ᱦᱚᱱ ᱠᱤᱢᱤᱱ

woman in blue and gold floral crop top touching face with left hand

– ᱠᱩᱱᱟᱹᱢᱤ ᱢᱩᱨᱢᱩ

ᱪᱮᱫ ᱟᱡᱟᱨ ᱠᱷᱟᱹᱛᱤᱨ ᱪᱚᱝ ᱥᱩᱦᱟᱱ ᱮᱸᱜᱟᱛ ᱜᱤᱛᱤᱡ ᱯᱟᱨᱠᱚᱢ ᱠᱷᱚᱱ ᱵᱟᱝᱼᱮ ᱪᱮᱴᱷᱟᱜ ᱠᱟᱱᱟ᱾ ᱵᱟᱹᱭ ᱵᱟᱹᱭᱛᱮ ᱛᱤ ᱡᱟᱝᱜᱟ ᱦᱚᱲᱢᱚ ᱥᱟᱱᱟᱢ ᱢᱟᱜ ᱩᱞᱴᱟᱹᱣ ᱫᱟᱨᱮ ᱞᱮᱠᱟ ᱜᱚᱥᱚᱜ ᱠᱟᱱ ᱛᱟᱭᱟ᱾ ᱱᱚᱝᱠᱟᱱ ᱢᱩᱦᱤᱢ ᱚᱠᱛᱚᱨᱮ ᱫᱟᱜ ᱫᱟᱠᱟ ᱥᱟᱱᱟᱢ ᱠᱤᱢᱤᱱᱛᱮᱫ ᱨᱟᱦᱞᱟᱼᱟᱜ ᱛᱤ ᱠᱷᱚᱱ ᱜᱮᱭ ᱟᱛᱟᱝᱼᱮᱫ ᱛᱟᱸᱦᱮᱫ, ᱠᱤᱢᱤᱱ ᱛᱮᱫᱜᱮᱭ ᱛᱳᱯᱳ ᱥᱟᱯᱷᱟᱠᱟᱭ ᱠᱟᱱ ᱛᱟᱸᱦᱮᱫ, ᱵᱟᱱᱫᱮ ᱞᱩᱜᱽᱲᱤᱡᱼᱮ ᱥᱟᱯᱷᱟ ᱨᱩᱭᱟᱹᱲ ᱠᱟᱛᱟᱭ ᱠᱟᱱ ᱛᱟᱸᱦᱮᱫ᱾
ᱢᱳᱞᱳᱜ ᱪᱟᱱᱫᱳᱭ ᱦᱟᱺᱥᱩᱨᱮᱱᱟ, ᱱᱟᱣᱟ ᱥᱮᱨᱢᱟ ᱢᱟᱨᱮᱭᱮᱱᱟ, ᱥᱤᱨᱡᱚᱱᱯᱩᱨᱤ ᱨᱮᱭᱟᱜ ᱞᱤᱞᱟᱹᱠᱷᱮᱹᱞᱳᱸᱰ ᱟᱹᱨᱤ ᱞᱮᱠᱟᱛᱮ ᱦᱚᱯᱚᱱ ᱠᱤᱢᱤᱱ ᱛᱟᱹᱠᱤᱱᱟᱜ ᱪᱩᱨᱤᱛᱦᱚᱸ ᱟᱹᱨᱩᱭᱮᱱᱟ᱾
