ᱡᱟᱹᱛᱤᱭᱟᱹᱨᱤ ᱥᱤᱠᱷᱱᱟᱹᱛ






ᱢᱟᱹᱞᱤᱱᱟᱜ ᱫᱚ ᱢᱤᱫᱴᱟᱝᱜᱮ ᱠᱟᱛᱷᱟ,ᱼ “ᱪᱟᱞᱟᱜ ᱜᱮᱭᱟᱞᱟᱝ ᱥᱟᱹᱨᱤ ᱥᱚᱦᱨᱟᱭᱨᱮ ᱡᱩᱫᱤ ᱵᱟᱝᱞᱟᱝ ᱪᱟᱞᱟᱜᱼᱟ, ᱛᱤᱥ ᱛᱟᱦᱞᱮᱞᱟᱝ ᱪᱟᱞᱟᱜᱼᱟ? ᱟᱨ ᱟᱢ ᱵᱟᱝᱼᱮᱢ ᱪᱟᱞᱟᱜ ᱨᱮᱦᱚᱸ ᱤᱧᱫᱩᱧ ᱪᱟᱞᱟᱜ ᱜᱮᱭᱟ, ᱪᱮᱫᱟᱜᱥᱮ ᱵᱟᱹᱧ ᱦᱤᱲᱤᱧ ᱫᱟᱲᱮᱭᱟᱜ ᱠᱟᱱᱟ ᱚᱱᱟ ᱠᱩᱞᱦᱤ ᱫᱟᱬᱟ ᱟᱹᱪᱩᱨ ᱮᱱᱮᱡ ᱥᱮᱨᱮᱧ᱾”
ᱢᱟᱹᱞᱤᱱ ᱨᱮᱱ ᱪᱷᱟᱛᱟ ᱫᱟᱨᱮ ᱨᱩᱵᱮᱹᱱ᱾ ᱥᱚᱯᱷᱴᱣᱮᱨ ᱤᱧᱡᱤᱱᱤᱭᱟᱨ ᱡᱟᱶᱟᱭ᱾ ᱟᱯᱟᱛ ᱛᱮᱫᱼᱮ ᱛᱟᱦᱮᱸ ᱠᱟᱱᱟ ᱤᱱᱠᱟᱢ ᱴᱮᱠᱥ ᱨᱮᱱ ᱠᱟᱹᱢᱤᱭᱟᱹ᱾ ᱚᱱᱟ ᱞᱮᱠᱟᱛᱮ ᱨᱩᱵᱮᱹᱱᱟᱜ ᱚᱞ ᱯᱟᱲᱦᱟᱣ ᱫᱚ ᱠᱳᱞᱠᱟᱛᱟᱨᱮᱜᱮ ᱟᱨ ᱪᱟᱹᱠᱨᱤ ᱦᱚᱸ ᱟᱨ ᱛᱟᱦᱮᱸᱱ ᱠᱟᱱᱟᱠᱳ ᱱᱤᱛᱳᱜ ᱠᱳᱞᱠᱟᱛᱟ ᱨᱮᱭᱟᱜ ᱩᱞᱴᱟᱰᱟᱸᱜᱟᱨᱮ᱾ ᱟᱪᱟᱨ ᱵᱮᱣᱦᱟᱨ ᱦᱚᱸ ᱟᱹᱰᱤ ᱱᱟᱯᱟᱭ, ᱨᱚᱲ ᱞᱟᱱᱫᱟ ᱛᱟᱭ ᱢᱟᱹᱦᱤᱨ ᱥᱟᱺᱦᱤᱡ᱾ᱟᱭᱟᱜ ᱵᱟᱝ ᱠᱩᱥᱤ ᱨᱮᱦᱚᱸ ᱵᱟᱝᱼᱮ ᱟᱹᱲᱤᱥᱚᱜᱼᱟ, ᱟᱹᱛᱷᱟᱹᱣᱲᱤ ᱵᱟᱝᱼᱮ ᱨᱟᱹᱜᱤᱜᱼᱟ᱾
ᱱᱤᱛᱳᱜ ᱨᱩᱵᱮᱹᱱᱼᱮ ᱩᱭᱦᱟᱹᱨᱚᱜ ᱠᱟᱱᱟ, ᱪᱮᱫᱼᱮ ᱪᱤᱠᱟᱹᱭᱟ, ᱱᱟᱹᱭᱦᱟᱹᱨᱛᱮᱭ ᱪᱟᱞᱟᱜᱼᱟ ᱥᱮ ᱵᱟᱝ, ᱱᱮᱣᱛᱟᱢᱟ ᱟᱭᱢᱟ ᱴᱷᱮᱱ ᱢᱮᱱᱟᱜ ᱟᱠᱟᱫᱼᱟ ᱟᱨ ᱱᱤᱭᱟᱹᱢᱟ ᱵᱟᱯᱞᱟ ᱠᱟᱛᱮᱫ ᱯᱳᱹᱭᱞᱳ ᱥᱮᱨᱢᱟ, ᱛᱟᱦᱞᱮᱠᱷᱟᱱ ᱢᱟᱢᱳᱦᱚᱧᱦᱟᱨ ᱛᱟᱠᱳᱴᱷᱮᱱ ᱦᱚᱸ ᱪᱟᱞᱟᱜ ᱞᱟᱹᱠᱛᱤᱜ ᱠᱟᱱᱟ᱾
“ᱞᱟᱹᱭᱢᱮ ᱪᱟᱞᱟᱜ ᱟᱞᱟᱝ ᱥᱮ ᱵᱟᱝ?” ᱢᱟᱹᱞᱤᱱᱟᱜ ᱠᱩᱠᱞᱤ᱾
“ᱚᱱᱟᱜᱮᱛᱚ…ᱹ” ᱟᱹᱰᱤ ᱢᱚᱴᱟ ᱥᱟᱸᱦᱮᱫ ᱟᱨ ᱡᱮᱞᱮᱧ ᱟᱲᱟᱝᱛᱮᱭ ᱢᱮᱱ ᱠᱮᱫᱼᱟ᱾
“ᱵᱟᱝ, ᱤᱧ ᱫᱚ ᱟᱨ ᱪᱮᱫᱦᱚᱸ ᱵᱟᱹᱧ ᱟᱧᱡᱚᱢᱟ᱾ ᱪᱟᱞᱟᱜ ᱜᱮᱭᱟᱞᱟᱝ ᱵᱟᱝᱠᱷᱟᱱ ᱮᱴᱟᱜ ᱯᱮᱲᱟᱠᱳᱜᱮ ᱵᱟᱝ ᱪᱮᱫᱠᱳ ᱢᱮᱱᱟ, ᱟᱢᱟᱜ ᱢᱟᱹᱱᱜᱮ ᱵᱟᱝ ᱛᱟᱦᱮᱸᱱ ᱛᱟᱢᱟ, ᱦᱟᱯᱮᱱ ᱟᱢᱜᱮ ᱵᱟᱝᱠᱳ ᱯᱟᱹᱛᱭᱟᱹᱣᱼᱟᱢᱟ᱾”
ᱟᱭᱢᱟ ᱩᱭᱦᱟᱹᱨ ᱛᱟᱭᱱᱚᱢ ᱨᱩᱵᱟᱹᱱᱼᱮ ᱨᱮᱵᱮᱱ ᱮᱱᱛᱮ ᱢᱮᱱ ᱠᱮᱫᱼᱟᱭ, “ᱦᱮᱸ ᱪᱟᱞᱟᱜ ᱟᱞᱟᱝ, ᱞᱩᱜᱲᱤᱡᱠᱳ ᱥᱟᱢᱴᱟᱣᱢᱮ ᱟᱨ ᱤᱧᱫᱩᱧ ᱪᱟᱞᱟᱜ ᱠᱟᱱᱟ ᱥᱟᱭᱵᱟᱨ ᱠᱮᱯᱷᱛᱮ ᱨᱤᱡᱟᱨᱵᱷᱮᱥᱚᱱ ᱴᱤᱠᱤᱴ ᱟᱹᱜᱩ᱾”
ᱨᱩᱵᱮᱹᱱᱼᱮ ᱪᱟᱞᱟᱣᱮᱱᱟ ᱨᱮᱹᱞ ᱨᱮᱭᱟᱜ ᱴᱤᱠᱤᱴ ᱜᱮᱫ᱾ ᱛᱮᱦᱮᱧ ᱧᱤᱱᱫᱟᱹᱨᱮ ᱵᱟᱝ ᱜᱮᱫ ᱞᱮᱠᱷᱟᱱ ᱜᱟᱯᱟ ᱥᱮᱛᱟᱜᱨᱮ ᱥᱴᱮᱹᱥᱚᱱ ᱠᱟᱣᱱᱴᱟᱨᱨᱮ ᱫᱚ ᱟᱹᱰᱤ ᱵᱷᱤᱲ ᱛᱟᱦᱮᱸᱱᱟ᱾
