ᱯᱳᱨᱟᱭᱱᱤ ᱢᱟᱹᱭ

ᱯᱳᱨᱟᱭᱱᱤ
ᱢᱟᱹᱭ

(ᱚᱱᱚᱬᱦᱮ)

ᱠᱟᱞᱤᱨᱟᱢ ᱢᱩᱨᱢᱩ

ᱯᱳᱨᱟᱭᱱᱤ
ᱢᱟᱹᱭ

PORAYNI MAEY

A Bunch of Modern Poems in Santhali.

By

KALIRAM MURMU

Copyright reserved by the author.

ISBN : 978-93-5391-347-2

First Published:- November 2019

Published by:- KALIRAM MURMU

Chaltha, Ranibandh (722148)

Bankura, West Bengal

Mob:-8101964215

Website:- https://kalirammurmuthakur.home.blog/

Email:- kalirammurmu1991@gmail.com

Printed by:- ARSHAL PUBLISHING GROUP

Ranibandh (722148), Bankura, West Bengal

Website:- https://arshalgroup.com/

Email:- arshal.library@gmail.com

Price:- 140.00

(One hundred forty rupees only)

ᱟᱞᱟᱭ

ᱫᱷᱟᱹᱨᱛᱤ ᱡᱟᱠᱟᱛᱨᱮᱱ
ᱥᱟᱱᱟᱢ ᱥᱟᱶᱛᱟ ᱞᱟᱹᱣᱲᱤᱭᱟᱹ ᱞᱟᱹᱜᱤᱫ᱿

ᱤᱧᱟᱹᱜ ᱵᱟᱠᱷᱮᱬ

ᱥᱟᱱᱟᱢ ᱢᱟᱹᱱᱢᱤᱜᱮ ᱢᱤᱻᱢᱤᱫᱴᱟᱝ ᱥᱟᱶᱛᱟᱨᱮ ᱡᱟᱱᱟᱢ ᱛᱟᱭᱱᱚᱢ ᱦᱟᱨᱟᱵᱩᱨᱩᱜ ᱥᱟᱶ ᱥᱟᱶᱛᱮ ᱟᱭᱢᱟ ᱞᱮᱠᱟᱱᱟᱜᱠᱳ ᱠᱟᱹᱢᱤᱭᱟ ᱟᱨ ᱟᱭᱢᱟ ᱥᱮᱫᱛᱮᱠᱳ ᱯᱟᱹᱨᱩᱠᱷᱤᱭᱟᱹᱜᱼᱟ ᱡᱮᱞᱮᱠᱟᱼ ᱚᱞᱵᱮᱞ, ᱪᱤᱛᱟᱹᱨ ᱟᱸᱠᱟᱣ, ᱮᱱᱮᱡ, ᱥᱮᱨᱮᱧ, ᱠᱷᱮᱞᱳᱰ ᱮᱢᱟᱱ ᱮᱢᱟᱱ᱾ ᱱᱚᱣᱟᱠᱳ ᱫᱚ ᱦᱳᱭᱳᱜ ᱠᱟᱱᱟ ᱢᱟᱹᱱᱢᱤᱭᱟᱜ ᱤᱸᱫᱤᱶᱤᱥᱩᱟᱞ ᱛᱟᱞᱮᱸᱛ ᱟᱨ ᱱᱚᱣᱟ ᱤᱸᱫᱤᱶᱤᱥᱩᱟᱞ ᱛᱟᱞᱮᱸᱛ ᱫᱚ ᱢᱚᱱᱮ ᱡᱤᱣᱤᱨᱮ ᱥᱤᱨᱡᱚᱱᱚᱜᱼᱟ ᱥᱟᱶᱛᱟ ᱥᱮ ᱥᱳᱪᱤᱮᱛᱭ ᱠᱷᱚᱱ᱾ ᱥᱟᱶᱛᱟ ᱨᱮᱭᱟᱜ ᱫᱷᱚᱨᱚᱢ ᱠᱚᱨᱚᱢ ᱯᱟᱹᱨᱥᱤ, ᱞᱟᱠᱪᱟᱨ, ᱟᱪᱟᱨ ᱵᱮᱣᱦᱟᱨ, ᱡᱤᱭᱚᱱ ᱠᱷᱟᱸᱰᱟᱣ ᱨᱮᱭᱟᱜ ᱵᱚᱨᱱᱚᱱ, ᱨᱮᱸᱜᱮᱡ ᱠᱤᱸᱥᱟᱹᱬ ᱱᱚᱣᱟᱠᱳ ᱠᱷᱟᱹᱛᱤᱨᱜᱮ ᱢᱤᱫ ᱦᱚᱲ ᱚᱱᱚᱬᱦᱮ ᱥᱮᱨᱮᱧ ᱠᱟᱹᱦᱱᱤ ᱚᱱᱚᱞ ᱮᱢᱟᱱᱟᱜᱼᱮ ᱚᱞ ᱫᱟᱲᱮᱭᱟᱜᱼᱟ, ᱢᱤᱫ ᱦᱚᱲᱼᱮ ᱥᱮᱨᱮᱧ ᱫᱟᱲᱮᱭᱟᱜᱼᱟ, ᱢᱤᱫ ᱦᱚᱲᱼᱮ ᱜᱟᱭᱟᱱ ᱫᱟᱲᱮᱭᱟᱜᱼᱟ᱾ ᱚᱱᱟᱛᱮ ᱢᱮᱱ ᱜᱟᱱᱚᱜᱼᱟ ᱥᱳᱪᱤᱮᱛᱭ ᱠᱷᱚᱱ ᱡᱟᱱᱟᱢᱚᱜ ᱤᱸᱫᱤᱶᱤᱥᱩᱟᱞ ᱛᱟᱞᱮᱸᱛ ᱛᱮᱜᱮ ᱥᱟᱶᱦᱮᱫ ᱥᱮ ᱞᱤᱛᱮᱨᱟᱛᱩᱨᱮ ᱨᱮᱭᱟᱜ ᱫᱷᱚᱱ ᱫᱩᱨᱤᱵᱽ ᱫᱚ ᱚᱞᱵᱮᱞᱛᱮ ᱠᱤᱸᱥᱟᱹᱬᱚᱜᱼᱟ ᱟᱨ ᱚᱱᱟᱛᱮᱜᱮ ᱢᱮᱱᱟᱠᱳ ᱱᱚᱣᱟ ᱞᱤᱛᱮᱨᱟᱛᱩᱨᱮ ᱫᱚ ᱢᱤᱫ ᱥᱳᱪᱤᱟᱞ ᱪᱩᱞᱛᱩᱨᱮ ᱠᱟᱱᱟ᱾ ᱱᱚᱣᱟ ᱥᱳᱪᱤᱟᱞ ᱪᱩᱞᱛᱩᱨᱮ ᱨᱮᱭᱟᱜ ᱫᱚ ᱵᱟᱨᱭᱟ ᱦᱟᱹᱴᱤᱧ ᱢᱮᱱᱟᱜᱼᱟ ᱚᱱᱟᱠᱤᱱ ᱫᱚ ᱦᱳᱭᱳᱜ ᱠᱟᱱᱟ ᱯᱳᱯᱩᱞᱟᱨ ᱪᱩᱞᱛᱩᱨᱮ ᱟᱨ ᱥᱳᱯᱷᱤᱥᱛᱤᱪᱟᱛᱮᱫ ᱪᱩᱞᱛᱩᱨᱮᱹ

ᱯᱳᱯᱩᱞᱟᱨ ᱪᱩᱞᱛᱩᱨᱮ ᱫᱚ ᱦᱳᱭᱳᱜ ᱠᱟᱱᱟ ᱡᱟᱸᱦᱟᱫᱚ ᱵᱟᱹᱲᱛᱤ ᱧᱩᱛᱩᱢᱟᱱᱟᱠᱟᱱ ᱡᱮᱞᱮᱠᱟ ᱡᱟᱸᱦᱟ ᱮᱱᱮᱡ ᱥᱮᱨᱮᱧ ᱫᱚ ᱵᱟᱹᱲᱛᱤ ᱦᱚᱲᱠᱳ ᱧᱮᱞᱮᱫᱼᱟ ᱥᱮ ᱟᱧᱡᱚᱢᱮᱫᱼᱟ ᱟᱨ ᱡᱟᱸᱦᱟ ᱯᱩᱛᱷᱤ ᱯᱟᱛᱷᱟᱢ ᱫᱚ ᱵᱟᱹᱲᱛᱤ ᱦᱚᱲᱠᱳ ᱯᱟᱲᱦᱟᱣᱮᱫᱼᱟ ᱚᱱᱟᱫᱚ ᱱᱟᱣᱟᱱᱟᱜ ᱦᱚᱸ ᱦᱳᱭ ᱫᱟᱲᱮᱭᱟᱜᱼᱟ ᱟᱨ ᱢᱟᱨᱮᱭᱟᱱᱟᱜ ᱦᱚᱸ ᱦᱳᱭ ᱫᱟᱲᱮᱭᱟᱜᱼᱟ ᱟᱨ ᱥᱳᱯᱷᱤᱥᱛᱤᱪᱟᱛᱮᱫ ᱪᱩᱞᱛᱩᱨᱮ ᱫᱚ ᱦᱳᱭᱳᱜ ᱠᱟᱱᱟ ᱮᱠᱷᱮᱱ ᱱᱟᱦᱟᱜ ᱚᱠᱛᱚ ᱨᱮᱭᱟᱜ ᱱᱟᱦᱟᱜ ᱮᱱᱮᱡ ᱥᱮᱨᱮᱧ ᱥᱮ ᱱᱟᱦᱟᱜ ᱫᱷᱟᱨᱟᱛᱮ ᱚᱞᱵᱮᱞ ᱯᱩᱛᱷᱤ ᱯᱟᱛᱷᱟᱢᱠᱳ᱾
ᱬᱟᱨᱽᱤᱥᱛ ᱞᱤᱛᱮᱨᱟᱛᱩᱨᱮ ᱨᱮᱭᱟᱜ ᱛᱷᱮᱳᱨᱭ ᱞᱮᱠᱟᱛᱮᱫᱚ ᱢᱤᱫᱴᱟᱝ ᱥᱟᱶᱦᱮᱫᱨᱮ ᱠᱟᱹᱣᱰᱤ ᱟᱹᱨᱤᱛᱮ ᱩᱛᱱᱟᱹᱣᱼᱚᱜ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ, ᱨᱟᱡᱽᱟᱹᱨᱤ ᱯᱳᱞᱤᱪᱭᱛᱮ ᱢᱟᱹᱱᱢᱤᱭᱟᱜ ᱱᱤᱫᱷᱟᱹᱱ ᱱᱟᱪᱟᱨ ᱦᱟᱞᱚᱛ ᱥᱩᱥᱟᱹᱨ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱟᱨ ᱥᱟᱶᱛᱟ ᱟᱹᱨᱤᱛᱮ ᱥᱟᱶᱛᱟ ᱵᱷᱟᱹᱞᱟᱹᱭ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱛᱟᱦᱮᱸᱱ ᱞᱟᱹᱠᱛᱤ ᱠᱟᱱᱟ᱾ ᱛᱚᱵᱮᱭᱟᱱᱤᱡ ᱱᱟᱣᱟ ᱩᱭᱦᱟᱹᱨ ᱵᱷᱟᱽᱱᱟᱛᱮ ᱢᱤᱫᱴᱟᱝ ᱡᱟᱹᱛᱤᱭᱟᱜ ᱱᱟᱜᱟᱢ ᱥᱟᱶᱛᱮ ᱱᱟᱦᱟᱜ ᱨᱮᱭᱟᱜ ᱛᱩᱞᱟᱹᱡᱚᱠᱷᱟ ᱜᱟᱱᱚᱜᱼᱟ ᱟᱨ ᱚᱱᱟ ᱵᱮᱲᱦᱟᱭᱛᱮ ᱥᱚᱥᱚᱱᱚᱜ ᱨᱮᱭᱟᱜ ᱩᱛᱱᱟᱹᱣ ᱞᱟᱹᱜᱤᱫ ᱱᱟᱣᱟ ᱱᱟᱣᱟ ᱯᱳᱞᱤᱪᱭ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱵᱩᱥᱟᱹᱬᱚᱜᱼᱟ᱾

ᱥᱟᱱᱟᱢ ᱦᱚᱲᱜᱮ ᱡᱟᱱᱟᱢᱤᱭᱟᱹ ᱥᱟᱶᱛᱟ ᱡᱮᱞᱮᱠᱟ ᱥᱚᱨᱮᱥ ᱜᱮᱠᱳ ᱢᱮᱛᱟᱜᱼᱟ ᱚᱱᱠᱟᱜᱮ ᱚᱱᱟ ᱥᱟᱶᱛᱟ ᱨᱮᱭᱟᱜ ᱨᱟᱭᱨᱤᱛ ᱟᱹᱨᱤᱪᱟᱹᱞᱤ ᱫᱷᱚᱨᱚᱢ ᱟᱨ ᱠᱚᱨᱚᱢ ᱱᱟᱭ ᱱᱮᱢᱟᱪᱟᱨ ᱥᱟᱱᱟᱢᱜᱮ ᱚᱱᱛᱚᱨ ᱩᱡᱟᱹᱲᱟᱛᱮᱫ ᱫᱩᱞᱟᱹᱲ ᱥᱟᱱᱟᱠᱚᱣᱟ᱾ ᱡᱟᱱᱟᱢᱤᱭᱟᱹ ᱥᱟᱶᱛᱟ ᱞᱟᱹᱜᱤᱫ ᱦᱟᱯᱮᱱ ᱫᱤᱱᱨᱮᱱ ᱯᱚᱼᱯᱚᱝᱲᱟ ᱞᱟᱹᱜᱤᱫ ᱡᱟᱸᱦᱟᱛᱤᱱᱟᱹᱜᱜᱮᱠᱳ ᱫᱟᱲᱮᱭᱟᱜ ᱠᱟᱹᱢᱤ ᱦᱚᱴᱚᱠᱟᱜ ᱨᱮᱭᱟᱜᱠᱳ ᱨᱤᱠᱟᱹᱭᱟ ᱟᱱᱟᱛᱮ ᱚᱠᱚᱭ ᱫᱚ ᱚᱲᱟᱜᱨᱮ ᱫᱩᱲᱩᱵ ᱠᱟᱛᱮᱫ ᱟᱨ ᱚᱠᱭ ᱫᱚ ᱫᱤᱥᱳᱢ ᱫᱤᱥᱳᱢ ᱫᱟᱬᱟ ᱟᱹᱪᱩᱨ ᱠᱟᱛᱮᱫ, ᱵᱷᱮᱜᱟᱨ ᱵᱷᱮᱜᱟᱨ ᱠᱟᱹᱢᱤ ᱠᱟᱛᱮᱫ ᱥᱟᱶᱛᱟ ᱟᱨ ᱥᱟᱶᱛᱟᱨᱮᱱ ᱢᱟᱹᱱᱢᱤ ᱵᱟᱧᱪᱟᱣ ᱫᱚᱦᱚ ᱨᱮᱭᱟᱜ ᱫᱤᱥ ᱦᱩᱫᱤᱥᱠᱳ ᱪᱟᱯᱟᱞ ᱦᱟᱹᱴᱤᱧᱟ᱾ ᱚᱠᱚᱭ ᱫᱚ ᱠᱳ ᱚᱞ ᱥᱟᱨᱥᱟᱫᱽᱞᱮᱭᱟ ᱟᱨ ᱚᱠᱚᱭᱠᱳ ᱫᱚ ᱨᱚᱲ ᱠᱟᱛᱮᱫ ᱦᱚᱲᱠᱳ ᱵᱩᱡᱷᱟᱹᱣ ᱠᱚᱣᱟ᱾

ᱤᱧᱦᱚᱸ ᱦᱳᱭ ᱚᱱᱠᱟᱜᱮ ᱫᱤᱥᱳᱢ ᱨᱮᱭᱟᱜ ᱮᱴᱟᱜ ᱥᱟᱶᱛᱟᱠᱳ ᱧᱮᱞ ᱠᱟᱛᱮᱫ ᱟᱨ ᱫᱷᱟᱹᱨᱛᱤᱨᱮ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱨᱤᱞᱟᱹᱢᱟᱞᱟ ᱳᱯᱨᱳᱢ ᱡᱟᱭᱡᱩᱜᱽ ᱡᱤᱭᱟᱹᱲ ᱫᱚᱦᱚᱭ ᱞᱟᱹᱜᱤᱫᱛᱮ ᱱᱟᱦᱟᱜ ᱚᱠᱛᱚᱨᱮᱭᱟᱜ ᱪᱤᱛᱟᱹᱨ ᱟᱨ ᱞᱮᱵᱷᱲᱟ ᱞᱟᱞᱚᱪᱤᱭᱟᱹ ᱯᱟᱨᱜᱟᱱᱟ ᱠᱚᱣᱟᱜ ᱦᱩᱫᱤᱥ ᱟᱹᱨᱩᱯᱷᱮᱨᱟᱣ ᱞᱟᱹᱜᱤᱫᱛᱮ ᱱᱚᱣᱟ ᱚᱱᱚᱬᱦᱮ ᱯᱩᱛᱷᱤ ᱜᱟᱜᱼᱵᱟᱱ ᱞᱟᱹᱜᱤᱫᱼᱤᱧ ᱵᱚᱦᱲᱮᱭᱮᱱᱟ᱾ ᱢᱮᱱᱠᱷᱟᱱ ᱠᱩᱢᱚᱱᱮᱭᱟᱱ ᱦᱚᱲ ᱠᱚᱣᱟᱜ ᱢᱚᱱᱮ ᱱᱟᱯᱟᱭ ᱨᱩᱭᱟᱹᱲᱚᱜᱼᱟ ᱢᱮᱱᱛᱮ ᱩᱱᱟᱹᱜ ᱯᱟᱹᱛᱭᱟᱹᱣ ᱫᱚ ᱵᱟᱹᱱᱩᱜ ᱛᱤᱧᱟᱹ ᱪᱮᱫᱟᱜᱥᱮ ᱚᱠᱛᱚ ᱥᱟᱶᱛᱮ ᱛᱟᱞ ᱢᱤᱞᱟᱹᱣᱜᱮ ᱥᱟᱱᱟᱢᱠᱳ ᱠᱩᱥᱤᱭᱟᱜ ᱠᱟᱱᱟ; ᱱᱟᱯᱟᱭ ᱚᱠᱛᱚ ᱥᱟᱹᱜᱩᱱ ᱫᱟᱨᱟᱢ ᱫᱚ ᱚᱠᱚᱭᱜᱮ ᱵᱟᱝᱠᱳ ᱠᱷᱚᱡᱚᱜ ᱠᱟᱱᱟ᱾ ᱮᱱᱦᱚᱸ ᱟᱭᱢᱟ ᱟᱥ ᱠᱟᱛᱮᱫ ᱥᱮᱫᱟᱭ ᱨᱮᱭᱟᱜ ᱨᱤᱞᱟᱹᱢᱟᱞᱟ ᱥᱟᱶᱛᱟ ᱵᱮᱱᱟᱣ ᱨᱩᱭᱟᱹᱲ ᱨᱮᱭᱟᱜ ᱡᱟᱸᱦᱟ ᱠᱩᱠᱢᱩ ᱤᱧ ᱧᱮᱧᱮᱞ ᱠᱟᱱᱟ, ᱜᱷᱟᱨᱚᱧᱡᱽ ᱛᱟᱞᱟᱨᱮ ᱟᱨ ᱥᱟᱶᱛᱟ ᱛᱟᱞᱟᱨᱮ ᱥᱩᱞᱩᱠ ᱥᱟᱹᱜᱟᱹᱭ ᱡᱤᱭᱟᱹᱲ ᱫᱚᱦᱚᱭ ᱨᱮᱭᱟᱜ ᱡᱟᱸᱦᱟ ᱠᱩᱠᱢᱩ ᱤᱧ ᱧᱮᱧᱮᱞ ᱠᱟᱱᱟ ᱚᱱᱟ ᱡᱟᱛᱮ ᱥᱟᱹᱨᱤ ᱩᱛᱟᱹᱨᱚᱜᱢᱟ ᱚᱱᱟ ᱞᱟᱹᱜᱤᱫᱜᱮ ᱱᱚᱣᱟ ᱯᱩᱛᱷᱤ ᱟᱯᱮ ᱥᱟᱱᱟᱢᱠᱳ ᱞᱟᱹᱜᱤᱫᱛᱤᱧ ᱚᱞ ᱠᱮᱫᱼᱟ ᱟᱨ ᱤᱧ ᱯᱟᱥᱱᱟᱣ ᱠᱮᱫᱼᱟ᱾

ᱤᱧᱜᱮ
ᱜᱟᱹᱦᱤᱨ ᱫᱩᱞᱟᱹᱲ ᱥᱟᱶᱛᱮ
ᱠᱟᱞᱤᱨᱟᱢ ᱢᱩᱨᱢᱩ ᱒᱔/᱐᱙/᱒᱐᱑᱙

ᱚᱱᱚᱬ

ᱟᱭᱢᱟ ᱨᱟᱹᱥᱠᱟᱹ ᱟᱨ ᱜᱚᱨᱚᱵᱽ ᱨᱮᱭᱟᱜ ᱠᱟᱛᱷᱟ ᱡᱟᱹᱛᱤ, ᱥᱟᱶᱛᱟ, ᱥᱟᱶᱦᱮᱫ ᱞᱟᱹᱜᱤᱫ ᱩᱭᱦᱟᱹᱨ ᱵᱷᱟᱵᱽᱱᱟᱣᱟᱛᱮᱫ ᱵᱟᱹᱵᱩ ᱠᱟᱞᱤᱨᱟᱢ ᱢᱩᱨᱢᱩ ᱱᱤᱭᱟᱹᱵᱟᱨ ᱫᱚᱭ ᱚᱞ ᱥᱚᱫᱚᱨ ᱠᱮᱫᱼᱟ ᱚᱱᱚᱬᱦᱮ ᱯᱩᱛᱷᱤ “ᱯᱳᱨᱟᱭᱱᱤ ᱢᱟᱹᱭ”᱾ ᱱᱚᱣᱟ ᱢᱟᱲᱟᱝ “ᱥᱟᱹᱨᱤ ᱫᱩᱞᱟᱹᱲᱤᱭᱟᱹ” ᱚᱱᱚᱬᱦᱮ ᱯᱩᱛᱷᱤᱨᱮ ᱡᱟᱱᱟᱢ ᱫᱟᱛᱟ, ᱵᱚᱭᱦᱟ ᱵᱩᱦᱤᱱ, ᱡᱟᱹᱛᱤ, ᱥᱟᱶᱛᱟ, ᱫᱷᱟᱹᱨᱛᱤᱯᱩᱨᱤ ᱥᱟᱱᱟᱢᱟᱜ ᱫᱩᱞᱟᱹᱲ ᱨᱮᱭᱟᱜ ᱠᱟᱛᱷᱟᱭ ᱚᱞ ᱥᱚᱫᱚᱨ ᱟᱠᱟᱫᱼᱟ ᱟᱭᱢᱟ ᱞᱮᱠᱟᱱ ᱥᱟᱹᱨᱭᱟᱹᱲ ᱩᱭᱦᱟᱹᱨ ᱵᱷᱟᱵᱽᱱᱟᱣᱟᱛᱮᱫ᱾

ᱱᱟᱦᱟᱜ ᱚᱠᱛᱚᱨᱮ ᱵᱟᱹᱵᱩ ᱠᱟᱞᱤᱨᱟᱢ ᱢᱩᱨᱢᱩᱭᱟᱜ ᱚᱞᱵᱮᱞᱨᱮ ᱫᱚ ᱥᱟᱶᱛᱟ ᱟᱹᱨᱤ, ᱠᱟᱹᱣᱰᱤ ᱟᱹᱨᱤ ᱟᱨ ᱨᱟᱡᱽᱟᱹᱨᱤᱛᱮ ᱱᱤᱫᱷᱟᱹᱱ ᱱᱟᱪᱟᱨ ᱦᱟᱞᱚᱛ ᱠᱷᱚᱱ ᱠᱤᱸᱥᱟᱹᱬᱚᱜ ᱨᱮᱭᱟᱜ ᱩᱭᱦᱟᱹᱨᱟᱱ ᱥᱟᱛᱟᱢᱜᱮ ᱵᱟᱹᱲᱛᱤ ᱧᱮᱞ ᱧᱟᱢᱚᱜ ᱠᱟᱱᱟ ᱡᱟᱸᱦᱟ ᱫᱚ ᱮᱠᱷᱮᱱ ᱥᱟᱱᱛᱟᱲ ᱡᱟᱹᱛᱤ ᱥᱩᱢᱩᱝ ᱫᱚ ᱵᱟᱝ; ᱥᱟᱱᱟᱢ ᱢᱟᱹᱱᱢᱤ ᱡᱟᱹᱛᱤ ᱞᱟᱹᱜᱤᱫ ᱩᱭᱦᱟᱹᱨ ᱵᱷᱟᱵᱽᱱᱟ ᱠᱷᱚᱱ ᱮᱛᱚᱦᱚᱵ ᱠᱟᱛᱮᱫ ᱫᱷᱟᱹᱨᱛᱤ ᱯᱩᱨᱤ ᱵᱟᱧᱪᱟᱣ ᱫᱚᱦᱚ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟᱠᱳ ᱱᱚᱣᱟ ᱯᱩᱛᱷᱤᱨᱮᱭ ᱥᱚᱫᱚᱨ ᱟᱠᱟᱫᱼᱟ᱾

ᱱᱚᱣᱟ ᱚᱱᱚᱬᱦᱮ ᱯᱩᱛᱷᱤᱨᱮᱭᱟᱜ “ᱯᱚᱨᱟᱭᱱᱤ ᱢᱟᱹᱭ” ᱚᱱᱚᱬᱦᱮᱨᱮᱵᱳᱱ ᱧᱟᱢᱮᱫᱼᱟ ᱥᱟᱶᱛᱟ ᱟᱹᱨᱤᱛᱮ ᱡᱩᱢᱤᱫᱚᱜ ᱨᱮᱭᱟᱜ ᱫᱤᱥ ᱦᱩᱫᱤᱥ᱾ᱱᱚᱣᱟᱨᱮᱭ ᱢᱮᱱ ᱟᱠᱟᱫᱼᱟ ᱥᱟᱱᱟᱢ ᱡᱟᱹᱛᱤᱭᱟᱜ ᱵᱤᱪᱟᱹᱨ ᱟᱪᱟᱨ ᱢᱤᱫᱜᱮ ᱦᱳᱭᱳᱜᱢᱟ; ᱥᱩᱱᱤᱛᱟ ᱢᱩᱨᱢᱩᱭᱟᱜ ᱵᱮᱲᱟᱨᱮ ᱡᱟᱸᱦᱟᱞᱮᱠᱟ ᱵᱤᱪᱟᱹᱨ ᱦᱳᱭᱞᱮᱱᱟ ᱚᱱᱠᱟᱫᱚ ᱟᱞᱚ ᱦᱳᱭᱳᱜᱢᱟ᱾ᱪᱮᱫᱟᱜᱥᱮ ᱟᱭᱢᱟ ᱥᱮᱫᱛᱮ ᱧᱮᱞ ᱞᱮᱠᱷᱟᱱ ᱥᱟᱱᱛᱟᱲ ᱥᱟᱶᱛᱟ ᱫᱚ ᱥᱟᱱᱟᱢᱟᱜ ᱛᱮᱜᱮ ᱥᱚᱨᱮᱥ ᱜᱮᱭᱟ ᱟᱨ ᱥᱟᱱᱛᱟᱲ ᱥᱟᱶᱛᱟᱨᱮᱜᱮ ᱟᱭᱢᱟ ᱞᱮᱠᱟᱱ ᱥᱮᱪᱮᱫᱚᱜ ᱨᱮᱭᱟᱜ ᱢᱮᱱᱟᱜᱼᱟ᱾ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱥᱟᱹᱨᱤ ᱫᱦᱚᱨᱚᱢ ᱨᱮᱭᱟᱜ ᱠᱚᱨᱚᱢ ᱨᱮᱜᱮ ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤ ᱡᱤᱵᱽ ᱡᱤᱭᱟᱹᱞᱤ ᱫᱷᱟᱹᱨᱛᱤᱯᱩᱨᱤ ᱥᱮᱵᱟ ᱡᱚᱛᱚᱱ ᱨᱮᱭᱟᱜ ᱥᱟᱹᱨᱭᱟᱹᱲ ᱩᱭᱦᱟᱹᱨ ᱢᱮᱱᱟᱜᱼᱟ᱾ᱚᱱᱟᱛᱮᱭ ᱢᱮᱱ ᱟᱠᱟᱫᱼᱟᱼ,
ᱫᱷᱟᱹᱨᱛᱤ ᱡᱟᱠᱟᱛ ᱢᱟᱹᱱᱢᱤ ᱛᱟᱞᱟᱨᱮ
ᱟᱞᱚᱯᱮ ᱛᱟᱦᱮᱸᱱᱟ ᱢᱤᱫ ᱠᱚᱬᱨᱮ ᱴᱩᱭᱟᱹᱨ
ᱫᱷᱟᱹᱨᱛᱤ ᱡᱟᱠᱟᱛ ᱡᱷᱟᱞᱠᱟᱣᱯᱮ
ᱨᱤᱞᱟᱹᱢᱟᱞᱟ ᱥᱚᱱᱮᱜᱚᱲ ᱟᱹᱱᱟᱹᱨᱤ ᱪᱤᱛᱟᱹᱨ᱿
(ᱯᱳᱨᱟᱭᱱᱤ ᱢᱟᱹᱭ)

ᱚᱱᱮ ᱢᱟᱲᱟᱝᱨᱮᱧ ᱢᱮᱱ ᱠᱮᱫ ᱞᱮᱠᱟ ᱫᱷᱟᱹᱨᱛᱤᱯᱩᱨᱤ ᱵᱟᱧᱪᱟᱣ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱟᱭᱢᱟ ᱚᱱᱚᱬᱦᱮᱨᱮᱭ ᱚᱞ ᱟᱠᱟᱫᱼᱟ ᱚᱱᱠᱟᱜᱮ “ᱠᱤᱨᱤᱧ ᱫᱟᱜ” ᱚᱱᱚᱬᱦᱮ ᱨᱮᱦᱚᱸ ᱫᱟᱜ ᱵᱟᱧᱪᱟᱣ ᱨᱮᱭᱟᱜ ᱩᱭᱦᱟᱹᱨᱼᱮ ᱥᱚᱫᱚᱨ ᱟᱠᱟᱫᱼᱟ᱾ ᱥᱟᱱᱟᱢ ᱜᱮᱵᱳᱱ ᱵᱟᱰᱟᱭᱟ ᱫᱟᱜᱜᱮ ᱦᱳᱭᱳᱜ ᱠᱟᱱᱟ ᱡᱤᱣᱤ᱾ ᱢᱮᱱᱠᱷᱟᱱ ᱱᱟᱦᱟᱜ ᱜᱞᱳᱵᱟᱞᱤᱲᱟᱛᱤᱳᱸ ᱡᱩᱜᱽᱨᱮ ᱠᱟᱹᱣᱰᱤᱛᱮ ᱠᱤᱸᱥᱟᱹᱬᱟᱠᱟᱱ ᱦᱚᱲᱠᱳ ᱫᱚ ᱥᱩᱠᱷᱟᱹᱞᱤ ᱡᱤᱭᱚᱱ ᱵᱤᱛᱟᱹᱣ ᱞᱟᱹᱜᱤᱫ ᱟᱯᱟᱱ ᱟᱹᱯᱤᱱ ᱚᱲᱟᱜᱨᱮ ᱚᱛ ᱯᱟᱛᱟᱞ ᱠᱷᱚᱱ ᱧᱩᱭ ᱞᱟᱹᱜᱤᱫ ᱫᱟᱜᱠᱳ ᱨᱟᱠᱟᱵ ᱮᱫᱟ ᱟᱨ ᱟᱹᱛᱦᱟᱹᱣᱲᱤᱜᱮᱠᱳ ᱵᱮᱣᱦᱟᱨᱮᱫᱼᱟ ᱡᱟᱸᱦᱟ ᱠᱷᱟᱹᱛᱤᱨ ᱯᱟᱛᱟᱞᱨᱮ ᱥᱟᱧᱪᱟᱣᱟᱠᱟᱱ ᱫᱟᱜ ᱫᱚ ᱵᱟᱹᱭ ᱵᱟᱹᱭᱛᱮ ᱟᱹᱫᱷᱤᱜ ᱠᱟᱱᱟ ᱟᱨ ᱥᱮᱹᱛᱳᱝ ᱫᱤᱱ ᱚᱱᱟᱛᱮ ᱠᱩᱧ, ᱠᱚᱞ ᱨᱮᱭᱟᱜ ᱫᱟᱜ ᱵᱟᱹᱲᱛᱤ ᱟᱧᱡᱮᱫᱚᱜ ᱠᱟᱱᱟ ᱟᱨ ᱚᱱᱟ ᱨᱮᱭᱟᱜ ᱚᱨᱥᱚᱝᱛᱮᱜᱮ ᱨᱮᱸᱜᱮᱡ ᱦᱚᱲ ᱫᱚ ᱫᱟᱜ ᱵᱮᱯᱟᱨᱤᱭᱟᱹ ᱴᱷᱮᱱ ᱠᱷᱚᱱ ᱠᱤᱨᱤᱧ ᱠᱟᱛᱮᱫ ᱧᱩᱭ ᱦᱳᱭᱳᱜ ᱠᱟᱱ ᱛᱟᱠᱚᱣᱟ᱾ ᱱᱤᱛᱳᱜ ᱠᱤᱸᱥᱟᱹᱬ ᱦᱚᱲ ᱵᱟᱝᱠᱳ ᱵᱩᱡᱷᱟᱹᱣ ᱞᱮᱠᱷᱟᱱ ᱦᱟᱯᱮᱱ ᱫᱤᱱ ᱫᱚ ᱫᱟᱜ ᱞᱟᱹᱜᱤᱫᱛᱮ ᱨᱮᱯᱮᱡ, ᱠᱷᱟᱹᱯᱟᱹᱣᱨᱤ, ᱛᱟᱯᱟᱢ, ᱢᱟᱯᱟᱜ, ᱜᱚᱯᱚᱡ ᱥᱟᱱᱟᱢᱟᱜᱜᱮ ᱦᱳᱭ ᱫᱟᱲᱮᱭᱟᱜᱼᱟ᱾

