Category Archives: ᱚᱱᱚᱬᱦᱮ

᱒᱒ ᱰᱤᱥᱮᱹᱢᱵᱚᱨ

ᱵᱳᱹᱭᱫᱚᱱᱟᱛᱷ ᱦᱟᱸᱥᱫᱟ






ᱵᱟᱨ ᱜᱮᱞ ᱵᱟᱨ ᱰᱤᱥᱮᱹᱢᱵᱚᱨ ᱢᱟᱦᱟ
ᱯᱟᱹᱨᱥᱤ ᱡᱤᱛᱠᱟᱹᱨ ᱢᱟᱦᱟ ᱠᱟᱱᱟ᱾
᱒᱐᱐᱓ ᱥᱟᱞ ᱨᱮᱱᱟᱜ ᱱᱚᱣᱟ
ᱩᱭᱦᱟᱹᱨ ᱛᱟᱦᱮᱸᱱᱟ ᱡᱟᱭᱡᱩᱜᱽ ᱛᱟᱞᱟ᱾
ᱠᱷᱮᱨᱣᱟᱞ ᱥᱟᱶᱛᱟ ᱧᱩᱢ ᱟᱱᱟᱜ
ᱱᱟᱜᱟᱢᱤᱭᱟᱹ ᱵᱟᱝᱠᱳ ᱦᱤᱲᱤᱧ᱾
ᱵᱷᱟᱨᱚᱛ ᱨᱮᱱᱟᱜ ᱥᱚᱝᱵᱤᱫᱷᱟᱱ ᱛᱟᱞᱟ
ᱴᱷᱟᱶᱼᱮ ᱧᱟᱢᱞᱮᱫ ᱥᱟᱱᱛᱟᱲᱤ ᱵᱷᱟᱥᱟ᱾
ᱡᱩᱜᱽ ᱡᱩᱜᱽ ᱠᱷᱚᱱ ᱞᱟᱹᱲᱦᱟᱹᱭ ᱞᱟᱹᱲᱦᱟᱹᱭ ᱛᱮ
ᱵᱟᱱ ᱜᱟᱰᱟ ᱫᱟᱜ ᱞᱮᱠᱟ ᱢᱟᱭᱟᱢ ᱞᱤᱸᱜᱤᱞᱮᱱ ᱛᱮ᱾
ᱥᱳᱱᱟ ᱟᱠᱷᱚᱨ ᱛᱮ ᱡᱷᱟᱠ ᱡᱷᱟᱠ
ᱵᱟᱝ ᱢᱟᱞᱚᱴᱚᱜ ᱟᱫᱚ ᱛᱟᱦᱮᱸᱱ ᱥᱟᱠᱟᱢ᱾
ᱤᱧ ᱟᱢ ᱚᱠᱚᱭ ᱜᱮ
ᱫᱤᱥᱟᱹᱭ ᱜᱮᱭᱟᱵᱳᱱ ᱞᱮᱛᱟᱲ ᱜᱮ᱾
ᱥᱮᱴᱮᱨᱞᱮᱱ ᱵᱟᱜᱮ ᱵᱟᱨ
ᱰᱤᱥᱮᱹᱢᱵᱚᱨ ᱪᱟᱸᱫᱳ ᱨᱮᱱᱟᱜ ᱥᱟᱭ ᱥᱟᱭ᱾
ᱞᱟᱹᱲᱦᱟᱹᱭ ᱞᱮᱫᱟᱵᱳᱱ
ᱡᱤᱛᱠᱟᱹᱨ ᱟᱠᱟᱱᱟᱵᱳᱱ᱾






