ᱠᱟᱹᱦᱱᱤ ”ᱟᱨᱟᱜ ᱠᱟᱹᱥᱤ ᱵᱟᱦᱟ”

ᱠᱟᱹᱦᱱᱤ ”ᱟᱨᱟᱜ ᱠᱟᱹᱥᱤ ᱵᱟᱦᱟ” – ᱠᱟᱞᱤᱨᱟᱢ ᱢᱩᱨᱢᱩ






ᱰᱟᱬᱟᱯᱟᱦᱟᱲ ᱰᱩᱝᱜᱽᱨᱤ ᱡᱟᱯᱟᱜ ᱵᱟᱦᱟᱴᱚᱞᱟ ᱟᱛᱳ ᱠᱩᱞᱦᱤ ᱢᱩᱪᱟᱹᱫ ᱜᱟᱶᱛᱟ ᱚᱲᱟᱜ ᱨᱮ ᱥᱟᱱᱟᱢ ᱨᱟᱹᱥᱭᱟᱹ ᱠᱚᱲᱟᱠᱳ ᱡᱟᱣᱨᱟ ᱟᱠᱟᱱᱟ᱾ ᱚᱠᱚᱭ ᱫᱚ ᱛᱟᱥ ᱠᱳ ᱠᱷᱮᱹᱞᱳᱜ ᱠᱟᱱᱟ, ᱚᱠᱚᱭ ᱫᱚ ᱢᱳᱵᱟᱭᱤᱞ ᱨᱮ ᱥᱮᱨᱮᱧᱠᱳ ᱟᱧᱡᱳᱢᱮᱫᱼᱟ ᱮᱱᱮᱡ ᱠᱳ ᱧᱮᱞᱮᱫᱼᱟ᱾
ᱥᱮᱨᱢᱟ ᱢᱩᱨᱢᱩ, ᱱᱩᱭ ᱫᱚ ᱱᱟᱥᱮᱦᱚᱸ ᱛᱟᱥ ᱠᱷᱮᱹᱞ ᱫᱚ ᱵᱟᱝᱼᱮ ᱚᱲᱵᱚᱝᱼᱟ᱾ ᱚᱱᱟᱛᱮ ᱩᱫᱽᱢᱟᱹ ᱥᱮᱨᱮᱧ ᱟᱧᱡᱚᱢᱤᱭᱟᱹᱠᱳ ᱥᱟᱶᱨᱮᱜᱮ ᱢᱤᱫ ᱫᱷᱟᱨᱮᱨᱮ ᱟᱴᱮᱫ ᱯᱟᱹᱴᱭᱟᱹᱨᱮ ᱜᱤᱛᱤᱡ ᱠᱟᱛᱮᱫ ᱟᱡᱦᱚᱸ ᱟᱭᱟᱜ ᱢᱳᱵᱟᱭᱤᱞᱼᱮ ᱞᱤᱱᱮᱫᱼᱟ ᱟᱨ ᱞᱩᱛᱩᱨᱨᱮᱭ ᱤᱫᱤᱭᱮᱫᱼᱟ᱾ ᱦᱟᱱᱮ ᱥᱮᱛᱟᱜ ᱠᱷᱚᱱ ᱢᱤᱫ ᱮᱥᱟ ᱱᱚᱝᱠᱟᱜᱮ ᱫᱟᱹᱛᱟᱹᱱᱤ ᱛᱳᱯᱳᱱ ᱡᱟᱦᱟᱸᱥᱮᱫᱜᱮᱭ ᱪᱟᱞᱟᱣᱞᱮᱱ ᱢᱳᱵᱟᱭᱤᱞ ᱫᱚ ᱢᱤᱫ ᱮᱥᱟ ᱞᱩᱛᱩᱨ ᱨᱮᱭ ᱞᱟᱴᱷᱣᱟᱠᱟᱫ ᱛᱟᱸᱦᱮᱱ ᱜᱮᱭᱟ᱾ ᱢᱮᱱᱠᱷᱟᱱ ᱨᱚᱲ ᱫᱚ ᱵᱟᱝᱼᱮ ᱨᱚᱲ ᱠᱟᱱᱟ᱾ ᱪᱮᱫᱟᱜ, ᱪᱮᱫ ᱠᱷᱟᱹᱛᱤᱨ? ᱩᱢᱤᱱ ᱦᱤᱞᱳᱜᱢᱟ ᱜᱟᱶᱛᱟ ᱚᱲᱟᱜ ᱢᱤᱫ ᱫᱷᱟᱨᱮᱨᱮ ᱵᱟᱝᱠᱷᱟᱱ ᱩᱞ ᱫᱟᱨᱮ ᱵᱩᱴᱟᱹᱨᱮ ᱫᱩᱲᱩᱵ ᱠᱟᱛᱮᱫ ᱚᱠᱚᱭ ᱥᱟᱶᱛᱮᱪᱚᱝ ᱫᱚᱢᱮᱭ ᱨᱚᱯᱚᱲ ᱡᱚᱝᱼᱟᱱ ᱜᱷᱟᱱᱮ ᱜᱷᱟᱱᱮ ᱞᱟᱱᱫᱟᱭᱟᱛᱮᱫ, ᱜᱷᱟᱱᱮ ᱫᱩᱲᱩᱵ ᱛᱷᱤᱨ ᱠᱟᱛᱮᱫ᱾
ᱢᱟᱧᱡᱟᱱ ᱵᱮᱲᱟ ᱟᱨᱟᱜ ᱟᱦᱞᱟ ᱦᱮᱱᱫᱮ ᱨᱤᱢᱤᱞᱛᱮ ᱫᱟᱯᱟᱞᱮᱱᱟ᱾ ᱚᱠᱛᱚ ᱛᱩᱨᱩᱭ ᱴᱟᱲᱟᱝ ᱢᱚᱲᱮ ᱴᱤᱲᱤᱡ ᱯᱟᱨᱚᱢᱮᱱᱟ᱾ ᱥᱟᱱᱛᱟᱲᱤ ᱟᱠᱷᱲᱟ ᱮᱛᱚᱦᱚᱵ ᱮᱱᱟ᱾ ᱟᱹᱰᱤ ᱱᱟᱯᱟᱭ ᱛᱨᱤᱭᱳ ᱵᱟᱱᱟᱢ ᱨᱟᱦᱟᱛᱮ ᱥᱮᱨᱮᱧᱠᱳ ᱟᱧᱡᱚᱢᱚᱜ ᱠᱟᱱᱟ᱾ ᱦᱟᱱᱮ ᱠᱳᱞᱠᱟᱛᱟ ᱟᱠᱟᱥᱵᱟᱱᱤ ᱵᱷᱚᱵᱚᱱ ᱠᱷᱚᱱ ᱵᱤᱱᱼᱛᱟᱨᱛᱮ ᱚᱴᱟᱝ ᱦᱤᱡᱩᱜ ᱠᱟᱱᱟ᱾ ᱥᱮᱨᱢᱟᱭ ᱩᱭᱦᱟᱹᱨᱟᱼ, ᱟᱞᱮᱢᱟ ᱱᱟᱦᱟᱜ ᱥᱟᱱᱛᱟᱲ, ᱱᱚᱣᱟᱠᱳ ᱥᱮᱨᱮᱧ ᱟᱧᱡᱚᱢᱨᱮ ᱨᱟᱹᱥᱠᱟᱹᱞᱮ ᱵᱩᱡᱷᱟᱹᱣ ᱨᱮᱦᱚᱸ ᱴᱷᱟᱹᱠᱟᱹᱭᱟᱞᱮ ᱚᱠᱟᱨᱮ? ᱟᱞᱮᱭᱟᱜ ᱢᱟ ᱵᱟᱹᱱᱩᱜ ᱟᱱᱟᱝ ᱮᱱᱮᱡ ᱥᱮᱨᱮᱧ ᱮᱠᱟᱰᱮᱹᱢᱤ᱾ ᱟᱨᱦᱚᱸᱭ ᱩᱭᱦᱟᱹᱨᱟ; “ᱯᱟᱹᱦᱤᱞ ᱦᱚᱸᱛᱚ ᱵᱟᱝ ᱛᱟᱸᱦᱮᱠᱟᱱᱟ ᱩᱱ ᱫᱚ ᱛᱟᱦᱞᱮ ᱪᱤᱠᱟᱹᱛᱮ ᱦᱚᱲᱠᱳ ᱥᱮᱬᱟᱡᱚᱝᱠᱟᱱ ᱛᱟᱸᱦᱮᱠᱟᱱᱟ?”
ᱪᱮᱫᱟᱜ ᱥᱮ, ᱩᱱ ᱡᱚᱠᱷᱮᱡ ᱨᱮᱱ ᱢᱟᱛᱟᱞ ᱠᱚᱲᱟᱠᱳ ᱫᱚ ᱱᱟᱦᱟᱜ ᱨᱮᱱ ᱞᱮᱠᱟ ᱮᱠᱷᱮᱱ ᱦᱟᱺᱰᱤ ᱯᱟᱹᱣᱨᱟᱹᱛᱮ ᱧᱩ ᱵᱩᱞ ᱠᱟᱛᱮᱫ ᱵᱟᱝᱠᱳ ᱵᱷᱟᱝᱠᱟ ᱵᱷᱟᱹᱠᱩᱨ ᱵᱟᱲᱟᱭ ᱠᱟᱱ ᱛᱟᱦᱮᱸᱠᱟᱱᱟ᱾ ᱥᱟᱸᱜᱮ ᱠᱩᱲᱤᱠᱳ ᱮᱱᱮᱡ ᱟᱸᱜᱟ ᱦᱚᱪᱚᱠᱳ ᱦᱳᱭᱳᱜᱼᱟ ᱢᱮᱱᱛᱮ ᱢᱚᱱᱮᱨᱮ ᱩᱭᱦᱟᱹᱨ ᱛᱟᱸᱦᱮᱠᱟᱱ ᱛᱟᱠᱚᱣᱟ᱾ ᱟᱨ ᱚᱱᱟᱛᱮ ᱢᱮᱱ ᱜᱟᱱᱚᱜᱼᱟ “ᱢᱟᱛᱟᱞ ᱜᱮ ᱞᱟᱠᱪᱟᱨ ᱠᱳ ᱡᱤᱭᱟᱹᱲ ᱫᱚᱦᱚᱭᱟᱠᱟᱫᱼᱟ᱾”
ᱱᱟᱦᱟᱜ ᱫᱚ ᱜᱞᱳᱵᱟᱞᱟᱭᱡᱮᱥᱚᱱ ᱡᱩᱜᱽ ᱯᱟᱲᱟᱣᱮᱱᱟ᱾ ᱱᱟᱦᱟᱜ ᱮᱱᱮᱡ ᱥᱮᱨᱮᱧᱛᱮ ᱫᱤᱥᱚᱢ ᱴᱟᱯᱟᱣᱼᱚᱜ ᱠᱟᱱᱟ᱾ ᱥᱟᱱᱟᱢ ᱞᱮᱠᱟᱱ ᱮᱱᱮᱡ ᱥᱮᱨᱮᱧ ᱤᱱᱴᱟᱨᱱᱮᱹᱴᱛᱮ ᱭᱩᱴᱩᱵᱽ ᱠᱷᱚᱱ ᱰᱟᱭᱳᱱᱞᱳᱰ ᱠᱟᱛᱮᱫ ᱱᱚᱜᱼᱚᱭ ᱱᱚᱝᱠᱟᱞᱮ ᱟᱧᱡᱚᱢᱟ ᱟᱨ ᱢᱚᱱᱮ ᱢᱚᱱᱮᱛᱮ ᱦᱩᱸᱻᱦᱩᱸᱞᱮ ᱥᱮᱨᱮᱧᱟ᱾ ᱢᱮᱱᱠᱷᱟᱱ ᱛᱮᱦᱮᱧ ᱫᱚ ᱚᱱᱟ ᱨᱮᱹᱰᱤᱭᱳ ᱥᱮᱨᱮᱧ ᱟᱧᱡᱚᱢ ᱠᱟᱛᱮᱫ ᱨᱮᱦᱚᱸ ᱢᱚᱱᱮᱨᱮ ᱨᱟᱹᱥᱠᱟᱹ ᱵᱟᱝᱼᱮ ᱟᱹᱭᱠᱟᱹᱣᱮᱫᱼᱟ᱾ ᱪᱮᱫᱟᱜ ᱥᱮ, ᱚᱱᱮᱡᱮᱹ ᱯᱷᱳᱱ ᱵᱟᱝᱼᱮ ᱨᱤᱥᱤᱵᱷᱮᱫᱼᱟ᱾ ᱥᱟᱹᱨᱤᱜᱮ, ᱟᱹᱰᱤ ᱟᱹᱲᱤᱥ ᱵᱮᱡᱟᱨ ᱵᱩᱡᱷᱟᱹᱜᱼᱟ ᱨᱟᱹᱜᱤ ᱵᱟᱹᱲᱛᱤᱜᱼᱟ ᱡᱚᱠᱷᱮᱡ ᱢᱚᱱᱮ ᱥᱟᱶᱛᱮ ᱢᱚᱱᱮ, ᱡᱤᱣᱤ ᱥᱟᱶᱛᱮ ᱡᱤᱣᱤ ᱛᱚᱯᱚᱞ ᱩᱨᱤᱡᱠᱚᱜ ᱨᱮᱦᱚᱸ ᱟᱥ ᱢᱚᱱᱮ ᱠᱷᱟᱹᱞᱤ ᱟᱹᱥᱤᱫᱚᱜᱼᱟ᱾
ᱱᱤᱛᱳᱜ ᱥᱮᱨᱢᱟ ᱫᱚ ᱮᱠᱟᱞ ᱱᱚᱝᱠᱟᱱ ᱦᱟᱞᱚᱛᱨᱮᱜᱮᱭ ᱥᱮᱴᱮᱨ ᱟᱠᱟᱱᱟ᱾ ᱟᱹᱰᱤ ᱛᱟᱹᱝᱜᱤ ᱛᱟᱭᱱᱚᱢ ᱦᱟᱱᱟ ᱫᱷᱟᱨᱮ ᱠᱷᱚᱱ ᱢᱤᱫ ᱵᱟᱵᱟ ᱦᱚᱲᱟᱜ ᱟᱲᱟᱝ, “ᱦᱮᱞᱳ”᱾ ᱥᱮᱨᱢᱟ ᱱᱟᱥᱮᱱᱟᱜᱼᱮ ᱟᱪᱠᱟ ᱜᱚᱫ ᱮᱱᱟ᱾ ᱵᱚᱛᱚᱨ ᱢᱮᱥᱟ ᱱᱟᱥᱮ ᱞᱩᱴᱤ ᱛᱣᱟᱨᱛᱷᱟᱨᱟᱣᱟᱛᱮᱭ ᱢᱮᱱ ᱨᱩᱭᱟᱹᱲ ᱠᱮᱫᱼᱟ, “ᱦᱮᱞᱳ᱾”
“ᱦᱮᱸ ᱵᱟᱹᱵᱩ, ᱞᱟᱹᱭᱢᱮ ᱚᱠᱟ ᱠᱷᱚᱱᱮᱢ ᱯᱷᱳᱱᱮᱫᱼᱟ?”