ᱥᱟᱱᱟᱢ ᱢᱟᱹᱱᱢᱤᱜᱮ ᱢᱤᱫᱴᱟᱝ ᱥᱟᱶᱛᱟ ᱛᱟᱞᱟᱨᱮᱠᱳ ᱛᱟᱦᱮᱸᱱᱟ ᱟᱨ ᱳᱱᱠᱳᱭᱟᱜ ᱡᱤᱭᱚᱱ ᱫᱚ ᱥᱟᱶᱛᱟ ᱟᱹᱨᱤᱛᱮᱜᱮ ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱦᱟᱹᱵᱤᱡ ᱥᱩᱥᱟᱹᱨᱚᱜᱼᱟ ᱚᱱᱟᱛᱮ ᱚᱱᱚᱬᱦᱤᱭᱟᱹ ᱫᱚᱭ ᱢᱮᱢᱮᱱ ᱠᱟᱱᱟ ᱠᱟᱹᱣᱰᱤᱛᱮ ᱥᱮ ᱫᱷᱚᱱ ᱫᱩᱨᱤᱵᱽᱛᱮ ᱠᱤᱸᱥᱟᱹᱬᱞᱮᱱ ᱛᱟᱭᱱᱚᱢ ᱥᱟᱶᱛᱟ ᱠᱷᱚᱱ ᱥᱟᱦᱟᱨᱮ ᱛᱟᱦᱮᱸᱱ ᱫᱚ ᱵᱟᱝ ᱵᱳᱜᱮᱭᱟ᱾ ᱪᱮᱫᱟᱜᱥᱮ ᱮᱥᱠᱟᱨ ᱨᱮᱭᱟᱜ ᱡᱤᱭᱚᱱ ᱠᱷᱟᱸᱰᱟᱣᱛᱮ ᱡᱟᱸᱦᱟ ᱥᱩᱠ ᱟᱨ ᱨᱟᱹᱥᱠᱟᱹ ᱧᱟᱢᱚᱜᱼᱟ ᱚᱱᱟᱠᱷᱚᱱ ᱫᱚ ᱥᱟᱸᱜᱮ ᱦᱚᱲ ᱥᱟᱶᱛᱮ ᱥᱟᱶᱛᱟ ᱛᱟᱞᱟᱨᱮ ᱛᱟᱦᱮᱸᱞᱮᱱ ᱠᱷᱟᱱ ᱟᱹᱰᱤ ᱵᱟᱹᱲᱛᱤ ᱥᱩᱠ ᱟᱨ ᱨᱟᱹᱥᱠᱟᱹᱛᱮ ᱡᱤᱭᱚᱱ ᱠᱷᱟᱸᱰᱟᱣᱼᱚᱜᱼᱟ᱾ ᱱᱚᱣᱟ ᱠᱟᱛᱷᱟᱜᱮ “ᱥᱟᱱᱛᱟᱲ ᱜᱟᱛᱮ” ᱚᱱᱚᱬᱦᱮᱨᱮ ᱱᱚᱝᱠᱟᱭ ᱢᱮᱱ ᱟᱠᱟᱫᱼᱟᱼ,
ᱟᱞᱚᱢ ᱩᱫᱩᱜᱽ ᱛᱟᱢᱟ
ᱠᱩᱲᱟᱹᱭ ᱠᱟᱹᱣᱰᱤ ᱨᱮᱭᱟᱜ ᱜᱚᱨᱚᱵᱽ
ᱟᱞᱚᱢ ᱩᱭᱦᱟᱹᱨᱟ ᱮᱠᱞᱟᱨᱮ ᱥᱩᱠ ᱨᱟᱹᱥᱠᱟᱹ᱾
ᱪᱮᱫᱟᱜᱥᱮ, ᱡᱟᱱᱟᱢ ᱟᱠᱟᱱᱟᱢ ᱡᱚᱠᱷᱮᱡ
ᱥᱟᱱᱛᱟᱲ ᱥᱟᱶᱛᱟᱨᱮ
ᱥᱚᱨᱚᱜᱽᱯᱩᱨᱤ ᱛᱮᱦᱚᱸᱭ ᱵᱤᱫᱟᱹᱭ ᱢᱮᱭᱟ
ᱥᱟᱱᱛᱟᱲ ᱥᱟᱶᱛᱟᱜᱮ᱾
(ᱥᱟᱱᱛᱟᱲ ᱜᱟᱛᱮ)

“ᱠᱚᱠᱚᱭ ᱦᱚᱲ” ᱚᱱᱚᱬᱦᱮᱨᱮ ᱫᱚ ᱡᱟᱹᱛᱤᱭᱟᱹᱨᱤ ᱳᱯᱨᱳᱢ ᱟᱛᱮᱫ ᱵᱟᱧᱪᱟᱜ ᱨᱮᱭᱟᱜ ᱟᱹᱰᱤ ᱫᱟᱢᱟᱱ ᱩᱭᱦᱟᱹᱨᱼᱮ ᱥᱚᱫᱚᱨ ᱟᱠᱟᱫᱼᱟ᱾ ᱟᱵᱚᱣᱟᱜ ᱡᱟᱱᱟᱢ ᱫᱤᱥᱳᱢᱨᱮ, ᱟᱵᱳᱨᱮᱱ ᱦᱟᱯᱲᱟᱢ ᱠᱚᱣᱟᱜ ᱡᱚᱜᱟᱣ ᱡᱚᱛᱚᱱ ᱟᱠᱟᱫ ᱫᱤᱥᱳᱢᱨᱮ ᱮᱴᱟᱜ ᱡᱟᱹᱛᱤ ᱦᱚᱲ ᱠᱚᱣᱟᱜ ᱥᱟᱥᱚᱱ ᱛᱟᱹᱨᱤᱨᱮ ᱢᱮᱱᱟᱜᱵᱳᱱ ᱠᱷᱟᱹᱛᱤᱨᱛᱮ ᱛᱮᱦᱮᱧᱦᱚᱸ ᱟᱵᱳ ᱫᱚ ᱵᱟᱧᱪᱟᱜ ᱞᱟᱹᱜᱤᱫ ᱚᱞᱚᱜ ᱯᱟᱲᱦᱟᱜ ᱨᱮᱭᱟᱜ ᱟᱹᱭᱫᱟᱹᱨ ᱟᱨ ᱚᱛ ᱦᱟᱥᱟ ᱨᱮᱭᱟᱜ ᱟᱹᱭᱫᱟᱹᱨ ᱡᱳᱲᱳᱵᱳᱱ ᱠᱚᱠᱚᱭ ᱠᱟᱱᱟ ᱜᱷᱟᱱᱮ ᱟᱹᱯᱤᱥ ᱜᱷᱮᱨᱟᱣ ᱠᱟᱛᱮᱫ, ᱜᱷᱟᱱᱮ ᱢᱚᱴᱚᱨ ᱜᱟᱹᱰᱤ ᱨᱮᱹᱞ ᱜᱟᱹᱰᱤᱠᱳ ᱟᱴᱚᱠ ᱠᱟᱛᱮᱫ᱾ ᱡᱩᱫᱤ ᱟᱵᱳᱦᱚᱸ ᱯᱟᱹᱨᱥᱤᱠᱤᱭᱟᱹ ᱦᱤᱥᱟᱹᱵᱽᱛᱮ ᱥᱟᱱᱛᱟᱲ ᱯᱚᱱᱚᱛᱠᱳ ᱦᱟᱹᱴᱤᱧᱟᱵᱳᱱ ᱠᱮᱭᱟ ᱮᱱᱠᱷᱟᱱ ᱡᱟᱹᱱᱤᱡ ᱠᱚᱠᱚᱭ ᱦᱚᱲᱞᱮᱠᱟ ᱫᱚ ᱵᱟᱝ ᱠᱚᱭ ᱦᱳᱭᱠᱚᱜ ᱛᱟᱵᱳᱱᱟ᱾

“ᱫᱤᱞ ᱫᱟᱲᱮ” ᱚᱱᱚᱬᱦᱮᱨᱮ ᱫᱚ ᱚᱱᱚᱬᱦᱤᱭᱟᱹᱭ ᱢᱮᱱ ᱟᱠᱟᱫᱼᱟ ᱢᱚᱱᱮᱨᱮ, ᱡᱤᱣᱤᱨᱮ ᱟᱨ ᱦᱚᱲᱢᱚᱨᱮ ᱫᱟᱲᱮ ᱥᱟᱧᱪᱟᱣ ᱨᱮᱭᱟᱜ ᱠᱟᱛᱷᱟ ᱟᱨ ᱫᱟᱲᱮ ᱥᱟᱧᱪᱟᱣ ᱠᱟᱛᱮᱫ ᱵᱩᱨᱫᱷᱤ ᱫᱟᱲᱮᱛᱮ ᱟᱨ ᱢᱤᱫ ᱫᱷᱟᱣ ᱦᱩᱞᱟᱥᱹᱭ ᱨᱮᱭᱟᱜ ᱠᱟᱛᱷᱟᱭ ᱡᱟᱹᱨᱤᱭᱟᱠᱟᱫᱼᱟ “ᱫᱚᱥᱟᱨ ᱦᱩᱞ” ᱚᱱᱚᱬᱦᱮᱨᱮ᱾ ᱚᱱᱟᱫᱚ ᱱᱚᱝᱠᱟᱼ,
ᱛᱤ ᱠᱤᱱ ᱨᱮ ᱟᱜᱼᱥᱟᱨ ᱠᱟᱹᱯᱤ
ᱥᱚᱸᱜᱮᱨᱮ ᱛᱟᱨᱣᱟᱲᱮ ᱟᱛᱮᱫ
ᱛᱮᱸᱜᱳᱱᱟᱹᱧ ᱵᱟᱹᱭᱨᱤ ᱵᱤᱨᱩᱫᱽ
ᱦᱚᱲᱢᱚ ᱡᱤᱣᱤ ᱟᱞᱟᱭ ᱠᱟᱛᱮᱫ᱿
(ᱫᱤᱞ ᱫᱟᱲᱮ)
ᱱᱟᱦᱟᱜ ᱚᱠᱛᱚᱨᱮ ᱥᱤᱭᱟᱹᱡᱟᱹᱨᱤᱛᱮᱭᱟᱜ ᱠᱟᱹᱣᱰᱤ ᱨᱚᱰᱚᱡ ᱨᱟᱡᱽ ᱟᱹᱨᱤ ᱵᱤᱨᱩᱫᱷᱨᱮ ᱟᱨ ᱦᱟᱥᱟ ᱡᱟᱭᱜᱟ ᱵᱤᱨ ᱵᱩᱨᱩ ᱨᱮᱭᱟᱜ ᱟᱹᱭᱫᱟᱹᱨ ᱵᱟᱹᱭ ᱵᱟᱹᱭᱛᱮ ᱪᱟᱵᱟᱜᱠᱟᱱ ᱠᱷᱟᱹᱛᱤᱨᱛᱮ ᱪᱮᱸᱜᱷᱟᱣᱱᱟ ᱞᱟᱹᱜᱤᱫᱜᱮ “ᱫᱚᱥᱟᱨ ᱦᱩᱞ” ᱚᱱᱚᱬᱦᱮᱨᱮ ᱱᱚᱝᱠᱟᱭ ᱢᱮᱱ ᱟᱠᱟᱫᱼᱟᱼ,
ᱨᱚᱰᱚᱡ ᱨᱟᱡᱽ ᱱᱤᱯᱩᱡᱽ ᱞᱟᱹᱜᱤᱫ
ᱛᱮᱨᱟᱝᱼᱟᱞᱮ ᱥᱮᱸᱜᱮᱞ ᱥᱟᱨ
ᱵᱩᱡᱷᱟᱹᱣ ᱦᱚᱪᱚᱠᱚᱣᱟᱞᱮ
ᱥᱤᱧ ᱥᱤᱸᱜᱟᱹᱬ ᱪᱟᱢᱟᱞ ᱪᱩᱢᱩᱞ᱾
ᱮᱛᱚᱦᱚᱵᱟᱞᱮ ᱡᱟᱱᱟᱢ ᱫᱤᱥᱳᱢ ᱟᱨ
ᱫᱷᱟᱹᱨᱛᱤ ᱵᱟᱧᱪᱟᱣ ᱞᱟᱹᱜᱤᱫ ᱫᱚᱥᱟᱨ ᱦᱩᱞ᱿
(ᱫᱚᱥᱟᱨ ᱦᱩᱞ)

“ᱠᱟᱬᱟ ᱢᱟᱹᱱᱢᱤ” ᱚᱱᱚᱬᱦᱮᱨᱮ ᱫᱚ ᱫᱤᱥᱳᱢ ᱡᱟᱠᱟᱛᱨᱮᱱ ᱥᱟᱱᱟᱢ ᱥᱟᱱᱛᱟᱲᱠᱳ ᱟᱯᱬᱮᱭᱟᱜ ᱫᱦᱚᱨᱚᱢ ᱜᱟᱲ ᱵᱟᱧᱪᱟᱣ ᱟᱨ ᱡᱟᱦᱮᱨ ᱛᱦᱟᱱᱨᱮ ᱵᱳᱝᱜᱟ ᱵᱩᱨᱩ ᱫᱮᱹᱵᱟ ᱥᱮᱹᱵᱟ ᱨᱮᱭᱟᱜ ᱠᱟᱛᱷᱟᱭ ᱚᱞ ᱟᱠᱟᱫᱼᱟ᱾ ᱱᱟᱦᱟᱜ ᱫᱤᱱᱨᱮ ᱟᱭᱢᱟ ᱥᱟᱱᱛᱟᱲᱜᱮ ᱥᱤᱠᱷᱱᱟᱹᱛᱟᱠᱟᱱ ᱨᱮᱦᱚᱸ ᱵᱟᱝ ᱵᱟᱰᱟᱭᱛᱮ ᱟᱨ “ᱥᱟᱹᱨᱤ ᱫᱦᱚᱨᱚᱢ” ᱨᱮᱭᱟᱜ ᱢᱟᱹᱱ ᱢᱚᱦᱚᱛ ᱵᱟᱝ ᱩᱭᱦᱟᱹᱨ ᱵᱩᱡᱷᱟᱹᱣᱟᱠᱟᱫᱛᱮ ᱮᱴᱟᱜ ᱡᱟᱹᱛᱤᱨᱮᱱ ᱵᱳᱝᱜᱟᱵᱩᱨᱩᱠᱳ ᱫᱮᱹᱵᱟᱥᱮᱹᱵᱟᱭᱮᱫ ᱠᱚᱣᱟ ᱡᱟᱸᱦᱟᱨᱮ ᱫᱚ ᱢᱮᱱᱟᱜᱼᱟ ᱮᱠᱷᱮᱱ ᱵᱟᱸᱵᱽᱬᱮ ᱠᱚᱣᱟᱜ ᱠᱟᱹᱣᱰᱤ ᱨᱚᱰᱚᱡ ᱫᱷᱚᱨᱚᱢ ᱟᱹᱨᱤ᱾ ᱚᱱᱟᱠᱷᱚᱱ ᱥᱟᱦᱟᱨᱮ ᱛᱟᱦᱮᱸ ᱠᱟᱛᱮᱫ ᱥᱟᱢᱟᱱᱚᱢ ᱞᱮᱠᱟᱱ ᱫᱷᱟᱹᱨᱛᱤ ᱨᱮᱭᱟᱜ ᱥᱚᱨᱮᱥ ᱥᱟᱶᱛᱟᱨᱮ ᱛᱟᱦᱮᱸᱱ ᱨᱮᱭᱟᱜ ᱠᱟᱛᱷᱟᱜᱮᱭ ᱢᱮᱱ ᱟᱠᱟᱫᱼᱟ᱾ ᱚᱱᱟᱫᱚ ᱱᱚᱝᱠᱟᱼ,
ᱥᱟᱢᱟᱱᱚᱢ ᱥᱟᱶᱛᱟ ᱮᱯᱲᱮ ᱠᱟᱛᱮᱫ
ᱠᱟᱬᱟ ᱢᱟᱹᱱᱢᱤᱯᱮ ᱥᱟᱡᱟᱣᱟᱠᱟᱱ ᱪᱮᱫᱟᱜ??
ᱢᱮᱱᱟᱜ ᱛᱟᱯᱮᱭᱟᱛᱚ ᱫᱷᱟᱹᱨᱛᱤ ᱨᱮᱭᱟᱜ
ᱥᱟᱱᱟᱢ ᱠᱷᱚᱱ ᱥᱚᱨᱮᱥᱟᱱᱟᱜ ᱵᱳᱝᱜᱟ ᱛᱷᱟᱱ
ᱚᱸᱰᱮᱜᱮᱛᱚ ᱥᱮᱫᱟᱭ ᱤᱧᱤᱧ ᱧᱟᱯᱟᱢᱟᱠᱟᱱ᱿
(ᱠᱟᱬᱟ ᱢᱟᱹᱱᱢᱤ)
ᱮᱴᱟᱜ ᱚᱱᱚᱬᱦᱮ ᱯᱩᱛᱷᱤ ᱞᱮᱠᱟ ᱱᱚᱣᱟ ᱯᱩᱛᱷᱤᱨᱮᱦᱚᱸ ᱠᱟᱹᱦᱱᱤ ᱚᱱᱚᱬᱦᱮᱭ ᱚᱞ ᱢᱮᱥᱟᱣᱟᱠᱟᱫᱼᱟ ᱚᱱᱟᱫᱚ ᱦᱳᱭᱳᱜ ᱠᱟᱱᱟ “ᱥᱤᱨᱡᱚᱱ”᱾ ᱱᱚᱣᱟ ᱚᱱᱚᱬᱦᱮᱨᱮ ᱫᱚ ᱢᱤᱫ ᱢᱟᱹᱱᱢᱤ ᱞᱮᱠᱟᱱ ᱢᱟᱹᱱᱢᱤ ᱛᱮᱭᱟᱨᱚᱜ ᱨᱮᱭᱟᱜ ᱫᱤᱥ ᱦᱩᱫᱤᱥᱼᱮ ᱚᱞ ᱥᱚᱫᱚᱨ ᱟᱠᱟᱫᱼᱟ᱾ ᱱᱚᱣᱟᱨᱮᱵᱳᱱ ᱧᱮᱞᱮᱠᱟᱱᱟ ᱥᱤᱨᱡᱚᱱ ᱫᱚ ᱵᱟᱹᱲᱛᱤ ᱵᱟᱝᱼᱮ ᱯᱟᱲᱦᱟᱣᱟᱠᱟᱫ ᱨᱮᱦᱚᱸ ᱵᱩᱨᱫᱷᱤ ᱨᱮᱭᱟᱜ ᱫᱟᱲᱮᱛᱮ ᱟᱨ ᱢᱚᱞᱚᱝ ᱨᱮᱭᱟᱜ ᱡᱚᱥᱛᱮ ᱵᱟᱧᱪᱟᱜ ᱨᱮᱭᱟᱜ ᱞᱟᱹᱲᱦᱟᱹᱭᱨᱮᱭ ᱡᱤᱛᱠᱟᱹᱨ ᱟᱠᱟᱱᱟ᱾ ᱚᱱᱟ ᱥᱟᱶᱛᱮ ᱱᱚᱣᱟ ᱚᱱᱚᱬᱦᱮ ᱛᱟᱞᱟᱨᱮ ᱟᱨᱦᱚᱸᱭ ᱚᱞ ᱢᱮᱥᱟᱣᱟᱠᱟᱫᱼᱟ ᱡᱟᱹᱛᱤ ᱥᱟᱶᱛᱟ ᱨᱮᱭᱟᱜ ᱢᱩᱦᱤᱢ ᱟᱱᱟᱴᱠᱳ ᱟᱨ ᱛᱤᱨᱞᱟᱹ ᱱᱟᱦᱟᱪᱟᱨ ᱟᱨ ᱵᱷᱚᱨᱚᱢ ᱱᱟᱥᱟᱣᱨᱮ ᱥᱚᱨᱠᱟᱨᱨᱮᱱ ᱵᱤᱪᱟᱹᱨᱤᱭᱟᱹ ᱠᱚᱣᱟᱜ ᱥᱟᱹᱨᱤ ᱵᱟᱫᱟᱞᱛᱮ ᱮᱲᱮ ᱮᱲᱮ ᱵᱤᱪᱟᱹᱨ ᱨᱮᱭᱟᱜ ᱠᱟᱛᱷᱟ᱾ ᱚᱱᱟᱛᱮ ᱢᱮᱱᱛᱚᱨᱟ ᱜᱟᱱᱚᱜᱼᱟ ᱚᱱᱚᱬᱦᱤᱭᱟᱹ ᱫᱚ ᱥᱟᱹᱨᱤᱜᱮ ᱢᱤᱫ ᱡᱟᱹᱛᱤ ᱥᱟᱶᱛᱟ ᱟᱨ ᱫᱤᱥᱳᱢ ᱫᱩᱞᱟᱹᱲᱤᱭᱟᱹ ᱠᱟᱱᱟᱭ ᱟᱨ ᱱᱚᱝᱠᱟᱱ ᱚᱱᱚᱞᱤᱭᱟᱹ ᱠᱚᱣᱟᱜ ᱴᱷᱟᱶ ᱫᱚ ᱥᱟᱶᱦᱮᱫ ᱱᱟᱜᱟᱢ ᱨᱮᱭᱟᱜ ᱞᱟᱯᱷᱟᱝ ᱛᱷᱟᱹᱨ ᱨᱮᱜᱮ ᱛᱟᱦᱮᱸᱱ ᱞᱟᱹᱠᱛᱤ ᱠᱟᱱᱟ᱾

ᱢᱩᱪᱟᱹᱫᱨᱮ ᱱᱚᱣᱟᱜᱤᱧ ᱟᱥᱚᱜᱼᱟ ᱟᱯᱮᱦᱚᱸ ᱚᱱᱚᱬᱦᱤᱭᱟᱹᱭᱟᱜ ᱚᱱᱚᱬᱦᱮᱠᱳ ᱯᱟᱲᱦᱟᱣ ᱠᱟᱛᱮᱫ ᱵᱩᱡᱷᱟᱹᱣ ᱨᱮᱭᱟᱜᱯᱮ ᱨᱤᱠᱟᱹᱭᱟ᱾ ᱱᱚᱣᱟᱠᱳ ᱢᱮᱱ ᱠᱟᱛᱮᱫᱜᱮ ᱟᱨ ᱚᱱᱚᱞᱤᱭᱟᱹ ᱴᱷᱮᱱ ᱠᱷᱚᱱ ᱟᱨᱦᱚᱸ ᱱᱟᱣᱟ ᱱᱟᱣᱟ ᱚᱞ ᱥᱤᱨᱡᱚᱱ ᱧᱟᱢ ᱨᱮᱭᱟᱜ ᱟᱥ ᱫᱚᱦᱚ ᱠᱟᱛᱮᱫ ᱤᱧᱟᱹᱜ ᱚᱱᱚᱬ ᱤᱧ ᱛᱷᱩᱠᱩᱢ ᱦᱟᱛᱟᱲ ᱠᱮᱫᱼᱟ᱾

ᱡᱚᱦᱟᱨ ᱥᱟᱞᱟᱜ
ᱤᱧᱫᱚ
ᱜᱩᱨᱟᱹᱭ ᱠᱤᱥᱠᱩ
(ᱥᱟᱱᱛᱟᱲᱤ ᱚᱱᱚᱞᱤᱭᱟᱹ) ᱒᱙/᱐᱙/᱒᱐᱑᱙

ᱛᱚᱡᱽᱵᱤᱡᱽ

ᱡᱩᱭᱟᱹᱱ ᱚᱱᱚᱞᱤᱭᱟᱹ ᱠᱟᱞᱤᱨᱟᱢ ᱢᱩᱨᱢᱩ ᱟᱡᱟᱜ ᱩᱢᱮᱹᱨ ᱞᱮᱠᱟᱛᱮ ᱟᱭᱢᱟ ᱜᱚᱴᱟᱝ ᱯᱩᱛᱷᱤ ᱩᱪᱷᱟᱹᱱ ᱫᱚ ᱚᱥᱟᱢᱵᱷᱮᱹᱲ ᱠᱟᱹᱨᱫᱷᱟᱹᱱᱤ ᱢᱮᱱᱛᱮᱧ ᱢᱚᱱᱮᱭᱟ᱾ ᱱᱤᱛ ᱦᱟᱹᱵᱤᱡᱛᱮ ᱵᱟᱰᱟᱭ ᱟᱠᱟᱱᱟ ᱚᱱᱚᱬᱦᱮ, ᱠᱟᱹᱦᱱᱤ, ᱜᱟᱭᱟᱱ, ᱞᱟᱠᱪᱟᱨ ᱥᱮᱨᱮᱧ ᱥᱟᱱᱟᱢ ᱞᱮᱠᱟᱱᱟᱜ ᱜᱮᱭ ᱚᱜᱼᱚᱞ ᱠᱟᱱᱟ᱾ ᱟᱡᱟᱜ ᱠᱟᱛᱷᱟ ᱞᱮᱠᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤᱛᱮ ᱚᱞᱚᱜ ᱨᱮᱭᱟᱜ ᱚᱡᱮ ᱛᱟᱭᱫᱚ ᱦᱳᱭᱳᱜ ᱠᱟᱱᱟ “ᱥᱟᱱᱛᱟᱲᱤ ᱥᱟᱶᱦᱮᱫ ᱠᱤᱸᱥᱟᱹᱬ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱵᱟᱧᱪᱟᱣ”᱾ ᱱᱤᱭᱟᱹᱵᱟᱨ ᱫᱚᱭ ᱩᱪᱷᱟᱹᱱᱮᱫᱼᱟ ᱚᱱᱚᱬᱦᱮ ᱯᱩᱛᱷᱤ “ᱯᱳᱨᱟᱭᱱᱤ ᱢᱟᱹᱭ”᱾ ᱱᱚᱣᱟ ᱯᱩᱛᱷᱤ ᱵᱟᱠᱷᱨᱟ ᱛᱮᱜᱮ ᱢᱤᱫ ᱵᱟᱨ ᱠᱟᱛᱷᱟᱧ ᱚᱞ ᱥᱚᱫᱚᱨᱮᱫᱼᱟ᱾

ᱱᱚᱣᱟ ᱯᱩᱛᱷᱤᱨᱮ ᱫᱚ ᱥᱟᱱᱛᱟᱲ ᱥᱟᱶᱛᱟ ᱛᱟᱞᱟᱨᱮ ᱦᱳᱭ ᱯᱟᱨᱚᱢᱟᱠᱟᱱ ᱢᱤᱫ ᱵᱮᱹᱵᱟᱹᱲᱤᱡ ᱜᱷᱚᱴᱚᱱ, ᱥᱟᱶᱛᱟ ᱨᱮᱭᱟᱜ ᱟᱭᱢᱟ ᱞᱮᱠᱟᱱ ᱟᱱᱟᱴ, ᱫᱤᱥᱳᱢ ᱨᱮᱭᱟᱜ ᱱᱟᱦᱟᱜ ᱦᱟᱞᱚᱛ, ᱫᱷᱟᱹᱨᱛᱤ ᱞᱟᱹᱜᱤᱫ ᱱᱟᱯᱟᱭ ᱩᱭᱦᱟᱹᱨ ᱵᱷᱟᱵᱽᱱᱟᱠᱳᱭ ᱚᱞ ᱥᱚᱫᱚᱨ ᱟᱠᱟᱫᱼᱟ ᱚᱱᱚᱬᱦᱮ ᱨᱩᱯᱛᱮ᱾

ᱯᱳᱨᱟᱭᱱᱤ ᱢᱟᱹᱭ ᱚᱱᱚᱬᱦᱮ ᱨᱮᱭᱟᱜ ᱥᱟᱛᱟᱢᱫᱚ ᱟᱭᱢᱟ ᱦᱚᱲᱜᱮᱵᱳᱱ ᱵᱟᱰᱟᱭᱟ᱾ ᱡᱟᱸᱦᱟᱫᱚ ᱮᱴᱟᱜ ᱡᱟᱹᱛᱤᱨᱮᱱ ᱠᱚᱲᱟ ᱥᱟᱶᱛᱮ ᱫᱩᱯᱩᱞᱟᱹᱲ ᱠᱷᱟᱹᱛᱤᱨ ᱡᱚᱛᱷᱟᱛ ᱵᱤᱪᱟᱹᱨ ᱵᱟᱝᱛᱮ ᱟᱨ ᱡᱚᱛᱷᱟᱛ ᱥᱟᱥᱮᱛ ᱵᱟᱫᱟᱞᱛᱮ ᱵᱮᱹᱵᱟᱹᱲᱤᱡ ᱥᱟᱥᱮᱛ ᱦᱳᱭᱞᱮᱱᱟ ᱟᱨ ᱚᱱᱟ ᱪᱤᱛᱟᱹᱨ ᱫᱤᱥᱳᱢ ᱡᱟᱠᱟᱛ ᱪᱟᱢᱠᱮᱭᱟᱠᱟᱱᱟ ᱡᱟᱸᱦᱟ ᱠᱷᱟᱹᱛᱤᱨ ᱟᱵᱚᱣᱟᱜ ᱨᱤᱞᱟᱹᱢᱟᱞᱟ ᱥᱟᱶᱛᱟ ᱵᱚᱠᱚᱞᱵᱚᱰᱮᱭᱟᱠᱟᱱᱟ ᱫᱤᱥᱳᱢ ᱦᱚᱲᱟᱜ ᱢᱮᱫᱨᱮ᱾ ᱚᱱᱟᱛᱮ ᱚᱱᱚᱞᱤᱭᱟᱹᱭ ᱢᱮᱢᱮᱱ ᱠᱟᱱᱟ ᱚᱱᱠᱟ ᱫᱚ ᱵᱟᱝ ᱵᱤᱪᱟᱹᱨ ᱠᱟᱛᱮᱫ ᱢᱟᱹᱱᱢᱤ ᱥᱩᱥᱟᱹᱨ ᱞᱮᱠᱟᱵᱳᱱ ᱵᱤᱪᱟᱹᱨᱢᱟ, ᱠᱟᱹᱭᱫᱷᱤ ᱟᱡᱟᱜ ᱠᱟᱹᱭ ᱵᱩᱡᱷᱟᱹᱣ ᱦᱚᱪᱚ ᱠᱟᱛᱮᱫ ᱦᱤᱲᱤᱡᱵᱳᱱ ᱥᱩᱫᱷᱟᱨᱟᱹᱣ ᱦᱚᱪᱚᱭᱮᱢᱟ ᱛᱚᱵᱮᱭᱟᱱᱤᱡ ᱥᱟᱶᱛᱟ ᱛᱟᱵᱳᱱ ᱫᱷᱟᱹᱨᱛᱤ ᱨᱮᱭᱟᱜ ᱩᱥᱩᱞ ᱯᱤᱸᱰᱟᱹᱨᱮ ᱫᱚᱲᱚᱢᱚᱜᱼᱟ ᱟᱨ ᱠᱚᱲᱟᱢ ᱪᱮᱴᱟᱜ ᱠᱟᱛᱮᱫ ᱵᱳᱱ ᱢᱮᱱ ᱫᱟᱲᱮᱭᱟᱜᱼᱟ ᱥᱟᱱᱛᱟᱲᱟᱜ ᱟᱹᱱ ᱟᱹᱨᱤᱜᱮ ᱥᱚᱨᱮᱥ ᱟᱹᱱ ᱟᱹᱨᱤ᱾

“ᱠᱤᱨᱤᱧ ᱫᱟᱜ” ᱚᱱᱚᱬᱦᱮ ᱨᱮᱭᱟᱜ ᱢᱤᱫ ᱡᱷᱟᱞᱟᱠᱼ,
ᱟᱹᱥᱩᱞ ᱡᱤᱭᱟᱹᱞᱤᱠᱳ ᱯᱟᱧᱡᱟᱭᱮᱫᱼᱟ
ᱦᱟᱹᱨᱤᱭᱟᱹᱲ ᱜᱷᱟᱸᱥ; ᱫᱷᱟᱶᱲᱟ ᱫᱷᱟᱹᱶᱲᱤ
ᱥᱟᱱᱟᱢ ᱨᱚᱝᱜᱚᱣᱟᱠᱟᱱᱛᱮ᱾

ᱱᱚᱣᱟ ᱚᱱᱚᱬᱦᱮ ᱛᱟᱞᱟᱛᱮ ᱟᱹᱰᱤ ᱫᱟᱢᱟᱱ ᱢᱤᱫ ᱪᱤᱛᱟᱹᱨᱼᱮ ᱥᱟᱵ ᱨᱟᱠᱟᱵ ᱟᱠᱟᱫᱼᱟ᱾ᱫᱟᱜ ᱫᱚ ᱡᱤᱭᱟᱹᱞᱤ ᱠᱚᱣᱟᱜ ᱡᱤᱭᱚᱱ ᱠᱟᱱᱟ᱾ ᱫᱟᱨᱮ ᱱᱟᱹᱲᱤ ᱡᱤᱵᱽ ᱡᱤᱭᱟᱹᱞᱤ ᱥᱟᱱᱟᱢ ᱠᱚᱣᱟᱜᱜᱮ ᱫᱟᱜ ᱵᱮᱜᱚᱨ ᱵᱟᱧᱪᱟᱣ ᱫᱚ ᱟᱸᱡᱷᱟᱴ ᱜᱮᱭᱟ᱾ᱛᱮᱦᱮᱧ ᱫᱟᱜᱵᱳᱱ ᱚᱱᱦᱮᱞᱟᱭ ᱠᱷᱟᱱ ᱦᱟᱯᱮᱱ ᱦᱤᱞᱳᱜ ᱱᱚᱣᱟ ᱠᱷᱟᱹᱛᱤᱨᱜᱮ ᱡᱤᱣᱤ ᱪᱷᱟᱴᱯᱟᱴᱟᱣ ᱠᱟᱛᱮᱫ ᱜᱩᱡᱩᱜ ᱦᱳᱭᱳᱜ ᱛᱟᱵᱳᱱᱟ᱾ ᱚᱱᱚᱬᱦᱮᱨᱮ ᱟᱹᱛᱷᱟᱹᱣᱲᱤ ᱫᱟᱜ ᱵᱮᱣᱦᱟᱨ ᱨᱮᱭᱟᱜ ᱠᱟᱹᱨᱫᱷᱟᱹᱱᱤ ᱫᱚ ᱥᱚᱫᱚᱨ ᱟᱠᱟᱱᱟ ᱠᱟᱹᱣᱰᱤᱛᱮ ᱨᱟᱴᱯᱟᱴ ᱠᱤᱸᱥᱟᱹᱬ ᱢᱟᱹᱱᱢᱤ ᱠᱚᱣᱟᱜ᱾ᱡᱟᱸᱦᱟᱭ ᱫᱚ ᱟᱡᱟᱜ ᱠᱟᱛᱷᱟ ᱵᱮᱜᱚᱨ ᱫᱚᱥᱟᱨ ᱟᱨ ᱢᱤᱫ ᱦᱚᱲᱟᱜ ᱠᱟᱛᱷᱟ ᱢᱤᱫ ᱰᱚᱸᱰᱮᱠ ᱦᱚᱸ ᱵᱟᱝᱠᱳ ᱩᱭᱦᱟᱹᱨ ᱫᱟᱲᱮᱭᱟᱜᱼᱟ ᱟᱨ ᱫᱷᱟᱹᱨᱛᱤ ᱞᱟᱹᱜᱤᱫ ᱩᱭᱦᱟᱹᱨᱢᱟ ᱮᱠᱟᱞᱜᱮ ᱵᱟᱝ ᱟᱛᱟᱠᱚᱣᱟ᱾

ᱚᱱᱚᱬᱦᱤᱭᱟᱹ ᱫᱚ ᱥᱟᱱᱟᱢ ᱠᱚᱬ ᱨᱮᱭᱟᱜ ᱥᱟᱛᱟᱢ ᱟᱛᱮᱫᱜᱮᱭ ᱚᱜᱼᱚᱞ ᱠᱟᱱᱟ᱾ ᱥᱟᱬᱮᱥ ᱨᱮᱭᱟᱜ ᱜᱞᱳᱵᱟᱞᱤᱲᱟᱛᱤᱳᱸ ᱡᱩᱜᱽᱨᱮ ᱥᱟᱱᱛᱟᱲ ᱡᱟᱹᱛᱤ ᱪᱮᱫ ᱞᱮᱠᱟ ᱛᱟᱞᱠᱳ ᱢᱤᱞᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱥᱮ ᱵᱟᱝ ᱟᱨ ᱪᱮᱫᱞᱮᱠᱟ ᱠᱟᱛᱮᱫ ᱚᱠᱟ ᱰᱟᱦᱟᱨᱛᱮ ᱢᱚᱦᱰᱟ ᱞᱮᱱᱠᱷᱟᱱ ᱮᱴᱟᱜ ᱠᱤᱸᱥᱟᱹᱬ ᱡᱟᱹᱛᱤ ᱥᱟᱶᱛᱮ ᱯᱟᱱᱛᱮ ᱠᱟᱛᱮᱫ ᱥᱚᱥᱚᱱᱚᱜ ᱥᱟᱱᱛᱟᱲ ᱥᱟᱶᱛᱟ ᱫᱷᱟᱹᱨᱛᱤᱨᱮ ᱯᱟᱹᱣᱲᱤᱭ ᱞᱟᱦᱟᱭᱟ ᱚᱱᱟ ᱞᱟᱹᱜᱤᱫᱦᱚᱸᱭ ᱩᱭᱦᱟᱹᱨᱮᱫᱼᱟ᱾ ᱡᱟᱸᱦᱟᱫᱚᱵᱳᱱ ᱢᱮᱛᱟᱜ ᱠᱟᱱᱟ ᱥᱟᱹᱨᱭᱟᱹᱲ ᱧᱮᱱᱮᱞᱚᱢ᱾