ᱯᱷᱩᱨᱜᱟᱹᱞ ᱟᱠᱟᱱᱟ ᱥᱟᱱᱛᱟᱲᱤ ᱵᱷᱟᱥᱟ
ᱯᱷᱩᱨᱜᱟᱹᱞ ᱟᱠᱟᱱᱟ ᱟᱵᱳᱱᱟᱜ ᱪᱟᱨᱪᱟ᱾
ᱥᱟᱱᱟᱢᱠᱳ ᱜᱮ ᱵᱳᱱ ᱥᱮᱞᱮᱫ ᱞᱮᱱ
ᱥᱟᱱᱟᱢᱠᱳ ᱜᱮ ᱵᱳᱱ ᱥᱮᱴᱮᱨ ᱞᱮᱱ᱾
ᱚᱠᱚᱭ ᱫᱚ ᱥᱟᱢᱟᱝ ᱥᱟᱢᱟᱝ ᱛᱮ
ᱚᱠᱚᱭ ᱫᱚ ᱫᱟᱱᱟᱝ ᱫᱟᱱᱟᱝ ᱛᱮ
ᱨᱮᱹᱞ ᱵᱳᱱ ᱜᱷᱮᱨᱟᱣ ᱟᱠᱟᱫᱟ
ᱦᱚᱨ ᱵᱳᱱ ᱡᱟᱸᱜᱮ ᱟᱠᱟᱫᱟ
ᱠᱳᱞᱠᱟᱛᱟ ᱵᱳᱱ ᱢᱟᱰᱨᱟᱣ ᱟᱠᱟᱱᱟ
ᱨᱟᱸᱪᱤ ᱵᱳᱱ ᱨᱮᱞᱟᱣ ᱟᱠᱟᱱᱟ᱾
ᱛᱤᱱᱟᱹᱜ ᱡᱮᱹ ᱵᱳᱱ ᱵᱮᱸᱜᱟᱲᱠᱚᱪᱟ ᱟᱠᱟᱫᱟ
ᱛᱤᱱᱟᱹᱜ ᱡᱮᱹ ᱵᱳᱱ ᱴᱷᱟᱺᱭᱪᱟᱹ ᱟᱠᱟᱱᱟ᱾
ᱟᱛᱳ ᱴᱚᱞᱟ, ᱥᱟᱦᱟᱨ ᱵᱟᱡᱟᱨ
ᱤᱥᱠᱩᱞ ᱠᱚᱞᱮᱡᱽ, ᱚᱯᱷᱤᱥ ᱟᱫᱟᱞᱚᱛ
ᱨᱤᱠᱟᱹ ᱫᱚ ᱢᱤᱫᱴᱟᱝ ᱛᱟᱦᱮᱸᱠᱟᱱ
ᱤᱨᱟᱹᱞᱟᱱᱟᱜ ᱛᱷᱚᱠ ᱨᱮ ᱥᱮᱞᱮᱫᱚᱜ ᱢᱟ ᱥᱟᱱᱛᱟᱲᱤ
ᱛᱮᱦᱮᱧ ᱫᱮ ᱮᱱᱠᱷᱟᱱ ᱫᱮᱞᱟ
ᱥᱟᱱᱟᱠᱳ ᱜᱮ ᱡᱚᱭ ᱡᱤᱛᱠᱟᱹᱨ ᱫᱮᱵᱳᱱ ᱢᱮᱱᱟ᱾
ᱡᱤᱛᱠᱟᱹᱨ ᱡᱤᱛᱠᱟᱹᱨ ᱡᱤᱛᱠᱟᱹᱨ
ᱯᱟᱹᱨᱥᱤ ᱢᱟᱦᱟ ᱡᱤᱛᱠᱟᱹᱨ ᱡᱤᱛᱠᱟᱹᱨ᱿






ᱟᱸᱡᱚᱢ ᱯᱮᱦᱳ✍️✍️ᱦᱩᱞᱜᱟ.ᱨᱤᱭᱟ.

ᱟᱸᱡᱚᱢ ᱯᱮᱦᱳ
📝📝 ᱦᱩᱞᱜᱟ.ᱨᱤᱭᱟ.


ᱮᱦᱳ ᱦᱩᱞᱜᱟ.ᱨᱤᱭᱟ. ᱮᱦᱳ ᱥᱩᱥᱟ.ᱨᱤᱭᱟ.
ᱡᱟ.ᱛ ᱯᱟ.ᱨᱥᱤ ᱱᱟᱜᱟᱢ
ᱪᱟᱜ ᱮᱢ ᱵᱟᱰᱟᱭ ᱮᱛᱚᱢ
ᱡᱟ.ᱛ ᱧᱩᱛᱩᱢ ᱠᱟᱛᱮ ᱮᱴᱟᱜ ᱠᱚᱠᱚ ᱵᱚᱞᱚᱱ
ᱟᱢ ᱫᱚᱢ ᱠᱚᱭᱚᱜ ᱦᱟ.ᱯᱤ
ᱮᱥ ᱴᱤ ᱨᱟᱠᱷᱟ ᱫᱚᱦᱚ ᱴᱷᱟᱣ ᱨᱮ
ᱫᱤᱠᱩ ᱛᱮᱠᱚ ᱞᱮᱢᱮ ᱞᱳᱲᱮᱜ ᱠᱟᱱ
ᱤᱥᱠᱩᱞ ᱠᱚᱞᱮᱡᱽ ᱡᱮᱜᱮᱫ ᱵᱤᱨᱫᱟ.ᱜᱟᱲ
ᱪᱟ.ᱠᱨᱤ ᱵᱟ.ᱠᱨᱤ ᱴᱷᱟᱣ ᱠᱚᱨᱮ
ᱟᱢ ᱫᱚᱠᱚ ᱮᱲᱮ ᱵᱷᱩᱲᱩᱡᱮᱫ ᱢᱮ
ᱡᱟᱞ ᱵᱷᱩᱭᱟ. ᱥᱟᱨᱴᱤᱯᱷᱤᱠᱮᱴ ᱦᱟᱛᱟᱣ ᱠᱟᱛᱮ
ᱟᱠᱚ ᱜᱮᱠᱚ ᱛᱳᱵᱮ.ᱫ ᱵᱚᱞᱚᱱ ᱠᱟᱱ !!

