Monthly Archives: August 2020

ᱫᱟᱨᱮ

ᱥᱟᱠᱟᱢ ᱫᱚ
ᱢᱮᱲᱦᱮᱫ ᱞᱮᱠᱟᱱ;
ᱵᱟᱝ ᱨᱚᱝᱜᱚᱜ ᱥᱮᱹᱛᱳᱝᱛᱮ
ᱚᱱᱟ ᱥᱟᱠᱟᱢᱜᱮ ᱵᱮᱱᱟᱣᱼᱟᱠᱳ
ᱫᱷᱟᱹᱨᱛᱤᱨᱮᱱ ᱥᱟᱱᱟᱢ ᱡᱤᱣᱤᱼᱟᱱ ᱠᱚᱣᱟᱜ
ᱥᱩᱛᱩᱜ ᱥᱩᱢᱩᱱ ᱡᱤᱣᱤ ᱞᱟᱹᱜᱤᱫ; ᱚᱠᱥᱤᱡᱮᱹᱱ᱾
ᱫᱟᱨᱮ ᱥᱟᱠᱟᱢ ᱫᱟᱱᱟᱝ ᱨᱮᱜᱮ ᱢᱟᱞᱟ ᱯᱚᱛᱟᱢ,
ᱯᱟᱱᱤᱨ ᱯᱤᱭᱳ, ᱴᱤᱴᱤᱴᱮᱸᱜᱚᱡ, ᱥᱩᱜᱤ ᱪᱮᱬᱮ ᱟᱨᱦᱚᱸ ᱢᱟᱞᱟ ᱢᱤᱨᱩ᱾
ᱵᱳᱴᱳᱜ ᱵᱟᱦᱟ ᱥᱟᱬᱚᱜ ᱟᱨᱦᱚᱸ ᱤᱛᱟᱹ ᱯᱟᱨᱪᱟᱣ ᱞᱟᱹᱜᱤᱫ
ᱵᱟᱦᱟ ᱨᱮᱭᱟᱜ ᱨᱟᱥᱟ ᱫᱚ ᱧᱮᱞᱮ, ᱞᱩᱛᱤ ᱛᱮᱨᱚᱢ, ᱯᱟᱹᱛᱱᱤ ᱞᱟᱹᱜᱤᱫ
ᱡᱚ ᱵᱤᱞᱤ ᱫᱚ ᱪᱮᱬᱮ ᱪᱩᱯᱨᱩᱫ, ᱡᱤᱵᱽ ᱡᱤᱭᱟᱹᱞᱤ ᱢᱟᱹᱱᱢᱤ ᱥᱟᱱᱟᱢᱠᱳ
ᱡᱟᱸᱦᱟᱭᱜᱮᱭ ᱡᱚᱢ ᱫᱟᱲᱮᱭᱟᱜ; ᱵᱟᱝᱼᱮ ᱢᱟᱱᱟ ᱟᱹᱱᱤᱡᱼᱟ ᱡᱤᱣᱤ ᱫᱟᱨᱮ᱾
ᱡᱩᱣᱟᱹᱱ ᱞᱮᱱᱠᱷᱟᱱᱠᱳ ᱛᱤᱠᱷᱳᱲᱟᱱ ᱫᱟᱨᱮᱠᱳ; ᱰᱩᱞᱟᱹᱣᱼᱟᱵᱳᱱ ᱰᱟᱹᱨᱠᱳ
ᱵᱟᱝᱠᱷᱟᱱ ᱮᱠᱟᱞᱛᱮ ᱢᱟᱜ ᱵᱤᱱᱫᱟᱹᱲᱼᱟᱵᱳᱱ
ᱫᱟᱲᱢᱟᱠᱟᱴ ᱢᱳᱴᱟ
ᱫᱟᱨᱮ ᱜᱟᱹᱲᱭᱟᱹ
ᱜᱮᱫᱼᱟᱵᱳᱱ ᱨᱮᱛᱮᱠᱷᱮᱛᱮ
ᱟᱹᱰᱤ ᱫᱟᱭᱟᱜᱮ
ᱠᱚᱨᱟᱛ ᱫᱟᱛᱨᱚᱢᱛᱮ᱾
ᱵᱮᱱᱟᱣ ᱞᱟᱹᱜᱤᱫ
ᱯᱟᱲᱭᱟᱨᱤ, ᱯᱟᱞᱞᱟ,
ᱥᱤᱞᱯᱤᱧ, ᱯᱟᱞᱟᱠ ᱯᱟᱨᱠᱚᱢ
ᱥᱮᱱᱮᱨ, ᱵᱷᱟᱠᱴᱟᱱ, ᱢᱩᱫᱷᱩᱱ
ᱩᱴᱠᱟᱹᱣᱟᱵᱳᱱ ᱨᱮᱦᱮᱫ ᱦᱚᱸ ᱨᱮᱦᱮᱫ᱾
ᱵᱩᱡᱷᱟᱹᱣᱮᱫ ᱨᱮᱦᱚᱸᱵᱳᱱ ᱵᱤᱨ ᱵᱩᱨᱩ ᱫᱟᱨᱮᱠᱳ ᱩᱡᱟᱹᱲᱚᱜᱠᱟᱱ᱾
ᱵᱟᱰᱟᱭ ᱨᱮᱦᱚᱸᱵᱳᱱ; ᱫᱟᱨᱮ ᱵᱮᱜᱚᱨ ᱡᱤᱣᱤ ᱥᱟᱶᱛᱟ ᱚᱴᱟᱝ ᱟᱫᱚᱜ᱾
ᱫᱮᱻᱫᱮᱞᱟ, ᱡᱤᱣᱤ ᱫᱩᱞᱟᱹᱲᱤᱭᱟᱹ ᱥᱟᱱᱟᱢ ᱵᱟᱧᱪᱟᱣᱼᱟᱵᱳᱱ ᱡᱤᱣᱤ ᱫᱟᱨᱮ
ᱚᱫᱟ ᱚᱛᱨᱮ ᱨᱚᱦᱚᱭ ᱠᱟᱛᱮᱫ ᱯᱟᱨᱪᱟᱣᱼᱟᱵᱳᱱ ᱡᱤᱣᱤ ᱤᱛᱟᱹ᱾