ᱨᱩᱵᱮᱹᱱᱼᱮ ᱳᱰᱳᱠ ᱥᱮᱱᱼᱮᱱ ᱥᱟᱶᱛᱮ ᱢᱟᱹᱞᱤᱱ ᱫᱚ ᱞᱩᱜᱽᱲᱤᱡ ᱟᱸᱜᱽᱨᱚᱵᱠᱳ ᱥᱟᱢᱴᱟᱣᱼᱮ ᱫᱷᱩᱨᱟᱹᱣᱮᱱᱟ᱾
ᱨᱩᱵᱮᱹᱱ ᱨᱩᱭᱟᱹᱲ ᱦᱤᱡᱩᱜᱛᱮ ᱮᱠᱟᱞᱼᱮ ᱥᱟᱹᱛ ᱩᱛᱟᱹᱨᱮᱱᱟ᱾ ᱥᱟᱨᱮᱡ ᱛᱟᱦᱮᱸᱭᱮᱱᱟ ᱱᱟᱯᱟᱭ ᱞᱩᱜᱽᱲᱤᱡ ᱵᱟᱱᱫᱮ, ᱱᱮᱹᱻᱞ ᱯᱟᱹᱞᱤᱥ, ᱢᱮᱫ ᱠᱩᱴᱤ ᱦᱮᱸᱫᱮ, ᱞᱤᱯᱥᱴᱤᱠ ᱟᱨ ᱦᱟᱯᱷ ᱥᱮᱱᱴᱤᱢᱤᱴᱟᱨ ᱥᱤᱸᱫᱩᱨ ᱴᱤᱰᱟᱹᱜ᱾ ᱚᱱᱟᱠᱳ ᱫᱚ ᱜᱟᱯᱟ ᱥᱮᱛᱟᱜ ᱥᱟᱶᱛᱮᱭ ᱞᱟᱜᱟᱣᱼᱟ᱾ ᱨᱩᱵᱮᱹᱱ ᱚᱲᱟᱜ ᱵᱚᱞᱚᱱ ᱥᱟᱶᱛᱮ ᱢᱟᱹᱞᱤᱱ ᱧᱮᱞ ᱠᱟᱛᱮᱫ ᱢᱚᱱᱮ ᱢᱚᱱᱮᱛᱮᱭ ᱞᱟᱱᱫᱟᱡᱚᱝ ᱠᱟᱱᱟ ᱟᱨᱼᱮ ᱢᱮᱱᱡᱚᱝ ᱠᱟᱱᱟ ‘ᱠᱩᱲᱤ ᱦᱚᱯᱚᱱ ᱢᱚᱱᱮ ᱱᱟᱥᱮ ᱨᱟᱹᱥᱠᱟᱹ ᱛᱮᱜᱮ ᱯᱮᱨᱮᱡ ᱠᱟᱸᱰᱟ ᱫᱟᱜ ᱞᱮᱠᱟ ᱪᱷᱤᱞᱠᱟᱹᱣ ᱜᱚᱫᱚᱜᱼᱟ’᱾
ᱢᱟᱹᱞᱤᱱ ᱫᱚ ᱟᱨᱦᱚᱸ ᱢᱚᱱᱮ ᱜᱚᱴᱟᱭ ᱞᱟᱹᱜᱤᱫᱼᱮ ᱠᱩᱞᱤ ᱜᱚᱫ ᱠᱮᱫᱮᱭᱟ, “ᱴᱤᱠᱤᱴᱼᱮᱢ ᱧᱟᱢ ᱠᱮᱫᱼᱟ ᱥᱮ ᱵᱟᱝ?”
ᱨᱩᱵᱮᱹᱱ ᱱᱟᱥᱮᱱᱟᱜ ᱤᱭᱟᱹᱨᱠᱤ ᱠᱟᱛᱮᱫᱼᱮ ᱢᱮᱱ ᱠᱮᱫᱼᱟ, “ᱵᱟᱝ, ᱵᱟᱹᱧ ᱧᱟᱢ ᱞᱮᱫᱼᱟ᱾”
ᱦᱟᱦᱟᱲᱟᱜ ᱠᱟᱛᱮᱫ ᱢᱟᱹᱞᱤᱱᱼᱮ ᱠᱩᱜᱞᱤ ᱟᱹᱱᱤᱡᱼᱟ, “ᱥᱟᱹᱨᱤ?”
ᱨᱩᱵᱮᱹᱱᱼᱮ ᱞᱟᱱᱫᱟ ᱜᱚᱫ ᱠᱮᱫᱼᱟ᱾ ᱢᱟᱹᱞᱤᱱᱼᱮ ᱵᱩᱡᱷᱟᱹᱣ ᱠᱮᱫᱼᱟ, ᱮᱲᱮᱭᱮ ᱠᱟᱱᱟᱭ ᱢᱮᱱᱛᱮ᱾ ᱢᱟᱹᱞᱤᱱ ᱦᱚᱸ ᱱᱟᱥᱮ ᱨᱟᱹᱜᱤ ᱢᱮᱥᱟ ᱞᱟᱱᱫᱟ ᱠᱟᱛᱮᱫ ᱵᱚᱞᱚᱭᱮᱱᱟᱭ ᱤᱥᱤᱱ ᱚᱲᱟᱜᱛᱮ ᱟᱨ ᱡᱚᱢᱟᱜᱠᱳ ᱵᱮᱜᱱᱟᱣ ᱠᱟᱛᱮᱫᱠᱤᱱ ᱠᱤᱫᱩᱵ ᱮᱱᱟ᱾
ᱫᱚᱥᱟᱨ ᱦᱤᱞᱳᱜ ᱢᱟᱹᱞᱤᱱ ᱟᱭᱟᱜ ᱥᱟᱨᱮᱡᱼᱟᱜ ᱥᱟᱡᱚᱜ ᱦᱚᱨᱟᱛᱮ ᱥᱟᱹᱛ ᱥᱟᱯᱲᱟᱣ ᱠᱟᱛᱮᱫ ᱢᱚᱦᱰᱟᱭᱮᱱᱟᱠᱤᱱ ᱚᱲᱟᱜᱛᱮ᱾
ᱚᱲᱟᱜ ᱠᱷᱚᱱ ᱳᱰᱳᱠ ᱥᱟᱶᱛᱮ ᱢᱤᱫᱴᱟᱝ ᱴᱮᱹᱠᱥᱤᱠᱤᱱ ᱧᱟᱢ ᱠᱮᱫᱼᱟ ᱴᱷᱤᱠ ᱚᱠᱛᱚᱨᱮᱠᱤᱱ ᱥᱮᱴᱮᱨ ᱠᱮᱫᱼᱟ ᱦᱟᱣᱲᱟ ᱥᱴᱮᱹᱥᱚᱱ, ᱟᱨ ᱮᱢᱱᱤᱨᱮ ᱫᱚ ᱚᱱᱟ ᱩᱞᱴᱟᱰᱟᱸᱜᱟ ᱠᱷᱚᱱ ᱵᱟᱥ ᱛᱮᱱᱟᱜᱛᱮ ᱦᱤᱡᱩᱜᱨᱮ ᱢᱤᱫ ᱴᱟᱲᱟᱝ ᱠᱷᱚᱱ ᱦᱚᱸ ᱡᱟᱹᱥᱛᱤ ᱚᱠᱛᱚ ᱞᱟᱜᱟᱣ ᱠᱚᱜᱼᱟ᱾
ᱨᱩᱵᱮᱹᱱ ᱛᱟᱠᱚᱣᱟᱜ ᱫᱤᱥᱚᱢ ᱚᱲᱟᱜ ᱫᱚ ᱵᱟᱸᱠᱩᱲᱟ ᱡᱤᱞᱟᱹ ᱨᱮᱭᱟᱜ ᱨᱟᱱᱤᱵᱟᱸᱫᱷᱨᱮ ᱟᱨ ᱱᱟᱹᱭᱦᱟᱹᱨ ᱫᱚ ᱵᱮᱹᱞᱯᱟᱦᱟᱲᱤ ᱥᱳᱨ ᱰᱩᱢᱩᱨᱤᱭᱟᱹᱨᱮ᱾ ᱵᱟᱹᱲᱛᱤᱠᱳ ᱦᱤᱡᱩᱜ ᱥᱮᱱᱚᱜᱼᱟᱠᱤᱱ ᱡᱷᱟᱲᱜᱨᱟᱢ ᱥᱮᱫ ᱛᱮᱜᱮ, ᱛᱮᱦᱮᱧ ᱦᱚᱸ ᱚᱱᱟᱛᱮ ᱤᱥᱯᱟᱛ ᱥᱩᱯᱟᱨᱯᱷᱟᱥᱴ ᱴᱨᱮᱹᱱᱛᱮ ᱥᱮᱴᱮᱨ ᱠᱮᱫᱼᱟᱠᱤᱱ ᱡᱷᱟᱲᱜᱨᱟᱢ᱾