ᱮᱦᱳ ᱦᱩᱞᱜᱟ.ᱨᱤᱭᱟ. ᱮᱦᱳ ᱥᱩᱥᱟ.ᱨᱤᱭᱟ.
ᱟᱢᱟᱜ ᱚᱞᱪᱤᱠᱤ ᱫᱩᱞᱟ.ᱲ ᱵᱟᱝᱛᱮ
ᱨᱳᱢᱟᱱ ᱦᱤᱱᱫᱤ ᱵᱟᱝᱞᱟ ᱛᱮᱜᱮᱢ
ᱦᱚᱨᱚ ᱵᱚᱨᱚᱜ ᱠᱟᱱ ᱫᱚ———-
ᱚᱱᱟ ᱛᱮᱜᱮ ᱡᱷᱟᱲᱠᱷᱚᱱᱰ ᱯᱚᱱᱚᱛ ᱨᱮᱦᱚᱸ
ᱨᱟᱡᱽ ᱵᱷᱟᱥᱟ ᱵᱟᱝ ᱡᱚᱭᱟᱜ ᱠᱟᱱ
ᱮᱴᱟᱜ ᱮᱴᱟᱜ ᱯᱟ.ᱨᱥᱤᱜᱮ
ᱞᱟᱦᱟ ᱦᱤᱡᱩᱜ ᱠᱟᱱ
ᱦᱟᱭᱨᱮ. ᱢᱟᱱᱣᱟ 2021 ᱥᱟᱞ
ᱢᱤᱥᱚᱱ ᱚᱞᱪᱤᱠᱤ ᱫᱚ
ᱪᱤᱠᱟ.ᱢ ᱡᱚ ᱵᱟᱦᱟ ᱦᱚᱪᱚᱭ
ᱡᱟᱱᱟᱢ ᱯᱟ.ᱨᱥᱤ ᱫᱚ ᱛᱤᱥᱮᱢ ᱫᱩᱞᱟ.ᱲ ??

ᱮᱦᱳ ᱦᱩᱞᱜᱟ.ᱨᱤᱭᱟ. ᱮᱦᱳ ᱥᱩᱥᱟᱨᱤᱭᱟ.
ᱟᱢᱟᱜ ᱱᱟᱜᱟᱢ ᱡᱩᱫᱤ ᱵᱟᱢ ᱵᱟᱰᱟᱭ
ᱛᱚᱵᱮ ᱪᱤᱠᱟ.ᱢ ᱫᱩᱞᱟ.ᱲ ᱠᱚ
ᱥᱤᱫᱷᱩ ᱠᱟ.ᱱᱩ ᱛᱤᱞᱠᱟ. ᱵᱤᱨᱥᱟ.
ᱯᱷᱩᱞᱳ ᱡᱷᱟᱱᱳ ᱞᱮᱠᱟᱱ ᱵᱤᱨ ᱵᱟᱱᱴᱟ
ᱡᱟᱸᱦᱟᱭ ᱫᱚ ᱤᱝᱨᱮᱡᱽ ᱵᱤᱨᱩᱫᱷᱨᱮ
ᱥᱟᱢᱟᱝ ᱫᱟᱯᱨᱟᱢ ᱞᱟ.ᱲᱦᱟ.ᱭ ᱠᱟᱛᱮ
ᱥᱟᱱᱛᱟᱲ ᱦᱚᱯᱱᱟᱜ ᱧᱩᱛᱩᱢ ᱠᱚ
ᱡᱟᱜ ᱫᱚᱦᱚ ᱟᱠᱟᱫᱟ
ᱱᱟᱜᱟᱢ ᱥᱟᱠᱟᱢ ᱨᱮ ᱩᱱᱠᱩ ᱠᱚᱣᱟᱜ
ᱱᱟᱜᱟᱢ ᱟᱢᱜᱮ ᱡᱟ.ᱥᱛᱤ ᱠᱷᱚᱱ ᱡᱟ.ᱥᱛᱤ
ᱵᱟᱰᱟᱭ ᱦᱩᱭᱩᱜᱛᱟᱢ ᱫᱚ !!
———————-****————————–
Baidyanath Hansda
Mamurda Jhargram
Dt-22/10/2020

ᱢᱤᱫ ᱫᱤᱱ

ᱢᱤᱫ ᱫᱤᱱ

ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱢᱤᱫ ᱫᱤᱱ ᱰᱚᱭᱞᱚᱝ ᱵᱟᱲᱟᱭᱟ
ᱡᱚᱞᱟᱠᱟᱨ ᱛᱟᱞᱟᱨᱮ
ᱦᱚᱲᱼᱟᱜ ᱡᱟᱝ᱾

ᱯᱟᱸᱡᱟ ᱯᱮᱪᱷᱟᱨᱮ
ᱪᱤᱞᱤᱜᱮ ᱵᱟᱝᱠᱳ ᱛᱟᱦᱮᱸᱱ
ᱞᱤᱞᱟᱹᱢ ᱪᱟᱵᱟᱜᱼᱟ ᱟᱢᱟᱜ ᱜᱚᱨᱚᱵᱽ᱾

ᱟᱢᱜᱮᱢ ᱠᱷᱩᱱ ᱠᱮᱫᱼᱟ
ᱟᱢᱜᱮᱢ ᱞᱟᱠᱚᱵ ᱠᱮᱫᱼᱟ
ᱟᱢᱟᱜ ᱡᱤᱞ ᱟᱨ ᱢᱟᱭᱟᱝ᱾

ᱢᱚᱞᱚᱝ ᱠᱚᱴᱮᱡᱚᱜ ᱦᱩᱭᱩᱜᱛᱟᱢᱟ ᱢᱤᱫ ᱫᱤᱱ
ᱪᱟᱱᱫᱳᱵᱳᱝᱜᱟ ᱫᱚ ᱵᱟᱝ
ᱰᱟᱴᱟ ᱤᱥᱤᱲ ᱪᱩᱲᱤᱱᱼᱮ ᱜᱚᱲᱚᱣᱟᱢᱟ᱾

ᱯᱟᱹᱨᱥᱤ ᱞᱟᱹᱜᱤᱫ

ᱯᱟᱹᱨᱥᱤ ᱞᱟᱹᱜᱤᱫ

ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱟᱵᱚᱣᱟᱜ ᱜᱚ ᱯᱟᱹᱨᱥᱤ ᱫᱚ ᱫᱷᱚᱨᱚᱢ ᱟᱲᱟᱝ
ᱵᱳᱝᱜᱟᱵᱩᱨᱩ ᱠᱚᱣᱟᱜ ᱥᱤᱨᱡᱚᱱ ᱴᱟᱲᱟᱝ ᱴᱟᱲᱟᱝ᱿