ᱥᱟᱱᱛᱟᱲ ᱡᱟᱹᱛᱤᱭᱟᱜ ᱵᱤᱱᱛᱤ ᱵᱟᱠᱷᱮᱬ ᱨᱮᱭᱟᱜ ᱥᱟᱹᱨᱭᱟᱹᱲ ᱥᱮ ᱯᱷᱤᱞᱳᱥᱳᱯᱷᱭ ᱫᱚ ᱡᱮᱹ ᱮᱠᱷᱮᱱ ᱥᱟᱱᱛᱟᱲ ᱥᱩᱢᱩᱝᱼᱟᱜ ᱠᱟᱱᱟ ᱚᱱᱠᱟᱱ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ᱾ ᱱᱚᱣᱟᱨᱮ ᱫᱚ ᱥᱟᱱᱟᱢ ᱢᱟᱹᱱᱢᱤ ᱥᱟᱶᱛᱮ ᱡᱤᱵᱽ ᱡᱤᱭᱟᱹᱞᱤᱭᱟᱜ ᱠᱟᱛᱷᱟᱠᱳ ᱟᱹᱜᱤᱞ ᱦᱟᱯᱲᱟᱢᱠᱳ ᱠᱳ ᱜᱟᱜ ᱜᱟᱵᱟᱱ ᱦᱚᱴᱚᱭᱟᱠᱟᱫᱼᱟ ᱥᱮᱨᱮᱧ ᱛᱟᱞᱟᱛᱮ ᱟᱨ ᱠᱟᱹᱦᱱᱤ ᱛᱟᱞᱟᱛᱮ᱾ ᱥᱟᱱᱟᱢᱜᱮᱵᱳᱱ ᱵᱟᱰᱟᱭᱟ ᱥᱟᱱᱛᱟᱲᱟᱜ ᱵᱤᱱᱛᱤ ᱫᱚ ᱟᱹᱰᱤ ᱡᱮᱞᱮᱧ ᱜᱮᱭᱟ ᱮᱱᱦᱚᱸ ᱚᱱᱚᱬᱦᱤᱭᱟᱹ ᱫᱚ ᱦᱩᱰᱤᱧ ᱢᱟᱪᱷᱟ “ᱵᱤᱱᱛᱤ ᱵᱮᱲᱦᱟᱭ ᱢᱟᱹᱱᱢᱤ ᱡᱟᱱᱟᱢ” ᱚᱱᱚᱬᱦᱮ ᱛᱟᱞᱟᱛᱮ ᱢᱟᱹᱱᱢᱤ ᱥᱤᱨᱡᱚᱱ ᱨᱮᱭᱟᱜ ᱠᱟᱛᱷᱟᱭ ᱜᱟᱵᱟᱱ ᱟᱠᱟᱫᱼᱟ᱾

ᱚᱱᱚᱬᱦᱤᱭᱟᱹ ᱠᱟᱞᱤᱨᱟᱢ ᱢᱩᱨᱢᱩᱨ ᱫᱚ ᱱᱚᱝᱠᱟᱜᱮ ᱟᱨᱦᱚᱸ ᱟᱭᱢᱟ ᱚᱱᱚᱬᱦᱮ ᱛᱟᱞᱟᱛᱮ ᱥᱟᱶᱛᱟ ᱛᱟᱞᱟᱨᱮ ᱢᱟᱹᱱᱢᱤ ᱢᱟᱹᱱᱢᱤ ᱢᱩᱫᱽᱨᱮ ᱥᱩᱞᱩᱠ ᱱᱤᱨᱟᱹᱭ, ᱫᱩᱞᱟᱹᱲ ᱥᱟᱹᱜᱟᱹᱭ, ᱵᱳᱜᱮ ᱩᱭᱦᱟᱹᱨ, ᱥᱩᱥᱟᱹᱨ ᱵᱤᱪᱟᱹᱨ ᱞᱟᱹᱜᱤᱫ ᱟᱨ ᱚᱞ ᱯᱟᱲᱦᱟᱣ ᱠᱟᱛᱮᱫ ᱢᱟᱹᱱᱢᱤ ᱞᱮᱠᱟᱱ ᱢᱟᱹᱱᱢᱤ ᱛᱮᱭᱟᱨᱚᱜ ᱞᱟᱹᱜᱤᱫ ᱚᱱᱚᱬᱦᱮᱭ ᱜᱟᱵᱟᱱ ᱟᱠᱟᱫᱼᱟ᱾ᱚᱱᱟᱠᱳ ᱥᱟᱱᱟᱢ ᱚᱱᱚᱬᱦᱮ ᱯᱟᱲᱦᱟᱣ ᱠᱟᱛᱮᱫ ᱵᱩᱡᱷᱟᱹᱣ ᱨᱮᱭᱟᱜ ᱟᱹᱰᱤᱜᱮ ᱞᱟᱹᱠᱛᱤ ᱢᱮᱱᱟᱜᱼᱟ᱾ ᱛᱚᱵᱮᱭᱟᱱᱤᱡ ᱡᱟᱹᱛᱤ ᱫᱷᱚᱨᱚᱢ ᱥᱟᱶᱛᱟ ᱫᱤᱥᱳᱢ ᱫᱷᱟᱹᱨᱛᱤ ᱥᱟᱶᱛᱮ ᱟᱵᱳᱦᱚᱸ ᱵᱟᱧᱪᱟᱣᱵᱳᱱ ᱛᱟᱦᱮᱸᱱᱟ ᱡᱚᱱᱚᱢ ᱡᱚᱱᱚᱢ᱾

ᱢᱟ ᱮᱱᱠᱷᱟᱱ ᱚᱠᱛᱚ ᱟᱭᱢᱟ ᱠᱷᱟᱴᱚᱜᱮ ᱠᱷᱟᱹᱛᱤᱨᱛᱮ ᱟᱨ ᱵᱟᱹᱲᱛᱤ ᱵᱟᱹᱧ ᱚᱞᱮᱫᱼᱟ᱾ ᱢᱩᱪᱟᱹᱫᱨᱮ ᱫᱷᱟᱹᱨᱛᱤ ᱡᱟᱠᱟᱛᱨᱮᱱ ᱯᱟᱹᱴᱷᱩᱭᱟᱹᱠᱳ ᱴᱷᱮᱱ ᱱᱚᱣᱟ ᱯᱩᱛᱷᱤ ᱯᱟᱲᱦᱟᱣ ᱨᱮᱭᱟᱜᱼᱤᱧ ᱟᱨᱫᱟᱥ ᱠᱮᱫᱼᱟ᱾

ᱢᱟᱹᱦᱤᱛ ᱤᱧᱜᱮ
ᱥᱚᱯᱚᱱ ᱥᱚᱨᱮᱱ ᱑᱐/᱐᱙/᱒᱐᱑᱙
ᱢᱟᱪᱮᱫ HALDIA HIGH SCHOOL

East Medinipur, West Bengal

ᱥᱟᱨᱦᱟᱣ ᱥᱟᱸᱫᱮᱥ

ᱵᱟᱹᱵᱩ ᱠᱟᱞᱤᱨᱟᱢ ᱢᱩᱨᱢᱩᱨᱼᱟᱜ ᱱᱚᱣᱟ “ᱯᱳᱨᱟᱭᱱᱤ ᱢᱟᱹᱭ” ᱚᱱᱚᱬᱦᱮ ᱯᱩᱛᱷᱤ ᱫᱚ ᱟᱹᱰᱤ ᱜᱚᱨᱚᱵᱽ ᱟᱨ ᱫᱤᱞ ᱫᱟᱲᱮᱭᱟᱱᱟᱜ ᱠᱟᱱᱜᱮᱭᱟ᱾ ᱱᱚᱣᱟ ᱯᱩᱛᱷᱤ ᱫᱚ ᱡᱟᱸᱦᱟᱭ ᱵᱮᱲᱦᱟᱭᱛᱮ ᱛᱤᱛᱞᱮ ᱟᱠᱟᱱᱟ ᱩᱱᱤ ᱢᱟᱹᱭ ᱥᱩᱱᱤᱛᱟ ᱢᱩᱨᱢᱩᱜᱮ ᱯᱳᱨᱟᱭᱱᱤ ᱢᱟᱹᱭ ᱞᱮᱠᱟᱛᱮ ᱩᱫᱩᱜ ᱟᱠᱟᱱᱟᱭ᱾

ᱚᱱᱚᱞᱤᱭᱟᱹ ᱫᱚ ᱩᱱᱤᱜᱮ ᱡᱟᱸᱦᱟᱭ ᱫᱚ ᱵᱳᱜᱮ ᱵᱟᱹᱲᱤᱡ ᱟᱭᱟᱜ ᱱᱚᱱᱚᱞ ᱰᱚᱜᱽᱛᱮ ᱠᱟᱹᱴᱩᱵᱛᱮ ᱩᱫᱩᱜ ᱞᱮᱠᱟᱭ ᱩᱫᱩᱜᱟ᱾
ᱥᱟᱱᱟᱢᱜᱮᱵᱳᱱ ᱵᱟᱰᱟᱭᱟ ᱒᱐᱑᱑ ᱥᱟᱞᱨᱮᱭᱟᱜ ᱡᱟᱱᱩᱟᱨᱭ ᱪᱟᱱᱫᱳᱨᱮ ᱵᱤᱨᱵᱷᱩᱢ ᱡᱤᱞᱟᱹ ᱨᱮᱭᱟᱜ ᱵᱚᱴᱛᱚᱞᱟ ᱟᱛᱳᱨᱮᱱ ᱩᱱᱟᱹᱜᱜᱟᱱ ᱥᱟᱱᱛᱟᱲ ᱩᱢᱤᱱᱢᱟᱨᱟᱝ ᱱᱤᱨᱤᱜᱷᱤᱱᱠᱳ ᱠᱟᱹᱢᱤ ᱠᱮᱫᱼᱟ᱾ ᱥᱟᱶᱛᱟ ᱠᱷᱟᱢᱠᱷᱩᱱᱴᱤᱠᱳ ᱚᱠᱟ ᱫᱷᱟᱨᱮᱠᱳ ᱨᱚᱲᱼᱟ ᱵᱟᱝᱠᱳ ᱴᱷᱤᱠᱟᱹ ᱫᱟᱲᱮᱭᱟᱫᱼᱟ᱾
ᱚᱱᱚᱞᱤᱭᱟᱹ ᱫᱚ ᱚᱱᱟᱜᱮᱭ ᱥᱚᱫᱚᱨ ᱟᱠᱟᱫᱼᱟ ᱵᱳᱜᱮ ᱫᱚ ᱵᱳᱜᱮ ᱟᱨ ᱵᱟᱹᱲᱤᱡ ᱫᱚ ᱵᱟᱹᱲᱤᱡᱜᱮ᱾ ᱱᱚᱣᱟ ᱳᱨᱳᱢ ᱫᱟᱲᱮ ᱵᱟᱝᱠᱷᱟᱱ ᱟᱜᱟᱢ ᱫᱤᱱᱨᱮ ᱥᱟᱶᱛᱟ ᱡᱚᱛᱷᱟᱛ ᱰᱟᱦᱟᱨ ᱵᱟᱝᱼᱮ ᱪᱟᱪᱳ ᱠᱚᱣᱟ᱾

ᱚᱱᱚᱲᱦᱤᱭᱟᱹ ᱫᱚ ᱱᱚᱣᱟ ᱥᱟᱨᱦᱟᱣ ᱥᱟᱸᱫᱮᱥ ᱤᱧ ᱪᱟᱞᱼᱟᱭ ᱠᱟᱱᱟᱼ,
ᱟᱢ ᱫᱚ ᱚᱞᱢᱮ ᱚᱱᱚᱞᱤᱭᱟᱹ
ᱵᱳᱜᱮ ᱵᱟᱹᱲᱤᱡ ᱡᱚᱠᱷᱟᱭᱟᱭ ᱡᱟᱸᱦᱟ
ᱟᱢᱟᱜ ᱪᱚᱠᱷᱚ ᱦᱟᱛᱟᱝ;
ᱥᱟᱨᱦᱟᱣ ᱟᱹᱲᱤᱥ ᱫᱩᱞᱟᱹᱲ ᱨᱟᱹᱜᱤ
ᱡᱟ ᱩᱰᱟᱹᱝ ᱚᱱᱟᱜᱮ ᱥᱤᱨᱯᱟᱹ
ᱚᱱᱚᱬᱦᱤᱭᱟᱹ, ᱨᱟᱹᱥᱠᱟᱹ ᱛᱤᱼᱛᱮᱢ ᱟᱛᱟᱝ᱿

ᱢᱟᱹᱦᱤᱛ ᱤᱧᱜᱮ
᱐᱕/᱑᱐/᱒᱐᱑᱙ ᱵᱟᱯᱯᱟᱫᱤᱛᱭᱚ ᱵᱮᱥᱨᱟ
(ᱥᱟᱱᱛᱟᱲᱤ ᱚᱱᱚᱞᱤᱭᱟᱹ)

(1) ᱯᱳᱨᱟᱭᱱᱤ ᱢᱟᱹᱭ

ᱛᱟᱨᱟᱞᱵᱟᱥᱟᱞ ᱢᱚᱱᱮ
ᱜᱤᱫᱟᱹᱨ ᱠᱩᱲᱤ ᱦᱟᱨᱟ ᱡᱩᱭᱟᱹᱱ
ᱦᱟᱱᱛᱮ ᱱᱟᱛᱮ ᱚᱴᱟᱝ ᱞᱮᱱᱟ
ᱡᱮᱞᱮᱠᱟ ᱨᱟᱦᱞᱟ ᱨᱤᱢᱤᱞ᱾
ᱟᱧᱪᱟᱨ ᱦᱤᱯᱤᱲ ᱥᱟᱡᱟᱣ ᱨᱚᱱᱮᱵᱚᱱᱮ
ᱥᱟᱬᱵᱟᱦᱟ ᱢᱩᱴᱷᱟᱹᱱ
ᱵᱤᱞᱤᱫ ᱵᱟᱞᱟᱫ ᱡᱷᱟᱞᱠᱟᱣ ᱞᱮᱱᱟ
ᱡᱮᱞᱮᱠᱟ ᱪᱟᱱᱫᱳ ᱤᱯᱤᱞ᱾

ᱫᱟᱨᱮ ᱡᱟᱯᱟᱜ ᱱᱟᱹᱲᱤ
ᱡᱟᱱᱟᱢ ᱫᱚ ᱰᱟᱹᱨ ᱦᱤᱨᱞᱟᱹ
ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱥᱟᱹᱨᱤ,
ᱠᱚᱲᱟ ᱦᱚᱯᱚᱱ ᱦᱤᱨᱞᱟᱹ᱿

ᱚᱠᱛᱚ ᱥᱟᱶᱛᱮ ᱡᱩᱭᱟᱹᱱ ᱪᱮᱫᱟᱜ ᱯᱟᱨᱚᱢᱚᱜ
ᱚᱱᱟᱛᱮ ᱫᱩᱯᱩᱞᱟᱹᱲ ᱞᱟᱹᱜᱤᱫ ᱧᱮᱞ ᱠᱤᱫᱟᱹᱧ ᱠᱩᱠᱢᱩ
ᱯᱟᱱᱛᱮ ᱠᱤᱫᱟᱹᱧ ᱫᱩᱞᱟᱹᱲ ᱡᱚᱲᱟᱣ ᱥᱟᱹᱜᱟᱹᱭ
ᱤᱧᱜᱮ ᱵᱚᱴᱛᱚᱞᱟ ᱨᱤᱱᱤᱡ ᱥᱩᱱᱤᱛᱟ ᱢᱩᱨᱢᱩ᱿

ᱫᱟᱞᱟᱱ ᱜᱚᱲᱟᱣ ᱠᱟᱹᱢᱤ ᱠᱟᱹᱢᱤᱛᱮ
ᱫᱩᱞᱟᱹᱲᱟᱫᱮᱭᱟᱹᱧ ᱪᱷᱟᱹᱛᱤᱠ ᱠᱚᱲᱟ᱾
ᱦᱚᱲᱠᱳ ᱨᱟᱹᱜᱤᱭᱮᱱᱛᱮ
ᱤᱧᱟᱹᱜ ᱫᱩᱞᱟᱹᱲ ᱠᱷᱟᱹᱛᱤᱨᱛᱮ
ᱢᱚᱦᱚᱞ ᱵᱤᱪᱟᱹᱨ ᱠᱮᱫᱼᱟᱠᱳ
ᱢᱟᱹᱧᱡᱽᱦᱤ ᱯᱟᱨᱜᱟᱱᱟ ᱫᱤᱥᱳᱢ ᱯᱮᱲᱟ᱿
ᱫᱩᱞᱟᱹᱲ ᱦᱟᱹᱴᱤᱧᱨᱮ ᱠᱟᱹᱭ ᱠᱷᱟᱹᱛᱤᱨ
ᱟᱥᱮᱱ ᱟᱹᱪᱩᱨ ᱠᱤᱫᱤᱧᱟᱠᱳ ᱮᱠᱷᱮᱱ ᱦᱚᱲᱢᱚᱛᱮ᱿

ᱞᱮᱸᱜᱟ ᱛᱤᱛᱮ ᱠᱚᱲᱟᱢ ᱛᱚᱣᱟ ᱟᱨ
ᱡᱚᱡᱚᱢ ᱛᱤᱛᱮ ᱡᱟᱱᱟᱢ ᱫᱩᱭᱟᱹᱨ ᱫᱟᱯᱟᱞ ᱠᱟᱛᱮᱫ
ᱛᱟᱲᱟᱢ ᱞᱟᱦᱟᱜ ᱚᱠᱛᱚ ᱢᱮᱱ ᱞᱮᱫᱼᱟᱠᱳ
“ᱮᱸᱜᱟᱛᱮ ᱱᱤᱛᱳᱜ ᱫᱚᱭ ᱞᱟᱡᱟᱜ ᱠᱟᱱᱟ”
ᱟᱨᱦᱚᱸ ᱚᱨ ᱚᱪᱚᱜᱞᱮᱫ ᱛᱤᱧᱟᱹᱠᱳ ᱛᱤ ᱠᱤᱱ,
ᱛᱤᱥ ᱠᱷᱚᱱ ᱵᱟᱝᱠᱳ ᱱᱟᱹᱣᱭᱟᱹᱭᱟᱠᱟᱱ ᱞᱮᱠᱟ
ᱠᱷᱟᱢᱪᱟᱣ ᱪᱟᱯᱳ ᱠᱤᱫᱤᱧᱟᱠᱳ ᱟᱹᱰᱤ ᱱᱤᱨᱤᱜᱷᱤᱱ᱾
ᱤᱸᱜᱩᱫ ᱠᱟᱛᱮᱫ ᱞᱟᱡᱟᱣᱤᱧ ᱫᱟᱯᱟᱞ ᱢᱮᱱᱛᱮ
ᱩᱱᱨᱮ ᱚᱠᱚᱭᱠᱳ ᱫᱚ ᱠᱳ ᱥᱟᱵ ᱥᱚᱡᱽᱦᱮ ᱠᱤᱫᱤᱧ᱿

ᱫᱤᱥᱳᱢ ᱦᱚᱲᱴᱷᱮᱱ ᱥᱟᱱᱟᱢ ᱥᱟᱹᱨᱤ
ᱥᱟᱢᱟᱝ ᱥᱚᱫᱚᱨᱮᱱᱟ
ᱵᱤᱪᱟᱹᱨᱤᱭᱟᱹᱠᱳ ᱦᱚᱨᱚᱜᱼᱟᱫ ᱠᱚᱣᱟ ᱥᱤᱠᱲᱤ
ᱢᱚᱦᱚᱞ ᱵᱤᱪᱟᱹᱨᱨᱮ ᱠᱩᱭᱟᱹ ᱦᱮᱱᱫᱮ ᱡᱮᱨᱮᱲᱮᱱᱟ᱾

ᱢᱟᱨᱟᱝ ᱢᱚᱱᱛᱨᱤᱼᱮ ᱢᱮᱱ ᱠᱮᱫᱼᱟ
ᱤᱧᱟᱹᱜ ᱥᱟᱦᱚᱥ ᱫᱚ ᱡᱟᱹᱛᱤᱭᱟᱹᱨᱤ
ᱚᱱᱟᱛᱮ ᱨᱟᱥᱴᱨᱚᱯᱚᱛᱤᱭᱟᱜ ᱛᱤ ᱠᱷᱚᱱ
ᱫᱤᱞᱜᱟᱹᱨᱤᱭᱟᱹ ᱥᱤᱨᱯᱟᱹᱧ ᱟᱛᱟᱝ ᱠᱮᱫᱼᱟ᱾
ᱡᱟᱸᱦᱟᱛᱮᱫᱚ ᱵᱮᱹᱢᱟᱱᱚᱛᱮᱱᱟ ᱥᱟᱶᱛᱟ
ᱠᱟᱬᱟ ᱢᱟᱹᱱᱢᱤ ᱪᱮᱫ ᱵᱟᱝᱠᱳ ᱵᱩᱡᱷᱟᱹᱣ ᱞᱮᱫᱼᱟ??

ᱚᱱᱟᱛᱤᱧ ᱢᱮᱢᱮᱱ ᱡᱟᱹᱛᱤ ᱥᱟᱶᱛᱟ ᱵᱷᱤᱱᱟᱹ ᱨᱮᱦᱚᱸ
ᱟᱞᱚᱯᱮ ᱛᱟᱲᱟᱢ ᱫᱷᱚᱨᱚᱢ ᱰᱟᱦᱟᱨ ᱫᱮᱭᱟ ᱠᱟᱛᱮᱫ
ᱫᱚᱦᱚᱭᱯᱮ ᱡᱤᱭᱟᱹᱲ ᱥᱟᱹᱨᱤ ᱥᱩᱯᱩᱞᱩᱠ
ᱵᱷᱟᱝᱠᱟᱬᱟ ᱞᱮᱠᱟ ᱵᱟᱝ ᱵᱤᱪᱟᱹᱨ ᱠᱟᱛᱮᱫ᱾

ᱫᱷᱟᱹᱨᱛᱤ ᱡᱟᱠᱟᱛ ᱢᱟᱹᱱᱢᱤ ᱛᱟᱞᱟᱨᱮ
ᱟᱞᱚᱯᱮ ᱛᱟᱦᱮᱸᱱᱟ ᱢᱤᱫ ᱠᱚᱬᱨᱮ ᱴᱩᱭᱟᱹᱨ
ᱫᱷᱟᱹᱨᱛᱤ ᱡᱟᱠᱟᱛ ᱡᱷᱟᱞᱠᱟᱣᱯᱮ
ᱨᱤᱞᱟᱹᱢᱟᱞᱟ ᱥᱚᱱᱮᱜᱚᱲ ᱟᱹᱱᱟᱹᱨᱤ ᱪᱤᱛᱟᱹᱨ᱿

ᱤᱧᱢᱟ ᱧᱩᱛᱟᱹᱛ ᱠᱩᱸᱵᱟᱹᱨᱮ ᱥᱮᱫᱟᱭᱼᱤᱧ ᱛᱟᱦᱮᱸᱠᱟᱱᱟ
ᱥᱤᱥᱤᱨ ᱫᱟᱜᱛᱮ ᱦᱚᱲᱢᱚ ᱛᱟᱦᱮᱸᱠᱟᱱ ᱛᱤᱧᱟᱹ ᱯᱩᱨᱢᱩ
ᱥᱚᱨᱠᱟᱨᱟᱜ ᱚᱲᱟᱜ ᱠᱷᱚᱱ ᱛᱮᱦᱮᱧᱼᱤᱧ ᱢᱮᱢᱮᱱ ᱠᱟᱱᱟ
ᱤᱧᱜᱮ ᱥᱚᱨᱮᱥ ᱥᱟᱶᱛᱟ ᱨᱤᱱᱤᱡ ᱥᱩᱱᱤᱛᱟ ᱢᱩᱨᱢᱩ᱿

(2) ᱠᱤᱨᱤᱧ ᱫᱟᱜ

ᱡᱷᱟᱨᱱᱟ ᱜᱟᱰᱟᱛᱮ ᱫᱟᱹᱲ ᱦᱤᱡᱩᱜᱢᱮ ᱮᱱᱮᱡ ᱮᱱᱮᱡᱛᱮ ᱫᱮᱞᱟ ᱡᱤᱣᱤ ᱡᱟᱱᱟᱢᱤᱭᱟᱹ ᱫᱟᱜ ᱡᱟᱹᱲᱤ᱾
ᱵᱟᱧᱪᱟᱣ ᱫᱚᱦᱚᱭᱢᱮ ᱡᱤᱭᱟᱹᱞᱤᱭᱟᱜ ᱫᱤᱥᱳᱢ
ᱟᱢᱴᱷᱮᱱᱜᱮ ᱤᱧᱟᱹᱜ ᱱᱚᱣᱟ ᱟᱥ᱾
ᱮᱛᱚᱢ ᱟᱠᱟᱱᱟ ᱱᱤᱨᱚᱱ,
ᱪᱟᱵᱟᱣᱟᱠᱟᱱᱟ ᱥᱮᱹᱛᱳᱝ
ᱮᱱᱦᱚᱸ ᱵᱟᱝ ᱥᱟᱦᱟᱜ ᱠᱟᱱᱟ ᱱᱤᱛᱳᱜ
ᱟᱥᱟᱲ ᱥᱟᱱ ᱨᱮᱭᱟᱜ ᱞᱚᱞᱚ ᱮᱞᱟᱝ᱾
ᱛᱤ ᱡᱟᱝᱜᱟ ᱥᱤᱱᱟᱹᱢ
ᱫᱟᱨᱮ ᱥᱟᱠᱟᱢ ᱞᱮᱠᱟ ᱜᱚᱥᱚᱜ ᱠᱟᱱᱟ᱾

ᱜᱟᱹᱰᱭᱟᱹ ᱫᱟᱜ ᱟᱧᱡᱮᱫ ᱥᱟᱨᱮᱡ
ᱩᱢ ᱟᱵᱚᱜ ᱠᱟᱱᱟᱞᱮ ᱚᱱᱰᱮᱜᱮ ᱥᱮᱰᱮ ᱥᱮᱰᱮ,
ᱵᱟᱹᱭ ᱵᱟᱹᱭᱛᱮ ᱥᱮᱛᱮᱧᱚᱜ ᱠᱟᱱᱟ ᱰᱟᱹᱰᱤ ᱡᱷᱟᱨᱱᱟ
ᱚᱱᱟ ᱵᱟᱫᱟᱞ ᱥᱟᱨᱟᱜᱷᱟᱹᱲᱤ ᱥᱤᱨᱚᱥᱚᱨᱚ
ᱜᱳᱴᱟ ᱦᱚᱲᱢᱚ ᱵᱩᱞᱩᱝ ᱫᱟᱜ ᱡᱷᱟᱨᱱᱟ᱾
ᱱᱚᱝᱠᱟᱱ ᱚᱠᱛᱚ, ᱢᱟᱥᱮ ᱫᱟᱜ ᱡᱟᱹᱲᱤᱢᱮ
ᱱᱚᱣᱟ ᱞᱚᱞᱚ ᱫᱷᱩᱲᱤᱨᱮ,
ᱢᱟᱥᱮ ᱫᱟᱜ ᱡᱟᱹᱲᱤᱢᱮ
ᱜᱚᱥᱚ ᱦᱚᱲᱢᱚ ᱱᱤᱯᱷᱩᱴ ᱞᱟᱹᱜᱤᱫᱛᱮ᱾

ᱟᱹᱥᱩᱞ ᱡᱤᱭᱟᱹᱞᱤᱠᱳ ᱯᱟᱧᱡᱟᱭᱮᱫᱼᱟ
ᱦᱟᱹᱨᱤᱭᱟᱹᱲ ᱜᱷᱟᱸᱥ; ᱫᱷᱟᱶᱲᱟ ᱫᱷᱟᱹᱶᱲᱤ
ᱥᱟᱱᱟᱢ ᱨᱚᱝᱜᱚᱣᱟᱠᱟᱱᱛᱮ᱾
ᱢᱚᱱᱮ ᱦᱳᱭᱳᱜᱠᱟᱱ ᱛᱤᱧᱟᱹ
ᱡᱟᱹᱱᱤᱡ ᱫᱷᱟᱹᱨᱛᱤᱦᱚᱸ ᱢᱤᱫ ᱫᱤᱱ ᱨᱚᱝᱜᱚᱜᱼᱟ;
ᱡᱤᱣᱤ ᱫᱟᱨᱮᱠᱳ ᱢᱟᱜ ᱵᱤᱱᱫᱟᱹᱲ ᱠᱷᱟᱹᱛᱤᱨᱛᱮ᱾

ᱱᱚᱝᱠᱟᱱ ᱠᱩᱦᱲᱟᱹ ᱚᱠᱛᱚᱨᱮ
ᱥᱮᱴᱮᱨᱟᱠᱟᱫ ᱠᱚᱣᱟ ᱫᱷᱟᱹᱨᱛᱤ ᱵᱮᱯᱟᱨᱤᱭᱟᱹᱠᱳ ᱠᱟᱹᱣᱰᱤᱛᱮ ᱠᱤᱸᱯᱤᱥᱟᱹᱬᱚᱜ ᱨᱮᱭᱟᱜ ᱫᱟᱣ;
ᱠᱤᱨᱤᱧ ᱟᱹᱠᱷᱨᱤᱧ ᱠᱟᱛᱮᱫ
ᱫᱷᱟᱹᱨᱛᱤ ᱨᱮᱭᱟᱜ ᱫᱩᱨᱤᱵᱽ᱾

ᱛᱮᱛᱟᱝ ᱢᱟᱨᱛᱚᱠ ᱞᱟᱹᱜᱤᱫ
ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ
ᱧᱩᱭ ᱞᱟᱜᱟᱣᱮᱫ ᱞᱮᱭᱟ ᱫᱟᱜ
ᱠᱷᱟᱡᱽᱱᱟ ᱢᱮᱥᱟ ᱠᱤᱨᱤᱧ ᱠᱟᱛᱮᱫ᱾
ᱠᱩᱧ ᱰᱟᱹᱰᱤ ᱡᱷᱟᱨᱱᱟ ᱟᱧᱡᱮᱫ ᱟᱠᱟᱱᱛᱮ
ᱚᱛ ᱯᱟᱛᱟᱞ ᱨᱮᱭᱟᱜ ᱫᱟᱜ ᱟᱹᱫᱷᱤᱜ ᱠᱟᱱᱛᱮ᱾

ᱥᱩᱞᱩᱠ ᱨᱮᱭᱟᱜ ᱥᱚᱥᱱᱚᱜ ᱨᱮᱠᱳ ᱥᱮᱴᱮᱨᱟᱠᱟᱱ
ᱨᱮᱸᱜᱮᱡ ᱟᱹᱲᱟᱹ ᱨᱮᱭᱟᱜ ᱢᱮᱱᱮᱛ ᱠᱳ ᱦᱤᱲᱤᱧᱟᱠᱟᱫ
ᱳᱱᱠᱳ ᱫᱚ ᱵᱟᱝ ᱞᱟᱴᱷᱟᱣᱟᱠᱳ ᱡᱟᱝᱜᱟᱨᱮ ᱫᱷᱩᱲᱤ
ᱮᱱᱦᱚᱸ ᱵᱮᱣᱦᱟᱨᱮᱫᱼᱟᱠᱳ ᱫᱟᱜ; ᱟᱹᱲᱤᱰᱷᱟᱹᱲᱤ᱾
ᱵᱷᱟᱹᱵᱤᱭᱟᱠᱳ ᱫᱷᱟᱹᱨᱛᱤ ᱫᱚ ᱟᱠᱳ ᱥᱩᱢᱩᱝ ᱞᱟᱹᱜᱤᱫ
ᱚᱱᱟᱛᱮ ᱱᱟᱹᱭ ᱵᱷᱟᱛᱟᱣ ᱠᱟᱛᱮᱫ ᱨᱚᱦᱚᱲ ᱥᱟᱹᱠᱤᱫ
ᱦᱩᱫᱤᱥ ᱟᱨ ᱥᱟᱺᱜᱤᱧ ᱧᱮᱱᱮᱞᱚᱢ ᱩᱭᱦᱟᱹᱨ ᱳᱱᱠᱳᱭᱟᱜ
ᱥᱤᱱᱟᱹᱢ ᱚᱜᱚᱢ ᱫᱚᱨᱭᱟᱨᱮ ᱟᱸᱜᱮᱱᱟᱠᱟᱱ ᱞᱮᱠᱟ᱾
ᱱᱚᱝᱠᱟᱱ ᱚᱠᱛᱚ, ᱱᱮᱦᱚᱨᱟᱢ ᱠᱟᱹᱱᱟᱹᱧ ᱥᱤᱨᱡᱚᱱᱤᱭᱟᱹ
ᱵᱟᱛᱟᱣᱢᱮ ᱱᱮᱦᱚᱨ; ᱟᱞᱮ ᱠᱟᱬᱟ ᱢᱟᱹᱱᱢᱤᱭᱟᱜ
ᱵᱮᱹᱢᱟᱹᱱᱢᱤᱭᱟᱜ ᱠᱟᱹᱢᱤ ᱠᱷᱟᱹᱛᱤᱨ ᱟᱞᱚᱥᱮᱢ ᱟᱹᱲᱤ
ᱡᱷᱟᱨᱱᱟ ᱜᱟᱰᱟᱛᱮ ᱫᱟᱹᱲ ᱦᱤᱡᱩᱜᱢᱮ ᱮᱱᱮᱡ ᱮᱱᱮᱡᱛᱮ ᱫᱮᱞᱟ ᱡᱤᱣᱤ ᱡᱟᱱᱟᱢᱤᱭᱟᱹ ᱫᱟᱜ ᱡᱟᱹᱲᱤ᱿

(3) ᱵᱤᱱᱛᱤ ᱵᱮᱲᱦᱟᱭ ᱢᱟᱹᱱᱢᱤ ᱡᱟᱱᱟᱢ

ᱥᱟᱡᱟᱣ ᱛᱟᱦᱮᱸᱠᱟᱱᱟ ᱯᱮ ᱟᱴᱟᱞᱛᱮ
ᱥᱮᱨᱢᱟ–ᱢᱚᱧᱪᱚ–ᱯᱟᱛᱟᱞᱯᱩᱨᱤ,
ᱥᱟᱱᱟᱢᱜᱮ ᱴᱷᱟᱹᱠᱩᱨᱼᱟᱜ ᱥᱤᱨᱡᱚᱱ᱾
ᱫᱷᱚᱨᱚᱢ ᱨᱮᱭᱟᱜ ᱥᱟᱥᱛᱚᱨ ᱠᱟᱛᱷᱟ
ᱫᱟᱜ ᱞᱮᱠᱟ ᱯᱟᱥᱱᱟᱣᱼᱚᱜ ᱠᱟᱱ
ᱡᱚᱢᱥᱤᱢ ᱵᱤᱱᱛᱤ ᱠᱷᱚᱱ᱿

ᱯᱟᱛᱟᱞᱯᱩᱨᱤᱨᱮ ᱫᱚ ᱮᱠᱷᱮᱱ ᱫᱟᱜ,
ᱢᱚᱧᱪᱚᱯᱩᱨᱤ ᱫᱚ ᱫᱷᱩᱸᱫᱽᱜᱮ ᱛᱷᱤᱨᱛᱷᱟᱨ᱾
ᱥᱮᱨᱢᱟᱯᱩᱨᱤᱨᱮ ᱫᱚ ᱴᱷᱟᱹᱠᱩᱨ ᱟᱨ
ᱴᱷᱟᱹᱠᱨᱟᱹᱱᱠᱤᱱ ᱛᱟᱦᱮᱸᱠᱟᱱ ᱮᱥᱠᱟᱨ᱿

ᱫᱷᱤᱨᱤᱜᱟᱲᱷ ᱥᱤᱱᱤ ᱠᱟᱯᱟᱴᱛᱮ
ᱫᱟᱯᱟᱞ ᱛᱮᱦᱮᱸᱠᱟᱱ
ᱞᱩᱜᱩᱵᱩᱨᱩ ᱜᱷᱟᱱᱴᱟᱵᱟᱲᱮ ᱰᱷᱚᱸᱰᱚᱨ᱾
ᱴᱷᱟᱹᱠᱩᱨ ᱫᱚ ᱦᱟᱹᱴᱤᱧ ᱥᱟᱱᱟ ᱠᱮᱫᱮᱭᱟ
ᱢᱚᱧᱪᱚᱯᱩᱨᱤᱨᱮ ᱟᱭᱟᱜ ᱳᱲᱷ᱿

