ᱜᱩᱡᱩᱜ ᱫᱚ

ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱜᱩᱡᱩᱜ ᱫᱚ ᱦᱳᱭᱳᱜ ᱜᱮᱭᱟ
ᱛᱮᱦᱮᱧ, ᱜᱟᱯᱟ ᱵᱟᱝᱠᱷᱟᱱ ᱢᱮᱭᱟᱝ,
ᱚᱠᱟᱨᱮ ᱚᱠᱟᱞᱮᱠᱟ ᱠᱟᱛᱮᱫ
ᱚᱱᱟᱜᱮ ᱵᱟᱰᱟᱭ ᱵᱟᱹᱱᱩᱜᱼᱟᱱ᱿

ᱵᱟᱧᱪᱟᱜ ᱞᱟᱹᱲᱦᱟᱹᱭᱜᱮ ᱡᱤᱭᱚᱱ
ᱢᱮᱱᱠᱷᱟᱱ ᱡᱤᱭᱚᱱ ᱫᱚ ᱢᱩᱪᱟᱹᱫᱚᱜ ᱜᱮᱭᱟ
ᱥᱮᱨᱢᱟᱨᱮᱢ ᱰᱷᱟᱝᱼᱚᱜ, ᱫᱟᱨᱦᱟᱨᱮᱢ ᱳᱠᱳᱜ,
ᱯᱟᱨᱟᱝᱜᱚᱛ ᱵᱟᱝᱼᱮᱢ ᱧᱟᱢᱟ᱿

ᱜᱩᱡᱩᱜ ᱫᱚ ᱥᱟᱹᱨᱤ ᱱᱟᱜᱟᱢ ᱠᱟᱱᱟ
ᱚᱱᱟᱛᱮ ᱱᱟᱜᱟᱢ ᱥᱤᱨᱡᱚᱱ ᱚᱴᱚᱠᱟᱢ
ᱨᱚᱦᱚᱲ ᱥᱟᱠᱟᱢ ᱧᱩᱨᱩᱜ ᱞᱮᱠᱟᱫᱚ ᱵᱟᱝ
ᱦᱟᱹᱛᱤ ᱞᱮᱠᱟ ᱵᱷᱤᱱᱫᱟᱹᱲᱚᱜ ᱢᱮ᱿

ᱟᱢᱟᱜ ᱫᱩᱠ ᱦᱚᱢᱚᱨ ᱨᱚᱸᱫᱷᱚᱱ
ᱢᱟᱹᱱᱢᱤ ᱢᱚᱱᱮᱨᱮ ᱵᱟᱥᱟᱜ ᱢᱟ,
ᱜᱚᱡ ᱛᱟᱭᱱᱚᱢ ᱦᱚᱸ ᱟᱢᱟᱜ ᱠᱟᱛᱷᱟ
ᱥᱟᱶᱛᱟ ᱛᱟᱞᱟᱨᱮ ᱵᱟᱥᱟᱜ ᱢᱟ᱿