নিরমায়া জিওয়ীজুরি ᱱᱤᱨᱢᱟᱭᱟ ᱡᱤᱣᱤᱡᱩᱨᱤ

– ᱠᱟᱞᱤᱨᱟᱢ ᱢᱩᱨᱢᱩ

ᱪᱤᱠᱟᱹᱛᱮᱢ ᱥᱮᱱᱼᱮᱱᱟ
ᱥᱚᱱᱮᱨ ᱜᱷᱟᱨᱚᱧᱡᱽ ᱵᱟᱹᱜᱤ ᱠᱟᱛᱮᱫ?
ᱪᱤᱠᱟᱹᱛᱮᱢ ᱦᱤᱲᱤᱧ ᱠᱮᱫᱼᱟ
ᱢᱟᱛᱠᱚᱢ ᱵᱩᱴᱟᱹ ᱨᱮᱭᱟᱜ ᱠᱤᱨᱤᱭᱟᱹ ᱠᱟᱛᱷᱟ?

ᱵᱟᱝ,
ᱟᱢ ᱫᱚ ᱡᱟᱹᱱᱤᱡᱠᱷᱟᱱ ᱵᱟᱝᱼᱮᱢ ᱦᱤᱲᱤᱧ ᱟᱠᱟᱫᱼᱟ
ᱥᱮᱫᱟᱭ ᱥᱳᱦᱟᱜᱽ ᱫᱩᱞᱟᱹᱲ ᱮᱯᱮᱢ ᱪᱟᱯᱟᱞ ᱨᱮᱭᱟᱜ ᱠᱟᱛᱷᱟ
ᱠᱩᱞᱦᱤ ᱪᱷᱟᱴᱠᱟᱨᱮ ᱜᱩᱲ ᱫᱟᱠᱟ ᱡᱚᱢ ᱠᱟᱛᱮᱫ
ᱛᱟᱞᱟ ᱚᱲᱟᱜᱛᱮ ᱦᱮᱢ ᱦᱚᱵᱚᱨ ᱠᱟᱛᱮᱫ ᱟᱫᱮᱨ ᱨᱮᱭᱟᱜ ᱫᱩᱯᱩᱞᱟᱹᱲ
ᱟᱛᱳ ᱯᱮᱲᱟ ᱫᱤᱥᱳᱢ ᱯᱮᱲᱟᱣᱟᱜ ᱪᱚᱜ ᱪᱮᱨᱮᱡ᱾

ᱵᱟᱝ,
ᱡᱟᱹᱱᱤᱡ ᱠᱷᱟᱱ ᱚᱱᱟᱠᱳ ᱫᱚ ᱪᱮᱫᱦᱚᱸ ᱵᱟᱝᱼᱮᱢ ᱦᱤᱲᱤᱧ ᱟᱠᱟᱫᱼᱟ
ᱟᱨ ᱛᱤᱥᱦᱚᱸ ᱵᱟᱝᱼᱮᱢ ᱦᱤᱲᱤᱧᱟ᱾

ᱛᱤᱥᱦᱚᱸ ᱡᱹᱱᱤᱡ ᱵᱟᱝᱜᱮᱢ ᱦᱤᱲᱤᱧᱟᱼ,
ᱛᱩᱨᱩᱭ ᱪᱟᱱᱫᱳᱨᱮᱱ ᱦᱟᱢᱟᱞ ᱦᱚᱲᱢᱚ ᱦᱳᱭᱟᱛᱮ ᱨᱮᱦᱚᱸ
ᱜᱷᱟᱨᱚᱧᱡᱽᱨᱮ ᱫᱩᱞᱟᱹᱲ ᱠᱤᱸᱥᱟᱹᱬ ᱞᱟᱹᱜᱤᱫ
ᱦᱮᱨᱢᱮᱫ ᱫᱤᱯᱤᱞᱟᱛᱮ ᱧᱩ ᱫᱟᱜᱼᱮᱢ ᱜᱮᱢᱮᱨ ᱟᱹᱜᱩᱞᱮᱫᱼᱟ
ᱰᱟᱹᱰᱤ ᱡᱷᱟᱨᱱᱟ ᱠᱷᱚᱱ᱾
ᱟᱨᱮ ᱪᱟᱱᱫᱳ ᱜᱮᱞ ᱢᱟᱦᱟ ᱯᱩᱨᱟᱹᱣᱮᱱ ᱛᱟᱭᱱᱚᱢ
ᱢᱤᱨᱩ ᱵᱤᱴᱤᱭ ᱡᱟᱱᱟᱢᱮᱱ ᱚᱠᱛᱚ
ᱛᱤᱱᱟᱹᱜᱼᱮᱢ ᱨᱟᱜ ᱞᱮᱫᱼᱟ, ᱛᱤᱱᱟᱹᱜᱼᱮᱢ ᱠᱤᱠᱭᱟᱹᱣ ᱞᱮᱱᱟ
ᱛᱚᱜᱚᱡ ᱰᱟᱴᱟᱣᱟᱛᱮ ᱢᱮᱫ ᱫᱟᱜ ᱟᱧᱡᱮᱫ ᱠᱟᱛᱮ
ᱢᱩᱪᱟᱹᱫᱨᱮ ᱡᱤᱛᱠᱟᱹᱨ ᱞᱮᱱᱟᱢ ᱟᱢᱦᱚᱸ “ᱟᱭᱳ”;
ᱟᱭᱳ ᱢᱮᱱᱛᱮ ᱧᱩᱢ ᱞᱮᱱᱟᱢ ᱱᱩᱭ ᱵᱤᱴᱤ ᱴᱷᱮᱱ᱾

