বুরু ধাসনা – গুলন চন্দ্র মুর্মু

অকয় দরে তিরিয়োয় অরং বুরু মা চট ধাসনা রে,
ঞহড় ঞহড় তারকঃ কানদ ইঞমা গাতে সাঁওরে ।।
গাতে গাতে লে সাহান্ সাকাম,মনে মা চালাঃ রাহারে,
আমদ দাদা গাই এম গুপি ,হঃ,হিং,হিয়োরে।।
তিরিয়ো বানাম রাঁওয়াঃ রেদ, দিন গে হিজুঃ সানাঞ,
গাতে বাংতে অড়াঃ রেমা ইঞ আয়ুয় মানাঞ ।।
এ দাদা পেড়া দাদা গাপা দরে অকা লদাম্, তাক্ যদিঞ ঞামা দাদা হরঃ আমাঞ মনের মুদাম্।।
তিরিয়ো বানাম আতেন্ তেরে ছুডার ইনাঞ গাতে,
তালা বির খন্ অকাঞ চালাঃ দেলা হাঞ মেরে নাতে ।।

গাই গুপি সুক্ দ বুডি কাশি টাঁন্ডি তিরিয়ো অরং,
দিনগে চালাঃ হুয়ুঃ বুডি,সিতুং ,জাপুদ্,নিরন,ধরন্।।
সেরেং আলম্ তেলায় বুডি বুরুমা হানা সৎ খন্,
তিরিয়ো বাংগে আজাড়িঃকান্ ইঞাঃ বানার তি খন্।।
ইঞদ গায়িঞ আচুর ক খান্,আমদ গাতে পাঁজা কম্,
তিকিন বেড়ায় তারাসিং এন্ গাতে তাম্ দ ঞাম কম।।
আম্ মা সাধের মিসরা পাছেৎ,ইঞমা কিঁষাড় গুতি,
সারা ঘাড়িচ্ ইঞ ভাগোওয়া কঃ আ টুয়ুল্ গামছা ধুতি।।
নিৎ মা গুতি,দাসি কড়া,বাংক তাঁহেন্ কান্ হড়্ রে,
অলঃ পাড়হাও বাগি বাগিতে সেনঃ কান্ক দিশম রে।।
হায়রে বুরু লদাম করে নিশুন্ আকান তিরিয়োরাহা,
ইচাঃবাহা,হুটের বাহা,মসদ্ এনা বির বাহা।।