ᱫᱷᱟᱹᱨᱛᱤ ᱛᱟᱞᱟ ᱡᱤᱭᱟᱹᱲ ᱛᱟᱦᱮᱸᱱ ᱥᱟᱱᱛᱟᱲᱤ ᱯᱟᱹᱨᱥᱤ
ᱴᱷᱟᱹᱠᱩᱨᱟᱜ ᱚᱝ ᱱᱚᱣᱟᱫᱚ ᱢᱟᱨᱟᱝᱵᱩᱨᱩᱼᱟᱜ ᱟᱹᱨᱥᱤ᱿

ᱡᱤᱣᱤ ᱪᱟᱞᱟᱜ ᱨᱮᱦᱚᱸ ᱟᱵᱳ ᱵᱟᱵᱳᱱ ᱵᱟᱹᱜᱤᱭᱟ ᱟᱲᱟᱝ
ᱢᱟᱭᱟᱝ ᱵᱳᱦᱮᱹᱞ ᱠᱟᱛᱮᱫᱦᱚᱸ ᱨᱚᱯᱷᱟ ᱠᱟᱛᱮᱵᱳᱱ ᱫᱟᱨᱟᱢ᱿

ᱦᱚᱭ ᱦᱤᱸᱥᱤᱫ ᱟᱨᱮᱹᱞ ᱵᱟᱹᱫᱤ ᱡᱚᱛᱚᱵᱳᱱ ᱞᱮᱵᱮᱫ ᱞᱚᱴᱚᱢ
ᱥᱩᱭᱟᱹᱦᱤᱸᱥᱟᱹ ᱮᱜᱮᱨ ᱜᱮᱜᱮᱨ ᱡᱚᱛᱚᱵᱳᱱ ᱪᱩᱯᱩᱫ ᱯᱚᱴᱚᱢ᱿

ᱛᱷᱤᱨᱫᱚ ᱵᱟᱝᱵᱳᱱ ᱛᱟᱦᱮᱸᱱᱟ ᱠᱟᱹᱢᱤᱨᱮᱵᱳᱱ ᱞᱟᱜᱟᱜ
ᱫᱩᱠ ᱦᱟᱨᱠᱮᱛ ᱦᱤᱡᱩᱜ ᱨᱮᱦᱚᱸ ᱵᱟᱝᱜᱮᱵᱳᱱ ᱵᱷᱟᱜᱟᱜ᱿

ননল রেয়াঃ লৗড়হৗয়

ননল রেয়াঃ লৗড়হৗয়
—-কুনৗমি

লৗড়হৗয় দ বাঞচাঃ লৗগিৎ বৗঞ হিড়িঞা তিসহঁ।
ইঞ বাডায়াকাৎ-আ ইঞৗঃ সুক বাং-এম ঞেল সাহাও দাড়েয়াঃ কানা
আয়মাধাও ইঞরেন হাপড়ামকো আমেম ডিগলৗও আকাৎ কওয়া ডিঁডৗ ভিটৗ খন।
রেচ্ আকাৎ কওয়াম ওনকোয়াঃ আরজাও ধন দুরিব আর জানাম দিসম রেয়াঃ অৗইদৗর।
নিতহঁম রিকৗয়েদা সানাম অৗইদৗর আমাঃ তি~রে চুপুৎ এসেদ লৗগিৎ।

মেনখান অহকেয়াম।
ইঞৗঃ ননল ডগতে এতহব্ আকাদৗঞ পুষ বোংগা রেয়াঃ রেয়াড় লৗড়হৗয়।
মিৎমাহা হিলোঃ দ সানাম নাচার নাহাচার হচওয়াকান উদৗরকো বুঝৗও ঞামা ইঞৗঃ সারকাথা।
এনহিলোঃ দ আমাঃ অলতল সাসেত অৗইন কৗনুন রেয়াঃ আঁগরা তেগে লাসেরঃ-আ আলে সানাম কওয়াঃ মিৎ বিতৗ হৗতয়ৗর।
রাঁওয়াঃ-আ আম বিরুদ ধিতকৗর ধিতকৗর
সৗরি রেয়াঃগে উন দ হোয়োঃ-আ জিতকৗর
আলেয়াঃ জাওরাঃকান দুক আম হাপেনেম হৗর
আমাঃহঁ জরঃ-আ সেবেচ্ সেবেচ্ উদগৗর।
রেচ্ রুওয়ৗড় মেয়ালে দিসম রেয়াঃ অৗইদৗর
আর বাংলে তাঁহেনা নিতলেকা এনানলেকা উদৗর
আমাঃ কাথাগে মুচৗৎ অৗইন অনাদ বাং তাঁহেনা
আলে বাঞচাও দহ লৗগিৎ আমাঃ মেৎদাঃ লিঁগিনা।
সংআলে হোয়ামা রেয়াড় লৗড়হৗয় রেয়াঃ কুড়ৗয়
আমহঁম মেনা আলে সাঁওতে মানওয়া ধরম হিতলৗয়
সৗরিধরম হিতলৗয়, মানওয়া ধরম হিতলৗয়, সৗরিধরম হিতলৗয়।।

রেনেশাঁস

রেনেশাঁস

হেমাল হিঁসিদ হাঁসদা

ইঞৗঃ দিশম ভারত দিশম
হুনৗর পৗরসি,হুনৌর ধরম ;
গেল সেরমা তায়ম-তায়ম
নাসাঃ কানা ইঞৗঃ ভরম !!

