ᱥᱮᱴᱮᱨᱟᱠᱟᱱ ᱚᱠᱛᱚ

-ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱱᱤᱛᱚᱜ ᱥᱮᱴᱮᱨᱟᱠᱟᱱ ᱚᱠᱛᱚ
ᱡᱩᱢᱤᱫ ᱛᱤ ᱛᱩᱞ ᱨᱮᱱᱟᱜ,
ᱱᱤᱛᱚᱜ ᱥᱮᱴᱮᱨᱟᱠᱟᱱ ᱚᱠᱛᱚ
ᱥᱟᱯᱟᱵ ᱥᱟᱵ ᱠᱟᱛᱮᱫ ᱵᱟᱹᱭᱨᱤ ᱞᱟᱜᱟ ᱨᱮᱱᱟᱜ᱿

ᱠᱩᱢᱲᱩᱭᱮᱱᱟ ᱦᱟᱥᱟ ᱠᱷᱚᱱ ᱵᱟᱥᱟ
ᱱᱟᱹᱭ ᱠᱷᱚᱱ ᱫᱟᱜ ᱜᱤᱛᱤᱞ
ᱚᱛ ᱠᱷᱚᱱ ᱯᱟᱹᱴᱩᱵ ᱩᱰᱩᱠ ᱠᱮᱫᱟᱠᱚ ᱥᱚᱱᱟ
ᱵᱤᱨᱵᱩᱨᱩ ᱠᱷᱚᱱ ᱥᱤᱲᱳ ᱠᱮᱫᱟᱠᱚ ᱥᱤᱨᱡᱚᱱ ᱫᱩᱨᱤᱵᱽ᱿

ᱫᱷᱟᱠᱞᱟᱣ ᱚᱪᱚᱜᱮᱫ ᱵᱚᱱᱟᱠᱚ
ᱜᱤᱨᱟᱹᱵᱟᱹᱥᱤ ᱦᱚᱲ ᱦᱚᱸ
ᱱᱤᱛᱚᱜ ᱥᱮᱴᱮᱨᱟᱠᱟᱱᱟ ᱚᱠᱛᱚ ᱜᱟᱨᱡᱟᱜ ᱨᱮᱱᱟᱜ
ᱱᱤᱛᱚᱜ ᱥᱮᱴᱮᱨᱟᱠᱟᱱᱟ ᱚᱠᱛᱚ ᱞᱟᱹᱲᱦᱟᱹᱭ ᱨᱮᱱᱟᱜ᱿

ᱠᱷᱟᱢᱪᱟᱣ ᱦᱟᱛᱟᱣ ᱠᱮᱫᱟᱠᱚ ᱯᱟᱹᱨᱥᱤ, ᱞᱟᱠᱪᱟᱨ
ᱨᱮᱡ ᱦᱟᱛᱟᱣ ᱠᱮᱫᱟᱠᱚ ᱦᱚᱠ ᱟᱹᱭᱫᱟᱹᱨ
ᱞᱩᱴᱩᱡ ᱠᱮᱫᱟᱠᱚ ᱢᱟᱹᱭ ᱛᱟᱠᱚᱣᱟᱜ ᱤᱡᱡᱚᱛ
ᱥᱮᱸᱜᱮᱞ ᱠᱚ ᱡᱩᱸᱰᱤᱭᱟᱫᱟ ᱥᱩᱠᱷᱟᱹᱞ ᱥᱟᱶᱛᱟᱨᱮ
ᱟᱵᱚᱣᱟᱜ ᱛᱟᱨᱮᱱ ᱨᱮ ᱵᱟᱹᱱᱫᱩᱠ ᱫᱚᱦᱚ ᱠᱟᱛᱮᱫ
ᱚᱞ ᱠᱮᱫᱟᱠᱚ ᱟᱠᱚᱣᱟᱜ ᱱᱟᱜᱟᱢ
ᱱᱤᱛᱚᱜ ᱥᱮᱴᱮᱨᱟᱠᱟᱱᱟ ᱚᱠᱛᱚ ᱵᱚᱦᱚᱜ ᱛᱩᱞ ᱨᱮᱱᱟᱜ
ᱱᱤᱛᱚᱜ ᱥᱮᱴᱮᱨᱟᱠᱟᱱᱟ ᱚᱠᱛᱚ ᱥᱮᱸᱜᱮᱞ ᱥᱟᱨ ᱨᱮᱱᱟᱜ᱿