ᱮᱛᱚᱢ ᱠᱚᱧᱮᱛᱮ ᱢᱚᱧᱪᱚᱯᱩᱨᱤ
ᱴᱷᱟᱹᱠᱩᱨᱼᱮ ᱟᱹᱪᱩᱨ ᱠᱮᱫᱛᱮ
ᱫᱷᱤᱨᱤᱜᱟᱲᱷ ᱥᱤᱱᱤ ᱠᱟᱯᱟᱴ ᱡᱷᱤᱡᱼᱮᱱ᱾
ᱦᱚᱭ ᱵᱷᱟᱱᱰᱳ ᱜᱩᱨᱞᱟᱹᱣᱟᱛᱮ
ᱵᱳᱝᱜᱟᱵᱩᱨᱩᱠᱳ ᱳᱰᱳᱠ ᱵᱟᱦᱮᱨᱮᱱ᱿

ᱢᱟᱨᱟᱝᱵᱩᱨᱩ, ᱡᱟᱦᱮᱨ ᱟᱭᱳ
ᱥᱟᱶᱛᱮ ᱫᱮᱹᱵᱽ ᱫᱮᱹᱵᱟᱞᱳᱠ ᱥᱟᱭ ᱥᱟᱭ᱾
ᱱᱳᱠᱳ ᱢᱩᱫᱽᱨᱮᱱ ᱠᱟᱡᱟᱠ ᱫᱟᱲᱮᱭᱟᱱ
ᱢᱟᱨᱟᱝᱵᱩᱨᱩ ᱞᱤᱴᱟᱹ ᱜᱚᱸᱥᱟᱭ᱿

ᱤᱛᱟᱹᱫ ᱥᱟᱨᱮᱡ ᱡᱚᱢ ᱦᱚᱪᱚ ᱞᱟᱹᱜᱤᱫ
ᱢᱚᱧᱪᱚᱯᱩᱨᱤᱨᱮ ᱴᱷᱟᱹᱠᱩᱨ ᱛᱟᱦᱮᱸᱱ ᱚᱠᱛᱚ
ᱱᱤᱜᱩᱲᱤᱭᱟᱹ ᱱᱤᱢᱩᱲᱤᱭᱟᱹ ᱧᱩᱛᱩᱢᱟᱱ᱾
ᱛᱮᱭᱟᱨ ᱞᱮᱫᱠᱤᱱᱟᱹᱭ ᱢᱟᱹᱱᱢᱤ
ᱛᱤ ᱟᱨ ᱡᱟᱝᱜᱟ ᱳᱱᱠᱤᱱᱟᱜ ᱵᱟᱝ ᱛᱟᱦᱮᱸᱠᱟᱱ᱿

ᱞᱤᱴᱟᱹ ᱜᱚᱸᱥᱟᱭᱼᱮ ᱟᱛᱟᱝᱞᱮᱫ ᱟᱹᱝᱜᱤᱵᱷᱟᱨ
ᱳᱱᱠᱤᱱ ᱢᱟᱹᱱᱢᱤ ᱡᱚᱜᱟᱣ ᱡᱚᱛᱚᱱ᱾
ᱳᱱᱠᱤᱱ ᱞᱟᱹᱜᱤᱫ ᱠᱩᱧ ᱞᱟᱻᱞᱟᱛᱮ ᱫᱟᱜ ᱫᱚ
ᱵᱷᱩᱠᱵᱷᱩᱠᱟᱹᱣ ᱳᱰᱳᱠᱞᱮᱱ ᱯᱟᱛᱟᱞᱯᱩᱨᱤ ᱠᱷᱚᱱ᱿

ᱱᱤᱜᱩᱲᱤᱭᱟᱹ ᱱᱤᱢᱩᱲᱤᱭᱟᱹᱠᱤᱱ ᱰᱚᱭᱞᱚᱝᱼᱮᱱᱟ
ᱢᱚᱧᱪᱚᱯᱩᱨᱤ ᱩᱱᱩᱢ ᱠᱟᱛᱮᱫ ᱡᱚᱞᱟᱯᱩᱨᱤᱭᱮᱱᱛᱮ
ᱴᱷᱟᱹᱠᱩᱨ ᱴᱷᱟᱹᱠᱨᱟᱹᱱᱠᱤᱱ ᱨᱩᱭᱟᱹᱲ ᱥᱮᱱᱼᱮᱱᱟ
ᱫᱮᱹᱵᱽ ᱫᱮᱹᱵᱟᱞᱳᱠᱟᱛᱮ ᱥᱮᱨᱢᱟᱯᱩᱨᱤᱛᱮ᱿

ᱴᱷᱟᱹᱠᱩᱨᱟᱜ ᱳᱲᱷ ᱦᱟᱹᱴᱤᱧ ᱥᱟᱱᱟᱢᱟᱛᱚ
ᱟᱥᱟ ᱨᱮᱜᱮ ᱛᱟᱦᱮᱸᱭᱮᱱ ᱛᱟᱭᱟ᱾
ᱵᱳᱝᱜᱟᱵᱩᱨᱩ ᱫᱮᱹᱵᱟᱥᱮᱹᱵᱟ ᱞᱟᱹᱜᱤᱫ
ᱢᱟᱹᱱᱢᱤ ᱥᱤᱨᱡᱚᱱᱦᱚᱸᱭ ᱩᱭᱦᱟᱹᱨᱟ᱿

ᱴᱷᱟᱹᱠᱩᱨᱼᱮ ᱛᱮᱭᱟᱨᱠᱮᱫ ᱠᱤᱱᱟᱹ
ᱦᱟᱸᱥ ᱦᱟᱺᱥᱤᱞ ᱪᱮᱬᱮ ᱟᱨ
ᱦᱟᱹᱴᱤᱧ ᱠᱮᱫᱼᱟᱭ ᱡᱤᱣᱤ ᱳᱱᱠᱤᱱᱨᱮ᱾
ᱩᱰᱟᱹᱣ ᱟᱹᱪᱩᱨᱮᱱᱟᱠᱤᱱ ᱨᱤᱯᱤ ᱨᱤᱯᱤ
ᱡᱚᱞᱟᱯᱩᱨᱤ ᱪᱮᱛᱟᱱ ᱥᱮᱨᱢᱟᱯᱩᱨᱤᱨᱮ᱿

ᱦᱟᱸᱥ ᱦᱟᱺᱥᱤᱞ ᱪᱮᱬᱮ ᱵᱮᱹᱞᱮᱹ ᱠᱷᱚᱱ
ᱡᱟᱱᱟᱢᱮᱱᱟᱠᱤᱱ ᱢᱟᱹᱱᱢᱤ ᱯᱤᱞᱪᱩ ᱧᱩᱛᱩᱢᱟᱱ
ᱴᱷᱟᱹᱠᱩᱨ ᱴᱷᱟᱹᱨᱟᱹᱱ ᱫᱚ ᱥᱤᱨᱡᱚᱱᱤᱭᱟ
ᱯᱤᱞᱪᱩ ᱟᱭᱳ ᱟᱨ ᱵᱟᱵᱟ ᱫᱚ ᱯᱳᱹᱭᱞᱳ ᱦᱟᱯᱲᱟᱢ᱿

(4) ᱥᱟᱢᱟᱱᱚᱢ ᱱᱤᱨᱚᱲ

ᱥᱤᱨᱡᱚᱱᱤᱭᱟᱹ ᱮᱱᱮᱢ
ᱦᱟᱹᱞᱤ ᱦᱟᱹᱨᱤᱭᱟᱹᱲᱜᱮ ᱢᱚᱧᱪᱚᱯᱩᱨᱤ
ᱚᱜᱚᱢ ᱥᱟᱹᱢᱩᱫᱽ ᱫᱚᱨᱭᱟ ᱛᱟᱞᱟᱨᱮ
ᱡᱟᱱᱟᱢ ᱟᱠᱟᱱ ᱵᱟᱨᱭᱟ ᱥᱩᱢᱩᱝᱜᱮ ᱡᱟᱹᱛᱤ᱾
ᱟᱹᱜᱤᱞ ᱦᱟᱯᱲᱟᱢᱠᱳ ᱵᱩᱴᱟᱹ ᱟᱠᱟᱫ
ᱠᱚᱲᱟ ᱡᱟᱹᱛᱤ ᱟᱨ ᱠᱩᱲᱤ ᱡᱟᱹᱛᱤ᱾

ᱠᱚᱲᱟ ᱡᱟᱹᱛᱤ ᱫᱚ ᱥᱟᱢᱟᱱᱚᱢ ᱡᱟᱹᱛᱤ
ᱥᱟᱢᱟᱱᱚᱢ ᱡᱟᱹᱛᱤ ᱫᱚ ᱨᱤᱞᱟᱹᱢᱟᱞᱟ
ᱧᱟᱢ ᱞᱮᱱᱟ ᱛᱚᱣᱟ ᱫᱟᱨᱮ ᱵᱩᱴᱟᱹᱨᱮ
ᱥᱟᱠᱟᱢᱨᱮ ᱥᱩᱛᱟᱹᱢᱛᱮ ᱛᱚᱞ ᱠᱟᱛᱮᱫ
ᱟᱹᱯᱩᱧᱠᱳ ᱠᱳ ᱪᱟᱞ ᱞᱮᱫᱼᱟ ᱥᱟᱢᱟᱱᱚᱢ ᱡᱟᱹᱛᱤ᱾

ᱠᱩᱲᱤ ᱡᱟᱹᱛᱤ ᱫᱚ ᱱᱤᱨᱚᱲ ᱡᱟᱹᱛᱤ
ᱠᱩᱲᱤ ᱡᱟᱹᱛᱤ ᱫᱚ ᱫᱩᱞᱟᱹᱲᱡᱟᱞᱟ
ᱧᱟᱢ ᱞᱮᱱᱟ ᱟᱛᱱᱟᱜ ᱥᱟᱠᱟᱢᱨᱮ
ᱮᱸᱜᱟᱧᱠᱳ ᱠᱳ ᱥᱮᱯᱮᱧ ᱞᱮᱫᱼᱟ ᱱᱤᱨᱚᱲ ᱡᱟᱹᱛᱤ᱾

ᱱᱚᱣᱟ ᱜᱮ ᱢᱟᱹᱱᱢᱤ ᱡᱚᱱᱚᱢ ᱵᱤᱱᱛᱤ
ᱦᱟᱡᱟᱨ ᱜᱚᱴᱟᱝ ᱧᱩᱛᱩᱢ ᱛᱮ ᱦᱟᱯᱟᱴᱤᱧ
ᱵᱤᱨᱵᱩᱨᱩ ᱛᱟᱞᱟ ᱵᱟᱡᱟᱨ ᱥᱟᱦᱟᱨ ᱛᱟᱞᱟ
ᱯᱩᱬ ᱢᱟᱹᱱᱢᱤ ᱦᱮᱱᱫᱮ ᱢᱟᱹᱱᱢᱤ
ᱢᱚᱱ ᱠᱩᱥᱤ ᱫᱷᱚᱨᱚᱢ ᱵᱮᱲᱦᱟᱭᱛᱮ ᱵᱷᱮᱜᱟᱨᱟᱠᱟᱱ
ᱫᱟᱨᱮ ᱵᱟᱦᱟ ᱞᱮᱠᱟᱱ ᱥᱟᱢᱟᱱᱚᱢ ᱱᱤᱨᱚᱲ ᱡᱟᱹᱛᱤ᱿

(5) ᱥᱟᱱᱛᱟᱲ ᱳᱯᱨᱳᱢ

ᱚᱞᱪᱤᱠᱤ ᱟᱠᱷᱚᱨ ᱛᱟᱵᱳᱱ
ᱥᱟᱱᱛᱟᱲᱤ ᱯᱟᱹᱨᱥᱤ ᱛᱟᱵᱳᱱ
ᱠᱷᱮᱨᱣᱟᱞ ᱜᱟᱬᱟ ᱟᱵᱳᱱᱟᱜ
ᱥᱟᱱᱛᱟᱲᱜᱮ ᱳᱯᱨᱳᱢ ᱛᱟᱵᱳᱱ᱿

ᱵᱳᱝᱜᱟᱵᱩᱨᱩᱠᱳ ᱢᱤᱫ ᱜᱮᱛᱟᱵᱳᱱ
ᱡᱷᱚᱛᱚᱜᱮ ᱟᱵᱳ ᱯᱤᱞᱪᱩ ᱦᱚᱯᱚᱱ
ᱠᱷᱮᱨᱣᱟᱞ ᱜᱟᱬᱟ ᱟᱵᱳᱱᱟᱜ
ᱥᱟᱱᱛᱟᱲᱜᱮ ᱳᱯᱨᱳᱢ ᱛᱟᱵᱳᱱ᱿

ᱡᱟᱦᱮᱨᱜᱮ ᱫᱷᱚᱨᱚᱢᱜᱟᱲᱷ ᱛᱟᱵᱳᱱ
ᱢᱟᱨᱟᱝᱵᱩᱨᱩ ᱡᱟᱦᱮᱨ ᱟᱭᱳ
ᱢᱚᱲᱮᱠᱳ ᱛᱩᱨᱩᱭᱠᱳ ᱢᱮᱱᱟᱜ ᱠᱳ ᱛᱷᱟᱯᱚᱱ
ᱠᱷᱮᱨᱣᱟᱞ ᱜᱟᱬᱟ ᱟᱵᱳᱱᱟᱜ
“ᱥᱟᱹᱨᱤᱫᱷᱚᱨᱚᱢ”ᱜᱮ ᱫᱷᱚᱨᱚᱢ ᱛᱟᱵᱳᱱ᱿

ᱥᱚᱱᱟ ᱞᱮᱠᱟᱱ ᱥᱟᱶᱛᱟ ᱛᱟᱵᱳᱱ
ᱨᱩᱯᱟᱹ ᱞᱮᱠᱟᱱ ᱟᱹᱨᱤᱪᱟᱹᱞᱤ ᱛᱟᱵᱳᱱ
ᱢᱮᱲᱦᱮᱫ ᱞᱮᱠᱟᱱ ᱟᱹᱱ ᱟᱹᱨᱤ ᱛᱟᱵᱳᱱ
ᱠᱷᱮᱨᱣᱟᱞ ᱜᱟᱬᱟ ᱟᱵᱳᱱᱟᱜ
ᱢᱟᱹᱧᱡᱽᱡᱦᱤ ᱯᱟᱨᱜᱟᱱᱟ ᱨᱟᱡᱽ ᱛᱟᱵᱳᱱ᱿

(6) ᱥᱟᱱᱛᱟᱲ ᱜᱟᱛᱮ

ᱟᱢ ᱫᱚ ᱵᱟᱝᱢᱟ ᱢᱟᱪᱮᱫ
ᱟᱢ ᱫᱚ ᱵᱟᱝᱢᱟ ᱰᱟᱠᱛᱟᱨ
ᱵᱟᱹᱦᱩ ᱜᱤᱫᱟᱹᱨᱟᱛᱮᱫ᱾
ᱵᱟᱡᱟᱨᱨᱮ ᱟᱢ ᱛᱟᱦᱮᱸᱱᱟ
ᱪᱟᱹᱠᱨᱤ ᱧᱟᱢ ᱥᱟᱶᱛᱚᱨᱟ
ᱟᱭᱳ ᱵᱟᱵᱟ ᱦᱤᱲᱤᱧ ᱠᱟᱛᱮᱫ᱿

ᱟᱢ ᱫᱚ ᱵᱟᱝ ᱥᱟᱱᱟᱢᱮᱭᱟ
ᱡᱟᱱᱟᱢ ᱟᱲᱟᱝᱛᱮ ᱨᱚᱯᱚᱲ
ᱠᱤᱸᱥᱟᱹᱬ ᱳᱯᱨᱳᱢ ᱩᱫᱩᱜᱽ ᱞᱟᱹᱜᱤᱫ
ᱪᱷᱩᱴᱠᱤ ᱯᱟᱹᱨᱥᱤᱠᱳᱛᱮᱢ ᱨᱚᱯᱚᱲ᱿

ᱮᱱᱦᱚᱸᱛᱚ ᱟᱢ ᱫᱚ ᱥᱟᱱᱛᱟᱲᱜᱮ
ᱨᱚᱲ ᱫᱚ ᱟᱢᱟᱜ ᱜᱟᱲᱢᱟᱫᱜᱮ᱿

ᱚᱱᱟᱛᱮ ᱨᱟᱹᱜᱤᱭᱟᱢᱟᱠᱳ ᱟᱹᱲᱤᱥᱟᱢᱟᱠᱳ
ᱟᱛᱳ ᱴᱚᱞᱟᱨᱮᱱ ᱦᱚᱲᱠᱳ᱿

ᱡᱟᱸᱦᱟᱛᱤᱥ ᱠᱳᱨᱮ ᱦᱤᱡᱩᱜ ᱥᱮᱱᱚᱜᱨᱮ
ᱫᱩᱞᱟᱹᱲ ᱥᱟᱶᱛᱮ ᱫᱚ ᱵᱟᱝᱠᱳ ᱜᱟᱛᱮᱢᱮ᱿

ᱟᱞᱚᱢ ᱩᱫᱩᱜᱽ ᱛᱟᱢᱟ
ᱠᱩᱲᱟᱹᱭ ᱠᱟᱹᱣᱰᱤ ᱨᱮᱭᱟᱜ ᱜᱚᱨᱚᱵᱽ
ᱟᱞᱚᱢ ᱩᱭᱦᱟᱹᱨᱟ ᱮᱠᱞᱟᱨᱮ ᱥᱩᱠ ᱨᱟᱹᱥᱠᱟᱹ᱾
ᱪᱮᱫᱟᱜᱥᱮ, ᱡᱟᱱᱟᱢ ᱟᱠᱟᱱᱟᱢ ᱡᱚᱠᱷᱮᱡ
ᱥᱟᱱᱛᱟᱲ ᱥᱟᱶᱛᱟᱨᱮ
ᱥᱚᱨᱚᱜᱽᱯᱩᱨᱤ ᱛᱮᱦᱚᱸᱭ ᱵᱤᱫᱟᱹᱭ ᱢᱮᱭᱟ
ᱥᱟᱱᱛᱟᱲ ᱥᱟᱶᱛᱟᱜᱮ᱿
ᱚᱱᱟᱛᱮ ᱟᱞᱚᱢ ᱦᱤᱲᱤᱧ ᱟᱢᱟᱜ
ᱵᱩᱠᱟᱹ ᱛᱚᱯᱟ ᱴᱷᱟᱶ
ᱟᱞᱚᱢ ᱦᱤᱲᱤᱧ ᱟᱢᱟᱜ
ᱡᱟᱹᱛᱤ ᱫᱷᱚᱨᱚᱢ ᱱᱮᱢᱟᱪᱟᱨ
ᱟᱞᱚᱢ ᱦᱤᱲᱤᱧ ᱟᱢᱟᱜ
ᱡᱟᱱᱟᱢ ᱯᱟᱹᱨᱥᱤ ᱞᱟᱠᱪᱟᱨ
ᱡᱤᱣᱮᱹᱫ ᱵᱷᱳᱨ ᱜᱟᱛᱮ ᱠᱚᱜᱢᱮ
ᱡᱟᱱᱟᱢᱤᱭᱟᱹ ᱥᱟᱶᱛᱮᱜᱮ᱿

(7) ᱠᱚᱠᱚᱭ ᱦᱚᱲ

ᱫᱩᱭᱟᱹᱨᱨᱮ ᱛᱮᱸᱜᱳᱱᱞᱮᱨᱮ ᱠᱚᱠᱚᱭ ᱦᱚᱲ
ᱢᱮᱛᱟ ᱠᱚᱣᱟᱠᱳ ᱠᱟᱹᱣᱰᱤ ᱵᱟᱹᱱᱩᱜᱼᱟ᱾
ᱚᱠᱚᱭ ᱫᱚ ᱦᱚᱨᱨᱮ ᱧᱟᱯᱟᱢ ᱠᱚᱠᱚᱭ ᱦᱚᱲᱢᱟ
ᱠᱚᱭᱚᱜ ᱠᱟᱛᱮᱫ ᱠᱳ ᱯᱟᱨᱚᱢᱚᱜᱼᱟ᱾
ᱢᱮᱱᱠᱷᱟᱱ ᱳᱱᱠᱳᱜᱮ ᱯᱟᱞᱮᱱ
ᱠᱚᱠᱚᱭ ᱦᱚᱲ ᱨᱩᱯᱛᱮ ᱵᱳᱝᱜᱟ
ᱮᱯᱲᱮᱭᱮᱫ ᱛᱟᱠᱚᱣᱟᱵᱳᱱ
ᱳᱱᱠᱳ ᱜᱚᱸᱥᱟᱭ ᱠᱚᱣᱟᱜ ᱯᱳᱨᱟᱭᱱᱤ ᱡᱟᱝᱜᱟ᱾

ᱨᱮᱸᱜᱮᱡ ᱛᱟᱞᱟᱨᱮ
ᱨᱮᱸᱜᱮᱡ ᱠᱤᱸᱥᱟᱹᱬ ᱦᱟᱯᱟᱴᱤᱧ ᱠᱟᱛᱮᱫ
ᱫᱷᱟᱹᱨᱛᱤ ᱛᱟᱞᱟᱨᱮ ᱵᱷᱮᱯᱮᱜᱮᱫᱜᱮ ᱵᱟᱹᱲᱛᱤ᱾
ᱚᱱᱟᱪᱤᱠᱟᱹ ᱵᱟᱝ ᱟᱛᱟᱵᱳᱱᱟ ᱟᱸᱫᱷᱟᱛᱮ
ᱥᱟᱥᱮᱛᱤᱭᱟᱹ ᱥᱟᱢᱟᱝᱨᱮ ᱟᱧᱪᱟᱨ ᱟᱛᱟᱝ᱾
ᱟᱵᱳ ᱫᱚ ᱥᱟᱱᱟᱢ ᱠᱚᱠᱚᱭ ᱦᱚᱲ
ᱵᱟᱧᱪᱟᱜ ᱨᱮᱭᱟᱜ ᱟᱹᱭᱫᱟᱹᱨ ᱵᱳᱱ ᱠᱚᱠᱚᱭᱠᱟᱱ᱿

(8) ᱫᱤᱞ ᱫᱟᱲᱮ

ᱛᱤ ᱠᱤᱱᱨᱮ ᱟᱜᱼᱥᱟᱨ ᱠᱟᱹᱯᱤ
ᱥᱚᱸᱜᱮᱨᱮ ᱛᱟᱨᱣᱟᱲᱮ ᱟᱛᱮᱫ
ᱛᱮᱸᱜᱳᱱᱟᱹᱧ ᱵᱟᱹᱭᱨᱤ ᱵᱤᱨᱩᱫᱽ
ᱦᱚᱲᱢᱚ ᱡᱤᱣᱤ ᱟᱞᱟᱭᱠᱟᱛᱮᱫ᱿

ᱵᱟᱧᱪᱟᱣ ᱛᱟᱦᱮᱸᱱ ᱥᱟᱱᱟᱹᱧᱨᱮ
ᱵᱟᱹᱧ ᱛᱤᱨᱩᱵᱟ ᱵᱚᱦᱚᱜ
ᱤᱧᱟᱹᱜᱦᱚᱸᱛᱚ ᱢᱮᱱᱟᱜᱼᱟ
ᱵᱤᱨᱫᱟᱹ ᱥᱟᱞᱟᱜ ᱫᱤᱞ ᱫᱟᱲᱮ᱾

ᱵᱟᱹᱧ ᱥᱟᱦᱟᱣᱼᱟ ᱦᱟᱨᱠᱷᱮᱛ ᱥᱟᱥᱮᱛ
ᱵᱟᱹᱧ ᱥᱟᱦᱟᱣᱼᱟ ᱨᱚᱰᱚᱡ ᱠᱚᱪᱞᱚᱱ
ᱢᱟᱲᱟᱝᱼᱚᱜᱼᱟᱹᱧ ᱰᱷᱟᱠᱟ ᱥᱟᱦᱟ ᱠᱟᱛᱮᱫ
ᱥᱟᱱᱟᱢ ᱡᱟᱹᱛ ᱵᱷᱮᱜᱟᱨ ᱥᱤᱢᱟᱹ ᱥᱟᱲᱮ᱿

ᱞᱟᱡ ᱡᱟᱞᱟᱛᱮ ᱤᱧᱤᱧ ᱢᱮᱢᱮᱱ
ᱟᱭᱳ ᱦᱟᱥᱟ ᱢᱟᱹᱱᱢᱤ
ᱮᱱᱦᱚᱸ ᱵᱟᱹᱧ ᱯᱟᱹᱛᱭᱟᱹᱣᱼᱟᱠᱚᱣᱟ
ᱵᱷᱟᱝᱠᱟᱲᱟ ᱫᱟᱹᱱᱢᱤ᱾

ᱥᱩᱞᱩᱠ ᱱᱤᱨᱟᱹᱭᱛᱮ ᱡᱤᱭᱚᱱ ᱠᱷᱟᱸᱰᱟᱣ ᱞᱟᱹᱜᱤᱫ
ᱯᱟᱯ ᱠᱷᱚᱱ ᱫᱚ ᱛᱟᱦᱮᱸᱱᱟᱹᱧ ᱥᱟᱦᱟᱨᱮ
ᱜᱟᱛᱮᱜᱼᱟᱹᱧ ᱥᱚᱱᱚᱛ ᱥᱟᱹᱨᱤ ᱥᱚᱛᱭᱟ ᱥᱟᱶᱜᱮ
ᱪᱤᱭᱟᱹ ᱡᱚᱝᱟᱹᱧ ᱥᱟᱹᱨᱤ ᱫᱷᱚᱨᱚᱢ ᱰᱟᱦᱟᱨᱜᱮ᱾

ᱦᱟᱯᱮᱱ ᱦᱤᱞᱳᱜᱼᱟᱜ
ᱧᱩᱛᱟᱹᱛ ᱢᱟᱨᱥᱟᱞ ᱞᱟᱹᱜᱤᱫ
ᱫᱩᱞᱟᱹᱲ ᱨᱮᱭᱟᱜ ᱫᱷᱟᱹᱨᱛᱤ
ᱨᱤᱞᱟᱹᱢᱟᱞᱟ ᱥᱟᱡᱟᱣ ᱞᱟᱹᱜᱤᱫ᱿

ᱥᱟᱱᱟᱢ ᱠᱚᱣᱟᱜ ᱢᱚᱱᱮᱨᱮ
ᱨᱟᱹᱥᱠᱟᱹ ᱥᱟᱨᱮᱲ ᱞᱟᱹᱜᱤᱫ
ᱥᱟᱱᱟᱢ ᱠᱚᱣᱟᱜ ᱡᱤᱣᱤᱨᱮ
ᱥᱟᱹᱱᱛᱤ ᱫᱟᱨᱟᱢ ᱞᱟᱹᱜᱤᱫ

ᱛᱤ ᱠᱤᱱᱨᱮ ᱟᱜᱼᱥᱟᱨ ᱠᱟᱹᱯᱤ
ᱥᱚᱸᱜᱮᱨᱮ ᱛᱟᱨᱣᱟᱲᱮ ᱟᱛᱮᱫ
ᱛᱮᱸᱜᱳᱱᱟᱹᱧ ᱵᱟᱹᱭᱨᱤ ᱵᱤᱨᱩᱫᱽ
ᱦᱚᱲᱢᱚ ᱡᱤᱣᱤ ᱟᱞᱟᱭ ᱠᱟᱛᱮᱫ᱿

(9) ᱢᱟᱱᱣᱟ ᱟᱹᱨᱤ

ᱥᱟᱬᱮᱥ ᱵᱮᱲᱦᱟᱭᱛᱮ ᱡᱩᱜᱽ ᱵᱟᱫᱟᱞᱚᱜ
ᱟᱛᱳ ᱫᱤᱥᱳᱢ ᱫᱷᱟᱹᱨᱛᱤ ᱨᱮᱭᱟᱜ ᱪᱤᱛᱟᱹᱨ ᱵᱟᱫᱟᱞᱚᱜ
ᱠᱩᱠᱢᱩ ᱥᱟᱸᱜᱮᱜᱼᱟ ᱟᱢ ᱤᱧ ᱥᱟᱱᱟᱢ ᱠᱚᱣᱟᱜ᱾

ᱵᱩᱨᱩ ᱡᱷᱟᱨᱱᱟ ᱠᱷᱚᱱ ᱥᱟᱹᱢᱩᱫᱽ ᱢᱚᱦᱰᱟᱛᱮ
ᱫᱟᱜ ᱫᱚ ᱞᱤᱸᱜᱤᱱᱟ ᱢᱟᱹᱱ ᱢᱟᱹᱱᱛᱮ
ᱠᱩᱸᱵᱟᱹ ᱚᱲᱟᱜ ᱠᱷᱚᱱ ᱫᱟᱞᱟᱱ ᱚᱲᱟᱜ
ᱥᱚᱥᱚᱱᱚᱜ ᱛᱟᱲᱟᱢ ᱦᱟᱹᱯᱤ ᱦᱟᱹᱯᱤᱛᱮ᱾

ᱠᱟᱹᱨᱜᱟᱲ ᱨᱮᱭᱟᱜ ᱚᱧᱡᱽᱨᱟ ᱫᱟᱜᱛᱮ
ᱥᱟᱦᱟᱨ ᱱᱟᱜᱟᱨ ᱨᱮᱭᱟᱜ ᱡᱟᱣᱨᱟ ᱫᱟᱜᱛᱮ
ᱵᱟᱹᱲᱤᱡᱚᱜ ᱠᱟᱱᱟ ᱫᱩᱥᱟᱹᱣᱚᱜ ᱠᱟᱱᱟ
ᱚᱛ ᱨᱮᱱ ᱜᱷᱩᱴᱩ ᱨᱮᱱ ᱡᱤᱣᱤ ᱵᱟᱧᱪᱟᱣᱤᱭᱟᱹ ‘ᱫᱟᱜ’᱾

ᱪᱟᱱᱫᱳ ᱵᱳᱝᱜᱟ ᱤᱯᱤᱞ ᱮᱸᱜᱮᱞ ᱥᱟᱱᱟᱢ
ᱥᱤᱧᱵᱳᱝᱜᱟ ᱵᱷᱚᱨᱥᱟ ᱠᱟᱛᱮᱫᱜᱮ
ᱛᱮᱨᱫᱮᱡ ᱢᱟᱨᱥᱦᱟᱞᱮᱫᱼᱟᱠᱳ ᱛᱟᱨᱟ ᱥᱮᱨᱢᱟ᱾

ᱢᱟᱹᱱᱢᱤ ᱞᱟᱹᱜᱤᱫ ᱫᱷᱟᱹᱨᱛᱤ
ᱫᱷᱟᱹᱨᱛᱤ ᱞᱟᱹᱜᱤᱫ ᱢᱟᱹᱱᱢᱤ
ᱱᱚᱣᱟ ᱟᱹᱨᱤ ᱛᱮᱜᱮ ᱵᱟᱧᱪᱟᱣ ᱛᱟᱦᱮᱸᱱᱟ
ᱥᱟᱱᱟᱢ ᱡᱤᱵᱽ ᱡᱤᱭᱟᱹᱞᱤ ᱳᱯᱨᱳᱢ᱾

ᱛᱮᱦᱮᱧ ᱥᱟᱱᱟᱢᱟᱜ ᱯᱟᱹᱦᱤᱞ ᱞᱮᱠᱟᱜᱮ
ᱮᱱᱠᱷᱟᱱ ᱚᱱᱟ ᱛᱟᱞᱟᱨᱮ
ᱥᱩᱠ ᱨᱮᱭᱟᱜ ᱜᱚᱨᱚᱵᱽᱛᱮ ᱵᱟᱝ ᱟᱹᱨᱩ ᱠᱟᱛᱮᱫ
ᱩᱭᱦᱟᱹᱨ ᱵᱩᱡᱷᱟᱹᱣ ᱞᱟᱹᱠᱛᱤ ᱠᱟᱱᱟ
ᱢᱟᱹᱱᱢᱤ ᱡᱚᱱᱚᱢ ᱫᱚ ᱥᱟᱫᱷᱮᱨ ᱡᱚᱱᱚᱢ
ᱡᱤᱣᱮᱹᱫ ᱵᱷᱳᱨ ᱨᱮᱭᱟᱜ ᱫᱷᱚᱨᱚᱢ ᱫᱚ ‘ᱥᱩᱥᱟᱹᱨ ᱠᱚᱨᱚᱢ’᱿

(10) ᱡᱤᱣᱤ ᱞᱟᱹᱜᱤᱫ ᱫᱷᱟᱹᱨᱛᱤ

ᱢᱤᱫ ᱢᱟᱦᱟ ᱦᱤᱞᱳᱜ ᱧᱟᱯᱟᱢ ᱦᱳᱭᱞᱮᱱᱟ
ᱢᱟᱡᱟᱱ ᱵᱮᱲᱟ ᱦᱚᱭᱫᱟᱜ ᱦᱟᱺᱥᱩᱨ ᱛᱟᱭᱱᱚᱢ᱾
ᱚᱱᱟ ᱪᱤᱛᱟᱹᱨ ᱢᱚᱱᱮᱨᱮ ᱟᱸᱠᱟᱣᱼᱟᱛᱮᱫ
ᱯᱟᱨᱚᱢᱮᱱᱟ ᱟᱹᱰᱤ ᱥᱮᱨᱢᱟ ᱤᱱᱟᱹᱛᱟᱭᱱᱚᱢ᱾
ᱫᱟᱨᱮ ᱡᱟᱯᱟᱜ ᱱᱟᱹᱲᱤ ᱥᱟᱠᱟᱢ
ᱚᱲᱟᱜ ᱵᱷᱤᱛ ᱯᱤᱸᱰᱟᱹᱛᱮᱦᱚᱸ
ᱡᱟᱯᱟᱜ ᱡᱟᱯᱟᱜᱛᱮ ᱴᱩᱸᱰᱟᱺᱝᱼᱚᱜ ᱠᱟᱱᱟ᱾
ᱠᱚᱲᱟᱢ ᱵᱷᱤᱛᱨᱤᱛᱮ ᱵᱚᱞᱚᱱ ᱠᱟᱱᱟ
ᱱᱟᱹᱲᱤ ᱨᱮᱭᱟᱜ ᱨᱮᱦᱮᱫ᱾
ᱵᱷᱩᱸᱭᱪᱟᱹᱞᱢᱟᱛᱚ ᱞᱮᱛᱟᱲᱜᱮ᱾
ᱟᱨᱦᱚᱸ, ᱫᱟᱨᱟᱭᱠᱟᱱᱟ ᱜᱩᱨᱞᱟᱹᱣ ᱵᱷᱟᱱᱰᱳ
ᱤᱬᱤᱡᱚᱜ ᱠᱟᱱᱟᱠᱳ ᱵᱟᱠᱡᱩᱱᱩ
ᱧᱤᱱᱫᱟᱹ ᱪᱟᱱᱫᱳᱦᱚᱸ ᱯᱳᱞᱥᱳ ᱯᱳᱞᱥᱳ᱾