জৗততেমা ইঞ দ সান্তাড়
হুনৗর গেতিঞ ইঞৗঃ মান্তার,
হুনৗর গেতিঞ ধরম-করম
অকারিঞ অলা ”সৗরিধরম”?

ইঞৗঃ দিশম ভারত দিশম
হুনৗর জৗতি, হুনৗর ধরম;
আয়মা জৗতি অল এদকো ধরম
ইঞ বেতার দ বানুঃ “কলম”!!

ইঞ সান্তাড় রাঃগৗঞ অকারে
অকয় ঠেনিঞ চালাঃ ,হায়রে !
ভারত আয়োরেন টুয়ৗর হপণাঃ হক
এড়েঞ কানকো জুগ খন জুগ !!

ভারত দিশম রেন এটাঃ জৗতক লেকা
ইঞৗঃ অৗইদৗর অকারিঞ খজা,
রিলৗমালা ভারত দিশম তালারে
অল সানাঞ ওপরোম নাগামরে ।।

ধৗরতি রেনাঃ মঞ্চপুরিরে লৗড়হৗই
অকয় দ ভাগে,অকয় দক কৗই
জৗত,ধরম,পৗরসিতে জৗতাঃ ওপরোম
উনিয়াঃগে নাগামরে তাঁহেনা ঞুতুম ।।

ইঞৗঃ দিশম ভারত দিশম
”সৗরি”,”সান্তাড়” ইঞৗঃ ঞুতুম,
গেল সেরমা তায়ম-তায়ম
ঞুতুমদ অলঃ,বাং লেখাঃ ধরম !!

ভারত আয়োরেন এটাঃ হপনকোঠেন
অৗডিলেকা অৗডিধাও ইঞ মেন,
অকয়াঃহঁ বৗঃনুঃ মেদ লুতুর
ভারত আয়ো ! তিসচ হিজুঃ গুর ।।

ইঞৗঃ দিশম ভারত দিশম
হুনৗর পৗরসি হুনৗর ধরম ;
গেল সেরমা তায়ম-তায়ম
নাশাঃ কানা ইঞৗঃ ভরম ।।

গেল সেরমা ছাডা-ছাডা ভারত সরকার
লেখাকয় মৗনমি আতো,বাজার-শাহার
গটা ধৗরতি কো ঞেল-”ভারত সেনশাঁস”
এহো! সান্তাড়, মান্তারদ-”রেনেশাঁস-রেনেশাঁস ।।”

