Category Archives: ᱥᱟᱱᱛᱟᱲᱤ ᱠᱷᱚᱵᱚᱨ

ᱜᱮᱞ ᱤᱨᱟᱹᱞ ᱟᱱᱟᱜ ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ ᱢᱟᱱᱟᱣ

ᱢᱟᱨᱥᱟᱞ ᱜᱟᱶᱛᱟ ᱡᱷᱟᱲᱜᱨᱟᱢ ᱪᱟᱸᱜᱟ ᱦᱚᱛᱮ ᱛᱮ ᱟᱹᱰᱤ ᱜᱟᱹᱦᱤᱨ ᱜᱚᱨᱚᱡᱽ ᱥᱟᱺᱦᱤᱡ ᱜᱮᱞ ᱤᱨᱟᱹᱞ ᱟᱱᱟᱜ ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ (᱒᱒/᱑᱒/᱒᱐᱒᱐) ᱢᱟᱱᱟᱣ ᱨᱮᱱᱟᱜ ᱥᱩᱥᱟᱹᱨᱟᱱ ᱠᱟᱹᱢᱤᱦᱚᱨᱟ ᱥᱟᱹᱛ ᱥᱟᱯᱲᱟᱣ ᱞᱟᱹᱜᱤᱫᱚᱜ ᱠᱟᱱᱟ ᱟᱠᱷᱲᱟ ᱫᱚ ᱮᱛᱚᱦᱚᱵᱚᱜ-ᱟ ᱵᱟᱹᱥᱭᱟᱹᱢ ᱑᱑ᱺ᱓᱐ ᱴᱟᱲᱟᱝ ᱨᱮ᱾






ᱱᱚᱣᱟ ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ ᱥᱟᱹᱜᱩᱱᱟᱱ ᱥᱟᱯᱲᱟᱣ ᱟᱠᱷᱲᱟ ᱫᱚ ᱯᱩᱨᱩᱫᱷᱩᱞ ᱜᱟᱹᱠᱷᱩᱲᱟᱱ ᱠᱚᱣᱟᱜ ᱩᱫᱽᱜᱟᱹᱣᱼᱟᱱ ᱯᱟᱹᱨᱥᱤ ᱡᱤᱭᱟᱹᱲᱟᱱ ᱢᱟᱱᱛᱟᱨ ᱥᱟᱶᱛᱮ ᱦᱟᱹᱞᱤ ᱡᱟᱹᱞᱤ ᱢᱟᱹᱭ ᱵᱟᱹᱵᱩ ᱠᱚᱣᱟᱜ ᱵᱟᱞᱮ ᱟᱲᱟᱝ ᱛᱮ ᱪᱚᱦᱟᱱ ᱥᱟᱹᱨᱤᱜᱼᱟ᱾






ᱱᱚᱣᱟ ᱟᱠᱷᱲᱟ ᱨᱮᱜᱮ ᱯᱚᱪᱷᱤᱢ ᱵᱟᱝᱞᱟ ᱥᱚᱨᱠᱟᱨᱟᱜ ᱥᱟᱱᱛᱟᱲᱤ ᱟᱠᱟᱰᱮᱢᱤ ᱠᱷᱚᱱ ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ ᱩᱭᱦᱟᱹᱨᱟᱱ ᱥᱤᱨᱯᱟᱹ ᱛᱮ ᱡᱷᱟᱵᱽᱨᱟᱣᱼᱟᱱ ᱯᱟᱹᱨᱥᱤ ᱞᱟᱲᱟᱣᱱᱟ ᱨᱮ ᱠᱚᱲᱟᱢ ᱚᱰᱟᱣᱼᱟᱱ , ᱥᱟᱱᱛᱟᱲᱤ, ᱵᱟᱝᱞᱟ ᱚᱱᱚᱬᱦᱮ ᱜᱟᱵᱟᱱ ᱛᱮ ᱯᱟᱹᱨᱩᱠᱷᱤᱭᱟᱹᱼᱟᱱ ᱢᱟᱱᱚᱛᱟᱱ ᱞᱚᱠᱷᱚᱱ ᱠᱤᱥᱠᱩ (ᱜᱩᱨᱟᱹᱭ), ᱨᱟᱱᱤᱵᱟᱸᱫᱷ, ᱵᱟᱸᱠᱩᱲᱟ ᱟᱨ ᱟᱹᱫᱤᱵᱟᱹᱥᱤ ᱥᱟᱶᱛᱟ ᱥᱮᱪᱮᱫ ᱞᱟᱠᱪᱟᱨ ᱥᱮᱢᱞᱮᱫ, ᱡᱷᱟᱲᱜᱨᱟᱢ ᱪᱟᱸᱜᱟ ᱨᱤᱱᱤᱡ ᱡᱤᱨᱟᱹᱣ ᱟᱠᱟᱱ ᱥᱩᱛᱨᱮᱫ ᱢᱟᱱᱚᱛᱟᱱ ᱪᱷᱚᱵᱤᱱᱟᱛᱷ ᱴᱩᱰᱩ, ᱡᱷᱟᱲᱜᱨᱟᱢᱼ ᱡᱟᱸᱦᱟᱭ ᱫᱚ ᱯᱟᱹᱨᱥᱤ ᱦᱟᱨᱟᱵᱩᱨᱩ ᱨᱮ ᱚᱥᱟᱢᱵᱷᱮᱹᱲ ᱮᱱᱮᱢ ᱟᱞᱟᱭ ᱠᱟᱛᱮ ᱯᱟᱹᱨᱥᱤ ᱛᱟᱵᱳᱭ ᱫᱟᱞᱟᱭ ᱫᱟᱞᱟᱭ ᱥᱟᱹᱨᱤᱭᱮᱫᱟ ᱱᱩᱠᱤᱱ ᱢᱤᱫ ᱡᱚᱲ ᱯᱟᱹᱨᱥᱤ ᱫᱩᱞᱟᱹᱲᱤᱭᱟᱹ ᱫᱚ ᱢᱟᱨᱥᱟᱞ ᱜᱟᱶᱛᱟ, ᱵᱷᱚᱨᱚᱛᱯᱩᱨ, ᱡᱷᱟᱲᱜᱨᱟᱢ ᱥᱚᱱᱚᱛ ᱥᱟᱨᱦᱟᱣ ᱪᱟᱞ ᱠᱟᱛᱮ ᱯᱟᱹᱨᱥᱤ ᱡᱤᱛᱠᱟᱹᱨ ᱪᱤᱨᱼᱮ ᱦᱤᱯᱤᱲ ᱥᱟᱹᱨᱤᱭᱟ᱾






ᱛᱤᱨᱞᱟᱹ ᱠᱚᱣᱟᱜ ᱚᱱᱛᱚᱨ ᱨᱮᱭᱟᱜ ᱠᱟᱛᱷᱟ ᱟᱨ ᱛᱤᱨᱞᱟᱹᱠᱳ ᱞᱟᱹᱜᱤᱫᱛᱮ ᱚᱞᱵᱮᱹᱞ ᱫᱚ ᱛᱤᱨᱞᱟᱹᱠᱳᱜᱮ ᱱᱟᱯᱟᱭᱛᱮᱠᱳ ᱚᱞ ᱥᱚᱫᱚᱨ ᱫᱟᱲᱮᱭᱟᱜᱼᱟ : ᱭᱚᱥᱳᱫᱟ ᱢᱩᱨᱢᱩ

ᱢᱟᱱᱚᱛᱟᱱ ᱫᱟᱥᱚᱨᱚᱛᱷᱤ ᱢᱟᱹᱡᱷᱤᱭᱟᱜ ᱥᱟᱯᱲᱟᱣᱛᱮ ᱫᱤᱱᱟᱹᱢᱜᱮ ᱩᱪᱷᱟᱹᱱᱚᱜᱠᱟᱱ ᱛᱟᱲᱣᱟᱨᱤ ᱒᱐᱒᱐ ᱜᱟᱯᱟᱞᱢᱟᱨᱟᱣᱨᱮ ᱯᱟᱨᱚᱢᱮᱱ ᱑᱖ ᱟᱜᱚᱥᱴ ᱦᱤᱞᱳᱜ ᱫᱚ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱱ ᱧᱩᱢ ᱩᱨᱩᱢ ᱛᱤᱨᱞᱟᱹ ᱚᱱᱚᱞᱤᱭᱟᱹ ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩᱼᱮ ᱥᱮᱞᱮᱫ ᱞᱮᱱᱟ᱿

ᱢᱟᱹᱱᱤᱡ ᱭᱚᱥᱳᱫᱟ ᱢᱩᱨᱢᱩ ᱫᱚ ᱚᱱᱟ ᱟᱠᱷᱲᱟᱨᱮᱭ ᱞᱟᱹᱭ ᱥᱚᱫᱚᱨ ᱠᱮᱫᱼᱟ ᱥᱟᱱᱛᱟᱲᱤ ᱥᱟᱶᱦᱮᱫᱨᱮ ᱟᱭᱟᱜ ᱚᱞᱵᱮᱹᱞ ᱮᱛᱚᱦᱚᱵ ᱨᱮᱭᱟᱜ ᱡᱤᱭᱚᱱ ᱠᱟᱹᱦᱱᱤ ᱟᱨ ᱱᱤᱛ ᱦᱟᱹᱵᱤᱡᱛᱮ ᱛᱤᱱᱟᱹᱜ ᱜᱟᱱ ᱪᱮᱫᱠᱳ ᱯᱩᱛᱷᱤᱭᱮ ᱚᱞ ᱩᱪᱷᱟᱹᱱ ᱟᱠᱟᱫᱼᱟ ᱚᱱᱟᱠᱳ ᱥᱟᱱᱟᱢᱼᱮ ᱩᱫᱩᱜ ᱥᱚᱫᱚᱨ ᱠᱮᱫᱼᱟ᱿

