যাঁহায় বিস-আন বিঞ ঠেনে গের হচওয়াকানা উনিগেয় বুঝৗও দাড়েয়াঃ-আ বিঞ বিষ তিনৗ: জলনা – পরিমল টুডু

মিৎ অক্ত আতো অড়াঃরে কাথা আজমঃ তাঁহেঃ মেন্তে, “ওনকো চৗকরি বৗকরি হড়গে সাঁওতা দ কো ডামাডোল চাবা কেদ-আ” আর অল পাড়হাও চৗকরি বৗকরি হড়হঁকো গালমারাও তাঁহেঃ মেন্তে “আতো টলারে পৗহিল লেকা এনেজ সেরেঞ নাহাঃ দ বাং ঞেলঃ কানা।” নোয়াকিন বানার কাথা রেয়াঃ রাসা রডজ কাতেৎ যাঁহা ঞামঃ-আ অনা দ হোয়োঃ কানা- সাঁওতা তরাও রেয়াঃ মিদ নাওয়া উইহৗর। নোয়া উইহৗর দ আতো অড়াঃ-এম মেন চাহে সাহার নাগার-এম মেন; ভেগেৎ বৗনুঃ-আ। উইহৗর দ মিদটাং গে- আবোয়াঃ জৗতি সাঁওতা লাকচার ধরম চিকৗতেবোন তরাও-আ আর নোয়া উইহৗর খৗতিরগে তেহেঞ অৗডিগান বোন কেটেচ গৎ আকাৎ-আ আরহ কেটেজ হোয়োঃ তাবোনা। সানাম পাহটা রেয়াঃ মিদ পাহটা রুদিগে তাবোনা নংকা দ বাং-আ।





আবোনাঃ নাগাম ঘান্টা কাতেদ ঞেলঃ-আ; মৗনমি জখেচ খন মিদ তাঁহেন রেয়াঃ হিসকো উইহৗর আকাদ-আ উন খনগে মিদ হড়াঃ মনে কাথা আর মিদ হড় বুজ বাডায় হচয়ে লৗগিৎ ইশৗরা, রড়, সেরেঞ বাংখান অড়হে কাতেদ উচৗড় রেয়াঃ ভাব ভঙ্গি গে তেহেঞ রড় সেরেঞ, অনড়হেঁ, কৗহনী, গায়ান এমান তেয়াঃ তাবোন ।

মিদটাং পৗরসি হারাবুরুঃ-আ সাঁওহেদ খৗতির। সাঁওহেদ হারাবুরুঃ-আ রড়, অল বিন্তি বাখেড় এমান তেয়াঃতে। নওয়াকোরেনাঃ হ অৗডিগান হাটিঞ মেনাঃ-আ। অনাকো মুদ রে অল দ আরহঁ কাজাক কেটেজ কৗমি কানা, নোয়া রে দ রুপক, অলংকার, ভাব, উপমা রাসা, ছাঁদ গাবান, রাড়, মাত্রা তাঁহেন খৗতির আলগা তেগে মৗনমীয়াঃ মনে অন্তরে ঝাদগো দাড়েয়াঃ-আ। জেলেঞ থুতি খাটো মাছাতে ভাব রাসা তালাতে সিরজন তুলুজ জিয়ন চিতৗর জপটেৎ কৗমিহরা ফোটেল রাকাপগে অনড়হেঁ কানা।

পন্ডিতকো কো মেনা অনড়হেঁরে দ আরে রাসা সে নবরস বেধাও তাঁহেনা। নোয়া রাসা চেপেচ ঞাম দ অৗডি গৗহির মনেয়ান মেনেক ভাবুক হড় লাক্তিঃ-আ।





