মার্টিন লুথার কিং

এম. নেপোলিয়ন টুডু

ধারতী জাকাতরেন নানাহুনৗর জাতিয়া: আপান আপিন জাতিয়ৗরী উৎনৗও সেদ্‌বন কয়গ্‌ লেখান,আডিলেকান ঘটন গেবন পান্তেঞামা। ঝতরেগে মিদ্‌ পিড়হি তায়ম আর মিদ্‌টাং পিড়হি রেনা: লাহান্তি ঞেলঞাম আকানা। সাঁওতা রেনা: সুসাৗর সাঁওসাঁওতে জাতিয়ৗরী দাড়ে কেটেজ চালাও আকানা। ভাব্‌না রেনা: ভেগার, ধরম রেনা: হাটিঞ, গাঁওতা করেনা: ভেপেগেদ্‌ ঝতম কওয়া: গে তাঁহেকানা। মেনখান নওয়া কদ অকাহঁ বাং জাঁগে আকানা।






তবেখান ঝতম জাতিরেগে অক্তনাপিত মিদ্‌বার মানমি বঁগা লেকাক ওফেল আকানা। যাঁহায় কওয়া: তারেন দাড়েতে,উসুল ঠাঁও দ হামেট সারি আকানা। পাসনাও আকানা ধারতী জাকাত জাতিয়ারী উপরুম। আপনার আকাদাক ধারতীরেন আয়মা মানমী কগে উনকুয়া: পারসী, সাঁওহেদ্‌ ,ধরম আর আরিচালি। তাড়াম আকাদাক উনকুয়া: উদু: হর ডাহার তে।






নংকাগে মিদ্‌ চাঁদোবঁগা বারাক মানমি দয় তাঁহেকানা – মার্টিন লুথার কিং জুনিয়র। হেঁদে হড়রেন মিদ্‌ জাজিলমান জুলু: ইপিল। যাঁহা অক্তরে উনিয়া: জানাম, উনদ আমেরিকা রেন হেঁদে হারতা হড় চেতান নাহাচার দ বাং সাহাও গান: লেকা। আর নওয়া ক রডজ কচলন ঞেল ঞেলতেগে উনিদয় হারালেনা। আঙচ লেদায় আপনার জাতিয়া: শাসেৎ রেনা: দুখালি হমর। কিরয়া লেদায় নাগাম তেয়ার লাগিদ্‌।






বুঝাও লেদায় কুকমু সারি লাগিদ্‌ সেচেদ্‌ গে মারাং সাপাব্‌ কানা। অনাতে হারকেৎ শাসেৎ দেয়াকাতে, হামেট লেদায় সেচেদ্‌ রেনা: লাফাং থক্‌। আরজাও লেআয় Ph.D ডিগ্রি। আড়গো লেনায় রাজআরি রেহঁ।অনা তায়ম গাঁওতা বেরেদ্‌ কাতে এতহব্‌ লেদায় হেঁদে হড়া: আইধার ঞাম লাগিদ্‌ তোঁগে লৗড়হৗই। মচা খনা: তাকের ওঁডোক লেনতায়া আপনার মানমি লাগিদ্‌ নিরড় আড়াং – “I have a dream”.






জিয়ন রেনা: লেখা সুমুং দিনে বাঞ্চাও লেনা। অনা মুদ্‌রেগে যা উডৗং এ কামিলেআ,অনা দিসমরেনা: সাঁওতারি চিতৗর গেয় বদল লেআ। সুমুং ৩৯ সেরমা উমের রেগে ইঁড়িজ লেনতায়া জিউয়ি বাতি। ইনৗ মুদ্‌রেগেয় হামেট লেআ নোবেল শান্তি পুরস্কার (১৯৬৪)। বদল দাড়েয়াদ্‌ তাঁহেদ্‌ নিগ্রো কওয়া: মলং অলং । যাঁহা রেনা: অর্জগে নিতো: সামাজিক,অর্থনৈতিক বনদলে আগু কাওয়াদ্‌ কওয়া। রাজআরি,খেলোন্ড, সিনেমা এমান রেহঁ সমান তে আকওয়া: পারুখিয়ৗ দুরীব্‌ ক সদর সামাং দাড়েয়া: কানা।






নিতো: ভারত দিসম রে, আবো সান্তাড় কওয়া: আইধৗর আঁদোড় হঁ ঠিক্‌ নংকা গে। আবোরেন সমাজ দরদিয়ৗ,সাঁওতা সুসারিয়ৗ কওয়া: কাজাগ্‌ কামিহরা হঁ লেতাড় আকানা। আতাং আকানা আয়মা কুড়াইগে। লাহান্তি আকানা পারসি , সাঁওহেদ্ সাঁওতে জানাম পৗরসি তে অলঃ পাড়হাও রেনাঃ । ইঞা: গৗহির পৗতয়ৗউ,সান্তাড় কওয়াগ্ অনা সুলুক দিনদ আডি সুররে।






উইহার ঞাম কাতে আবোরেন আঁগিল বিরৗদৗলী, বীরবান্টা ক , হিরিজ্ পৗসর কামিহরা ক হৗরসামটাও হোয়োঃ তাবনা। তেবা: তিয়োগ্‌ কওয়াবন – মারাংবুরু, জাহেরআয়ো, মড়েক তুরুয় ক। সাঁওতা সৗরয়ৗড় রেনাঃ সঁধাড়বন মহকাও অচয়া যুয়ৗন কওয়াঃ অন্তর জিউয়িরে।পান্তে ঞাম কগেয়াবন আবো সান্তাড় বাখোলরেনরেন শায় শায় ‘মার্টিন লুথার কিং ‘।

© এম. নেপোলিয়ন টুডু।