ᱚᱞᱯᱮ ᱥᱮᱨᱮᱧᱯᱮ

ᱫᱟᱥᱚᱨᱚᱛᱷᱤ ᱢᱟᱹᱡᱷᱤ

ᱚᱞᱯᱮ, ᱚᱞᱯᱮ, ᱚᱞ ᱤᱫᱤᱭ ᱛᱟᱵᱳᱱᱯᱮ
ᱥᱮᱨᱮᱧᱯᱮ, ᱥᱮᱨᱮᱧᱯᱮ ᱥᱮᱨᱮᱧ ᱛᱳᱸᱜᱮᱭ ᱛᱟᱵᱳᱱᱯᱮ᱿
ᱚᱞᱛᱮᱜᱮ ᱥᱚᱫᱚᱨᱜᱼᱟ ᱡᱟᱹᱛᱤ ᱫᱷᱚᱨᱚᱢ ᱵᱷᱟᱵᱽᱱᱟ
ᱠᱮᱴᱮᱡᱚᱜᱼᱟ ᱵᱤᱥᱤᱡᱟᱝ, ᱛᱤ ᱡᱟᱝᱜᱟ ᱫᱟᱵᱽᱱᱟ᱿
ᱡᱟᱸᱦᱟᱭ ᱡᱟᱹᱛᱤᱭᱟᱜ ᱛᱤᱻᱨᱮ ᱢᱮᱱᱟᱜᱛᱟᱭᱟ ᱠᱚᱞᱚᱢ
ᱜᱚᱴᱟ ᱫᱷᱟᱹᱨᱛᱤᱨᱮ ᱧᱮᱞᱚᱜᱛᱟᱭᱟ ᱩᱱᱤᱭᱟᱜ ᱪᱤᱸᱠᱟᱹᱬ ᱢᱚᱞᱚᱝ᱿
ᱡᱟᱸᱦᱟᱭ ᱡᱟᱹᱛᱤᱭᱟᱜ ᱨᱩ ᱨᱟᱦᱟ ᱥᱮᱨᱮᱧ ᱫᱩᱨᱟᱹᱝ ᱛᱳᱸᱜᱮᱜᱼᱟ
ᱚᱱᱟ ᱥᱟᱶᱛᱟᱨᱮ ᱫᱚ ᱫᱩᱠ ᱦᱟᱨᱠᱮᱛ ᱵᱟᱝᱜᱮᱪᱚ ᱡᱟᱸᱜᱮᱜᱼᱟ᱿
ᱥᱮᱨᱮᱧ ᱨᱮᱜᱮ ᱵᱩᱡᱷᱟᱹᱜᱼᱟ ᱞᱟᱠᱪᱟᱨ ᱛᱤᱱᱟᱹᱜ ᱠᱮᱴᱮᱡᱼᱟ
ᱟᱹᱨᱤᱪᱟᱹᱞᱤ, ᱨᱟᱹᱭᱨᱤᱛ ᱵᱳᱜᱮ ᱡᱩᱫᱟᱹ ᱥᱮᱴᱮᱡᱼᱟ᱿
ᱚᱞᱯᱮ ᱚᱞᱯᱮ ᱚᱞ ᱤᱫᱤᱭ ᱛᱟᱵᱳᱱᱯᱮ
ᱥᱮᱨᱮᱧᱯᱮ, ᱥᱮᱨᱮᱧᱯᱮ ᱥᱮᱨᱮᱧ ᱛᱳᱸᱜᱮᱭ ᱛᱟᱵᱳᱱᱯᱮ᱿
ᱟᱞᱚᱥᱮᱯᱮ ᱟᱹᱲᱤᱥᱚᱜ, ᱟᱞᱚᱥᱮᱯᱮ ᱦᱤᱫᱤᱡᱚᱜ
ᱚᱞ ᱟᱨ ᱥᱮᱨᱮᱧ ᱛᱮᱜᱮ ᱢᱚᱱᱮ ᱡᱤᱣᱤ ᱠᱤᱫᱤᱡᱚᱜ᱿
ᱴᱩᱰᱟᱹᱜᱽᱯᱮ ᱠᱚᱞᱚᱢ ᱨᱮᱸᱛᱟᱭᱯᱮ ᱵᱟᱱᱟᱢ
ᱱᱚᱣᱟᱛᱮᱵᱳᱱ ᱡᱩᱢᱤᱫᱚᱜᱼᱟ ᱟᱵᱳ ᱦᱚᱲᱠᱚ ᱥᱟᱱᱟᱢ᱿

ᱚᱞᱚᱜ ᱫᱮᱞᱟᱵᱚᱱ

✍️✍️✍️ ᱦᱩᱞᱜᱟ.ᱨᱤᱭᱟ.


ᱚᱞᱚᱜ ᱵᱟ.ᱵᱩ ᱪᱚᱞᱚᱵᱚᱱ
ᱚᱞᱚᱜ ᱵᱮᱜᱚᱨ ᱪᱮᱫᱜᱮ ᱵᱟ.ᱱᱩᱜ !
ᱚᱞᱚᱜ ᱢᱟ.ᱭ ᱫᱮᱞᱟᱵᱚᱱ
ᱚᱞᱚᱜ ᱵᱮᱜᱚᱨ ᱪᱮᱫᱜᱮ ᱵᱟ.ᱱᱩᱜ !
ᱚᱞᱚᱜ ᱪᱮᱢᱟᱫᱠᱳ ᱫᱚ
ᱫᱤᱥᱚᱢ ᱫᱚᱠᱳ ᱪᱟᱞᱟᱣᱮᱫ
ᱫᱤᱥᱚᱢ ᱫᱤᱥᱚᱢᱠᱳ ᱫᱟᱬᱟᱭᱮᱫ !
ᱵᱩᱜᱤ ᱵᱟᱹᱲᱤᱡ ᱠᱟᱹᱢᱤᱦᱚᱨᱟ
ᱡᱷᱚᱛᱚᱢᱜᱮᱠᱳ ᱥᱟᱞᱟᱜᱚᱴᱟᱭᱮᱫ !
ᱥᱟᱶᱛᱟ ᱠᱟᱹᱢᱤ ᱫᱤᱥᱚᱢ ᱠᱟᱹᱢᱤ
ᱫᱤᱚᱢ ᱦᱚᱲ ᱢᱟ.ᱱ ᱛᱩᱞᱩᱡ
ᱥᱟᱢᱟᱝ ᱛᱷᱚᱠ ᱨᱮᱠᱳ ᱫᱚᱦᱚᱭᱮᱫ ᱠᱳ !
ᱟᱯᱮᱠᱳ ᱦᱚᱸ ᱵᱟᱵᱩ, ᱢᱟ.ᱭ ᱫᱮᱞᱟ
ᱚᱞᱚᱜ ᱟᱠᱷᱲᱟᱛᱮ
ᱚᱞᱚᱜ ᱯᱟᱲᱦᱟᱣᱜᱮᱭ ᱫᱟᱲᱮᱭᱟᱜ
ᱰᱟ.ᱱ ᱰᱟ.ᱯᱟ.ᱱ ᱟᱱᱫᱷᱟ ᱯᱟ.ᱛᱭᱟ.ᱣ
ᱢᱩᱪᱟ.ᱫ ᱨᱮᱱᱟᱜ ᱠᱟᱹᱢᱤᱦᱚᱨᱟ
ᱥᱩᱞᱩᱠ ᱥᱟ.ᱜᱟ.ᱭ ᱫᱚᱠᱳ ᱡᱤᱭᱟ.ᱲ ᱫᱚᱦᱚᱭ !!

