লৗওড়িয়ৗ ᱞᱟᱹᱣᱲᱤᱭᱟᱹ

– ᱥᱚᱧᱡᱤᱵᱚᱱ ᱢᱩᱨᱢᱩ

ᱚᱛᱮ ᱢᱟᱦᱟ ᱨᱮᱱᱟᱜ ᱠᱟᱛᱷᱟᱼ, ᱟᱞᱮᱭᱟᱜ ᱫᱚᱥᱟᱨ ᱥᱮᱹᱢᱤᱥᱴᱟᱨ ᱨᱮᱱᱟᱜ ᱵᱤᱱᱤᱰ ᱢᱩᱪᱟᱹᱫ ᱠᱟᱛᱮᱫ ᱱᱚᱣᱟᱜᱮ ᱯᱳᱹᱭᱞᱳ ᱠᱞᱟᱥ᱾ ᱦᱟᱞᱮᱜᱮ ᱵᱤᱱᱤᱰᱠᱳ ᱢᱩᱪᱟᱹᱫ ᱟᱠᱟᱱᱛᱮ ᱢᱚᱱᱮ ᱡᱤᱣᱤᱠᱳ ᱨᱟᱣᱟᱞᱜᱚᱫ ᱟᱠᱟᱱᱟ᱾ ᱫᱤᱱᱟᱹᱢ ᱫᱤᱱ ᱨᱮᱱᱟᱜ ᱟᱹᱨᱤ ᱞᱮᱠᱟᱛᱮ ᱢᱮᱢ ᱫᱚ ᱯᱨᱮᱡᱮᱱᱴ ᱠᱷᱟᱛᱟ ᱥᱟᱶᱛᱮ ᱯᱚᱛᱚᱵᱠᱳ ᱥᱟᱵ ᱠᱟᱛᱮ ᱨᱩᱢᱛᱮᱭ ᱵᱚᱞᱚᱭᱮᱱᱟ᱾ ᱢᱮᱢ ᱵᱚᱞᱚ ᱥᱟᱶᱛᱮ ᱥᱟᱱᱟᱢᱠᱳ ᱥᱮᱴᱮᱨᱟᱠᱟᱱ ᱟᱞᱮ ᱯᱟᱹᱴᱷᱩᱣᱟᱹᱠᱳᱞᱮ ᱛᱮᱸᱜᱳᱭᱮᱱᱟ᱾ ᱢᱮᱢ ᱫᱚ ᱥᱟᱵ ᱟᱠᱟᱫ ᱠᱷᱟᱛᱟ, ᱯᱚᱛᱚᱵᱠᱳ ᱴᱮᱹᱵᱤᱞ ᱪᱮᱛᱟᱱ ᱨᱮᱭ ᱫᱚᱦᱚ ᱠᱮᱫᱼᱟ᱾ ᱥᱟᱱᱟᱢᱠᱳ ᱫᱩᱲᱩᱵᱼᱮ ᱢᱮᱛᱟᱜ ᱞᱮᱭᱟ᱾ ᱟᱡ ᱫᱚ ᱛᱮᱸᱜᱳ ᱨᱮᱜᱮᱭ ᱛᱟᱦᱮᱸᱭᱮᱱᱟ᱾
ᱹᱹᱹᱹᱹᱜᱮᱞ ᱢᱤᱫ ᱨᱳᱞ ᱱᱟᱢᱵᱟᱨ ᱚᱠᱚᱭᱟᱜ?
