ᱵᱤᱫᱟᱹᱭ ᱵᱮᱲᱟ

ᱠᱟᱞᱤᱨᱟᱢ ᱢᱩᱨᱢᱩ

ᱥᱮᱨᱢᱟᱨᱮ ᱦᱮᱱᱫᱮ ᱨᱤᱢᱤᱞ
ᱡᱳᱞᱳᱫ ᱡᱳᱞᱳᱫ ᱥᱟᱸᱜᱮ ᱤᱯᱤᱞ
ᱧᱤᱱᱫᱟᱹ ᱪᱟᱱᱫᱳ ᱛᱟᱨᱟᱥ ᱯᱳᱞᱥᱳ ᱯᱳᱞᱥᱳ᱿

ᱥᱤᱢᱨᱟᱜ ᱚᱠᱛᱚ ᱛᱮᱨᱫᱮᱡ ᱢᱟᱨᱥᱟᱞᱨᱮ
ᱫᱟᱨᱮ ᱰᱟᱹᱨᱨᱮ
ᱪᱮᱬᱮ ᱪᱩᱯᱨᱩᱫ ᱪᱮᱨᱚ ᱵᱮᱨᱚ
ᱫᱩᱞᱟᱹᱲᱛᱮ ᱜᱷᱟᱹᱞ
ᱡᱤᱣᱤ ᱛᱤᱧ ᱢᱟ ᱦᱚᱨᱚ ᱵᱚᱨᱚ᱿

ᱛᱮᱦᱮᱧ ᱫᱷᱟᱥᱟᱣᱼᱮᱱᱟ
ᱫᱩᱞᱟᱹᱲ ᱨᱮᱭᱟᱜ ᱵᱟᱺᱫᱤ ᱢᱩᱨᱟᱹᱭ
ᱛᱚᱯᱟᱜ ᱥᱟᱹᱨᱤᱭᱮᱱᱟ
ᱛᱚᱯᱚᱞ ᱥᱳᱦᱟᱜᱽ ᱥᱟᱹᱜᱟᱹᱭ᱾
ᱮᱲᱮ ᱩᱛᱟᱹᱨᱮᱱᱟ
ᱥᱟᱱᱟᱢ ᱢᱮᱱ ᱫᱚᱦᱚ ᱠᱟᱛᱷᱟ
ᱵᱟᱝᱞᱟᱝ ᱦᱳᱭᱞᱮᱱᱟ ᱟᱞᱟᱝ, ᱡᱩᱨᱤᱡᱚᱛᱟ᱾

ᱱᱤᱛᱳᱜ ᱞᱤᱸᱡᱤᱱ ᱠᱟᱱᱟ
ᱤᱧᱟᱹᱜ ᱢᱮᱫ ᱠᱚᱬᱨᱮ ᱢᱮᱫᱼᱫᱟᱜ
ᱮᱱᱛᱮᱠᱷᱟᱱ ᱞᱟᱹᱭᱢᱮ
ᱫᱩᱞᱟᱹᱲ ᱟᱹᱫᱤᱧᱟᱢ ᱪᱮᱫᱟᱜ?

ᱡᱩᱫᱤ ᱥᱟᱹᱨᱤᱜᱮ,
ᱫᱩᱞᱟᱹᱲ ᱠᱷᱟᱹᱛᱤᱨ ᱵᱟᱧᱪᱟᱣ ᱢᱮᱱᱟᱜ
ᱫᱟᱨᱮ ᱱᱟᱹᱲᱤ ᱫᱷᱟᱹᱨᱛᱤ

ᱫᱩᱞᱟᱹᱲ ᱠᱷᱟᱹᱛᱤᱨ ᱥᱩᱯᱩᱞᱩᱠ ᱢᱮᱱᱟᱜ
ᱢᱟᱹᱱᱢᱤ ᱡᱤᱣᱤ ᱡᱟᱹᱛᱤ᱿
ᱮᱱᱛᱮᱠᱷᱟᱱ ᱫᱩᱞᱟᱹᱲ ᱠᱷᱟᱹᱛᱤᱨ
ᱢᱮᱫᱼᱫᱟᱜ ᱛᱮᱦᱮᱧ ᱪᱮᱫᱟᱜ??