ᱥᱩᱦᱟᱱ ᱮᱸᱜᱟᱛᱼᱮ ᱩᱭᱦᱟᱹᱨᱚᱜ ᱠᱟᱱᱟᱼ, “ᱛᱮᱦᱮᱧ ᱠᱷᱚᱱ ᱯᱮ ᱥᱮᱨᱢᱟ ᱢᱟᱲᱟᱝ ᱡᱟᱸᱦᱟ ᱦᱤᱞᱳᱜ ᱵᱟᱦᱟᱴᱚᱞᱟ ᱨᱮᱱ ᱠᱤᱢᱤᱱᱤᱧ ᱛᱟᱹᱠᱤᱱ ᱱᱩᱭ ᱦᱚᱲ ᱦᱚᱯᱚᱱᱮᱨᱟ ᱟᱛᱮᱫ ᱥᱩᱦᱟᱱ ᱠᱤᱱ ᱵᱷᱮᱡᱟᱜᱚᱫ ᱟᱠᱟᱫᱮᱭᱟ ᱤᱱᱟᱹᱦᱤᱞᱳᱜ ᱡᱟᱸᱦᱟ ᱤᱧ ᱩᱭᱦᱟᱹᱨ ᱞᱮᱫᱼᱟ; ᱚᱱᱟᱜᱮ ᱛᱮᱦᱮᱧ ᱥᱟᱹᱨᱤᱜ ᱠᱟᱱᱟ᱾”
ᱤᱱᱟᱹ ᱦᱤᱞᱳᱜ ᱥᱩᱦᱟᱱ ᱮᱸᱜᱟᱛᱼᱮ ᱢᱮᱱ ᱞᱮᱫᱼᱟ, “ᱱᱩᱠᱤᱱ ᱵᱟᱱᱟᱦᱚᱲ ᱠᱤᱱ ᱪᱟᱞᱟᱣ ᱞᱮᱱᱠᱷᱟᱱ ᱤᱧᱫᱚ ᱚᱲᱟᱜ ᱵᱟᱹᱧ ᱨᱩᱭᱟᱹᱲᱟ᱾”
ᱵᱟᱦᱟᱴᱚᱞᱟ ᱨᱮᱱ ᱠᱤᱢᱤᱱᱛᱮᱫᱼᱮ ᱠᱩᱠᱞᱤ ᱞᱮᱫᱮᱭᱟ, “ᱪᱮᱫᱟᱜᱭᱳ ᱵᱟᱝᱵᱮᱱ ᱨᱩᱭᱟᱹᱲᱟ?”
ᱩᱱᱨᱮ ᱥᱩᱦᱟᱱ ᱮᱸᱜᱟᱛ ᱥᱟᱯᱷᱟᱥᱟᱹᱯᱷᱤᱭᱮ ᱛᱮᱞᱟ ᱞᱮᱫᱼᱟ, “ᱟᱹᱞᱤᱧᱟᱜ ᱫᱚ ᱠᱩᱥᱤ ᱵᱟᱹᱱᱩᱜᱼᱟ᱾”
ᱢᱮᱱᱠᱷᱟᱱ ᱥᱩᱦᱟᱱ ᱫᱚ ᱡᱤᱣᱤ ᱢᱚᱱᱮᱭ ᱜᱚᱴᱟ ᱩᱛᱟᱹᱨ ᱟᱠᱟᱫ ᱠᱷᱟᱹᱛᱤᱨ ᱡᱟᱱᱟᱢ ᱟᱭᱳᱼᱟᱜ ᱠᱟᱛᱷᱟᱦᱚᱸ ᱵᱟᱝᱼᱮ ᱵᱟᱛᱟᱣ ᱞᱮᱫᱼᱟ᱾
ᱩᱱᱨᱮ ᱠᱤᱢᱤᱱᱛᱮᱫ ᱠᱩᱱᱟᱹᱢᱤ ᱫᱚ ᱠᱤᱨᱤᱭᱟᱹ ᱠᱟᱛᱷᱟᱭ ᱵᱟᱸᱠᱷᱮᱬ ᱞᱮᱫᱼᱟ, “ᱟᱵᱮᱱ ᱫᱚ ᱠᱷᱟᱹᱞᱤ ᱠᱷᱟᱹᱞᱤᱵᱮᱱ ᱫᱚᱦᱟᱵᱚᱦᱟᱜ ᱠᱟᱱᱟ; ᱧᱮᱞ ᱟᱵᱮᱱ ᱦᱟᱸᱜᱠᱷᱟᱱ ᱠᱤᱢᱤᱱᱢᱮ ᱛᱟᱹᱠᱤᱱ ᱴᱷᱮᱱ ᱠᱷᱚᱱ ᱟᱹᱰᱤ ᱵᱟᱹᱲᱛᱤ ᱥᱳᱦᱟᱜᱽ ᱫᱩᱞᱟᱹᱲᱵᱮᱱ ᱧᱟᱢᱟ᱾”
