Monthly Archives: August 2020

অকারেঞ রাগা

অকারেঞ রাগা
-সুমনা বেসরা

ছাতা দারে পৗওরৗ ঞু তেয় হেরেল আকান
টিফিন টেওয়েঞ কাতে ইঞিঞ তাসেঃ সেতোংরে
গিদৗর কো তিরেম যতন কোওয়া
হারাঃ গেয়াকো কুলহি ধুড়িরে।

উইহার গদাঞ মিৎ অনলিয়ৗ ঠেনেঞ সেনঃ আ
কুলিয়েয়াঞ রেঁগেচ মুরুখ খন তিসেঞ দোগঃআ
অকা পুথিরেঞ তলাসা দুক নিপুচ অনড়হেঁ ,
যুদি, সিরপৗ তুমাল অলরে জহড় হেনায়া
বায় ঞামা ইঞ লাগিৎ অক্ত
আরহঁ অনাতে মনেঞ সলঃ বকগ আ।

পারগানা ঠেন হঁ সেটের সানাঞা
কুলি সানায়িঞা,
বাবা, সাঁওতা তিরলা চেদাঃ ছাতিক সাঁওক সাগাই
কড়াকো দ চেদাঃ ভাটি বায়ার
সুলুকতে ভুঞ্জাও ডাহার ওকোর?
পাচেঃ রাঁগাও মেসায় কয়ঃ আঞ
ভোট উইহাররে জহড় মেনায়
পাচে সদরঃ আ ইঞাঃগে কাই।

আতোরেন মাচেৎ ঠেন হঁ বাডায় সানাঞা
মাহাশয়, কম উমেররেক বাপ্লা আকাদিঞা
মাঝি বাবা উমের বায় কুলি আকাদিঞা, দেনা পাওনায় লেখা আকাদা
জালি ডাঁডা কায়রা পহা যুদি লাবিৎ সেতোং হেলাঃ বের এ পাকটঃআ?
বাং পান্তেঃ উইহার ঢডারে জাঙ্গায় চাডোয় লাগিদঃআ? অকয়াঃ কৗই ?
বৗঞ ভরসায়া, যুদি বিদ্যাগাঢ়রেয় কৗমি থাকাও আকানা
জিরৗঃ দিন করে রৗস্কৗ অকতয় বিতৗও এদা
আচকা আরহঁয় এদরে বেজারৗঞা।

বৗঞ লৗইআ অকয়ঠেন হঁ
বৗঞ রাগা হড় আঁজম লেকা।
আগাম অক্ত পাচেয় উমৗন
ইঞাঃ নিশুন হিঁকোৎ।

কাটিআম//২৭.০৮.২০২০