ᱢᱤᱫᱴᱟᱝ ᱵᱟᱵᱟ ᱦᱚᱲ ᱱᱚᱝᱠᱟ ᱱᱟᱯᱟᱭ ᱥᱟᱺᱦᱤᱡᱼᱮ ᱠᱩᱠᱞᱤᱠᱟᱱ ᱫᱚ, ᱚᱠᱚᱭᱮ ᱦᱳᱭ ᱫᱟᱲᱮᱭᱟᱜᱼᱟ, ᱥᱟᱹᱜᱩᱱ ᱥᱮ ᱪᱮᱛᱟ᱾ ᱥᱮᱨᱢᱟᱭ ᱵᱷᱟᱹᱵᱤᱛᱚᱜ ᱠᱟᱱᱟ ᱥᱟᱹᱨᱤ ᱠᱟᱛᱷᱟᱭ ᱢᱮᱱᱟ ᱥᱮ ᱵᱟᱝ᱾ ᱢᱮᱱᱠᱷᱟᱱ ᱩᱱᱤ ᱵᱟᱵᱟ ᱦᱚᱲᱟᱜ ᱨᱚᱲᱨᱮ ᱚᱠᱟ ᱞᱮᱠᱟᱪᱚᱝ ᱴᱷᱟᱠᱮᱫ ᱢᱮᱥᱟ ᱞᱟᱸᱜᱟ ᱟᱲᱟᱝᱼᱚᱜ ᱠᱟᱱᱟ᱾ ᱚᱱᱟᱛᱮ ᱫᱤᱞ ᱫᱟᱲᱮ ᱥᱟᱧᱪᱟᱣ ᱠᱟᱛᱮᱫ ᱥᱮᱨᱢᱟ ᱫᱚ ᱥᱟᱹᱨᱤ ᱥᱟᱹᱨᱤᱜᱮᱭ ᱢᱮᱱ ᱠᱮᱫᱼᱟ, “ᱤᱧ ᱫᱚ ᱵᱟᱦᱟᱴᱚᱞᱟ ᱠᱷᱚᱱᱤᱧ ᱞᱟᱹᱭᱮᱫᱼᱟ᱾ ᱠᱟᱛᱷᱟ ᱦᱳᱭᱳᱜ ᱠᱟᱱᱟ ᱤᱯᱤᱞ ᱫᱚ ᱵᱟᱹᱱᱩᱭᱛᱮ?”
ᱩᱱᱤ ᱵᱟᱵᱟ ᱦᱚᱲ ᱢᱤᱫ ᱜᱷᱟᱹᱲᱤᱡ ᱛᱷᱤᱨᱜᱮᱭ ᱛᱟᱸᱦᱮᱭᱮᱱᱟ᱾ ᱤᱱᱟᱹ ᱛᱟᱭᱱᱚᱢᱼᱮ ᱢᱮᱱ ᱠᱮᱫᱼᱟ, “ᱤᱯᱤᱞ, ᱤᱯᱤᱞ…ᱹᱹ ᱳ ᱦᱮᱸ, ᱤᱯᱤᱞ ᱫᱚ ᱢᱮᱱᱟᱭ ᱜᱮᱭᱟ᱾ ᱱᱤᱛᱳᱜ ᱫᱚ ᱵᱟᱝᱼᱮ ᱜᱟᱞᱢᱟᱨᱟᱣ ᱠᱮᱭᱟ, ᱱᱤᱛᱳᱜ ᱫᱚ ᱟᱢ ᱫᱚᱦᱚ ᱫᱟᱲᱮᱭᱟᱜᱼᱟ᱾”
“ᱞᱟᱹᱭ ᱵᱟᱝ ᱜᱟᱱᱚᱜᱛᱮ, ᱪᱚᱫᱼᱮ ᱪᱤᱠᱟᱹᱭᱮᱫ ᱛᱮ?”
“ᱟᱪᱪᱷᱟ ᱵᱟᱹᱵᱩ, ᱟᱢ ᱫᱚ ᱯᱮᱲᱟ ᱜᱤᱫᱟᱹᱨ ᱥᱮ ᱪᱮᱛᱟ?”
“ᱦᱮᱸ ᱯᱮᱲᱟ ᱜᱮ᱾”
“ᱚᱠᱟᱨᱮᱱ ᱟᱨ ᱚᱠᱟᱞᱮᱠᱟᱱ ᱯᱮᱲᱟ?”
“ᱜᱟᱛᱮ ᱯᱮᱲᱟ᱾ ᱥᱟᱹᱜᱩᱱ ᱫᱚ ᱫᱟᱫᱟ ᱟᱨ ᱤᱯᱤᱞ ᱫᱚ ᱦᱤᱞᱤᱫᱟᱹᱭ᱾ ᱢᱮᱱᱠᱷᱟᱱ ᱧᱩᱛᱩᱢ ᱧᱩᱢᱟᱛᱮᱫᱜᱮ ᱢᱮᱢᱮᱱ ᱤᱧ ᱦᱮᱣᱟᱼᱟᱛᱷᱚ ᱚᱱᱟᱛᱮ…ᱹᱹ᱾”
“ᱛᱟᱦᱞᱮᱠᱷᱟᱱ ᱟᱧᱡᱚᱢ ᱢᱮ, ᱯᱟᱨᱚᱢᱮᱱ ᱧᱤᱱᱫᱟᱹ ᱵᱮᱲᱟ ᱡᱟᱹᱯᱤᱫ ᱠᱷᱚᱱᱜᱮ ᱥᱟᱹᱜᱩᱱ ᱫᱚ ᱵᱟᱝᱼᱮ ᱮᱵᱷᱮᱱ ᱟᱠᱟᱱᱟ᱾ ᱪᱮᱫᱟᱜ, ᱪᱮᱫ ᱠᱷᱟᱹᱛᱤᱨ ᱚᱱᱟᱫᱚ ᱱᱤᱛᱦᱚᱸ ᱟᱹᱣᱨᱤᱞᱮ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ᱾ ᱵᱟᱝ ᱫᱚ ᱡᱟᱹᱯᱤᱫᱨᱮ ᱡᱟᱸᱦᱟᱱᱟᱜ ᱦᱳᱭᱟᱠᱟᱱᱛᱟᱭ ᱵᱟᱝ ᱫᱚ ᱡᱟᱸᱦᱟᱱᱟᱜᱼᱮ ᱡᱚᱢ ᱢᱮᱥᱟᱞᱮᱫ, ᱪᱮᱫᱜᱮ ᱵᱟᱝᱞᱮ ᱟᱭᱼᱩᱢᱟᱹᱱ ᱫᱟᱲᱮᱭᱟᱜ ᱠᱟᱱᱟ᱾ ᱥᱚᱥᱟᱱᱛᱮ ᱤᱫᱤᱞᱮ ᱢᱮᱱ ᱠᱮᱫᱠᱷᱟᱱ ᱚᱠᱚᱭ ᱫᱚ ᱠᱳ ᱢᱮᱱ ᱠᱮᱫᱼᱟ, ᱵᱟᱝ ᱯᱟᱧᱡᱟ ᱢᱟᱲᱟᱝ ᱟᱵᱳᱱ ᱪᱮᱫ ᱠᱷᱟᱹᱛᱤᱨ ᱟᱡᱛᱮ ᱱᱚᱝᱠᱟ ᱵᱤᱫᱟᱹᱭᱼᱮ ᱦᱟᱛᱟᱣ ᱠᱮᱫᱼᱟ᱾ ᱱᱚᱛᱮ ᱤᱯᱤᱞᱢᱟ ᱨᱟᱜ ᱨᱟᱜᱛᱮᱭ ᱛᱤᱸᱜᱤᱫ ᱩᱛᱟᱹᱨᱮᱱ ᱨᱮᱦᱚᱸ ᱵᱟᱝᱼᱮ ᱛᱷᱤᱨᱳᱜ ᱠᱟᱱᱟ, ᱱᱤᱛᱦᱚᱸ ᱥᱟᱹᱜᱩᱱ ᱥᱳᱨ ᱨᱮᱜᱮ ᱫᱩᱲᱩᱵ ᱠᱟᱛᱮᱫᱼᱮ ᱨᱟᱨᱟᱜ ᱠᱟᱱᱟ᱾ ᱡᱟᱸᱦᱟᱭᱜᱮ ᱵᱩᱡᱷᱟᱹᱣ ᱞᱟᱹᱜᱤᱫ ᱠᱳ ᱨᱤᱠᱟᱹᱭᱮᱫᱼᱟ, ᱩᱱ ᱠᱷᱟᱱᱜᱮ ᱵᱟᱹᱲᱛᱤᱜᱠᱟᱱ ᱛᱟᱭᱟ ᱨᱟᱜ ᱦᱚᱢᱚᱨ᱾”
ᱥᱮᱨᱢᱟ ᱥᱟᱱᱟᱢᱟᱜᱼᱮ ᱵᱩᱡᱷᱟᱹᱣ ᱠᱮᱫᱠᱷᱟᱱ ᱢᱮᱱ ᱠᱮᱫᱼᱟᱭ, “ᱴᱷᱤᱠᱟᱹᱱ ᱜᱮᱭᱟ ᱱᱤᱭᱟᱹ ᱵᱮᱲᱟ ᱞᱮᱠᱟᱫᱩᱧ ᱫᱚᱦᱚ ᱦᱟᱛᱟᱲᱮᱫᱼᱟ᱾” ᱢᱮᱱ ᱠᱟᱛᱮᱫ ᱜᱮ ᱯᱷᱳᱱᱼᱮ ᱫᱚᱦᱚ ᱠᱮᱫᱼᱟ᱾
ᱱᱤᱛᱳᱜ ᱥᱮᱨᱢᱟᱭ ᱩᱭᱦᱟᱹᱨᱮᱫᱼᱟ; ᱛᱮᱦᱮᱧ ᱠᱷᱚᱱ ᱤᱯᱤᱞ ᱫᱚᱭ ᱨᱟᱺᱰᱤᱭᱮᱱᱟ᱾ ᱛᱮᱦᱮᱧ ᱠᱷᱚᱱ ᱟᱫᱚ ᱢᱚᱱᱮ ᱡᱤᱣᱤ ᱱᱟᱯᱟᱭ ᱫᱚᱦᱚᱭ ᱞᱟᱹᱜᱤᱫ ᱯᱩᱬ ᱥᱟᱹᱲᱤᱛᱮ ᱵᱟᱱᱫᱮ ᱠᱟᱛᱮᱫᱼᱮ ᱛᱟᱸᱦᱮᱱᱟ᱾ ᱦᱚᱨᱟᱥᱤᱨᱮ ᱵᱟᱝ ᱧᱮᱞᱚᱜ ᱛᱟᱭᱟ ᱫᱷᱩᱲᱤ ᱥᱤᱸᱫᱩᱨ, ᱞᱮᱸᱜᱟ ᱛᱤ ᱨᱮᱭᱟᱜ ᱢᱮᱲᱦᱮᱫ ᱥᱟᱠᱚᱢᱦᱚᱸ ᱟᱨ ᱵᱟᱝ, ᱟᱛᱳ ᱴᱚᱞᱟ ᱯᱟᱲᱟ ᱯᱩᱲᱥᱤ ᱥᱟᱱᱟᱢ ᱦᱚᱲᱴᱷᱮᱱ ᱢᱤᱫᱴᱟᱝ ᱧᱩᱛᱩᱢ ᱛᱮᱜᱮᱭ ᱪᱷᱟᱹᱴᱭᱟᱹᱨᱚᱜᱼᱟ, ᱩᱱᱤ ᱫᱚ ᱨᱟᱺᱰᱤ᱾ ᱢᱮᱱᱠᱷᱟᱱ ᱫᱩᱠ ᱨᱮᱭᱟᱜ ᱠᱟᱛᱷᱟ ᱫᱚ ᱢᱤᱫᱴᱟᱝᱜᱮ, ᱢᱤᱫᱴᱟᱝ ᱠᱩᱲᱤ ᱦᱚᱯᱚᱱ ᱵᱤᱱ ᱜᱤᱫᱟᱹᱨ ᱮᱸᱜᱟᱛ ᱠᱟᱛᱮᱫ ᱪᱤᱠᱟᱹᱛᱮ ᱨᱟᱺᱰᱤ ᱧᱩᱛᱩᱢᱛᱮᱭ ᱪᱷᱟᱹᱴᱭᱟᱹᱨᱚᱜᱼᱟ? ᱩᱱᱤᱨᱮᱱ ᱡᱟᱶᱟᱭᱜᱮᱥᱮᱭ ᱪᱟᱞᱟᱣ ᱢᱟᱲᱟᱝ ᱮᱱᱟ, ᱥᱤᱸᱫᱩᱨ ᱟᱨ ᱥᱟᱠᱚᱢᱜᱮᱥᱮᱭ ᱟᱫ ᱠᱮᱫᱼᱟ ᱢᱮᱱᱠᱷᱟᱱ ᱥᱟᱱᱟᱢ ᱠᱟᱹᱢᱤ ᱫᱟᱲᱮ ᱥᱟᱱᱟᱢ ᱥᱩᱥᱟᱹᱨ ᱢᱚᱱᱮᱢᱟ ᱱᱤᱛᱦᱚᱸ ᱢᱮᱱᱟᱜ ᱡᱤᱣᱮᱹᱫᱜᱮ᱾
ᱥᱟᱹᱜᱩᱱ ᱛᱟᱠᱳ ᱚᱲᱟᱜ ᱦᱚᱲᱠᱳ ᱩᱭᱦᱟᱹᱨᱮᱫᱼᱟ ᱯᱟᱞᱮᱱ ᱤᱯᱤᱞᱜᱮ ᱡᱟᱶᱟᱭ ᱛᱮᱫ ᱟᱹᱲᱟᱹᱭ ᱠᱟᱹᱞᱤ ᱢᱟᱱᱛᱟᱨᱛᱮ ᱤᱱᱵᱚᱨᱚᱭ ᱟᱛᱟᱨᱠᱮᱫ ᱛᱟᱭᱟ᱾ ᱚᱱᱟ ᱦᱚᱸ ᱪᱤᱠᱟᱹᱢ ᱞᱟᱹᱭ ᱠᱮᱭᱟ ᱾ ᱛᱟᱦᱞᱮᱠᱷᱟᱱ ᱥᱩᱱᱩᱢ ᱧᱮᱞ ᱦᱚᱪᱚᱭ ᱦᱳᱭᱳᱜᱼᱟ᱾
ᱢᱮᱱᱠᱷᱟᱱ ᱚᱞ ᱯᱟᱲᱦᱟᱣᱛᱮ ᱢᱟᱨᱟᱝ ᱟᱠᱟᱱ, ᱟᱹᱠᱤᱞ ᱜᱮᱭᱟᱱᱮ ᱟᱨᱡᱟᱣᱟᱠᱟᱫ ᱠᱤᱸᱥᱟᱹᱬ ᱦᱚᱯᱚᱱᱮᱨᱟ ᱫᱚ ᱪᱮᱫᱟᱜ ᱰᱟᱹᱱᱼᱮ ᱥᱮᱬᱟᱭᱟ ᱟᱨ ᱪᱮᱫᱟᱜᱜᱮ ᱵᱟᱝ ᱡᱟᱶᱟᱭ ᱛᱮᱫᱼᱮ ᱡᱚᱢᱮᱭᱟ?
