ᱟᱯᱬᱮ ᱧᱮᱧᱮᱞᱚᱢ

– ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱟᱹᱨᱥᱤᱨᱮ ᱠᱚᱭᱚᱜᱚᱜᱢᱮ
ᱠᱚᱭᱚᱜᱛᱮᱜᱮ ᱛᱟᱦᱮᱸᱱᱢᱮ,
ᱧᱮᱞᱟᱢ, ᱟᱢᱟᱜ ᱡᱟᱝ ᱯᱟᱧᱡᱽᱨᱟ
ᱨᱚᱨᱚᱲ ᱥᱟᱱᱟᱭᱮ ᱠᱟᱱᱟ᱾

ᱟᱢᱟᱜ ᱵᱟᱝ ᱥᱚᱫᱚᱨᱟᱠᱟᱱ ᱟᱹᱱᱟᱹᱭᱠᱟᱹᱣᱠᱚ
ᱟᱢᱟᱜ ᱛᱟᱹᱯᱩᱜ ᱫᱚᱦᱚ ᱠᱟᱺᱦᱤᱥ ᱟᱲᱟᱝᱠᱚ
ᱟᱢᱟᱜ ᱡᱳᱨᱮᱢᱳᱴᱷᱮ ᱞᱤᱸᱵᱳᱫ ᱜᱚᱡ ᱦᱟᱹᱥᱩ ᱡᱚᱞᱚᱱᱠᱚ
ᱯᱷᱟᱹᱱᱴᱤᱞ ᱛᱩᱫ ᱥᱟᱱᱟᱭᱮᱫ ᱠᱚᱣᱟ᱾

ᱢᱟᱹᱱᱢᱤ ᱡᱤᱭᱚᱱ ᱫᱚ
ᱠᱩᱰᱵᱩᱨ ᱥᱮ ᱠᱟᱰᱟᱠᱩᱰᱩ ᱱᱟᱜᱟᱢ ᱫᱚ ᱵᱟᱝᱠᱟᱱᱟ,
ᱪᱤᱨᱜᱟᱹᱞ ᱛᱟᱲᱟᱢ ᱠᱟᱛᱮᱫᱜᱮ
ᱦᱚᱨ ᱨᱮᱱᱟᱜ ᱡᱟᱹᱱᱩᱢ ᱞᱮᱵᱮᱫ ᱜᱮᱡᱮᱨ ᱠᱟᱛᱮᱫᱜᱮ
ᱧᱟᱢ ᱟᱠᱟᱫᱟᱵᱚᱱ ᱱᱟᱦᱟᱜ ᱥᱚᱥᱚᱱᱚᱜ᱾

ᱟᱹᱨᱥᱤᱨᱮ ᱠᱚᱭᱚᱜᱚᱜᱢᱮ
ᱡᱟᱝ ᱨᱮᱱᱟᱜ ᱢᱟᱡᱽ ᱞᱟᱹᱭ ᱟᱢᱟᱭ
ᱢᱟᱭᱟᱝ ᱥᱤᱨᱡᱚᱱ ᱨᱮᱱᱟᱜ ᱠᱟᱹᱦᱱᱤ᱾
ᱟᱨ ᱟᱢᱟᱜ ᱢᱟᱭᱟᱝ ᱨᱮᱦᱚᱸ ᱛᱳᱸᱜᱮ ᱢᱮᱱᱟᱜᱼᱟ
ᱫᱷᱟᱹᱨᱛᱤ ᱨᱮᱱᱟᱜ ᱥᱤᱨᱡᱚᱱ,
ᱯᱷᱩᱱᱩᱨᱜᱟᱹᱞ ᱡᱤᱭᱟᱹᱲᱚᱜ ᱢᱟᱱᱛᱟᱨ᱾