ᱜᱟᱯᱟᱞᱢᱟᱨᱟᱣ ᱛᱟᱞᱟᱨᱮ ᱟᱭᱢᱟ ᱞᱮᱠᱟᱱᱟᱜ ᱟᱭᱢᱟ ᱜᱚᱴᱟᱝ ᱟᱭᱟᱜ ᱥᱤᱨᱡᱚᱱ ᱱᱟᱯᱟᱭ ᱱᱟᱯᱟᱭ ᱚᱱᱚᱬᱦᱮᱠᱳᱭ ᱚᱬᱦᱮ ᱠᱮᱫᱼᱟ᱿ ᱚᱱᱟ ᱥᱟᱶ ᱥᱟᱶᱛᱮᱭ ᱞᱟᱹᱭ ᱯᱟᱥᱱᱟᱣ ᱠᱮᱫᱼᱟ, ”ᱛᱤᱨᱞᱟᱹ ᱠᱚᱣᱟᱜ ᱚᱱᱛᱚᱨ ᱨᱮᱭᱟᱜ ᱠᱟᱛᱷᱟ ᱟᱨ ᱛᱤᱨᱞᱟᱹᱠᱳ ᱞᱟᱹᱜᱤᱫᱛᱮ ᱚᱞᱵᱮᱹᱞ ᱫᱚ ᱛᱤᱨᱞᱟᱹᱠᱳᱜᱮ ᱱᱟᱯᱟᱭᱛᱮᱠᱳ ᱚᱞ ᱥᱚᱫᱚᱨ ᱫᱟᱲᱮᱭᱟᱜᱼᱟ ᱚᱱᱟᱛᱮ ᱥᱟᱶᱦᱮᱫ ᱠᱟᱹᱢᱤᱨᱮ ᱟᱨᱦᱚᱸ ᱡᱟᱹᱥᱛᱤ ᱠᱟᱭᱛᱮ ᱛᱤᱨᱞᱟᱹᱠᱳ ᱞᱟᱦᱟ ᱦᱤᱡᱩᱜ ᱦᱳᱭᱳᱜ ᱛᱟᱠᱚᱣᱟ᱿”

ᱜᱟᱯᱟᱞᱢᱟᱨᱟᱣ ᱨᱮᱭᱟᱜ ᱯᱩᱨᱟᱹ ᱵᱷᱤᱰᱤᱭᱳ ᱞᱟᱛᱟᱨᱨᱮᱵᱳᱱ ᱧᱮᱞᱢᱟ;

ᱦᱚᱸᱥᱚᱸᱨᱮᱱᱟᱭ ᱪᱤᱨᱜᱟ.ᱞ ᱵᱟᱰᱳᱦᱤ 🌹

ᱦᱚᱸᱥᱚᱸᱨᱮᱱᱟᱭ ᱪᱤᱨᱜᱟ.ᱞ ᱵᱟᱰᱳᱦᱤ : ✍✍✍ M. NEPOLIAN TUDU

● ᱢᱤᱫ ᱚᱠᱛᱚᱨᱮ ᱱᱚᱣᱟ ᱥᱮᱨᱮᱧ ᱯᱟᱨᱥᱟᱞ ᱥᱟᱶᱼᱥᱟᱶᱛᱮ,ᱛᱟᱢᱟᱢ ᱥᱟᱱᱛᱟᱲ ᱦᱚᱯᱚᱱ ᱠᱚᱣᱟᱜ ᱢᱚᱱᱮᱨᱮ ᱢᱤᱫ ᱨᱟᱠᱷᱟᱫᱚᱦᱚ ᱴᱷᱟᱶᱼᱮ ᱦᱟᱢᱮᱴ ᱞᱮᱜᱼᱟ ᱾ᱮᱞᱵᱟᱢ ᱧᱩᱛᱩᱢᱫᱚ ᱟᱸᱥ ᱾

ᱢᱟ.ᱱ ᱥᱤᱝᱨᱟ.ᱭ ᱥᱚᱨᱮᱱᱟᱜ ᱥᱟᱯᱲᱟᱣ ᱟᱨ ᱢᱟ.ᱱ ᱨᱤᱢᱤᱞ_ᱥᱚᱨᱮᱱᱟᱜ ᱨᱟᱦᱟ ᱟᱲᱟᱝᱛᱮ ᱱᱚᱣᱟ ᱥᱮᱨᱮᱧᱫᱚ –

” ᱪᱤᱨᱜᱟ.ᱞ ᱪᱤᱨᱜᱟ.ᱞᱚᱜᱯᱮ ᱟᱫᱤᱢ ᱠᱷᱮᱨᱣᱟᱲ
ᱫᱷᱤᱨᱤ ᱫᱚᱞᱟᱱ
ᱫᱷᱟᱥᱟᱣᱮᱱ ᱪᱤᱨᱩᱼᱪᱟᱢᱯᱟᱜᱟᱲ ᱾

ᱩᱲᱤᱥᱟ ᱵᱮᱝᱜᱚᱞ ᱟᱥᱟᱢ ᱡᱷᱟᱨᱠᱷᱚᱱᱰ
ᱢᱤᱫᱩᱜ ᱟᱵᱚᱱ ᱫᱤᱥᱚᱢ ᱦᱚᱲ
ᱵᱮᱨᱮᱫᱟᱵᱚᱱ ᱪᱤᱨᱩᱼᱪᱟᱢᱯᱟᱜᱟᱲ
ᱟ.ᱭᱫᱷᱟ.ᱨᱟᱵᱚᱱ ᱟᱵᱚ ᱡᱟᱱᱟᱢ ᱨᱚᱲ ᱾ “

ᱟᱠᱤᱱ ᱵᱟᱱᱟᱨ ᱵᱚᱭᱦᱟᱼᱟᱜ ᱯᱟ.ᱨᱩᱠᱷᱤᱭᱟ.
ᱫᱟᱲᱮᱨᱮ ᱥᱟᱨᱦᱟᱣ ᱮᱢ ᱠᱟᱛᱮᱜᱮ ᱞᱟ.ᱭ ᱜᱟᱱᱚᱜᱼᱟ, ᱱᱚᱣᱟ ᱥᱮᱨᱮᱧ ᱫᱚ ᱡᱩᱫᱟ.ᱠᱟᱨᱛᱮ Singer & Music_Arranger ᱞᱮᱠᱟᱛᱮᱭ ᱛᱷᱟᱯᱚᱱ ᱥᱟ.ᱨᱤᱞᱮᱫ ᱠᱤᱱᱟ ᱾ ᱥᱟᱱᱛᱟᱲ ᱢᱟᱱᱢᱤ ᱠᱚᱴᱷᱮᱱᱦᱚᱸ ᱡᱟᱛᱤᱭᱟᱨᱤ ᱪᱮᱛᱟᱣᱱᱟᱭ ᱥᱟᱧᱪᱟᱣ ᱞᱮᱜᱼᱟ ᱾ᱨᱟᱶᱟᱣ ᱞᱮᱱᱟ ᱱᱚᱣᱟ ᱢᱚᱡᱽ ᱥᱮᱨᱮᱧ ᱨᱟᱦᱟ ᱾

ᱮᱴᱟᱜ ᱟᱰᱤ ᱟᱭᱢᱟ ᱥᱮᱨᱮᱧ ᱞᱮᱠᱟᱜᱮ, ᱱᱚᱣᱟ ᱥᱮᱨᱮᱧ ᱨᱤᱱᱤᱡ ᱠᱟᱛᱷᱟ ᱜᱟᱵᱟᱱᱤᱭᱟ. ᱥᱮ Lyricist ᱚᱠᱚᱭᱮ ᱛᱟᱦᱮᱸᱞᱮᱱᱟ ᱚᱱᱟ ᱨᱮᱱᱟᱜ ᱛᱚᱞᱟᱥᱫᱚ ᱵᱟᱝᱵᱚᱱ ᱦᱟᱛᱟᱣ ᱟᱠᱟᱫᱟ ?
ᱩᱱᱤᱫᱚ ᱟᱨ ᱚᱠᱚᱭᱦᱚᱸᱵᱟᱝ……… ᱢᱟᱱᱚᱛᱟᱱᱪᱚᱸᱱᱫᱨᱚᱢᱚᱦᱚᱱ_ᱥᱚᱨᱮᱱ ᱾ ᱢᱟᱱ ᱥᱤᱝᱨᱟ.ᱭ ᱥᱚᱨᱮᱱ ᱟᱨ ᱨᱤᱢᱤᱞ ᱥᱚᱨᱮᱱ ᱨᱮᱱ
ᱡᱟᱱᱟᱢ ᱟᱯᱟᱛ ᱾

ᱢᱟᱱᱚᱛᱟᱱ ᱥᱚᱨᱮᱱ ᱜᱚᱢᱠᱮᱫᱚ ᱯᱟᱨᱚᱢᱮᱱ ᱑᱕ ᱥᱮᱯᱴᱮᱢᱵᱚᱨ, ᱫᱷᱩᱲᱤ ᱫᱷᱟᱨᱛᱤ ᱨᱮᱭᱟᱜ ᱢᱟᱭᱟ ᱪᱷᱟᱰᱟ ᱠᱟᱛᱮ ᱵᱚᱸᱜᱟᱼᱫᱤᱥᱚᱢᱛᱮᱭ ᱢᱚᱦᱰᱟ ᱮᱱᱟ ᱾ ᱠᱟ.ᱨᱤ ᱨᱮᱭᱟᱜ ᱜᱚᱲᱦᱚᱱ ᱟᱛᱮ,ᱦᱟᱱᱟᱯᱩᱨᱤᱨᱮ ᱱᱟᱭᱛᱮ ᱱᱟᱯᱟᱭᱛᱮᱭ
ᱛᱟᱸᱦᱮᱠᱚᱜᱼᱢᱟ ᱾

ᱚᱱᱚᱞᱤᱭᱟᱹᱠᱳ ᱫᱚ ᱥᱟᱶᱛᱟᱨᱮᱱ ᱰᱟᱠᱛᱚᱨ, SELF REALIZATION ᱠᱟᱛᱮᱫ ᱥᱟᱶᱛᱟ ᱟᱨ ᱥᱟᱶᱦᱮᱫ ᱵᱷᱟᱹᱞᱟᱹᱭ ᱠᱟᱹᱢᱤᱨᱮ ᱡᱩᱣᱟᱹᱱᱠᱳ ᱫᱚᱱ ᱠᱷᱟᱫᱽᱞᱮᱜ ᱦᱳᱭᱳᱜ ᱛᱟᱠᱚᱣᱟ