ᱵᱟᱥ ᱜᱟᱹᱰᱤᱨᱮ ᱫᱮᱡᱚᱜ ᱢᱟᱲᱟᱝ ᱨᱩᱵᱮᱹᱱᱼᱮ ᱢᱮᱱ ᱠᱮᱫᱼᱟ, “ᱛᱮᱦᱮᱧᱨᱮ ᱱᱚᱱᱰᱮ ᱫᱚ ᱵᱟᱝᱞᱟᱝ ᱵᱚᱞᱚᱱᱟ, ᱮᱠᱟᱞᱛᱮ ᱠᱷᱩᱱᱴᱟᱹᱣ ᱦᱤᱞᱳᱜ ᱞᱟᱝ ᱦᱤᱡᱩᱜᱼᱟ᱾”
ᱢᱟᱹᱞᱤᱱ ᱨᱟᱹᱜᱤ ᱟᱹᱲᱤᱥ ᱢᱮᱥᱟᱭ ᱢᱮᱱ ᱠᱮᱫᱼᱟ, “ᱱᱚᱣᱟ ᱫᱚ ᱟᱨᱦᱚᱸ ᱪᱮᱫ ᱞᱮᱠᱟᱱ ᱤᱧᱡᱤᱱᱤᱭᱟᱨᱤᱝ ᱥᱤᱥᱴᱮᱹᱢᱛᱟᱢ? ᱛᱮᱦᱮᱧ ᱫᱚ ᱚᱲᱟᱜᱛᱮ ᱟᱞᱟᱝ ᱯᱟᱨᱚᱢᱚᱜᱼᱟ ᱟᱨ ᱚᱲᱟᱜ ᱠᱷᱚᱱ ᱟᱞᱟᱝ ᱦᱤᱡᱩᱜᱼᱟ ᱮᱠᱟᱞ ᱠᱷᱩᱱᱴᱟᱹᱣ ᱦᱤᱞᱳᱜ; ᱩᱱ ᱫᱚ ᱛᱟᱦᱞᱮᱠᱷᱟᱱ ᱵᱳᱝᱜᱟᱜ ᱫᱚ ᱵᱟᱝᱞᱟᱝ ᱧᱟᱢᱟ᱾ ᱮᱱᱠᱷᱟᱱ ᱦᱮᱡ ᱥᱮᱨᱴᱮᱨ ᱜᱮᱛᱚ ᱵᱮᱨᱛᱷᱟᱜ ᱛᱟᱞᱟᱝᱼᱟ᱾”
“ᱟᱪᱪᱷᱟ ᱛᱮᱦᱮᱧ ᱫᱚ ᱩᱢᱩᱜ ᱠᱟᱱᱟᱠᱳ ᱵᱟᱝᱥᱮ?” ᱨᱩᱵᱮᱹᱱᱟᱜ ᱠᱩᱠᱞᱤ᱾
“ᱦᱳᱭ᱾”
“ᱛᱟᱦᱞᱮᱠᱷᱟᱱ ᱛᱮᱦᱮᱧ ᱠᱷᱚᱱ ᱮᱠᱟᱞ ᱡᱟᱞᱮ ᱦᱤᱞᱳᱜ ᱫᱷᱟᱹᱵᱤᱡ ᱛᱟᱦᱮᱸᱱ ᱦᱳᱭᱳᱜᱼᱟ᱾ ᱤᱱᱟᱹᱜ ᱛᱮᱢᱟ ᱥᱟᱱᱟᱢ ᱪᱷᱩᱴᱤ ᱪᱟᱵᱟᱜ ᱛᱤᱧᱟᱹ᱾ ᱮᱱᱠᱷᱟᱱ ᱵᱟᱵᱟ ᱛᱟᱹᱠᱤᱱ ᱫᱚ ᱪᱤᱠᱟᱹᱛᱮ ᱟᱞᱟᱝ ᱧᱮᱞᱛᱚᱨᱟ ᱠᱤᱱᱟᱹ?”
“ᱳᱦ! ᱟᱨᱦᱚᱸ ᱧᱮᱧᱮᱞ᱾ ᱚᱱᱮᱛᱚ ᱯᱷᱳᱱᱛᱮᱠᱤᱱ ᱢᱮᱱ ᱠᱮᱫᱼᱟ ᱵᱟᱝᱢᱟ ᱠᱤᱱ ᱱᱟᱯᱟᱭ ᱜᱮᱭᱟ ᱮᱱᱠᱷᱟᱱ ᱵᱟᱝ ᱥᱮᱱᱞᱮᱱ ᱨᱮᱦᱚᱸᱛᱚ ᱜᱟᱱᱚᱜ ᱜᱮᱭᱟ᱾ᱪᱚᱞᱚ ᱛᱮᱦᱮᱧ ᱨᱮᱜᱮ ᱱᱚᱱᱰᱮ ᱟᱞᱟᱝ ᱪᱟᱞᱟᱜᱼᱟ ᱟᱨ ᱵᱟᱝᱠᱷᱟᱱ ᱤᱧ ᱢᱚᱛᱚᱜᱮᱧ ᱪᱟᱞᱟᱜᱼᱟ᱾”
“ᱵᱟᱝ, ᱟᱢ ᱢᱚᱛᱚ ᱫᱚ ᱟᱞᱚᱢ ᱪᱟᱞᱟᱜᱼᱟ, ᱟᱢ ᱡᱟᱸᱦᱟᱢ ᱢᱮᱱᱟ ᱚᱱᱠᱟᱜᱮ ᱠᱟᱹᱢᱤᱭ ᱦᱳᱭᱳᱜᱼᱟ᱾”






(᱒)
ᱢᱟᱹᱞᱤᱱᱟᱜ ᱠᱟᱛᱷᱟ ᱞᱮᱠᱟᱛᱮ ᱨᱩᱵᱮᱹᱱ ᱫᱚ ᱥᱮᱴᱮᱨ ᱦᱳᱭᱮᱱ ᱛᱟᱭᱟ ᱱᱟᱹᱭᱦᱟᱹᱨᱛᱮ᱾ ᱢᱟᱱᱰᱤ ᱵᱟᱠᱷᱳᱞᱨᱮᱱ ᱥᱟᱫᱷᱮᱨ ᱱᱟᱣᱟ ᱡᱟᱶᱟᱭ᱾ ᱚᱲᱟᱜ ᱵᱚᱞᱚᱱ ᱢᱤᱫ ᱜᱷᱟᱹᱲᱤᱡ ᱛᱟᱭᱱᱚᱢ ᱠᱷᱟᱱᱜᱮ ᱦᱮᱡ ᱡᱟᱣᱨᱟᱭᱮᱱᱟᱠᱳ ᱢᱟᱹᱞᱤᱱᱨᱮᱱ ᱥᱟᱸᱜᱮ ᱵᱚᱠᱚᱛ ᱠᱩᱲᱤᱠᱳ᱾ ᱚᱠᱚᱭᱠᱳ ᱫᱚ ᱛᱮᱧᱟᱝ ᱯᱟᱱᱛᱮᱨᱮ ᱫᱩᱲᱩᱵ ᱠᱟᱛᱮᱫ ᱟᱨ ᱚᱠᱚᱭᱠᱳ ᱫᱚ ᱪᱟᱹᱞᱤ ᱠᱷᱩᱱᱴᱤᱨᱮ ᱡᱟᱯᱟᱜ ᱠᱛᱮᱫ ᱱᱟᱱᱟᱦᱩᱱᱟᱹᱨ ᱤᱭᱟᱹᱨᱠᱤ ᱠᱟᱛᱷᱟ ᱢᱮᱥᱟ ᱠᱟᱛᱮᱫᱠᱳ ᱪᱮᱨᱮᱡᱼᱮ ᱠᱟᱱᱟ᱾ ᱢᱮᱱᱠᱷᱟᱱ ᱨᱩᱵᱮᱹᱱ ᱫᱚ ᱟᱹᱰᱤ ᱟᱥᱠᱮᱛᱜᱮᱭ ᱵᱩᱡᱷᱟᱹᱣᱮᱫᱼᱟ᱾ ᱱᱚᱣᱟ ᱠᱷᱟᱹᱛᱤᱨᱜᱮ ᱵᱟᱝ ᱦᱤᱡᱩᱜ ᱥᱟᱱᱟᱭᱮᱠᱟᱱ ᱛᱟᱦᱮᱸᱠᱟᱱᱟ᱾
ᱢᱟᱹᱱ ᱵᱟᱧᱪᱟᱣ ᱞᱟᱹᱜᱤᱫ ᱦᱟᱱᱦᱟᱨ ᱦᱚᱧᱦᱟᱨ ᱛᱟᱹᱠᱤᱱ ᱡᱟᱶᱟᱭ ᱥᱟᱶᱛᱮ ᱵᱳᱜᱮᱹ ᱵᱟᱹᱲᱤᱡᱠᱤᱱ ᱨᱚᱯᱚᱲᱼᱮᱱᱟ᱾ ᱤᱱᱟᱹ ᱛᱟᱭᱱᱚᱢ ᱟᱡᱷᱱᱟᱨ ᱵᱟᱦᱧᱟᱨᱠᱳᱦᱚᱸ᱾ ᱠᱩᱞᱤᱭᱮ ᱠᱟᱱᱟᱠᱳ, “ᱡᱟᱶᱟᱭ ᱦᱮᱡ ᱮᱱᱟᱵᱮᱱ?”