ᱩᱭᱦᱟᱹᱨᱛᱮ ᱵᱩᱡᱷᱟᱹᱣᱼᱚᱜ ᱠᱟᱱᱟ ᱫᱩᱠ
ᱫᱷᱟᱹᱨᱛᱤ ᱨᱮᱭᱟᱜ ᱦᱟᱞᱚᱛ
ᱤᱬᱤᱡᱚᱜᱼᱟᱠᱳ ᱯᱟᱞᱮᱱ ᱥᱟᱱᱟᱢ ᱤᱯᱤᱞ ᱮᱸᱜᱮᱞ᱾
ᱢᱩᱪᱷᱟᱹᱣᱚᱜᱼᱟ ᱥᱟᱱᱟᱢ ᱚᱞ ᱫᱚᱦᱚ ᱠᱟᱛᱷᱟ
ᱞᱟᱹᱱᱫᱩᱲᱚᱜᱼᱟ ᱥᱟᱱᱟᱢ ᱨᱟᱡᱽ ᱵᱟᱠᱷᱳᱞ᱾
ᱮᱱᱮᱡᱼᱟᱭ ᱥᱟᱹᱢᱩᱫᱽ ᱫᱟᱜ ᱟᱡ ᱮᱠᱞᱟ ᱥᱩᱢᱩᱝ
ᱥᱮᱛᱟᱜ ᱥᱤᱸᱜᱟᱹᱬ ᱮᱵᱷᱮᱱᱚᱜᱼᱟᱭ
ᱟᱨ ᱡᱟᱹᱯᱤᱫᱟᱭ, ᱱᱤᱨᱟᱹᱞᱟ᱾
ᱵᱟᱝᱠᱳ ᱛᱟᱦᱮᱸᱱᱟ ᱰᱷᱚᱸᱜᱟᱣᱟᱛᱮᱫ
ᱫᱚᱨᱭᱟ ᱟᱥᱮᱱ ᱞᱟᱹᱣᱲᱤᱭᱟᱹ
ᱵᱟᱝᱠᱳ ᱛᱟᱦᱮᱸᱱᱟ ᱥᱤᱨᱡᱚᱱᱯᱩᱨᱤ ᱵᱮᱹᱯᱟᱨᱤᱭᱟᱹ
ᱛᱮᱭᱟᱨᱚᱜᱼᱟ ᱱᱟᱣᱟ ᱫᱷᱟᱹᱨᱛᱤ ᱱᱟᱣᱟ ᱢᱟᱹᱱᱢᱤᱭᱟᱛᱮ᱿

(11) ᱥᱤᱨᱡᱚᱱ ᱟᱹᱨᱤ

ᱵᱮᱨᱢᱟ ᱯᱤᱨᱤᱞ ᱯᱤᱨᱤᱞ
ᱢᱟᱨᱥᱟᱞ ᱫᱷᱟᱹᱨᱛᱤ ᱰᱤᱜᱤᱢᱤᱜᱤ᱾
ᱚᱠᱛᱚ ᱱᱟᱹᱯᱤᱛ ᱢᱟᱨᱟᱜᱠᱳ ᱦᱤᱭᱳ ᱦᱤᱭᱳᱭ
ᱥᱤᱢ ᱥᱟᱺᱰᱤᱠᱳ ᱠᱩᱠᱲᱩᱭ ᱠᱩᱠᱠᱩᱰᱩᱵᱩᱨ᱾
ᱥᱟᱶ ᱥᱟᱶᱛᱮ ᱡᱟᱹᱯᱤᱫ ᱠᱷᱚᱱᱵᱳ ᱮᱵᱷᱮᱱᱚᱜ
ᱤᱱᱟᱹᱛᱟᱭᱱᱚᱢ ᱟᱯᱟᱱ ᱟᱹᱯᱤᱱ ᱠᱟᱹᱢᱤᱵᱳᱱ ᱥᱟᱹᱛᱚᱜ᱿

ᱚᱠᱚᱭ ᱫᱚ ᱟᱹᱠᱤᱞᱛᱮᱠᱳ ᱜᱮᱭᱟᱱᱚᱜᱠᱟᱱ
ᱳᱱᱠᱳ ᱫᱚ ᱥᱩᱞᱩᱠ ᱥᱟᱶᱟᱨᱠᱳ ᱯᱟᱧᱡᱟᱭᱮᱫᱠᱟᱱ᱾
ᱚᱠᱚᱭ ᱫᱚ ᱡᱩᱜᱽ ᱡᱩᱜᱽ ᱠᱷᱚᱱ ᱞᱟᱡ ᱡᱟᱞᱟᱛᱮ
ᱧᱤᱱᱫᱟᱹᱠᱳ ᱡᱟᱹᱯᱤᱫ ᱥᱩᱠᱛᱮ ᱠᱷᱟᱱ
ᱥᱤᱧᱠᱳ ᱠᱟᱹᱢᱤᱭᱟ ᱩᱫᱩᱲ ᱫᱷᱩᱯᱩᱲ᱾
ᱚᱠᱚᱭ ᱫᱚ ᱢᱟᱹᱱᱢᱤ ᱥᱩᱥᱟᱹᱨᱠᱳ ᱠᱟᱹᱢᱤᱭᱠᱷᱟᱱ
ᱚᱠᱚᱭ ᱫᱚ ᱢᱟᱹᱱᱢᱤᱭᱟᱜ ᱥᱩᱞᱩᱠ ᱵᱟᱠᱷᱳᱞᱠᱳ ᱫᱷᱟᱹᱥᱩᱲ᱿

ᱡᱟᱸᱦᱟᱭ ᱠᱷᱟᱹᱛᱤᱨ ᱱᱚᱝᱠᱟᱱ ᱫᱚᱥᱟ
ᱩᱱᱤᱭᱟᱜ ᱠᱟᱹᱭ ᱫᱚ ᱵᱟᱝᱜᱮ᱾
ᱪᱮᱫᱟᱜᱥᱮ, ᱥᱩᱠ ᱢᱮᱱᱟᱜᱠᱷᱟᱱ
ᱫᱩᱠ ᱫᱚ ᱧᱟᱢᱚᱜᱜᱮ᱿
ᱞᱟᱡ ᱯᱮᱨᱮᱡ ᱡᱚᱢᱠᱟᱜ ᱨᱮᱦᱚᱸ
ᱨᱮᱸᱜᱮᱡ ᱫᱚ ᱛᱟᱦᱮᱸᱱ ᱜᱮᱭᱟ᱾
ᱡᱤᱣᱮᱹᱫ ᱡᱤᱣᱤᱨᱮ ᱵᱮᱹᱢᱤᱫ ᱦᱟᱞᱚᱛ
ᱥᱟᱱᱟᱢᱠᱳ ᱴᱷᱮᱱ ᱛᱟᱦᱮᱸᱱ ᱜᱮᱭᱟ᱿

ᱦᱟᱣᱮᱫ ᱫᱤᱱᱢᱟ ᱦᱩᱞᱩᱭ ᱦᱚᱭᱨᱮ
ᱦᱮᱢᱟᱞᱜᱮ ᱫᱷᱟᱹᱨᱛᱤ ᱫᱷᱩᱲᱤ᱾
ᱛᱤᱠᱤᱱ ᱵᱮᱲᱟ ᱥᱮᱹᱛᱳᱝ ᱫᱤᱱᱢᱟ
ᱡᱟᱨᱟᱫ ᱡᱟᱨᱟᱫ ᱢᱚᱧᱪᱚᱯᱩᱨᱤ᱿

ᱮᱱᱦᱚᱸ ᱥᱟᱦᱟᱣ ᱠᱟᱛᱮᱫ ᱛᱟᱦᱮᱸᱱ ᱦᱳᱭᱳᱜ
ᱠᱤᱸᱥᱟᱹᱬ ᱢᱚᱱᱮᱨᱮᱦᱚᱸ ᱞᱟᱹᱠᱛᱤ ᱵᱮᱲᱟᱨᱮ᱾
ᱱᱚᱣᱟᱠᱳᱜᱮ ᱥᱤᱨᱡᱚᱱᱤᱭᱟᱹ ᱮᱱᱮᱢ
ᱫᱷᱟᱹᱨᱛᱤ ᱟᱭᱳ ᱠᱳᱞᱮᱨᱮ᱿

ᱧᱮᱯᱮᱞ ᱧᱟᱯᱟᱢᱟᱵᱳᱱ ᱡᱤᱭᱚᱱᱨᱮ
ᱢᱤᱫ ᱫᱷᱟᱣᱜᱮ ᱢᱟᱹᱱᱢᱤ ᱨᱩᱯᱛᱮ᱾
ᱵᱩᱫᱽᱜᱟᱹᱨᱤᱭᱟᱹ ᱥᱩᱥᱟᱹᱨᱤᱭᱟᱹᱠᱳ ᱫᱟᱱᱟᱝᱨᱮ
ᱛᱟᱦᱮᱸᱱᱟᱠᱳ ᱢᱟᱹᱱᱢᱤ ᱥᱤᱵᱳᱲᱤᱭᱟᱹ᱾
ᱫᱟᱨᱮ ᱰᱟᱹᱨ ᱦᱤᱨᱞᱟᱹ ᱵᱟᱦᱟ ᱥᱟᱠᱟᱢ
ᱡᱟᱱᱟᱢᱤᱭᱟᱹ ᱦᱤᱨᱞᱟᱹ ᱟᱵᱚᱣᱟᱜ ᱡᱟᱱᱟᱢ᱾
ᱢᱟᱡᱟᱱ ᱩᱢᱮᱹᱨ ᱥᱮᱴᱮᱨ ᱞᱮᱱᱠᱷᱟᱱ
ᱮᱨ ᱤᱛᱟᱹ ᱦᱤᱨᱞᱟᱹᱜᱮ ᱡᱟᱱᱟᱢᱤᱭᱟᱹ᱿

ᱥᱤᱧ ᱪᱟᱱᱫᱳᱭ ᱫᱟᱱᱟᱝᱼᱚᱜᱼᱟ
ᱛᱤᱠᱤᱱ ᱵᱮᱲᱟᱭ ᱛᱟᱨᱟᱥᱤᱧᱼᱚᱜᱼᱟ
ᱥᱤᱝᱜᱟᱹᱬ ᱥᱟᱸᱠᱣᱟ ᱨᱟᱶᱟᱜᱼᱟ
ᱟᱭᱳ ᱢᱤᱥᱨᱟᱠᱳ ᱱᱮᱦᱚᱨ ᱡᱚᱦᱟᱨᱟ
ᱥᱩᱧᱡᱟᱹ ᱤᱯᱤᱞ ᱥᱮᱫ ᱥᱟᱢᱟᱝ ᱠᱟᱛᱮᱫ
ᱥᱩᱞᱩᱠ ᱱᱤᱨᱟᱹᱭ ᱫᱟᱨᱟᱢ ᱞᱟᱹᱜᱤᱫᱛᱮ᱿

ᱫᱤᱱ ᱯᱟᱨᱚᱢᱚᱜᱼᱟ ᱯᱤᱲᱦᱤ ᱵᱟᱫᱟᱞᱚᱜᱼᱟ
ᱡᱩᱜᱽ ᱡᱩᱜᱽᱢᱟ ᱵᱟᱹᱲᱛᱤᱜ ᱡᱟᱞᱟᱯᱩᱨᱤ᱾
ᱨᱚᱲ ᱞᱟᱱᱫᱟ ᱠᱮᱱᱮᱠᱚᱛᱮ
ᱥᱟᱱᱟᱢᱟᱜ ᱮᱛᱚᱢ ᱠᱟᱛᱮᱫ
ᱢᱤᱫ ᱢᱟᱦᱟ ᱦᱤᱞᱳᱜ ᱥᱟᱱᱟᱢᱜᱮ ᱥᱤᱨᱡᱚᱱ ᱟᱹᱨᱤᱛᱮ
ᱵᱟᱹᱜᱤᱭᱟᱜᱼᱟᱵᱳᱱ ᱱᱚᱣᱟ ᱥᱟᱫᱷ ᱨᱮᱭᱟᱜ ᱫᱷᱟᱹᱨᱛᱤᱯᱩᱨᱤ᱿

(12) ᱢᱮᱫ ᱫᱟᱜ

ᱡᱟᱱᱟᱢ ᱟᱭᱳ ᱛᱟᱹᱝᱜᱤᱨᱮᱭ ᱛᱮᱦᱮᱸᱠᱟᱱᱟ
ᱟᱨᱮ ᱪᱟᱱᱫᱳ ᱜᱮᱞ ᱢᱟᱦᱟ
ᱡᱟᱱᱟᱢ ᱦᱤᱞᱳᱜ ᱞᱤᱸᱡᱤᱞᱮᱱᱛᱟᱭᱟ
ᱢᱮᱫ ᱫᱟᱜ ᱜᱮ ᱞᱟᱦᱟ ᱞᱟᱦᱟ᱿

ᱟᱹᱣᱨᱤ ᱨᱚᱲ ᱫᱟᱲᱮ ᱠᱷᱚᱱᱜᱮ
ᱨᱟᱜ ᱞᱤᱫᱟᱹᱧ ᱚᱶᱟ ᱚᱶᱟ
ᱨᱮᱸᱜᱮᱡ ᱛᱮᱛᱟᱝ ᱠᱚᱭ ᱞᱤᱫᱟᱹᱧ ᱛᱚᱣᱟ᱿

ᱦᱮᱢ ᱠᱷᱚᱱᱤᱧ ᱦᱟᱨᱟᱭᱮᱱᱟ
ᱦᱩᱰᱤᱧ ᱠᱷᱚᱱᱤᱧ ᱢᱟᱨᱟᱝᱼᱮᱱᱟ᱾
ᱯᱷᱩᱨᱜᱟᱹᱞᱮᱱᱛᱮᱧ ᱟᱻᱵᱟᱜᱟᱞᱮᱱᱟ
ᱡᱟᱱᱟᱢᱤᱭᱟᱹ ᱢᱚᱱᱮ ᱦᱟᱢᱟᱞᱮᱱᱟ᱿

ᱡᱩᱭᱟᱹᱱ ᱢᱚᱱᱮᱧ ᱯᱟᱥᱱᱟᱣ ᱠᱮᱫᱼᱟ
ᱟᱛᱳ ᱱᱟᱜᱟᱨ ᱦᱤᱨᱤᱡ ᱯᱟᱹᱥᱤᱨ᱾
ᱯᱟᱧᱡᱟ ᱠᱮᱫᱠᱷᱟᱱᱠᱳ ᱤᱧᱨᱮ ᱥᱟᱹᱜᱩᱱ
ᱩᱥᱟᱹᱫ ᱤᱱᱟᱹᱧ ᱚᱱᱟ ᱠᱷᱟᱹᱛᱤᱨ᱿

ᱨᱟᱜ ᱞᱤᱫᱟᱹᱧ ᱥᱮᱫᱟᱭ
ᱟᱭᱳ ᱠᱚᱲᱟᱢ ᱠᱳᱞᱮᱨᱮ ᱜᱩᱸᱜᱩᱫ ᱠᱟᱛᱮᱫ᱾
ᱨᱟᱻᱨᱟᱜ ᱠᱟᱹᱱᱟᱹᱧ ᱛᱮᱦᱮᱧ
ᱪᱷᱟᱢᱰᱟ ᱞᱟᱛᱟᱨᱨᱮ ᱛᱩᱸᱵᱩᱫ ᱠᱟᱛᱮᱫ᱿

ᱥᱚᱡᱽᱦᱮ ᱠᱤᱫᱟᱹᱧ ᱵᱚᱦᱚᱜ
ᱫᱤᱥᱳᱢ ᱯᱮᱲᱟ ᱛᱟᱞᱟ᱾
ᱡᱚᱲᱟᱣ ᱞᱟᱹᱜᱤᱫ ᱥᱩᱞᱩᱠ ᱥᱟᱹᱜᱟᱹᱭ
ᱱᱟᱣᱟ ᱜᱷᱟᱨᱚᱧᱡᱽ ᱛᱟᱞᱟ᱿

ᱟᱨ ᱵᱟᱹᱧ ᱡᱚᱨᱚᱭᱟ ᱢᱮᱫ ᱫᱟᱜ
ᱫᱩᱠ ᱦᱟᱨᱠᱷᱮᱛ ᱡᱟᱞᱟ᱾
ᱜᱷᱟᱨᱚᱧᱡᱽ ᱚᱥᱟᱨ ᱠᱟᱛᱮᱫ
ᱥᱟᱡᱟᱣᱼᱟᱹᱧ ᱨᱤᱞᱟᱹᱢᱟᱞᱟ᱿

ᱥᱟᱦᱟᱭᱟᱹᱧ ᱥᱟᱱᱟᱢ ᱠᱚᱣᱟᱜ
ᱟᱹᱲᱤᱥ ᱠᱟᱺᱦᱤᱥ ᱵᱮᱡᱟᱨ
ᱠᱩᱥᱤ ᱨᱟᱹᱥᱠᱟᱹ ᱢᱮᱫ ᱫᱟᱜᱛᱮ
ᱵᱮᱱᱟᱣᱼᱟᱹᱧ ᱫᱩᱞᱟᱹᱲ ᱜᱟᱲᱷ᱿

(13) ᱵᱟᱦᱟ

ᱵᱟᱜᱟᱱ ᱛᱟᱞᱟ ᱥᱟᱬ ᱵᱟᱦᱟ
ᱥᱚᱻᱛᱮ ᱢᱚᱦᱠᱟᱜ ᱵᱟᱜᱟᱱᱨᱮ
ᱧᱮᱞ ᱡᱚᱝᱛᱮ ᱟᱹᱰᱤᱜᱮ ᱱᱟᱯᱟᱭ
‘ᱥᱚ’ ᱫᱚ ᱟᱹᱰᱤ ᱥᱚᱸᱫᱷᱟᱬᱜᱮ᱾
ᱠᱚᱛᱮᱠ ᱵᱟᱦᱟ ᱫᱟᱨᱮᱨᱮ ᱢᱚᱦᱮᱜᱼᱟ
ᱧᱩᱨ ᱨᱚᱦᱚᱲ ᱨᱚᱸᱜᱚᱜᱼᱟ
ᱠᱚᱛᱮᱠ ᱵᱟᱦᱟ ᱫᱚ ᱜᱩᱛᱩ ᱜᱟᱞᱟᱝᱼᱚᱜᱛᱮ
ᱴᱷᱟᱶᱼᱮ ᱧᱟᱢᱟ ᱵᱳᱝᱜᱟ ᱦᱚᱲᱢᱚᱨᱮ᱾

ᱥᱟᱱᱟᱢ ᱵᱟᱦᱟ ᱧᱮᱞᱛᱮ ᱢᱤᱫᱜᱮ
ᱛᱤᱱᱟᱹᱜ, ᱚᱠᱚᱭ ᱪᱤᱠᱟᱹᱛᱮᱠᱳ ᱫᱤᱥᱟᱹᱭᱟ?
ᱯᱟᱞᱮᱱ ᱧᱮᱞᱮ ᱵᱷᱟᱶᱟᱨ ᱞᱩᱛᱤ ᱛᱮᱨᱚᱢᱠᱳᱦᱚᱸ
ᱟᱵᱳ ᱞᱮᱠᱟ ᱱᱟᱜᱟᱢᱠᱳ ᱚᱞᱮᱫᱼᱟ᱾

ᱢᱟᱹᱱᱢᱤ ᱞᱮᱠᱟᱜᱮ ᱵᱟᱦᱟ ᱡᱟᱱᱟᱢ
ᱞᱮᱠᱷᱟ ᱥᱩᱢᱩᱝ ᱚᱠᱛᱚ ᱞᱟᱹᱜᱤᱫ᱾
ᱪᱟᱠᱷᱟ ᱦᱚᱪᱚᱜᱼᱟᱠᱳ ᱵᱟᱦᱟ
ᱟᱭᱢᱟ ᱧᱮᱞᱮ ᱵᱷᱟᱶᱟᱨ ᱞᱩᱛᱤ ᱛᱮᱨᱚᱢ ᱴᱷᱮᱱ
ᱢᱚᱱᱮ ᱨᱮᱭᱟᱜ ᱛᱮᱛᱟᱝ ᱛᱟᱦᱮᱸᱱ ᱦᱟᱹᱵᱤᱡ᱾

ᱵᱟᱜᱟᱱ ᱵᱟᱦᱟ ᱠᱚᱣᱟᱜᱢᱟ
ᱥᱟᱢᱟᱱᱚᱢ ᱞᱮᱠᱟᱱ ᱥᱟᱶᱛᱟ
ᱥᱟᱶᱠᱟᱛᱮᱫ ᱡᱤᱱᱛᱤ ᱯᱤᱯᱤᱲᱤ
ᱵᱟᱹᱱᱩᱜ ᱨᱮᱦᱚᱸ ᱟᱹᱱᱟᱹᱨᱤ ᱵᱟᱛᱟ᱾

ᱠᱟᱫᱟᱢ ᱢᱟᱹᱞᱤ ᱪᱟᱢᱯᱟ
ᱫᱟᱜ ᱛᱟᱞᱟᱨᱮ ᱩᱯᱟᱹᱞ ᱯᱳᱭᱨᱟᱱᱤ
ᱵᱤᱨ ᱛᱟᱞᱟᱨᱮ ᱯᱤᱱᱰᱟᱹᱨ ᱦᱩᱸᱴᱟᱹᱨ ᱵᱟᱦᱟ᱾

ᱥᱟᱱᱟᱢᱜᱮ ᱡᱤᱣᱤᱭᱟᱛᱮ ᱵᱳᱴᱳᱜᱚᱜ
ᱫᱷᱟᱹᱨᱛᱤᱨᱮ ᱢᱟᱹᱱᱢᱤ ᱡᱚᱱᱚᱢ ᱞᱮᱠᱟ᱾

ᱚᱱᱟᱛᱮᱧ ᱢᱮᱻᱢᱮᱱ
ᱥᱤᱫᱽᱯᱮ ᱵᱟᱦᱟ ᱦᱮᱴᱮᱡᱽᱯᱮ ᱵᱟᱦᱟ
ᱵᱮᱱᱟᱣᱯᱮ ᱜᱩᱛᱩ ᱜᱟᱞᱟᱝ ᱢᱟᱞᱟ
ᱥᱩᱞᱩᱠ ᱫᱩᱞᱟᱹᱲ ᱥᱟᱨᱥᱟᱣ ᱞᱟᱹᱜᱤᱫᱛᱮ
ᱮᱯᱮᱢ ᱪᱟᱯᱟᱞᱚᱜᱯᱮ ᱵᱟᱦᱟ
ᱠᱷᱟᱹᱞᱤ ᱠᱷᱟᱹᱞᱤ ᱫᱚ ᱟᱞᱚᱯᱮ ᱠᱚᱞᱥᱟ ᱢᱟᱜᱟᱞᱟ᱿

(14) ᱥᱚᱨᱮᱥ

ᱡᱮᱜᱮᱫ ᱡᱟᱠᱟᱛ ᱛᱟᱞᱟᱨᱮ
ᱫᱷᱟᱹᱨᱛᱤ ᱡᱟᱠᱟᱛ ᱛᱟᱞᱟᱨᱮ
ᱤᱧᱟᱹᱜ ᱡᱟᱱᱟᱢ ᱫᱤᱥᱳᱢ
ᱥᱟᱹᱨᱤᱜᱮ, ᱟᱹᱰᱤ ᱥᱚᱨᱮᱥ᱿

ᱨᱤᱞᱟᱹᱢᱟᱞᱟ ᱱᱟᱹᱭ ᱡᱷᱟᱨᱱᱟ
ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱲᱤᱛᱮ ᱥᱟᱡᱟᱣ
ᱤᱧᱟᱹᱜ ᱡᱟᱱᱟᱢ ᱫᱤᱥᱳᱢ
ᱥᱟᱹᱨᱤᱜᱮ, ᱟᱹᱰᱤ ᱥᱚᱨᱮᱥ᱿

ᱦᱟᱦᱟᱲᱟᱜᱜᱮ ᱥᱤᱨᱡᱚᱱᱤᱭᱟᱹ ᱥᱤᱨᱡᱚᱱ
ᱥᱟᱱᱟᱢᱨᱮᱜᱮ ᱪᱟᱱᱫᱳᱭᱟᱜ ᱞᱤᱠᱷᱚᱱ
ᱥᱟᱱᱟᱢ ᱡᱤᱣᱤᱼᱟᱱ ᱛᱟᱞᱟ ᱢᱟᱹᱱᱢᱤ;
ᱥᱟᱹᱨᱤᱜᱮ, ᱟᱹᱰᱤ ᱥᱚᱨᱮᱥ᱿

ᱛᱟᱸᱯᱟᱦᱮᱱ ᱢᱤᱫ ᱥᱟᱶᱛᱮ
ᱫᱩᱞᱟᱹᱲ ᱜᱷᱟᱨᱚᱧᱡᱽ ᱛᱟᱞᱟᱨᱮ
ᱥᱟᱢᱟᱱᱚᱢ ᱞᱮᱠᱟᱱ ᱥᱟᱶᱛᱟ
ᱥᱟᱹᱨᱤᱜᱮ, ᱟᱹᱰᱤ ᱥᱚᱨᱮᱥ᱿

ᱫᱟᱜ ᱦᱚᱭ ᱵᱚᱰᱮ ᱫᱩᱥᱟᱹᱣ
ᱥᱮᱭᱟ ᱚᱧᱡᱽᱨᱟ ᱠᱟᱹᱨᱜᱟᱲ ᱠᱷᱚᱱ
ᱥᱚᱥᱚᱱᱚᱜ ᱩᱛᱱᱟᱹᱣ ᱠᱷᱟᱹᱛᱤᱨ
ᱥᱚᱨᱮᱥ ᱩᱭᱦᱟᱹᱨ ᱞᱤᱪᱟᱹᱲᱜᱮ᱿

ᱫᱷᱟᱹᱨᱛᱤ ᱞᱟᱹᱜᱤᱫ ᱚᱱᱛᱚᱨ ᱫᱟᱱᱟᱝ
ᱫᱩᱞᱟᱹᱲ ᱵᱟᱝ ᱛᱟᱦᱮᱸᱱ ᱠᱷᱟᱱ
ᱨᱮᱸᱜᱮᱡᱛᱮ ᱠᱤᱸᱥᱟᱹᱬ ᱢᱟᱹᱱᱢᱤ ᱛᱟᱞᱟᱨᱮ
ᱥᱚᱨᱮᱥᱚᱜ ᱫᱚ ᱵᱮᱹᱭᱢᱟᱱᱜᱮ᱿

(15) ᱟᱸᱫᱷᱟ

ᱫᱷᱟᱹᱨᱛᱤ ᱨᱮᱭᱟᱜ ᱥᱚᱨᱮᱥ ᱥᱟᱶᱛᱟᱨᱮ
ᱫᱷᱟᱹᱨᱛᱤᱯᱩᱨᱤ ᱥᱮᱹᱵᱟ ᱡᱚᱛᱚᱱ
ᱫᱷᱚᱨᱚᱢ ᱠᱚᱨᱚᱢ ᱨᱤᱞᱟᱹᱢᱟᱞᱟ᱾
ᱢᱟᱱᱰᱤ ᱠᱤᱥᱠᱩ ᱛᱟᱞᱟ
ᱢᱤᱫ ᱠᱷᱚᱬ, ᱢᱤᱫ ᱯᱟᱹᱨᱤᱥ ᱛᱟᱞᱟ
ᱢᱟᱱᱟ ᱛᱟᱦᱮᱸᱠᱟᱱᱟ ᱵᱟᱯᱞᱟ᱾

ᱦᱩᱰᱤᱧ ᱢᱟᱨᱟᱝ ᱢᱟᱹᱱᱟᱱ ᱯᱮᱲᱟ
ᱦᱟᱱᱦᱟᱨ ᱦᱚᱧᱦᱟᱨ ᱟᱡᱷᱱᱟᱨ ᱵᱟᱦᱧᱟᱨ
ᱛᱟᱦᱮᱸᱠᱟᱱᱟ ᱢᱟᱱᱟᱣ ᱵᱟᱛᱟᱣ᱾
ᱢᱚᱱᱮ ᱠᱤᱸᱯᱤᱥᱟᱹᱬᱼᱮᱱᱟ
ᱱᱟᱜᱟᱨ ᱥᱚᱥᱚᱱᱚᱜ ᱱᱟᱦᱟᱜ ᱥᱟᱶᱛᱟ
ᱟᱪᱟᱨ ᱵᱟᱣᱦᱟᱨ ᱦᱳᱭᱮᱱᱟ ᱟᱹᱨᱩᱯᱷᱮᱨᱟᱣ᱿

ᱥᱩᱥᱟᱹᱨ ᱟᱹᱱ ᱟᱹᱨᱤ ᱪᱮᱛᱟᱱ
ᱡᱟᱦᱮᱨᱜᱟᱲᱷ ᱥᱟᱹᱨᱭᱟᱹᱲ ᱪᱮᱛᱟᱱ
ᱪᱟᱵᱟᱭᱮᱱᱟ ᱯᱟᱹᱛᱭᱟᱹᱣ᱾
ᱵᱷᱤᱛ ᱯᱮᱨᱮᱡᱼᱮᱱᱟ ᱵᱮᱱᱟᱣ ᱵᱳᱝᱜᱟᱛᱮ
ᱥᱤᱭᱟᱹᱡᱟᱹᱨᱤᱛᱮ ᱚᱞ ᱛᱚᱞ ᱟᱹᱨᱤ ᱨᱮᱜᱮ
ᱢᱚᱱᱮ ᱫᱚ ᱛᱷᱟᱹᱞᱤᱭᱟᱛᱮ ᱜᱟᱹᱫᱷᱭᱟᱹᱣ᱾

ᱢᱮᱫ ᱞᱳᱛᱚᱨ ᱛᱟᱦᱮᱸᱱ ᱛᱩᱞᱩᱡ
ᱵᱩᱫᱽ ᱟᱹᱠᱤᱞ ᱜᱮᱭᱟᱱ ᱟᱫ ᱠᱟᱛᱮᱫ
ᱜᱟᱞᱵᱚᱴ ᱥᱟᱞᱵᱚᱴᱮᱱᱟ ᱵᱤᱪᱟᱹᱨ᱾
ᱮᱱᱦᱚᱸ, ᱥᱟᱹᱨᱤᱫᱷᱚᱨᱚᱢ ᱯᱟᱹᱛᱭᱟᱹᱣ ᱠᱟᱛᱮᱫ
ᱡᱟᱹᱛᱤ ᱥᱟᱶᱛᱟ ᱫᱩᱞᱟᱹᱲᱤᱭᱟᱹᱠᱳ
ᱥᱟᱶᱛᱟ ᱵᱟᱧᱪᱟᱣ ᱞᱟᱹᱜᱤᱫ ᱠᱳ ᱩᱭᱦᱟᱹᱨ᱿

(16) ᱠᱩᱸᱭᱟᱹᱨ ᱠᱩᱸᱭᱟᱹᱨᱤ

ᱟᱢᱵᱟᱵᱟᱹᱥᱤᱭᱟᱹ ᱠᱩᱱᱟᱹᱢᱤ ᱛᱟᱭᱱᱚᱢ
ᱨᱚᱦᱚᱭ ᱫᱟᱨᱮ ᱰᱟᱹᱨ ᱞᱤᱣᱮᱹᱫ ᱥᱟᱱᱟᱢ ᱥᱮᱦᱮᱫ
ᱦᱟᱨᱟᱛᱚᱨᱟ ᱥᱟᱬ ᱵᱟᱦᱟ
ᱥᱟᱜᱮᱱ ᱥᱟᱠᱟᱢᱨᱮ ᱞᱳᱵᱷ ᱜᱮᱪᱚᱭ ᱵᱮᱸᱜᱮᱫᱽ᱿

ᱠᱩᱠᱷᱤ ᱵᱷᱤᱛᱟᱹᱨ ᱠᱷᱚᱱ ᱡᱟᱝᱜᱟ ᱞᱟᱦᱟᱜ
ᱛᱤᱨᱮ ᱥᱟᱵᱚᱜ ᱞᱟᱹᱜᱤᱫ
ᱮᱸᱜᱟᱛ ᱟᱯᱟᱛ ᱛᱤ ᱠᱷᱚᱱ ᱪᱷᱟᱯᱟᱰᱟ ᱛᱟᱭᱱᱚᱢ
ᱥᱟᱦᱟ ᱥᱟᱺᱜᱤᱧᱚᱜ ᱧᱤᱱᱫᱟᱹ ᱡᱟᱹᱯᱤᱫ᱿

ᱡᱩᱭᱟᱹᱱ ᱞᱟᱹᱣᱲᱤᱭᱟᱼ, ᱚᱠᱚᱭ ᱨᱤᱱᱤᱡ?
ᱦᱟᱦᱟᱲᱟᱜ ᱠᱩᱠᱞᱤ ᱢᱚᱱᱮᱨᱮ
ᱯᱟᱧᱡᱟᱛᱮᱱ ᱫᱩᱞᱟᱹᱲᱤᱭᱟᱹᱼ,
ᱪᱮᱫᱟᱜ ᱵᱟᱝ ᱜᱷᱚᱞᱟᱣᱞᱮᱱ ᱵᱮᱹᱞᱮᱹ??