ᱵᱚᱛᱚᱨᱥᱟᱛᱞᱟᱜ ᱛᱮᱸᱜᱳ ᱠᱟᱛᱮᱧ ᱢᱮᱱ ᱠᱮᱫᱼᱟ, “ᱢᱮᱢ, ᱤᱧᱟᱹᱜ ᱜᱮ ᱜᱮᱞ ᱢᱤᱫ ᱨᱳᱞ ᱱᱟᱢᱵᱟᱨ ᱛᱤᱧ᱾”
ᱢᱮᱢ ᱫᱩᱲᱩᱵᱼᱮ ᱢᱮᱛᱟᱫᱤᱧᱟᱹ᱾
ᱚᱱᱟ ᱛᱟᱭᱱᱚᱢ ᱡᱟᱸᱦᱟ ᱜᱷᱚᱴᱟᱣᱮᱱᱟ ᱚᱱᱟᱫᱚ ᱵᱟᱝ ᱦᱤᱲᱤᱧ ᱞᱮᱠᱟᱱᱟᱜ ᱜᱮ᱾

ᱢᱮᱢ ᱨᱟᱹᱜᱤ ᱟᱲᱟᱝᱛᱮᱭ ᱞᱟᱹᱭ ᱠᱮᱫᱼᱟᱼ,”ᱟᱯᱮ ᱫᱚ ᱵᱤᱱᱤᱰᱯᱮ ᱮᱢ ᱟᱠᱟᱫᱼᱟ ᱥᱮ ᱪᱮᱫ? ᱩᱱᱟᱹᱜ ᱫᱤᱱ ᱛᱟᱦᱚᱞᱮ ᱯᱟᱲᱦᱟᱣ ᱠᱟᱛᱮᱫ ᱪᱮᱫᱯᱮ ᱥᱮᱬᱟ ᱠᱮᱫᱼᱟ? ᱪᱮᱫ ᱥᱤᱠᱷᱱᱟᱹᱛ ᱤᱧ ᱮᱢᱟᱜ ᱯᱮᱭᱟ? ᱵᱤᱱᱤᱰ ᱨᱮᱭᱟᱜ ᱛᱮᱞᱟ ᱠᱷᱟᱛᱟᱨᱮ ᱪᱮᱫᱯᱮ ᱚᱞ ᱟᱠᱟᱫᱼᱟ?”
ᱟᱞᱮ ᱥᱟᱱᱟᱢ ᱯᱟᱹᱴᱷᱩᱣᱟᱹᱠᱳᱢᱟ ᱴᱩᱝᱠᱤ ᱥᱤᱢ ᱞᱮᱠᱟ ᱠᱩᱰᱵᱩᱨ ᱠᱟᱛᱮᱫ ᱢᱮᱱᱟᱜ ᱞᱮᱭᱟ᱾ ᱤᱧ ᱥᱳᱨ ᱨᱮᱱ ᱜᱟᱛᱮ ᱥᱚᱛᱛᱭᱚ ᱡᱚᱠᱷᱚᱱ ᱪᱮᱫᱪᱚᱭ ᱠᱩᱞᱤ ᱠᱮᱫᱮᱭᱟ ᱟᱨ ᱢᱤᱫ ᱜᱟᱛᱮ ᱚᱠᱚᱭᱪᱚᱹᱹᱹᱹᱹ! ᱩᱱᱫᱚ ᱤᱧᱟᱹᱜ ᱱᱟᱹᱰᱨᱤ ᱥᱟᱱᱟᱢ ᱨᱚᱦᱚᱲ ᱪᱟᱵᱟᱣᱟᱠᱟᱱ ᱛᱤᱧᱟᱹ᱾ ᱢᱚᱱᱮᱛᱤᱧ ᱢᱮᱱᱮᱫᱼᱟ ᱡᱟᱹᱱᱤᱡᱠᱷᱟᱱ ᱢᱮᱢᱼᱟᱜ ᱵᱚᱦᱚᱜ ᱫᱚ ᱯᱟᱲᱟᱜ ᱟᱠᱟᱱ ᱛᱟᱭᱟ᱾ ᱛᱮᱦᱮᱧ ᱫᱚ ᱟᱞᱮ ᱫᱚᱭ ᱪᱟᱵᱟᱠᱮᱫ ᱞᱮᱭᱟ᱾ ᱵᱤᱱᱤᱰᱢᱟ ᱱᱟᱯᱟᱭᱜᱮᱧ ᱮᱢ ᱟᱠᱟᱫᱼᱟ᱾ ᱮᱱᱦᱚᱸ ᱵᱤᱱᱤᱰ ᱨᱮᱱᱟᱜ ᱠᱟᱛᱷᱟᱜᱮᱭ ᱢᱮᱱᱮᱫᱼᱟ᱾ ᱛᱟᱦᱞᱮ ᱪᱮᱫ ᱵᱤᱱᱤᱰ ᱫᱚ ᱢᱚᱱᱮᱨ ᱢᱚᱛᱚᱱ ᱵᱟᱝᱞᱮ ᱮᱢ ᱟᱠᱟᱫᱛᱮ?