ᱛᱮᱞᱟᱭᱮᱫᱼᱟᱭ, “ᱦᱮᱸ, ᱦᱮᱡ ᱮᱱᱟᱞᱤᱧ᱾”
ᱨᱩᱵᱮᱹᱱᱟᱜ ᱢᱚᱱᱮ ᱫᱚ ᱵᱟᱨ ᱦᱚᱲᱠᱤᱱ ᱦᱮᱡ ᱮᱱᱟ᱾ ᱤᱱᱟᱹ ᱛᱟᱭᱱᱚᱢ ᱛᱳᱝᱜᱮ ᱜᱟᱞᱢᱟᱨᱟᱣ ᱛᱟᱞᱟᱨᱮ ᱫᱚ ᱠᱷᱟᱹᱞᱤ ‘ᱤᱧ’, ‘ᱟᱢ’ ᱟᱛᱮᱫᱜᱮᱭ ᱨᱚᱯᱚᱲ ᱠᱟᱱᱟ᱾
ᱥᱟᱱᱟᱢ ᱜᱮ ᱡᱟᱶᱟᱭᱼᱟᱜ ᱜᱟᱞᱢᱟᱨᱟᱣ ᱟᱧᱡᱚᱢ ᱠᱟᱛᱮᱫ ᱵᱩᱡᱷᱟᱹᱣᱧᱟᱢ ᱠᱮᱫᱼᱟᱠᱳ ᱢᱮᱱᱛᱮ, ᱥᱤᱠᱷᱱᱟᱹᱛᱼᱟᱱ ᱡᱟᱶᱟᱭ ᱠᱟᱱ ᱨᱮᱦᱚᱸᱭ ᱥᱟᱱᱛᱟᱲᱼᱟᱜ ᱥᱟᱹᱜᱟᱹᱭ ᱫᱚ ᱵᱟᱝᱼᱮ ᱥᱮᱬᱟ ᱟᱠᱟᱫᱼᱟ ᱟᱨ ᱪᱮᱫᱟᱜᱼᱮ ᱥᱮᱬᱟᱭᱟ ᱵᱟᱡᱟᱨᱨᱮᱢᱟ ᱥᱟᱹᱜᱟᱹᱭ ᱨᱮᱭᱟᱜ ᱫᱚ ᱞᱟᱹᱠᱛᱤᱜᱮ ᱵᱟᱹᱱᱩᱜᱼᱟ᱾
ᱥᱟᱶ ᱥᱟᱶᱛᱮ ᱢᱟᱹᱞᱤᱱ ᱟᱡ ᱟᱭᱳ ᱚᱲᱟᱜ ᱵᱷᱤᱛᱟᱹᱨᱨᱮ ᱢᱟᱹᱞᱤᱱ ᱦᱚᱦᱚ ᱠᱟᱛᱮᱫᱼᱮ ᱢᱮᱛᱟᱫᱮᱭᱟ, “ᱱᱤᱛᱳᱜᱜᱮ ᱡᱟᱶᱟᱭ ᱞᱟᱹᱭᱼᱟᱭᱢᱮ ᱚᱠᱚᱭᱠᱳ ᱥᱟᱶᱛᱮ ᱪᱮᱫ ᱞᱮᱠᱟ ᱨᱚᱯᱚᱲ ᱦᱳᱭᱳᱜᱼᱟ ᱢᱮᱱᱛᱮ᱾”
ᱟᱥᱟᱲᱷ ᱠᱷᱚᱱ ᱥᱚᱦᱨᱟᱭ ᱦᱳᱭ ᱯᱟᱨᱚᱢᱮᱱᱟ ᱮᱱᱦᱚᱸ ᱢᱟᱹᱞᱤᱱ ᱟᱡ ᱡᱟᱶᱟᱭᱛᱮᱫ ᱵᱟᱹᱲᱛᱤ ᱥᱤᱠᱷᱱᱟᱹᱛ ᱵᱟᱝᱼᱮ ᱮᱢ ᱫᱟᱲᱮ ᱟᱠᱟᱣᱫᱮᱭᱟ ᱚᱱᱟᱛᱮ ᱱᱤᱛᱳᱜ ᱩᱱᱤ ᱥᱟᱶᱛᱮ ᱟᱡᱦᱚᱸ ᱚᱯᱚᱢᱟᱱᱼᱮ ᱵᱩᱡᱷᱟᱹᱣᱮᱫᱼᱟ᱾
ᱛᱤ ᱡᱟᱝᱜᱟᱠᱳ ᱟᱹᱨᱩᱵ ᱠᱟᱛᱮᱫ ᱚᱲᱟᱜ ᱵᱷᱤᱛᱟᱹᱨᱼᱮ ᱟᱫᱮᱨ ᱠᱮᱫᱮᱭᱟ ᱟᱨᱼᱮ ᱢᱮᱛᱟᱣᱟᱫᱮᱭᱟ, ”ᱤᱧ ᱨᱮᱱ ᱟᱭᱳ ᱵᱟᱵᱟ ᱛᱟᱹᱠᱤᱱ ᱟᱨ ᱥᱟᱶᱛᱮ ᱥᱟᱱᱟᱢ ᱦᱩᱰᱤᱧᱵᱟ, ᱦᱩᱰᱤᱧ ᱟᱭᱳ ᱛᱟᱠᱳ, ᱫᱟᱫᱟ ᱛᱟᱠᱳ, ᱫᱤᱫᱤ ᱛᱟᱠᱳ ᱥᱟᱶᱛᱮᱢ ᱜᱟᱞᱢᱟᱨᱟᱜ ᱚᱠᱛᱚ ᱫᱚ ‘ᱵᱮᱱ’ ᱟᱛᱮᱫ ᱨᱚᱲ ᱨᱩᱭᱟᱹᱲᱢᱮ ᱟᱨ ᱟᱢᱮᱢ ᱢᱮᱱᱚᱜᱨᱮ ᱫᱚ ‘ᱟᱹᱞᱤᱧ’ ᱢᱮᱱᱢᱮ᱾ ᱟᱨ ᱡᱩᱫᱤ ᱵᱟᱝᱼᱮᱢ ᱵᱩᱡᱷᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱮᱱᱠᱷᱟᱱ ‘ᱥᱟᱶᱟᱨ’ ᱯᱟᱛᱦᱟᱢ ᱨᱮᱭᱟᱜ ᱳᱭᱮᱹᱵᱽᱥᱟᱭᱤᱴᱨᱮ ᱵᱚᱞᱚᱱ ᱢᱮ ᱟᱨ ᱒᱐᱑᱓ ᱥᱮᱨᱢᱟ ᱨᱮᱭᱟᱜ ᱡᱩᱞᱟᱭᱼᱰᱤᱥᱮᱹᱢᱵᱚᱨ ᱞᱮᱠᱷᱟᱨᱮ ᱢᱮᱱᱟᱜ ‘ᱥᱟᱹᱜᱟᱹᱭ’ ᱚᱱᱚᱞ ᱯᱟᱲᱦᱟᱣᱢᱮ᱾”