ᱠᱩᱸᱭᱟᱹᱨ ᱠᱩᱸᱭᱟᱹᱨᱤ ᱠᱟᱹᱨᱫᱷᱟᱹᱱᱤ ᱧᱮᱞᱛᱮ
ᱮᱸᱜᱟᱛ ᱟᱯᱟᱛ ᱵᱚᱦᱚᱜ ᱜᱩᱨᱜᱩᱨᱟᱹᱜ
ᱵᱟᱝ ᱵᱩᱡᱽᱛᱮ ᱩᱢᱮᱹᱨ ᱨᱮᱭᱟᱜ ᱜᱚᱱᱚᱝ
ᱥᱤᱨᱡᱚᱱ ᱢᱚᱱᱮ ᱟᱹᱣᱲᱟᱹᱜ᱿

ᱠᱩᱸᱭᱟᱹᱨ ᱠᱩᱸᱭᱟᱹᱨᱤ ᱢᱚᱱᱮ ᱵᱟᱫᱟᱞᱚᱜ
ᱥᱟᱹᱨᱩ ᱥᱟᱠᱟᱢ ᱪᱮᱛᱟᱱ ᱫᱟᱜ ᱞᱮᱠᱟ
ᱵᱳᱜᱮ ᱵᱟᱹᱲᱤᱡ ᱪᱩᱨᱤᱛ ᱵᱮᱣᱦᱟᱨ
ᱰᱟᱹᱰᱤ ᱠᱩᱧ ᱜᱷᱟᱴᱨᱮ ᱵᱤᱪᱟᱹᱨ ᱟᱪᱟᱨᱚᱜ᱿

ᱵᱟᱦᱟ ᱪᱮᱛᱟᱱᱨᱮ ᱩᱰᱟᱹᱜ ᱯᱟᱹᱛᱱᱤ
ᱦᱮᱲᱮᱢ ᱨᱟᱥᱟ ᱪᱮᱯᱮᱡ ᱧᱟᱢ
ᱡᱩᱭᱟᱹᱱ ᱡᱟᱞᱟ ᱵᱟᱝ ᱥᱟᱦᱟᱣᱼᱚᱜ
ᱟᱥ ᱯᱩᱨᱟᱹᱣ ᱱᱮᱱᱰᱟ ᱧᱟᱯᱟᱢ᱿

ᱚᱲᱟᱜ ᱫᱩᱭᱟᱹᱨ ᱠᱷᱚᱱ ᱪᱷᱟᱴᱠᱟ
ᱥᱟᱹᱨᱤ ᱯᱷᱩᱨᱜᱟᱹᱞ ᱢᱚᱱᱮ ᱩᱭᱦᱟᱹᱨ
ᱫᱷᱤᱲᱩ ᱵᱟᱹᱪᱷᱤ ᱯᱤᱨᱤᱞᱟᱛᱮ
ᱵᱟᱦᱟᱭ ᱟᱨᱟᱣ ᱦᱟᱹᱞᱤ ᱡᱟᱹᱞᱤ ᱠᱩᱸᱭᱟᱹᱨ᱿

ᱡᱩᱭᱟᱹᱱ ᱨᱮᱭᱟᱜ ᱛᱤᱠᱤᱱ ᱵᱮᱲᱟ
ᱵᱩᱨᱫᱷᱤ ᱵᱩᱸᱥᱟᱹᱬᱚᱜ ᱜᱮᱭᱟᱱ ᱯᱚᱴᱠᱚᱡᱚᱜ
ᱞᱮᱵᱽᱫᱟ ᱯᱟᱨᱚᱢ ᱚᱠᱛᱚ ᱨᱮᱭᱟᱜ ᱜᱚᱱᱚᱝ
ᱵᱩᱡᱷᱟᱹᱣ ᱠᱷᱟᱹᱛᱤᱨ ᱚᱱᱛᱚᱨ ᱡᱤᱣᱤ ᱦᱮᱰᱮᱡᱚᱜ᱿

(17) ᱥᱟᱹᱜᱩᱱ ᱢᱟᱦᱟᱨᱮ

ᱛᱮᱦᱮᱛᱮᱦᱮ ᱩᱯᱤ ᱞᱮᱠᱟ
ᱦᱤᱡᱩᱜᱼᱟᱠᱳ ᱫᱤᱥᱳᱢ ᱯᱮᱲᱟ
ᱵᱟᱝᱜᱮ ᱵᱳᱜᱮᱭᱟ ᱟᱵᱟᱜᱟᱞᱚᱜ
ᱫᱤᱱᱟᱹᱢ ᱵᱟᱝ ᱫᱟᱨᱟᱭᱟ ᱥᱟᱹᱜᱩᱱ ᱵᱮᱲᱟ᱿

ᱵᱟᱝ ᱯᱚᱨᱚᱠᱷ ᱞᱮᱱᱛᱮ ᱚᱥᱟᱹᱜᱩᱱ
ᱥᱟᱥᱟᱝ ᱯᱤᱭᱳᱭ ᱦᱮᱸ ᱥᱟᱹᱨᱤ
ᱦᱟᱨᱟ ᱡᱩᱭᱟᱹᱱ ᱩᱢᱮᱹᱨᱨᱮ
ᱥᱮᱴᱮᱨᱱᱟ ᱵᱤᱫᱟᱹᱭ ᱢᱟᱦᱟ ᱟᱢᱟᱜ ᱯᱟᱹᱨᱤ᱿

ᱡᱟᱶᱟᱭ ᱯᱟᱦᱴᱟ ᱛᱚᱞᱻᱮᱱ ᱜᱟᱺᱴᱟᱛᱮᱫ ᱜᱤᱨᱟᱹ
ᱡᱚᱠᱷᱮᱡ ᱥᱟᱹᱜᱟᱹᱭ ᱥᱟᱹᱜᱩᱱ ᱥᱟᱹᱨᱤᱭᱮᱱ
ᱜᱤᱨᱟᱹ ᱜᱟᱺᱴ ᱧᱮᱞ ᱵᱤᱰᱟᱹᱣ ᱠᱟᱛᱮᱫ
ᱡᱟᱶᱟᱭ ᱯᱟᱦᱴᱟ ᱥᱳᱭᱜᱤᱨᱟᱹ ᱵᱷᱮᱡᱟ ᱨᱩᱭᱟᱹᱲᱮᱱ᱿

ᱵᱮᱱᱟᱣ ᱠᱮᱫᱼᱟᱠᱳ ᱪᱷᱟᱢᱰᱟ
ᱥᱟᱨᱡᱚᱢ, ᱢᱟᱛᱠᱚᱢ, ᱥᱮᱠᱨᱮᱡ ᱰᱟᱹᱨ ᱢᱮᱥᱟᱣᱟᱛᱮ
ᱵᱤᱫ ᱠᱮᱫᱼᱟᱠᱳ ᱢᱟᱰᱣᱟ ᱠᱷᱩᱱᱴᱤ; ᱟᱛᱳ ᱢᱚᱬᱮ ᱦᱚᱲ᱾
ᱥᱮᱴᱮᱨᱮᱱᱟᱠᱳ ᱥᱟᱸᱜᱮ ᱵᱟᱹᱨᱤᱭᱟᱹᱛ
ᱨᱩᱻᱨᱩᱛᱮ ᱦᱩᱰᱜᱩ ᱰᱩᱜᱩᱨ, ᱦᱩᱰᱜᱩ ᱰᱩᱜᱩᱨ
ᱟᱨᱦᱚᱸ ᱨᱮᱜᱽᱲᱟ ᱨᱚᱜᱚᱲ ᱯᱚᱜᱚᱲ᱿

ᱦᱟᱹᱛᱤ ᱪᱮᱛᱟᱱ ᱥᱟᱫᱚᱢ ᱪᱮᱛᱟᱱ
ᱥᱮᱴᱮᱨᱮᱱᱟᱭ ᱱᱟᱣᱟ ᱡᱟᱶᱟᱭ
ᱥᱟᱥᱟᱝ ᱜᱟᱵᱟᱣ ᱥᱟᱹᱲᱤ ᱟᱨ
ᱚᱡᱚᱜ ᱥᱟᱨᱮᱡ ᱥᱟᱥᱟᱥᱝ
ᱥᱟᱶᱛᱮ ᱯᱚᱴᱚᱢ ᱥᱟᱝᱠᱷᱟ ᱥᱤᱸᱫᱩᱨ
ᱟᱹᱜᱩᱛᱚᱨᱟᱣᱟᱫ ᱢᱮᱭᱟᱭ᱿
ᱮᱯᱮᱢ ᱪᱟᱯᱟᱞ ᱠᱟᱛᱮᱫ ᱯᱟᱱ ᱵᱤᱲᱤ
ᱵᱚᱠᱚᱢᱼᱮ ᱟᱛᱟᱝ ᱠᱮᱫᱼᱟ ᱥᱟᱞᱟ ᱫᱟᱹᱦᱲᱤ᱿
ᱡᱟᱨᱮᱹ ᱫᱚᱢ, ᱡᱟᱨᱮᱹ ᱰᱚᱢᱟᱛᱮᱫ
ᱚᱡᱚᱜ ᱥᱟᱨᱮᱡ ᱥᱟᱥᱟᱝ ᱚᱡᱚᱜ ᱠᱟᱛᱮᱫ
ᱦᱤᱲᱤᱧ ᱠᱮᱫᱼᱟᱢ ᱩᱥᱟᱹᱫ ᱟᱹᱲᱤ
ᱵᱟᱱᱫᱮ ᱠᱮᱫᱼᱟᱢ ᱥᱟᱥᱟᱝ ᱥᱟᱹᱲᱤ
ᱥᱟᱡᱟᱣᱮᱱᱟᱢ ᱱᱟᱣᱟ ᱵᱟᱹᱦᱩ ᱠᱩᱲᱤ᱿

ᱡᱚᱜᱽ ᱢᱟᱹᱧᱡᱽᱦᱤᱭ ᱟᱛᱟᱝ ᱠᱮᱫᱼᱟ
ᱟᱢ ᱡᱚᱜᱟᱣ ᱡᱚᱛᱚᱱ ᱥᱤᱨᱯᱟᱹ᱾
ᱫᱟᱹᱣᱲᱟᱹ ᱪᱮᱛᱟᱱ ᱠᱷᱚᱱ ᱟᱢ ᱫᱚ
ᱥᱟᱫᱚᱢ ᱪᱮᱛᱟᱱ ᱠᱷᱚᱱ ᱡᱟᱶᱟᱭ ᱫᱚ
ᱤᱨᱪᱤᱭᱟᱱᱟᱵᱮᱱ ᱟᱹᱪᱩᱨᱮ ᱵᱤᱦᱩᱨᱮ
ᱥᱟᱹᱜᱩᱱ ᱥᱩᱯᱟᱹᱲᱤ ᱞᱚᱴᱟ ᱫᱟᱜ᱾
ᱡᱟᱶᱟᱭ ᱛᱟᱢᱮ ᱴᱤᱰᱟᱹᱜᱼᱟᱫ ᱢᱮᱭᱟ
ᱞᱟᱲᱟ ᱠᱟᱛᱮᱫ ᱯᱚᱴᱚᱢ ᱫᱷᱩᱲᱤ ᱥᱤᱸᱫᱩᱨ
ᱥᱟᱶᱛᱮ ᱞᱮᱸᱜᱟ ᱛᱤᱨᱮ ᱢᱮᱲᱦᱮᱫ ᱥᱟᱠᱚᱢ
ᱛᱩᱸᱵᱩᱫ ᱠᱟᱛᱮᱫ ᱟᱢ ᱫᱚ ᱠᱟᱺᱫᱩᱨ ᱢᱟᱺᱫᱩᱨ᱿

ᱵᱤᱫᱟᱹᱭ ᱵᱮᱲᱟ ᱵᱮᱱ ᱟᱛᱟᱝ ᱠᱮᱫᱼᱟ
ᱥᱩᱯᱩᱞᱩᱠ ᱛᱟᱯᱟᱦᱮᱱ ᱠᱤᱨᱤᱭᱟᱹ
ᱥᱟᱹᱜᱩᱱ ᱵᱮᱲᱟᱵᱮᱱ ᱜᱚᱜ ᱫᱤᱯᱤᱞ ᱠᱮᱫᱼᱟ
ᱜᱷᱟᱨᱚᱧᱡᱽ ᱵᱷᱟᱹᱨᱤᱭᱟᱹ;
ᱫᱩᱞᱟᱹᱲᱛᱮ ᱥᱟᱡᱟᱣ ᱞᱟᱹᱜᱤᱫ ᱡᱩᱨᱤᱯᱩᱨᱤ
ᱯᱤᱨᱤᱞ ᱵᱮᱲᱟ ᱥᱟᱹᱠᱷᱤ ᱠᱟᱛᱮᱫ
ᱫᱤᱥᱳᱢ ᱯᱮᱲᱟ ᱥᱟᱹᱠᱷᱤ ᱠᱟᱛᱮᱫ
ᱟᱵᱮᱱᱜᱮ ᱯᱳᱨᱟᱱᱮ ᱯᱳᱨᱟᱝᱜᱚᱛ ᱡᱤᱣᱤᱡᱩᱨᱤ᱿

(18) ᱦᱚᱲ ᱪᱮᱛᱟᱱ ᱦᱚᱲ

ᱡᱟᱸᱦᱟᱥᱮᱫ ᱦᱤᱡᱩᱜ ᱥᱮᱱᱚᱜ ᱦᱚᱨᱨᱮ
ᱯᱟᱧᱡᱟᱞᱤᱫᱤᱧᱟᱢ ᱜᱩᱭᱩᱨ ᱜᱩᱭᱩᱨ
ᱥᱮᱹᱵᱮᱹᱞ ᱥᱮᱹᱵᱮᱹᱞ ᱛᱷᱩᱛᱤᱭᱟᱛᱮ
ᱟᱹᱛᱠᱤᱨᱞᱮᱫ ᱛᱤᱧᱟᱹᱢ ᱢᱚᱱᱮ; ᱟᱢ ᱥᱳᱨ᱿
ᱵᱟᱝᱫᱚ ᱠᱟᱭᱨᱟ ᱯᱩᱸᱜᱤ ᱦᱚᱲᱢᱚ ᱧᱮᱞᱛᱮ
ᱵᱟᱝᱫᱚ ᱨᱚᱲ ᱞᱟᱱᱫᱟᱛᱤᱧᱮᱢ ᱠᱩᱥᱤᱭᱟᱜᱛᱮ
ᱟᱢᱜᱮᱛᱚᱜᱳ ᱯᱳᱹᱭᱞᱳᱛᱮᱢ ᱫᱩᱞᱟᱹᱲᱟᱫᱤᱧ
ᱦᱟᱨᱟᱛᱚᱨᱟ ᱠᱩᱪᱤ ᱠᱩᱲᱤ ᱢᱚᱱᱮᱨᱮ᱿
ᱧᱟᱯᱟᱢ ᱥᱟᱹᱱᱟᱹᱧ ᱥᱟᱨᱟᱜᱷᱟᱹᱲᱤ
ᱵᱟᱹᱧ ᱫᱟᱲᱮᱭᱟᱜᱨᱮ ᱟᱢ ᱵᱮᱜᱚᱨ ᱛᱟᱦᱮᱸᱱ
ᱚᱡᱽᱞᱤᱫᱟᱹᱧ ᱜᱤᱫᱽᱨᱟᱹ ᱞᱮᱠᱟ
ᱵᱟᱹᱦᱩᱠᱩᱲᱤ ᱥᱟᱡᱚᱜ ᱞᱟᱹᱜᱤᱫ ᱟᱢᱨᱮᱱ᱿

ᱟᱥ ᱞᱤᱱᱟᱹᱧ ᱟᱨᱠᱳ ᱞᱮᱠᱟ
ᱟᱬᱜᱳ ᱧᱟᱯᱟᱢᱟᱞᱟᱝ
ᱤᱧ ᱫᱚ ᱫᱟᱹᱣᱲᱟᱹ ᱪᱮᱛᱟᱱ ᱠᱷᱚᱱ
ᱟᱢᱫᱚ ᱥᱟᱫᱚᱢ ᱪᱮᱛᱟᱱ ᱠᱷᱚᱱ᱾
ᱤᱧ ᱯᱟᱦᱴᱟ ᱥᱟᱸᱜᱮ ᱥᱟᱹᱨᱤᱭᱟᱹᱛ
ᱟᱢ ᱯᱟᱦᱴᱟ ᱥᱟᱸᱜᱮ ᱵᱟᱹᱨᱤᱭᱟᱹᱛ
ᱨᱟᱹᱥᱠᱟᱹᱜᱮ ᱨᱟᱡᱚᱱ ᱵᱟᱡᱚᱱ᱿

ᱵᱟᱝᱢᱟ ᱥᱟᱹᱜᱩᱱ ᱵᱟᱝᱠᱳ ᱧᱟᱢ ᱞᱮᱫᱼᱟ
ᱤᱧᱨᱮᱱ ᱟᱯᱟᱵᱟᱨᱮ
ᱩᱱᱨᱮ, ᱨᱟᱜ ᱞᱤᱫᱟᱹᱧ ᱟᱹᱠᱩᱞᱮ ᱵᱤᱠᱩᱞᱮ
ᱥᱤᱸᱜᱟᱹᱬ ᱧᱩᱦᱩᱧ ᱵᱮᱲᱟ ᱵᱟᱲᱜᱮ ᱫᱩᱭᱟᱹᱨᱛᱮ
ᱵᱟᱦᱮᱨ ᱠᱟᱛᱮᱫ ᱤᱧ ᱟᱺᱰᱤᱡ ᱞᱮᱱᱟ
ᱟᱢ ᱥᱟᱶᱛᱮ ᱡᱷᱚᱯᱚᱨ ᱡᱳᱞᱮ᱿

ᱢᱚᱱᱮ ᱥᱟᱶᱛᱮ ᱢᱚᱱᱮ,
ᱡᱤᱣᱤ ᱥᱟᱶᱛᱮ ᱡᱤᱣᱤ
ᱛᱚᱯᱚᱞ ᱢᱤᱫ ᱠᱮᱫᱼᱟᱞᱟᱝ
ᱥᱟᱹᱨᱤᱭ ᱞᱟᱹᱜᱤᱫ ᱫᱩᱞᱟᱹᱲ
ᱡᱤᱭᱟᱹᱲ ᱞᱟᱹᱜᱤᱫ ᱥᱟᱹᱜᱟᱹᱭ
ᱦᱳᱭᱮᱱ ᱛᱟᱞᱟᱝᱼᱟ ᱠᱳᱸᱰᱮᱹᱞ ᱧᱟᱯᱟᱢ᱿
ᱩᱱ ᱫᱚ ᱯᱟᱧᱡᱟ ᱠᱮᱫᱠᱷᱟᱱ ᱧᱟᱢ ᱠᱮᱫᱼᱟᱠᱳ ᱥᱟᱹᱜᱩᱱ
ᱡᱚᱲᱟᱣᱮᱱᱟ ᱯᱮᱲᱟ ᱥᱟᱹᱜᱟᱹᱭ
ᱥᱟᱹᱦᱤᱡᱩᱦᱤᱭᱮᱱᱟ ᱟᱞᱟᱝᱼᱟᱜ ᱵᱟᱯᱞᱟ
ᱟᱨ ᱵᱟᱝᱞᱟᱝ ᱛᱟᱦᱮᱸᱞᱮᱱᱟ ᱮᱠᱞᱟ ᱮᱠᱞᱟ᱿

ᱚᱠᱛᱚ ᱪᱟᱠᱟ ᱟᱹᱪᱩᱨᱮᱱᱟ
ᱜᱷᱟᱨᱚᱧᱡᱽ ᱥᱤᱢᱟᱹ ᱚᱥᱟᱨᱮᱱᱟ
ᱦᱮᱶ ᱦᱚᱵᱚᱨᱟᱹᱱᱟᱹᱧ ᱡᱚᱲ ᱵᱟᱹᱵᱩ ᱢᱟᱹᱭ᱾
ᱱᱤᱛᱳᱜ ᱯᱷᱟᱹᱨᱭᱟᱹ ᱫᱟᱜ ᱵᱚᱰᱮᱭᱮᱱᱟ
ᱥᱮᱹᱵᱮᱹᱞ ᱥᱟᱹᱜᱟᱹᱭ ᱦᱟᱲᱦᱟᱫ ᱮᱱᱟ
ᱟᱢᱟᱜ ᱵᱟᱦᱨᱮ ᱪᱳᱠᱳ ᱠᱟᱛᱷᱟ ᱦᱚᱲᱠᱳ ᱞᱟᱹᱯᱟᱹᱭ᱿

ᱛᱮᱦᱮᱧ, ᱵᱟᱹᱱᱩᱜᱢᱮᱭᱟ ᱵᱤᱪᱷᱱᱟᱹᱨᱮ
ᱵᱟᱹᱧ ᱧᱟᱢᱮᱫᱢᱮᱭᱟ ᱦᱟᱹᱛᱲᱟᱹᱣᱛᱮ
ᱛᱟᱞᱟᱧᱤᱱᱫᱟᱹ ᱮᱵᱷᱮᱱ ᱠᱟᱛᱮᱫ
ᱚᱠᱟᱛᱮ ᱵᱟᱝᱼᱮᱢ ᱥᱮᱱ ᱟᱠᱟᱱ……ᱹ?
ᱩᱭᱦᱟᱹᱨ ᱩᱭᱦᱟᱹᱨᱛᱮ ᱡᱟᱹᱯᱤᱫ ᱫᱚᱦᱲᱟ ᱠᱤᱫᱟᱹᱧ
ᱜᱤᱫᱽᱨᱟᱹᱠᱤᱱ ᱦᱟᱺᱵᱩᱫ ᱠᱟᱛᱮᱫ᱿

ᱧᱮᱞᱮᱫ ᱢᱤᱭᱟᱹᱧ ᱥᱮᱛᱟᱜᱨᱮ ᱮᱵᱷᱮᱱ ᱠᱟᱛᱮᱫ
ᱡᱟᱹᱯᱤᱫ ᱡᱚᱝ ᱠᱟᱱᱟᱢ ᱩᱫᱩᱨᱟᱛᱮᱫ᱾
ᱠᱩᱞᱤ ᱥᱟᱹᱱᱟᱹᱧ ᱠᱟᱱᱟᱼ
ᱧᱤᱱᱫᱟᱹ ᱵᱮᱲᱟ ᱚᱠᱟᱛᱮᱢ ᱪᱟᱞᱟᱣ ᱞᱮᱱᱟ?
ᱢᱮᱱᱠᱷᱟᱱ, ᱵᱟᱝ, ᱵᱟᱹᱧ ᱠᱩᱞᱤᱞᱮᱫᱢᱮᱭᱟ᱾

ᱚᱜᱼᱚᱞ ᱠᱟᱱᱮᱢ ᱟᱢᱟᱜ ᱜᱟᱭᱟᱱ ᱥᱟᱠᱟᱢᱨᱮ;
ᱟᱢᱮᱢ ᱮᱵᱷᱮᱱᱚᱜ ᱢᱟᱲᱟᱝᱨᱮ
ᱚᱞ ᱠᱤᱫᱟᱹᱧ ᱤᱧᱟᱹᱜ ᱢᱚᱱᱮ ᱨᱮᱭᱟᱜ ᱠᱟᱛᱷᱟᱼ,

“ᱟᱢ ᱫᱚ ᱤᱧᱤᱡ ᱤᱧ ᱫᱚ ᱟᱢᱤᱡ
ᱟᱞᱟᱝᱦᱚᱸ ᱫᱷᱟᱹᱨᱛᱤᱯᱩᱨᱤᱨᱮᱱ
ᱡᱩᱨᱤ ᱯᱟᱣᱨᱟ ᱞᱮᱠᱟᱱ ᱡᱩᱨᱤᱜᱟᱛᱮ
ᱥᱟᱹᱨᱤ ᱫᱩᱞᱟᱹᱲᱤᱭᱟᱹᱠᱳ ᱛᱟᱞᱟᱨᱮᱱ᱿
ᱟᱢ ᱵᱮᱜᱚᱨ ᱵᱟᱹᱱᱩᱜ ᱛᱤᱧᱟᱹ
ᱫᱩᱞᱟᱹᱲᱟᱛᱮ ᱵᱟᱧᱪᱟᱜ ᱟᱹᱭᱫᱟᱹᱨ;
ᱡᱮᱹᱦᱤᱞᱳᱜ ᱠᱷᱚᱱ ᱵᱟᱹᱜᱤᱭᱟᱠᱟᱫᱟᱹᱧ
ᱟᱭᱳ ᱵᱟᱵᱟ ᱚᱲᱟᱜ ᱫᱩᱭᱟᱹᱨ᱿
ᱥᱩᱠ ᱡᱤᱭᱚᱱᱨᱮ ᱫᱩᱠ ᱟᱞᱚᱢ ᱥᱮᱯᱮᱧᱟᱹᱧᱟᱹ
ᱮᱜᱳ, ᱡᱤᱣᱤᱡᱩᱨᱤ ᱪᱷᱟᱛᱫᱟᱨᱮ
ᱮᱠᱷᱮᱱ ᱥᱩᱞᱩᱠ ᱜᱮᱛᱚᱠᱳ ᱟᱥᱚᱜᱼᱟ
ᱥᱟᱱᱟᱢᱠᱳ ᱨᱮᱱ ᱟᱯᱟᱵᱟᱨᱮ᱿
ᱟᱞᱚᱢ ᱵᱷᱟᱹᱵᱤᱭᱟ ᱠᱷᱟᱹᱞᱤ ᱠᱷᱟᱹᱞᱤ
ᱵᱟᱨ ᱢᱟᱹᱧᱡᱽᱦᱤᱭᱟᱜ ᱠᱤᱨᱤᱭᱟᱹ
ᱟᱞᱚᱢ ᱥᱟᱡᱚᱜᱼᱟ ᱦᱚᱲ ᱪᱮᱛᱟᱱ ᱦᱚᱲ
ᱟᱞᱚᱢ ᱫᱤᱯᱤᱞᱟᱹᱧᱟᱹ ᱦᱤᱨᱳᱢ ᱵᱷᱟᱹᱨᱤᱭᱟᱹ᱿”

(19) ᱫᱮᱹᱠᱳ ᱯᱮᱲᱟ

ᱤᱧᱡᱤᱱᱤᱭᱟᱨ ᱠᱚᱲᱟ ᱨᱚᱧᱡᱚᱱ ᱥᱚᱨᱮᱱ
ᱜᱚᱨᱚᱵᱟᱱᱟᱜ ᱳᱯᱨᱳᱢ ᱥᱟᱱᱛᱟᱲ ᱴᱷᱮᱱ᱿

ᱡᱟᱱᱟᱢ ᱞᱮᱱᱟᱭ ᱥᱚᱨᱮᱱ ᱵᱟᱠᱷᱳᱞᱨᱮ
ᱦᱟᱨᱟ ᱞᱮᱱᱟᱭ ᱨᱚᱲ ᱞᱟᱱᱫᱟ ᱠᱮᱱᱮᱠᱚᱛᱮ
ᱪᱚᱜ ᱪᱮᱨᱮᱡ ᱫᱩᱞᱟᱹᱲ ᱛᱟᱞᱟᱛᱮ᱾
ᱦᱩᱰᱤᱧ ᱠᱷᱚᱱᱮ ᱦᱟᱨᱟ ᱡᱩᱭᱟᱹᱱᱮᱱ
ᱠᱳᱢᱲᱳ ᱫᱩᱞᱟᱹᱲᱨᱮᱭ ᱡᱷᱟᱹᱞᱤᱭᱮᱱ᱾

ᱪᱟᱹᱠᱨᱤ ᱠᱚᱲᱟ ᱠᱷᱟᱹᱛᱤᱨᱛᱮ
ᱚᱲᱟᱜ ᱛᱟᱞᱟ ᱞᱮᱫᱮᱭᱟᱠᱳ ᱫᱮᱹᱠᱳ ᱵᱟᱠᱷᱳᱞᱨᱮ᱾

ᱪᱟᱱᱫᱳ ᱞᱤᱠᱷᱚᱱ ᱡᱟᱸᱦᱟ ᱛᱟᱦᱮᱸᱠᱟᱱᱟ
ᱚᱱᱟᱜᱮᱪᱚᱝ ᱦᱳᱭ ᱥᱟᱹᱨᱤᱭᱮᱱᱟ;
ᱪᱟᱹᱠᱨᱤ ᱠᱷᱚᱱᱮ ᱡᱤᱨᱟᱹᱣᱮᱱ ᱛᱟᱭᱱᱚᱢ
ᱠᱟᱹᱣᱰᱤ ᱵᱷᱩᱬᱩᱡ ᱠᱟᱛᱮᱫᱠᱳ
ᱞᱟᱜᱟ ᱵᱟᱦᱮᱨ ᱠᱮᱫᱮᱭᱟ᱾
ᱠᱷᱚᱵᱚᱨ ᱠᱟᱜᱚᱡᱽᱨᱮᱠᱳ ᱥᱚᱫᱚᱨ ᱠᱮᱫᱼᱟ
ᱵᱷᱟᱱᱰᱟᱱ ᱵᱤᱫᱟᱹᱭ ᱠᱟᱛᱮᱫ
ᱦᱚᱭ ᱡᱤᱣᱤᱛᱟᱭ ᱥᱟᱹᱱᱛᱤᱨᱮ ᱛᱟᱦᱮᱸᱱᱢᱟ᱿

(20) ᱫᱚᱥᱟᱨ ᱦᱩᱞ

ᱧᱩᱢᱦᱟᱞᱟᱝ ᱡᱟᱹᱛᱤᱭᱟᱹᱨᱤ ᱢᱟᱹᱦᱤᱛᱨᱮ
ᱥᱤᱧ ᱪᱟᱱᱫᱳᱭ ᱨᱟᱠᱟᱵᱼᱮᱱᱟ
ᱰᱤᱜᱤᱢᱤᱜᱤ ᱢᱟᱨᱥᱟᱞ ᱯᱟᱥᱱᱟᱣᱮᱱᱟ
ᱵᱷᱟᱨᱚᱛ ᱫᱤᱥᱳᱢ ᱡᱟᱠᱟᱛ
ᱦᱩᱞᱜᱟᱹᱨᱤᱭᱟᱹ ᱢᱩᱴᱷᱟᱹᱱᱨᱮ
ᱟᱨᱟᱣᱮᱱᱟ ᱵᱟᱦᱟᱢᱟᱞᱟ᱿

ᱥᱚᱨᱚᱜᱽᱯᱩᱨᱤᱨᱮ ᱥᱟᱸᱜᱮ ᱵᱳᱝᱜᱟᱵᱩᱨᱩ
ᱥᱟᱶᱨᱮ ᱢᱮᱱᱟᱜᱯᱮ ᱥᱟᱸᱜᱮ ᱦᱩᱞᱜᱟᱹᱨᱤᱭᱟᱹ
ᱡᱩᱫᱤᱯᱮ ᱧᱮᱧᱮᱞ ᱠᱟᱱᱟ;
ᱮᱱᱠᱷᱟᱱ ᱧᱮᱞ ᱞᱮᱯᱮ ᱪᱮᱫᱞᱮᱠᱟ ᱢᱮᱱᱟᱜ ᱞᱮᱭᱟ
ᱪᱮᱫᱞᱮᱠᱟᱞᱮ ᱮᱯᱲᱮᱭᱮᱫᱼᱟ ᱟᱯᱮᱭᱟᱜ ᱩᱫᱩᱜ ᱰᱟᱦᱟᱨ᱿

ᱱᱤᱛᱦᱚᱸ ᱵᱟᱝᱞᱮ ᱵᱩᱡᱷᱟᱹᱣ ᱞᱮᱫᱼᱟ
ᱪᱮᱫᱟᱜᱯᱮ ᱥᱟᱡᱟᱣᱞᱮᱱᱟ ᱦᱩᱞᱜᱟᱹᱨᱤᱭᱟᱹ?

ᱪᱮᱫᱟᱜ ᱛᱤᱞᱠᱟᱹ ᱟᱢᱜᱮ ᱯᱳᱹᱭᱞᱳ
ᱫᱤᱥᱳᱢ ᱯᱷᱩᱨᱜᱟᱹᱞ ᱞᱟᱹᱜᱤᱫ ᱟᱞᱟᱭ ᱞᱮᱫᱼᱟᱢ ᱡᱤᱣᱤ,
ᱪᱮᱫᱟᱜ ᱫᱚ ᱵᱤᱨᱥᱟᱹ ᱟᱢ ᱵᱤᱨᱞᱮᱱᱟ??
ᱪᱮᱫᱟᱜ ᱫᱚ ᱥᱤᱫᱩ ᱠᱟᱹᱱᱩ
ᱟᱥᱮᱱ ᱞᱮᱫᱼᱟᱵᱮᱱ ᱦᱩᱞ ᱜᱤᱨᱟᱹ
ᱜᱚᱜ ᱠᱟᱛᱮᱫ ᱥᱟᱨᱡᱚᱢ ᱰᱷᱟᱹᱣᱨᱟᱹ᱾
ᱥᱟᱹᱨᱤᱜᱮ, ᱱᱤᱛᱦᱚᱸ ᱵᱟᱝᱞᱮ ᱮᱢ ᱫᱟᱲᱮᱣᱟᱠᱟᱫᱯᱮᱭᱟ
ᱟᱯᱮᱭᱟᱜ ᱡᱤᱣᱤ ᱟᱞᱟᱭ ᱨᱮᱭᱟᱜ ᱢᱟᱹᱱ
ᱟᱯᱮᱭᱟᱜ ᱫᱤᱥᱳᱢ ᱵᱟᱧᱪᱟᱣ ᱨᱮᱭᱟᱜ ᱠᱩᱲᱟᱹᱭ᱿

ᱚᱱᱟᱛᱮ ᱛᱮᱦᱮᱧ ᱢᱚᱱᱮ ᱦᱳᱭᱳᱜᱠᱟᱱᱟ
ᱥᱤᱧ ᱪᱟᱱᱫᱳᱭᱟᱜ ᱟᱨᱥᱟᱞᱛᱮ
ᱢᱟᱨᱥᱟᱞᱚᱜᱠᱟᱱ ᱡᱤᱣᱤ ᱡᱟᱹᱛᱤ
ᱵᱟᱝᱞᱮ ᱫᱟᱲᱮᱭᱟᱜ ᱠᱟᱱᱟ
ᱫᱷᱟᱹᱨᱛᱤ ᱨᱮᱭᱟᱜ ᱢᱟᱹᱱ ᱢᱟᱹᱪᱤᱨᱮ ᱛᱷᱟᱯᱚᱱ
ᱠᱷᱟᱹᱞᱤ ᱟᱞᱮ ᱮᱱᱮᱡ ᱠᱟᱱᱟ
ᱨᱟᱡᱽᱵᱟᱠᱷᱳᱞ ᱨᱮᱱ ᱱᱟᱪᱚᱱᱤᱭᱟᱹ ᱥᱟᱡᱟᱣ ᱠᱟᱛᱮᱫ
ᱠᱷᱟᱹᱞᱤ ᱟᱞᱮ ᱵᱷᱤᱲᱠᱟᱹᱣᱼᱚᱜ ᱠᱟᱱᱟ
ᱨᱟᱡᱽᱵᱟᱭᱟᱨ ᱠᱚᱣᱟᱜ ᱥᱤᱭᱟᱹᱡᱟᱹᱨᱤ ᱵᱷᱤᱞᱠᱤᱛᱮ᱿

ᱨᱟᱡᱽᱵᱟᱭᱟᱨ ᱠᱚᱣᱟᱜ ᱟᱹᱭᱩᱨᱛᱮ
ᱛᱟᱲᱟᱢᱞᱮᱫᱼᱟᱞᱮ ᱵᱩᱞᱟᱹᱣᱟᱱᱟ ᱪᱤᱨ ᱥᱟᱵ ᱠᱟᱛᱮᱫ
ᱵᱤᱱ ᱚᱡᱮᱛᱮ ᱵᱤᱱ ᱠᱟᱹᱭᱛᱮ
ᱟᱞᱟᱭ ᱠᱮᱫᱼᱟᱞᱮ ᱡᱤᱣᱤ
ᱵᱟᱨᱤᱠᱩᱞᱨᱮ ᱠᱷᱟᱹᱞᱤ ᱠᱷᱟᱹᱞᱤ᱿

ᱟᱯᱬᱮᱭᱟᱜ ᱵᱟᱧᱪᱟᱜ ᱟᱹᱭᱫᱟᱹᱨ ᱠᱚᱠᱚᱭ ᱵᱮᱲᱟ
ᱫᱟᱞ ᱦᱚᱪᱚᱜ ᱠᱟᱱᱟᱞᱮ ᱥᱤᱯᱟᱹᱦᱤ ᱞᱟᱹᱴᱷᱤᱛᱮ᱾
ᱡᱟᱹᱛᱤᱨᱮᱱ ᱵᱤᱥᱤᱡᱟᱝ, ᱫᱤᱥᱳᱢᱨᱮᱱ ᱞᱟᱹᱣᱲᱤᱭᱟᱹ
ᱢᱟᱹᱱᱢᱤ ᱞᱮᱠᱟᱱ ᱢᱟᱹᱱᱢᱤ ᱵᱮᱜᱱᱟᱣᱤᱭᱟᱹ
ᱫᱷᱟᱹᱨᱛᱤ ᱨᱮᱱ ᱥᱟᱹᱨᱤ ᱫᱩᱞᱟᱹᱲᱤᱭᱟᱹ
ᱟᱞᱮᱜᱮ ᱢᱟᱹᱱᱟᱱ ᱢᱟᱪᱮᱫ,
ᱮᱱᱦᱚᱸ ᱩᱪᱤᱛ ᱠᱩᱲᱟᱹᱭ ᱠᱚᱠᱚᱭ ᱵᱮᱲᱟ
ᱠᱳᱞᱠᱟᱛᱟ ᱨᱟᱸᱪᱤ ᱨᱟᱡᱽ ᱰᱟᱦᱟᱨᱨᱮ
ᱥᱤᱯᱟᱹᱦᱤ ᱞᱟᱹᱴᱷᱤᱛᱮ ᱵᱚᱦᱚᱜᱛᱟᱞᱮ ᱯᱷᱚᱨᱚᱜ ᱠᱟᱱᱟ
ᱢᱟᱭᱟᱢᱛᱟᱞᱮ ᱥᱤᱨᱚᱥᱚᱨᱚ ᱡᱚᱨᱚᱜ ᱠᱟᱱᱟ᱾
ᱟᱨᱦᱚᱸ ᱨᱟᱡᱟ ᱨᱟᱹᱱᱤ ᱵᱟᱪᱷᱱᱟᱣ ᱵᱮᱲᱟ
ᱵᱟᱹᱲᱤᱡᱟᱜ ᱨᱚᱲ ᱫᱟᱨᱟᱢ ᱞᱮᱠᱷᱟᱱ
ᱤᱬᱤᱡᱚᱜᱠᱟᱱ ᱛᱟᱞᱮᱭᱟ ᱡᱤᱣᱤᱵᱟᱹᱛᱤ᱿

ᱵᱤᱨ ᱵᱩᱨᱩ ᱟᱛᱳ ᱛᱟᱞᱟ
ᱚᱲᱟᱜ ᱠᱚᱪᱟ ᱠᱷᱩᱸᱫᱽᱲᱤ ᱦᱟᱹᱦᱤᱡ
ᱦᱟᱯᱟᱴᱤᱧᱮᱫᱼᱟᱞᱮ ᱢᱟᱭᱟᱢᱦᱚᱸ ᱢᱟᱭᱟᱢ ᱾
ᱚᱞ ᱯᱟᱲᱦᱟᱣ ᱠᱟᱛᱮᱫ ᱨᱮᱦᱚᱸ
ᱵᱟᱹᱱᱩᱜᱞᱮᱠᱟ ᱦᱩᱫᱤᱥ ᱜᱮᱭᱟᱱ
ᱯᱮᱲᱟ ᱯᱮᱲᱟᱞᱮ ᱛᱳᱯᱳᱫ ᱛᱟᱯᱟᱢ᱾
ᱵᱩᱡᱷᱟᱹᱣ ᱠᱟᱛᱮᱫᱦᱚᱸ ᱵᱟᱝᱞᱮ ᱵᱩᱡᱽ
ᱨᱟᱡᱟ ᱨᱟᱹᱱᱤᱠᱳ ᱫᱚ ᱥᱩᱞᱩᱠᱨᱮᱜᱮ ᱥᱟᱱᱟᱢ
ᱪᱮᱫᱟᱜᱥᱮ, ᱯᱟᱹᱦᱤᱞ ᱠᱷᱚᱱᱜᱮ ᱳᱱᱠᱳ ᱫᱚ ᱥᱮᱭᱟᱱ᱿