ᱯᱟᱨᱚᱢᱮᱱ ᱑᱒ ᱥᱮᱹᱯᱴᱮᱹᱢᱵᱚᱨ ᱦᱤᱞᱳᱜ ᱢᱟᱹᱱ ᱫᱟᱥᱚᱨᱚᱛᱷᱤ ᱢᱟᱹᱧᱡᱽᱦᱤᱭᱟᱜ ᱥᱟᱯᱲᱟᱣ ᱛᱮᱭᱟᱜ TARWARI 2020 CONVERSATION ᱨᱮᱭᱟᱜ ᱟᱠᱷᱲᱟᱨᱮ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱢᱟᱹᱱ ᱜᱚᱱᱮᱥ ᱢᱟᱨᱟᱱᱰᱤ ᱟᱭᱟᱜ ᱚᱞᱚᱜ ᱡᱤᱭᱚᱱ, ᱠᱟᱹᱢᱤ ᱡᱤᱭᱚᱱ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱟᱶᱦᱮᱫ ᱨᱮᱭᱟᱜ ᱵᱷᱟᱹᱞᱟᱹᱭ ᱵᱟᱠᱷᱨᱟᱛᱮ ᱟᱭᱢᱟ ᱜᱚᱱᱚᱝ ᱟᱱᱟᱜ ᱫᱤᱥ ᱦᱩᱫᱤᱥᱼᱮ ᱞᱟᱹᱭ ᱥᱚᱫᱚᱨ ᱠᱮᱫᱼᱟ᱿

ᱢᱟᱹᱱ ᱜᱚᱱᱮᱥ ᱢᱟᱨᱟᱱᱰᱤ ᱫᱚ ᱯᱚᱪᱷᱤᱢ ᱵᱟᱝᱞᱟ ᱨᱮᱭᱟᱜ ᱯᱩᱨᱩᱞᱤᱭᱟᱹ ᱡᱤᱞᱟᱹᱨᱮᱱ ᱱᱟᱣᱟ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱟᱨ ᱯᱟᱛᱷᱟᱢ ᱥᱟᱯᱲᱟᱣᱼᱤᱡ ᱠᱟᱱᱟᱭ᱿ ᱩᱱᱤᱭᱟᱜ ᱥᱟᱯᱲᱟᱣ ᱯᱟᱛᱷᱟᱢ ᱫᱚ ᱦᱳᱭᱳᱜ ᱠᱟᱱᱟ ”ᱥᱟᱨᱡᱚᱢ ᱩᱢᱩᱞ”᱿ ᱚᱱᱟ ᱥᱟᱶ ᱥᱟᱶᱛᱮ ᱟᱨᱦᱚᱸ ”ᱡᱩᱣᱟᱹᱱ ᱚᱱᱚᱞᱤᱭᱟᱹ” ᱧᱩᱛᱩᱢᱟᱱ ᱢᱤᱫ ᱚᱱᱚᱞᱤᱭᱟᱹ ᱜᱟᱶᱛᱟᱨᱮᱱ ᱯᱟᱨᱥᱮᱫᱦᱚᱸ ᱠᱟᱱᱟᱭ᱿

ᱯᱳᱹᱭᱞᱳᱛᱮ ”ᱡᱩᱣᱟᱹᱱ ᱚᱱᱚᱞᱤᱭᱟᱹ” ᱜᱟᱶᱛᱟ ᱨᱮᱭᱟᱜ ᱠᱟᱹᱢᱤᱦᱚᱨᱟᱠᱚᱭ ᱞᱟᱹᱭ ᱥᱚᱫᱚᱨ ᱠᱮᱫᱼᱟ᱿ ᱢᱮᱱ ᱠᱮᱫᱼᱟᱭ, ”ᱡᱩᱣᱟᱹᱱ ᱚᱱᱚᱞᱤᱭᱟᱹᱼᱟᱜ ᱟᱠᱷᱲᱟᱨᱮ ᱫᱚ ᱡᱩᱣᱟᱹᱱᱠᱳ ᱟᱠᱳ ᱞᱮᱠᱟᱛᱮ ᱟᱠᱚᱣᱟᱜ ᱠᱟᱛᱷᱟᱠᱳ ᱢᱮᱱ ᱫᱟᱲᱮᱭᱟᱜᱼᱟ ᱟᱨ ᱮᱴᱟᱜ ᱡᱩᱣᱟᱹᱱᱠᱳ ᱥᱟᱶᱦᱮᱫ ᱪᱟᱨᱪᱟᱣ ᱨᱮᱠᱳ ᱩᱫᱽᱜᱟᱹᱣ ᱠᱚᱣᱟ᱿ ᱚᱱᱟ ᱥᱟᱶᱛᱮ ᱚᱱᱟ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱯᱟᱛᱷᱟᱢ ᱩᱪᱷᱟᱹᱱ ᱨᱮᱭᱟᱜ ᱠᱩᱨᱩᱢᱩᱴᱩ ᱦᱚᱸ ᱢᱮᱱᱟᱜᱼᱟ ᱟᱨ ᱱᱟᱣᱟ ᱱᱟᱣᱟ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱠᱚᱣᱟᱜ ᱯᱩᱛᱷᱤᱠᱳ ᱪᱷᱟᱯᱟ ᱥᱚᱫᱚᱨ ᱨᱮᱭᱟᱜ ᱦᱚᱸ ᱩᱭᱦᱟᱹᱨ ᱵᱷᱟᱵᱽᱱᱟ ᱢᱮᱱᱟᱜᱼᱟ᱿”

ᱡᱩᱣᱟᱹᱱᱠᱳ ᱞᱟᱹᱜᱤᱫ ᱥᱟᱱᱫᱮᱥ ᱞᱮᱠᱟᱛᱮᱭ ᱢᱮᱱ ᱠᱮᱫᱼᱟ, ”ᱡᱩᱣᱟᱹᱱᱠᱳ ᱟᱯᱬᱮᱛᱮ ᱟᱸᱜᱚᱪ ᱦᱳᱭᱳᱜ ᱛᱟᱠᱚᱣᱟ ᱥᱮ SELF REALIZATION ᱠᱟᱛᱮᱫ ᱵᱩᱡᱷᱟᱹᱣ ᱦᱳᱭᱳᱜ ᱛᱟᱠᱚᱣᱟ ᱢᱮᱱᱛᱮ ”ᱤᱧ ᱫᱩᱧ ᱥᱟᱱᱛᱟᱲ ᱠᱟᱱᱟ, ᱤᱧᱟᱹᱜ ᱡᱟᱱᱟᱢ ᱯᱟᱹᱨᱥᱤ ᱫᱚ ᱥᱟᱱᱛᱟᱲᱤ ᱠᱟᱱᱟ, ᱤᱧᱟᱹᱜ ᱯᱟᱹᱨᱥᱤ ᱨᱮᱭᱟᱜ ᱥᱟᱶᱦᱮᱫ ᱦᱚᱸ ᱮᱴᱟᱜ ᱯᱟᱹᱨᱥᱤ ᱠᱷᱚᱱ ᱵᱟᱝ ᱞᱤᱪᱟᱹᱲᱟ, ᱤᱧᱟᱹᱜ ᱥᱟᱶᱦᱮᱫ ᱨᱮᱦᱚᱸ ᱟᱭᱢᱟ ᱫᱷᱚᱱ ᱫᱩᱨᱤᱵᱽ ᱢᱮᱱᱟᱜᱼᱟ, ᱢᱤᱫ ᱠᱟᱛᱷᱟᱛᱮ ᱟᱯᱱᱟᱨ ᱞᱮᱠᱟ ᱢᱚᱱᱮᱭ ᱦᱚᱭᱳᱜ ᱛᱟᱠᱚᱣᱟ᱿ ᱡᱩᱣᱟᱹᱱᱠᱳᱜᱮᱠᱳ ᱦᱳᱭᱳᱜ ᱠᱟᱱᱟ ᱦᱟᱯᱮᱱ ᱫᱤᱱ ᱨᱮᱱ ᱞᱟᱹᱣᱲᱤᱭᱟᱹ, ᱥᱟᱶᱛᱟ ᱨᱮᱱ ᱠᱷᱟᱢᱠᱷᱩᱱᱴᱤ᱿

ᱟᱨᱦᱚᱸᱭ ᱢᱮᱱ ᱠᱮᱫᱼᱟ, ”ᱥᱟᱶᱦᱮᱫ ᱪᱟᱨᱪᱟᱣ ᱨᱮᱫᱚ ᱟᱭᱢᱟ ᱟᱸᱡᱷᱟᱴ ᱢᱮᱱᱟᱜᱼᱟ, ᱚᱞᱵᱮᱹᱞ ᱫᱚ ᱟᱹᱰᱤ ᱠᱮᱴᱮᱡ ᱠᱟᱹᱢᱤ ᱠᱟᱱᱟ, ᱥᱟᱶᱦᱮᱫ ᱡᱟᱸᱦᱟᱭᱠᱳ ᱪᱟᱨᱪᱟᱣᱟ ᱳᱱᱠᱳᱭᱟᱜ ᱫᱚ ᱟᱭᱢᱟ ᱫᱟᱭᱵᱷᱟᱨ ᱢᱮᱱᱟᱜᱼᱟ, ᱚᱱᱚᱞᱤᱭᱟᱹ ᱫᱚ ᱵᱳᱜᱮᱹ ᱟᱨ ᱵᱟᱹᱲᱤᱡ ᱪᱤᱛᱟᱹᱨᱠᱳ ᱩᱫᱩᱜ ᱥᱚᱫᱚᱨᱟ, ᱚᱱᱟ ᱥᱟᱶᱛᱮ ᱚᱱᱚᱞᱤᱭᱟᱹᱠᱳ ᱫᱚ ᱵᱳᱜᱮᱹ ᱦᱚᱨᱨᱮ ᱛᱟᱦᱮᱸᱱ ᱦᱳᱭᱳᱜ ᱛᱟᱠᱚᱣᱟ, ᱥᱟᱶᱦᱮᱫ ᱞᱟᱹᱜᱤᱫ ᱠᱟᱹᱢᱤᱫᱚ ᱟᱹᱰᱤ RESPONSIBILITY ᱨᱮᱭᱟᱜ ᱠᱟᱹᱢᱤ ᱠᱟᱱᱟ᱿”

