Category Archives: ᱥᱟᱱᱛᱟᱲᱤ ᱚᱱᱚᱞ

স্যোসাল মিডিয়া আর আবো

– বিজয় মুরমু

মিডিয়া মেনেদ দ নংকান মিদ বেবস্থা,জাঁহাতে সোর সৗঁঙ্গিঞ রেনাঃ ডগরকো আবো মেদ সামাংরে মিদ ঘৗড়িতেগে ঝালকাও আবোনা। মাড়াং দ ডগর পাসনাও লৗগিদ হড়, চিঠিসাকাম এমানকো তাঁহেকানা। বাই বাইতে প্রিণ্ট মিডিয়া, ইলেকট্রনিক মিডিয়া এমানতেনাঃ চেতান মৗনমি কওয়াঃ রৗস্কৗ জৗসতি ইদিয়েনা। কাগজ সাকাম তালাতে,টেলিভিশন তালাতে দেশ দিশম রেনাঃ ডগরকো আবো সামাং ঝালকাও রাকাব এনা। অনা তায়নম টেলিফোন,আর অনা তায়নম মোবাইল আবোওয়াঃ তিরে সেটের এনা। মাড়াংদ মোবাইলতে একেন রপড় আর মেসেজ হুয়ুগ কান তাঁহে কানা। মেনখান নেতারাঃ মোবাইল রেদ সানামাঃ গে। মেন গানঃ-আ মিদটাং মোবাইলরে গোটা ধৗরতি সাম্ভাও আকানা। অনাতেগে তো লৗইয়ঃ কানা গোটা ধৗরতি ইঞৗঃ তিরে। প্রিন্ট মিডিয়া, ইলেকট্রনিক মিডিয়া খনহঁ নেতার স্যোসাল মিডিয়া অৗডিগে বেওহার আন মিডিয়া কানা।

নাহাঃ মৗনমি জিয়নরে স্যোসাল মিডিয়া-আঃ অৗডি মারাং এনেম মেনাঃ-আ। জাঁহায় ইন্টেরনেটবন বেওহার এদা ওনকো মুদরে নংকান মিদ হড়হঁ বানুঃবনা জাঁহায়দ স্যোসাল মিডিয়া বাখরাতে বাংবন বাডায়া। নওয়া স্যোসাল মিডিয়া তালাতে তেগে আবোরেন সুর সাঙ্গিঞ গাতেকো সাঁও নানাহুনোর দুক-সুক বুন রপড় জং কানা।চ্যাটিং, মেসেজিং,ফোটো খন ভিডিও, আরহঁ নানাহুনোর বুন শেয়ার জং কান। স্যোসাল মিডিয়া কো মুদ রে ফেসবুক, ওয়াটস অ্যাপ,ইউটিউব আডিগে সরেশ মেনতে আবো কো তালারে বাছনাও আকানা। সানাম কগে কমবেশি স্যোসাল মিডিয়া রে অক্তবুন খাঁডাওয়েদ গেয়া।কম উমের রেন মাই বাবু তাকো নওয়া স্যোসাল মিডিয়ারে অক্ত খাঁডাও জাসতি গে রাস্কো কো আইকাও-আ।ফেসবুক ঞেল লেখানগে অনা রেনাঃ জেলেক দবুন ঞাম গদ-আ।

নওয়া স্যোসাল মিডিয়া বেওহার কাতেঃ আয়মা হড়গেকো উপ্কার আকানা আর আয়মা হড় আঃ অক্ত বৗড়িচ আকানা। স্যোসাল মিডিয়া বেওহার কাতেঃ আয়মা হড় কৗওডিকো আরজাও এদা।অকয়দ ইউটিউব তালাতে, অকয়দ ফেসবুক তালাতে। অকয়দ স্যোসাল মিডিয়া তালাতে নানাহুনোর জিনিসকো রেনাঃ অ্যাডভার্টাইজমেন্ট কো এম এদা,অনা ঞেলতে গ্রাহক কো অ্যাডভার্টাইজমেন্ট দড়ম আকাদ হড় সাঁও রপড় কাতেঃ আকোওয়াঃ লৗকতিয়ান জিনিসকো হাতাও জং কানা,আর অকয়দ নানাহুনোর মেসেজ,ভিডিও তেয়ার কাতেঃ স্যোসাল মিডিয়ারে দড়ম কাতেঃ কৗওডিকো আরজাও এদা,জৗসতি দ ইউটিউব আর ফেসবুক খন।