ᱨᱟᱦᱞᱟᱨᱮᱱ ᱟᱭᱳ ᱵᱟᱵᱟ ᱛᱟᱠᱳᱴᱷᱮᱱ ᱱᱚᱣᱟ ᱠᱟᱛᱷᱟ ᱥᱮᱴᱮᱨᱞᱮᱱ ᱛᱟᱭᱱᱚᱢ ᱥᱮᱨᱣᱟ ᱨᱮᱭᱟᱜ ᱠᱳᱸᱰᱮᱹᱞ ᱧᱟᱯᱟᱢ ᱟᱹᱨᱤ ᱞᱮᱠᱟᱛᱮ ᱥᱟᱹᱜᱩᱱ ᱵᱟᱯᱞᱟᱦᱚᱸ ᱵᱟᱝ ᱦᱟᱹᱯᱤ ᱟᱠᱟᱱᱟ᱾
ᱚᱠᱛᱚ ᱨᱮᱭᱟᱜ ᱪᱟᱠᱟ ᱟᱹᱪᱩᱨᱚᱜ ᱥᱟᱶᱥᱟᱶᱛᱮ ᱛᱟᱨᱟ ᱠᱮᱪᱟᱜ ᱪᱟᱱᱫᱳᱭ ᱠᱩᱱᱟᱹᱢᱤᱭᱮᱱᱟ, ᱥᱩᱦᱟᱱ ᱟᱨ ᱨᱟᱦᱞᱟ ᱛᱟᱠᱚᱣᱟᱜ ᱜᱷᱟᱨᱚᱧᱡᱽ ᱵᱟᱲᱜᱮ ᱨᱮᱦᱚᱸ ᱤᱛᱟᱭ ᱚᱢᱚᱱ ᱮᱱᱟᱼ ᱥᱳᱱᱟ ᱵᱮᱴᱟ᱾ ᱨᱟᱦᱞᱟᱦᱚᱸ ᱡᱤᱣᱤ ᱚᱱᱛᱚᱨᱨᱮ ᱯᱮᱨᱮᱡ ᱯᱩᱠᱷᱨᱤ ᱫᱟᱜ ᱪᱮᱦᱮᱞ ᱪᱮᱯᱮᱞᱚᱜ ᱞᱮᱠᱟ ᱠᱩᱥᱤ ᱨᱟᱹᱥᱠᱟᱹ ᱥᱟᱨᱮᱲ ᱟᱫᱮᱭᱟ᱾
ᱯᱳᱹᱭᱞᱳ ᱯᱳᱹᱭᱞᱳ ᱫᱚ ᱨᱟᱦᱞᱟᱼᱟᱜ ᱵᱮᱣᱦᱟᱨ ᱱᱟᱯᱟᱭᱜᱮ ᱟᱹᱭᱠᱟᱹᱜ ᱠᱟᱱ ᱛᱟᱸᱦᱮᱱᱟ᱾ ᱦᱟᱱᱦᱟᱨᱛᱮᱫ ᱨᱩᱭᱟᱹ ᱨᱟᱵᱟᱝ ᱨᱮᱭ ᱜᱤᱛᱤᱡᱠᱚᱜᱨᱮ ᱫᱟᱜ ᱫᱟᱠᱟ ᱥᱟᱱᱟᱢ ᱡᱚᱢᱟᱜᱼᱮ ᱥᱳᱨᱼᱟᱭ ᱠᱟᱱ ᱛᱟᱸᱦᱮᱠᱟᱱᱟ, ᱵᱩᱜᱤ ᱵᱟᱹᱲᱤᱡᱼᱮ ᱠᱩᱜᱞᱤᱭᱮ ᱠᱟᱱ ᱛᱟᱸᱦᱮᱠᱟᱱᱟ᱾ ᱢᱮᱱᱠᱷᱟᱱ ᱵᱟᱹᱭ ᱵᱟᱹᱭᱛᱮ ᱨᱟᱦᱞᱟ ᱫᱚ ᱡᱟᱹᱱᱤᱡ ᱦᱟᱱᱦᱟᱨ ᱪᱮᱛᱟᱱᱨᱮ ᱜᱩᱨᱞᱟᱹᱣ ᱟᱹᱪᱩᱨᱚᱜ ᱫᱚᱭ ᱞᱟᱸᱜᱟᱭᱮᱱᱟ᱾