ᱛᱟᱦᱞᱮᱠᱷᱟᱱ ᱵᱩᱡᱷᱟᱹᱣᱚᱜ ᱠᱟᱱᱟ ᱱᱟᱦᱟᱜ ᱫᱚ ᱤᱱᱴᱟᱨᱱᱮᱹᱴ ᱛᱮᱭ ᱴᱟᱯᱟᱣᱼᱟᱠᱟᱫ ᱜᱞᱳᱵᱟᱞᱟᱭᱡᱮᱥᱚᱱ ᱡᱩᱜᱽᱨᱮᱦᱚᱸ ᱯᱩᱛᱷᱤ ᱯᱟᱛᱷᱟᱢ ᱨᱮᱭᱟᱜ ᱞᱟᱹᱠᱛᱤ ᱫᱚ ᱢᱮᱱᱟᱜ ᱜᱮᱭᱟ᱾ ᱯᱟᱹᱦᱤᱞ ᱨᱮᱱ ᱦᱚᱲ ᱫᱚ ᱯᱩᱛᱷᱤ ᱜᱟᱫᱟᱱᱨᱮ ᱫᱩᱲᱩᱵ ᱠᱟᱛᱮᱫ ᱫᱟᱢᱟᱱ ᱫᱟᱢᱟᱱ ᱯᱩᱛᱷᱤᱠᱳ ᱯᱟᱲᱦᱟᱣ ᱠᱟᱛᱮᱫ ᱵᱟᱝ ᱵᱟᱰᱟᱭᱟᱜᱠᱳ ᱵᱟᱰᱟᱭ ᱡᱚᱝᱼᱟᱱ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱱᱟᱦᱟᱜ ᱫᱚ ᱚᱱᱟ ᱯᱩᱛᱷᱤ ᱜᱟᱫᱟᱱ ᱨᱮᱭᱟᱜ ᱯᱩᱛᱷᱤᱠᱳ ᱫᱚ ᱫᱚᱦᱚ ᱢᱟᱨᱮᱜ ᱠᱟᱱᱟ, ᱯᱩᱛᱷᱤ ᱜᱟᱫᱟᱱ ᱫᱚ ᱱᱟᱜᱟᱢᱚᱜ ᱠᱟᱱᱟ᱾
ᱠᱷᱩᱱᱴᱟᱹᱣ ᱦᱤᱞᱳᱜ᱾
ᱵᱟᱨᱭᱟ ᱴᱚᱞᱟᱛᱮ ᱢᱮᱱᱟᱜ ᱰᱩᱢᱩᱨᱤᱭᱟᱹ ᱟᱛᱳ ᱨᱮᱭᱟᱜ ᱥᱚᱦᱨᱟᱭ ᱱᱮᱛᱟᱨᱦᱚᱸ ᱦᱟᱹᱛᱤ ᱞᱮᱠᱟᱱ ᱥᱚᱦᱨᱟᱭ ᱜᱮ ᱢᱮᱱ ᱜᱟᱱᱚᱜᱼᱟ᱾ᱯᱟᱹᱦᱤᱞ ᱠᱷᱚᱱ ᱜᱮ ᱰᱩᱢᱩᱨᱤᱭᱟᱹ ᱟᱛᱳ ᱦᱚᱲ ᱠᱚᱣᱟᱜ ᱫᱚ ᱵᱟᱨ ᱡᱚᱲ ᱴᱟᱢᱟᱠ, ᱢᱤᱫ ᱡᱚᱲ ᱨᱮᱜᱽᱲᱟ, ᱢᱤᱫ ᱡᱚᱲ ᱛᱩᱢᱫᱟᱹᱜ ᱚᱱᱠᱟᱜᱮ ᱡᱷᱟᱺᱭ, ᱠᱚᱨᱛᱟᱞ ᱥᱟᱱᱟᱢᱟᱜ ᱡᱚᱲ ᱡᱚᱲ ᱜᱮᱭᱟ᱾ᱰᱟᱸᱜᱽᱨᱟ ᱪᱟᱨᱦᱟᱣ ᱚᱠᱛᱚ ᱠᱷᱚᱱ ᱜᱮ ᱟᱭᱳ ᱢᱤᱥᱨᱟ ᱛᱟᱠᱳ ᱫᱚ ᱮᱱᱮᱡ ᱥᱮᱨᱮᱧ ᱟᱛᱮᱫ ᱵᱟᱱᱟᱨ ᱠᱩᱞᱦᱤᱠᱳ ᱫᱟᱬᱟ ᱯᱩᱨᱟᱹᱣ ᱠᱮᱫᱼᱟ᱾ᱟᱭᱢᱟ ᱰᱟᱸᱜᱽᱨᱟ, ᱠᱟᱰᱟᱠᱳ ᱛᱚᱞ ᱞᱮᱫ ᱠᱚᱣᱟ ᱟᱨ ᱡᱟᱸᱦᱟᱭᱠᱳ ᱨᱮᱱ ᱫᱚ ᱞᱟᱹᱴᱩᱠᱳ ᱵᱟᱹᱱᱩᱜ ᱠᱚᱣᱟ ᱩᱱᱠᱩ ᱫᱚ ᱢᱤᱦᱩ ᱠᱳ ᱛᱚᱞ ᱞᱮᱫ ᱠᱚᱣᱟ᱾ ᱥᱟᱱᱟᱢ ᱪᱟᱨᱦᱟᱣ ᱥᱟᱹᱛ ᱛᱟᱭᱱᱚᱢ ᱛᱟᱞᱟ ᱠᱩᱞᱦᱤ ᱢᱟᱹᱡᱷᱤ ᱪᱷᱟᱴᱠᱟ ᱴᱷᱮᱱ ᱮᱛᱚᱦᱚᱵ ᱠᱮᱫᱼᱟᱠᱳ ᱟᱠᱷᱲᱟ ᱥᱚᱦᱨᱟᱭ ᱥᱟᱶᱛᱮ ᱰᱟᱱᱴᱟ, ᱞᱩᱦᱩᱨᱤ, ᱜᱩᱧᱡᱟᱹ, ᱢᱟᱛᱳᱣᱟᱨ, ᱡᱷᱤᱸᱠᱟᱹ ᱞᱟᱜᱽᱬᱮ ᱥᱟᱱᱟᱢ ᱜᱮᱠᱳ ᱥᱮᱨᱮᱧᱮᱫᱼᱟ ᱟᱨ ᱨᱩ ᱛᱟᱞ ᱛᱮᱠᱳ ᱮᱱᱮᱡᱼᱟᱫ ᱠᱟᱱᱟ ᱟᱹᱰᱤ ᱨᱟᱹᱥᱠᱟᱹ ᱜᱮ᱾

ᱮᱱᱮᱡ ᱠᱳ ᱥᱟᱵ ᱟᱠᱟᱱ ᱚᱱᱟ ᱵᱟᱨ ᱟᱴᱟᱞ ᱢᱩᱫᱽ ᱨᱮ ᱢᱟᱹᱞᱤᱱ ᱦᱚᱸᱭ ᱮᱱᱮᱡ ᱠᱟᱱᱟ᱾ᱢᱟᱹᱱᱰᱤᱠᱳ ᱨᱮᱱ ᱱᱟᱣᱟ ᱡᱟᱶᱟᱭ ᱧᱮᱞᱧ ᱠᱟᱱᱟᱠᱳ ᱢᱟᱹᱡᱷᱤ ᱛᱦᱟᱱ ᱨᱮ ᱤᱨᱤᱞ ᱠᱚᱲᱟᱠᱳ ᱥᱟᱶᱛᱮ ᱫᱩᱲᱩᱵ ᱠᱟᱛᱮᱫ ᱮᱱᱮᱡᱼᱮ ᱧᱮᱻᱧᱮᱞ ᱠᱟᱱᱟ᱾ᱥᱟᱹᱨᱤ ᱠᱟᱛᱷᱟ ᱫᱚ ᱦᱳᱭᱳᱜ ᱠᱟᱱᱟ, ᱢᱟᱹᱞᱤᱱᱼᱮ ᱧᱮᱞᱮ ᱠᱟᱱᱟ ᱯᱟᱞᱮᱱ ᱡᱟᱸᱦᱟᱭᱠᱳ ᱱᱚᱡᱚᱨᱟᱭ ᱠᱟᱱᱟ, ᱟᱛᱳ ᱫᱤᱥᱚᱢ ᱨᱮᱱ ᱠᱚᱲᱟ ᱴᱷᱮᱱ ᱫᱚ ᱚᱦᱚᱢ ᱯᱟᱹᱛᱭᱟᱹᱣ ᱠᱚᱜᱼᱟ ᱚᱱᱟ ᱢᱤᱫ ᱟᱠᱷᱲᱟ ᱟᱹᱣᱨᱤ ᱯᱩᱨᱟᱹᱜ ᱛᱮᱜᱮ ᱛᱟᱞᱟ ᱟᱠᱷᱲᱟ ᱦᱟᱹᱵᱤᱡ ᱠᱳ ᱞᱟᱦᱟ ᱜᱚᱫᱚᱜᱼᱟ᱾ᱢᱤᱫ ᱫᱷᱟᱣ ᱫᱚ ᱢᱤᱫᱴᱟᱝ ᱢᱟᱹᱫᱟᱲᱤᱭᱟᱹ ᱱᱟᱣᱟ ᱡᱟᱶᱟᱭᱼᱮ ᱧᱮᱞ ᱛᱮᱵᱟᱜ ᱠᱮᱫᱼᱮ ᱠᱷᱟᱱ ᱩᱱᱤ ᱥᱳᱨ ᱦᱮᱡ ᱠᱟᱛᱮᱫ ᱛᱩᱢᱫᱟᱹᱜᱼᱮ ᱪᱟᱞ ᱟᱭ ᱠᱟᱱ ᱨᱮ ᱨᱩᱵᱮᱹᱱ ᱫᱚ ᱠᱷᱟᱹᱞᱤ ᱜᱮᱭ ᱢᱮᱱ ᱠᱮᱫᱼᱟ,
“ᱢᱟᱥᱮ ᱢᱟ ᱨᱩᱭᱢᱮ, ᱨᱩᱭᱢᱮ᱾’’
ᱡᱟᱶᱟᱭ ᱛᱮᱦᱮᱧ ᱫᱚ ᱟᱯᱮᱠᱳ ᱜᱮ ᱢᱟᱲᱟᱝ ᱨᱮ ᱛᱟᱦᱮᱸᱱ ᱦᱳᱭᱳᱜ ᱛᱟᱯᱮᱭᱟ᱾ᱫᱮᱞᱟ ᱫᱮᱞᱟ ᱵᱮᱨᱮᱫ ᱵᱮᱱ᱾
ᱤᱱᱟᱹ ᱛᱟᱭᱱᱚᱢ ᱚᱨ ᱵᱮᱨᱮᱫ ᱠᱮᱫᱮᱭᱟᱭ ᱟᱨ ᱛᱩᱢᱫᱟᱹᱜᱼᱮ ᱜᱚᱜ ᱟᱫᱮᱭᱟ᱾
ᱛᱩᱢᱫᱟᱹᱜ ᱪᱮᱴᱟᱜ ᱛᱚᱲᱟᱣ ᱞᱟᱜᱟ ᱱᱚᱣᱟᱠᱳ ᱫᱚ ᱨᱩᱵᱮᱹᱱ ᱛᱟᱠᱚᱣᱟᱜ ᱥᱤᱞᱮᱹᱵᱟᱥ ᱨᱮ ᱵᱟᱝ ᱛᱟᱦᱮᱸᱠᱟᱱᱟ ᱟᱨ ᱥᱮᱬᱟᱭ ᱨᱮᱭᱟᱜ ᱥᱟᱱᱟ ᱦᱚᱸ ᱵᱟᱡᱟᱨ ᱨᱮᱭ ᱦᱟᱨᱟ ᱟᱠᱟᱱ ᱠᱷᱟᱹᱛᱤᱨ ᱵᱟᱝ ᱯᱚᱴᱠᱚᱡ ᱟᱠᱟᱣᱫᱮᱭᱟ᱾ᱚᱱᱟ ᱠᱷᱟᱹᱛᱤᱨ ᱮᱠᱷᱮᱱ ᱜᱚᱜ ᱠᱟᱛᱮᱫ ᱦᱟᱱᱛᱮ ᱱᱟᱛᱮ ᱢᱟᱴᱟᱨ ᱢᱩᱴᱩᱨ ᱠᱚᱭᱚᱜ ᱵᱟᱲᱟᱜᱮ ᱦᱳᱭᱮᱱ ᱛᱟᱭᱟ᱾ᱚᱱᱟ ᱢᱤᱫ ᱟᱠᱷᱲᱟ ᱯᱩᱨᱟᱹᱣ ᱮᱱᱠᱷᱟᱱ ‘ᱵᱟᱦᱨᱮ ᱥᱮᱫ ᱤᱧ ᱪᱟᱞᱟᱣ ᱞᱮᱱ ᱜᱮ’ ᱢᱮᱱ ᱠᱟᱛᱮᱫ ᱟᱨ ᱢᱤᱫ ᱦᱚᱲ ᱛᱩᱢᱫᱟᱹᱜ ᱪᱟᱞ ᱦᱚᱴᱚ ᱠᱟᱛᱮᱫ ᱱᱟᱣᱟ ᱡᱟᱶᱟᱭ ᱫᱚᱭ ᱥᱟᱦᱟᱭᱮᱱᱟ᱾
ᱪᱷᱟᱛᱟ ᱫᱟᱨᱮ ᱛᱟᱭ ᱮᱱᱮᱡ ᱥᱮᱨᱮᱧ ᱵᱟᱝᱼᱮ ᱵᱟᱰᱟᱭ ᱠᱷᱟᱹᱛᱤᱨ ᱢᱟᱹᱞᱤᱱ ᱱᱤᱛᱳᱜ ᱟᱹᱰᱤ ᱞᱟᱡᱟᱣᱼᱮ ᱵᱩᱡᱷᱟᱹᱣᱮᱫᱼᱟ, ᱩᱱᱤ ᱦᱚᱸ ᱟᱫᱚ ᱵᱟᱝ ᱮᱱᱮᱡ ᱥᱟᱱᱟᱭᱮ ᱠᱟᱱᱟ᱾ᱡᱩᱫᱤ ᱱᱚᱝᱠᱟ ᱦᱳᱭ ᱠᱚᱜᱼᱟ, ᱢᱟᱹᱞᱤᱱ ᱫᱚᱭ ᱥᱮᱨᱮᱧᱟ ᱟᱨ ᱨᱩᱵᱮᱹᱱ ᱫᱚᱭ ᱨᱩᱻᱭᱟ ᱛᱟᱦᱞᱮᱠᱷᱟᱱ ᱟᱹᱰᱤ ᱨᱟᱹᱥᱠᱟᱹᱭ ᱵᱩᱡᱷᱟᱹᱣ ᱠᱮᱭᱟ᱾ᱢᱮᱱᱠᱷᱟᱱ ᱚᱱᱠᱟ ᱫᱚ ᱵᱟᱝ, ᱵᱟᱨ ᱦᱚᱲᱟᱜ ᱦᱟᱨᱟᱵᱩᱨᱩ ᱫᱚ ᱵᱷᱮᱜᱟᱨ ᱵᱷᱮᱜᱟᱨ ᱥᱟᱶᱛᱟ ᱛᱟᱞᱟ ᱨᱮ᱾ᱢᱮᱹᱞᱤᱱ ᱦᱚᱸ ᱟᱫᱚ ᱮᱱᱮᱡ ᱟᱴᱟᱞ ᱟᱲᱟᱜ ᱠᱟᱛᱮᱫ ᱚᱲᱟᱜ ᱛᱮᱭ ᱦᱮᱡ ᱮᱱᱟ᱾ ᱟᱹᱰᱤ ᱠᱳ ᱡᱚᱵᱚᱨᱮ ᱠᱟᱱ ᱛᱟᱦᱮᱸ ᱠᱟᱱᱟ, ᱮᱱᱮᱡ ᱦᱟᱛᱟᱲᱟᱵᱳᱱ᱾ᱢᱮᱱᱠᱷᱟᱱ ᱵᱟᱝ, ᱵᱟᱝ ᱜᱮᱭ ᱵᱟᱛᱟᱣ ᱞᱮᱫᱼᱟ᱾ᱚᱲᱟᱜ ᱛᱮᱭ ᱦᱮᱡ ᱮᱱᱟ᱾