নাহাঃ দ আবো সান্তাড়হঁ নওয়া স্যোসাল মিডিয়া রেনাঃ বেওহারবন সেঁড়া আকাদ গেয়া। ফেসবুক আর ইউটিউব রেদ জাসতিগে সান্তাড় কওয়া কৗমিহরা ঞেলঃ কানা। মেনখান জাঁহাগে হোয়োঃ কান অনারেনাঃ ভিডিও তেয়ার কাতেঃ ইউটিউব রেবন দড়ম এদা। সান্তাড়ি এনেচ সেরেঞ,লায়-লাকচার,অনড়হেঁ,হুডিং কৗহনি, নাহাঃ সান্তাড়ি সেরেঞ,আরহঁ নানাহুনৗর কৗমিকো রেনাঃ ভিডিওকহঁ ঞামঃ কান গেয়া। তবে সান্তাড়হঁ ছৗতিক জৗতিলেকা বৗড়িচ কৗমিরেবোন জপড়াও আকানা, অনারেনাঃ ভিডিওহঁ ইউটিউবরে দড়ম আকানা।

নওয়া স্যোসাল মিডিয়া আবো অৗদিবাসী লৗগিদ দ অৗডি কৗমিয়ান মাধ্যম কান গেয়া। চেদাঃ স্যে প্রিন্ট মিডিয়া, ইলেকট্রনিক মিডিয়া আবো চেতান রে হোয়োঃকান নাহাচার রেনাঃ কাথা কদ বাংকো পারসাল এদা স্যে হাপেনদিনরেহঁ জৗনিচ বাংকো পাসনাওয়া। আর জাঁহাকো পাসনাও এদা অনাহঁ বেবৗড়িচ স্যে ভুল। নিতঃ নওয়া স্যোসাল মিডিয়া তালাতেগে মঁজ,বৗড়িচ ডগরকো পাসনাও কাতেঃ ধৗরতি জাকাতরেন সান্তাড়কো মিদ তাঁহে রেনাঃ কৗমিহরাবোন হাতাও দাড়েয়াঃ-আ। *দেশ গুনে বেশ,রাজা গুনে প্রজা* নংকান চিন্তৗ মুচৗদ কাতেঃ *মিদ সাঁওতা, মিদ অৗরি* রেনাঃ কৗমিহরাবোন এহব দাড়েয়াঃ-আ। সাঁওতা হারাবুরু রেনাঃ নানাহুনৗর দিশহুদিশকো আবোরেন নাহাঃ বৗবু তাকো ঠেনবোন সেটের দাড়েয়াঃ-আ।

দিশম জাকাত স্যে ধৗরতি জাকাতরে আবো চেতান হোয়োঃকান নাহাচারকো স্যোসাল মিডিয়া তালাতেবোন বাড়ায় ঞাম এদা।আর আবোহঁ উন জহগগে নওয়া স্যোসাল মিডিয়ারে নাহাচার বিরুদ কাথাকো দড়ম কাতেঃ নাহাচার জাঙ্গে দারাম রেনাঃবোন কুরুমুটুয়েদা। পুরৗ কৗমি বাং হোয়োঃকান রেহঁ নাসে দ হোয়োঃকান গেয়া।স্যোসাল মিডিয়া আবো কওয়াঃ কাথা ঞেল কাতেঃ নাহাচার বিরুদ লৗড়হাইকান সান্তাড় সৗঙ্গিঞরে তাঁহে কাতেঃ হঁ লাড়হাই রেনাঃ দাড়েকো ঞাম এদা। আবো কওয়া পোস্ট স্যে কমেন্ট কো ঞেল কাতেঃ প্রশাসনহঁ মিদ বার ঠাঁও রেদ নাহাচার বিরুদ রে কৗমিহরাকো সাব আকাদ গেয়া। আর নণ্ডেগে স্যোসাল মিডিয়া বেওহার কাতেঃ আবোওয়াঃ জুমিদ দ,আবোওয়া জিতকৗর দ।