ᱚᱱᱟᱛᱮ ᱛᱮᱦᱮᱧ ᱫᱚᱦᱲᱟ ᱟᱨᱦᱚᱸ
ᱟᱛᱟᱝᱮᱫᱼᱟᱞᱮ ᱠᱤᱨᱤᱭᱟᱹ
ᱢᱮᱲᱦᱮᱫ ᱞᱮᱠᱟᱱ ᱟᱹᱱ ᱟᱹᱨᱤ
ᱟᱞᱚ ᱵᱟᱲᱮ ᱞᱟᱹᱵᱤᱫᱚᱜᱢᱟ,
ᱨᱤᱞᱟᱹᱢᱟᱞᱟ ᱥᱟᱶᱛᱟ ᱵᱟᱠᱷᱳᱞ
ᱟᱞᱚ ᱵᱟᱲᱮ ᱫᱷᱟᱹᱥᱩᱲᱚᱜᱢᱟ
ᱟᱞᱚ ᱵᱟᱲᱮ ᱞᱟᱹᱱᱫᱩᱲᱚᱜᱢᱟ᱾
ᱳᱨᱳᱢ ᱠᱚᱣᱟᱞᱮ ᱥᱟᱹᱨᱤ ᱥᱟᱹᱨᱤᱱ ᱵᱟᱹᱭᱨᱤ
ᱰᱤᱜᱽᱞᱟᱹᱣ ᱠᱚᱣᱟᱞᱮ ᱵᱟᱦᱨᱮ ᱫᱤᱥᱳᱢ ᱦᱚᱲ᱾
ᱟᱹᱫᱟᱹᱭᱟᱞᱮ ᱦᱟᱯᱲᱟᱢ ᱠᱚᱣᱟᱜ ᱛᱮᱭᱟᱨ
ᱡᱟᱱᱟᱢ ᱫᱤᱥᱳᱢ ᱨᱮᱭᱟᱜ ᱟᱹᱭᱫᱟᱹᱨ᱾
ᱠᱟᱹᱯᱤ ᱛᱟᱨᱣᱟᱲᱮ ᱞᱟᱥᱮᱨ ᱠᱟᱛᱮᱫ
ᱟᱜ ᱩᱯᱟᱹᱲᱤ ᱡᱚᱛᱨᱟᱣ ᱠᱟᱛᱮᱫ;
ᱨᱚᱰᱚᱡ ᱨᱟᱡᱽ ᱱᱤᱯᱩᱡᱽ ᱞᱟᱹᱜᱤᱫ
ᱛᱮᱨᱟᱝᱼᱟᱞᱮ ᱥᱮᱸᱜᱮᱞ ᱥᱟᱨ
ᱵᱩᱡᱷᱟᱹᱣ ᱦᱚᱪᱚᱠᱚᱣᱟᱞᱮ
ᱥᱤᱧ ᱥᱤᱸᱜᱟᱹᱬ ᱪᱟᱢᱟᱞ ᱪᱩᱢᱩᱞ
ᱮᱛᱚᱦᱚᱵᱟᱞᱮ ᱡᱟᱱᱟᱢ ᱫᱤᱥᱳᱢ ᱟᱨ
ᱫᱷᱟᱹᱨᱛᱤ ᱵᱟᱧᱪᱟᱣ ᱞᱟᱹᱜᱤᱫ ᱫᱚᱥᱟᱨ ᱦᱩᱞ᱿

(21) ᱠᱟᱬᱟ ᱢᱟᱹᱱᱢᱤ

ᱟᱞᱚᱯᱮ ᱦᱚᱦᱚᱭ ᱛᱟᱭᱚᱢ ᱥᱮᱦᱮᱫ ᱠᱷᱚᱱ
ᱤᱧᱟᱹᱜ ᱞᱩᱛᱩᱨ ᱵᱟᱹᱱᱩᱜ
ᱟᱞᱚᱯᱮ ᱜᱟᱹᱫᱩᱡᱽ ᱥᱟᱢᱟᱝ ᱥᱮᱦᱮᱫ ᱠᱷᱚᱱ
ᱤᱧᱟᱹᱜ ᱢᱮᱫ ᱵᱟᱹᱱᱩᱜ᱿
ᱤᱧᱟᱹᱜ ᱡᱟᱸᱦᱟ ᱢᱮᱫ ᱞᱩᱛᱩᱨ
ᱟᱯᱮᱯᱮ ᱧᱮᱞ ᱧᱟᱢᱮᱫ ᱛᱤᱧᱟᱹ
ᱚᱱᱟᱛᱮᱫᱚ ᱱᱮᱵᱮᱛᱟᱨ ᱵᱟᱹᱧ ᱟᱧᱡᱚᱢ
ᱟᱨ ᱵᱟᱹᱧ ᱧᱮᱧᱮᱞ᱾
ᱥᱟᱹᱨᱤᱭᱟᱱᱟᱜ ᱢᱮᱫ ᱞᱩᱛᱩᱨ ᱢᱟᱛᱷᱚ
ᱵᱮᱹᱢᱟᱹᱱᱢᱤᱠᱳ ᱵᱟᱫᱟᱞ ᱟᱠᱟᱫᱛᱤᱧᱟᱹ᱾

ᱢᱤᱫ ᱰᱚᱸᱰᱮᱠ ᱩᱭᱦᱟᱹᱨ ᱞᱮᱜᱟᱭᱯᱮᱼ
ᱪᱮᱫᱟᱜ ᱵᱟᱝᱯᱮ ᱡᱮᱨᱮᱫ ᱮᱫᱟ
ᱧᱩᱬᱩ ᱧᱩᱬᱩ ᱵᱟᱠᱷᱳᱞᱨᱮ ᱢᱟᱨᱥᱟᱞ ᱵᱟᱹᱛᱤ
ᱚᱱᱟᱛᱮᱜᱮ ᱵᱟᱹᱧ ᱧᱟᱯᱟᱢ ᱟᱯᱮ ᱥᱟᱶᱛᱮ
ᱡᱟᱦᱮᱨ ᱟᱭᱳ ᱤᱧᱜᱮ ᱞᱟᱹᱫᱩᱢ ᱦᱟᱹᱛᱤ᱾
ᱟᱯᱮᱭᱟᱜ ᱫᱩᱠ ᱪᱤᱠᱟᱹᱛᱤᱧ ᱵᱩᱡᱷᱟᱹᱣᱼᱟ
ᱪᱟᱵᱟᱣᱟᱠᱟᱱ ᱛᱤᱧᱟᱹ ᱥᱟᱱᱟᱢ ᱫᱟᱭᱟ ᱫᱩᱞᱟᱹᱲ
ᱵᱤᱨ ᱯᱟᱠᱟᱲᱮᱨᱮ ᱞᱳᱥᱳᱯᱳᱸᱰᱳ ᱟᱠᱟᱫᱟᱯᱮ
ᱥᱟᱱᱟᱢ ᱥᱟᱹᱨᱤ ᱫᱩᱞᱟᱹᱲ᱾

ᱟᱯᱮᱭᱟᱜ ᱠᱟᱛᱷᱟ ᱪᱤᱠᱟᱹᱛᱤᱧ ᱟᱧᱡᱚᱢ
ᱠᱟᱱ ᱨᱮᱦᱩᱧ ᱢᱟᱨᱟᱝ ᱵᱩᱨᱩ ᱯᱩᱬ ᱥᱟᱫᱚᱢ
ᱠᱷᱟᱹᱞᱤ ᱠᱷᱟᱹᱞᱤ ᱟᱞᱚᱯᱮ ᱦᱚᱢᱚᱨ ᱠᱷᱩᱱᱩᱜ ᱠᱷᱩᱱᱩᱜ
ᱟᱯᱮᱭᱟᱜ ᱵᱟᱝᱠᱩᱥᱤ ᱠᱟᱹᱢᱤ ᱠᱷᱟᱹᱛᱤᱨ
ᱟᱯᱮᱴᱷᱮᱱ ᱤᱧᱟᱹᱜ ᱜᱚᱨᱚᱡᱽ ᱟᱨ ᱵᱟᱹᱱᱩᱜ᱿

ᱩᱭᱦᱟᱹᱨᱯᱮᱥᱮ ᱥᱮᱫᱟᱭ ᱚᱠᱛᱚ
ᱡᱟᱦᱮᱨ ᱛᱷᱟᱱᱨᱮ ᱦᱚᱲᱠᱳ ᱡᱚᱛᱚ
ᱨᱚᱯᱚᱲ ᱞᱮᱱᱟᱠᱳ ᱤᱧ ᱥᱟᱶᱛᱮ
ᱫᱩᱠ ᱜᱟᱹᱞᱤᱨᱮᱠᱳ ᱡᱷᱟᱹᱞᱤᱞᱮᱱᱛᱮ᱿

ᱧᱮᱞᱯᱮᱥᱮ ᱢᱟ ᱱᱮᱵᱮᱛᱟᱨ ᱩᱠᱩᱨ
ᱠᱚᱭᱚᱜ ᱟᱹᱪᱩᱨᱟᱠᱳ ᱢᱟᱴᱟᱨ ᱢᱩᱴᱩᱨ
ᱢᱚᱦᱰᱟᱜ ᱠᱟᱱᱟᱠᱳ ᱮᱴᱟᱜ ᱚᱲᱟᱜ
ᱥᱳᱵᱷᱟᱭᱮᱫᱟᱠᱳ ᱵᱳᱝᱜᱟ ᱛᱷᱟᱱ ᱮᱴᱟᱜ ᱦᱚᱲᱟᱜ᱿
ᱢᱮᱱᱟᱜᱠᱳ ᱨᱮᱦᱚᱸ ᱥᱟᱹᱨᱤ ᱯᱟᱹᱛᱭᱟᱹᱣᱼᱟᱱ
ᱵᱟᱝᱠᱳ ᱨᱚᱯᱚᱲ ᱥᱟᱢᱟᱝ ᱫᱟᱯᱨᱟᱢ
ᱥᱩᱥᱟᱹᱨ ᱨᱩᱭᱟᱹᱲ ᱠᱟᱛᱷᱟᱠᱳᱜᱮ
ᱟᱛᱳ ᱵᱟᱦᱨᱮ ᱨᱚᱯᱚᱲᱟᱠᱳ ᱫᱟᱢᱟᱱ ᱫᱟᱢᱟᱱ᱿

ᱚᱠᱛᱚ ᱱᱚᱜᱼᱚᱭ ᱥᱮᱴᱮᱨᱟᱠᱟᱱ
ᱩᱭᱦᱟᱹᱨ ᱠᱟᱛᱮᱫ ᱵᱩᱡᱷᱟᱹᱣ ᱨᱮᱭᱟᱜ
ᱥᱟᱢᱟᱱᱚᱢ ᱥᱟᱶᱛᱟ ᱮᱯᱲᱮ ᱠᱟᱛᱮᱫ
ᱠᱟᱬᱟ ᱢᱟᱹᱱᱢᱤᱯᱮ ᱥᱟᱡᱟᱣᱟᱠᱟᱱ ᱪᱮᱫᱟᱜ??
ᱢᱮᱱᱟᱜ ᱛᱟᱯᱮᱭᱟᱛᱚ ᱫᱷᱟᱹᱨᱛᱤ ᱨᱮᱭᱟᱜ
ᱥᱟᱱᱟᱢ ᱠᱷᱚᱱ ᱥᱚᱨᱮᱥᱟᱱᱟᱜ ᱵᱳᱝᱜᱟ ᱛᱷᱟᱱ
ᱚᱸᱰᱮᱜᱮᱛᱚ ᱥᱮᱫᱟᱭ ᱤᱧᱤᱧ ᱧᱟᱯᱟᱢᱟᱠᱟᱱ᱿
ᱫᱷᱤᱨᱤ ᱫᱚᱞᱟᱱᱛᱮ ᱥᱟᱡᱟᱣ ᱵᱳᱝᱜᱟ ᱚᱲᱟᱜ
ᱵᱟᱹᱧ ᱢᱟᱱᱟᱯᱮᱭᱟ ᱧᱮᱧᱮᱞ ᱞᱟᱹᱜᱤᱫ ᱥᱮᱱᱚᱜ
ᱩᱭᱦᱟᱹᱨᱯᱮᱥᱮ ᱮᱥᱠᱟᱨᱨᱮ; ᱥᱮᱱᱚᱜᱼᱟᱯᱮ ᱪᱮᱫᱟᱜ ᱥᱟᱶᱛᱟ ᱠᱷᱚᱱ ᱫᱩᱠᱜᱮ ᱡᱩᱫᱤ ᱵᱟᱝ ᱚᱪᱚᱜᱚᱜ᱿

ᱵᱩᱡᱷᱟᱹᱣ ᱯᱮᱥᱮ ᱟᱞᱜᱟᱛᱮᱜᱮ
ᱧᱮᱞᱡᱚᱝ ᱞᱮᱠᱟᱱ ᱵᱳᱝᱜᱟ ᱛᱷᱟᱱ ᱨᱮᱭᱟᱜ ᱠᱚᱨᱚᱢ
ᱵᱳᱝᱜᱟ ᱵᱟᱦᱱᱟᱛᱮ ᱵᱚᱛᱚᱨ ᱦᱚᱪᱚᱠᱟᱛᱮᱫ
ᱳᱱᱠᱳᱭᱟᱜ ᱫᱚ ᱠᱟᱹᱣᱰᱤ ᱨᱚᱰᱚᱡᱜᱮ ᱫᱷᱚᱨᱚᱢ᱿

ᱚᱱᱟᱛᱤᱧ ᱢᱮᱢᱮᱱ ᱥᱚᱱᱛᱚᱨ ᱵᱟᱠᱷᱮᱬ
ᱟᱧᱡᱚᱢᱯᱮ, ᱵᱩᱡᱷᱟᱹᱣᱯᱮ ᱥᱩᱥᱟᱹᱨ ᱠᱟᱛᱷᱟ ᱥᱟᱱᱟᱢ
ᱨᱤᱠᱟᱹᱭᱮᱫᱟᱠᱳ ᱠᱳᱢᱲᱳ ᱡᱟᱹᱛᱤ ᱫᱚ
ᱳᱱᱠᱳ ᱥᱟᱶᱛᱮ ᱟᱹᱭᱩᱨ ᱞᱟᱹᱜᱤᱫ ᱦᱟᱸᱜᱠᱷᱟᱱ᱿
ᱢᱚᱬᱮᱠᱳ ᱛᱩᱨᱩᱭᱠᱳ ᱴᱷᱮᱱᱦᱚᱸ
ᱵᱳᱝᱜᱟ ᱵᱷᱩᱛᱠᱳ ᱳᱯᱮᱹᱞ ᱠᱟᱛᱮᱫ
ᱮᱛᱚᱦᱚᱵ ᱟᱠᱟᱫᱟᱠᱳ ᱵᱮᱱᱟᱣ ᱵᱳᱝᱜᱟ ᱚᱲᱟᱜ
ᱥᱚᱨᱠᱟᱨ ᱜᱚᱲᱚ ᱥᱚᱯᱚᱦᱚᱫ ᱧᱟᱢ ᱠᱟᱛᱮᱫ᱿
ᱳᱱᱠᱳ ᱫᱚ ᱥᱟᱥᱚᱱᱤᱭᱟᱹ ᱫᱷᱚᱨᱚᱢ ᱟᱹᱨᱤᱛᱮ
ᱵᱚᱛᱚᱨ ᱦᱚᱪᱚ ᱠᱟᱛᱮᱫ ᱵᱳᱢᱟ ᱵᱟᱹᱱᱫᱩᱠᱛᱮ
ᱟᱞᱚᱯᱮ ᱢᱚᱦᱰᱟᱜᱼᱟ ᱟᱞᱚᱯᱮ ᱜᱩᱭᱩᱨᱚᱜᱼᱟ
ᱳᱱᱠᱳᱭᱟᱜ ᱫᱷᱚᱢᱚᱠ ᱟᱨ ᱞᱤᱞᱠᱟᱹᱨᱛᱮ᱿
ᱵᱟᱝᱠᱷᱟᱱ ᱥᱟᱹᱨᱤᱜᱮᱯᱮ ᱦᱤᱲᱤᱧᱟ
ᱩᱭᱦᱟᱹᱨᱛᱮᱦᱚᱸ ᱵᱟᱝᱯᱮ ᱵᱩᱡᱷᱟᱹᱣ ᱧᱟᱢᱟ
ᱢᱮᱫ ᱛᱟᱦᱮᱸᱱ ᱛᱩᱞᱩᱡ ᱥᱟᱡᱟᱣ ᱯᱮᱭᱟᱠᱳ ᱠᱟᱬᱟ ᱟᱨ
ᱟᱬᱜᱚᱱ ᱞᱟᱹᱜᱤᱫ ᱤᱧ ᱫᱚ ᱛᱚᱲᱮ ᱥᱩᱛᱟᱹᱢ ᱵᱟᱹᱧ ᱧᱟᱢᱟ᱿

(22) ᱥᱤᱨᱡᱚᱱ

(᱑)
ᱥᱤᱨᱡᱚᱱ ᱯᱟᱲᱦᱟᱣᱟᱠᱟᱫᱼᱟᱭ ᱜᱮᱞᱵᱟᱨ ᱪᱟᱱᱟᱪ
ᱢᱮᱱᱠᱷᱟᱱ ᱛᱮᱦᱮᱧ ᱩᱱᱤ ᱢᱮᱱᱟᱭᱟ ᱮᱠᱷᱮᱱᱟᱜᱜᱮ᱾
ᱩᱱᱤᱦᱚᱸ ᱢᱮᱱᱟᱜ ᱟᱠᱫᱮᱭᱟ ᱡᱟᱸᱦᱟᱞᱮᱠᱟᱱᱟᱜᱜᱮ
ᱢᱤᱫᱴᱟᱝ ᱪᱟᱹᱠᱨᱤ ᱟᱥᱨᱮ᱾
ᱵᱟᱰᱟᱭ ᱢᱮᱱᱟᱜ ᱛᱟᱭᱟ; ᱯᱟᱲᱦᱟᱣᱞᱮᱱᱠᱷᱟᱱᱜᱮ
ᱪᱟᱹᱠᱨᱤ ᱫᱚ ᱵᱟᱝ ᱧᱟᱢᱚᱜᱼᱟ᱾
ᱯᱟᱲᱦᱟᱣ ᱫᱚ ᱞᱟᱹᱠᱛᱤᱠᱟᱱᱟ ᱱᱟᱯᱟᱭ ᱢᱚᱱᱮᱭᱟᱱ ᱢᱟᱹᱱᱢᱤ ᱛᱮᱭᱟᱨᱚᱜ ᱞᱟᱹᱜᱤᱫ᱾
ᱮᱱᱛᱮᱨᱮᱦᱚᱸ ᱥᱤᱨᱡᱚᱱ ᱞᱟᱹᱜᱤᱫ ᱪᱟᱹᱠᱨᱤ ᱫᱚ ᱞᱟᱹᱠᱛᱤᱜᱮ
ᱪᱮᱫᱟᱜᱥᱮ, ᱠᱟᱹᱢᱤ ᱠᱟᱹᱥᱱᱤ ᱮᱠᱟᱞ ᱵᱟᱝᱼᱮ ᱚᱲᱵᱚᱝᱼᱟ
ᱦᱟᱨᱟᱣᱟᱠᱟᱱᱟᱭ ᱥᱩᱠᱨᱮ
ᱵᱟᱡᱟᱨ ᱨᱮᱭᱟᱜ ᱵᱤᱨᱫᱟᱹᱜᱟᱲᱷᱨᱮ᱾
ᱮᱱᱛᱮᱠᱷᱟᱱ ᱪᱟᱹᱠᱨᱤ ᱚᱠᱚᱭᱮ ᱮᱢᱟᱭᱟ?
ᱚᱠᱟᱨᱮᱭ ᱧᱟᱢᱟ??

ᱯᱳᱹᱭᱞᱳᱛᱮ ᱵᱟᱵᱟᱭ ᱢᱮᱛᱟᱣᱟᱫᱮᱭᱟ
ᱵᱟᱵᱟᱫᱚ ᱥᱤᱨᱡᱚᱱ ᱟᱡ ᱢᱟᱢᱟᱭ ᱢᱮᱛᱟᱣᱟᱫᱮᱭᱟ
ᱢᱟᱢᱟᱫᱚ ᱥᱤᱨᱡᱚᱱ ᱟᱡ ᱠᱟᱠᱟᱭ ᱢᱮᱛᱟᱣᱟᱫᱮᱭᱟ
ᱠᱟᱠᱟᱫᱚ ᱥᱤᱨᱡᱚᱱᱼᱮ ᱢᱮᱛᱟᱭᱠᱟᱱᱟ,
“ᱵᱟᱹᱵᱩ, ᱢᱚᱱᱮ ᱩᱨᱤᱡ ᱠᱟᱛᱮᱫ ᱟᱨᱦᱚᱸ ᱯᱟᱲᱦᱟᱣᱢᱮ,
ᱪᱟᱹᱠᱨᱤ ᱨᱮᱭᱟᱜ ᱵᱤᱱᱤᱰᱠᱳ ᱮᱢᱢᱮ᱾”

ᱢᱚᱱᱮ ᱨᱮᱭᱟᱜ ᱰᱷᱤᱝᱠᱩ ᱦᱤᱞᱟᱹᱜ ᱠᱩᱠᱞᱤ ᱛᱮᱞᱟ
ᱧᱟᱢ ᱠᱮᱫᱼᱟᱭ ᱛᱮᱦᱮᱧ ᱦᱟᱲᱦᱟᱫ ᱢᱮᱥᱟ ᱟᱥ ᱢᱚᱱᱮᱨᱮ᱿

ᱡᱩᱭᱟᱹᱱ ᱠᱚᱲᱟ ᱥᱤᱨᱡᱚᱱ
ᱧᱮᱞᱛᱮ ᱦᱮᱱᱫᱮ ᱩᱥᱩᱞ
ᱦᱚᱲᱢᱚ ᱜᱚᱲᱦᱚᱱ ᱜᱩᱞᱟᱹᱴ ᱢᱮᱥᱟ ᱠᱮᱴᱮᱡ,
ᱦᱩᱰᱤᱧ ᱠᱷᱚᱱᱜᱮ ᱛᱷᱤᱭᱟᱹ ᱵᱚᱞ ᱠᱷᱮᱹᱞᱳᱰᱤᱭᱟᱹ
ᱚᱱᱟᱛᱮ ᱫᱟᱹᱲ ᱫᱚᱱᱨᱮ ᱫᱚ ᱯᱟᱹᱨᱩᱠᱷᱤᱭᱟᱹ᱾
ᱯᱩᱞᱤᱥ ᱪᱟᱹᱠᱨᱤ ᱯᱟᱧᱡᱟᱭᱮᱫ ᱚᱠᱛᱚ
ᱫᱟᱹᱲ ᱦᱚᱪᱚᱠᱮᱫᱮᱭᱟᱠᱳ
ᱚᱠᱛᱚ ᱩᱱᱩᱫᱩᱜ ᱢᱮᱹᱥᱤᱱ ᱵᱮᱫᱷᱟᱣ ᱠᱟᱛᱮᱫ᱾
ᱫᱟᱹᱲ ᱟᱫᱟᱭ ᱪᱤᱲᱟᱹᱢᱯᱟᱴ
ᱫᱟᱹᱲ ᱯᱟᱨᱚᱢᱠᱮᱫ ᱠᱚᱣᱟᱭ ᱟᱡ ᱠᱷᱚᱱ ᱢᱟᱲᱟᱝᱛᱮᱱᱠᱳ
“ᱛᱟᱭᱱᱚᱢ ᱟᱠᱟᱱᱟᱢ”
ᱼᱫᱟᱹᱲ ᱯᱩᱨᱟᱹᱣ ᱠᱟᱛᱮᱫ ᱢᱮᱛᱟᱫᱮᱭᱟᱠᱳ᱾

ᱠᱤᱨᱤᱧᱟᱭ ᱯᱷᱚᱨᱢ, ᱯᱮᱨᱮᱡᱟᱭ, ᱵᱷᱮᱡᱟᱭᱟᱭ᱾
ᱢᱮᱱᱠᱷᱟᱱ ᱪᱟᱹᱠᱨᱤ ᱫᱚ…ᱹᱹᱹ᱾

ᱵᱤᱱᱤᱰᱨᱮᱭ ᱯᱟᱥ ᱟᱠᱟᱫᱼᱟ
ᱨᱮᱹᱞ ᱨᱮᱭᱟᱜ ᱯᱩᱱ ᱜᱟᱸᱛᱟᱠ ᱨᱮᱭᱟᱜ ᱪᱟᱹᱠᱨᱤ ᱞᱟᱹᱜᱤᱫ
ᱫᱮᱞᱟᱣᱟᱫᱮᱭᱟᱠᱳ ᱥᱟᱢᱟᱝ ᱫᱟᱯᱨᱟᱢ
ᱠᱩᱠᱞᱤ ᱨᱚᱯᱚᱲ ᱞᱟᱹᱜᱤᱫ᱾
ᱡᱟᱱᱟᱢᱤᱭᱟᱹᱠᱤᱱ ᱦᱚᱴᱚᱜ ᱰᱚᱵᱚᱜ
ᱡᱚᱦᱟᱨ ᱦᱚᱴᱚ ᱠᱟᱛᱮᱫ
ᱥᱮᱴᱮᱨᱮᱱᱟᱭ ᱱᱮᱰᱟ ᱴᱷᱟᱶᱨᱮ
ᱟᱭᱢᱟ ᱟᱥ ᱠᱟᱛᱮᱫ ᱠᱳᱞᱠᱟᱛᱟ ᱵᱟᱡᱟᱨᱨᱮ ᱾
ᱢᱮᱛᱟᱫᱮᱭᱟᱠᱳ ᱩᱱᱨᱮ
“ᱢᱚᱬᱮ ᱞᱟᱠᱷ ᱴᱟᱠᱟ ᱮᱢᱢᱮ
ᱟᱨ ᱪᱟᱹᱠᱨᱤᱨᱮ ᱵᱟᱦᱟᱞᱚᱜᱢᱮ᱾”

ᱫᱩᱲᱩᱵ ᱮᱱᱟᱭ ᱩᱱᱩᱭᱦᱟᱹᱨᱨᱮ
ᱮᱱᱛᱮᱠᱷᱟᱱ ᱪᱟᱹᱠᱨᱤ ᱫᱚ…ᱹᱹ
ᱵᱟᱹᱱᱤᱡ ᱵᱮᱯᱟᱨᱚᱜ ᱠᱟᱱᱟ ᱠᱟᱹᱣᱰᱤ ᱵᱟᱫᱟᱞᱛᱮ᱾

(᱒)
ᱥᱤᱨᱡᱚᱱ ᱥᱟᱱᱟᱢᱠᱳ ᱞᱟᱹᱜᱤᱫ
ᱵᱮᱣᱨᱟ ᱚᱞᱚᱜᱼᱮ ᱫᱩᱲᱩᱵ ᱮᱱᱟ
ᱢᱮᱱᱠᱷᱟᱱ ᱚᱱᱟᱦᱚᱸ ᱵᱟᱝ ᱯᱩᱨᱟᱹᱣᱞᱮᱱᱟ᱾
ᱯᱩᱬ ᱥᱟᱠᱟᱢᱨᱮ ᱚᱞ ᱠᱟᱛᱷᱟ
ᱥᱟᱱᱟᱢ ᱢᱮᱫᱼᱫᱟᱜᱛᱮ ᱞᱚᱦᱚᱫ ᱮᱱᱟ᱾
ᱢᱚᱱᱮ ᱟᱫᱚᱭ ᱜᱚᱴᱟ ᱠᱮᱫᱼᱟ ᱟᱨ ᱵᱟᱝᱼᱮ ᱚᱞᱼᱟ᱾
ᱚᱞ ᱛᱟᱦᱮᱸᱱᱟ ᱦᱟᱸᱜᱠᱷᱟᱱ ᱵᱟᱜᱟᱱ ᱨᱮᱭᱟᱜ
ᱚᱱᱟ ᱥᱟᱠᱟᱢ ᱪᱮᱛᱟᱱᱨᱮ
ᱚᱱᱟ ᱜᱷᱟᱸᱥ ᱪᱮᱛᱟᱱᱨᱮ
ᱚᱱᱟ ᱵᱟᱦᱟ ᱪᱮᱛᱟᱱᱨᱮ
ᱚᱱᱟ ᱫᱷᱤᱨᱤ ᱪᱟᱹᱴᱟᱹᱱᱤᱨᱮ᱾

ᱟᱨ ᱵᱟᱝ, ᱱᱤᱛᱳᱜ ᱪᱟᱞᱟᱜ ᱦᱳᱭᱳᱜ ᱛᱟᱭᱟ
ᱡᱟᱸᱦᱟ ᱞᱮᱠᱟᱱᱟᱜᱜᱮ ᱢᱤᱫᱴᱟᱝ ᱠᱟᱹᱢᱤ ᱞᱟᱹᱜᱤᱫ
ᱟᱯᱬᱮᱭᱟᱜ ᱟᱛᱳ ᱫᱤᱥᱚᱢ ᱵᱟᱹᱜᱤ ᱠᱟᱛᱮᱫ
ᱥᱟᱺᱜᱤᱧ ᱠᱷᱚᱱ ᱟᱹᱰᱤ ᱥᱟᱺᱜᱤᱧ᱾

ᱨᱟᱦᱟᱣᱮᱱ ᱛᱟᱭᱟ ᱡᱟᱝᱜᱟ ᱛᱟᱲᱟᱢ ᱛᱟᱲᱟᱢᱛᱮ
ᱵᱷᱟᱹᱵᱤᱭᱮᱫᱼᱟᱭ ᱫᱟᱱᱟᱝᱠᱷᱚᱱ ᱡᱟᱸᱦᱟᱭᱜᱮ
ᱡᱟᱹᱱᱤᱡ ᱠᱷᱟᱱ ᱵᱟᱝᱠᱳ ᱪᱟᱪᱳ ᱦᱚᱪᱚᱭᱟᱭ ᱠᱟᱱᱟ ᱯᱷᱟᱨᱪᱟ ᱰᱟᱦᱟᱨᱛᱮ᱾
ᱛᱮᱸᱜᱳ ᱛᱷᱤᱨᱮᱱᱟᱭ ᱫᱟᱜ ᱫᱚᱨᱭᱟ ᱟᱲᱮᱨᱮ
ᱧᱮᱞᱮᱫᱟᱭ ᱥᱟᱺᱜᱤᱧ ᱥᱮᱨᱢᱟ ᱞᱟᱯᱷᱟᱝ ᱦᱟᱹᱵᱤᱡ
ᱵᱟᱝ ᱧᱮᱞᱚᱜ ᱢᱩᱪᱟᱹᱫ ᱥᱟᱹᱢᱩᱫᱽ ᱟᱨ ᱫᱟᱜ᱾
ᱦᱮᱞᱠᱟᱣ ᱦᱤᱡᱩᱜ ᱠᱟᱱᱟ ᱟᱡ ᱥᱳᱨᱛᱮ
ᱩᱥᱩᱞ ᱩᱥᱩᱞ ᱰᱷᱮᱹᱣ᱾
ᱵᱟᱹᱭ ᱵᱟᱹᱭᱛᱮ ᱯᱚᱪᱷᱤᱢ ᱱᱟᱠᱷᱟᱨᱮ
ᱦᱟᱺᱥᱩᱨᱮᱱᱟᱭ ᱥᱤᱧ ᱵᱳᱝᱜᱟ᱾
ᱡᱩᱨᱤᱡᱚᱛᱟᱠᱳ ᱥᱮᱴᱮᱨᱞᱮᱱ
ᱜᱟᱹᱨᱩᱢ ᱜᱟᱹᱨᱩᱢ ᱥᱟᱹᱢᱩᱫᱽ ᱧᱮᱧᱮᱞ
ᱥᱟᱱᱟᱢᱠᱳ ᱨᱩᱭᱟᱹᱲᱮᱱᱟ᱾
ᱮᱥᱠᱟᱨᱜᱮ ᱚᱲᱟᱜ ᱦᱤᱲᱤᱧᱟᱠᱟᱫ ᱡᱤᱭᱟᱹᱞᱤ ᱞᱮᱠᱟ
ᱫᱩᱲᱩᱵ ᱦᱟᱹᱯᱤᱭᱮᱱᱟᱭ ᱥᱤᱨᱡᱚᱱ ᱮᱥᱠᱟᱨ
ᱥᱮᱨᱢᱟ ᱪᱚᱴᱨᱮ ᱥᱟᱸᱜᱮ ᱤᱯᱤᱞ ᱮᱸᱜᱮᱞ ᱞᱟᱛᱟᱨ᱾

ᱩᱭᱦᱟᱹᱨᱮᱫᱟᱭ ᱟᱨᱦᱚᱸ ᱢᱟᱨᱮ ᱜᱟᱛᱮ
ᱫᱩᱞᱟᱹᱲᱤ ᱨᱟᱦᱞᱟ ᱢᱟᱹᱭᱼᱟᱜ ᱠᱟᱛᱷᱟ᱾
ᱡᱟᱸᱦᱟᱭ ᱥᱟᱶᱛᱮ ᱫᱩᱯᱩᱞᱟᱹᱲ ᱠᱟᱛᱮᱫ
ᱯᱟᱹᱦᱩᱲ ᱦᱚᱪᱚᱣᱟᱠᱟᱱᱟᱭ ᱥᱤᱨᱡᱚᱱ᱾

ᱱᱤᱛᱳᱜ ᱫᱤᱥᱟᱹ ᱦᱮᱡ ᱟᱭᱠᱟᱱᱟ
ᱯᱟᱜᱽᱞᱟ ᱦᱚᱪᱚ ᱨᱚᱲ ᱞᱟᱱᱫᱟ
ᱪᱚᱨᱚᱠ ᱯᱳᱨᱟᱭᱱᱤ ᱵᱟᱦᱟ ᱢᱩᱴᱷᱟᱹᱱ
ᱥᱤᱱᱟᱹᱢ ᱥᱮᱨᱮᱧ ᱠᱩᱭᱞᱤ ᱪᱮᱬᱮ ᱟᱲᱟᱝ᱾
ᱟᱨᱟᱜ ᱞᱩᱴᱤ ᱨᱮᱭᱟᱜ ᱪᱮᱨᱮᱡ
ᱟᱨ ᱥᱟᱹᱨᱫᱤ ᱥᱮᱹᱛᱳᱝ ᱛᱤᱠᱤᱱ ᱵᱮᱲᱟ
ᱵᱟᱹᱨᱩ ᱩᱢᱩᱞ ᱦᱮᱢᱟᱞᱨᱮ ᱧᱟᱯᱟᱢ ᱛᱚᱨᱟ
ᱤᱠᱤᱞ ᱥᱤᱠᱤᱞ ᱠᱷᱤᱞᱰᱩ ᱮᱱᱮᱡ᱾

ᱢᱮᱱᱠᱷᱟᱱ ᱛᱮᱦᱮᱧ ᱚᱠᱚᱭᱦᱚᱸ ᱚᱠᱚᱭᱨᱮᱱ
ᱟᱨ ᱵᱟᱝ ᱠᱟᱱᱟᱠᱤᱱ᱾

ᱨᱟᱦᱞᱟ ᱥᱟᱶᱛᱮ ᱫᱩᱯᱩᱞᱟᱹᱲ ᱧᱟᱯᱟᱢ ᱨᱮᱭᱟᱜ ᱠᱟᱛᱷᱟ
ᱟᱫᱚ ᱵᱟᱝ ᱩᱭᱦᱟᱹᱨ ᱠᱟᱛᱮᱫᱼᱮ ᱢᱚᱱᱥᱩᱵᱟᱹ ᱠᱮᱫᱼᱟ,ᱼ
ᱜᱮᱥᱟᱭ ᱥᱟᱥᱟᱭ ᱫᱩᱞᱟᱹᱲᱤ ᱫᱩᱞᱟᱹᱲᱤᱭᱟᱹᱠᱳ ᱛᱟᱞᱟᱨᱮ
ᱠᱟᱛᱷᱟᱧ ᱮᱢᱚᱜ ᱠᱟᱱᱟ ᱯᱷᱩᱞᱟᱹᱣ ᱠᱟᱛᱮᱫ ᱠᱚᱲᱟᱢ
ᱫᱩᱞᱟᱹᱲ ᱦᱟᱯᱮᱱᱤᱧ ᱧᱟᱢ ᱛᱟᱺᱝᱜᱤᱨᱤᱧ ᱛᱟᱦᱮᱸᱱᱠᱷᱟᱱ᱾

ᱤᱱᱟᱹᱛᱟᱭᱱᱚᱢ
ᱮᱠᱷᱮᱱ ᱯᱟᱲᱦᱟᱣ ᱟᱨ ᱯᱟᱲᱦᱟᱣ
ᱮᱠᱷᱮᱱ ᱚᱞ ᱟᱨ ᱚᱞ᱾

ᱛᱮᱦᱮᱧᱟᱜ ᱠᱩᱠᱞᱤᱼ
ᱥᱤᱨᱡᱚᱱ ᱪᱮᱫᱼᱮ ᱯᱟᱲᱦᱟᱣ ᱠᱮᱫᱼᱟ?
ᱥᱤᱨᱡᱚᱱ ᱪᱮᱫᱼᱮ ᱚᱞ ᱠᱮᱫᱼᱟ??

