ᱵᱷᱚᱨᱥᱟ
Poem ᱵᱷᱚᱨᱥᱟ ✒️✒️✒️ ᱥᱩᱢᱤᱛᱟ ᱴᱩᱰᱩ
ᱫᱷᱟ.ᱨᱛᱤ ᱢᱟ ᱞᱤᱞᱤ-ᱵᱤᱪᱷᱤ
ᱢᱟᱱᱣᱟ ᱠᱚᱣᱟᱜ ᱵᱷᱚᱨᱥᱟ,
ᱢᱟᱱᱣᱟ ᱥᱟᱜᱟᱞ-ᱥᱟᱜᱟᱞ
ᱦᱚᱭ ᱡᱤᱣᱤ ᱵᱷᱚᱨᱥᱟ l
ᱡᱤᱭᱟ.ᱞᱤ ᱠᱚ ᱦᱮᱸᱥᱮᱡ-ᱥᱮᱠᱨᱮᱡ
ᱫᱟᱨᱮ-ᱱᱟ.ᱲᱤ ᱵᱷᱚᱨᱥᱟ,
ᱫᱟᱨᱮ-ᱱᱟ.ᱲᱤ ᱞᱮᱜᱮᱡ-ᱞᱮᱜᱮᱡ
ᱚᱛ ᱦᱟᱥᱟ ᱵᱷᱚᱨᱥᱟ l
ᱫᱟᱜ ᱟᱛᱩᱜ ᱞᱮᱜᱮᱢ-ᱞᱮᱜᱮᱢ
ᱱᱟ.ᱭ-ᱱᱟᱞᱟ ᱵᱷᱚᱨᱥᱟ,
ᱦᱟᱠᱳ-ᱠᱟᱴᱠᱳᱢ ᱪᱷᱤᱞ-ᱵᱤᱞ ᱨᱟᱜᱟᱢ-ᱨᱩᱜᱩᱢ
ᱫᱟᱜ ᱵᱷᱚᱨᱥᱟ l
ᱡᱟᱱᱟᱢ ᱟᱲᱟᱝ ᱴᱟᱲᱟᱝ-ᱴᱟᱲᱟᱝ
ᱡᱟᱱᱟᱢ ᱟᱭᱳ ᱵᱷᱚᱨᱥᱟ,
ᱥᱚᱢᱟᱡᱽ ᱛᱟᱵᱳᱱ ᱨᱤᱞᱟ.-ᱢᱟᱞᱟ
ᱟᱛᱳ ᱢᱚᱲᱮᱠᱳ ᱵᱷᱚᱨᱥᱟ l
ᱥᱚᱦᱚᱨ-ᱵᱟᱡᱟᱨ ᱫᱟᱲᱟᱱ ᱞᱟ.ᱜᱤᱫ
ᱴᱟᱠᱟ-ᱯᱳᱭᱥᱟ ᱵᱷᱚᱨᱥᱟ,
ᱥᱳᱱᱟ ᱫᱤᱥᱳᱢ ᱛᱟᱵᱳᱱ
ᱵᱳᱝᱜᱟ-ᱵᱳᱨᱳ ᱵᱷᱚᱨᱥᱟ l
ᱚᱱᱟᱛᱮᱜᱮ ᱡᱷᱚᱛᱚ ᱠᱷᱚᱱ
ᱫᱷᱟ.ᱨᱛᱤ ᱯᱩᱨᱤ ᱥᱚᱨᱮᱥᱟ,
ᱱᱚᱣᱟ ᱨᱮᱭᱟᱜ ᱵᱩᱜᱤ-ᱵᱟ.ᱲᱤᱡ
ᱟᱵᱚ ᱨᱮᱜᱮ ᱵᱷᱚᱨᱥᱟ. l
ᱛᱩᱢᱟ.ᱞᱤᱡᱺ ᱜᱚᱱᱮᱥ ᱢᱟᱨᱟᱱᱰᱤ, ᱯᱩᱨᱩᱞᱤᱭᱟ.