স্যোসাল মিডিয়া আবোয় মিদ-এদবোন রেহঁ আবো তালারে আরহঁ হাপাটিঞহঁয় সিরজৗও-এদকান গেয়া। ফেসবুক ঞেল লেখান ঞেল ঞাম আবোন, দিনোমগে আবো সান্তাড় বুন খাপারিঃ কানা। অকয়দ ধরম ইদিকাতে,অকয়দ আড়াং ইদি কাতেঃ,অকয় চিকি ইদি কাতেঃ। আবো মুদ খনগে কিছু সান্তাড় পাহটা খন নংকা পোস্ট কো দড়মঃ-আ জাঁহাদ আবো সান্তাড় বিরুদ কানা। অকয়দ আরহঁ সান্তাড় সাঁওতা ইদি কাতে অৗডিগে ভুল তথ্যকো দড়মা, আরহঁ অকয়দ বেবৗড়িচকো রড়র-আ। ফেসবুক ঞেল লেখান বুঝৗও ঞামঃ-আ আবোরেন আয়মা সান্তাড় ছৗতিক কওয়া অৗরিচৗলি পাঁজা কাতেঃ আবো খন আয়মা সৗঁঙ্গিঞকো সেন আকানা। সান্তাড় সাঁওতা রেনাঃ কাথা মেতাকো খানগে অকালেকাচ এ্যঁতকা জদ আৎকো লেকাকো আইকাও-আ। উনদ সান্তাড় সাঁওতা ইদিকাতেঃ নানাহুনৗর বৗড়িচ কাথাকো লালাই-আ, সংবিধান রেনাঃ কাথাকো লৗই-আ, স্বাধীনতা রেনাঃ কাথাকো লৗই-আ,মেনখান সাঁওতা ভৗলৗই রেনাঃ কাথা দ বাংকো লৗলৗই-আ। অনা সাঁওতে আবোরেন নাহাঃ মৗই বৗবু তাকো স্যোসাল মিডিয়ারে সিঞ ঞিদৗ ডুবুজ মেনাঃ কওয়া। নওয়ারে ডুবুজ তাঁহে কাতেঃ আকোওয়াঃ আগাম লৗগিদ কৗমি হরাকো হিড়িঞ কাঃ কানা। কিছু কিছু মৗই বৗবু তাকো স্যোসাল মিডিয়ারেকো লাই এদা *মাই লাইফ, মাই চয়েস*। বুগি কাথা। আদ আবোরেন মৗই বৗবু তো অকা লাইফকো খজঃ কানা অকয় বাডায়া।

আদ জাঁহাগে জাহাঃ কান, তবে পৗতয়ৗও মেনাঃ-আ মিদ দিন হিলোঃ নওয়া স্যোসাল মিডিয়া রেনাঃ সঠিক বেওহারবোন সেঁড়ায়গেয়া জৗনিচ। সেঁড়া সেঁড়া সান্তাড় ফেসবুকার কওয়া কাথাতে, ওনকোয়াঃ কৗমিহরা ঞেলতে আবোরেন *আৎ আকান হড়* কো, বেধরম তে তাড়াম আকাদ হড়কো, স্যোসাল মিডিয়া রেনাঃ নিশৗতে বুল আকান মৗই বৗবু তাকো,সান্তাড় সাঁওতা চেতান অৗড়িস আকান বয়হাবুহিন কো মিদ দিন নওয়া স্যোসাল মিডিয়া তালাতেগে সান্তাড় সাঁওতা রেনাঃ কাথাকো উইহৗর-আ, আবোওয়াঃ সান্তাড় সাঁওতা রেকো রুওয়ৗড় হিজুঃ-আ।