ᱥᱩᱦᱟᱱᱢᱟ ᱠᱚᱲᱟ ᱜᱤᱫᱟᱹᱨ ᱚᱱᱟᱛᱮ ᱵᱟᱹᱦᱩ ᱢᱮᱱᱟᱭ ᱛᱩᱞᱩᱡ ᱡᱟᱱᱟᱢ ᱟᱭᱳ ᱥᱮᱵᱟ ᱡᱚᱛᱚᱱ ᱫᱚ ᱡᱟᱹᱱᱤᱡ ᱞᱟᱡᱟᱣᱼᱮ ᱵᱩᱡᱷᱟᱹᱣᱮᱫᱼᱟ᱾ ᱢᱮᱱᱠᱷᱟᱱ ᱵᱟᱹᱦᱩᱛᱟᱭ ᱫᱤᱥ ᱦᱩᱫᱤᱥ ᱮᱢ ᱠᱟᱛᱮᱫ ᱥᱩᱥᱟᱹᱨ ᱫᱚ ᱡᱟᱹᱱᱤᱡᱠᱤᱱ ᱫᱟᱲᱮᱭᱟᱜ ᱠᱮᱭᱟ ᱚᱱᱟ ᱵᱟᱫᱟᱞᱛᱮ ᱥᱩᱦᱟᱱ ᱫᱚ ᱟᱭᱳ ᱥᱮᱫ ᱴᱮᱨᱟ ᱢᱮᱫᱛᱮᱦᱚᱸ ᱵᱟᱝᱼᱮ ᱠᱚᱭᱚᱜ ᱮᱫᱟ᱾
ᱦᱚᱯᱚᱱ ᱠᱤᱢᱤᱱᱟᱜ ᱱᱚᱝᱠᱟᱱ ᱵᱮᱣᱦᱟᱨ ᱠᱷᱟᱹᱛᱤᱨ ᱛᱮᱦᱮᱧ ᱫᱩᱠ ᱡᱟᱞᱟᱛᱮ ᱟᱯᱬᱮ ᱠᱟᱹᱭᱫᱷᱤ ᱡᱟᱱᱟᱢᱤᱭᱟᱹ ᱵᱷᱟᱹᱵᱤ ᱠᱟᱛᱮᱫ ᱢᱮᱫ ᱫᱟᱜᱜᱮ ᱥᱮᱛᱮᱧ ᱜᱚᱫᱚᱜ ᱠᱟᱱ ᱛᱟᱭᱟ᱾

(᱒)
ᱟᱨᱮᱹᱞ ᱛᱟᱹᱠᱤᱱ ᱴᱷᱮᱱᱠᱳ ᱞᱟᱹᱭ ᱵᱷᱮᱡᱟ ᱟᱠᱟᱫᱼᱟ, “ᱞᱤᱯᱤᱜᱷᱩᱴᱩ ᱯᱷᱩᱞ ᱟᱭᱳ ᱢᱮᱱᱫᱚ ᱥᱩᱦᱟᱱ ᱮᱸᱜᱟᱛ ᱟᱹᱰᱤ ᱵᱟᱹᱲᱛᱤᱭᱮ ᱞᱟᱸᱜᱟᱣᱟᱠᱟᱱᱟ, ᱦᱤᱨᱤᱠᱳ ᱪᱟᱞᱟᱜᱢᱟ᱾”
ᱚᱱᱟᱛᱮ ᱠᱷᱚᱵᱚᱨ ᱧᱟᱢ ᱥᱟᱶᱛᱮ ᱟᱨᱮᱹᱞ ᱛᱟᱹᱠᱤᱱ ᱫᱚ ᱫᱚᱥᱟᱨ ᱦᱤᱞᱳᱜᱜᱮ ᱦᱤᱨᱤ ᱧᱩᱛᱩᱢᱛᱮᱠᱤᱱ ᱢᱚᱦᱰᱟᱭᱮᱱᱟ ᱢᱟᱡᱟᱱ ᱢᱟᱡᱟᱱ᱾