Baidyanath Hansda
Mamurda : Jhargram
Date:17/09/2020

ᱥᱟᱰᱮ

ᱫᱟᱥᱚᱨᱚᱛᱷᱤ ᱢᱟᱹᱡᱷᱤ


ᱤᱧᱟᱹᱜ ᱠᱚᱲᱟᱢ ᱵᱷᱤᱛᱨᱤ ᱠᱷᱚᱱᱟᱜ
ᱢᱤᱫᱴᱟᱝ ᱥᱟᱰᱮ ᱦᱤᱡᱩᱜᱼᱟ,
ᱢᱤᱫᱴᱟᱝ ᱥᱟᱰᱮ ᱦᱤᱡᱩᱜᱼᱟ
ᱤᱧᱟᱹᱜ ᱠᱚᱲᱟᱢ ᱵᱷᱤᱛᱨᱤ ᱠᱷᱚᱱᱟᱜ
ᱞᱮᱛᱟᱲᱜᱮ, ᱞᱟᱹᱜᱟᱹᱲᱜᱮ
ᱞᱟᱹᱜᱟᱹᱲᱜᱮ, ᱞᱮᱛᱟᱲᱜᱮ
ᱯᱟᱹᱪ ᱪᱟᱞᱟᱜ ᱨᱮᱱᱟᱜ
ᱯᱟᱹᱪᱷᱞᱟᱹᱣ ᱧᱩᱨᱩᱜ ᱨᱮᱱᱟᱜ᱿

ᱟᱹᱰᱤ ᱦᱚᱲᱠᱳ ᱢᱤᱛᱟᱹᱧ ᱠᱟᱱᱟ
ᱫᱷᱟᱹᱨᱛᱤ ᱯᱟᱞᱴᱟᱜ ᱠᱟᱱᱟ
ᱟᱹᱰᱤᱡᱳᱨ ᱧᱤᱨᱟᱜ ᱠᱟᱱᱟ
ᱟᱢᱦᱚᱸ ᱯᱟᱞᱴᱟᱜᱢᱮ
ᱟᱢᱦᱚᱸ ᱧᱤᱨᱟᱜᱢᱮ
ᱵᱟᱝᱠᱷᱟᱱ ᱛᱟᱭᱚᱢ ᱩᱛᱟᱹᱨᱚᱜᱼᱟᱢ
ᱵᱟᱝᱠᱷᱟᱱ ᱢᱟᱞᱚᱴ ᱩᱛᱟᱹᱨᱚᱜᱼᱟᱢ᱿

ᱪᱟᱞᱟᱠᱚᱜ ᱢᱮ
ᱵᱩᱨᱫᱷᱤ ᱜᱮᱭᱟᱱ ᱵᱟᱹᱲᱛᱤᱭ ᱛᱟᱢ,
ᱪᱤᱨᱜᱟᱹᱞᱚᱜ ᱢᱮ
ᱢᱟᱨᱮ ᱥᱟᱯᱟᱵᱠᱳ ᱜᱤᱰᱤ ᱠᱟᱛᱮᱫ
ᱱᱟᱣᱟ ᱥᱟᱯᱟᱵ ᱟᱯᱱᱟᱨ ᱢᱮ
ᱪᱷᱤᱱᱜᱟᱹᱣ, ᱪᱷᱤᱱᱛᱟᱹᱭ ᱥᱮᱬᱟᱭᱢᱮ
ᱮᱴᱟᱜᱠᱳ ᱮᱲᱮ ᱵᱷᱩᱬᱩᱡ ᱨᱮᱱᱟᱜ ᱢᱟᱱᱛᱟᱨ ᱵᱮᱱᱟᱣᱢᱮ᱾
ᱱᱮᱛᱟᱨ ᱫᱚ ᱯᱷᱤᱛᱟᱹ ᱛᱮᱠᱳ ᱢᱟᱯᱟᱯ ᱠᱟᱱᱟ
ᱟᱢ ᱛᱤᱱᱟᱹᱜᱼᱮᱢ ᱡᱮᱞᱮᱧᱼᱟ,
ᱟᱢ ᱛᱤᱱᱟᱹᱜᱼᱮᱢ ᱚᱥᱟᱨᱼᱟ,
ᱳᱡᱚᱱᱮᱫ ᱢᱮᱭᱟᱠᱳ ᱮᱴᱟᱜᱠᱳ ᱥᱟᱞᱟᱜ,
ᱟᱢ ᱢᱤᱫ ᱥᱮᱫ
ᱟᱨ ᱜᱚᱴᱟ ᱫᱷᱟᱹᱨᱛᱤ ᱟᱨ ᱢᱤᱫ ᱥᱮᱫ᱾

