল আকাদা। মেনখান -ঞেল ঞেলতে বাপলারেয়াঃ উমেরগে পারম এনা, কুকমুদ বাং সারিলেনা। দিন দিনতে সেতাঃ শিশির সাড়বাহা রূপ, গশ তলমজঃ কানা। যাঁহারে জম -ঞু, হরঃ -বাঁদে, গিদরৗ-পিদরৗ আতে সুলুক্ সংসার জিয়ন খেমাও রেয়াঃ কাথা, অঁডে দুক্ আর কাঁহিসতে জিয়নক খেমাও এদা ।’মেনকাতে মালিনী জেলেঞ সাঁহিচ্ সাঁহেৎ এ আড়াঃকেদা।
মালিনীআঃ কাথা আঁজমকাতে হাহাড়াঃ ইনৗঞ। সান্তাড় সাঁওতারেয়া নাহাঃ আরুঃকান অক্তরেনাঃ হৗল হুবিগৎ বৗঞ বাড়ায় ঞাম আকাৎতে, আডি লাজাওগিঞ বুঝৗও কেদা। মেনখান -সারিকাথা লৗইতে, উনৗঃ গাহির সালাঃ তুনখি তলাশকাতে বাড়ায় রেয়াঃহঁ বৗঞ রিকৗ আকাদা। দাকা টুকুচ্ রেয়াঃ মিৎ বারয়া দাকা তুনুমকাতে টুকুচ্ দাকা ইসিন আকানা বাড়ায়কেৎ লেকা, আব সাঁওতারেন মিৎবার্ চাকরিয়ান কুড়ি গিদরৗকওয়াঃ বাপলা ঞেলকাতে ইঞহঁ মনে লিদৗঞ, জানিচ্ নংকাগে জত চাকরিয়ান কুড়ি গিদরাৗকওয়াঃগে বাপলা হোয়োঃকানা। মেনখান -অনাযে বাং সারিয়া, অনাদ মালিনীআঃ কাথা খনগিঞ বাড়ায় ঞামকেদা।
ইঞাঃ মনেরে নংকা কুকলি হিজুঃকানা, চেদাঃ? চেৎখাতির চাতরিকান কড়াক, চাকরিয়েৎ কুড়ি গিদরৗ বাপলা বাংক রেবেন কানা? চাকরিয়ান কুড়ি গিদরৗ বাপলা লেকখান, চাকরি খাতিরগে হাপেন হাঁডেনাডে তাঁহেন হোয়োঃআ। বাপলাকাতে যুদি মিৎতেগে বাংএম তাঁহে দাড়েয়াদা, তাহলে -চাকরিয়ান কুড়ি গিদরৗ বাপলারেয়াঃ চেৎ লৗকতি? ওনকো কি নংকাক মনেয়েদা??সে -এটাঃ আরহঁ যাঁহানাঃ অজে মেনাঃ আকাদা??
নংকা হিনৗনিয়ৗঞ উইহৗর আচুর এদা,অনকান অক্ত মালিনীয় লৗইকেদা, ‘সোহাগদা, যুদি নংকাগে চালাও ইদিঃআ, তাহলে -আয়মা সেচেৎ শিকনাত্ চাকরিকান কুড়ি গিদরৗ আব সাঁওতা তালারে ডৗঙ্গুয়ৗতেক বুড়হিঃআ। সাগাল সাগাল কুড়ি গিদরৗ ডৗঙ্গুয়ৗতে তাঁহেন গেকি সাঁওতা উৎনৗঃরেয়াঃ চিতৗর? ?
মিৎঘাড়িচ্ থির ঞঃকাতে আরহঁয় লাইকেদা, ‘আব সানাম কগেবন বাড়ায়া, যুওয়ৗন উমেররে কুড়ি গিদরৗগে হোয়োঃ চাহে কড়াগিদরৗগে হোয়োঃ, মনে -জিউয়ী রেনাঃ সুক্ দুক্, রমজ্ রৗস্কৗ চেপেচ্ হাপাটিঞ লাগিৎ মিৎ গাতে সে জুরিয় লৗকতিঃআ। অনালাগিৎতেগে হারা যুওয়ৗন উমের রেক বাপলা কাকওয়া। মেনখান -আয়মাদিন তাঁগিতাঁড়াঃ কাতেহঁ যুদি যুওয়ৗন কুড়ি গিদরৗআঃ বাপলা বাং হোয়োঃআ, উনদ উমের রেনাঃ উরগুম এলাং দুলৗড় জৗড়িতে তিরপি রেয়াড় লাগিৎ, সাঁওতা অৗন অৗরি সীমৗ আড়ে তালমকাতে, জৗত্ ধরম বাং বাছাওকাতে, এটাঃ জৗত্ সালাঃক ওডোক্ চালাঃআ সে ক বাপলাঃআ, উন -সাঁওতারেনাঃ মৗন বাং খাটঃআ থ?? ‘
চেৎ ইঞ লৗইআ? কাথাগে হাতড়ৗওতে বৗঞ ঞাম এদা। অনাতে বহঃ তিরুব্ কাতেঞ দুড়ুপ্ থির আকানা। মালিনীগেয় রড় সাডে কেদা। আচ্ছা সোহাগদা লৗইমেসে, ‘সান্তাড় সাঁওতারেন আলে কুড়ি গিদরৗক অলঃরেয়াঃ ডিগ্রীলে হামেট্ আ, একেন ভাগে জাঁওয়ায় ‘মেনেক্ চাকরিয়ান জাঁওয়ায় ঞাম লাগিৎগে??? ‘
চাপচুপ্ ইঞ দুড়ুপ্ থির আকানা। চেদাঃসে, চেৎ তেলাঞ এমা? মালিনীআঃ কুকলিরেনাঃ যথাৎ তেলা ,ইঞদ বৗঞ এম দাড়েয়াদা। এহো, সান্তাড় সাঁওতারেন সেচেৎ শিকলৗত্ চাকরিয়ান কড়াক, মালিনীআঃ নওয়া কুকলিরেনাঃ যথাৎতেলা, আপেপে এম দাড়েয়াঃআ থ??? ”
……………………মুচৗৎ …………………………