ᱢᱟᱹᱞᱤᱱ ᱜᱚᱜᱚ ᱵᱟᱵᱟ ᱛᱟᱹᱠᱤᱱ ᱫᱚ ᱟᱠᱷᱲᱟ ᱨᱮᱜᱮᱭ ᱧᱮᱞ ᱦᱚᱴᱚ ᱠᱟᱜ ᱠᱤᱱᱟᱹ᱾ᱵᱷᱤᱛᱟᱹᱨ ᱚᱲᱟᱜ ᱨᱮ ᱵᱚᱞᱚ ᱠᱟᱛᱮᱫ ᱧᱮᱞᱮᱫᱼᱟᱭ ᱮᱠᱷᱮᱱᱟᱜ ᱯᱟᱞᱟᱠ ᱯᱟᱨᱠᱚᱢ᱾ ᱚᱠᱚᱭ ᱦᱚᱸ ᱚᱲᱟᱜ ᱨᱮ ᱫᱚ ᱵᱟᱹᱱᱩᱜ ᱠᱚᱣᱟ ᱵᱷᱟᱹᱵᱤᱛ ᱨᱮᱭ ᱯᱟᱲᱟᱣ ᱜᱚᱫ ᱮᱱᱟ, “ᱛᱟᱦᱞᱮ ᱠᱷᱟᱱ ᱳᱠᱟᱛᱮᱭ ᱥᱮᱱ ᱮᱱᱟ?”
ᱯᱷᱳᱱᱼᱮ ᱞᱮᱜᱟ ᱠᱮᱫᱼᱟ᱾ᱟᱹᱰᱤ ᱡᱮᱞᱮᱧ ᱜᱮ ᱨᱤᱝ ᱨᱤᱝ ᱥᱟᱰᱮ ᱠᱟᱱᱟ᱾ᱨᱩᱵᱮᱹᱱ ᱯᱷᱳᱱ ᱵᱟᱝᱼᱮ ᱨᱤᱥᱤᱵᱷᱮᱫᱼᱟ ᱢᱤᱫ ᱫᱷᱟᱣ ᱨᱤᱝ ᱯᱩᱨᱟᱹᱣᱮᱱᱟ, ᱫᱚᱦᱲᱟᱭᱰᱟᱭᱮᱞ ᱠᱮᱫᱼᱟ, ᱩᱱᱦᱚᱸ ᱵᱟᱝᱼᱮ ᱨᱤᱥᱤᱵᱷ ᱞᱮᱫᱼᱟ᱾ᱫᱷᱟᱶᱟ ᱫᱷᱟᱹᱶᱭᱤ ᱪᱟᱞᱟᱣ ᱨᱩᱭᱟᱹᱲᱮᱱᱟᱭ ᱟᱠᱷᱲᱟ ᱛᱮ᱾ᱚᱸᱰᱮ ᱥᱮᱱ ᱠᱟᱛᱮᱫ ᱚᱸᱰᱮ ᱦᱚᱸ ᱵᱟᱝᱼᱮ ᱧᱮᱞ ᱧᱟᱢᱮ ᱠᱟᱱᱟ᱾ ᱵᱟᱵᱟ ᱛᱟᱹᱠᱤᱱ ᱛᱩᱨᱟᱹᱛᱼᱮ ᱠᱩᱞᱤ ᱠᱮᱫ ᱠᱤᱱᱟᱹ
“ᱡᱟᱶᱟᱭ ᱫᱚ ᱩᱠᱩᱨᱤᱡ?”
“ᱡᱟᱶᱟᱭ!ᱡᱟᱶᱟᱭ ᱢᱟᱛᱚ ᱮᱱᱟᱱ ᱨᱮ ᱚᱲᱟᱜ ᱥᱮᱫᱼᱮ ᱪᱟᱞᱟᱣᱮᱱ ᱫᱚ᱾ᱢᱟᱹᱞᱤᱱ ᱟᱡ ᱵᱟᱵᱟᱭ ᱛᱮᱞᱟ ᱠᱮᱫᱼᱟ᱾”
“ᱵᱟᱝ ᱵᱟᱵᱟ, ᱚᱲᱟᱜ ᱫᱚ ᱡᱟᱹᱱᱤᱡ ᱵᱟᱝᱼᱮ ᱥᱮᱱ ᱟᱠᱟᱱᱟ, ᱚᱲᱟᱜ ᱨᱮ ᱛᱚ ᱵᱟᱹᱱᱩᱜᱮᱭᱟ ᱟᱨ ᱯᱷᱳᱱ ᱦᱚᱸ ᱵᱟᱝᱼᱮ ᱨᱤᱥᱤᱵᱷᱮᱫᱼᱟ᱾”
“ᱛᱟᱦᱞᱮᱠᱷᱟᱱ ᱫᱚᱭ ᱚᱠᱟᱭᱮᱱᱟ?ᱮᱹᱭ ᱮᱹᱭ ᱠᱚᱲᱟᱠᱳ ᱦᱟᱯᱮ ᱛᱷᱤᱨ ᱞᱮᱱ ᱯᱮᱥᱮ᱾”
ᱥᱟᱱᱟᱢ ᱨᱩ ᱮᱱᱮᱡ ᱥᱮᱨᱮᱧ ᱠᱳ ᱛᱷᱩᱠᱩᱢ ᱠᱮᱫᱼᱟ᱾
“ᱠᱟᱛᱷᱟ ᱦᱳᱭᱳᱜ ᱠᱟᱱᱟ, ᱢᱟᱹᱞᱤᱱ ᱡᱟᱶᱟᱭ ᱳᱠᱟᱛᱮᱪᱚᱭ ᱪᱟᱞᱟᱣᱟᱠᱟᱱᱟ ᱵᱟᱝᱼᱮ ᱧᱟᱢᱚᱜ ᱠᱟᱱᱟ ᱟᱨ ᱯᱷᱳᱱ ᱦᱚᱸ ᱵᱟᱝᱼᱮ ᱨᱤᱥᱤᱵᱷᱮᱫᱼᱟ᱾”
ᱚᱠᱚᱭ ᱢᱤᱫ ᱢᱟᱛᱟᱞ ᱠᱚᱲᱟ ᱪᱚᱝᱼᱮ ᱢᱮᱱ ᱠᱮᱫᱼᱟ, “ᱚᱠᱟᱭ ᱪᱟᱞᱟᱜᱼᱟ ᱚᱠᱚᱭ ᱯᱟᱞᱮᱱ ᱯᱟᱱ ᱞᱟᱹᱰᱩ ᱛᱮᱱᱟᱜ ᱠᱚᱭ ᱠᱚᱭ ᱠᱟᱛᱮᱫ ᱡᱟᱸᱦᱟ ᱥᱮᱫ ᱠᱳ ᱜᱚᱦᱚᱲ ᱤᱫᱤ ᱟᱠᱟᱫᱼᱮ᱾”
“ᱵᱟᱝᱭᱟ ᱵᱟᱹᱵᱩ ᱚᱱᱠᱟᱱ ᱠᱟᱛᱷᱟ ᱫᱚ ᱵᱟᱝ ᱦᱳᱭ ᱫᱟᱲᱮᱭᱟᱜᱼᱟ᱾”
“ᱪᱮᱫᱟᱜ ᱵᱟᱝ ᱦᱳᱭ ᱫᱟᱲᱮᱭᱟᱜᱼᱟ, ᱛᱮᱦᱮᱧ ᱜᱮᱛᱚ ᱵᱟᱹᱛᱟᱹᱞᱤ ᱫᱚ᱾”