ᱩᱦᱩᱸᱜ, ᱚᱱᱠᱟᱫᱚ ᱵᱟᱝ ᱦᱳᱭ ᱫᱟᱲᱮᱭᱟᱜᱼᱟ, ᱚᱱᱟᱫᱚ ᱵᱟᱹᱲᱤᱡ ᱩᱭᱦᱟᱹᱨ, ᱚᱱᱟᱫᱚ ᱢᱤᱫ ᱞᱮᱠᱟᱱ ᱟᱸᱫᱷᱟ ᱯᱟᱹᱛᱭᱟᱹᱣ᱾
ᱟᱨᱦᱚᱸᱠᱳ ᱩᱭᱦᱟᱹᱨᱮᱫᱼᱟ, ᱥᱟᱹᱜᱩᱱᱟᱜ ᱜᱷᱟᱨᱚᱧᱡᱽᱨᱮ ᱛᱟᱸᱦᱮᱱ ᱥᱟᱶ ᱥᱟᱶᱛᱮ ᱯᱟᱞᱮᱱ ᱟᱦᱨᱮ ᱵᱟᱦᱨᱮ ᱡᱟᱸᱦᱟᱭ ᱥᱟᱶᱛᱮ ᱥᱟᱹᱜᱟᱹᱭᱼᱮ ᱡᱚᱲᱟᱣ ᱮᱢᱟᱱᱞᱮᱫ᱾ ᱯᱟᱞᱮᱱ ᱳᱱᱠᱳᱭᱟᱜ ᱩᱫᱩᱜ ᱥᱤᱠᱷᱟᱹᱣᱛᱮᱜᱮ ᱱᱚᱝᱠᱟᱭ ᱠᱟᱹᱢᱤᱠᱮᱫ; ᱦᱳᱭᱦᱚᱸ ᱫᱟᱲᱮᱭᱟᱜᱼᱟ, ᱱᱟᱦᱟᱜ ᱫᱚ ᱚᱱᱠᱟᱱ ᱠᱚᱲᱟᱜᱮᱠᱳ ᱵᱟᱹᱲᱛᱤᱭᱟ, ᱡᱟᱸᱦᱟᱭ ᱠᱩᱲᱤ ᱥᱟᱶᱛᱮ ᱫᱩᱯᱩᱞᱟᱹᱲ ᱞᱮᱱᱠᱷᱟᱱ ᱟᱹᱭ ᱢᱮᱱᱟᱜᱼᱟ ᱩᱱᱤᱫᱚ ᱠᱟᱹᱬᱤᱭ ᱦᱳᱭᱳᱜ ᱟᱨ ᱠᱷᱩᱲᱫᱤᱭ ᱦᱳᱭᱳᱜ, ᱵᱟᱹᱦᱩᱲᱤᱭᱟᱹᱭ ᱦᱳᱭᱳᱜ ᱟᱨ ᱰᱟᱺᱜᱩᱭᱟᱹᱭ ᱦᱳᱭᱳᱜ ᱮᱠᱟᱞ ᱫᱚᱦᱚ ᱩᱛᱟᱹᱨ ᱞᱮᱠᱷᱟᱱᱜᱮ ᱥᱟᱱᱟᱢ ᱟᱱᱟᱴ ᱥᱟᱦᱟ ᱥᱟᱹᱝᱜᱤᱧᱚᱜᱼᱟ᱾
ᱱᱤᱛᱳᱜ ᱥᱟᱹᱜᱩᱱ ᱵᱟᱹᱦᱩᱢᱟᱛᱷᱚ ᱮᱛᱚᱦᱚᱵ ᱥᱮᱪᱮᱫ ᱵᱤᱨᱫᱟᱹᱜᱟᱲᱨᱮᱱ ᱢᱟᱪᱮᱛᱟᱱᱤ, ᱱᱩᱭᱟᱜ ᱠᱟᱹᱣᱰᱤ ᱟᱨᱡᱟᱣ ᱢᱮᱱᱟᱜᱼᱟ᱾ ᱡᱟᱸᱦᱟᱞᱮᱠᱟ ᱠᱮᱛᱮᱫ ᱟᱹᱛᱠᱤᱨ ᱞᱮᱠᱷᱟᱱ ᱥᱟᱨᱮᱡ ᱡᱤᱭᱚᱱ ᱫᱚ ᱵᱷᱚᱨ ᱫᱟᱲᱮ ᱛᱮᱜᱮ ᱵᱤᱛᱟᱹᱣ ᱯᱩᱨᱟᱹᱜᱼᱟ᱾ ᱦᱳᱭ ᱱᱚᱜᱼᱚᱭ ᱱᱚᱝᱠᱟ ᱩᱭᱦᱟᱹᱨᱛᱮ ᱯᱟᱪᱷᱮᱫ ᱡᱟᱸᱦᱟᱭ ᱠᱚᱲᱟᱜᱮ…ᱹᱹ᱾
ᱤᱯᱤᱞᱠᱳ ᱠᱩᱞᱤᱭᱮ ᱠᱟᱱᱟᱼ, ᱵᱟᱹᱦᱩ ᱟᱵᱮᱱᱵᱮᱱ ᱵᱩᱡᱷᱟᱹᱣ ᱮᱢᱟᱱ ᱟᱠᱟᱫᱼᱟ ᱯᱟᱞᱮᱱ ᱥᱟᱹᱜᱩᱱ ᱵᱟᱹᱵᱩ ᱡᱟᱸᱦᱟᱱᱟᱜ ᱵᱷᱤᱛᱨᱤ ᱟᱡᱟᱨᱨᱮᱭ ᱯᱟᱲᱟᱣᱞᱮᱱ, ᱚᱱᱠᱟ ᱡᱟᱸᱦᱟᱱᱟᱜᱼᱮ ᱞᱟᱹᱭᱟᱠᱟᱫᱵᱮᱱ ᱛᱟᱸᱦᱮᱱᱟ ᱥᱮ ᱵᱟᱝ?
ᱤᱯᱤᱞᱟᱜ ᱛᱮᱞᱟ, “ᱵᱟᱝ ᱪᱮᱫᱜᱮ ᱵᱟᱝᱞᱤᱧ ᱵᱟᱰᱟᱭᱟ ᱟᱨ ᱚᱱᱠᱟᱢᱟ ᱪᱮᱫᱜᱮ ᱵᱟᱝᱼᱮ ᱞᱟᱹᱭᱟᱠᱟᱫᱞᱤᱧᱟᱹ᱾”
ᱩᱱᱟᱹᱜ ᱠᱟᱛᱮᱨᱮᱦᱚᱸ ᱪᱮᱫᱜᱮ ᱵᱟᱝ ᱵᱟᱰᱟᱭ ᱞᱮᱱᱟ᱾ ᱢᱮᱱᱠᱷᱟᱱ ᱱᱚᱣᱟ ᱨᱮᱭᱟᱜ ᱨᱮᱦᱮᱫ ᱚᱡᱮ ᱫᱚ ᱯᱟᱧᱡᱟ ᱧᱟᱢ ᱛᱮᱜᱮ ᱦᱳᱭᱳᱜᱼᱟ ᱵᱟᱝᱠᱷᱟᱱ ᱫᱤᱥᱚᱢᱨᱮᱱ ᱦᱚᱲ ᱪᱮᱫ ᱪᱚᱝᱠᱳ ᱨᱚᱲ ᱵᱟᱹᱲᱤᱡᱟ᱾ ᱚᱱᱟᱛᱮ ᱫᱚᱥᱟᱨ ᱦᱤᱞᱳᱜᱜᱮ ᱯᱳᱥᱴᱢᱚᱨᱴᱮᱢ ᱦᱚᱪᱚᱭ ᱞᱟᱹᱜᱤᱫ ᱜᱟᱹᱰᱤ ᱵᱷᱟᱲᱟ ᱠᱟᱛᱮᱫ ᱢᱚᱦᱰᱟᱭᱮᱱᱟᱠᱳ ᱦᱟᱥᱯᱟᱛᱟᱞᱛᱮ᱾ ᱢᱟᱡᱟᱱᱛᱮᱜᱮ ᱨᱤᱯᱳᱨᱴ᱾ ᱱᱚᱣᱟᱫᱚ ᱥᱩᱭᱥᱟᱭᱤᱰ– ᱟᱯᱬᱮᱛᱮᱜᱮ ᱵᱤᱥ ᱨᱟᱱ ᱡᱚᱢ ᱠᱟᱛᱮᱫᱼᱮ ᱜᱚᱡ ᱟᱠᱟᱱᱟ᱾
ᱥᱟᱹᱜᱩᱱᱟᱜ ᱜᱚᱡ ᱢᱟᱹᱲᱤ ᱟᱹᱜᱩ ᱨᱩᱭᱟᱹᱲ ᱠᱮᱫᱼᱟᱠᱳ ᱚᱲᱟᱜᱛᱮ᱾
ᱥᱮᱨᱣᱟ ᱨᱮᱭᱟᱜ ᱠᱟᱹᱢᱤ ᱛᱟᱞᱟᱛᱮ ᱥᱟᱹᱜᱩᱱᱟᱜ ᱵᱤᱫᱟᱹᱭ ᱠᱟᱹᱢᱤ ᱦᱳᱭ ᱥᱟᱹᱛ ᱮᱱᱟ᱾
ᱤᱱᱟᱹᱛᱟᱭᱱᱚᱢ ᱩᱭᱦᱟᱹᱨᱚᱜ ᱠᱟᱱᱟᱠᱳᱼ, ᱵᱤᱥ ᱨᱟᱱᱼᱮ ᱡᱚᱢ ᱞᱮᱫᱠᱷᱟᱱ ᱢᱚᱪᱟᱠᱷᱚᱱ ᱳᱠᱳᱨ ᱡᱟᱸᱦᱟᱱᱟᱜ ᱯᱷᱚᱛᱚ ᱠᱟᱛᱮᱫ ᱳᱰᱳᱠ ᱞᱮᱱᱟ ᱢᱮᱱᱛᱮ ᱵᱟᱝ ᱧᱮᱞ ᱞᱮᱱᱟᱛᱚᱹ ᱛᱟᱦᱞᱮᱠᱷᱟᱱ ᱪᱮᱫ ᱨᱟᱱᱼᱮ ᱡᱚᱢ ᱞᱮᱫᱛᱮ ᱟᱨ ᱪᱮᱫᱟᱜᱜᱮᱵᱟᱝᱼᱮ ᱡᱚᱢ ᱞᱮᱫᱼᱟ?ᱼᱳᱦ, ᱡᱟᱸᱦᱟᱭᱮᱱᱜᱮ, ᱦᱳᱭᱟᱜᱢᱟ ᱦᱳᱭ ᱯᱟᱨᱚᱢᱟᱠᱟᱱ ᱱᱤᱛᱳᱜ ᱫᱚ ᱥᱟᱢᱟᱝᱥᱮᱫ ᱧᱮᱧᱮᱞ ᱞᱟᱹᱜᱽ ᱠᱟᱱᱟ᱾






(᱒)
ᱫᱚᱥᱟᱨ ᱦᱤᱞᱳᱜ᱾ ᱚᱠᱛᱚ ᱛᱟᱞᱟ ᱧᱤᱱᱫᱟᱹ᱾ ᱦᱟᱱᱦᱟᱨ ᱦᱚᱧᱦᱟᱨ ᱥᱟᱶᱛᱮ ᱥᱟᱱᱟᱢ ᱚᱲᱟᱜ ᱯᱮᱲᱟᱠᱳ ᱡᱟᱹᱯᱤᱫ ᱦᱚᱪᱚᱠᱟᱛᱮᱫ ᱤᱯᱤᱞᱨᱮᱱ ᱦᱤᱸᱥᱤᱫ ᱨᱟᱭᱵᱟᱨ ᱚᱴᱟᱝ ᱥᱮᱴᱮᱨ ᱮᱱᱟᱭ ᱥᱮᱨᱢᱟ ᱥᱳᱨᱛᱮ᱾
ᱥᱟᱹᱨᱫᱤ ᱡᱟᱹᱯᱤᱫ ᱚᱠᱛᱚᱨᱮ ᱜᱤᱛᱤᱡ ᱟᱠᱟᱱ ᱦᱚᱲᱢᱚ ᱠᱷᱚᱱ ᱞᱮᱸᱜᱟ ᱫᱷᱟᱨᱮ ᱵᱚᱦᱚᱜ ᱥᱳᱨᱨᱮ ᱫᱚᱦᱚ ᱢᱮᱱᱟᱜ ᱯᱷᱳᱱᱨᱮ ᱥᱮᱨᱮᱧ ᱨᱟᱦᱟ ᱥᱟᱰᱮᱭᱮᱱᱟ᱾ ᱥᱮᱨᱢᱟᱭ ᱮᱵᱷᱮᱱᱮᱱᱟ᱾
ᱵᱷᱤᱛᱨᱮ ᱟᱠᱟ ᱢᱮᱱᱟᱜ ᱜᱷᱩᱲᱤ ᱠᱚᱭᱚᱜ ᱠᱟᱛᱮᱫ ᱧᱮᱞ ᱠᱮᱫᱼᱟᱭ ᱚᱠᱛᱚ ᱱᱤᱛᱳᱜ ᱜᱮᱞᱵᱟᱨ ᱴᱟᱲᱟᱝ ᱜᱮᱞ ᱢᱚᱲᱮ ᱴᱤᱲᱤᱡ᱾ “ᱱᱩᱱᱟᱹᱜ ᱧᱤᱱᱫᱟᱹ ᱤᱯᱤᱞᱼᱮ ᱯᱷᱳᱱᱮᱫᱼᱟ; ᱪᱮᱫ ᱠᱷᱟᱹᱛᱤᱨ?” ᱨᱤᱥᱤᱵᱷ ᱠᱮᱫᱼᱟᱭ᱾
ᱤᱯᱤᱞᱟᱜ ᱟᱹᱰᱤ ᱦᱟᱢᱟᱞ ᱟᱲᱟᱝ, “ᱥᱮᱨᱢᱟ᱾”
“ᱤᱯᱤᱞ ᱱᱩᱱᱟᱹᱜ ᱧᱤᱱᱫᱟᱹ?”