ᱟᱢ ᱠᱷᱟᱱ ᱫᱚ,
ᱫᱩᱲᱩᱵ ᱮᱱᱟᱢ ᱥᱚᱱᱮᱨ ᱰᱟᱹᱞᱤᱨᱮ
ᱥᱟᱥᱟᱝᱛᱮ ᱜᱟᱵᱟᱣ ᱥᱟᱹᱲᱤ ᱵᱟᱸᱫᱮ ᱠᱟᱛᱮᱫ
ᱥᱟᱹᱠᱷᱤ ᱠᱮᱫ ᱠᱚᱣᱟᱢ ᱵᱳᱝᱜᱟ ᱵᱩᱨᱩ
ᱯᱮ ᱴᱩᱥᱟᱹ ᱥᱤᱸᱫᱩᱨ
ᱵᱚᱥᱢᱚᱛᱟᱨᱮ ᱜᱤᱰᱤ ᱠᱟᱛᱮᱫ᱿
ᱞᱚᱴᱟ ᱫᱟᱜᱼᱮᱢ ᱤᱨᱪᱤ ᱠᱮᱫᱼᱟ
ᱩᱞ ᱰᱷᱟᱹᱣᱨᱟᱹᱜᱛᱮ
ᱯᱟᱛᱲᱟ ᱪᱮᱛᱟᱱ ᱨᱮ
ᱟᱢ ᱛᱮᱸᱜᱳᱭᱮᱱᱟ ᱛᱤᱨᱤ ᱯᱟᱱᱛᱮ᱿

ᱟᱢ ᱫᱚ ᱢᱟᱭᱱᱚ ᱟᱢ ᱫᱚ ᱢᱤᱨᱩ
ᱵᱟᱠᱷᱳᱞᱼᱮᱢ ᱵᱟᱫᱟᱞᱼᱟᱱᱟ
ᱢᱮᱲᱦᱮᱫ ᱞᱮᱠᱟᱱ ᱟᱹᱨᱤᱛᱮ ᱛᱚᱯᱚᱞ
ᱥᱚᱱᱮᱜᱚᱲ ᱥᱟᱶᱛᱟ ᱛᱟᱞᱟᱨᱮ
ᱱᱟᱣᱟ ᱜᱷᱟᱨᱚᱧᱡᱽᱼᱮᱢ ᱡᱚᱲᱟᱣᱼᱟᱱᱟ᱿

ᱡᱷᱟᱹᱞᱤᱭᱮᱱᱟᱢ ᱜᱷᱟᱨᱚᱧᱡᱽ ᱪᱷᱟᱸᱫᱟᱨᱮ
ᱛᱮᱸᱜᱳᱭᱟᱱᱟᱢ ᱡᱤᱣᱤ ᱡᱩᱨᱤ ᱪᱷᱟᱛᱟ ᱫᱟᱨᱮ᱿

ᱟᱞᱚᱢ ᱦᱤᱲᱤᱧᱼᱟ
ᱦᱟᱱᱦᱟᱨ ᱦᱚᱧᱦᱟᱨ ᱵᱟᱦᱧᱟᱨ ᱢᱟᱱᱟᱣ ᱵᱟᱛᱟᱣ
ᱩᱱ ᱟᱹᱱᱤᱡ ᱜᱮᱢ ᱟᱛᱟᱝᱼᱟ ᱥᱟᱭ ᱜᱮᱥᱟᱭ ᱥᱟᱨᱦᱟᱣ᱿

ᱠᱟᱹᱢᱤ ᱞᱟᱸᱜᱟ ᱢᱚᱱᱮ ᱛᱷᱤᱨᱞᱟᱹ
ᱞᱟᱡ ᱨᱮᱸᱜᱮᱡ ᱛᱮᱛᱟᱝ ᱛᱤᱨᱯᱤᱛ
ᱟᱢᱟᱜ ᱛᱤ ᱛᱮᱜᱮ ᱦᱟᱯᱮᱱ
ᱥᱩᱠᱷᱟᱹᱞᱤ ᱜᱷᱟᱨᱚᱧᱡᱽ ᱛᱟᱞᱟᱨᱮ
ᱥᱚᱸᱫᱷᱟᱲ ᱢᱚᱦᱚᱠ ᱵᱟᱦᱟ ᱞᱮᱠᱟ
ᱥᱮᱵᱮᱞ ᱦᱮᱲᱮᱢ ᱞᱟᱹᱰᱩ ᱞᱮᱠᱟ
ᱥᱟᱹᱜᱟᱹᱭᱼᱮᱢ ᱡᱤᱭᱟᱹᱲ ᱠᱟᱜᱼᱟ ᱡᱚᱱᱚᱢᱮ ᱡᱚᱱᱚᱢ᱿