ᱫᱷᱟᱹᱨᱛᱤᱯᱩᱨᱤᱨᱮ ᱠᱳᱨᱳᱱᱟ ᱟᱡᱟᱨ ᱨᱮᱭᱟᱜ ᱵᱩᱜᱤ ᱵᱟᱹᱲᱤᱡ

ᱡᱚᱠᱷᱮᱡ ᱪᱤᱱ ᱫᱤᱥᱳᱢᱨᱮ ᱯᱳᱹᱭᱞᱳ ᱠᱳᱨᱳᱱᱟ ᱟᱡᱟᱨ ᱪᱷᱩᱲᱭᱟᱹᱣ ᱮᱛᱚᱦᱚᱵ ᱮᱱᱟ, ᱩᱱ ᱫᱚ ᱞᱚᱜᱚᱱ ᱢᱟᱪᱷᱟ ᱚᱱᱟ ᱫᱤᱥᱳᱢ ᱠᱷᱚᱱ ᱵᱷᱟᱨᱚᱛ ᱨᱮᱱ ᱦᱚᱲᱠᱳ ᱵᱟᱝᱠᱳ ᱨᱩᱭᱟᱹᱲ ᱦᱮᱡ ᱞᱮᱱᱟ, ᱡᱚᱠᱷᱮᱡ ᱤᱛᱟᱞᱤ, ᱫᱚᱠᱠᱷᱤᱱ ᱠᱳᱨᱤᱭᱟ, ᱤᱨᱟᱱ, ᱟᱢᱮᱹᱨᱤᱠᱟ ᱠᱳᱨᱮ ᱠᱳᱨᱳᱱᱟ ᱯᱟᱥᱱᱟᱣᱮᱱᱟ ᱩᱱ ᱟᱹᱱᱤᱡ ᱵᱟᱦᱨᱮ ᱫᱤᱥᱳᱢ ᱠᱳᱨᱮᱠᱳ ᱛᱟᱦᱮᱸᱠᱟᱱ ᱵᱷᱟᱨᱚᱛ ᱨᱮᱱ ᱦᱚᱲᱠᱳ ᱵᱷᱟᱨᱚᱛ ᱛᱮᱠᱳ ᱦᱮᱡ ᱮᱱᱟ, ᱟᱨ ᱳᱱᱠᱳᱜᱮ ᱵᱷᱟᱨᱚᱛ ᱫᱤᱥᱳᱢᱨᱮ ᱠᱳᱨᱳᱱᱟ ᱟᱡᱟᱨᱠᱳ ᱯᱟᱥᱱᱟᱣ ᱠᱮᱫᱼᱟ, ᱚᱱᱟᱛᱮ ᱤᱧᱟᱹᱜ ᱢᱚᱱᱮ ᱦᱳᱭ ᱜᱚᱫ ᱮᱱᱟ ᱯᱟᱞᱮᱱ ᱱᱚᱣᱟ ᱫᱚ ᱫᱤᱥᱳᱢ ᱨᱮᱱ ᱮᱥᱮᱞ ᱩᱥᱩᱞ ᱦᱚᱲ ᱠᱚᱣᱟᱜ ᱠᱟᱹᱨᱥᱟᱹᱡᱤ ᱠᱟᱱ, ᱯᱟᱞᱮᱱ ᱳᱱᱠᱳ ᱠᱳ ᱢᱚᱱᱥᱩᱵᱟᱹᱭᱟᱠᱟᱫ ᱫᱤᱥᱳᱢ ᱨᱮᱠᱳ ᱥᱟᱸᱜᱮᱭᱟᱠᱟᱱ ᱢᱟᱹᱱᱢᱤᱠᱳ ᱜᱚᱡ ᱟᱹᱫᱷᱤᱠᱳ ᱨᱮᱭᱟᱜ; ᱵᱟᱝ ᱦᱳᱭ ᱨᱮᱭᱟᱜ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟᱹ᱿