“ᱥᱮᱨᱢᱟ, ᱵᱷᱟᱹᱞᱤ ᱵᱟᱹᱧ ᱵᱩᱡᱷᱟᱹᱣᱮᱫᱼᱟ, ᱠᱷᱟᱹᱞᱤᱧ ᱵᱚᱛᱚᱨᱚᱜ ᱠᱟᱱᱟ᱾ ᱩᱱᱤᱜᱮ ᱠᱷᱟᱹᱞᱤ ᱠᱩᱠᱢᱩᱛᱤᱧ ᱧᱮᱞ ᱧᱟᱢᱮ ᱠᱟᱱᱟ᱾ ᱪᱮᱫ ᱠᱚᱪᱚᱭ ᱢᱤᱛᱟᱹᱧ ᱠᱟᱱᱟ᱾ ᱠᱩᱠᱢᱩ ᱧᱮᱞ ᱛᱟᱭᱱᱚᱢ ᱟᱫᱚ ᱵᱟᱹᱧ ᱡᱟᱹᱯᱤᱫ ᱫᱟᱲᱮᱭᱟᱜ ᱠᱟᱱᱟ᱾”
“ᱤᱯᱤᱞ, ᱪᱤᱠᱟᱹᱛᱮᱭᱟᱜ ᱪᱮᱫ ᱢᱮᱱᱟᱜᱛᱮ? ᱚᱱᱠᱟ ᱠᱟᱛᱮᱫᱜᱮ ᱛᱟᱸᱦᱮᱱ ᱦᱳᱭᱳᱜ ᱛᱟᱢᱟ᱾ ᱵᱟᱹᱲᱛᱤ ᱦᱟᱱᱟᱱᱚᱣᱟ ᱟᱞᱚᱢ ᱩᱭᱦᱟᱹᱨᱟ ᱧᱮᱞᱟᱢ ᱵᱟᱨ ᱯᱮ ᱢᱟᱦᱟ ᱛᱟᱭᱱᱚᱢ ᱠᱷᱟᱱᱜᱮ ᱥᱟᱱᱟᱢᱟᱜ ᱱᱟᱯᱟᱭᱚᱜᱼᱟ᱾ ᱱᱚᱣᱟᱠᱳ ᱫᱚ ᱥᱟᱱᱟᱢᱜᱮ ᱥᱤᱨᱡᱚᱱᱤᱭᱟᱹᱼᱟᱜ ᱞᱤᱞᱟᱹᱠᱷᱮᱞᱟ᱾”
“ᱥᱮᱨᱢᱟ ᱤᱧᱫᱚ ᱛᱟᱦᱞᱮᱠᱷᱟᱱ ᱪᱮᱫ ᱟᱫᱚ ᱱᱚᱝᱠᱟ ᱠᱟᱛᱮᱫᱜᱤᱧ ᱵᱩᱲᱦᱤᱜᱼᱟ? ᱟᱨ ᱱᱚᱝᱠᱟ ᱠᱟᱛᱮᱫᱜᱤᱧ ᱜᱚᱡ ᱜᱤᱰᱤᱜᱼᱟ? ᱤᱧᱟᱹᱜ ᱟᱛᱨᱟ ᱡᱤᱭᱚᱱ ᱞᱟᱹᱜᱤᱫᱛᱮ ᱫᱚ ᱥᱤᱨᱡᱚᱱᱤᱭᱟᱹ ᱵᱟᱝᱼᱮ ᱚᱞ ᱟᱠᱟᱫᱛᱮ ᱡᱤᱭᱤ ᱛᱟᱸᱦᱮᱱ ᱵᱷᱳᱨ ᱡᱩᱨᱤᱛᱮ ᱡᱤᱭᱚᱱ ᱠᱷᱟᱸᱰᱟᱣ ᱨᱮᱭᱟᱜ ᱠᱟᱛᱷᱟ?”
ᱥᱮᱨᱢᱟ ᱟᱫᱚ ᱛᱷᱤᱨᱜᱮᱭ ᱛᱟᱦᱮᱸᱭᱮᱱᱟ᱾ ᱩᱭᱦᱟᱹᱨᱮᱫᱼᱟᱭ, ᱤᱯᱤᱞᱼᱮ ᱨᱟᱺᱰᱤᱭᱮᱱ ᱨᱮᱦᱚᱸ ᱢᱚᱱᱮ ᱫᱚ ᱱᱤᱛᱦᱚᱸ ᱰᱟᱺᱜᱩᱭᱟᱹᱜᱮᱛᱟᱭᱟ᱾ ᱱᱤᱛᱳᱜ ᱫᱚ ᱮᱠᱟᱞ ᱤᱧ ᱥᱟᱶᱛᱮ ᱥᱟᱨᱮᱡ ᱡᱤᱭᱚᱱ ᱠᱷᱟᱸᱰᱟᱣ ᱥᱟᱱᱟᱭᱮ ᱠᱟᱱᱟ ᱢᱮᱱᱠᱷᱟᱱ ᱪᱮᱫ ᱤᱧ ᱢᱮᱛᱟᱭᱟ, ᱚᱱᱟᱵᱮᱜᱚᱨ ᱟᱹᱰᱤ ᱢᱟᱦᱟ ᱦᱳᱭᱜᱚᱫ ᱟᱠᱟᱱᱟ ᱟᱹᱞᱤᱧᱟᱜ ᱳᱠᱳᱪᱳᱠᱳ ᱧᱟᱯᱟᱢ ᱨᱚᱯᱚᱲ᱾ ᱤᱯᱤᱞ ᱢᱟᱛᱷᱚ ᱢᱩᱨᱩᱠ ᱠᱩᱲᱤᱫᱚᱭ ᱵᱟᱝ ᱠᱟᱱᱟ, ᱚᱞ ᱯᱟᱲᱦᱟᱣᱟᱠᱟᱱ ᱠᱩᱲᱤ, ᱵᱳᱜᱮᱹ ᱵᱟᱹᱲᱤᱡ ᱵᱤᱪᱟᱹᱨᱼᱮ ᱵᱟᱰᱟᱭᱟ᱾ ᱮᱱᱛᱮᱨᱮᱦᱚᱸ ᱪᱮᱫᱟᱜ ᱥᱟᱶᱛᱟ ᱥᱟᱹᱲᱤᱢᱨᱮᱭ ᱛᱟᱦᱟᱢ ᱛᱩᱠᱩᱡ ᱞᱟᱹᱜᱤᱫᱚᱜ ᱠᱟᱱᱟ᱾ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱟᱹᱱ ᱟᱹᱨᱤ ᱠᱷᱚᱱ ᱡᱩᱭᱟᱹᱱ ᱦᱚᱲᱢᱚ ᱨᱮᱭᱟᱜ ᱟᱹᱭᱫᱟᱹᱨᱜᱮ ᱢᱟᱨᱟᱝᱼᱮᱱ ᱛᱟᱭᱟ?
ᱥᱮᱨᱢᱟ ᱛᱮᱦᱮᱧ ᱱᱚᱝᱠᱟᱭ ᱩᱭᱦᱟᱹᱨᱮᱫᱼᱟ, ᱪᱮᱫᱟᱜᱥᱮ ᱤᱯᱤᱞ ᱥᱟᱶᱛᱮ ᱳᱠᱳ ᱫᱟᱱᱟᱝ ᱥᱟᱹᱜᱟᱹᱭ ᱡᱚᱲᱟᱣ ᱢᱟᱲᱟᱝ ᱱᱚᱝᱠᱟ ᱚᱜᱷᱚᱴᱚᱱ ᱦᱳᱭ ᱫᱟᱲᱮᱭᱟᱜᱼᱟ ᱢᱮᱱᱛᱮ ᱵᱟᱝᱼᱮ ᱧᱮᱞ ᱫᱚᱦᱚ ᱟᱠᱟᱫ ᱛᱟᱸᱦᱮᱱᱟ᱾
ᱟᱭᱢᱟ ᱪᱚᱴ ᱯᱷᱮᱰ ᱩᱭᱦᱟᱹᱨ ᱛᱟᱭᱱᱚᱢ ᱥᱮᱨᱢᱟ ᱢᱚᱱᱮᱭ ᱜᱚᱴᱟ ᱠᱮᱫᱼᱟ, ᱤᱯᱤᱞ ᱢᱟᱛᱷᱚ ᱪᱟᱹᱠᱨᱤ ᱠᱩᱲᱤ᱾ ᱩᱱᱤᱭᱟᱜ ᱫᱚ ᱠᱟᱹᱣᱰᱤ ᱟᱱᱟᱴ ᱱᱟᱥᱮᱦᱚᱸ ᱵᱟᱹᱱᱩᱜ ᱛᱟᱭᱟ᱾ ᱚᱱᱟᱛᱮ ᱱᱤᱭᱟᱹᱛᱟᱭᱱᱚᱢ ᱡᱩᱫᱤᱧ ᱛᱮᱸᱜᱳᱱᱟ ᱤᱯᱤᱞᱨᱮᱱ ᱪᱷᱟᱛᱟᱫᱟᱨᱮ ᱛᱟᱦᱞᱮᱠᱷᱟᱱ ᱮᱠᱟᱞᱤᱧ ᱴᱮᱱᱠᱟᱣ ᱩᱛᱟᱹᱨᱚᱜᱼᱟ᱾
ᱥᱮᱨᱢᱟ ᱟᱫᱚᱭ ᱢᱮᱱ ᱨᱩᱭᱟᱹᱲ ᱠᱮᱫᱼᱟ, “ᱤᱯᱤᱞ, ᱡᱩᱫᱤ ᱥᱟᱹᱨᱤᱜᱮ ᱫᱷᱟᱹᱨᱛᱤᱨᱮ ᱵᱳᱝᱜᱟᱵᱩᱨᱩ ᱢᱮᱱᱟᱜ ᱠᱚᱣᱟ ᱛᱟᱦᱞᱮᱠᱷᱟᱱ ᱟᱨ ᱵᱟᱹᱲᱛᱤ ᱫᱚ ᱟᱞᱚᱢ ᱵᱷᱟᱹᱵᱤᱛᱚᱜᱼᱟ ᱡᱟᱸᱦᱟᱭᱵᱟᱝ ᱡᱟᱸᱦᱟᱭ ᱴᱷᱤᱠ ᱟᱢᱠᱳ ᱧᱮᱞ ᱢᱮᱭᱟ᱾”
“ᱵᱟᱝ ᱥᱮᱨᱢᱟ, ᱡᱟᱸᱦᱟᱭ ᱫᱚ ᱵᱟᱝ, ᱟᱢᱫᱚ ᱞᱟᱹᱞᱟᱹᱭ ᱦᱳᱭᱳᱜ ᱛᱟᱢᱟ ᱢᱮᱱᱛᱮ ᱤᱧᱟᱹᱜ ᱠᱟᱛᱷᱟᱨᱮ ᱨᱮᱵᱮᱱ ᱢᱮᱱᱟᱢᱟ ᱥᱮ ᱵᱟᱝ?”