ᱠᱚᱲᱟᱢ ᱛᱚᱣᱟ ᱟᱹᱣᱨᱤ ᱥᱟᱹᱠᱤᱫᱚᱜ ᱦᱟᱹᱵᱤᱡ
ᱥᱮᱛᱟᱜ ᱥᱤᱸᱜᱟᱹᱲ ᱥᱟᱨᱟ ᱵᱮᱲᱟ
ᱛᱟᱞᱟ ᱟᱫᱷᱟ ᱧᱤᱱᱫᱟᱹ ᱡᱟᱹᱯᱤᱫ ᱮᱵᱷᱮᱱ ᱠᱟᱛᱮᱫ
ᱡᱮᱸᱵᱮᱫ ᱟᱠᱟᱣᱫᱮᱭᱟᱢ ᱛᱚᱣᱟ ᱫᱟᱠᱟᱠᱤᱱ᱾
ᱨᱩᱣᱟᱹᱨᱮ ᱦᱟᱥᱳᱨᱮ ᱟᱸᱜᱟᱣᱟᱠᱟᱫᱼᱟᱢ
ᱧᱤᱱᱫᱟᱹ ᱫᱩᱲᱩᱵ ᱠᱟᱛᱮᱫ᱾
ᱵᱟᱝᱼᱮᱢ ᱧᱮᱞ ᱥᱟᱦᱟᱣ ᱫᱟᱲᱮᱭᱟᱠᱟᱫᱼᱟ
ᱚᱠᱚᱭᱟᱜ ᱦᱚᱸ ᱠᱚᱥᱴᱚ᱾
ᱟᱢᱦᱚᱢ ᱠᱟᱢᱤ ᱜᱚᱲᱚᱣᱟᱠᱟᱫᱤᱧᱟᱹ
ᱜᱷᱟᱨᱚᱧᱡᱽ ᱵᱟᱵᱮᱨ ᱠᱮᱴᱮᱡ ᱩᱨᱤᱡ ᱞᱟᱹᱜᱤᱫ᱾
ᱟᱢᱦᱚᱸᱢ ᱧᱮᱞ ᱜᱚᱲᱚᱣᱟᱠᱟᱫᱤᱧᱟᱹ
ᱥᱩᱞᱩᱠ ᱨᱮᱭᱟᱜ ᱠᱩᱠᱢᱩ ᱧᱮᱧᱮᱞ᱾

ᱮᱱᱦᱚᱸ ᱛᱮᱦᱮᱧ ᱫᱚ,
ᱪᱟᱞᱟᱣᱮᱱᱟᱢ ᱥᱟᱺᱜᱤᱧᱛᱮ,
ᱵᱟᱹᱧ ᱵᱟᱰᱟᱭᱟ ᱚᱠᱟᱛᱮ?
ᱵᱟᱹᱧ ᱵᱟᱰᱟᱭᱟ ᱚᱠᱚᱭ ᱥᱟᱶᱛᱮ?
ᱵᱟᱹᱧ ᱵᱟᱰᱟᱭᱟ ᱪᱮᱫ ᱞᱟᱹᱜᱤᱫᱛᱮ??

ᱯᱟᱹᱛᱭᱟᱹᱣ ᱵᱟᱝ ᱦᱳᱭᱳᱜᱠᱟᱱ ᱛᱤᱧᱟᱹ ᱢᱮᱱᱛᱮ;
ᱥᱟᱹᱨᱤᱜᱮ ᱵᱟᱝᱼᱮᱢ ᱟᱱᱴᱟᱣ ᱯᱩᱨᱟᱹᱣ ᱞᱮᱱᱟ ᱡᱚᱢ ᱧᱩᱛᱮ
ᱥᱟᱹᱨᱤᱜᱮ ᱵᱟᱝᱼᱮᱢ ᱛᱤᱨᱯᱤᱛ ᱞᱮᱱᱟ ᱮᱨ ᱤᱛᱟᱹ, ᱪᱷᱟᱛᱟ ᱫᱟᱨᱮ,
ᱦᱟᱱᱦᱟᱨ ᱦᱚᱧᱦᱟᱨ ᱠᱚᱣᱟᱜ ᱫᱩᱞᱟᱹᱲᱛᱮ
ᱚᱱᱟᱛᱮᱜᱮ ᱛᱮᱦᱮᱧ ᱟᱢ ᱫᱚᱢ ᱪᱷᱩᱰᱟᱹᱨᱮᱱᱟ ᱤᱧ ᱴᱷᱮᱱ ᱠᱷᱚᱱ
ᱡᱟᱹᱱᱤᱡᱠᱷᱟᱱ ᱜᱚᱲᱟᱣᱮᱫᱼᱟᱢ ᱱᱟᱣᱟ ᱜᱷᱟᱨᱚᱧᱡᱽ ᱱᱟᱣᱟ ᱡᱤᱭᱚᱱ᱿