ᱚᱱᱚᱬᱦᱤᱭᱟᱹ ᱠᱟᱞᱤᱨᱟᱢ ᱢᱩᱨᱢᱩ

ᱵᱳᱝᱜᱟ ᱫᱤᱥᱳᱢᱛᱮᱭ ᱢᱚᱦᱰᱟᱭᱮᱱᱟ ᱢᱟᱱ ᱫᱤᱥᱳᱢ ᱨᱮᱱ ᱧᱩᱛᱩᱢᱟᱱ ᱥᱮᱨᱮᱧ ᱵᱟᱰᱳᱦᱤ

ᱞᱚᱠᱷᱤᱨᱟᱢ ᱦᱟᱸᱥᱫᱟ

ᱵᱳᱝᱜᱟ ᱫᱤᱥᱳᱢᱛᱮᱭ ᱢᱚᱦᱰᱟᱭᱮᱱᱟ ᱥᱮᱨᱮᱧ ᱵᱟᱰᱳᱦᱤ ᱞᱚᱠᱷᱤᱨᱟᱢ ᱦᱟᱸᱥᱫᱟ| ᱡᱟᱸᱦᱟᱭ ᱞᱚᱠᱷᱤᱨᱟᱢ ᱜᱮ ᱜᱟᱵᱟᱱ ᱞᱮᱫᱼᱟᱭ ᱟᱨ ᱥᱮᱨᱮᱧ ᱞᱮᱫᱼᱟᱭ ”ᱢᱮᱱᱟᱜ ᱢᱳᱛᱤ ᱦᱤᱨᱟᱹ ᱢᱮᱱᱟᱜ ᱥᱳᱱᱟ ᱨᱩᱯᱟᱹ”, ”ᱚᱞ ᱟᱹᱠᱤᱞ ᱵᱟᱦᱟ ᱜᱩᱛᱩᱭ ᱯᱮᱥᱮ ᱢᱟᱞᱟ” ”ᱠᱤᱭᱟᱹ ᱠᱟᱫᱟᱢ ᱡᱷᱟᱨᱱᱟ”, ”ᱫᱟᱨᱟᱭ ᱯᱚᱭᱞᱟ ᱯᱷᱟᱹᱜᱩᱱ”, ”ᱚᱠᱚᱭ ᱞᱟᱹᱜᱤᱫ ᱟᱢᱟᱜ ᱢᱚᱱᱮ ᱚᱠᱚᱭ ᱵᱟᱰᱟᱭᱟ”, ”ᱦᱤᱦᱤᱲᱤ ᱯᱤᱯᱤᱲᱤᱨᱮ ᱠᱷᱮᱨᱣᱟᱞᱹᱹᱹᱹᱹ” ᱟᱨᱦᱚᱸ ᱮᱢᱟᱱ ᱮᱢᱟᱱ ᱥᱮᱨᱮᱧᱠᱳ|