“ᱦᱳᱭ, ᱮᱠᱟᱞᱛᱮ ᱵᱟᱹᱧ ᱞᱟᱹᱭ ᱯᱩᱨᱟᱹᱣ ᱞᱮᱫᱛᱮ ᱵᱟᱝᱼᱮᱢ ᱵᱩᱡᱷᱟᱹᱣ ᱫᱟᱲᱮᱭᱟᱫᱟ᱾ ᱢᱮᱛᱟᱢ ᱠᱟᱹᱱᱟᱹᱧᱛᱷᱚ ᱟᱞᱚᱢ ᱵᱷᱟᱹᱵᱤᱛᱚᱜᱼᱟ ᱦᱳᱭᱥᱮ, ᱛᱮᱦᱮᱧ ᱫᱚ ᱟᱹᱰᱤ ᱧᱤᱱᱫᱟᱹᱭᱮᱱᱟ ᱢᱟ ᱡᱟᱹᱯᱤᱫᱽᱢᱮ ᱵᱟᱝᱠᱷᱟᱱ ᱜᱟᱯᱟ ᱥᱮᱛᱟᱜᱨᱮ ᱮᱵᱷᱮᱱᱚᱜᱛᱮᱢ ᱵᱤᱞᱳᱢᱚᱜᱼᱟ᱾ ᱟᱨ ᱜᱟᱯᱟ ᱛᱤᱠᱤᱱ ᱵᱮᱲᱟ ᱯᱷᱳᱱᱢᱮ ᱦᱟᱸᱜᱠᱷᱟᱱ᱾”
ᱤᱯᱤᱞ ᱯᱷᱳᱱ ᱵᱟᱝ ᱫᱚᱦᱚ ᱥᱟᱱᱟᱭᱮ ᱠᱟᱱᱟ ᱮᱱᱛᱮᱨᱮᱦᱚᱸ ᱫᱚᱦᱚᱠᱮᱫ ᱜᱮᱭᱟᱭ᱾
ᱥᱮᱨᱢᱟ ᱟᱨ ᱤᱯᱤᱞ ᱛᱟᱹᱠᱤᱱᱟᱜ ᱮᱛᱚᱦᱚᱵ ᱫᱟᱱᱟᱝ ᱫᱩᱞᱟᱹᱲ ᱨᱮᱭᱟᱜ ᱡᱤᱭᱚᱱ ᱠᱟᱹᱦᱱᱤ ᱫᱚ ᱱᱚᱝᱠᱟᱼ,
ᱥᱮᱨᱢᱟ ᱤᱯᱤᱞ ᱛᱟᱹᱠᱤᱱᱟᱜ ᱧᱟᱯᱟᱢ ᱜᱟᱛᱮ ᱯᱮᱲᱟ ᱞᱮᱠᱟᱛᱮᱫᱚ ᱵᱟᱝᱠᱟᱱᱟ᱾ᱥᱟᱹᱜᱩᱱ ᱟᱨ ᱥᱮᱨᱢᱟ ᱜᱟᱛᱮ ᱫᱚ ᱵᱟᱝᱠᱤᱱ ᱛᱟᱸᱦᱮᱠᱟᱱᱟ᱾ ᱦᱟᱹᱱᱤᱱᱩᱭ ᱴᱷᱮᱱᱠᱷᱚᱱ ᱢᱩᱪᱟᱹᱫᱨᱮ ᱥᱮᱨᱢᱟ ᱴᱷᱮᱱ ᱤᱯᱤᱞᱟᱜ ᱯᱷᱳᱱ ᱱᱟᱢᱵᱟᱨ ᱥᱮᱴᱮᱨᱞᱮᱱᱛᱮᱜᱮ ᱥᱮᱨᱢᱟ ᱤᱯᱤᱞᱼᱮ ᱯᱟᱧᱡᱟ ᱞᱮᱫᱮᱭᱟ᱾ ᱩᱱ ᱡᱚᱠᱷᱮᱡ ᱫᱚ ᱥᱮᱨᱢᱟ ᱵᱟᱝᱼᱮ ᱵᱩᱡᱷᱟᱹᱣ ᱫᱟᱲᱮᱭᱟᱠᱟᱫ ᱛᱟᱸᱦᱮᱱᱟ ᱢᱮᱱᱛᱮ ᱤᱯᱤᱞ ᱫᱚ ᱰᱟᱺᱜᱩᱭᱟᱹ ᱠᱩᱲᱤ ᱥᱮ ᱵᱟᱹᱦᱩᱲᱤᱭᱟᱹ᱾ ᱤᱯᱤᱞ ᱦᱚᱸ ᱥᱮᱨᱢᱟ ᱴᱷᱮᱱ ᱥᱟᱹᱨᱤ ᱠᱟᱛᱷᱟ ᱵᱟᱝᱼᱮ ᱥᱚᱫᱚᱨ ᱟᱠᱟᱫ ᱛᱟᱸᱦᱮᱱᱟ᱾ ᱡᱟᱸᱦᱟ ᱦᱤᱞᱳᱜ ᱡᱟᱢᱛᱟᱲᱟ ᱦᱟᱴᱨᱮ ᱯᱳᱹᱭᱞᱳᱠᱤᱱ ᱧᱟᱯᱟᱢᱞᱮᱱᱟ ᱩᱱᱦᱤᱞᱳᱜ ᱥᱮᱨᱢᱟ ᱫᱚ ᱦᱚᱲ ᱥᱟᱢᱟᱝᱮᱨᱮ ᱨᱚᱯᱚᱲᱚᱜᱛᱮ ᱫᱚ ᱟᱹᱰᱤ ᱵᱟᱹᱲᱛᱤ ᱞᱟᱡᱟᱣᱼᱮ ᱵᱩᱡᱷᱟᱹᱣ ᱞᱮᱫᱼᱟ ᱢᱮᱱᱠᱷᱟᱱ ᱥᱮᱱᱫᱽᱨᱟᱢ ᱫᱩᱠᱟᱹᱱᱟ ᱟᱨ ᱥᱮᱱᱫᱽᱨᱟ ᱡᱤᱞ ᱵᱟᱝᱼᱮᱢ ᱡᱚᱢᱟ ᱱᱚᱝᱠᱟᱢᱟ ᱚᱠᱚᱭᱜᱮ ᱵᱟᱝᱼᱟᱛᱟᱠᱳ᱾ ᱦᱳᱭᱮᱱᱥᱮᱭ ᱵᱟᱹᱦᱩᱲᱤᱭᱟᱹ ᱪᱮᱫ ᱪᱤᱠᱟᱹᱭᱟᱠᱟᱱᱛᱮ, ᱱᱚᱣᱟᱢᱟᱛᱷᱚ ᱳᱠᱳ ᱠᱳᱢᱲᱳ ᱡᱚᱢ ᱧᱩ᱾
ᱥᱟᱹᱨᱤᱜᱮ, ᱚᱲᱟᱜᱨᱮ ᱫᱷᱚᱨᱚᱢ ᱥᱟᱹᱠᱷᱤ ᱪᱷᱟᱛᱟᱫᱟᱨᱮ ᱛᱟᱸᱦᱮᱱ ᱛᱩᱞᱩᱡ, ᱦᱟᱱᱦᱟᱨ ᱟᱭᱳ ᱟᱨ ᱦᱚᱧᱦᱟᱨ ᱵᱟᱵᱟ ᱛᱟᱠᱚᱣᱼᱟᱜ ᱫᱩᱞᱟᱹᱲ ᱜᱷᱟᱨᱚᱧᱡᱽᱨᱮ ᱛᱟᱸᱦᱮᱱ ᱛᱩᱞᱩᱡ ᱵᱟᱹᱲᱛᱤ ᱥᱩᱠ ᱨᱟᱹᱥᱠᱟᱹ ᱞᱟᱹᱜᱤᱫᱛᱮ ᱵᱟᱝ ᱵᱟᱰᱟᱭ ᱠᱷᱟᱺᱫᱽᱨᱤᱝ ᱫᱚᱨᱭᱟ ᱫᱟᱜ ᱛᱟᱞᱟᱨᱮ ᱞᱟᱹᱣᱠᱟᱹ ᱰᱷᱚᱸᱜᱟ ᱰᱚᱭᱞᱚᱝ ᱞᱮᱠᱟ ᱵᱮᱹᱪᱩᱨᱤᱛᱟᱱ ᱵᱟᱹᱦᱩᱲᱤᱭᱟᱹᱠᱳ ᱡᱤᱭᱚᱱ ᱠᱳ ᱰᱚᱭᱞᱚᱝ ᱛᱟᱠᱚᱣᱟ᱾ ᱚᱱᱠᱟᱜᱮ ᱱᱩᱠᱤᱱᱟᱜ ᱦᱚᱸ᱾ ᱧᱮᱞ ᱧᱮᱞᱛᱮ ᱛᱟᱨᱟ ᱠᱮᱪᱟᱜ ᱪᱟᱱᱫᱳ ᱚᱛ ᱠᱩᱱᱟᱹᱢᱤ ᱠᱷᱚᱱᱮ ᱵᱩᱨᱩ ᱠᱩᱱᱟᱹᱢᱤᱭᱮᱱᱟ᱾ ᱪᱟᱱᱫᱳᱭ ᱜᱟᱦᱱᱟᱜᱼᱟ ᱡᱷᱚᱢᱚᱨ ᱡᱷᱚᱢᱚᱨ ᱫᱟᱜᱼᱮ ᱡᱟᱹᱲᱤᱭᱟ, ᱨᱮᱭᱟᱲ ᱡᱷᱟᱨᱱᱟ ᱞᱤᱸᱜᱤᱱᱟ ᱵᱩᱨᱩ ᱥᱳᱛᱟᱞᱛᱮ᱾ ᱢᱮᱱᱠᱷᱟᱱ ᱥᱮᱨᱢᱟ ᱟᱨ ᱤᱯᱤᱞ ᱛᱟᱹᱠᱤᱱ ᱫᱚ ᱢᱚᱱᱮ ᱡᱤᱣᱤ ᱮᱠᱟᱞᱠᱤᱱ ᱜᱚᱴᱟᱣᱟᱠᱟᱫᱼᱟ ᱢᱮᱱᱛᱮ ᱪᱮᱫ ᱵᱚᱛᱚᱨᱜᱮ ᱵᱟᱹᱱᱩᱜᱼᱟ, ᱦᱤᱡᱩᱜ ᱨᱮᱦᱚᱸ ᱦᱚᱭᱫᱟᱜ ᱦᱩᱰᱩᱨ ᱵᱤᱡᱽᱞᱤ ᱟᱹᱛᱩᱜ ᱨᱮᱦᱚᱸ ᱵᱳᱦᱮᱞ ᱵᱟᱱ ᱫᱟᱜ ᱪᱮᱫᱨᱮᱦᱚᱸ ᱵᱚᱛᱚᱨᱜᱮ ᱵᱟᱝ, ᱮᱠᱷᱮᱱ ᱨᱟᱹᱥᱠᱟᱹ ᱟᱨ ᱨᱟᱹᱥᱠᱟ, ᱥᱩᱠ ᱟᱨ ᱥᱩᱠ᱾ ᱱᱚᱣᱟ ᱫᱩᱞᱟᱹᱲ ᱨᱮᱭᱟᱜ ᱫᱷᱟᱹᱨᱛᱤᱨᱮ ᱛᱟᱸᱦᱮᱱᱟᱠᱤᱱ ᱥᱳᱯᱳᱨ ᱥᱳᱯᱳᱨ ᱟᱨᱠᱳ ᱥᱟᱸᱜᱮ ᱡᱚᱲᱡᱩᱨᱤ ᱞᱮᱠᱟ᱾






(᱓)
ᱢᱤᱫ ᱢᱟᱦᱟ ᱦᱳᱭ ᱯᱟᱨᱚᱢᱮᱱᱟ᱾ ᱱᱚᱛᱮ ᱤᱯᱤᱞ ᱨᱮᱱ ᱟᱭᱳ ᱵᱟᱵᱟ ᱛᱟᱹᱠᱤᱱ ᱡᱤᱣᱤ ᱞᱟᱲᱮᱡ ᱞᱟᱹᱜᱤᱫᱛᱮ ᱤᱯᱤᱞ ᱵᱟᱝᱠᱤᱱ ᱤᱫᱤ ᱛᱚᱨᱟ ᱞᱮᱫᱮᱭᱟ᱾ ᱡᱟᱹᱱᱤᱡ ᱠᱷᱟᱱ ᱳᱱᱠᱤᱱ ᱫᱚ ᱩᱱᱟᱹᱜ ᱫᱩᱠ ᱵᱟᱝᱠᱤᱱ ᱟᱴᱠᱟᱨᱮᱫᱼᱟ᱾ ᱪᱮᱫᱟᱜᱥᱮ ᱟᱡ ᱠᱩᱥᱤᱛᱮᱭ ᱡᱟᱶᱟᱭ ᱞᱮᱱᱟ᱾ ᱚᱱᱟᱛᱮ ᱡᱟᱹᱱᱤᱡ ᱱᱤᱛᱦᱚᱸ ᱢᱚᱱᱮ ᱢᱚᱱᱮᱛᱮᱠᱤᱱ ᱢᱮᱢᱮᱱ ᱠᱟᱱᱟᱼ ᱢᱟᱨᱟᱝ ᱢᱟᱹᱭ, ᱦᱚᱯᱚᱱ ᱢᱟᱹᱭ ᱛᱟᱠᱳᱛᱷᱚ ᱢᱮᱱᱟᱜ ᱠᱚᱣᱟ ᱛᱟᱞᱟ ᱢᱟᱹᱭᱼᱮ ᱛᱟᱞᱟ ᱴᱟᱺᱰᱤ ᱞᱮᱱᱠᱷᱟᱱ ᱪᱮᱫᱦᱚᱸ ᱵᱟᱝ ᱵᱟᱹᱲᱤᱡᱚᱜᱼᱟ᱾