ᱡᱮᱹᱦᱤᱞᱳᱜ ᱯᱳᱹᱭᱞᱳᱛᱮ ᱥᱟᱱᱟᱢ ᱫᱤᱥᱳᱢ ᱨᱮᱱ ᱥᱚᱨᱠᱟᱨ ᱟᱨᱵᱟᱝ world health organisation ᱨᱮᱱ ᱥᱟᱱᱟᱢ ᱜᱟᱹᱜᱷᱩᱲᱟᱱᱠᱳ ᱵᱩᱡᱷᱟᱹᱣ ᱛᱤᱭᱳᱜ ᱞᱮᱫᱼᱟ ᱢᱮᱱᱛᱮ ᱪᱤᱱ ᱠᱷᱚᱱ ᱡᱩᱫᱤ ᱵᱟᱦᱨᱮ ᱫᱤᱥᱳᱢᱛᱮ ᱦᱚᱲᱠᱳ ᱥᱮᱱᱚᱜᱼᱟ ᱛᱟᱦᱞᱮᱠᱷᱟᱱ ᱠᱳᱨᱳᱱᱟ ᱥᱚᱸᱜᱮ ᱠᱟᱛᱮᱫᱠᱳ ᱥᱮᱱ ᱫᱟᱲᱮᱭᱟᱜᱼᱟ; ᱚᱱᱟᱛᱮ ᱩᱱ ᱨᱮᱜᱮ ᱥᱟᱱᱟᱢᱠᱳ ᱚᱸᱰᱮᱜᱮ ᱛᱟᱦᱮᱸ ᱦᱚᱪᱚᱣᱟᱠᱳ ᱨᱮᱭᱟᱜ ᱵᱚᱱᱫᱮᱹᱡᱽᱠᱳ ᱠᱚᱨᱟᱣ ᱞᱮᱠᱷᱟᱱ ᱱᱟᱯᱟᱭ ᱠᱚᱜᱼᱟ ᱟᱨ ᱩᱱᱨᱮ ᱪᱤᱱ ᱥᱚᱨᱠᱟᱨ ᱡᱩᱫᱤ ᱮᱛᱚᱦᱚᱵ ᱨᱮᱜᱮ ᱵᱷᱟᱨᱚᱛ ᱫᱤᱥᱳᱢ ᱞᱮᱠᱟ ᱞᱚᱠᱰᱟᱭᱳᱱ ᱠᱟᱹᱱᱩᱱᱼᱮ ᱡᱟᱹᱨᱤ ᱠᱮᱭᱟ ᱛᱟᱦᱞᱮᱠᱷᱟᱱ ᱩᱱᱟᱹᱜ ᱦᱚᱲ ᱫᱚ ᱵᱟᱝᱠᱳ ᱜᱚᱡ ᱠᱚᱜ ᱠᱮᱭᱟ᱿ ᱢᱮᱱᱠᱷᱟᱱ ᱪᱤᱱ ᱥᱚᱨᱠᱟᱨ ᱚᱱᱠᱟ ᱦᱚᱲ ᱪᱮᱫᱟᱜ ᱵᱮᱝᱼᱮ ᱥᱚᱱᱛᱚᱨᱟᱠᱟᱫ ᱠᱚᱣᱟ ᱚᱱᱟᱛᱮ ᱢᱚᱱᱮ ᱦᱚᱭᱳᱜᱠᱟᱱ ᱛᱤᱧᱟᱹ ᱯᱟᱞᱮᱱ ᱥᱟᱹᱨᱤᱜᱮ ᱱᱚᱣᱟ ᱫᱚ ᱫᱤᱥᱳᱢ ᱨᱮᱱ ᱢᱟᱹᱱᱢᱤᱠᱳ ᱜᱚᱡ ᱟᱹᱫᱷᱤ ᱨᱮᱭᱟᱜ ᱠᱟᱹᱨᱥᱟᱹᱡᱤ ᱠᱟᱱ᱿

