ᱯᱷᱩᱨᱜᱟᱹᱞ ᱢᱟᱦᱟ

– ᱵᱤᱨᱮᱱᱫᱚᱨᱚ ᱱᱟᱛᱷ ᱠᱤᱥᱠᱩ

ᱵᱟᱨᱥᱟᱭ ᱥᱮᱨᱢᱟ ᱞᱮᱠᱟ ᱤᱧᱨᱮᱡᱽ ᱡᱟᱹᱛᱤᱭᱟᱜ
ᱨᱚᱰᱚᱽ ᱠᱚᱪᱞᱚᱱ, ᱥᱟᱥᱮᱛ, ᱱᱟᱦᱟᱪᱟᱨ ᱠᱷᱚᱱ
ᱨᱟᱲᱟ ᱫᱩᱜ ᱠᱟᱛᱮ, ᱱᱳᱣᱟ ᱫᱤᱥᱚᱢ ᱨᱮᱱ
ᱥᱟᱱᱟᱢ ᱢᱟᱹᱱᱢᱤ ᱵᱚᱱ ᱟᱹᱯᱱᱟᱹᱛ ᱟᱠᱟᱱ;
ᱦᱟᱱᱮ ᱥᱮᱫᱟᱭ ᱱᱟᱜᱟᱢ ᱨᱮᱭᱟᱜ
ᱜᱮᱞ ᱢᱚᱲᱮ ᱟᱜᱚᱥᱴ, ᱑᱙᱔᱗ ᱥᱟᱞ ᱟᱹᱯᱱᱟᱹᱛ ᱢᱟᱦᱟ,
ᱫᱤᱥᱚᱢ ᱨᱮᱱ ᱥᱟᱱᱟᱢ ᱢᱟᱹᱱᱢᱤ ᱨᱟᱹᱥᱠᱟᱹᱛᱮᱠᱚ ᱪᱟᱯᱮᱞᱮᱱ
ᱵᱷᱟᱵᱤᱛ ᱞᱮᱫᱟᱠᱚ ᱪᱟᱵᱟᱭᱮᱱᱟ ᱥᱟᱥᱮᱛ ᱱᱟᱦᱟᱪᱟᱨ ᱯᱟᱞᱮᱱ᱾
ᱥᱟᱱᱟᱢ ᱟᱨᱡᱟᱣ ᱫᱷᱚᱱᱨᱮ ᱟᱯᱱᱟᱨᱟ ᱜᱮ ᱟᱭᱫᱷᱟᱹᱨ,
ᱵᱟᱝᱠᱚ ᱛᱟᱸᱦᱮᱱᱟ ᱟᱫᱚ ᱡᱟᱸᱱᱫᱮ ᱪᱷᱟᱱᱫᱮ, ᱵᱤᱨ ᱜᱟᱡᱟᱲ;
ᱛᱮᱭᱟᱨ ᱟᱠᱚ ᱢᱤᱫ ᱥᱩᱞᱩᱠ ᱱᱤᱨᱟᱹᱭ, ᱱᱤᱨᱟᱹᱲ ᱥᱟᱶᱛᱟ
ᱟᱯᱱᱟᱨ ᱫᱤᱥᱚᱢᱨᱮ ᱟᱯᱱᱟᱨᱟᱜ ᱜᱮ ᱨᱟᱡᱽ᱿

ᱪᱟᱵᱟᱭᱮᱱᱟ ᱥᱟᱱᱟᱢ ᱡᱚᱢᱤᱫᱟᱨ ᱠᱳᱣᱟᱜ ᱡᱚᱢᱤᱫᱟᱨᱤ
ᱡᱮᱹ ᱡᱮᱢᱚᱱ ᱠᱚ ᱪᱟᱥ ᱟᱱᱟ ᱦᱟᱨᱤ ᱯᱷᱟᱨᱤ᱾
ᱧᱮᱞ ᱠᱟᱛᱮ ᱡᱚᱢᱤᱫᱟᱨ ᱠᱚᱠᱚ ᱮᱛᱦᱚᱵ ᱠᱮᱫᱟ ᱱᱟᱣᱟ ᱟᱹᱨᱤ,
ᱱᱟᱦᱟᱜ ᱨᱮᱭᱟᱜ ᱪᱟᱞᱟᱜ ᱠᱟᱱ “ᱨᱟᱡᱽᱟᱹᱨᱤ”᱾
ᱮᱛᱦᱚᱵ ᱮᱱᱟ ᱟᱨᱦᱚᱸ ᱱᱟᱣᱟ ᱢᱤᱫ ᱞᱮᱠᱟᱛᱮ ᱥᱟᱥᱚᱱ,
ᱱᱟᱪᱟᱨ ᱢᱟᱹᱱᱢᱤᱼᱟᱜ ᱢᱚᱱᱮ ᱠᱷᱚᱱ ᱥᱟᱦᱟᱭᱮᱱᱟ ᱯᱷᱩᱨᱜᱟᱹᱞ ᱵᱷᱟᱵᱽᱱᱟ
ᱱᱤᱛᱦᱚᱸ ᱚᱱᱟᱛᱮᱜᱮ ᱥᱟᱨᱟᱵᱮᱲᱟ ᱜᱮᱠᱚ ᱨᱚᱸᱫᱷᱚᱱᱟ᱿