ᱡᱟᱸᱦᱟᱛᱤᱱᱨᱮ ᱚᱴᱟᱜ ᱞᱮᱫᱟᱭ ᱯᱩᱛᱷᱤ
ᱨᱟᱦᱞᱟ ᱥᱟᱶᱛᱮ ᱧᱟᱯᱟᱢ ᱥᱟᱱᱟᱞᱮᱫᱮ ᱩᱛᱤᱥᱩᱛᱤ᱾
ᱟᱨ ᱮᱥᱠᱟᱨ ᱵᱮᱲᱟᱠᱳᱨᱮ
ᱠᱟᱹᱠᱭᱟᱹᱣᱟᱛᱮᱭ ᱢᱮᱢᱮᱱ ᱠᱟᱱᱟ
“ᱢᱤᱫᱴᱟᱝ ᱪᱟᱹᱠᱨᱤ ᱮᱢᱟᱭᱯᱮ ᱱᱩᱭ ᱥᱤᱨᱡᱚᱱ᱾”
ᱼᱚᱠᱚᱭ ᱥᱤᱨᱡᱚᱱ?
ᱛᱤᱱᱟᱹᱜᱼᱮ ᱯᱟᱲᱦᱟᱣᱟᱠᱟᱫᱼᱟ?

ᱥᱤᱨᱡᱚᱱᱮ ᱢᱚᱱᱮᱭᱮᱫᱼᱟ ᱱᱚᱝᱠᱟ ᱡᱟᱹᱱᱤᱡ
ᱡᱟᱸᱦᱟᱭᱠᱳ ᱠᱩᱠᱞᱤᱭᱮ ᱠᱟᱱᱟ᱾
ᱚᱱᱟᱛᱮ ᱢᱮᱱᱜᱚᱫ ᱠᱮᱫᱼᱟᱭ,ᱼ ᱤᱧᱜᱮ ᱥᱤᱨᱡᱚᱱ
ᱤᱧ, ᱤᱧ ᱫᱚ ᱜᱮᱞᱵᱟᱨ ᱪᱟᱱᱟᱪ ᱯᱟᱲᱦᱟᱣ ᱠᱟᱛᱮᱫ
ᱫᱩᱲᱩᱵ ᱢᱤᱱᱟᱹᱧᱟ ᱱᱚᱜᱼᱚᱭ ᱱᱤᱛᱳᱜ
ᱠᱤᱭᱟᱹ ᱡᱷᱟᱨᱱᱟ ᱟᱲᱮᱨᱮ
ᱢᱟᱛᱠᱚᱢ ᱵᱩᱴᱟᱹ ᱞᱟᱛᱟᱨᱨᱮ᱾

ᱼᱳ ᱦᱮᱸ, ᱩᱨᱩᱢ ᱵᱩᱡᱷᱟᱹᱣᱛᱮ ᱚᱠᱛᱚ ᱞᱟᱜᱟᱣ ᱠᱤᱫᱤᱧᱟ
ᱟᱢᱫᱚ ᱩᱱᱤ ᱥᱤᱨᱡᱚᱱ,
ᱡᱟᱸᱦᱟᱭ ᱫᱚ ᱫᱩᱯᱩᱞᱟᱹᱲ ᱞᱮᱫᱼᱟᱢ ᱨᱟᱦᱞᱟ ᱥᱟᱶᱛᱮ
ᱠᱩᱠᱢᱩ ᱟᱢ ᱧᱮᱞ ᱞᱮᱫᱼᱟ ᱡᱚᱲ ᱡᱩᱨᱤᱜ ᱢᱮᱱᱛᱮ᱾
ᱢᱮᱱᱠᱷᱟᱱ ᱛᱮᱦᱮᱧ ᱢᱚᱬᱮ ᱥᱮᱨᱢᱟ ᱮᱥᱠᱟᱨ ᱟᱠᱟᱱᱟᱢ
ᱚᱱᱟᱛᱮᱜᱮ ᱱᱤᱛᱳᱜ ᱵᱟᱹᱧ ᱳᱨᱳᱢ ᱫᱟᱲᱮᱭᱟᱢᱠᱟᱱ᱾
ᱱᱚᱣᱟᱠᱳ ᱛᱟᱞᱟᱨᱮ ᱛᱤᱥ ᱫᱚ ᱟᱢᱮᱢ ᱯᱟᱲᱦᱟᱣᱮᱱ
ᱟᱢᱟᱜ ᱚᱞ ᱯᱟᱲᱦᱟᱣ ᱫᱚ ᱢᱤᱪᱷᱟᱹᱜᱮᱭᱟ ᱯᱟᱞᱮᱱ᱾
ᱼᱱᱚᱝᱠᱟ ᱩᱭᱦᱟᱹᱨ ᱩᱭᱦᱟᱹᱨᱛᱮ
ᱯᱟᱨᱚᱢᱮᱱᱟ ᱟᱹᱰᱤ ᱢᱟᱦᱟ; ᱤᱱᱟᱹᱛᱟᱭᱱᱚᱢ ᱟᱫᱚ ᱵᱟᱝ᱾
(᱓)
ᱢᱤᱫ ᱪᱟᱱᱫᱳ ᱦᱳᱭᱮᱱᱟ ᱥᱤᱨᱡᱚᱱ ᱚᱲᱟᱜᱨᱮ ᱵᱟᱹᱱᱩᱜᱮᱭᱟ
ᱯᱟᱧᱡᱟᱠᱳ ᱳᱰᱳᱠᱮᱱᱟ ᱥᱤᱨᱡᱚᱱᱨᱮᱱ ᱟᱭᱳ ᱵᱟᱵᱟ᱾
ᱟᱛᱳ ᱴᱚᱞᱟ ᱯᱟᱲᱟ ᱯᱩᱲᱥᱤ ᱯᱮᱲᱟ ᱯᱟᱺᱦᱬᱟᱹ
ᱥᱟᱱᱟᱢ ᱥᱮᱦᱮᱫ ᱥᱟᱱᱟᱢ ᱠᱚᱬ ᱯᱟᱧᱡᱟ ᱛᱟᱭᱱᱚᱢ
ᱥᱮᱴᱮᱨᱮᱱᱟᱠᱳ ᱚᱱᱟ ᱠᱤᱭᱟᱹ ᱡᱷᱟᱨᱱᱟᱛᱮ
ᱧᱮᱞᱮᱫᱼᱟᱠᱳ ᱠᱷᱚᱫᱮ ᱢᱟᱛᱠᱚᱢ ᱫᱟᱨᱮ ᱟᱹᱰᱤ ᱢᱟᱨᱟᱝ᱾
ᱚᱱᱟ ᱞᱟᱛᱟᱨᱨᱮ ᱜᱤᱛᱤᱡ ᱢᱮᱱᱟᱭᱟ ᱢᱤᱫ ᱦᱚᱲ
ᱧᱩᱨ ᱡᱟᱣᱨᱟ ᱥᱟᱠᱟᱢ ᱪᱮᱛᱟᱱ ᱠᱷᱮᱛ ᱟᱲᱮ ᱫᱟᱱᱟᱝ᱾
ᱡᱚᱡᱚᱢ ᱛᱤ ᱨᱮᱭ ᱪᱩᱯᱩᱫ ᱟᱠᱟᱫᱼᱟ
ᱵᱟᱨᱜᱮᱞ ᱴᱟᱠᱟ ᱠᱟᱹᱣᱰᱤ᱾
ᱚᱱᱟᱫᱚ ᱡᱟᱹᱱᱤᱡ
ᱯᱟᱱᱛᱮᱨᱮ ᱫᱚᱦᱚ ᱢᱮᱱᱟᱜ ᱯᱟᱹᱣᱨᱟᱹ ᱠᱤᱨᱤᱧ ᱠᱟᱛᱮᱫ
ᱵᱮᱯᱟᱨᱤ ᱨᱩᱭᱟᱹᱲᱮ ᱮᱢ ᱟᱠᱟᱣᱫᱮᱭᱟ᱾

ᱥᱤᱨᱡᱚᱱ ᱛᱮᱦᱮᱧ ᱯᱟᱹᱣᱨᱟᱹ ᱧᱩ ᱵᱩᱞᱠ ᱠᱷᱟᱹᱛᱤᱨ
ᱵᱚᱦᱚᱜ ᱦᱚᱸᱭ ᱯᱷᱚᱨᱚᱣᱟᱠᱟᱱ
ᱵᱟᱝᱫᱚ ᱟᱹᱲᱤᱥ ᱡᱟᱞᱟ
ᱵᱟᱝᱫᱚ ᱵᱮᱡᱟᱨ ᱡᱟᱞᱟ
ᱵᱳᱛᱳᱞᱛᱮ ᱢᱚᱞᱚᱝᱼᱮ ᱠᱚᱴᱮᱡ ᱟᱠᱟᱱ
ᱵᱟᱝᱫᱚᱭ ᱵᱤᱱᱫᱟᱹᱲ ᱟᱠᱟᱱ᱾

ᱜᱚᱜ ᱠᱟᱛᱮᱫᱠᱳ ᱟᱹᱜᱩ ᱨᱩᱭᱟᱹᱲ ᱠᱮᱫᱮᱭᱟ ᱚᱲᱟᱜ;
ᱵᱩᱞ ᱠᱷᱚᱱᱮ ᱪᱮᱴᱷᱟᱭᱮᱱᱟ ᱡᱚᱠᱷᱮᱡ
ᱩᱭᱦᱟᱹᱨ ᱨᱩᱭᱟᱹᱲ ᱠᱮᱫᱼᱟᱭ ᱠᱟᱛᱷᱟᱠᱳ ᱦᱚᱞᱟᱱᱟᱜ᱿

(᱔)
“ᱨᱟᱹᱢᱩ ᱞᱚᱵᱟ ᱛᱟᱹᱠᱤᱱ
ᱨᱟᱹᱢᱩ ᱞᱚᱵᱟ ᱛᱟᱹᱠᱤᱱ
ᱵᱳᱝᱜᱟᱜᱮ ᱡᱟᱹᱱᱤᱡ ᱛᱟᱦᱮᱸ ᱠᱟᱱᱟᱠᱤᱱ᱾”
ᱼᱱᱚᱝᱠᱟ ᱥᱮᱨᱮᱧ ᱥᱮᱨᱮᱧᱛᱮ ᱢᱤᱫ ᱟᱡᱚᱫᱤᱭᱟᱹᱨᱮᱱ
ᱥᱟᱹᱫᱷᱩ ᱵᱟᱵᱟᱭ ᱥᱮᱴᱮᱨᱮᱱᱟ
ᱥᱤᱨᱡᱚᱱ ᱛᱟᱠᱚᱣᱟᱜ ᱚᱲᱟᱜ ᱪᱷᱟᱴᱠᱟ᱾

ᱩᱭᱩᱝ ᱠᱟᱛᱮᱫᱼᱮ ᱧᱮᱞᱠᱮᱫᱼᱟ
ᱚᱲᱟᱜᱨᱮ ᱦᱚᱲ ᱢᱮᱱᱟᱜ ᱠᱚᱣᱟ
ᱚᱱᱟᱛᱮ ᱮᱠᱟᱞ ᱛᱟᱞᱟ ᱨᱟᱪᱟᱛᱮᱭ ᱵᱚᱞᱚᱭᱮᱱᱟ
ᱨᱟᱪᱟᱨᱮ ᱵᱤᱞ ᱛᱮᱦᱮᱸᱠᱟᱱ ᱯᱟᱨᱠᱚᱢᱨᱮᱭ ᱫᱩᱲᱩᱵᱼᱮᱱᱟ᱾

ᱥᱤᱨᱡᱚᱱ ᱥᱮᱫ ᱠᱚᱭᱚᱜ ᱠᱟᱛᱮᱫ
ᱥᱟᱹᱫᱷᱩ ᱵᱟᱵᱟ ᱫᱷᱩᱨᱟᱹᱣᱮᱱᱟᱭ ᱢᱮᱢᱮᱱ,
“…ᱹᱹᱱᱩᱭ ᱫᱚ ᱱᱟᱯᱟᱭ…ᱹᱹᱚᱞᱚᱜ ᱠᱚᱲᱟ
…ᱹᱹᱫᱩᱞᱟᱹᱲ ᱪᱷᱩᱰᱟᱹᱨ᱾
ᱵᱟᱝᱼᱮ ᱧᱟᱢ ᱟᱠᱟᱫᱼᱟ ᱪᱟᱹᱠᱨᱤ…ᱹᱹ᱾
ᱵᱟᱝ ᱟᱨ ᱵᱟᱝ, ᱚᱠᱛᱚ ᱱᱤᱛᱦᱚᱸ ᱢᱮᱱᱟᱜ ᱜᱮᱭᱟ
ᱪᱟᱱᱫᱳᱭ ᱧᱮᱧᱮᱞ ᱠᱟᱱᱟ
ᱱᱤᱭᱟᱹ ᱥᱮᱨᱢᱟ ᱢᱩᱫᱽᱨᱮ ᱢᱟᱪᱮᱫᱼᱮ ᱛᱮᱭᱟᱨᱚᱜᱼᱟ
ᱮᱛᱚᱦᱚᱵ ᱥᱮᱪᱮᱫ ᱵᱤᱨᱫᱟᱹᱜᱟᱲᱨᱮᱱ᱿
ᱢᱮᱱᱠᱷᱟᱱ ᱚᱱᱟ ᱞᱟᱹᱜᱤᱫ ᱟᱨᱦᱚᱸ
ᱯᱟᱲᱦᱟᱜ ᱦᱳᱭᱳᱜ ᱛᱟᱭᱟ
ᱥᱮᱫᱟᱭ ᱚᱜᱷᱚᱴᱚᱱ ᱥᱟᱱᱟᱢ ᱦᱤᱲᱤᱧ ᱠᱟᱛᱮᱫ
ᱤᱧᱟᱹᱜ ᱠᱟᱛᱷᱟᱨᱮ ᱯᱟᱹᱛᱭᱟᱹᱣ ᱛᱟᱦᱮᱸ ᱠᱟᱛᱮᱫ᱿”

ᱟᱨᱦᱚᱸ ᱠᱟᱛᱷᱟᱭ ᱮᱢ ᱠᱮᱫᱼᱟ ᱥᱟᱹᱫᱷᱩ ᱵᱟᱵᱟ
ᱡᱩᱫᱤ ᱱᱚᱣᱟ ᱠᱟᱛᱷᱟ ᱵᱟᱝ ᱥᱟᱹᱨᱤᱜ
ᱟᱭᱟᱜ ᱥᱟᱹᱫᱷᱩ ᱫᱟᱲᱮ ᱪᱟᱵᱟᱜ
ᱟᱡᱜᱮ ᱦᱟᱯᱮᱱᱼᱮ ᱠᱷᱮᱯᱟᱜ᱿

ᱚᱱᱟᱠᱳ ᱢᱮᱱ ᱠᱟᱛᱮᱫ
ᱥᱟᱹᱫᱷᱩ ᱵᱟᱵᱟ ᱟᱫᱚᱭ ᱳᱰᱳᱠ ᱥᱮᱱ ᱮᱱᱟ᱿

(᱕)
ᱥᱤᱨᱡᱚᱱ ᱟᱫᱚ ᱯᱟᱲᱦᱟᱜᱼᱮ ᱮᱛᱚᱦᱚᱵ ᱠᱮᱫᱼᱟᱼ,
ᱟᱛᱳ ᱚᱲᱟᱜᱨᱮ ᱫᱤᱥᱳᱢ ᱡᱟᱠᱟᱛᱨᱮ
ᱪᱮᱫ ᱦᱳᱭᱳᱜ ᱠᱟᱱᱟ, ᱪᱮᱫᱠᱳ ᱪᱤᱠᱟᱹᱜ ᱠᱟᱱᱟ
ᱚᱱᱟ ᱫᱚ ᱵᱟᱰᱟᱭ ᱨᱮᱭᱟᱜ ᱞᱟᱹᱠᱛᱤ
ᱵᱟᱝᱼᱮ ᱢᱚᱱᱮ ᱞᱮᱫᱼᱟ᱾

ᱞᱟᱛᱟᱨ ᱠᱩᱞᱦᱤ ᱢᱟᱨᱥᱟᱞ ᱵᱟᱹᱦᱩ
ᱤᱨᱟᱹᱞ ᱪᱟᱱᱫᱳᱨᱮᱱ ᱦᱟᱢᱟᱞ ᱦᱚᱲᱢᱚ ᱦᱳᱭ ᱠᱟᱛᱮᱫ ᱨᱮᱦᱚᱸ ᱩᱱᱤᱭᱟᱜ ᱚᱲᱟᱜᱨᱮ ᱤᱨᱤᱞ ᱠᱚᱲᱟ
ᱵᱟᱦᱧᱟᱨ ᱠᱚᱲᱟ ᱛᱟᱞᱟ ᱧᱤᱱᱫᱟᱹᱠᱳ ᱵᱚᱞᱚ ᱞᱮᱱᱟ᱾

ᱩᱱᱨᱮ,
ᱮᱱᱦᱚᱸ
ᱢᱟᱨᱥᱟᱞ ᱫᱚ ᱵᱟᱝᱼᱮ ᱥᱮᱱ ᱞᱮᱱᱟ ᱛᱷᱟᱱᱟᱛᱮ,
ᱵᱟᱝᱼᱮ ᱞᱟᱹᱞᱤᱥ ᱞᱮᱫᱼᱟ ᱯᱩᱞᱤᱥ ᱴᱷᱮᱱ᱾
ᱪᱮᱫᱟᱜᱥᱮ ᱢᱟᱨᱥᱟᱞ ᱫᱚ ᱢᱤᱫ
ᱥᱟᱶᱛᱟ ᱫᱩᱞᱟᱹᱲᱤᱭᱟᱹ ᱠᱟᱱᱟᱭ᱾
ᱩᱱᱨᱮ
ᱟᱛᱳ ᱦᱚᱲ ᱢᱟᱨᱥᱟᱞᱜᱮᱵᱟᱝ ᱪᱮᱫᱟᱜ
ᱯᱮ ᱜᱮᱥᱟᱭᱠᱳ ᱯᱷᱩᱨᱟᱹᱱ ᱞᱮᱫᱮᱭᱟ᱾
ᱼᱚᱱᱟᱫᱚ ᱵᱟᱰᱟᱭ ᱨᱮᱭᱟᱜ ᱞᱟᱹᱠᱛᱤ
ᱵᱟᱝᱼᱮ ᱢᱚᱱᱮ ᱞᱮᱫᱼᱟ᱾
ᱨᱟᱭᱜᱚᱧᱡᱽ, ᱥᱩᱥᱩᱱᱤᱭᱟᱹ, ᱡᱷᱟᱲᱜᱟᱨᱟᱢ, ᱵᱟᱱᱫᱳᱭᱟᱱ ᱜᱚᱴᱟᱜᱮᱛᱚ ᱟᱡᱨᱮᱱ ᱡᱟᱹᱛ ᱵᱩᱦᱤᱱᱜᱮᱛᱚ
ᱵᱷᱟᱝᱠᱟᱬᱟ ᱴᱷᱮᱱᱠᱳ ᱱᱟᱦᱟᱪᱟᱨ ᱦᱚᱪᱚᱣᱟᱠᱟᱱᱟ
ᱚᱱᱟᱨᱮ ᱳᱱᱠᱳ ᱠᱟᱹᱭᱫᱷᱤ
ᱵᱟᱝᱠᱳ ᱧᱟᱢ ᱟᱠᱟᱫᱼᱟ ᱡᱚᱛᱷᱟᱛ ᱥᱟᱥᱮᱛ᱾
ᱢᱮᱱᱠᱷᱟᱱ ᱪᱮᱫᱟᱜ?
ᱚᱱᱟᱫᱚ ᱵᱟᱰᱟᱭ ᱨᱮᱭᱟᱜ ᱞᱟᱹᱠᱛᱤ
ᱵᱟᱝᱼᱮ ᱢᱚᱱᱮ ᱞᱮᱫᱼᱟ᱾
ᱪᱮᱫᱟᱜᱥᱮ,
ᱱᱤᱛᱳᱜ ᱫᱚ ᱥᱤᱨᱡᱚᱱᱼᱮ ᱚᱞᱚᱜ ᱠᱟᱱᱟ
ᱱᱤᱛᱳᱜ ᱫᱚ ᱥᱤᱨᱡᱚᱱᱼᱮ ᱯᱟᱲᱦᱟᱜ ᱠᱟᱱᱟ᱿

ᱚᱠᱛᱚ ᱥᱮᱴᱮᱨᱮᱱᱟ
ᱵᱟᱨ ᱜᱮᱟᱥᱭ ᱢᱤᱫ ᱜᱮᱞ ᱥᱟᱞ
ᱥᱟᱹᱨᱤᱜᱮ,
ᱮᱛᱚᱦᱚᱵ ᱥᱮᱪᱮᱫ ᱵᱤᱨᱫᱟᱹᱜᱟᱲᱷᱨᱮ
ᱥᱤᱨᱡᱚᱱ ᱵᱟᱹᱵᱩ ᱡᱮᱨᱮᱫ ᱠᱮᱫᱟᱭ ᱰᱤᱵᱟᱹ ᱢᱟᱨᱥᱟᱞ᱿

ᱥᱟᱹᱫᱷᱩ ᱵᱟᱵᱟᱭᱟᱜ ᱠᱟᱛᱷᱟ ᱥᱟᱹᱨᱤ
ᱚᱞ ᱠᱮᱫᱼᱟᱭ ᱥᱤᱨᱡᱚᱱ ᱯᱟᱹᱨᱤ
“…ᱹᱹᱥᱟᱱᱟᱢ ᱨᱮᱭᱟᱜ ᱢᱮᱱᱟᱜ ᱵᱮᱹᱥᱟᱹᱢᱞᱟᱹᱛ
ᱞᱟᱥᱮᱨᱢᱮ ᱫᱤᱱᱟᱹᱢ ᱢᱤᱫ ᱢᱚᱱᱮᱛᱮ
ᱟᱢᱟᱜ ᱜᱮᱭᱟᱱ ᱠᱟᱺᱛ᱾
ᱫᱩᱠᱷ ᱵᱮᱜᱚᱨ ᱥᱩᱠ ᱵᱟᱝᱜᱮ ᱫᱟᱨᱟᱭ
ᱥᱩᱠ ᱠᱩᱠᱢᱩᱭᱟᱛᱮᱫ ᱡᱟᱸᱦᱟᱭ ᱟᱞᱚᱢ ᱫᱩᱞᱟᱹᱲᱟᱭ᱿
ᱨᱮᱸᱜᱮᱡ ᱵᱩᱡᱷᱟᱹᱜ ᱛᱚᱵᱮᱭᱟᱱᱟᱜᱼᱮᱢ ᱡᱚᱢ
ᱟᱞᱚᱢ ᱦᱟᱹᱯᱤᱫᱽ ᱛᱟᱢᱟ ᱚᱞᱚᱜ ᱛᱤ ᱡᱚᱡᱚᱢ᱿
ᱚᱞᱢᱮ ᱥᱟᱹᱨᱤ ᱠᱟᱛᱷᱟ
ᱨᱚᱲᱢᱮ ᱥᱟᱹᱨᱤ ᱠᱟᱛᱷᱟ
ᱟᱧᱡᱚᱢᱢᱮ ᱥᱟᱹᱨᱤ ᱠᱟᱛᱷᱟ
ᱯᱟᱹᱛᱭᱟᱹᱜᱢᱮ ᱥᱟᱹᱨᱤ ᱠᱟᱛᱷᱟ
ᱜᱚᱜ ᱠᱟᱛᱟᱢ ᱜᱩᱱ ᱥᱚᱸᱜᱮ ᱠᱟᱛᱟᱢ ᱢᱟᱹᱱ᱾
ᱢᱚᱱᱮ ᱟᱞᱚᱢ ᱠᱷᱟᱴᱚᱭᱟ ᱵᱚᱦᱚᱜ ᱟᱞᱚᱢ ᱛᱤᱨᱩᱵᱟ
ᱟᱞᱚᱢ ᱦᱟᱹᱯᱤᱫᱟ ᱟᱪᱠᱟ ᱟᱢᱟᱜ ᱥᱤᱠᱷᱱᱟᱹᱛ ᱟᱦᱞᱟ
ᱟᱢᱜᱮᱢ ᱦᱳᱭᱳᱜ ᱥᱚᱨᱮᱥ ᱢᱚᱱᱮᱭᱟᱱ
ᱱᱟᱣᱟ ᱫᱟᱨᱟᱭᱟᱱ ᱢᱟᱹᱱᱢᱤ
ᱟᱞᱚᱢ ᱟᱹᱠᱩᱞᱟ ᱢᱚᱱᱮ ᱟᱞᱚᱢ ᱵᱤᱠᱳᱞᱟ ᱡᱤᱣᱤ
ᱟᱞᱚᱢ ᱟᱹᱲᱤᱥᱟ ᱢᱚᱱᱮ ᱟᱞᱚᱢ ᱠᱟᱺᱦᱤᱥᱟ ᱡᱤᱣᱤ
ᱛᱟᱹᱝᱜᱤᱨᱮ ᱛᱟᱦᱮᱸᱱᱢᱮ
ᱥᱟᱦᱟᱣᱟᱱᱟ ᱢᱚᱱᱮ ᱛᱮᱭᱟᱨᱢᱮ᱾
ᱩᱫᱩᱲ ᱫᱷᱩᱯᱩᱲ ᱠᱟᱹᱢᱤ ᱵᱮᱜᱚᱨ ᱡᱤᱣᱤ ᱢᱤᱪᱷᱟᱹ
ᱱᱚᱝᱠᱟ ᱟᱞᱚᱢ ᱩᱭᱦᱟᱹᱨ᱾
ᱱᱟᱞᱦᱟ ᱛᱩᱢᱟᱹᱞ ᱦᱚᱯᱚᱱ ᱠᱷᱟᱱᱫᱚ
ᱥᱟᱹᱨᱤᱜᱮ ᱥᱩᱞᱩᱠ ᱦᱟᱯᱮᱱᱼᱮᱢ ᱛᱩᱢᱟᱹᱞ
ᱥᱤᱠᱷᱱᱟᱹᱛ ᱟᱠᱟᱱ ᱦᱚᱯᱚᱱ ᱠᱷᱟᱱᱫᱚ
ᱥᱟᱹᱨᱤᱜᱮ ᱵᱤᱨᱫᱟᱹ ᱦᱟᱯᱮᱱᱼᱮᱢ ᱩᱪᱟᱹᱲ᱿

ᱟᱞᱚᱢ ᱵᱷᱟᱹᱵᱤᱜ ᱟᱯᱬᱮ ᱦᱩᱰᱤᱧ
ᱟᱢᱦᱚᱸ ᱪᱟᱱᱫᱳᱭ ᱠᱚᱭᱚᱜᱼᱟᱢ᱾
ᱟᱞᱚᱢ ᱵᱷᱟᱹᱵᱤᱛᱚᱜ ᱟᱢᱫᱚ ᱮᱥᱠᱟᱨ
ᱟᱞᱚᱢ ᱚᱱᱦᱮᱞᱟᱭ ᱥᱟᱫᱷ ᱨᱮᱭᱟᱜ ᱡᱤᱭᱚᱱ᱾
ᱪᱮᱫᱟᱜᱥᱮ ᱡᱟᱱᱟᱢ ᱫᱟᱛᱟ ᱛᱚᱣᱟ ᱫᱟᱨᱮ
ᱥᱟᱹᱨᱤᱭᱟᱜᱜᱮᱠᱤᱱ ᱥᱤᱨᱡᱚᱱ᱾”

ᱟᱛᱳ ᱯᱮᱲᱟ ᱫᱤᱥᱳᱢ ᱯᱮᱲᱟᱠᱳ ᱴᱷᱮᱱ
ᱠᱟᱛᱷᱟ ᱪᱟᱞᱛᱮ ᱪᱟᱯᱟᱞᱛᱮ
ᱥᱤᱨᱡᱚᱱᱠᱳ ᱡᱚᱴᱟᱣᱟᱫᱮᱭᱟ
ᱡᱤᱣᱤ ᱨᱤᱱᱤᱡ ᱡᱩᱨᱤ ᱜᱟᱛᱮ᱿
ᱥᱤᱨᱡᱚᱱ ᱱᱤᱛᱳᱜ ᱫᱚ ᱪᱟᱞᱟᱜ ᱦᱳᱭᱳᱜ ᱛᱟᱭᱟ
ᱚᱲᱟᱜ ᱠᱷᱚᱱ ᱥᱟᱺᱜᱤᱧ ᱜᱩᱛᱤ ᱠᱟᱹᱢᱤᱛᱮ
ᱵᱤᱨ ᱵᱩᱨᱩ ᱯᱟᱨᱚᱢᱨᱮ ᱵᱟᱡᱟᱨ ᱥᱟᱦᱟᱨ ᱛᱟᱞᱟᱨᱮ᱿
ᱱᱤᱛᱳᱜ ᱫᱚ ᱥᱤᱨᱡᱚᱱ ᱩᱭᱦᱟᱹᱨᱚᱜᱼᱮ ᱫᱷᱩᱨᱟᱹᱣᱮᱱᱟ
ᱪᱮᱫᱼᱮ ᱪᱤᱠᱟᱹᱭᱟ?
ᱩᱭᱦᱟᱹᱨᱮᱫᱼᱟᱭ ᱢᱟᱨᱥᱟᱞ ᱵᱟᱹᱦᱩᱭᱟᱜ ᱠᱟᱛᱷᱟ
ᱩᱭᱦᱟᱹᱨᱮᱫᱼᱟᱭ ᱨᱟᱭᱜᱚᱧᱡᱽ ᱨᱮᱭᱟᱜ ᱠᱟᱛᱷᱟ
ᱩᱭᱦᱟᱹᱨᱮᱫᱼᱟᱭ ᱡᱷᱟᱲᱜᱨᱟᱢ, ᱵᱟᱱᱫᱳᱭᱟᱱ ᱟᱨ ᱥᱩᱥᱩᱱᱤᱭᱟᱹ ᱨᱮᱭᱟᱜ ᱠᱟᱛᱷᱟ᱾
ᱫᱤᱥᱳᱢᱨᱮ ᱚᱞ ᱢᱮᱱᱟᱜ ᱛᱚᱞ ᱢᱮᱱᱟᱜ
ᱟᱹᱭᱤᱱ ᱠᱟᱹᱱᱩᱱ ᱨᱮᱭᱟᱜ ᱠᱟᱛᱷᱟ᱾
ᱵᱟᱹᱲᱤᱡ ᱢᱟᱹᱱᱢᱤᱠᱳ ᱥᱟᱥᱮᱛ ᱞᱟᱹᱜᱤᱫ
ᱟᱹᱱᱟᱹᱨᱤ ᱢᱮᱱᱟᱜ ᱨᱮᱦᱚᱸ
ᱨᱟᱡᱽ ᱟᱹᱨᱤ ᱨᱮᱭᱟᱜ ᱥᱤᱭᱟᱹᱡᱟᱹᱨᱤᱛᱮ
ᱨᱟᱡᱟ ᱨᱟᱹᱱᱤ ᱠᱚᱣᱟᱜ ᱫᱷᱚᱢᱚᱠᱛᱮ
ᱥᱟᱹᱨᱤ ᱵᱤᱪᱟᱹᱨ ᱵᱟᱝ ᱦᱳᱭᱳᱜ ᱠᱟᱱᱟ᱿

ᱪᱮᱫᱟᱜᱥᱮ ᱵᱤᱪᱟᱹᱨᱤᱭᱟᱹᱠᱳ ᱫᱚ ᱥᱟᱱᱟᱢ
ᱪᱮᱛᱟᱱ ᱜᱟᱸᱛᱟᱠ ᱦᱚᱲ
ᱟᱨ ᱟᱡ ᱠᱷᱟᱱᱫᱚ ᱞᱟᱛᱟᱨ ᱜᱟᱸᱛᱟᱠ᱾
ᱱᱟᱜᱟᱢ ᱠᱷᱚᱱᱟᱜ ᱱᱤᱛ ᱦᱟᱹᱵᱤᱡ
ᱳᱱᱠᱳ ᱪᱮᱛᱟᱱ ᱜᱟᱸᱛᱟᱠ ᱦᱚᱲ ᱫᱚ
ᱵᱟᱧᱪᱟᱣ ᱢᱮᱱᱟᱜ ᱠᱚᱣᱟ
ᱢᱤᱫ ᱵᱤᱛᱟᱹ ᱵᱚᱦᱚᱜᱛᱮ ᱠᱟᱹᱢᱤ ᱠᱟᱛᱮᱫ
ᱟᱨ ᱞᱟᱛᱟᱨ ᱜᱟᱸᱛᱟᱠ ᱦᱚᱲ ᱫᱚ
ᱵᱟᱧᱪᱟᱣ ᱢᱮᱱᱟᱜ ᱠᱚᱣᱟ
ᱯᱮ ᱢᱚᱠᱟ ᱦᱚᱲᱢᱚᱛᱮ ᱠᱟᱹᱢᱤ ᱠᱟᱛᱮᱫ᱿

ᱞᱟᱛᱟᱨ ᱜᱟᱸᱛᱟᱠ ᱦᱚᱲ ᱫᱚ
ᱵᱤᱪᱠᱚᱢ ᱵᱟᱝᱠᱳ ᱠᱷᱚᱡᱚᱜᱼᱟ
ᱢᱚᱱᱮ ᱡᱤᱣᱤᱨᱮ ᱚᱥᱟᱹᱱᱛᱤ᱾
ᱥᱟᱱᱟᱠᱚᱣᱟ ᱥᱩᱞᱩᱠᱨᱮ, ᱥᱩᱯᱩᱞᱩᱠᱨᱮ ᱛᱟᱦᱮᱸᱱ
ᱫᱷᱟᱹᱨᱛᱤᱯᱩᱨᱤ ᱨᱮᱭᱟᱜ ᱥᱟᱱᱟᱢ ᱠᱷᱚᱱ ᱥᱚᱨᱮᱥ
ᱥᱟᱶᱛᱟ ᱛᱟᱞᱟᱨᱮ ᱥᱟᱹᱨᱤ ᱥᱟᱨᱡᱚᱢ ᱩᱢᱩᱞᱨᱮ᱿