ᱯᱳᱹᱭᱞᱳᱛᱮᱠᱤᱱ ᱥᱮᱱᱼᱮᱱᱟ ᱨᱟᱱᱤᱵᱟᱸᱫᱷ ᱵᱟᱡᱟᱨ᱾ ᱚᱸᱰᱮ ᱥᱟᱱᱫᱮᱥ ᱧᱩᱛᱩᱢᱛᱮ ᱟᱯᱮᱹᱞ ᱠᱟᱭᱨᱟ ᱟᱨ ᱪᱤᱱᱤ ᱞᱟᱹᱰᱩᱠᱳ ᱠᱤᱱ ᱠᱤᱨᱤᱧ ᱠᱮᱫᱼᱟ᱾
ᱞᱤᱯᱤᱜᱷᱩᱴᱩ ᱠᱤᱱ ᱥᱮᱴᱮᱨ ᱠᱮᱫᱼᱟ ᱮᱠᱟᱞ ᱵᱮᱲᱟ ᱦᱟᱺᱥᱩᱨᱚᱜ ᱚᱠᱛᱚ᱾ ᱵᱚᱞᱚᱭᱮᱱᱟᱠᱤᱱ ᱮᱠᱟᱞᱛᱮ ᱚᱲᱟᱜ ᱵᱷᱤᱛᱟᱹᱨ ᱡᱟᱸᱦᱟᱨᱮ ᱯᱷᱩᱞ ᱟᱭᱳ ᱜᱤᱛᱤᱡ ᱢᱮᱱᱟᱭᱟ᱾ ᱧᱮᱞᱮᱠᱟᱱᱟᱠᱤᱱ; ᱡᱟᱹᱯᱤᱫ ᱟᱠᱟᱫᱼᱟᱭ᱾
ᱯᱚᱴᱚᱢ ᱥᱟᱱᱫᱮᱥᱠᱳ ᱜᱚᱪᱷᱟ ᱠᱟᱛᱮᱫ ᱠᱩᱱᱟᱹᱢᱤ ᱫᱚ ᱮᱠᱟᱞᱛᱮ ᱩᱱᱤᱭᱟᱜ ᱯᱟᱨᱠᱚᱢᱨᱮᱭ ᱫᱩᱲᱩᱵ ᱮᱱᱟ᱾ ᱥᱩᱦᱟᱱ ᱛᱟᱹᱠᱤᱱ ᱩᱱ ᱫᱚ ᱫᱩᱭᱟᱹᱨᱨᱮ ᱦᱮᱡ ᱠᱟᱛᱮᱫ ᱠᱤᱱ ᱛᱮᱸᱜᱳᱭᱮᱱᱟ᱾
ᱠᱩᱱᱟᱹᱢᱤ ᱫᱚ ᱯᱷᱩᱞ ᱟᱭᱳᱭ ᱦᱚᱦᱚᱣᱟᱫᱮᱭᱟ᱾ ᱟᱧᱡᱚᱢ ᱠᱮᱫᱛᱮᱭ ᱮᱵᱷᱮᱱ ᱮᱱᱟ᱾ ᱜᱚᱝ ᱠᱮᱫᱼᱟᱭ– “ᱚᱠᱚᱭ ᱠᱟᱱᱟᱯᱮ?”
“ᱟᱹᱞᱤᱧ ᱭᱳ, ᱵᱟᱦᱟᱴᱚᱞᱟᱨᱮᱱ ᱠᱤᱢᱤᱱᱢᱮ ᱛᱟᱹᱞᱤᱧ᱾” ᱠᱩᱱᱟᱹᱢᱤᱭᱮ ᱛᱮᱞᱟ ᱠᱮᱫᱼᱟ᱾
ᱥᱩᱦᱟᱱ ᱛᱟᱹᱠᱤᱱ ᱥᱳᱨ ᱠᱷᱚᱱ ᱠᱤᱱ ᱥᱟᱦᱟᱭᱮᱱᱟ᱾
“ᱚᱠᱚᱭ?”