ᱯᱟᱨᱚᱢᱮᱱᱟ ᱛᱤᱱᱟᱜ ᱥᱮᱨᱢᱟ………ᱹᱹ
ᱱᱟᱪᱟᱨ ᱢᱟᱹᱱᱢᱤ ᱱᱤᱛᱦᱚᱸ ᱛᱟᱭᱚᱢᱨᱮᱜᱮᱠᱚ ᱛᱟᱸᱦᱮᱭᱮᱱᱟ᱾
ᱵᱟᱝᱠᱚ ᱧᱟᱢ ᱞᱮᱫ ᱱᱤᱛ ᱦᱟᱹᱵᱤᱡ ᱟᱠᱳᱣᱟᱜ ᱟᱭᱫᱷᱟᱹᱨ,
ᱡᱤᱣᱤ ᱵᱟᱹᱛᱤ ᱵᱟᱧᱪᱟᱣ ᱞᱟᱹᱜᱤᱫ ᱵᱟᱝᱠᱚ ᱧᱟᱢᱼᱟ ᱵᱤᱪᱟᱹᱨ᱾
ᱱᱤᱛᱦᱚᱸ ᱞᱤᱸᱜᱤᱜ ᱠᱟᱱᱟ ᱡᱚᱦᱟ ᱪᱮᱛᱟᱱ ᱢᱮᱫ ᱫᱟᱜ
ᱟᱹᱫᱤᱵᱟᱹᱥᱤ ᱠᱚᱣᱟᱜ ᱥᱟᱱᱟᱢᱟᱜ ᱥᱚᱨᱠᱟᱨ ᱨᱮᱡ ᱦᱟᱛᱟᱣᱼᱮ ᱮᱛᱦᱚᱵ ᱟᱠᱟᱫᱼᱟ᱾
ᱡᱟᱱᱟᱢ ᱟᱲᱟᱝᱛᱮ ᱨᱚᱲ ᱞᱟᱱᱫᱟ
ᱯᱷᱩᱨᱜᱟᱹᱞ ᱛᱟᱭᱚᱢ ᱨᱮᱜᱮ ᱫᱤᱥᱚᱢ ᱠᱷᱚᱱ ᱰᱩᱸᱜᱤ ᱟᱠᱟᱱ᱾
ᱵᱟᱝᱠᱚ ᱦᱟᱹᱴᱤᱧ ᱟᱠᱟᱫᱟ ᱡᱟᱱᱟᱢ ᱟᱲᱟᱝᱛᱮ ᱵᱷᱮᱜᱟᱨ ᱯᱚᱱᱚᱛ
ᱟᱹᱫᱤᱵᱟᱹᱥᱤ ᱠᱳ ᱪᱮᱛᱟᱱ ᱟᱨᱦᱚᱸ ᱪᱟᱢᱠᱮᱭᱮᱱᱟ ᱥᱟᱥᱮᱛ,
ᱫᱤᱥᱚᱢᱨᱮᱱ ᱟᱹᱫᱤᱵᱟᱹᱥᱤ ᱠᱳᱣᱟᱜ ᱡᱩᱢᱤᱫ ᱫᱟᱲᱮ ᱛᱟᱠᱚ
ᱟᱹᱯᱱᱟᱹᱛ ᱛᱟᱭᱚᱢᱜᱮ ᱥᱟᱱᱟᱢ ᱨᱟᱹᱯᱩᱫᱼᱮᱱ ᱛᱟᱠᱚ᱿

ᱱᱩᱢᱤᱱ ᱫᱤᱱ ᱛᱟᱭᱚᱢ ᱨᱮᱸᱦᱚ ᱟᱹᱯᱱᱟᱹᱛ ᱨᱮᱭᱟᱜ ᱨᱟᱹᱥᱠᱟᱹ
ᱟᱹᱫᱤᱵᱟᱹᱥᱤᱠᱚ ᱢᱩᱫᱽᱨᱮ ᱛᱮᱦᱮᱧᱦᱚᱸ ᱵᱟᱱᱩᱜ ᱟᱱ,
ᱢᱮᱫ ᱢᱩᱴᱷᱟᱹᱱᱨᱮ ᱱᱤᱛᱦᱚᱸ ᱦᱮᱱᱟᱜ ᱵᱮᱼᱟᱹᱯᱱᱟᱹᱛ ᱨᱮᱭᱟᱜ ᱪᱦᱟᱯ
ᱱᱚᱝᱠᱟ ᱦᱩᱭᱩᱜ ᱛᱤᱥᱦᱚᱸ ᱵᱟᱝᱠᱚ ᱵᱷᱟᱹᱵᱤᱛᱼᱟᱱ᱾
ᱟᱹᱯᱱᱟᱹᱛ ᱞᱟᱹᱭᱛᱮ ᱛᱮᱦᱮᱧ ᱡᱟᱹᱛᱤᱭᱟᱹᱨᱤ ᱪᱷᱩᱴᱤ ᱢᱟᱦᱟ,
ᱥᱚᱨᱠᱟᱹᱨᱤ ᱚᱯᱷᱤᱥ , ᱵᱤᱫᱫᱟᱹᱜᱟᱲ ᱠᱚᱨᱮ ᱵᱳᱱᱫᱮ ᱞᱟᱹᱰᱩ
ᱢᱟᱨᱟᱝ ᱢᱟᱨᱟᱝ ᱵᱷᱟᱥᱚᱱ ᱟᱨ ᱱᱟᱜᱟᱢ ᱨᱮᱭᱟᱜ ᱟᱹᱨᱤ᱾
ᱡᱟᱹᱛᱤᱭᱟᱹᱨᱤ ᱪᱤᱨ ᱚᱴᱟᱝᱼᱟᱛᱮ ᱰᱤᱜᱞᱟᱹᱣᱵᱟᱲᱟ,
ᱱᱟᱯᱟᱭ ᱱᱟᱯᱟᱭ ᱡᱚᱢ ᱧᱩ ᱛᱮᱦᱮᱧ ᱢᱤᱫ ᱵᱮᱲᱟ᱿