ᱟᱨᱦᱚᱸ ᱡᱟᱸᱦᱟ ᱠᱟᱛᱷᱟᱠᱳ ᱢᱟᱹᱱ ᱜᱚᱱᱮᱥ ᱢᱟᱨᱟᱱᱰᱤᱼᱮ ᱢᱮᱱ ᱠᱮᱫᱼᱟ ᱚᱱᱠᱳ ᱫᱚ ᱱᱚᱣᱟ ᱞᱟᱛᱟᱨ ᱨᱮᱭᱟᱜ ᱵᱷᱤᱰᱤᱭᱳ ᱨᱮᱵᱚᱱ ᱧᱮᱞᱢᱟ;

”ᱚᱱᱚᱞᱤᱭᱟᱹ ᱫᱚ ᱟᱠᱳᱭᱟᱜ ᱚᱱᱛᱚᱨ ᱟᱨ ᱵᱩᱨᱫᱷᱤ ᱛᱮᱠᱳ ᱚᱞᱼᱟ, ᱦᱚᱲᱟᱜ ᱩᱫᱩᱜ ᱥᱤᱠᱷᱟᱹᱣ ᱨᱮᱭᱟᱜ ᱞᱟᱹᱠᱛᱤ ᱫᱚ ᱵᱟᱹᱱᱩᱜᱼᱟ” – ᱠᱟᱡᱚᱞᱤ ᱥᱚᱨᱮᱱ

”ᱛᱟᱲᱣᱟᱨᱤ” ᱯᱟᱛᱷᱟᱢ ᱥᱟᱯᱲᱟᱣᱤᱡ ᱢᱟᱹᱱ ᱫᱟᱥᱚᱨᱚᱛᱷᱤ ᱢᱟᱹᱧᱡᱽᱷᱤᱭᱟᱜ ᱠᱩᱨᱩᱢᱩᱴᱩᱛᱮ ᱥᱟᱯᱲᱟᱣᱼᱚᱜ ᱠᱟᱱ ᱛᱟᱨᱣᱟᱲᱤᱼ᱒᱐᱒᱐ ᱨᱮᱭᱟᱜ ᱜᱟᱯᱟᱞᱢᱟᱨᱟᱣᱨᱮ ᱚᱱᱚᱞᱤᱭᱟᱹ ᱢᱟᱹᱱ ᱠᱟᱡᱚᱞᱤ ᱥᱚᱨᱮᱱ ᱟᱭᱟᱜ ᱚᱞᱚᱜ ᱡᱤᱭᱚᱱ ᱵᱟᱠᱷᱨᱟᱛᱮ ᱟᱭᱢᱟ ᱜᱚᱱᱚᱝ ᱟᱱᱟᱜ ᱥᱟᱱᱫᱮᱥᱼᱮ ᱟᱧᱡᱽᱞᱮ ᱠᱮᱫᱼᱟ᱿ ᱚᱱᱚᱞᱤᱭᱟᱹ ᱢᱟᱹᱱ ᱠᱟᱡᱚᱞᱤ ᱥᱚᱨᱮᱱ ᱫᱚ ᱑᱙᱖᱘ ᱥᱟᱞ ᱠᱷᱚᱱ ᱮᱛᱚᱦᱚᱵ ᱠᱟᱛᱮᱫ ᱱᱤᱛ ᱦᱟᱹᱵᱤᱡ ᱥᱟᱱᱛᱟᱲᱤ ᱥᱟᱶᱦᱮᱫ ᱞᱟᱹᱜᱤᱫᱼᱮ ᱚᱜᱼᱚᱞ ᱠᱟᱱᱟ᱿

ᱚᱱᱚᱞᱤᱭᱟᱹ ᱠᱟᱡᱚᱞᱤ ᱥᱚᱨᱮᱱᱼᱮ ᱢᱮᱱ ᱠᱮᱫᱼᱟ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱭᱟᱜ ᱢᱤᱫ ᱦᱟᱹᱴᱤᱧ ᱚᱱᱚᱬᱦᱮ ᱵᱟᱠᱷᱨᱟᱛᱮ᱿ ᱥᱚᱨᱮᱱ ᱜᱚᱝᱠᱮᱭ ᱢᱮᱱ ᱠᱮᱫᱼᱟ, ᱚᱱᱚᱬᱦᱮ ᱫᱚ ᱵᱟᱨ ᱦᱟᱹᱴᱤᱧᱛᱮ ᱚᱞᱚᱜᱼᱟ ᱥᱮ ᱥᱤᱨᱡᱚᱱᱚᱜᱼᱟ ᱚᱱᱟᱠᱤᱱ ᱫᱚ ᱦᱳᱭᱳᱜ ᱠᱟᱱᱟ ”ᱵᱩᱨᱫᱷᱤ ᱯᱚᱨᱤᱪᱟᱞᱤᱛᱚ” ᱟᱨ ”ᱚᱱᱛᱚᱨ ᱯᱚᱨᱤᱪᱟᱞᱤᱛᱚ”, ᱚᱱᱚᱬᱦᱮ ᱱᱤᱛᱳᱜ ᱪᱮᱫ ᱞᱮᱠᱟ ᱚᱞᱚᱜ ᱠᱟᱱᱟ, ᱪᱷᱟᱱᱫᱽ ᱚᱱᱚᱬᱦᱮ ᱥᱟᱶ ᱥᱟᱶᱛᱮ ᱱᱟᱦᱟᱜ ᱚᱱᱚᱬᱦᱮ ᱨᱮᱭᱟᱜ ᱜᱩᱱᱢᱟᱹᱱ ᱛᱤᱱᱟᱹᱜ ᱠᱤᱸᱥᱟᱹᱬ ᱟᱠᱟᱱᱟ ᱚᱱᱟᱠᱳ ᱥᱟᱱᱟᱢ ᱥᱚᱜ ᱥᱮᱴᱮᱡ ᱠᱟᱛᱮᱫᱼᱮ ᱞᱟᱹᱭ ᱥᱚᱫᱚᱨ ᱠᱮᱫᱼᱟ᱿

ᱥᱟᱱᱛᱟᱲ ᱥᱟᱶᱛᱟ ᱨᱮ ᱱᱤᱛᱳᱜ ᱡᱟᱸᱦᱟ ᱞᱮᱠᱟ ᱟᱹᱛᱷᱟᱹᱲᱤ ᱟᱹᱞᱤᱧ ᱟᱹᱵᱤᱱ ᱟᱛᱮᱫ ᱦᱚᱲᱠᱳ ᱨᱚᱯᱚᱲᱚᱜ ᱠᱟᱱᱟ, ᱚᱱᱟᱫᱚ ᱨᱚᱱᱚᱲ ᱨᱮᱭᱟᱜ ᱵᱚᱪᱚᱱ ᱦᱤᱥᱟᱹᱵᱽ ᱛᱮᱫᱚ ᱵᱟᱹᱲᱤᱡᱚᱜ ᱠᱟᱱᱟ ᱢᱮᱱᱛᱮᱭ ᱢᱮᱱ ᱠᱮᱫᱼᱟ᱿ ᱟᱹᱞᱤᱧ ᱟᱹᱵᱤᱱ ᱟᱛᱮᱫ ᱫᱚ ᱮᱠᱷᱮᱱ ᱦᱚᱧᱦᱟᱨ, ᱦᱟᱱᱦᱟᱨ, ᱵᱟᱦᱧᱟᱨ, ᱟᱡᱷᱱᱟᱨ ᱮᱢᱟᱱᱠᱳ ᱥᱟᱶᱛᱮᱜᱮ ᱨᱚᱯᱚᱲ ᱫᱚ ᱵᱳᱜᱮᱭᱟ᱿ ᱡᱟᱸᱦᱟ ᱫᱚ ᱥᱟᱶᱛᱟ ᱨᱮᱭᱟᱜ ᱢᱤᱫ ᱵᱷᱮᱱᱮᱜᱟᱨ ᱳᱯᱨᱳᱢ ᱠᱟᱱᱟ ᱥᱮ ᱯᱟᱹᱨᱥᱤ ᱨᱮᱭᱟᱜ ᱠᱤᱸᱯᱤᱥᱟᱹᱬ ᱠᱟᱱᱟ ᱢᱮᱱᱛᱮᱵᱳᱱ ᱵᱟᱰᱟᱭᱟ᱿

ᱜᱟᱯᱟᱞᱢᱟᱨᱟᱣ ᱨᱮᱭᱟᱜ ᱢᱩᱪᱟᱹᱫᱨᱮ ᱱᱟᱣᱟ ᱚᱱᱚᱞᱤᱭᱟᱹᱠᱳ ᱞᱟᱹᱜᱤᱫ ᱡᱟᱸᱦᱟ ᱥᱟᱱᱫᱮᱥᱼᱮ ᱪᱟᱞ ᱠᱮᱫᱼᱟ ᱚᱱᱟᱫᱚ ᱱᱚᱝᱠᱟ, ”ᱚᱱᱚᱞᱤᱭᱟᱹ ᱫᱚ ᱟᱠᱳ ᱟᱠᱳᱛᱮᱜᱮᱠᱳ ᱛᱮᱭᱟᱨᱚᱜᱼᱟ, ᱚᱱᱚᱞᱤᱭᱟᱹ ᱫᱚ ᱟᱠᱳᱭᱟᱜ ᱚᱱᱛᱚᱨ ᱟᱨ ᱵᱩᱨᱫᱷᱤ ᱛᱮᱠᱳ ᱚᱞᱼᱟ, ᱦᱚᱲᱟᱜ ᱩᱫᱩᱜ ᱥᱤᱠᱷᱟᱹᱣ ᱨᱮᱭᱟᱜ ᱞᱟᱹᱠᱛᱤ ᱫᱚ ᱵᱟᱹᱱᱩᱜᱼᱟ, ᱮᱱᱛᱮᱨᱮᱦᱚᱸ ᱥᱟᱱᱛᱟᱲᱤ ᱯᱟᱹᱨᱥᱤ ᱟᱨ ᱥᱟᱶᱦᱮᱫ ᱦᱟᱨᱟᱵᱩᱨᱩ ᱞᱟᱹᱜᱤᱫ ᱜᱮᱠᱳ ᱚᱞᱢᱟ᱿”