“ᱵᱟᱦᱟᱴᱚᱞᱟᱨᱮᱱ ᱠᱤᱢᱤᱱᱢᱮ ᱛᱟᱹᱞᱤᱧ᱾ ᱵᱟᱝᱼᱮᱢ ᱳᱨᱳᱢᱮᱫ ᱞᱤᱧᱛᱮ?”
“ᱟᱨ ᱪᱤᱠᱟᱹᱛᱤᱧ ᱳᱨᱳᱢ ᱯᱮᱭᱟ, ᱤᱧ ᱜᱮᱛᱚ ᱵᱟᱝᱯᱮ ᱳᱨᱳᱢ ᱞᱤᱫᱤᱧᱟ᱾” ᱢᱮᱱ ᱢᱩᱪᱟᱹᱫ ᱥᱟᱶ ᱥᱟᱶᱛᱮ ᱵᱮᱪᱟᱨᱤ ᱨᱟᱨᱟᱜᱼᱮ ᱮᱛᱚᱦᱚᱵ ᱮᱱᱟ᱾
ᱯᱷᱩᱞ ᱦᱟᱱᱦᱟᱨ ᱟᱭᱳᱭᱟᱜ ᱢᱮᱫ ᱫᱟᱜ ᱧᱮᱞᱛᱮ ᱠᱩᱱᱟᱹᱢᱤᱭᱟᱜᱦᱚᱸ ᱢᱮᱫ ᱫᱟᱜ ᱯᱮᱲᱮ ᱯᱮᱲᱮ ᱜᱚᱫᱼᱮᱱᱟ ᱟᱨᱼᱮ ᱢᱮᱱ ᱠᱮᱫᱼᱟ, “ᱟᱞᱚᱵᱮᱱ ᱨᱟᱻᱜᱟ, ᱛᱷᱤᱨᱳᱜ ᱵᱮᱱ᱾”
ᱢᱤᱫ ᱜᱷᱟᱹᱲᱤᱡ ᱛᱟᱭᱱᱚᱢᱼᱮ ᱛᱷᱤᱨ ᱮᱱᱟ ᱟᱨ ᱛᱤ ᱡᱟᱝᱜᱟᱠᱳ ᱜᱟᱹᱫᱩᱨᱚᱜ ᱛᱩᱞᱩᱡᱼᱮ ᱵᱟᱠᱷᱮᱬᱮᱫᱼᱟ, “ᱟᱹᱰᱤᱫᱤᱱ ᱦᱳᱭᱳᱜ ᱠᱟᱱᱟ ᱟᱹᱣᱨᱤᱞᱤᱧ ᱛᱳᱯᱳᱱᱟ᱾ ᱛᱤ ᱡᱟᱝᱜᱟᱠᱳ, ᱫᱮᱭᱟᱠᱳ ᱫᱚᱢᱮ ᱵᱟᱵᱟᱛᱮᱫ ᱞᱤᱧᱟᱹ᱾ ᱢᱟᱻᱜᱚ ᱢᱟᱥᱮ ᱠᱟᱹᱴᱤᱡ ᱜᱟᱹᱫᱩᱨ ᱠᱟᱹᱞᱤᱧ ᱵᱮᱱ᱾”
ᱠᱩᱱᱟᱹᱢᱤ ᱯᱩᱞ ᱦᱟᱱᱦᱟᱨ ᱟᱭᱳᱭ ᱜᱟᱹᱫᱩᱨ ᱠᱮᱫᱮᱠᱷᱟᱱ ᱱᱩᱱᱟᱹᱜ ᱢᱟᱹᱭᱞᱟᱹ ᱳᱰᱳᱠᱮᱱ ᱛᱟᱭᱟ ᱡᱟᱸᱦᱟᱛᱮᱫ ᱵᱟᱨᱭᱟ ᱦᱟᱸᱥ ᱦᱟᱺᱥᱤᱞ ᱪᱮᱬᱮ ᱵᱮᱜᱼᱱᱟᱣ ᱜᱟᱱ ᱠᱚᱜᱼᱟ᱾