ᱢᱮᱱᱠᱷᱟᱱ ᱟᱨ ᱢᱤᱫ ᱥᱮᱫᱛᱮ ᱧᱮᱞ ᱞᱮᱠᱷᱟᱱ; ᱫᱷᱟᱹᱨᱛᱤᱯᱩᱨᱤᱨᱮ ᱠᱳᱨᱳᱱᱟ ᱵᱷᱟᱭᱨᱟᱥ ᱨᱮᱭᱟᱜ ᱟᱡᱟᱨ ᱯᱟᱨᱪᱟᱣᱮᱱᱛᱮ ᱫᱷᱟᱹᱨᱛᱤ ᱞᱟᱹᱜᱤᱫᱛᱮᱫᱚ ᱱᱟᱯᱟᱭᱜᱮ ᱦᱳᱭᱟᱠᱟᱱᱟ᱿ ᱱᱤᱛᱳᱜ ᱵᱷᱟᱨᱚᱛ ᱫᱤᱥᱳᱢᱨᱮ ᱞᱚᱠᱰᱟᱭᱳᱱ ᱥᱮ ᱠᱟᱨᱯᱷᱩ ᱠᱟᱹᱱᱩᱱ ᱡᱟᱨᱤᱭᱟᱠᱟᱱᱟ ᱚᱱᱟᱛᱮ ᱚᱠᱚᱭᱦᱚᱸ ᱚᱲᱟᱜ ᱠᱷᱚᱱ ᱵᱟᱝᱠᱳ ᱳᱰᱳᱠ ᱫᱟᱲᱮᱭᱟᱜ ᱠᱟᱱᱟ᱿ ᱥᱟᱱᱟᱢ ᱞᱮᱠᱟᱱ ᱢᱚᱴᱚᱨ ᱜᱟᱹᱰᱤ ᱱᱤᱛᱳᱜ ᱥᱚᱲᱚᱠᱨᱮ ᱵᱟᱝ ᱜᱩᱲᱫᱷᱟᱹᱜ ᱠᱟᱱᱟ ᱡᱟᱸᱦᱟ ᱠᱷᱟᱹᱛᱤᱨ CO2 ᱵᱟᱝ ᱵᱟᱹᱲᱛᱤᱜ ᱠᱟᱱᱟ, ᱱᱚᱣᱟᱛᱮᱫᱚ O2 ᱨᱮᱭᱟᱜ ᱵᱷᱟᱨᱥᱟᱢᱢᱚ ᱵᱟᱹᱡᱟᱹᱭᱚᱜ ᱠᱟᱱᱟ ᱢᱮᱱᱛᱮ ᱥᱟᱱᱟᱢ ᱦᱚᱲᱠᱳ ᱵᱟᱛᱟᱣᱮᱫᱼᱟ᱿ ᱡᱟᱸᱦᱟᱠᱷᱟᱹᱛᱤᱨ ᱫᱷᱟᱹᱨᱛᱤᱯᱩᱨᱤ ᱟᱫᱚ ᱵᱟᱹᱲᱛᱤ ᱵᱟᱝ ᱞᱚᱞᱚᱜᱼᱟ, ᱟᱱᱴᱟᱨᱠᱴᱤᱠᱟ ᱨᱮᱭᱟᱜ ᱵᱚᱨᱚᱯᱷ ᱟᱫᱚ ᱵᱟᱝ ᱜᱚᱞᱟᱜᱼᱟ ᱚᱱᱟᱛᱮ ᱢᱮᱱ ᱜᱟᱱᱚᱜ ᱠᱟᱱᱟ ᱞᱚᱠᱰᱟᱭᱳᱱ ᱠᱟᱛᱮᱫ ᱫᱚ ᱱᱟᱯᱟᱭᱜᱮ ᱦᱳᱭᱟᱠᱟᱱᱟ ᱡᱮᱞᱮᱠᱟ ᱱᱤᱛᱳᱜ ᱨᱮᱱ ᱢᱟᱹᱱᱢᱤ ᱞᱟᱹᱜᱤᱫ ᱚᱱᱠᱟᱜᱮ ᱦᱟᱯᱮᱱ ᱦᱤᱞᱳᱜ ᱨᱮᱱ ᱢᱟᱹᱱᱢᱤ ᱞᱟᱹᱜᱤᱫᱦᱚᱸ᱿ ᱟᱨᱦᱚᱸ ᱟᱭᱢᱟ ᱫᱤᱥᱳᱢ ᱨᱮᱫᱚ ᱱᱤᱛᱷᱚᱸ ᱠᱳᱨᱳᱱᱟ ᱟᱹᱣᱨᱤ ᱥᱮᱴᱮᱨᱚᱜᱛᱮ ᱚᱱᱟᱠᱳᱨᱮᱫᱚ ᱱᱚᱝᱠᱟ ᱞᱚᱠᱰᱟᱭᱳᱱ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱟᱹᱣᱨᱤᱭᱟᱜᱼᱟ ᱮᱱᱛᱮᱨᱮᱦᱚᱸ ᱡᱩᱫᱤ ᱵᱷᱟᱨᱚᱛ ᱫᱤᱥᱳᱢ ᱞᱮᱠᱟᱜᱮ ᱮᱴᱟᱜ ᱥᱟᱱᱟᱢ ᱫᱤᱥᱳᱢ ᱨᱮᱜᱮ ᱱᱚᱝᱠᱟᱜᱮ ᱠᱟᱹᱱᱩᱱᱠᱳ ᱡᱟᱹᱨᱤ ᱠᱮᱭᱟ ᱟᱹᱰᱤᱜᱮ ᱱᱟᱯᱟᱭᱠᱚᱜ ᱠᱮᱭᱟ ᱢᱮᱱᱠᱷᱟᱱ ᱥᱟᱱᱟᱢ ᱫᱤᱥᱳᱢ ᱥᱚᱨᱠᱟᱨᱛᱚ ᱟᱨ ᱵᱟᱝᱠᱳ ᱢᱤᱫᱼᱟ ᱚᱱᱟᱛᱮ ᱟᱭᱢᱟ ᱫᱤᱥᱳᱢᱜᱮ ᱱᱤᱛᱷᱚᱸ ᱛᱷᱤᱨᱛᱷᱟᱨᱜᱮ ᱢᱮᱱᱟᱜ ᱠᱚᱣᱟ᱿