ᱚᱱᱟ ᱥᱟᱶᱛᱮ ᱚᱱᱚᱞᱤᱭᱟᱹ ᱠᱟᱡᱚᱞᱤ ᱥᱚᱨᱮᱱ ᱜᱚᱝᱠᱮ ᱟᱨᱦᱚᱸ ᱡᱟᱸᱦᱟᱠᱳᱭ ᱢᱮᱱ ᱠᱮᱫᱼᱟ ᱚᱱᱟᱫᱚ ᱱᱚᱣᱟ ᱵᱷᱤᱰᱤᱭᱳ ᱨᱮᱵᱳᱱ ᱧᱮᱞ ᱫᱟᱲᱮᱭᱟᱜᱼᱟ;

ᱵᱳᱝᱜᱟ ᱫᱤᱥᱳᱢᱛᱮᱭ ᱢᱚᱦᱰᱟᱭᱮᱱᱟ ᱢᱟᱱ ᱫᱤᱥᱳᱢ ᱨᱮᱱ ᱧᱩᱛᱩᱢᱟᱱ ᱥᱮᱨᱮᱧ ᱵᱟᱰᱳᱦᱤ

ᱞᱚᱠᱷᱤᱨᱟᱢ ᱦᱟᱸᱥᱫᱟ

ᱵᱳᱝᱜᱟ ᱫᱤᱥᱳᱢᱛᱮᱭ ᱢᱚᱦᱰᱟᱭᱮᱱᱟ ᱥᱮᱨᱮᱧ ᱵᱟᱰᱳᱦᱤ ᱞᱚᱠᱷᱤᱨᱟᱢ ᱦᱟᱸᱥᱫᱟ| ᱡᱟᱸᱦᱟᱭ ᱞᱚᱠᱷᱤᱨᱟᱢ ᱜᱮ ᱜᱟᱵᱟᱱ ᱞᱮᱫᱼᱟᱭ ᱟᱨ ᱥᱮᱨᱮᱧ ᱞᱮᱫᱼᱟᱭ ”ᱢᱮᱱᱟᱜ ᱢᱳᱛᱤ ᱦᱤᱨᱟᱹ ᱢᱮᱱᱟᱜ ᱥᱳᱱᱟ ᱨᱩᱯᱟᱹ”, ”ᱚᱞ ᱟᱹᱠᱤᱞ ᱵᱟᱦᱟ ᱜᱩᱛᱩᱭ ᱯᱮᱥᱮ ᱢᱟᱞᱟ” ”ᱠᱤᱭᱟᱹ ᱠᱟᱫᱟᱢ ᱡᱷᱟᱨᱱᱟ”, ”ᱫᱟᱨᱟᱭ ᱯᱚᱭᱞᱟ ᱯᱷᱟᱹᱜᱩᱱ”, ”ᱚᱠᱚᱭ ᱞᱟᱹᱜᱤᱫ ᱟᱢᱟᱜ ᱢᱚᱱᱮ ᱚᱠᱚᱭ ᱵᱟᱰᱟᱭᱟ”, ”ᱦᱤᱦᱤᱲᱤ ᱯᱤᱯᱤᱲᱤᱨᱮ ᱠᱷᱮᱨᱣᱟᱞᱹᱹᱹᱹᱹ” ᱟᱨᱦᱚᱸ ᱮᱢᱟᱱ ᱮᱢᱟᱱ ᱥᱮᱨᱮᱧᱠᱳ|

ᱞᱚᱠᱷᱤᱨᱟᱢ ᱦᱟᱸᱥᱫᱟ ᱫᱚ ᱯᱟᱨᱚᱢᱮᱱ ᱒᱓ ᱟᱜᱚᱥᱴ ᱦᱤᱞᱳᱜ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱢᱟᱱᱵᱟᱡᱟᱨ ᱨᱮᱭᱟᱜ ᱪᱤᱨᱩᱵᱷᱤᱴᱟᱹ ᱟᱛᱳᱨᱮ ᱯᱷᱩᱴᱵᱚᱞ ᱠᱷᱮᱸᱞᱳᱸᱰ ᱧᱮᱞ ᱚᱠᱛᱚ ᱥᱮᱸᱜᱮᱞ ᱫᱟᱜ ᱛᱮᱭ ᱵᱟᱡᱟᱣᱮᱱ ᱠᱷᱟᱹᱛᱤᱨ ᱡᱤᱣᱤᱵᱟᱹᱛᱤ ᱫᱚ ᱥᱩᱫᱟᱹᱭ ᱫᱤᱱ ᱞᱟᱹᱜᱤᱫ ᱤᱬᱤᱡᱼᱮᱱ ᱛᱟᱭᱟ ᱩᱢᱮᱹᱨ ᱫᱚ ᱦᱳᱭᱞᱮᱱ ᱛᱟᱭᱟ ᱓᱕ ᱥᱮᱨᱢᱟ|

ᱞᱚᱠᱷᱤᱨᱟᱢ ᱦᱟᱸᱥᱫᱟ ᱫᱚ ᱟᱡ ᱨᱮᱱ ᱚᱲᱟᱜ ᱞᱚᱠᱷᱤ ᱢᱟᱹᱱᱤᱡ ᱥᱚᱨᱚᱥᱚᱛᱤ ᱦᱟᱸᱥᱫᱟ ᱥᱟᱶᱛᱮᱭ ᱥᱮᱨᱮᱧᱮᱫ ᱛᱟᱦᱮᱸᱠᱟᱱᱟ ᱨᱟᱦᱞᱟ ᱚᱨᱠᱮᱥᱴᱨᱟ ᱧᱩᱛᱩᱢᱟᱱ ᱥᱮᱨᱮᱧ ᱜᱟᱶᱛᱟ ᱦᱚᱸᱠᱤᱱ ᱵᱮᱱᱟᱣ ᱟᱠᱟᱫᱼᱟ ᱟᱨ ᱚᱱᱟ ᱜᱟᱛᱮ ᱜᱟᱶᱛᱟᱨᱮ ᱟᱭᱢᱟ ᱠᱚᱲᱟ ᱠᱩᱲᱤᱠᱳ ᱠᱟᱹᱢᱤᱭᱮᱫᱼᱟ|

ᱮᱱᱮᱡ ᱥᱮᱨᱮᱧ ᱥᱟᱶ ᱥᱟᱶᱛᱮ ᱞᱚᱠᱷᱤᱨᱟᱢ ᱫᱚ ᱢᱤᱫ ᱢᱟᱪᱮᱫ ᱦᱚᱸᱭ ᱛᱟᱦᱮᱸᱠᱟᱱᱟ ᱞᱚᱠᱷᱤᱨᱟᱢ ᱨᱮᱱ ᱢᱟᱪᱮᱫ ᱜᱟᱛᱮ ᱥᱟᱶᱛᱮ ᱥᱟᱱᱟᱢ ᱞᱟᱠᱪᱟᱨ ᱫᱩᱞᱟᱹᱲᱤᱭᱟᱹᱠᱳ ᱜᱟᱹᱦᱤᱨ ᱫᱩᱠ ᱠᱳ ᱥᱚᱫᱚᱨᱮᱫᱼᱟ|

ᱵᱷᱳᱞᱟᱱᱟᱛᱷ ᱦᱟᱸᱥᱫᱟ ᱛᱟᱭᱱᱚᱢ ᱢᱟᱱ ᱫᱤᱥᱳᱢ ᱨᱮᱱ ᱧᱩᱛᱩᱢᱟᱱ ᱥᱮᱨᱮᱧ ᱵᱟᱰᱳᱦᱤ ᱫᱚ ᱞᱚᱠᱷᱤᱨᱟᱢ ᱜᱮᱭ ᱛᱮᱭᱟᱨ ᱞᱮᱱᱟ ᱢᱮᱱᱠᱷᱟᱱ ᱱᱤᱛ ᱫᱚ ᱵᱟᱨᱭᱟ ᱜᱤᱫᱟᱹᱨ ᱵᱟᱹᱜᱤ ᱦᱚᱴᱚ ᱠᱟᱛᱮᱫ ᱵᱳᱝᱜᱟ ᱫᱤᱥᱳᱢ ᱛᱮᱭ ᱢᱚᱦᱰᱟᱭᱮᱱᱟ|

ᱵᱤᱨᱵᱷᱩᱢ ᱟᱹᱫᱤᱵᱟᱹᱥᱤ ᱜᱟᱶᱛᱟᱼᱟᱜ ᱠᱩᱨᱩᱢᱩᱴᱩᱛᱮ ᱰᱟ.ᱱ ᱯᱟ.ᱛᱭᱟ.ᱣ ᱥᱟᱦᱟᱭᱮᱱᱟ

ᱟᱨᱥᱟᱞ ᱰᱮᱹᱥᱠ:- ᱯᱟᱨᱚᱢᱮᱱ ᱑᱑ ᱟᱜᱚᱥᱴ ᱦᱤᱞᱳᱜ ᱵᱤᱨᱵᱷᱩᱢ ᱡᱤᱞᱟᱹ ᱨᱮᱭᱟᱜ ᱫᱮᱹᱨᱤᱭᱟᱯᱩᱨ ᱜᱨᱟᱢ ᱯᱚᱧᱪᱟᱭᱮᱹᱛ ᱨᱮᱭᱟᱜ ᱵᱚᱱᱜᱨᱟᱢ ᱟᱛᱳ ᱨᱮᱭᱟᱜ ᱜᱷᱚᱴᱚᱱᱟ| ᱚᱱᱟ ᱟᱛᱳᱨᱮᱱ ᱢᱟᱠᱩ ᱢᱩᱨᱢᱩ ᱧᱩᱛᱩᱢᱟᱱ ᱢᱤᱫ ᱟᱭᱳ ᱦᱚᱲ ᱰᱟᱹᱱ ᱠᱟᱱᱟᱭ ᱢᱹᱮᱱᱛᱠᱳ ᱪᱷᱟᱹᱴᱭᱟᱹᱨ ᱞᱮᱫᱮᱭᱟ ᱟᱨ ᱚᱱᱟᱛᱮ ᱟᱛᱳ ᱦᱚᱲᱛᱮ ᱜᱟᱞᱢᱟᱨᱟᱣ ᱜᱚᱴᱟ ᱠᱟᱛᱮᱫ ᱩᱱᱤ ᱢᱟᱠᱩ ᱢᱩᱨᱢᱩ ᱫᱚ ᱟᱛᱳ ᱠᱷᱚᱱ ᱠᱳ ᱞᱟᱜᱟ ᱵᱟᱦᱮᱨ ᱞᱮᱫᱮᱭᱟ ᱟᱨ ᱢᱮᱛᱟᱣᱟᱫᱮ ᱛᱟᱦᱮᱸᱱᱟᱠᱳ, ”ᱚᱲᱟᱜᱛᱮᱢ ᱨᱩᱣᱟᱹᱲ ᱞᱮᱱᱠᱷᱟᱱᱞᱮ ᱜᱚᱡ ᱢᱮᱭᱟ᱿”

ᱱᱚᱣᱟ ᱜᱷᱚᱴᱚᱱᱟ ᱟᱧᱡᱚᱢ ᱠᱟᱛᱮᱫ ᱥᱟᱶᱛᱟ ᱨᱮᱭᱟᱜ ᱱᱚᱣᱟ ᱱᱤᱨᱤᱜᱷᱤᱱ ᱟᱸᱫᱷᱟᱯᱟᱹᱛᱭᱟᱹᱣ ᱥᱟᱦᱟ ᱥᱟᱸᱹᱜᱤᱧ ᱞᱟᱹᱜᱤᱫᱛᱮᱜᱮ ᱑᱓ ᱟᱜᱚᱥᱴ ᱦᱤᱞᱳᱜ ᱵᱤᱨᱵᱷᱩᱢ ᱟᱹᱫᱤᱵᱟᱹᱥᱤ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱢᱟᱹᱱ ᱨᱚᱵᱤᱱ ᱥᱚᱨᱮᱱ, ᱵᱩᱫᱚᱱ ᱢᱟᱨᱰᱤ ᱮᱢᱟᱱᱠᱳ ᱥᱮᱴᱮᱨ ᱠᱟᱛᱮᱫ ᱟᱨ ᱯᱩᱲᱥᱤ ᱵᱤᱪᱟᱹᱨ ᱠᱟᱛᱮᱫ ᱥᱮᱴᱮᱨᱞᱮᱱ ᱟᱛᱳ ᱦᱚᱲᱠᱳ ᱞᱟᱹᱭ ᱵᱩᱡᱦᱟᱹᱣᱟᱰ ᱠᱳᱣᱟ ᱢᱮᱱᱛᱮ ᱰᱟᱹᱱ ᱠᱟᱛᱷᱟᱨᱮ ᱯᱟᱹᱛᱭᱟᱹᱣ ᱫᱚ ᱢᱤᱫ ᱟᱸᱫᱷᱟ ᱯᱟᱹᱛᱭᱟᱹᱣ ᱠᱟᱱᱟ᱿

ᱤᱱᱟᱹᱛᱟᱭᱱᱚᱢ ᱟᱫᱚ ᱟᱛᱳ ᱢᱚᱲᱮ ᱦᱚᱲ ᱥᱟᱶᱛᱮ ᱯᱩᱲᱥᱤ ᱥᱩᱥᱟᱹᱨᱤᱭᱟᱹ ᱠᱚᱣᱟᱜ ᱜᱟᱞᱢᱟᱨᱟᱣ ᱜᱚᱴᱟᱭᱮᱱᱛᱮ ᱩᱱᱤ ᱟᱭᱳᱦᱚᱲ ᱚᱲᱟᱜᱛᱮᱠᱳ ᱨᱩᱣᱟᱹᱲ ᱟᱹᱜᱩ ᱠᱮᱫᱮᱭᱟ ᱟᱨ ᱢᱟᱠᱩ ᱢᱩᱨᱢᱩ ᱟᱨ ᱢᱚᱴᱨᱩ ᱥᱚᱨᱮᱱ ᱛᱟᱹᱠᱤᱱ ᱢᱤᱫᱴᱟᱝ ᱠᱤᱨᱤᱭᱟᱹ ᱥᱟᱠᱟᱢ ᱨᱮᱠᱤᱱ ᱥᱚᱦᱤ ᱠᱮᱫᱼᱟ ᱢᱮᱱᱛᱮ ᱱᱚᱝᱠᱟ ᱱᱤᱭᱟᱹᱛᱭᱱᱚᱢ ᱟᱫᱚ ᱰᱟᱹᱱ ᱰᱟᱹᱯᱟᱹᱱ ᱞᱮᱠᱟᱱ ᱵᱟᱹᱲᱤᱡ ᱠᱟᱛᱷᱟᱠᱳ ᱟᱛᱮᱫ ᱵᱟᱝᱠᱤᱱ ᱠᱷᱟᱹᱯᱟᱹᱨᱤᱜᱼᱟ᱿

ᱢᱤᱥᱚᱱ ᱚᱞᱪᱤᱠᱤ ᱥᱟᱨ ᱥᱟᱹᱜᱩᱱ ᱞᱟᱹᱜᱤᱫ ᱥᱟᱦᱤᱛᱭᱚ ᱟᱠᱟᱰᱮᱹᱢᱤ ᱥᱤᱨᱯᱟᱹ ᱦᱟᱢᱮᱹᱴᱤᱭᱟᱹ ᱢᱟᱹᱱ ᱯᱚᱨᱤᱢᱚᱞ ᱦᱟᱸᱥᱫᱟᱼᱟᱜ ᱱᱟᱣᱟ ᱯᱟᱹᱣᱲᱤ

ᱵᱷᱟᱨᱚᱛ ᱫᱤᱥᱚᱢ ᱨᱮᱭᱟᱜ ᱯᱚᱪᱷᱤᱢ ᱵᱟᱝᱞᱟ ᱯᱚᱱᱚᱛ; ᱱᱚᱣᱟ ᱯᱚᱪᱷᱤᱢ ᱵᱟᱝᱞᱟ ᱨᱮᱜᱮ ᱥᱟᱱᱛᱟᱲᱤ ᱥᱟᱶᱦᱮᱫ ᱨᱮᱱ ᱡᱳᱞᱳᱜ ᱤᱯᱤᱞ ᱞᱮᱠᱟᱛᱮᱠᱤᱱ ᱳᱯᱮᱹᱞ ᱞᱮᱱᱟ ᱠᱚᱵᱤ ᱥᱟᱨᱚᱫᱟ ᱯᱨᱚᱥᱟᱫᱽ ᱠᱤᱥᱠᱩ, ᱠᱚᱵᱤᱜᱩᱨᱩ ᱥᱟᱹᱫᱷᱩ ᱨᱟᱢᱪᱟᱸᱫᱽ ᱢᱩᱨᱢᱩ ᱟᱨ ᱱᱚᱣᱟ ᱯᱚᱪᱷᱤᱢ ᱵᱟᱝᱞᱟ ᱯᱚᱱᱚᱛ ᱨᱮᱭᱟᱜ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱨᱮᱜᱮ ᱥᱟᱱᱟᱢ ᱠᱷᱚᱱ ᱯᱳᱹᱭᱞᱳᱛᱮ ᱚᱞᱪᱤᱠᱤ ᱥᱤᱨᱡᱚᱱᱤᱭᱟᱹ ᱯᱚᱱᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱵᱮᱝᱜᱚᱞ ᱥᱚᱨᱠᱟᱨ ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣᱱᱟᱭ ᱟᱛᱟᱝ ᱞᱮᱫᱼᱟ᱾


ᱤᱱᱟᱹᱛᱟᱭᱱᱚᱢ ᱱᱚᱣᱟ ᱯᱚᱪᱷᱤᱢ ᱵᱟᱝᱞᱟ ᱨᱮᱜᱮ ᱯᱳᱭᱞᱳᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱫᱚ ᱫᱚᱥᱟᱨ ᱚᱯᱷᱤᱥᱤᱭᱟᱞ ᱯᱟᱹᱨᱥᱤ ᱞᱮᱠᱟᱛᱮ ᱵᱮᱝᱜᱚᱞ ᱥᱚᱨᱠᱟᱨᱼᱮ ᱢᱟᱱᱟᱣ ᱵᱟᱛᱟᱣ ᱟᱠᱟᱫᱼᱟ ᱟᱨ ᱥᱟᱱᱛᱟᱲᱤ ᱛᱟᱞᱢᱟᱛᱮ ᱒᱐᱐᱘ ᱥᱟᱞ ᱠᱷᱚᱱ ᱚᱞ ᱯᱟᱲᱦᱟᱣ ᱦᱚᱸᱭ ᱮᱛᱚᱦᱚᱵ ᱟᱠᱟᱫᱛᱮ ᱱᱮᱥᱜᱮ ᱒᱐᱒᱐ ᱥᱟᱞᱨᱮ ᱥᱟᱱᱛᱟᱲ ᱯᱟᱹᱴᱷᱩᱣᱟᱹᱠᱳ ᱥᱟᱱᱛᱟᱲᱤᱛᱮ ᱜᱮᱞᱵᱟᱨ ᱪᱟᱱᱟᱪᱠᱳ ᱯᱟᱲᱦᱟᱣ ᱯᱩᱨᱟᱹᱣ ᱠᱮᱫᱼᱟ᱾ ᱱᱤᱭᱟᱹᱛᱟᱭᱱᱚᱢ ᱟᱫᱚ ᱡᱮᱜᱮᱫ ᱵᱤᱨᱫᱟᱹᱜᱟᱲᱷᱨᱮ ᱥᱟᱱᱛᱟᱲᱤ ᱛᱟᱞᱢᱟᱛᱮ ᱚᱞᱚᱜ ᱯᱚᱲᱦᱚᱱ ᱮᱛᱚᱦᱚᱵᱚᱜᱼᱟ᱾