ᱥᱟᱹᱨᱤᱜᱮ ᱫᱷᱟᱹᱨᱛᱤᱨᱮ ᱟᱭᱢᱟ ᱞᱮᱠᱟᱱ ᱢᱟᱹᱱᱢᱤᱵᱳᱱ ᱳᱯᱮᱹᱞᱚᱜᱼᱟ ᱚᱠᱚᱭ ᱫᱚ ᱫᱩᱠ ᱵᱳᱱ ᱧᱮᱞ ᱥᱟᱦᱟᱣ ᱠᱮᱭᱟ ᱟᱨ ᱚᱠᱚᱭ ᱫᱚ ᱮᱴᱟᱜ ᱦᱚᱲᱟᱜ ᱫᱩᱠᱨᱮ ᱱᱟᱥᱮᱦᱚᱸ ᱵᱟᱝᱵᱳᱱ ᱫᱩᱠᱚᱜᱼᱟ᱾ ᱚᱱᱟᱛᱮ ᱵᱷᱟᱹᱭ ᱵᱷᱟᱭᱟᱛᱵᱳᱱ ᱠᱷᱟᱹᱯᱟᱹᱨᱤᱜ ᱨᱮᱦᱚᱸ ᱵᱟᱨᱥᱤᱧ ᱞᱟᱹᱜᱤᱫᱜᱮ ᱟᱨ ᱚᱠᱚᱭ ᱫᱚ ᱡᱤᱭᱚᱱ ᱵᱷᱳᱨ ᱵᱟᱯᱟᱜᱽ ᱜᱮᱵᱳᱱ ᱛᱟᱸᱦᱮᱱᱟ᱾ ᱢᱮᱱᱠᱷᱟᱱ ᱱᱚᱣᱟᱠᱳ ᱨᱮᱭᱟᱜ ᱦᱚᱸ ᱚᱡᱮ ᱫᱚ ᱛᱟᱸᱦᱮᱱ ᱜᱮᱭᱟ ᱡᱟᱸᱦᱟ ᱠᱟᱹᱭᱠᱳ ᱫᱚ ᱵᱟᱹᱲᱛᱤ ᱞᱮᱱᱠᱷᱟᱱ ᱤᱠᱟᱹ ᱵᱟᱝ ᱧᱟᱢᱚᱜᱼᱟ᱾
ᱤᱯᱤᱞᱦᱚᱸ ᱴᱷᱤᱠ ᱚᱱᱠᱟᱜᱮ ᱵᱟᱹᱲᱛᱤᱜᱮᱭ ᱠᱟᱹᱢᱤ ᱵᱟᱹᱲᱤᱡ ᱟᱠᱟᱫᱼᱟ᱾ ᱡᱟᱸᱦᱟ ᱦᱤᱞᱳᱜ ᱟᱡ ᱧᱩᱛᱩᱢᱛᱮ ᱥᱟᱹᱜᱩᱱ ᱥᱩᱛᱟᱹᱢ ᱜᱤᱨᱟᱹᱼᱟᱛᱮᱫᱠᱳ ᱛᱚᱻᱛᱚᱞ ᱠᱟᱱ ᱛᱟᱸᱦᱮᱠᱟᱱᱟ ᱤᱱᱟᱹ ᱦᱤᱞᱳᱜᱼᱜᱮ ᱩᱱᱤ ᱫᱚ ᱥᱟᱹᱜᱩᱱ ᱥᱟᱶᱛᱮᱭ ᱟᱹᱝᱜᱤᱨ ᱩᱛᱟᱹᱨᱞᱮᱱᱟ᱾ ᱫᱷᱟᱶᱲᱟ ᱫᱷᱟᱺᱣᱲᱤ ᱟᱸᱫᱟᱜ ᱛᱟᱣᱟᱜ ᱥᱮᱱᱫᱽᱨᱟ ᱠᱟᱛᱮᱫ ᱨᱮᱦᱚᱸ ᱵᱟᱝᱠᱳ ᱯᱟᱧᱡᱟ ᱧᱟᱢᱞᱮᱫ ᱛᱟᱸᱦᱮᱠᱟᱱᱟ ᱤᱯᱤᱞᱟᱜ ᱠᱷᱚᱡᱽ ᱛᱚᱞᱟᱥ᱾ ᱵᱟᱨ ᱪᱟᱱᱫᱳ ᱛᱟᱭᱱᱚᱢ ᱥᱟᱹᱜᱩᱱ ᱛᱟᱠᱳ ᱚᱲᱟᱜ ᱦᱚᱲ ᱟᱛᱳᱨᱮ ᱠᱟᱛᱷᱟ ᱠᱳ ᱯᱟᱥᱱᱟᱣ ᱠᱮᱫᱼᱟ ᱵᱟᱝᱢᱟ ᱟᱠᱳ ᱥᱟᱹᱜᱩᱱ ᱵᱮᱴᱟ ᱫᱚ ᱵᱟᱹᱦᱩᱭᱮ ᱞᱟᱹᱜᱤᱫ ᱢᱤᱫ ᱠᱩᱲᱤ ᱜᱤᱫᱟᱹᱨᱼᱮ ᱚᱲᱟᱜ ᱵᱷᱤᱛᱟᱹᱨ ᱟᱠᱟᱫᱮᱭᱟ᱾ ᱥᱟᱹᱜᱩᱱ ᱨᱮᱱ ᱟᱭᱳ ᱵᱟᱵᱟ ᱛᱟᱹᱠᱤᱱᱠᱤᱱ ᱜᱚᱴᱟ ᱥᱟᱹᱨᱤ ᱠᱮᱫᱼᱟ, ᱥᱟᱹᱜᱩᱱ ᱫᱚ ᱮᱠᱞᱟ ᱦᱚᱯᱚᱱ, ᱱᱚᱝᱠᱟ ᱟᱡ ᱠᱩᱥᱤᱛᱮ ᱡᱚᱠᱷᱮᱡ ᱦᱟᱯᱮᱱ ᱡᱤᱭᱚᱱ ᱞᱟᱹᱜᱤᱫ ᱡᱩᱨᱤᱭᱮ ᱡᱚᱴᱟᱣᱟᱱᱟ ᱟᱨ ᱵᱟᱹᱲᱛᱤ ᱢᱟᱱᱟ ᱫᱚ ᱵᱟᱝ ᱱᱟᱯᱟᱭᱟ ᱟᱨ ᱤᱯᱤᱞ ᱨᱮᱱ ᱟᱭᱳ ᱵᱟᱵᱟᱦᱚᱸ ᱚᱱᱠᱟᱜᱮ ᱦᱚᱯᱚᱱᱮᱨᱟᱼᱟᱜ ᱠᱩᱥᱤᱨᱮ ᱵᱟᱝᱠᱤᱱ ᱵᱤᱨᱩᱫᱽ ᱞᱮᱫᱼᱟ᱾ ᱚᱱᱟᱛᱮ ᱥᱟᱹᱜᱩᱱ ᱟᱨ ᱤᱯᱤᱞ ᱛᱟᱹᱠᱤᱱᱠᱳ ᱵᱟᱯᱞᱟᱠᱟᱫ ᱠᱤᱱᱟᱹ ᱠᱳᱸᱰᱮᱹᱞ ᱧᱟᱯᱟᱢ ᱵᱟᱦᱟ ᱥᱟᱶᱦᱟ ᱠᱟᱛᱮᱫ᱾ ᱢᱮᱱᱠᱷᱟᱱ ᱫᱩᱠ ᱨᱮᱭᱟᱜ ᱠᱟᱛᱷᱟ; ᱪᱟᱣᱞᱮ ᱠᱷᱟᱹᱡᱟᱹᱲᱤ ᱮᱯᱮᱢ ᱪᱟᱯᱟᱞ ᱦᱳᱭᱮᱱ ᱨᱮᱦᱚᱸ ᱨᱟᱹᱜᱤ ᱡᱟᱞᱟᱛᱮ ᱵᱟᱹᱴᱤ ᱞᱚᱴᱟ ᱫᱚ ᱢᱤᱫᱴᱟᱝᱦᱚᱸ ᱵᱟᱝᱠᱳ ᱮᱢᱟᱠᱟᱫᱮᱭᱟ᱾
ᱤᱱᱟᱹᱛᱟᱭᱱᱚᱢ ᱡᱟᱶᱟᱭ ᱚᱲᱟᱜ ᱠᱷᱚᱱᱜᱮ ᱢᱚᱱᱮ ᱨᱤᱠᱤᱲ ᱠᱟᱛᱮᱫ ᱫᱷᱩᱨᱟᱹᱣᱮᱱᱟᱭ ᱚᱞ ᱯᱟᱲᱦᱟᱣ᱾ ᱯᱟᱲᱦᱟᱣ ᱯᱩᱨᱟᱹᱣ ᱠᱮᱫᱼᱟᱭ ᱜᱮᱞᱵᱟᱨ ᱪᱟᱱᱟᱪ᱾ ᱢᱚᱞᱚᱝ ᱨᱮᱭᱟᱜ ᱡᱚᱥ ᱛᱟᱸᱦᱮᱠᱟᱱ ᱠᱷᱟᱹᱛᱤᱨᱛᱮ ᱢᱤᱫ ᱥᱮᱨᱢᱟ ᱟᱹᱣᱨᱤ ᱟᱹᱪᱩᱨ ᱯᱩᱨᱟᱹᱜᱛᱮᱜᱮ ᱵᱟᱦᱟᱞᱤ ᱮᱱᱟᱭ ᱟᱛᱳ ᱥᱳᱨ ᱡᱟᱹᱱᱩᱢᱰᱤ ᱟᱛᱳ ᱵᱤᱨᱫᱟᱹᱜᱟᱲᱷᱨᱮᱱ ᱢᱟᱪᱮᱛᱟᱱᱤ ᱞᱮᱠᱟᱛᱮ᱾
ᱱᱤᱛᱳᱜ ᱤᱯᱤᱞᱟᱜ ᱵᱟᱯᱞᱟ ᱠᱟᱛᱮᱫ ᱵᱟᱨ ᱥᱮᱨᱢᱟ ᱞᱮᱠᱟ ᱦᱳᱭ ᱯᱟᱨᱚᱢᱞᱮᱱ ᱨᱮᱦᱚᱸ ᱥᱟᱹᱜᱩᱱᱟᱜ ᱛᱤᱛᱮ ᱮᱨ ᱤᱛᱟᱹ ᱵᱟᱝ ᱚᱢᱚᱱ ᱟᱠᱟᱱᱟ᱾ ᱵᱟᱝᱢᱟ ᱰᱟᱠᱛᱟᱨ, ᱚᱡᱷᱟ ᱥᱟᱱᱟᱢ ᱠᱚᱣᱟᱜ ᱨᱟᱱᱜᱮ ᱤᱯᱤᱞᱼᱮ ᱡᱚᱢ ᱵᱤᱰᱟᱹᱣ ᱟᱠᱟᱫ ᱛᱟᱸᱦᱮᱱᱟ ᱢᱮᱱᱠᱷᱟᱱ ᱦᱮᱢ ᱦᱚᱵᱚᱨᱟᱱᱟᱜ ᱠᱩᱠᱢᱩ ᱫᱚ ᱵᱟᱝ ᱥᱟᱹᱨᱤᱭᱟᱠᱟᱱ ᱛᱟᱭᱟ᱾ ᱥᱟᱱᱟᱢᱜᱮᱠᱳ ᱢᱮᱱ ᱟᱠᱟᱫᱼᱟᱼ ᱵᱟᱝ, ᱤᱯᱤᱞ ᱫᱚᱭ ᱱᱟᱯᱟᱭ ᱜᱮᱭᱟ, ᱦᱚᱲᱢᱚᱨᱮ ᱪᱮᱫ ᱜᱷᱟᱹᱴᱛᱤᱜᱮ ᱵᱟᱹᱱᱩᱜ ᱛᱟᱭᱟ ᱥᱟᱱᱟᱢ ᱥᱮᱫᱛᱮᱭ ᱱᱤᱯᱷᱩᱴ ᱜᱮᱭᱟ᱾ ᱢᱮᱱᱠᱷᱟᱱ ᱥᱟᱹᱜᱩᱱᱟᱜ ᱦᱚᱲᱢᱚ ᱨᱮᱜᱮ ᱯᱟᱞᱮᱱ ᱡᱟᱸᱦᱟᱱᱟᱜ ᱜᱩᱞᱢᱟᱞ ᱢᱮᱱᱟᱜ ᱚᱱᱟᱫᱚ ᱚᱠᱚᱭ ᱰᱟᱠᱛᱟᱨ ᱚᱡᱷᱟᱦᱚᱸ ᱵᱟᱝᱠᱳ ᱧᱮᱞ ᱞᱮᱜᱟ ᱞᱮᱫᱼᱟ᱾