অনড়হেঁরে দ বারয়া মুঠৗন ঞেলঃ-আ; মিদ দ মেল ছাঁদ অনড়হেঁ আর দসার দ অনল সে গদ্য অনড়হেঁ। মেল ছাঁদ অনড়হেঁরে দ লাহাখন সেরেঞ অনড়হে লেকাতে হেজ আগুয়াকান রাহাগে নওয়ারে দ অৗইকৗও ঞামঃ-আ। মেনখান অনল অনড়হেঁরে দ ভাব রাসা হেচ কাতেদ জিয়ন চিতৗর সাঁওতে মিলাওঅঃ-আ। যাঁহা দ পৗঠুয়া হাতাং অৗডি আলগা তেগে ভেদ-এ সাব দাড়েয়াঃ-আ মিদটাং কৗরিগল আয়াঃ তুলিতে রং গাবাও কাতেদ চেদ লেকা নাওয়া চিতৗর-এ ফুটাও-আ অনকাগে অনড়হেঁ অল হঁ মিৎ মারাং কৗরিগল-আঃ কৗরধৗনি কানা।

পিড়হি চাক অৗচুর সাঁওতে অলকো রেনাঃ চাক হঁ অৗচুর অৗচুরতে অৗডিগান আরুফেরাও হেচ আকানা। ঞেল লেখান ঞেলঃ-আ কবি পৗওল জুঝৗর সরেন, কবি সাধুরামচাঁদ মুরমু, পন্ডিত রঘুনাথ মুরমু, কবি সারদা প্রসাদ কিস্কু খনাঃ নিত ধৗবিচ অৗডিগান অনলিয়ৗ কওয়াঃ অনড়হেঁতে সান্তাড়ি পৗরসি রাজগাড় বারেক্কে হারা রাকাব আকান গে মেনাঃ-আ আর নিতোঃ রেন অনলিয়ৗ, অনড়হিয়ৗ, সাপড়াওইয়ৗ, ডিটিপিয়ৗ, পাঠুয়ৗ সানামকো গে কুরুমুটুকো ধুরৗও আকানা। মিৎ হড়-এ অল-আ আর মিৎ হড়-এ পাড়হাওয়া নওয়া সৗগৗইগে সাঁওহেৎ হারাবুরু রেয়াঃ মিৎ মারাং অৗঁগিভার।





যাঁহা খৗতিরতে নিত ধৗবিচ অনড়হেঁ বাবোদ তে নুমিন মারাং ইঞ অল কেদ-আ অনাগে আদুঞ লৗইলেগে-

বাঁকুড়া জিলৗ রেয়াঃ রানীবাঁধ থানা রেয়াঃ চালথা আতোরেন বাবু কালিরাম মুরমু ২২ সেরমা উমের রে ইঞ আয়াঃ মিদটাং অনড়হেঁয় অল পেরেচ আকাৎ খাতায় উদুঃ অৗদিঞা আর-এ মেতাদিঞা নওয়া পুথি বেনাও রেয়াঃ ইঞ মনেয়েদ-আ।

“বেনাওমে, ইঞ গড়ওয়ামা”- নোয়া কাথাঞ মেতাদেয়া। আর অনারে বারকাথা অল লৗগিৎ দ ইঞগেয় নেহর অৗদিঞা আর উছৗন হঁ ইঞগেয় উছৗনহচ লিদিঞা। উনরেগে কালিরাম মুরমুয়াঃ অনা পুথি লৗগিদতে নংকাঞ অল লেদ-আ।





অনা পুথি দ হোয়োঃকান তায়া “দুলৗড় রাহা”। অনা “দুলৗড় রাহা” পুথি দ নংকান অনড়হেঁকোতেয় বেনাও আকাদ-আ যাঁহা রেয়াঃ অনড়হেঁ দ বাং-এম পাড়হাও লেখান অহম আয় উমৗন কেয়া মেন্তে দুলৗড় দ তিনাঃ গাবেয়ানা সে চকাঃ গেয়া। চেদাঃ সে যাঁহায় বিষ-আন বিঞঠেনে গের হচওয়াকানা উনিগেয় বুঝৗও দাড়েয়াঃ-আ বিঞ বিষ তিনৗ: জলনা।

-ইঞগে পরিমল টুডু, –“সাঁওয়ার” পাথাম সাপড়াওয়িচ আর সুমনা বেসরা-আঃ অনড়হে পুথি “মিদ কেচাঃ মায়াম কুঁডি” সাপাড়াওয়িচ।