ᱠᱩᱧ ᱜᱷᱟᱴᱨᱮ ᱰᱟᱹᱰᱤ ᱜᱷᱟᱴᱨᱮ
ᱞᱟᱴ ᱵᱟᱝᱼᱮᱢ ᱞᱟᱜᱟᱣᱼᱟ
ᱥᱟᱸᱜᱮ ᱜᱟᱛᱮᱠᱳ ᱵᱟᱝᱼᱮᱢ ᱛᱟᱹᱝᱜᱤ ᱠᱚᱣᱟ᱾
ᱪᱮᱫᱟᱜ ᱥᱮ, ᱠᱚᱭᱚᱜ ᱠᱟᱜᱼᱟᱠᱳ ᱟᱢᱟᱜ ᱦᱚᱨ
ᱟᱢ ᱫᱚ ᱚᱲᱟᱜᱨᱮᱠᱳ ᱛᱟᱹᱝᱜᱤ ᱠᱟᱢᱟ᱾

ᱵᱤᱫᱟᱹᱭ ᱵᱮᱲᱟᱨᱮ
ᱟᱛᱳ ᱯᱮᱲᱟ ᱫᱤᱥᱚᱢ ᱯᱮᱲᱟ
ᱪᱟᱞ ᱠᱮᱫ ᱢᱮᱭᱟᱠᱳ ᱟᱨ ᱢᱤᱫ ᱦᱚᱲ ᱴᱷᱮᱱ
ᱟᱢᱟᱜ ᱥᱟᱱᱟᱢ ᱟᱺᱜᱤᱵᱷᱟᱨ
ᱪᱟᱞ ᱠᱮᱫᱼᱟᱠᱳ ᱟᱨ ᱢᱚᱬᱮ ᱦᱚᱲ ᱴᱷᱮᱱ᱿
ᱛᱚᱯᱚᱞᱮᱱᱟ ᱡᱮᱞᱮᱠᱟ ᱥᱩᱛᱟᱹᱢ ᱜᱤᱨᱟᱹ
ᱞᱟᱴᱷᱟ ᱩᱨᱤᱡ ᱟᱠᱟᱱ ᱞᱮᱠᱟ
ᱫᱟᱨᱮᱨᱮ ᱰᱟᱹᱨᱨᱮ ᱞᱟᱲ ᱱᱟᱹᱲᱤ ᱵᱟᱸᱫᱳ ᱱᱟᱹᱲᱤ
ᱛᱚᱯᱚᱞᱮᱱᱟ ᱵᱟᱨᱭᱟ ᱜᱷᱟᱨᱚᱧᱡᱽ
ᱛᱚᱯᱚᱞ ᱩᱨᱤᱡᱼᱮᱱᱟ
ᱵᱟᱨᱭᱟ ᱟᱛᱳ ᱨᱮᱭᱟᱜ ᱥᱟᱹᱜᱟᱹᱭ᱿

ᱵᱟᱝ ᱨᱟᱯᱟᱜ ᱦᱚᱲᱢᱚ ᱨᱮᱦᱚᱸ
ᱪᱟᱞ ᱠᱮᱫ ᱛᱟᱢᱟ ᱠᱳ ᱟᱨ ᱢᱤᱫ ᱦᱚᱲ ᱴᱷᱮᱱ
“ᱡᱟᱝ ᱦᱚᱸ ᱡᱟᱝ ᱛᱚᱨᱚᱡ ᱦᱚᱸ ᱛᱚᱨᱚᱡ”᱿
ᱢᱚᱱᱮ ᱡᱤᱣᱤ ᱨᱮᱭᱟᱜ ᱫᱩᱠ ᱠᱟᱛᱷᱟ
ᱟᱞᱚᱢ ᱳᱠᱳ ᱫᱚᱦᱚ ᱠᱟᱜᱼᱟ
ᱵᱚᱦᱚᱜ ᱰᱟᱸᱰᱟ ᱞᱟᱡ ᱦᱟᱥᱳ
ᱚᱠᱛᱚᱨᱮ ᱜᱮ ᱞᱟᱹᱭᱜᱚᱫᱽ ᱢᱮ᱿