ᱟᱢᱟᱜ ᱜᱷᱟᱨᱚᱧᱡᱽ ᱫᱷᱤᱸᱜᱟᱹᱞ ᱥᱟᱸᱜᱟᱞ ᱠᱟᱛᱮᱫ
ᱩᱰᱩᱠ ᱩᱛᱟᱹᱨᱚᱜᱼᱟᱢ,
ᱱᱟᱣᱟ ᱪᱤᱨ ᱥᱟᱵᱽᱼᱟᱢ?
ᱥᱮ ᱵᱟᱹᱭᱨᱤᱠᱳ ᱛᱮᱜᱮᱱᱮᱲᱮ ᱠᱟᱛᱮᱫ
ᱜᱮᱨ ᱵᱤᱫᱽᱞᱟᱹᱭ ᱛᱟᱢᱟᱠᱳ ᱦᱚᱲᱢᱚ ᱥᱟᱶᱟᱨ!
ᱠᱩᱠᱢᱩ ᱨᱮᱱᱟᱜ ᱫᱚᱨᱭᱟᱨᱮ
ᱯᱟᱱᱤᱰᱩᱵᱟᱹ ᱞᱮᱠᱟᱧ ᱩᱴᱩᱰᱩᱵᱩᱜ ᱠᱟᱱᱟ
ᱛᱟᱭᱟᱝ, ᱵᱤᱧ, ᱥᱤᱠᱟᱹᱨᱤ ᱫᱚᱨᱭᱟ ᱫᱟᱜ
ᱡᱚᱛᱚ ᱯᱷᱟᱸᱫᱟ ᱯᱟᱹᱥᱤᱨ ᱠᱟᱛᱮᱫ
ᱵᱟᱧᱪᱟᱣ ᱛᱟᱦᱮᱸᱱ ᱦᱳᱭᱳᱜ ᱛᱤᱧᱟᱹ᱾
ᱥᱟᱰᱮ ᱥᱟᱸᱜᱮ ᱦᱤᱡᱩᱜ ᱠᱟᱱᱟ
ᱵᱟᱹᱭᱨᱤ ᱠᱚᱣᱟᱜ ᱪᱟᱦᱞᱟ ᱟᱛᱮᱱ ᱧᱟᱢᱟᱹᱧ,
ᱤᱧᱟᱹᱜ ᱠᱚᱲᱟᱢ ᱵᱷᱤᱛᱨᱤ ᱠᱷᱚᱱᱟᱜᱦᱚᱸ
ᱢᱤᱫᱴᱟᱝ ᱥᱟᱰᱮ ᱦᱤᱡᱩᱜ ᱠᱟᱱᱟ
ᱞᱮᱛᱟᱲᱜᱮ, ᱞᱟᱹᱜᱟᱹᱲᱜᱮ
ᱠᱤᱨᱤᱭᱟᱹ ᱟᱛᱟᱝ ᱨᱮᱱᱟᱜ,
ᱜᱚᱜ ᱵᱷᱟᱹᱨᱭᱟᱹ ᱨᱮᱱᱟᱜ
ᱞᱮᱛᱟᱲᱜᱮ, ᱞᱟᱹᱜᱟᱹᱲᱜᱮᱹᱹᱹᱹᱹᱹᱹᱹᱹᱹ᱿

ᱠᱟᱹᱭ

ᱪᱩᱵᱟᱹᱜ

ᱟᱢᱫᱚ ᱛᱤᱨᱞᱟᱹ ᱡᱷᱟᱨᱱᱟ
ᱡᱟᱸᱦᱟᱠᱷᱚᱱ ᱦᱤᱡᱩᱜᱼᱟᱠᱳ ᱯᱷᱟᱨᱱᱟ᱿
ᱟᱢᱟᱜ ᱚᱱᱟ ᱨᱤᱞᱟᱹᱢᱟᱞᱟ ᱫᱟᱜ ᱧᱮᱞᱛᱮ
ᱫᱩᱲᱩᱵ ᱠᱚᱣᱟᱢ ᱪᱮᱦᱨᱟᱛᱮ᱿
ᱨᱚᱯᱚᱲᱟᱵᱮᱱ ᱵᱷᱟᱹᱞᱤ ᱵᱟᱹᱲᱤᱡ
ᱦᱚᱲᱢᱚᱵᱮᱱ ᱦᱮᱞᱠᱟᱣ ᱟᱵᱮᱱᱟᱜ᱿
ᱟᱬᱜᱳ ᱠᱚᱣᱟᱢ ᱰᱟᱹᱰᱤᱨᱮ
ᱯᱟᱭᱨᱟ ᱵᱟᱰᱟᱭ ᱦᱚᱲᱫᱚ ᱢᱟᱥᱮ
ᱵᱟᱭ ᱟᱹᱭᱠᱟᱹᱣ ᱠᱚᱥᱴᱚ ᱱᱟᱥᱮ
ᱞᱚᱦᱚᱫᱚᱜᱼᱟᱭ ᱠᱟᱹᱴᱤᱡ
ᱛᱩᱯᱩᱱ ᱞᱚᱦᱚᱫ ᱞᱮᱟᱠᱭ ᱵᱩᱡᱷᱟᱹᱣ᱿
ᱯᱟᱭᱨᱟ ᱠᱟᱛᱮᱫ ᱵᱚᱰᱮ ᱞᱮᱱᱠᱷᱟᱱ
ᱧᱮᱞᱚᱜᱼᱟ ᱚᱨᱡᱚ ᱟᱢ ᱪᱮᱛᱟᱱ
ᱩᱱᱜᱮ ᱟᱢᱮᱢ ᱵᱩᱡᱷᱟᱹᱣᱼᱟ ᱫᱟᱹᱭ
ᱠᱟᱹᱢᱤ ᱨᱮᱱᱟᱜ ᱠᱟᱹᱭ᱿

« Older Entries