ᱞᱚᱠᱷᱤᱨᱟᱢ ᱦᱟᱸᱥᱫᱟ ᱫᱚ ᱯᱟᱨᱚᱢᱮᱱ ᱒᱓ ᱟᱜᱚᱥᱴ ᱦᱤᱞᱳᱜ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱢᱟᱱᱵᱟᱡᱟᱨ ᱨᱮᱭᱟᱜ ᱪᱤᱨᱩᱵᱷᱤᱴᱟᱹ ᱟᱛᱳᱨᱮ ᱯᱷᱩᱴᱵᱚᱞ ᱠᱷᱮᱸᱞᱳᱸᱰ ᱧᱮᱞ ᱚᱠᱛᱚ ᱥᱮᱸᱜᱮᱞ ᱫᱟᱜ ᱛᱮᱭ ᱵᱟᱡᱟᱣᱮᱱ ᱠᱷᱟᱹᱛᱤᱨ ᱡᱤᱣᱤᱵᱟᱹᱛᱤ ᱫᱚ ᱥᱩᱫᱟᱹᱭ ᱫᱤᱱ ᱞᱟᱹᱜᱤᱫ ᱤᱬᱤᱡᱼᱮᱱ ᱛᱟᱭᱟ ᱩᱢᱮᱹᱨ ᱫᱚ ᱦᱳᱭᱞᱮᱱ ᱛᱟᱭᱟ ᱓᱕ ᱥᱮᱨᱢᱟ|

ᱞᱚᱠᱷᱤᱨᱟᱢ ᱦᱟᱸᱥᱫᱟ ᱫᱚ ᱟᱡ ᱨᱮᱱ ᱚᱲᱟᱜ ᱞᱚᱠᱷᱤ ᱢᱟᱹᱱᱤᱡ ᱥᱚᱨᱚᱥᱚᱛᱤ ᱦᱟᱸᱥᱫᱟ ᱥᱟᱶᱛᱮᱭ ᱥᱮᱨᱮᱧᱮᱫ ᱛᱟᱦᱮᱸᱠᱟᱱᱟ ᱨᱟᱦᱞᱟ ᱚᱨᱠᱮᱥᱴᱨᱟ ᱧᱩᱛᱩᱢᱟᱱ ᱥᱮᱨᱮᱧ ᱜᱟᱶᱛᱟ ᱦᱚᱸᱠᱤᱱ ᱵᱮᱱᱟᱣ ᱟᱠᱟᱫᱼᱟ ᱟᱨ ᱚᱱᱟ ᱜᱟᱛᱮ ᱜᱟᱶᱛᱟᱨᱮ ᱟᱭᱢᱟ ᱠᱚᱲᱟ ᱠᱩᱲᱤᱠᱳ ᱠᱟᱹᱢᱤᱭᱮᱫᱼᱟ|

ᱮᱱᱮᱡ ᱥᱮᱨᱮᱧ ᱥᱟᱶ ᱥᱟᱶᱛᱮ ᱞᱚᱠᱷᱤᱨᱟᱢ ᱫᱚ ᱢᱤᱫ ᱢᱟᱪᱮᱫ ᱦᱚᱸᱭ ᱛᱟᱦᱮᱸᱠᱟᱱᱟ ᱞᱚᱠᱷᱤᱨᱟᱢ ᱨᱮᱱ ᱢᱟᱪᱮᱫ ᱜᱟᱛᱮ ᱥᱟᱶᱛᱮ ᱥᱟᱱᱟᱢ ᱞᱟᱠᱪᱟᱨ ᱫᱩᱞᱟᱹᱲᱤᱭᱟᱹᱠᱳ ᱜᱟᱹᱦᱤᱨ ᱫᱩᱠ ᱠᱳ ᱥᱚᱫᱚᱨᱮᱫᱼᱟ|

ᱵᱷᱳᱞᱟᱱᱟᱛᱷ ᱦᱟᱸᱥᱫᱟ ᱛᱟᱭᱱᱚᱢ ᱢᱟᱱ ᱫᱤᱥᱳᱢ ᱨᱮᱱ ᱧᱩᱛᱩᱢᱟᱱ ᱥᱮᱨᱮᱧ ᱵᱟᱰᱳᱦᱤ ᱫᱚ ᱞᱚᱠᱷᱤᱨᱟᱢ ᱜᱮᱭ ᱛᱮᱭᱟᱨ ᱞᱮᱱᱟ ᱢᱮᱱᱠᱷᱟᱱ ᱱᱤᱛ ᱫᱚ ᱵᱟᱨᱭᱟ ᱜᱤᱫᱟᱹᱨ ᱵᱟᱹᱜᱤ ᱦᱚᱴᱚ ᱠᱟᱛᱮᱫ ᱵᱳᱝᱜᱟ ᱫᱤᱥᱳᱢ ᱛᱮᱭ ᱢᱚᱦᱰᱟᱭᱮᱱᱟ|