ᱫᱟᱠᱟ ᱩᱛᱩ ᱪᱚᱸᱫᱟ ᱪᱩᱞᱦᱟᱹ
ᱟᱞᱚᱢ ᱡᱟᱹᱯᱤᱫ ᱦᱤᱲᱤᱧᱼᱟ
ᱩᱛᱩ ᱨᱚᱸᱜᱚᱜᱨᱮ, ᱫᱟᱠᱟ ᱚᱜᱚᱜᱨᱮ
ᱵᱟᱝᱼᱮᱢ ᱫᱟᱲᱮᱭᱟᱜᱨᱮ
ᱥᱤᱠᱷᱟᱹᱣ ᱦᱚᱪᱚᱜ ᱢᱮ᱿

ᱛᱮᱦᱮᱧ ᱤᱧᱟᱹᱜ ᱫᱩᱞᱟᱹᱲ ᱟᱲᱮ
ᱵᱷᱟᱸᱜᱟᱴᱼᱮᱱ ᱨᱮᱦᱚᱸ
ᱤᱧ ᱥᱟᱶᱛᱮᱭᱟᱜ ᱥᱟᱹᱜᱟᱹᱭ
ᱥᱟᱭᱜᱟᱫᱼᱮᱱ ᱨᱮᱦᱚᱸ
ᱤᱧᱠᱷᱚᱱ ᱟᱢᱮᱢ
ᱪᱷᱟᱯᱟᱰᱟᱭᱮᱱ ᱨᱮᱦᱚᱸ
ᱢᱮᱲᱦᱮᱫ ᱥᱤᱠᱲᱤ ᱛᱚᱯᱟᱜᱚᱜ ᱨᱮᱦᱚᱸ
ᱵᱤᱫᱟᱹᱭ ᱵᱮᱲᱟ ᱨᱮᱭᱟᱜ ᱠᱟᱛᱷᱟ ᱥᱤᱠᱲᱤ
ᱡᱚᱲᱟᱣ ᱫᱚᱦᱚ ᱠᱟᱜ ᱢᱮ
ᱡᱚᱱᱚᱢᱮ ᱡᱚᱱᱚᱢ ᱡᱤᱣᱤ ᱛᱟᱦᱮᱸᱱ ᱵᱷᱳᱨ᱿

ᱛᱮᱦᱮᱧ ᱠᱷᱚᱱ ᱫᱚ
ᱪᱟᱱᱫᱳ ᱵᱳᱝᱜᱟ ᱧᱩᱛᱩᱢ
ᱫᱷᱚᱨᱚᱢ ᱨᱮᱭᱟᱜ ᱥᱤᱸᱫᱩᱨ
ᱦᱚᱨᱟᱥᱤᱨᱮ ᱴᱤᱰᱟᱹᱜᱽ ᱢᱮ
ᱵᱟᱝ ᱵᱟᱪᱷᱟᱣ ᱠᱟᱛᱮᱫ ᱡᱟᱶᱟᱭ ᱫᱩᱞᱟᱹᱲ
ᱢᱚᱱᱮ ᱛᱚᱯᱚᱞ ᱵᱟᱵᱮᱨᱛᱮ ᱵᱩᱱᱫᱤ ᱛᱟᱦᱮᱸᱱ ᱢᱮ᱿

ᱥᱟᱹᱨᱤ ᱫᱩᱞᱟᱹᱲᱤᱭᱟᱹᱠᱳ ᱛᱟᱞᱟᱨᱮ
ᱡᱤᱭᱚᱱ ᱵᱟᱰᱳᱦᱤ ᱥᱟᱡᱟᱣ ᱠᱚᱜᱛᱮ
ᱟᱯᱟᱱ ᱟᱹᱯᱤᱱ ᱥᱟᱹᱝᱜᱤᱧ ᱡᱤᱣᱤ ᱥᱳᱯᱳᱨᱵᱮᱱ᱿
ᱱᱟᱣᱟ ᱢᱟᱹᱱᱢᱤ ᱦᱮᱢ ᱦᱚᱵᱚᱨ ᱠᱟᱛᱮᱫ
ᱛᱟᱨᱟ ᱠᱮᱪᱟᱜ ᱫᱩᱞᱟᱹᱲ ᱡᱤᱣᱤ ᱵᱤᱛᱟᱹᱣ ᱯᱩᱨᱟᱹᱣᱵᱮᱱ᱿