ᱤᱧ ᱟᱢ ᱟᱵᱳ ᱢᱟᱛᱚ ᱥᱟᱫᱷᱟᱨᱚᱱ ᱦᱚᱲ, ᱟᱵᱚᱣᱟᱜ ᱨᱚᱲ ᱨᱮᱭᱟᱜ ᱜᱚᱱᱚᱝ ᱫᱚ ᱥᱚᱨᱠᱟᱨ ᱩᱱᱟᱹᱜ ᱵᱟᱝᱠᱳ ᱢᱮᱫ ᱞᱩᱛᱩᱨᱟᱼᱟ, ᱚᱱᱟᱛᱮ ᱟᱵᱳ ᱫᱚ ᱮᱠᱷᱮᱱ ᱚᱞᱚᱜ ᱟᱨ ᱨᱚᱨᱚᱲ ᱜᱮᱵᱳᱱ ᱵᱟᱰᱟᱭᱟ᱿ ᱡᱮᱞᱮᱠᱟ ᱠᱳᱨᱚᱱᱟ ᱡᱚᱠᱷᱮᱡᱜᱮ ᱪᱤᱱᱨᱮ ᱯᱳᱹᱭᱞᱳ ᱮᱛᱚᱦᱚᱵ ᱞᱮᱱᱟ ᱩᱱᱨᱮᱜᱮ ᱟᱭᱢᱟ ᱜᱟᱛᱮᱠᱳ ᱥᱟᱶᱛᱮᱧ ᱜᱟᱞᱢᱟᱨᱟᱣ ᱞᱮᱫᱼᱟ ᱢᱮᱱᱛᱮ ᱟᱱᱛᱚᱨᱡᱟᱛᱤᱠ ᱩᱰᱟᱹᱜ ᱜᱟᱹᱰᱤ ᱯᱚᱨᱤᱥᱮᱹᱵᱟ ᱵᱚᱱᱫᱚ ᱞᱮᱠᱷᱟᱱ ᱠᱚᱨᱳᱱᱟ ᱵᱟᱝ ᱦᱤᱡᱩᱜᱼᱟ᱿ ᱢᱮᱱᱠᱷᱟᱱ ᱥᱚᱨᱠᱟᱨ ᱩᱱ ᱵᱮᱲᱟ ᱨᱮᱫᱚ ᱚᱱᱠᱟ ᱵᱟᱝᱼᱮ ᱠᱟᱹᱢᱤᱭᱟᱠᱟᱫᱼᱟ, ᱛᱟᱭᱱᱚᱢᱛᱮ ᱡᱚᱠᱷᱮᱡ ᱵᱷᱟᱨᱚᱛ ᱫᱤᱥᱳᱢ ᱨᱮᱦᱚᱸ ᱠᱳᱨᱳᱱᱟ ᱟᱡᱟᱨᱛᱮ ᱦᱚᱲᱠᱳ ᱜᱩᱡᱩᱜᱠᱳ ᱮᱛᱚᱦᱚᱵ ᱮᱱᱟ ᱩᱱ ᱟᱹᱱᱤᱡ ᱩᱭᱦᱟᱹᱨ ᱵᱷᱟᱵᱽᱱᱟᱭ ᱮᱛᱚᱦᱚᱵ ᱠᱮᱫᱼᱟ ᱟᱨ ᱥᱟᱱᱟᱢ ᱞᱮᱠᱟᱱ ᱢᱚᱴᱚᱨ ᱜᱟᱹᱰᱤ ᱯᱚᱨᱤᱥᱮᱹᱵᱟᱭ ᱵᱚᱱᱫᱚ ᱠᱮᱫᱼᱟ᱿ ᱚᱱᱟᱛᱮ ᱢᱚᱱᱮ ᱦᱳᱭᱳᱜ ᱠᱟᱱᱟ ᱱᱤᱛᱳᱜᱟᱜ ᱥᱚᱨᱠᱟᱨᱠᱳ ᱪᱟᱞᱟᱣᱮᱫ ᱜᱟᱶᱛᱟᱠᱳ ᱫᱚ ᱟᱨᱦᱚᱸ ᱛᱟᱠ ᱜᱮᱠᱳ ᱯᱟᱧᱡᱟᱭᱮᱫᱼᱟ ᱪᱮᱫᱞᱮᱠᱟ ᱠᱟᱛᱮᱫ ᱫᱤᱥᱳᱢ ᱦᱚᱲ ᱠᱚᱣᱟᱜ ᱢᱚᱱᱮ ᱠᱩᱥᱤ ᱦᱚᱪᱚ ᱜᱟᱱᱚᱜᱼᱟ ᱟᱨ ᱫᱟᱨᱟᱭᱠᱟᱱ ᱫᱤᱱ ᱞᱟᱹᱜᱤᱫ ᱵᱷᱳᱴ ᱵᱮᱝᱠ ᱪᱩᱯᱩᱫ ᱡᱟᱣᱨᱟ ᱜᱟᱱᱚᱜᱼᱟ᱿