ᱢᱤᱫ ᱢᱟᱦᱟ ᱦᱤᱞᱳᱜ ᱫᱚ ᱰᱟᱹᱰᱤ ᱜᱷᱟᱴᱨᱮ ᱫᱟᱜ ᱞᱩᱞᱩ ᱚᱠᱛᱚ ᱤᱯᱤᱞᱼᱟᱜ ᱵᱚᱦᱚᱜ ᱜᱩᱨᱜᱩᱨᱟᱹᱣᱞᱮᱱ ᱛᱟᱭᱟ᱾ ᱥᱟᱶᱛᱮᱠᱳ ᱛᱟᱸᱦᱮᱠᱟᱱ ᱧᱟᱛᱟᱛ ᱮᱨᱟᱠᱳ ᱫᱚ ᱥᱟᱱᱟᱢᱟᱜ ᱠᱳ ᱵᱩᱡᱷᱟᱹᱣ ᱛᱮᱵᱟᱜ ᱠᱮᱫᱠᱷᱟᱱ ᱟᱛᱳ ᱚᱲᱟᱜᱨᱮ ᱠᱟᱛᱷᱟ ᱯᱟᱥᱱᱟᱣᱞᱮᱱᱟ ᱢᱮᱱᱛᱮ ᱤᱯᱤᱞᱟᱜ ᱯᱟᱹᱴᱭᱟᱹ ᱯᱮᱨᱮᱡᱚᱜ ᱠᱟᱱᱟ᱾ ᱢᱟᱲᱟᱝ ᱫᱚ ᱤᱯᱤᱞ ᱵᱟᱝᱼᱮ ᱵᱩᱡᱷᱟᱹᱣᱟᱠᱟᱫ ᱛᱟᱸᱦᱮᱱᱟ ᱢᱮᱱᱛᱮ ᱥᱮᱨᱢᱟ ᱥᱟᱶᱛᱮ ᱳᱠᱳ ᱫᱟᱱᱟᱝ ᱧᱟᱯᱟᱢ ᱨᱚᱯᱚᱲᱛᱮ ᱯᱷᱟᱹᱨᱭᱟᱹ ᱢᱚᱱᱮ ᱡᱤᱣᱤᱨᱮ ᱠᱩᱭᱟᱹ ᱡᱮᱨᱮᱲᱚᱜᱼᱟ ᱢᱮᱱᱛᱮ᱾ ᱥᱮᱨᱢᱟ ᱴᱷᱮᱱ ᱟᱫᱚ ᱚᱱᱟ ᱠᱟᱛᱷᱟᱭ ᱥᱚᱫᱚᱨᱞᱮᱫ ᱛᱟᱭᱱᱚᱢ ᱥᱮᱨᱢᱟ ᱫᱚ ᱟᱹᱰᱤᱜᱮᱭ ᱠᱩᱥᱤᱞᱮᱱᱟ, ᱪᱮᱫᱟᱜᱥᱮ ᱥᱮᱨᱢᱟ ᱫᱚ ᱰᱟᱺᱜᱩᱭᱟᱹᱨᱮᱭ ᱟᱯᱟᱛᱚᱜᱼᱟ᱾ ᱟᱨ ᱱᱚᱣᱟ ᱠᱟᱛᱷᱟ ᱫᱚ ᱤᱯᱤᱞ ᱵᱮᱜᱚᱨ ᱚᱠᱚᱭᱜᱮ ᱵᱟᱝᱠᱳ ᱵᱟᱰᱟᱭ ᱫᱟᱲᱮᱭᱟᱜᱼᱟ᱾ ᱢᱮᱱᱠᱷᱟᱱ ᱦᱳᱭᱟᱠᱟᱱᱟ ᱚᱱᱟ ᱨᱮᱭᱟᱜ ᱩᱞᱴᱟᱹ᱾ ᱤᱯᱤᱞᱼᱮ ᱟᱹᱨᱡᱤ ᱞᱮᱫᱼᱟ ᱢᱮᱱᱛᱮ ᱜᱤᱫᱟᱹᱨ ᱮᱸᱜᱟᱛᱚᱜᱼᱟᱭ ᱢᱮᱱᱠᱷᱟᱱ ᱟᱡ ᱡᱟᱶᱟᱭᱼᱟᱜ ᱛᱤ ᱛᱮᱜᱮ᱾ ᱚᱱᱟᱛᱮ ᱥᱮᱨᱢᱟ ᱥᱟᱶᱛᱮ ᱟᱹᱭᱩᱨ ᱠᱟᱛᱮᱫ ᱨᱟᱱᱼᱮ ᱠᱤᱨᱤᱧ ᱡᱚᱢ ᱟᱠᱟᱫᱼᱟ᱾ ᱩᱱᱨᱮ ᱤᱯᱤᱞ ᱵᱟᱝᱼᱮ ᱟᱹᱡᱟᱹᱲᱤ ᱞᱮᱱᱠᱷᱟᱱ ᱱᱤᱛᱳᱜ ᱫᱚ ᱜᱤᱫᱟᱹᱨ ᱮᱸᱜᱟᱛ ᱠᱟᱛᱮᱫᱜᱮᱭ ᱨᱟᱺᱰᱤ ᱠᱚᱜᱼᱟ᱾






(᱔)
ᱥᱮᱨᱢᱟ ᱤᱯᱤᱞ ᱟᱨ ᱵᱟᱹᱲᱛᱤ ᱚᱠᱛᱚ ᱵᱟᱝᱠᱤᱱ ᱧᱮᱞ ᱯᱟᱨᱚᱢ ᱦᱚᱪᱚᱣᱟᱫᱟ᱾ ᱥᱟᱹᱜᱩᱱᱟᱜ ᱵᱤᱫᱟᱹᱭ ᱠᱷᱚᱱ ᱢᱤᱫ ᱪᱟᱱᱫᱳ ᱛᱟᱭᱱᱚᱢ ᱡᱷᱚᱯᱚᱨᱡᱳᱞᱮ ᱠᱤᱱ ᱥᱮᱴᱮᱨᱮᱱᱟ ᱥᱮᱨᱢᱟ ᱛᱟᱠᱚᱣᱟᱜ ᱵᱟᱠᱷᱳᱞ ᱮᱠᱟᱞ ᱵᱮᱲᱟ ᱦᱟᱺᱥᱩᱨ ᱛᱟᱭᱱᱚᱢ᱾ ᱥᱮᱨᱢᱟ ᱟᱡ ᱟᱭᱳ ᱫᱚᱭ ᱥᱩᱧᱡᱟᱹᱭᱮᱫᱼᱟ ᱛᱟᱞᱟ ᱨᱟᱪᱟ ᱨᱮᱭᱟᱜ ᱛᱩᱨᱥᱤ ᱛᱷᱟᱱᱨᱮ ᱟᱨ ᱟᱡ ᱵᱟᱵᱟ ᱫᱚ ᱯᱤᱸᱰᱟᱹ ᱨᱮᱭᱟᱜ ᱯᱟᱨᱠᱚᱢᱨᱮ ᱫᱩᱲᱩᱵ ᱠᱟᱛᱮᱫᱼᱮ ᱚᱜᱼᱚᱞ ᱠᱟᱱᱟ᱾ ᱩᱱᱤ ᱫᱚ ᱢᱤᱫ ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱠᱟᱱᱟᱭ᱾ ᱫᱤᱥᱚᱢ ᱡᱟᱠᱟᱛᱨᱮᱱ ᱯᱟᱹᱴᱷᱩᱭᱟᱹᱠᱳ ᱯᱩᱛᱷᱤᱨᱮ, ᱯᱟᱛᱷᱟᱢᱨᱮ ᱩᱱᱤᱭᱟᱜ ᱚᱞᱠᱳ ᱯᱟᱲᱦᱟᱣ ᱛᱟᱭᱟ᱾ ᱡᱚᱠᱷᱮᱡᱜᱮ ᱥᱮᱨᱢᱟ ᱟᱡ ᱟᱭᱳ ᱤᱠᱲᱩᱢ ᱠᱷᱚᱱᱼᱮ ᱵᱟᱨᱮᱫ ᱮᱱᱟ ᱟᱨ ᱡᱚᱡᱚᱢ ᱛᱤ ᱢᱚᱞᱚᱝ ᱨᱮᱭ ᱵᱷᱤᱲᱟᱹᱣ ᱞᱟᱹᱜᱤᱫᱚᱜ ᱠᱟᱱᱟ ᱵᱳᱝᱜᱟ ᱡᱚᱦᱟᱨ ᱧᱩᱛᱩᱢ ᱩᱱᱠᱷᱟᱱᱜᱮᱭ ᱧᱮᱞᱮᱠᱟᱱᱟ ᱥᱟᱢᱟᱝᱨᱮ ᱞᱮᱸᱡᱮᱨ ᱞᱩᱜᱽᱲᱤᱡ ᱵᱟᱱᱫᱮ ᱠᱟᱛᱮᱫ ᱪᱤᱞᱤ ᱵᱳᱝᱜᱟ ᱠᱩᱲᱤ ᱪᱚᱝ, ᱢᱮᱱᱠᱷᱟᱱ ᱩᱱᱤ ᱛᱟᱭᱱᱚᱢᱨᱮ ᱫᱚ ᱟᱨᱦᱚᱸ ᱚᱠᱚᱭ? ᱱᱟᱯᱟᱭ ᱥᱟᱺᱦᱤᱡ ᱠᱚᱭᱚᱜ ᱠᱟᱛᱮᱫᱼᱮ ᱧᱮᱞᱮᱠᱟᱱᱟ, ᱳ ᱱᱩᱭᱢᱟ ᱥᱮᱨᱢᱟ ᱵᱮᱴᱟ᱾
ᱥᱮᱨᱢᱟ ᱟᱡ ᱵᱟᱵᱟ ᱟᱫᱚ ᱚᱞᱚᱜ ᱱᱚᱱᱚᱞ ᱦᱟᱹᱯᱤᱫ ᱠᱟᱛᱮᱫ ᱥᱮᱨᱢᱟ ᱛᱟᱹᱠᱤᱱᱥᱮᱫ ᱠᱚᱭᱚᱜ ᱦᱟᱹᱯᱤ ᱠᱟᱛᱮᱫᱼᱮ ᱛᱟᱸᱦᱮᱭᱮᱱᱟ᱾ ᱫᱩᱲᱩᱵ ᱮᱱᱟᱠᱤᱱ ᱢᱟᱨᱟᱝ ᱚᱲᱟᱜ ᱯᱤᱸᱰᱟᱹ ᱨᱮᱭᱟᱜ ᱯᱟᱨᱠᱚᱢᱨᱮ᱾ ᱟᱭᱳ ᱫᱚ ᱵᱟᱝ ᱵᱤᱞᱳᱢ ᱠᱟᱛᱮᱫ ᱞᱚᱴᱟ ᱫᱟᱜᱜᱮ ᱢᱟᱲᱟᱝᱼᱮ ᱥᱳᱨ ᱟᱫ ᱠᱤᱱᱟᱹ᱾ ᱟᱭᱳ ᱵᱟᱵᱟ ᱜᱚᱸᱰ ᱡᱚᱦᱟᱨ ᱪᱟᱞ ᱠᱟᱛᱮᱫ ᱵᱟᱱᱟᱦᱚᱲ ᱡᱟᱸᱜᱟ ᱫᱷᱩᱲᱤᱠᱤᱱ ᱟᱹᱨᱩᱵ ᱜᱤᱰᱤ ᱠᱟᱫᱟ᱾ ᱤᱱᱟᱹᱛᱟᱭᱱᱚᱢ ᱟᱭᱳ ᱵᱟᱵᱟ ᱠᱩᱠᱞᱤ ᱠᱤᱱ ᱥᱟᱨᱥᱟᱫᱽᱞᱮ ᱠᱮᱫᱼᱟ, ᱵᱮᱴᱟ ᱱᱩᱭ ᱫᱚ ᱚᱠᱚᱭ, ᱟᱨ ᱚᱠᱟᱨᱮᱱ ᱚᱠᱚᱭ ᱦᱚᱯᱚᱱᱮᱨᱟ?