“ᱴᱷᱤᱠᱟᱹᱱ ᱜᱮᱭᱟ, ᱟᱯᱮ ᱡᱩᱫᱤ ᱩᱱᱟᱹᱜ ᱥᱤᱨᱤᱭᱟᱥ ᱵᱟᱝᱯᱮ ᱵᱷᱟᱹᱵᱤᱭᱮᱫᱼᱟ ᱛᱟᱦᱞᱮᱠᱷᱟᱱ ᱢᱟ ᱨᱟᱹᱥᱠᱟᱹᱭ ᱯᱮ ᱢᱟᱱᱟ ᱵᱟᱹᱱᱩᱜᱼᱟ᱾”
ᱤᱱᱟᱹ ᱛᱟᱭᱱᱚᱢ ᱢᱟᱹᱞᱤᱱ ᱛᱟᱠᱳ ᱚᱲᱟᱜ ᱠᱳ ᱦᱮᱡ ᱮᱱᱟ᱾
ᱢᱟᱹᱞᱤᱱ ᱨᱮᱱ ᱡᱟᱱᱟᱢᱤᱭᱟᱹ ᱟᱭᱳ ᱵᱟᱵᱟ ᱚᱲᱟᱜ ᱫᱚ ᱞᱟᱛᱟᱨ ᱠᱩᱞᱦᱤ ᱢᱩᱪᱟᱹᱫ ᱩᱛᱟᱹᱨᱨᱮ᱾ ᱱᱟᱥᱮ ᱪᱷᱟᱰᱟ ᱪᱷᱟᱰᱟ ᱚᱲᱟᱜᱠᱳ᱾
ᱢᱟᱹᱞᱤᱱ ᱫᱚ ᱯᱷᱳᱱᱮ ᱞᱮᱜᱟᱭᱮᱫ ᱜᱮᱭᱟ ᱟᱨ ᱨᱤᱝ ᱨᱤᱝ ᱥᱟᱰᱮᱠᱟᱱ ᱜᱮᱭᱟ᱾ ᱢᱤᱫᱜᱷᱟᱹᱲᱤᱡ ᱛᱟᱭᱱᱚᱢ ᱦᱟᱹᱨᱩ ᱛᱟᱠᱚᱣᱟᱜ ᱠᱩᱸᱫᱽᱨᱩ ᱞᱟᱴᱟ ᱥᱮᱫᱨᱮ ᱢᱳᱵᱟᱭᱤᱞᱨᱮ ᱥᱮᱨᱮᱧ ᱟᱧᱡᱚᱢᱮᱱᱟ᱾
ᱢᱟᱹᱞᱤᱱ ᱟᱡ ᱟᱭᱳᱭ ᱢᱮᱱ ᱜᱚᱫ ᱠᱮᱫᱼᱟ,“ᱵᱤᱴᱤ ᱚᱛᱮ ᱟᱧᱡᱚᱢ ᱢᱮᱥᱮ ᱚᱱᱛᱮᱨᱮ ᱢᱳᱵᱟᱭᱤᱞᱨᱮ ᱥᱮᱨᱮᱧ ᱥᱟᱰᱮ ᱠᱟᱱᱟ, ᱡᱟᱹᱱᱤᱡ ᱡᱟᱶᱟᱭᱼᱟᱜ ᱠᱟᱱᱜᱮᱭᱟ᱾”
ᱢᱟᱹᱞᱤᱱᱼᱮ ᱟᱛᱮᱱ ᱡᱩᱛ ᱠᱮᱫᱼᱟ ᱟᱨ ᱟᱭᱟᱜ ᱯᱷᱳᱱᱦᱚᱸ ᱩᱭᱩᱝ ᱠᱟᱛᱮᱫᱼᱮ ᱢᱮᱱ ᱠᱮᱫᱼᱟ, “ᱦᱮᱸ”᱾
ᱟᱹᱴᱩᱯᱟᱹᱴᱩ ᱟᱫᱚ ᱚᱱᱟ ᱞᱟᱴᱟᱛᱮᱠᱳ ᱥᱮᱱᱮᱱᱟ ᱟᱨ ᱥᱮᱱ ᱠᱟᱛᱮᱫ ᱠᱳ ᱧᱮᱞᱮ ᱠᱟᱱᱟ ᱜᱤᱛᱤᱡ ᱟᱠᱟᱱᱟᱭ ᱟᱨᱠᱳ ᱟᱹᱭᱠᱟᱹᱣᱮᱫᱼᱟ ᱢᱟᱛᱠᱚᱢ ᱯᱟᱹᱣᱨᱟᱹ ᱨᱮᱭᱟᱜ ‘ᱥᱚᱸᱫᱷᱟᱬ ᱥᱚ’᱾ᱵᱩᱡᱷᱟᱹᱣ ᱠᱮᱫᱼᱟᱠᱳ ᱢᱮᱱᱛᱮ ᱥᱚᱦᱨᱟᱭ ᱫᱚ ᱵᱷᱟᱹᱞᱤᱜᱮᱭ ᱢᱟᱱᱟᱣ ᱟᱠᱟᱫᱼᱟ ᱟᱨ ᱚᱱᱟᱛᱮ ᱱᱩᱱᱟᱹᱜᱼᱮ ᱵᱩᱞ ᱵᱟᱹᱲᱛᱤᱭᱟᱠᱟᱱᱛᱮ ᱚᱲᱟᱜ ᱵᱟᱫᱟᱞᱛᱮ ᱜᱟᱡᱟᱲᱨᱮᱭ ᱛᱳᱦᱮᱹᱞ ᱟᱠᱟᱱᱟ᱾
ᱫᱚᱥᱟᱨ ᱦᱤᱞᱳᱜ ᱥᱮᱛᱟᱜ ᱨᱮ ᱮᱵᱷᱮᱱ ᱠᱟᱛᱮᱫ ᱨᱩᱵᱮᱹᱱ ᱡᱚᱠᱷᱮᱡ ᱩᱭᱦᱟᱹᱨ ᱠᱟᱛᱮᱫᱼᱮ ᱫᱤᱥᱟᱹ ᱧᱟᱢ ᱠᱮᱫᱼᱟ ᱦᱚᱞᱟ ᱧᱤᱱᱫᱟᱹ ᱪᱮᱫ ᱠᱷᱟᱹᱛᱤᱨ ᱟᱹᱰᱤ ᱵᱟᱹᱲᱛᱤ ᱯᱟᱹᱣᱨᱟᱹᱭ ᱧᱩ ᱞᱮᱫᱼᱟ ᱩᱱᱠᱷᱟᱱᱜᱮ ᱟᱫᱚ ᱞᱮᱯᱴᱚᱯ ᱨᱮ ᱤᱱᱴᱟᱨᱱᱮᱹᱴ ᱪᱟᱹᱞᱩ ᱠᱟᱛᱮᱫ ᱵᱤᱨᱫᱟᱹᱜᱟᱲᱷ ᱵᱮᱱᱟᱣ ᱨᱮᱭᱟᱜ ᱥᱳᱭᱜᱤᱨᱟᱹ ᱧᱟᱢ ᱞᱟᱹᱜᱤᱫ ᱪᱤᱴᱷᱤ ᱚᱞᱚᱜᱼᱮ ᱫᱷᱩᱨᱟᱹᱣᱮᱱᱟ ᱟᱨ ᱡᱟᱸᱦᱟ ᱵᱤᱨᱫᱟᱹᱜᱟᱲᱷ ᱜᱚᱲᱟᱣ ᱨᱮᱭᱟᱜᱼᱮ ᱩᱭᱦᱟᱹᱨ ᱠᱮᱫᱼᱟ ᱚᱱᱟ ᱨᱮᱭᱟᱜ ᱧᱩᱛᱩᱢ ᱫᱚᱭ ᱜᱚᱴᱟ ᱠᱮᱫᱼᱟ TRIBAL CULTURAL INSTITUTE AND RESEARCH CENTER.