ᱫᱷᱟᱹᱨᱛᱤ ᱡᱟᱠᱟᱛ ᱨᱮᱱ ᱥᱟᱱᱟᱢ ᱦᱚᱲᱠᱳ ᱵᱟᱰᱟᱭᱟ ᱑᱙᱒᱕ ᱥᱟᱞᱨᱮ ᱳᱰᱤᱥᱟ ᱯᱚᱱᱚᱛ ᱢᱚᱭᱩᱨᱵᱷᱚᱧᱡᱽ ᱡᱤᱞᱟᱹ ᱨᱮᱱ ᱯᱚᱱᱰᱤᱛ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱚᱞᱪᱤᱠᱤᱭ ᱥᱤᱨᱡᱚᱱ ᱞᱮᱫᱼᱟ ᱟᱨ ᱚᱱᱟ ᱚᱞᱪᱤᱠᱤ ᱨᱮᱭᱟᱜ ᱩᱢᱮᱹᱨ ᱫᱟᱨᱟᱭᱠᱟᱱ ᱒᱐᱑᱕ ᱥᱟᱞ ᱨᱮ ᱑᱐᱐ (ᱢᱤᱫ ᱥᱟᱭ) ᱥᱮᱨᱢᱟᱭ ᱯᱩᱨᱟᱹᱣᱼᱟ᱾ ᱮᱱᱛᱮᱨᱮᱦᱚᱸ ᱳᱰᱤᱥᱟ ᱯᱚᱱᱚᱛ, ᱡᱷᱟᱨᱠᱷᱚᱱᱰ ᱯᱚᱱᱚᱛ, ᱵᱤᱦᱟᱨ ᱯᱚᱱᱚᱛᱠᱳᱨᱮ ᱟᱭᱢᱟ ᱥᱟᱸᱜᱮ ᱥᱟᱸᱜᱮ ᱥᱟᱱᱛᱟᱲ ᱢᱮᱱᱟᱜᱠᱳ ᱨᱮᱦᱚᱸ ᱥᱟᱱᱛᱟᱲᱤ ᱛᱟᱞᱢᱟᱛᱮ ᱚᱞ ᱯᱟᱲᱦᱟᱣ ᱥᱚᱨᱠᱟᱨ ᱵᱟᱝᱼᱮ ᱮᱛᱚᱦᱚᱵ ᱟᱠᱟᱫᱼᱟ᱾


ᱴᱷᱤᱠ ᱱᱚᱝᱠᱟᱱ ᱚᱠᱛᱚᱨᱮ ᱫᱤᱞᱞᱤ ᱥᱟᱦᱤᱛᱭᱚ ᱟᱠᱟᱰᱮᱢᱤ ᱨᱮᱭᱟᱜ ᱡᱩᱣᱟᱹᱱ ᱚᱱᱚᱞᱤᱭᱟᱹ ᱥᱤᱨᱯᱟᱹ ᱦᱟᱢᱮᱹᱴᱟᱱ ᱚᱱᱚᱞᱤᱭᱟᱹ ᱢᱟᱹᱱ ᱯᱚᱨᱤᱢᱚᱞ ᱦᱟᱸᱥᱫᱟᱼᱟᱜ ᱥᱟᱯᱲᱟᱣᱛᱮᱛᱮ ᱯᱟᱨᱚᱢᱮᱱ ᱡᱮᱜᱮᱫ ᱡᱟᱠᱟᱛ ᱟᱹᱫᱤᱵᱟᱹᱥᱤ ᱢᱟᱦᱟ ᱦᱤᱞᱳᱜ ᱩᱪᱷᱟᱹᱱᱮᱱᱟ ᱢᱤᱫ ᱱᱟᱣᱟ ᱥᱟᱱᱛᱟᱲᱤ ᱣᱮᱵᱽᱥᱟᱭᱤᱴ᱾
ᱚᱱᱚᱞᱤᱭᱟᱹ ᱯᱚᱨᱤᱢᱚᱞ ᱦᱟᱸᱥᱫᱟᱼᱟᱜ ᱠᱩᱨᱩᱢᱩᱴᱩᱛᱮ ᱩᱪᱷᱟᱹᱱᱮᱱ ᱣᱮᱵᱽᱥᱟᱭᱤᱴ ᱨᱮᱭᱟᱜ ᱧᱩᱛᱩᱢ ᱫᱚ ᱦᱳᱭᱳᱜ ᱠᱟᱱᱟ ᱯᱟᱨᱳᱠᱷᱤᱭᱟᱹ᱾ ᱚᱱᱟᱨᱮᱫᱚ ᱜᱟᱢᱟᱢ, ᱠᱟᱹᱦᱱᱤ, ᱠᱚᱢᱤᱠᱥ, ᱜᱟᱭᱟᱱ, ᱚᱱᱚᱞ, ᱚᱱᱚᱬᱦᱮ ᱟᱨ ᱥᱟᱸᱜᱷᱟᱨ ᱠᱟᱹᱦᱱᱤᱠᱳ ᱩᱪᱷᱟᱹᱱ ᱟᱠᱟᱱᱟ᱾


ᱱᱤᱛ ᱦᱟᱹᱵᱤᱡᱛᱮ ᱡᱟᱸᱦᱟᱭ ᱚᱱᱚᱞᱤᱭᱟᱹ ᱠᱚᱣᱟᱜ ᱚᱞᱠᱳ ᱩᱪᱷᱟᱹᱱ ᱟᱠᱟᱱᱟ ᱳᱱᱠᱳ ᱫᱚ ᱠᱳ ᱦᱳᱭᱳᱜ ᱠᱟᱱᱟᱼ, ᱯᱚᱨᱤᱢᱚᱞ ᱦᱟᱸᱥᱫᱟ, ᱫᱟᱥᱚᱨᱚᱛᱷᱤ ᱢᱟᱹᱡᱷᱤ, ᱥᱩᱠᱪᱟᱸᱫᱽ ᱥᱚᱨᱮᱱ, ᱥᱩᱵᱩᱫᱤᱭᱟᱹ ᱢᱩᱨᱢᱩ, ᱵᱤᱨᱮᱱᱫᱨᱚᱱᱟᱛᱷ ᱠᱤᱥᱠᱩ, ᱵᱟᱹᱵᱩᱨᱟᱢ ᱠᱤᱥᱠᱩ, ᱚᱧᱡᱚᱞᱤ ᱠᱤᱥᱠᱩ, ᱠᱟᱞᱤᱨᱟᱢ ᱢᱩᱨᱢᱩ, ᱜᱚᱱᱮᱥ ᱢᱟᱨᱟᱱᱰᱤ, ᱚᱡᱚᱭ ᱥᱚᱨᱮᱱ, ᱡᱚᱭ ᱥᱟᱜᱚᱨ ᱢᱩᱨᱢᱩ, ᱥᱨᱤᱯᱚᱛᱤ ᱴᱩᱰᱩ, ᱨᱚᱵᱤᱱᱟᱛᱷ ᱢᱩᱨᱢᱩ, ᱨᱟᱱᱤ ᱢᱩᱨᱢᱩ᱾

https://www.parokhiya.com/


ᱱᱚᱣᱟ ᱯᱟᱨᱳᱠᱷᱤᱭᱟᱹ ᱣᱮᱵᱽᱥᱟᱭᱤᱴ ᱩᱪᱷᱟᱹᱱ ᱠᱟᱛᱮᱫ ᱥᱟᱯᱲᱟᱣᱤᱡ ᱯᱚᱨᱤᱢᱚᱞ ᱦᱟᱸᱥᱫᱟ ᱴᱷᱮᱱᱠᱷᱚᱱ ᱵᱟᱰᱟᱭᱮᱱᱟ ᱢᱮᱱᱛᱮ,  ”ᱱᱚᱣᱟᱫᱚ‌‌ ᱥᱟᱶᱛᱟ ‌ᱥᱟ.ᱲᱤᱢ‌ ᱟᱨ ᱥᱟᱶᱦᱮᱫ ᱢᱩᱨᱟ.ᱭ ᱠᱟᱱᱟ᱾ ᱱᱚᱣᱟᱫᱚ ᱢᱤᱫ ᱯᱟ.ᱨᱥᱤ‌ ᱢᱤᱫ ᱪᱤᱠᱤ ᱨᱮᱭᱟᱜ ᱡᱚᱥᱛᱮ ᱵᱮᱱᱟᱣ ᱟᱠᱟᱱᱟ᱾ ᱱᱚᱰᱮ ᱫᱚ ‌ᱥᱟᱱᱟᱢ ᱥᱟᱶᱦᱮᱛᱤᱭᱟ. ᱥᱟᱶᱦᱮᱫ ᱪᱟᱨᱪᱟ ᱨᱮᱱᱟᱜ ᱫᱟᱣ ᱠᱚ ᱧᱟᱢᱟ ᱾ ᱥᱟᱱᱟᱢᱠᱳ ᱚᱞᱪᱤᱠᱤ ᱥᱤᱠᱷᱟᱹᱣᱠᱳ ᱞᱟᱹᱜᱤᱫᱛᱮ ᱥᱮ ᱢᱤᱥᱚᱱ ᱚᱞᱪᱤᱠᱤ ᱒᱐᱒᱕ ᱥᱟᱠᱥᱮᱹᱥ ᱞᱟᱹᱜᱤᱫᱜᱮ ᱱᱚᱣᱟ ᱯᱟᱹᱣᱲᱤ ᱫᱚᱭ ᱞᱟᱦᱟᱭᱮᱱᱟ᱾”


ᱟᱥ ᱟᱨ ᱯᱟᱹᱛᱭᱟᱹᱣ ᱛᱟᱦᱮᱸᱱ ᱠᱟᱱᱟ ᱱᱚᱣᱟ ᱰᱤᱡᱤᱴᱟᱞ ᱡᱩᱜᱽᱨᱮ ᱮᱴᱟᱜ ᱯᱟᱹᱨᱥᱤ ᱥᱟᱶᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱦᱚᱸ ᱯᱟᱱᱛᱮ ᱠᱟᱛᱮᱫ ᱥᱟᱱᱟᱢ ᱞᱮᱠᱟᱱ ᱢᱟᱹᱱᱟᱱ ᱴᱷᱟᱶᱨᱮ ᱥᱮᱴᱮᱨ ᱞᱟᱹᱜᱤᱫ ᱱᱚᱝᱠᱟᱜᱮ ᱥᱟᱱᱟᱢ ᱯᱟᱹᱨᱥᱤ ᱫᱩᱞᱟᱹᱲᱤᱭᱟᱹ ᱯᱟᱹᱨᱥᱤ ᱫᱚᱨᱚᱫᱤᱭᱟᱹ ᱠᱚᱣᱟᱜ ᱜᱚᱲᱚ ᱥᱚᱯᱚᱦᱚᱫ ᱫᱚ ᱥᱟᱨᱟᱵᱮᱲᱟ ᱜᱮ ᱛᱟᱦᱮᱸᱱᱟ᱾