ᱥᱮᱨᱢᱟ ᱫᱚ ᱪᱮᱫᱦᱚᱸ ᱵᱟᱝ ᱪᱳᱠᱳ ᱠᱟᱛᱮᱫ ᱥᱟᱱᱟᱢ ᱥᱟᱹᱨᱤ ᱠᱟᱛᱷᱟ ᱞᱟᱹᱞᱟᱹᱭᱼᱮ ᱮᱛᱚᱦᱚᱵ ᱮᱱᱟ, “ᱱᱩᱭᱟᱜ ᱧᱩᱛᱩᱢ ᱫᱚ ᱤᱯᱤᱞ, ᱟᱭᱳ ᱵᱟᱵᱟ ᱚᱲᱟᱜᱥᱮᱫᱛᱮ ᱫᱚ ᱤᱯᱤᱞ ᱢᱩᱨᱢᱩ ᱟᱨ ᱡᱟᱶᱟᱭ ᱚᱲᱟᱜᱥᱮᱫᱛᱮ ᱫᱚ ᱪᱷᱟᱹᱴᱭᱟᱹᱨ ᱞᱮᱱᱟᱭ ᱤᱯᱤᱞ ᱢᱟᱱᱰᱤ᱾”
ᱥᱮᱨᱢᱟᱼᱟᱜ ᱠᱟᱛᱷᱟ ᱟᱧᱡᱚᱢ ᱠᱟᱛᱮᱫ ᱟᱭᱳ ᱵᱟᱵᱟᱠᱤᱱ ᱦᱟᱦᱟᱲᱟᱜ ᱮᱱᱟ᱾
ᱥᱮᱨᱢᱟ ᱟᱨᱦᱚᱸ ᱠᱟᱛᱷᱟᱭ ᱛᱳᱝᱜᱮ ᱠᱮᱫᱼᱟ, “ᱚᱲᱟᱜ ᱛᱟᱠᱳ ᱫᱚ ᱠᱟᱨᱟᱢᱜᱷᱩᱴᱩᱨᱮ, ᱡᱟᱶᱟᱭ ᱞᱮᱫᱮᱭᱟᱠᱳ ᱡᱟᱢᱛᱟᱲᱟᱨᱮ᱾ ᱡᱟᱶᱟᱭ ᱛᱮᱫ ᱫᱚ ᱪᱮᱫᱪᱚᱝ ᱵᱟᱝᱵᱟᱰᱟᱭ ᱟᱡᱟᱨ ᱛᱮᱭ ᱜᱚᱡ ᱵᱟᱹᱜᱤᱭᱟᱫᱮᱭᱟ᱾ ᱢᱟᱲᱟᱝ ᱠᱷᱚᱱᱜᱮ ᱟᱹᱞᱤᱧᱟᱜ ᱳᱯᱨᱳᱢ ᱛᱟᱸᱦᱮᱠᱟᱱᱛᱮ ᱟᱫᱚ ᱱᱤᱛᱳᱜ ᱤᱧ ᱥᱟᱶᱛᱮ ᱛᱟᱸᱦᱮᱱᱮ ᱢᱮᱱᱠᱮᱫ ᱠᱷᱟᱱ ᱤᱧ ᱟᱹᱜᱩ ᱩᱛᱟᱹᱨ ᱠᱮᱫᱮᱭᱟ᱾”
ᱟᱭᱳᱭ ᱢᱮᱱᱜᱚᱫ ᱠᱮᱫᱼᱟ, “ᱢᱮᱱᱠᱷᱟᱱ ᱵᱮᱴᱟᱹᱹᱹᱹᱹ”᱾
ᱥᱮᱨᱢᱟ ᱛᱩᱨᱟᱹᱛᱜᱮ ᱟᱡ ᱟᱭᱳᱭᱟᱜ ᱠᱟᱛᱷᱟ ᱮᱴᱮᱫ ᱠᱟᱛᱮᱫᱼᱮ ᱢᱮᱱ ᱜᱚᱫ ᱠᱮᱫᱼᱟ, “ᱭᱳ, ᱵᱟᱵᱟ ᱱᱩᱭ ᱫᱚ ᱤᱧ ᱴᱷᱮᱱᱮ ᱛᱟᱸᱦᱮᱱ ᱜᱮᱭᱟ ᱟᱨ ᱱᱚᱱᱰᱮ ᱠᱷᱚᱱᱜᱮ ᱜᱤᱫᱟᱹᱨ ᱯᱟᱲᱷᱟᱣᱼᱮ ᱪᱟᱞᱟᱜᱼᱟ᱾”
ᱡᱟᱱᱟᱢᱤᱭᱟᱹ ᱵᱟᱱᱟᱦᱚᱲᱠᱤᱱ ᱠᱚᱭᱚᱜ ᱡᱚᱝ ᱟᱹᱱᱤᱡᱼᱟ᱾ ᱵᱩᱡᱷᱟᱹᱣ ᱧᱟᱢ ᱠᱮᱫᱼᱟᱠᱤᱱ ᱛᱟᱦᱞᱮᱠᱷᱟᱱ ᱟᱞᱟᱝᱨᱮᱱ ᱠᱤᱢᱤᱱ ᱫᱚ ᱢᱤᱫ ᱢᱟᱪᱮᱛᱟᱱᱤ ᱠᱟᱱᱟᱭ᱾
ᱧᱩᱛᱩᱢᱟᱱ ᱚᱱᱚᱞᱤᱭᱟᱹ ᱢᱟᱜᱟᱛ ᱢᱩᱨᱢᱩ; ᱟᱫᱚ ᱢᱚᱱᱮ ᱡᱤᱣᱤᱭ ᱜᱚᱴᱟ ᱠᱮᱫᱼᱟ, ᱵᱟᱝ ᱱᱩᱠᱤᱱ ᱫᱚ ᱟᱨ ᱵᱟᱹᱧ ᱪᱷᱟᱯᱟᱰᱟ ᱠᱤᱱᱟᱹ᱾ ᱢᱚᱱᱮᱭᱟᱹᱧ ᱱᱚᱣᱟᱦᱚᱸ ᱤᱧᱟᱹᱜ, ᱤᱧ ᱞᱟᱹᱜᱤᱫ ᱢᱤᱫᱴᱟᱝ ᱯᱟᱣᱱᱟ ᱠᱟᱱ ᱛᱤᱧᱟᱹ᱾ ᱛᱮᱦᱮᱧ ᱫᱚ ᱤᱧᱟᱹᱜ ᱡᱤᱭᱚᱱ ᱨᱮᱭᱟᱜ ᱥᱟᱢᱟᱱᱚᱢ ᱵᱚᱨᱚᱱ ᱢᱟᱦᱟ ᱥᱤᱱᱟᱹᱢ᱾ ᱛᱮᱦᱮᱧ ᱫᱚ ᱱᱟᱣᱟ ᱥᱟᱛᱟᱢ ᱤᱧ ᱚᱞ ᱯᱟᱥᱱᱟᱣᱼᱟ ᱢᱮᱱᱛᱮᱼ ᱨᱟᱸᱰᱟ ᱥᱮ ᱨᱟᱺᱰᱤ, ᱪᱷᱟᱹᱰᱣᱟᱹ ᱥᱮ ᱪᱷᱟᱹᱰᱣᱤ ᱥᱟᱱᱟᱢᱠᱳᱜᱮ ᱡᱩᱭᱟᱹᱱ ᱠᱚᱲᱟ ᱠᱩᱲᱤ ᱜᱤᱫᱽᱨᱟᱹ ᱠᱷᱟᱱᱫᱚ ᱫᱚᱦᱲᱟ ᱵᱟᱯᱞᱟ ᱮᱠᱟᱞᱛᱮ ᱜᱟᱱᱚᱜ ᱜᱮᱭᱟ᱾
ᱥᱮᱨᱢᱟ ᱟᱡ ᱟᱭᱳ ᱫᱚ ᱮᱱᱦᱚᱸᱭ ᱩᱭᱦᱟᱹᱨᱚᱜᱠᱟᱱ ᱜᱮᱭᱟ ᱚᱱᱟᱛᱮᱭ ᱠᱩᱠᱞᱤ ᱠᱮᱫᱼᱟ, “ᱵᱷᱤᱛᱟᱹᱨ ᱵᱳᱝᱜᱟ ᱥᱮᱵᱟ ᱡᱚᱛᱚᱱ ᱜᱮᱡ ᱜᱩᱨᱤᱡ ᱪᱷᱚᱸᱪ ᱪᱷᱚᱲᱟ ᱱᱚᱣᱟᱠᱳ ᱠᱟᱹᱢᱤᱢᱟ ᱱᱩᱭ ᱵᱟᱹᱦᱩᱭᱟᱛᱮᱫ ᱫᱚ ᱵᱟᱝ ᱜᱟᱱᱚᱜᱼᱟ, ᱵᱳᱝᱜᱟ ᱵᱩᱨᱩ ᱧᱩᱛᱩᱢᱛᱮ ᱦᱟᱺᱰᱤ ᱫᱚᱦᱚ ᱱᱩᱭ ᱵᱟᱹᱦᱩᱭᱟᱛᱮᱫ ᱢᱟ ᱵᱟᱝ ᱜᱟᱱᱚᱜᱼᱟ ᱛᱟᱦᱞᱮᱠᱷᱟᱱ ᱵᱮᱴᱟ ᱦᱟᱯᱮᱱ ᱪᱮᱫ ᱦᱳᱭᱳᱜᱼᱟ?”
ᱥᱮᱨᱢᱟ ᱟᱫᱚᱭ ᱛᱮᱞᱟ ᱠᱮᱫᱼᱟ, “ᱭᱳ, ᱟᱢ ᱢᱮᱱᱟᱜᱢᱮ ᱵᱷᱳᱨ ᱫᱚ ᱟᱢᱮᱢ ᱠᱟᱹᱢᱤᱭᱟ ᱟᱨ ᱵᱟᱝᱼᱮᱢ ᱫᱟᱲᱮᱭᱟᱜᱨᱮ ᱫᱚ ᱵᱷᱤᱛᱟᱹᱨ ᱵᱳᱝᱜᱟᱠᱳ ᱫᱚ ᱤᱧᱤᱧ ᱢᱟᱱᱚᱛ ᱠᱚᱣᱟ᱾ ᱳᱱᱠᱳ ᱧᱩᱛᱩᱢ ᱦᱟᱺᱰᱤᱦᱚᱸ ᱤᱧᱤᱧ ᱫᱚᱦᱚᱭᱟ᱾”
ᱥᱮᱨᱢᱟ ᱟᱡ ᱵᱟᱵᱟ ᱟᱫᱚ ᱫᱚᱥᱟᱨ ᱦᱤᱞᱳᱜ ᱠᱷᱚᱱᱜᱮ ᱠᱟᱹᱢᱤᱦᱚᱨᱟ ᱥᱟᱵ ᱥᱳᱨᱮ ᱮᱛᱚᱦᱚᱵ ᱠᱮᱫᱼᱟ ᱟᱨ ᱢᱤᱫ ᱪᱟᱱᱫᱳ ᱵᱷᱤᱛᱨᱤᱛᱮ ᱥᱟᱦᱟᱱ ᱥᱟᱠᱟᱢ ᱠᱷᱟᱹᱡᱟᱹᱲᱤ ᱪᱟᱣᱞᱮ ᱥᱟᱱᱟᱢᱮ ᱥᱟᱯᱲᱟᱣ ᱠᱮᱫᱛᱮ ᱟᱛᱳ ᱴᱚᱞᱟ ᱯᱮᱲᱟ ᱯᱟᱺᱦᱲᱟᱹ ᱥᱟᱶᱛᱮ ᱥᱟᱱᱟᱢ ᱜᱟᱛᱮᱠᱳ ᱱᱮᱣᱛᱟ ᱠᱟᱛᱮᱫ ᱠᱤᱢᱤᱱᱛᱮᱫᱼᱟᱜ ᱫᱚᱦᱲᱟ ᱵᱟᱯᱞᱟᱭ ᱥᱟᱨ ᱥᱟᱹᱜᱩᱱ ᱠᱮᱫᱼᱟ᱾ ᱥᱟᱱᱟᱢ ᱫᱤᱥᱚᱢ ᱯᱮᱲᱟᱠᱳ ᱞᱮᱦᱮᱜᱮᱫᱮ ᱵᱷᱚᱡᱽ ᱫᱟᱠᱟᱠᱳ ᱡᱚᱢ ᱠᱮᱫᱛᱮ ᱫᱚᱝᱥᱟᱞ ᱮᱱᱮᱡ ᱟᱠᱷᱲᱟᱨᱮ ᱟᱹᱰᱤ ᱡᱚᱢᱚᱠ ᱦᱩᱰᱜᱩᱼᱰᱩᱜᱩᱨᱟᱛᱮᱫ ᱨᱟᱹᱥᱠᱟᱹᱠᱳ ᱦᱟᱯᱟᱴᱤᱧ ᱠᱮᱫᱼᱟ᱾ ᱥᱟᱶᱛᱮ ᱮᱱᱮᱡ ᱟᱴᱟᱞᱨᱮ ᱥᱮᱨᱢᱟ ᱟᱨ ᱤᱯᱤᱞ ᱛᱟᱹᱠᱤᱱᱦᱚᱸ ᱠᱳ ᱥᱟᱵ ᱢᱮᱥᱟ ᱠᱮᱫ ᱠᱤᱱᱟᱹ ᱟᱨ ᱥᱮᱨᱮᱧ ᱠᱟᱛᱮᱫ ᱠᱳ ᱟᱧᱡᱚᱢᱟᱫ ᱠᱤᱱᱟᱹᱼ
ᱩᱢᱤᱱ ᱫᱤᱱ ᱫᱚ ᱢᱟᱭᱱᱚ ᱢᱤᱨᱩ ᱫᱚ
ᱛᱚᱠᱚᱭ ᱥᱤᱨᱤᱡᱟᱞᱟ ᱴᱟᱺᱰᱤ ᱴᱤᱠᱩᱨ??
ᱛᱮᱦᱮᱧ ᱫᱤᱱ ᱫᱚ ᱢᱟᱭᱱᱚ ᱢᱤᱨᱩ ᱫᱚ
ᱥᱮᱨᱢᱟ ᱥᱤᱨᱤᱡᱟᱞᱟᱭ ᱡᱤᱣᱤᱡᱩᱨᱤᱭᱮᱱ᱿