ᱢᱮᱢᱼᱟᱜ ᱠᱟᱛᱷᱟᱠᱳ ᱟᱨᱦᱚᱸ ᱛᱟᱠᱮᱨ ᱮᱱᱟ ᱞᱳᱛᱳᱨ ᱨᱮᱼ,”ᱟᱯᱮ ᱤᱫᱤᱠᱟᱛᱮ ᱛᱤᱱᱟᱹᱜ ᱠᱩᱠᱢᱩᱧ ᱧᱮᱞ ᱟᱠᱟᱫᱼᱟ᱾ ᱟᱯᱮᱜᱮ ᱦᱟᱯᱮᱱ ᱫᱤᱱ ᱨᱮᱱ ᱞᱟᱹᱣᱲᱤᱭᱟᱹ᱾ ᱟᱯᱮᱜᱮ ᱥᱟᱶᱛᱟ ᱨᱮᱱ ᱜᱚᱨᱚᱵᱽ, ᱫᱤᱥ ᱦᱩᱫᱤᱥᱟᱱ ᱦᱚᱲ᱾ ᱟᱯᱮ ᱡᱩᱫᱤ ᱡᱚᱛᱷᱟᱛ ᱥᱤᱠᱷᱱᱟᱹᱛ ᱵᱟᱝᱯᱮ ᱦᱟᱢᱮᱹᱴᱟ ᱛᱟᱦᱞᱮᱠᱷᱟᱱ ᱛᱟᱭᱚᱢ ᱫᱟᱨᱟᱢ ᱫᱚ ᱪᱮᱫ ᱦᱳᱭᱳᱜᱼᱟ?”
ᱢᱮᱢᱼᱟᱜ ᱠᱟᱛᱷᱟ ᱠᱷᱚᱱ ᱯᱷᱟᱨᱪᱟ ᱥᱟᱺᱦᱤᱡ ᱵᱟᱰᱟᱭ ᱧᱟᱢ ᱮᱱᱟ ᱡᱮᱹ, ᱟᱞᱮᱫᱚ ᱱᱟᱯᱟᱭᱛᱮ ᱵᱤᱱᱤᱰ ᱵᱟᱝᱞᱮ ᱮᱢ ᱟᱠᱟᱫᱼᱟ᱾ ᱚᱱᱟᱛᱮᱜᱮ ᱢᱮᱢᱼᱟᱜ ᱵᱚᱦᱚᱜ ᱫᱚ ᱯᱟᱲᱟᱜ ᱟᱠᱟᱱ ᱛᱟᱭᱟ᱾ ᱤᱧᱢᱟ ᱵᱚᱛᱚᱨᱛᱮᱧ ᱞᱟᱠᱟᱲ ᱞᱩᱠᱩᱲ ᱪᱟᱵᱟᱭᱮᱱᱟ᱾ ᱡᱚᱢ ᱫᱟᱠᱟ ᱦᱚᱸ ᱦᱟᱡᱟᱢᱮᱱ ᱛᱤᱧᱟᱹ᱾ ᱟᱨ ᱪᱮᱫᱟᱜᱜᱮ ᱵᱟᱝ ᱱᱚᱝᱠᱟ ᱫᱚᱥᱟ ᱫᱚ ᱦᱳᱭᱳᱜ ᱛᱤᱧᱟᱹ; ᱦᱮᱡ ᱠᱟᱛᱮᱫ ᱤᱧ ᱢᱟᱲᱟᱝ ᱨᱳᱞ ᱱᱟᱢᱵᱟᱨ ᱫᱚᱭ ᱠᱩᱞᱤ ᱟᱠᱟᱫᱤᱧᱟᱹ ᱟᱨ ᱚᱠᱚᱭᱦᱚᱸ ᱵᱟᱝᱼᱮ ᱠᱩᱞᱤᱞᱮᱫ ᱠᱚᱣᱟ᱾ ᱵᱚᱛᱚᱨ ᱨᱮᱱᱟᱜᱜᱮ ᱠᱟᱛᱷᱟ ᱠᱟᱱᱟ᱾ ᱮᱱᱦᱚᱸ ᱤᱧ ᱫᱚ ᱠᱩᱞᱤ ᱛᱮᱜᱮ ᱞᱟᱜᱟᱣᱤᱧᱟᱹ, ᱪᱮᱫᱟᱜᱥᱮ ᱡᱷᱟᱢᱮᱞᱟ ᱫᱚ ᱤᱧᱟᱹᱜ ᱜᱮ ᱡᱟᱹᱥᱛᱤ᱾ ᱠᱚᱲᱟᱢ ᱪᱟᱯᱚ ᱠᱟᱛᱮᱧ ᱢᱮᱱ ᱠᱮᱫᱼᱟ, “ᱛᱟᱦᱚᱞᱮ ᱢᱮᱢ ᱵᱤᱱᱤᱰ ᱫᱚ ᱵᱷᱟᱹᱜᱤ ᱵᱟᱝ ᱦᱳᱭᱟᱠᱟᱱ ᱛᱮ?”