ᱫᱟᱜ ᱫᱚᱲᱚᱢᱮᱱᱟᱭ “ᱫᱩᱯᱩᱞᱟᱹᱲ” ᱥᱟᱶᱦᱮᱫ ᱯᱟᱛᱦᱟᱢᱨᱮᱱ ᱥᱟᱯᱲᱟᱣᱤᱡ

ᱫᱟᱜ ᱫᱚᱲᱚᱢᱮᱱᱟᱭ “ᱫᱩᱯᱩᱞᱟᱹᱲ” ᱥᱟᱶᱦᱮᱫ ᱯᱟᱛᱦᱟᱢᱨᱮᱱ ᱥᱟᱯᱲᱟᱣᱤᱡ ᱚᱱᱚᱞᱤᱭᱟᱹ ᱚᱱᱚᱬᱦᱤᱭᱟᱹ ᱢᱟᱹᱱ ᱵᱳᱭᱫᱚᱱᱟᱛᱷ ᱢᱟᱱᱰᱤ᱾ ᱢᱟᱱᱰᱤ ᱜᱚᱝᱠᱮ ᱫᱚ ᱮᱠᱷᱮᱱ ᱚᱱᱚᱞᱤᱭᱟᱹ ᱮᱥᱠᱟᱨ ᱫᱚ ᱵᱟᱝ ᱩᱱᱤ ᱫᱚ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ ᱟᱨ ᱚᱞᱪᱤᱠᱤ ᱯᱟᱨᱪᱟᱣᱤᱡ ᱦᱚᱸᱭ ᱛᱟᱦᱮᱸᱠᱟᱱᱟ᱾
ᱚᱱᱚᱞᱤᱭᱟᱹ ᱵᱳᱭᱫᱚᱱᱟᱛᱷ ᱢᱟᱱᱰᱤ ᱫᱚ ᱯᱟᱹᱦᱤᱞ ᱯᱚᱪᱷᱤᱢ ᱢᱮᱹᱫᱤᱱᱤᱯᱩᱨ ᱡᱤᱞᱟᱹ ᱨᱮᱭᱟᱜ ᱵᱮᱹᱱᱟᱪᱟᱯᱲᱟ ᱟᱛᱳᱨᱮ ᱑᱙᱔᱒ ᱥᱟᱞ ᱨᱮᱭᱟᱜ ᱚᱠᱴᱳᱵᱚᱨ ᱪᱟᱱᱫᱳ ᱯᱚᱭᱞᱟ ᱢᱟᱹᱦᱤᱛᱨᱮ ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤᱨᱮᱭ ᱳᱯᱮᱹᱞ ᱞᱮᱱᱟ᱾ ᱟᱯᱟᱛ ᱧᱩᱛᱩᱢ ᱫᱚ ᱛᱟᱦᱮᱸᱠᱟᱱᱟ ᱵᱟᱵᱩᱞᱟᱞ ᱢᱟᱱᱰᱤ ᱟᱨ ᱮᱸᱜᱟᱛ ᱧᱩᱛᱩᱢ ᱫᱚ ᱛᱟᱦᱮᱱᱠᱟᱱᱟ ᱥᱚᱞᱢᱟ ᱢᱟᱱᱰᱤ᱾ ᱢᱟᱱᱰᱤ ᱜᱚᱝᱠᱮ ᱫᱚ ᱑᱙᱖᱒ ᱥᱟᱞᱨᱮ ᱦᱟᱭᱟᱨ ᱥᱮᱠᱮᱱᱰᱟᱨᱤ ᱯᱟᱥ ᱛᱟᱭᱱᱚᱢ ᱨᱮᱹᱞ ᱵᱤᱵᱷᱟᱜᱽ ᱨᱮᱭᱟᱜ ᱠᱟᱹᱢᱤᱨᱮᱭ ᱡᱚᱯᱲᱟᱣ ᱞᱮᱱᱟ᱾
ᱤᱱᱟᱹᱛᱟᱭᱱᱚᱢ ᱥᱟᱱᱛᱟᱲᱤ ᱥᱟᱶᱦᱮᱫ ᱞᱟᱹᱜᱤᱫ ᱚᱞᱵᱮᱹᱞ ᱮᱛᱚᱦᱚᱵ ᱠᱟᱛᱮᱫ ᱥᱟᱱᱛᱟᱲᱤ ᱞᱟᱠᱪᱟᱨ ᱵᱟᱵᱳᱫᱛᱮᱦᱚᱸᱭ ᱠᱷᱚᱸᱫᱽᱨᱚᱸᱫᱽ ᱞᱮᱫᱼᱟ᱾ ᱚᱱᱟ ᱠᱷᱚᱸᱫᱽᱨᱚᱸᱫᱽ ᱯᱩᱛᱷᱤ ᱫᱚ ᱵᱟᱝᱞᱟ ᱯᱟᱹᱨᱥᱤ ᱛᱮᱭ ᱚᱞ ᱩᱪᱷᱟᱹᱱ ᱞᱮᱫᱼᱟ᱾
ᱢᱟᱱᱰᱤ ᱜᱚᱝᱠᱮᱭᱟᱜ ᱚᱞ ᱦᱚᱴᱚ ᱯᱩᱛᱷᱤᱠᱳ ᱫᱚ ᱦᱳᱭᱳᱜ ᱠᱟᱱᱟ ᱑) “ᱚᱞᱚᱚᱜ ᱫᱩᱨᱟᱹᱝ” (ᱚᱞᱪᱤᱠᱤ ᱥᱮᱪᱮᱫ ᱨᱮᱭᱟᱜ ᱯᱩᱛᱷᱤ; ᱩᱪᱷᱟᱹᱱ ᱞᱮᱱᱟ ᱑᱙᱗᱗ ᱥᱟᱞᱨᱮ), ᱒) “সাঁওতালী লোক সংস্কৃতি” (ᱠᱷᱚᱸᱫᱽᱨᱚᱸᱫᱽ ᱯᱩᱛᱷᱤ; ᱩᱪᱷᱟᱹᱱ ᱞᱮᱱᱟ ᱑᱙᱘᱓ ᱥᱟᱞᱨᱮ) ᱟᱨ ᱓) “ᱛᱟᱨᱟᱥ” (ᱥᱮᱨᱮᱧ ᱟᱨ ᱚᱱᱚᱬᱦᱮ ᱜᱟᱱᱛᱷᱟᱲᱢᱟᱞᱟ; ᱩᱪᱷᱟᱹᱱ ᱞᱮᱱᱟ ᱑᱙᱙᱒ ᱥᱟᱞᱨᱮ)᱾
ᱢᱟᱹᱱ ᱵᱳᱭᱫᱚᱱᱟᱛᱷ ᱢᱟᱱᱰᱤ ᱫᱚ ᱑᱙᱙᱕ ᱥᱟᱞ ᱠᱷᱚᱱ “ᱫᱩᱯᱩᱞᱟᱹᱲ” ᱧᱩᱛᱩᱢᱟᱱ ᱵᱟᱨ ᱪᱟᱱᱫᱳᱠᱤᱭᱟᱹ ᱥᱟᱱᱛᱟᱲᱤ ᱥᱟᱶᱦᱮᱫ ᱥᱟᱠᱟᱢᱼᱮ ᱥᱟᱯᱲᱟᱣᱮᱫ ᱛᱟᱦᱮᱸᱠᱟᱱᱟ᱾ ᱚᱱᱟ ᱥᱟᱶ ᱥᱟᱶᱛᱮ ᱟᱭᱟᱜ ᱚᱞᱠᱳ ᱫᱚ “ᱦᱚᱲᱥᱚᱢᱵᱟᱫᱽ”, “ᱛᱮᱛᱨᱮ”, “ᱥᱟᱜᱮᱱ ᱥᱟᱠᱟᱢ”, ᱯᱷᱟᱜᱩᱱ ᱠᱳᱭᱮᱹᱞ” ᱮᱢᱟᱱ ᱯᱟᱛᱷᱟᱢᱠᱳᱨᱮ ᱩᱪᱷᱟᱹᱱ ᱟᱠᱟᱱ ᱛᱟᱭᱟ᱾
ᱥᱟᱱᱛᱟᱲᱤ ᱥᱟᱶᱦᱮᱫᱨᱮᱱ ᱱᱚᱝᱠᱟᱱ ᱢᱤᱫ ᱡᱳᱞᱳᱜ ᱤᱯᱤᱞᱼᱮ ᱤᱬᱤᱡᱼᱮᱱ ᱠᱷᱟᱹᱛᱤᱨᱛᱮ ᱥᱟᱱᱟᱢ ᱚᱱᱚᱞᱤᱭᱟᱹ ᱚᱱᱛᱚᱨᱨᱮ ᱫᱩᱠᱜᱮ ᱜᱩᱨᱞᱟᱹᱣᱚᱜ ᱠᱟᱱᱟ᱾

সাগুন খবর; এতহব এনা আদিবাসী টিভি (ADIVASI TV)

পছিম বাংলা পনত রেয়াঃ উত্তর দিনাজপুর রেয়াঃ রায়গঞ্জ নাগার রে এতহব এনা আদিবাসী সান্তাড় লৗগিদ পৌইলো উতৗর স্যাটেলাইট টিভি চ্যানেল আদিবাসী টিভি।

নওয়া টিভি চ্যানেল দ Santaliwood Entertainment সাঁওতে জুমিদ কাতেদ Kalyani Group of Industries হতেতে এতহব এনা। আরহ নওয়া সৗগুনান কৗমিরে গড় সপহদ রেদ মেনাঃ কওয়া উত্তর দিনাজপুর আদিবাসী সমন্বয় কমিটি আর ভারত জাকাত মৗঞ্জহি পারগানা মহল।

আরহঁ মিদটাং রৗস্কৗ খবর নওয়া সান্তাড়ি চ্যানেল রেন ব্রান্ড আম্বেসেডর দয় তাঁহেন কানা সান্তাড়ি ফিল্ম ইন্ডাস্ট্রিরেন ঞুতুমান নায়িকা ডগরমণি টুডু।

« Older Entries