ᱯᱷᱩᱞ ᱠᱤᱢᱤᱱᱟᱜ ᱢᱤᱫ ᱜᱷᱟᱹᱲᱤᱡ ᱨᱮᱭᱟᱜ ᱥᱩᱥᱟᱹᱨᱛᱮ ᱥᱩᱦᱟᱱ ᱮᱸᱜᱟᱛ ᱢᱤᱫ ᱨᱩᱛᱤᱜᱟᱱ ᱥᱩᱠᱼᱮ ᱟᱹᱭᱠᱟᱹᱣ ᱠᱮᱫᱛᱮ ᱨᱟᱹᱭᱞᱟᱹ ᱟᱲᱟᱝᱛᱮᱭ ᱢᱮᱱ ᱠᱮᱫᱼᱟ, “ᱵᱟᱹᱦᱩ ᱜᱚ, ᱵᱷᱟᱹᱞᱤᱵᱮᱱ ᱦᱮᱡᱼᱮᱱ; ᱤᱥᱠᱤᱨ ᱠᱮᱫ ᱞᱤᱧᱟᱹᱵᱮᱱ᱾ ᱚᱱᱟᱵᱮᱜᱚᱨ ᱯᱷᱩᱞᱢᱮ ᱛᱚᱹᱹᱹᱹᱹ᱾” ᱵᱟᱝ ᱢᱮᱱ ᱢᱩᱪᱟᱹᱫ ᱠᱟᱛᱮᱫ ᱦᱩᱸᱠᱨᱟᱹᱣᱟᱛᱮᱫ ᱟᱨᱦᱚᱸ ᱨᱟᱨᱟᱜᱼᱮ ᱮᱛᱚᱦᱚᱵ ᱠᱮᱫᱼᱟ᱾
ᱠᱩᱱᱟᱹᱢᱤᱭᱮ ᱢᱮᱱ ᱠᱮᱫᱼᱟ, “ᱛᱷᱤᱨᱳᱜᱵᱮᱱ ᱜᱚ, ᱛᱷᱤᱨᱳᱜ ᱵᱮᱱ” ᱟᱨ ᱜᱟᱹᱫᱩᱨᱠᱟᱭᱼᱮ ᱫᱷᱩᱨᱟᱹᱣᱮᱱᱟ᱾ ᱱᱤᱛᱳᱜ ᱫᱚ ᱵᱟᱹᱭ ᱵᱟᱹᱭᱛᱮᱭ ᱡᱟᱹᱯᱤᱫ ᱫᱚᱦᱲᱟ ᱠᱮᱫᱼᱟ᱾
ᱢᱮᱫ ᱥᱟᱢᱟᱝᱨᱮ ᱵᱟᱝ ᱥᱟᱦᱟᱜ ᱞᱮᱠᱟᱱ ᱡᱤᱣᱮᱹᱫ ᱡᱤᱭᱚᱱ ᱨᱮᱭᱟᱜ ᱪᱤᱛᱟᱹᱨ ᱧᱮᱞ ᱠᱟᱛᱮᱫ ᱟᱨᱮᱹᱞ ᱡᱟᱸᱦᱟᱱᱟᱜ ᱢᱮᱢᱮᱱ ᱥᱟᱱᱟᱭᱮ ᱠᱟᱱᱟ ᱢᱮᱱᱠᱷᱟᱱ ᱵᱟᱝᱼᱮ ᱢᱮᱱᱮᱫᱼᱟ᱾ ᱠᱩᱱᱟᱹᱢᱤᱦᱚᱸ ᱨᱟᱹᱜᱤᱛᱮ ᱨᱟᱦᱞᱟ ᱫᱟᱫᱟᱞ ᱥᱟᱱᱟᱭᱮ ᱠᱟᱱᱟ ᱢᱮᱱᱠᱷᱟᱱ ᱛᱤ ᱵᱟᱝ ᱚᱥᱨᱟᱜ ᱠᱟᱱ ᱛᱟᱭᱟ᱾ ᱪᱮᱫᱟᱜᱥᱮ, ᱛᱮᱦᱮᱧ ᱟᱭᱢᱟ ᱦᱳᱭ ᱯᱟᱨᱚᱢ ᱟᱠᱟᱱᱟ᱾ ᱠᱩᱱᱟᱹᱢᱤᱭᱮ ᱩᱭᱦᱟᱹᱨᱚᱜ ᱠᱟᱱᱟ, “ᱟᱛᱳ ᱦᱚᱲ, ᱵᱷᱟᱹᱭ ᱵᱷᱟᱭᱟᱛ, ᱯᱮᱲᱟ ᱦᱚᱲ ᱥᱟᱱᱟᱢᱜᱮ ᱦᱮᱡ ᱠᱟᱛᱮᱫᱠᱳ ᱧᱮᱞ ᱦᱚᱴᱚ ᱟᱠᱟᱫᱮᱭᱟ᱾ ᱡᱟᱱᱟᱢ ᱟᱭᱳ ᱥᱩᱥᱟᱹᱨ ᱞᱟᱹᱜᱤᱫ ᱠᱟᱛᱷᱟ ᱫᱚ ᱪᱮᱫ ᱵᱟᱝᱠᱳ ᱵᱟᱸᱠᱷᱮᱬ ᱦᱚᱴᱚᱣᱟᱠᱟᱫᱛᱮ? ᱮᱱᱦᱚᱸ ᱳᱠᱳᱨ ᱵᱟᱝᱛᱚᱠᱤᱱ ᱥᱚᱡᱽᱦᱮ ᱟᱠᱟᱱᱟ᱾”
ᱵᱟᱝ, ᱟᱨᱮᱹᱞ ᱛᱟᱹᱠᱤᱱ ᱚᱱᱟᱛᱮ ᱪᱮᱫᱦᱚᱸ ᱵᱟᱝᱠᱤᱱ ᱢᱮᱛᱟᱫᱠᱤᱱᱟᱹ᱾ ᱥᱟᱱᱟᱢ ᱨᱟᱹᱜᱤᱠᱤᱱ ᱚᱨ ᱫᱚᱦᱚ ᱠᱮᱫᱼᱟ ᱪᱮᱫᱟᱜᱥᱮ, ᱛᱮᱦᱮᱧ ᱫᱚ ᱯᱷᱩᱞ ᱟᱭᱳ ᱦᱤᱨᱤᱠᱤᱱ ᱦᱮᱡ ᱟᱠᱟᱱᱟ᱾
ᱨᱟᱪᱟᱨᱮᱠᱤᱱ ᱳᱰᱳᱠ ᱮᱱᱟ᱾ ᱥᱮᱨᱢᱟ ᱠᱷᱚᱱ ᱛᱟᱨᱟ ᱠᱮᱪᱟᱜ ᱪᱟᱱᱫᱳ ᱯᱳᱞᱥᱳ ᱯᱳᱞᱥᱳᱭ ᱢᱟᱨᱥᱟᱞᱮᱫᱼᱟ᱾ ᱤᱯᱤᱞᱠᱳ ᱡᱳᱞᱳᱜ ᱠᱟᱱᱟ᱾ ᱢᱩᱨᱩᱠᱷ ᱢᱚᱱᱮᱭᱟᱱ ᱥᱩᱦᱟᱱ ᱛᱟᱹᱠᱤᱱᱟᱜ ᱱᱤᱫᱷᱟᱹᱱ ᱠᱟᱹᱢᱤ ᱩᱭᱦᱟᱹᱨᱛᱮ ᱟᱨᱮᱹᱞ ᱛᱟᱹᱠᱤᱱ ᱵᱷᱟᱹᱵᱤᱛᱚᱜᱠᱤᱱ ᱫᱷᱩᱨᱟᱹᱣᱮᱱᱟᱼ, ᱛᱮᱦᱮᱧ ᱫᱚ ᱛᱟᱦᱮᱸ ᱵᱟᱥᱟᱜᱼᱟᱠᱤᱱ ᱥᱮ ᱵᱟᱝ??