ᱢᱮᱢ ᱤᱧ ᱥᱮᱫ ᱠᱚᱭᱚᱜ ᱠᱟᱛᱮᱫᱼᱮ ᱢᱮᱱ ᱠᱮᱫᱼᱟ, “ᱟᱢᱟᱜ ᱜᱮ ᱵᱷᱟᱹᱜᱤ ᱦᱳᱭ ᱟᱠᱟᱱᱟ᱾”

ᱡᱟᱠ ᱵᱟᱵᱟ, ᱢᱟᱨᱟᱝᱵᱩᱨᱩᱼᱟᱜ ᱫᱟᱭᱟ ᱢᱟᱭᱟᱛᱮ ᱵᱟᱧᱪᱟᱣᱮᱱ ᱞᱮᱠᱟᱧ ᱵᱩᱡᱷᱟᱹᱣ ᱠᱮᱫᱼᱟ ᱟᱨ ᱢᱚᱱᱮᱨᱮ ᱥᱟᱹᱱᱛᱤᱧᱚᱜ ᱤᱧ ᱵᱩᱡᱷᱟᱹᱣ ᱠᱮᱫᱼᱟ᱾ ᱵᱳᱛᱚᱞᱨᱮ ᱛᱟᱦᱮᱠᱟᱱ ᱫᱟᱜ ᱢᱤᱫ ᱰᱷᱚᱠ ᱤᱧ ᱧᱩ ᱠᱮᱫᱼᱟ᱾ ᱚᱱᱟ ᱛᱟᱭᱱᱚᱢ ᱢᱮᱢ ᱫᱚᱭ ᱫᱩᱲᱩᱵ ᱮᱱᱛᱮ ᱯᱚᱛᱚᱵ ᱨᱮᱱᱟᱜ ᱥᱟᱠᱟᱢᱠᱳᱭ ᱚᱴᱟᱜ ᱠᱮᱫᱼᱟ᱾ ᱢᱮᱱᱠᱷᱟᱱ ᱤᱧᱟᱹᱜ ᱢᱚᱱᱮᱨᱮ ᱠᱩᱠᱞᱤ ᱫᱚ ᱛᱟᱦᱮᱸᱭᱮᱱ ᱜᱮᱭᱟ᱾ ᱢᱮᱢᱛᱚᱭ ᱢᱮᱱ ᱠᱮᱫᱼᱟ ᱠᱷᱟᱱᱮᱠ ᱢᱟᱲᱟᱝᱜᱮ ᱡᱮᱹ, ᱟᱯᱮᱜᱮ ᱦᱟᱯᱮᱱ ᱫᱤᱱ ᱨᱮᱱ ᱞᱟᱹᱣᱲᱤᱭᱟᱹ᱾ ᱥᱟᱶᱛᱟ ᱨᱮᱱ ᱜᱚᱨᱚᱵᱽ᱾ ᱛᱟᱦᱚᱞᱮ ᱤᱧ ᱢᱚᱛᱚ ᱵᱷᱟᱜᱮ ᱠᱟᱛᱮ ᱫᱚ ᱥᱟᱶᱛᱟ ᱨᱮᱱᱟᱜ ᱰᱷᱚᱸᱜᱟ ᱫᱚ ᱵᱟᱝ ᱞᱟᱦᱟᱜᱼᱟ᱾ ᱚᱱᱟᱛᱮ ᱟᱞᱮ ᱥᱟᱱᱟᱢ ᱯᱟᱹᱴᱷᱩᱣᱟᱹᱠᱳ ᱠᱤᱨᱤᱭᱟᱹ ᱦᱟᱛᱟᱣ ᱦᱳᱭᱳᱜ ᱛᱟᱞᱮᱭᱟ ᱡᱮᱹ ᱵᱷᱟᱹᱜᱤ ᱦᱚᱲᱞᱮ ᱛᱮᱭᱟᱨᱚᱜᱼᱟ᱾ ᱟᱞᱮᱜᱮ, ᱦᱟᱯᱮᱱ ᱫᱤᱱ ᱨᱮᱱ ᱞᱟᱹᱣᱲᱤᱭᱟᱹ᱾